|
زوجي بيتوتي ويتهمني بأهمالة
السلام عليكم ورحمه الله وبركاته
أعزائي ...كل عام وانتم بخير بقرب عيد الفطر المبارك هذي اول مشاركه لي في المنتدى وبصراحه استفدت كثيررررر وقررت اني اسجل واعرض مشكلتي لتساعدوني عندي مشكلتين مترابطه ببعض الاولى..البارح لما كنت اشتغل وارتب البيت زوجي قالي ...انتي ماتجلسي معي وتتحججي بتنظيف البيت والشغل والثانيه...عمل زوجي ومللي من جلوسه بالبيت وكلها مرتبطه ببعض قلت له والله من الصبح واحنا متقابلين وبعدين البيت لازم له تنظيف وشغل وطبخ وغيره انا عارفه بتقولون هذا زوجك اجلسي معه والبيت لاحقه على تنظيفه او اذا طلع للعمل استغلي عدم وجوده بالبيت وخلصي كل شي عندك علشان اذا رجع تكونين متفضيه ليه صح بـــــــــــــس اذا كان زوجي 24 ساعه في البيت؟؟؟ ايش اسوي متى التفت للبيت ونفسي وبنتي .. وانا من النوع الي ما احب اشتغل وزوجي يكون بالبيت احب اخذ راحتي وهو كذا على باله اني ما ابغي اجلس معاه طيب عطني فرصه عطيني وقت ارتب ..اجهز ..واشتاق ..وافقدك.. نفسي مثل الحريم الي ازواجهم يطلعون الصباح ويرجعون الظهر يحسسني وضعه ما كانه مثل باقي الرجال وهذا الوضع جدا تاعبني من زمان زوجي عمل مافيه يقعد يومين بالبيت ويوم يداوم 24 ساعه بس هو يداوم 6 ساعات بالكثير ويرجع ياجالس على التلفزيون او النت مايعطيني فرصه التفت لنفسي شوي اتضبط قبل مايجي <<<اكيد الحريم فاهمين على دائم متواجد حتى والله السواليف تخلص انام ونصحى ونفطرونجلس.... روتين ممل وربي بديت أمل واخاف من هالوضع لاني لاحظت مشاكلنا كثرت حتى على اتفه شي... واخرها البارح لما قالي ((انتي ماتجلسي معي وتتحججي بتنظيف البيت والشغل)) وهو مايدري انه سبب كل هالمشاكل حتى اذا بعزم صاحباتي اشوف اليوم الي يكون عنده استلام مررره تعبت من هالوضع بس ايش اسوي مش حلوه اقوله ليش جلستك في البيت كثيره جدااا متعبني نظام عمله ومش عارفه كيف اقوله ؟؟ساعدوني انتظر ردودكم |
حببتي انت في نعمة تتغبط عليها كثير من النساءء قولي الحمدالله زوجك يحب يجلس معك غيرك دايما لاهي عنها - او مسافر او عصبي او بخييل او راعي خرابيط كل جدام عينك شي جمييل ولا تدلعي حاولي تلهينه في شي اذا كان عنك شغل مثل برنامج يحبة او خلي اخوه او اخوك يسير عليكم وانت روحي اخذي راحتك او عطية شغله بالبيت مثلا يركب لوحة او مرايا يصبغ طوفة - الرجال تحب تشتغل في ادوات البيت نجارة كهربا .......الخ شوفي شنو ميوله ... ودوري القنوات اللي على هواة مثل قناة ثقافية......صناعية ... اخبارية.... سيارات ... دينية ....افلام ... اقل برنامج يأخذ ساعة تقريبا .... يكفيكي تاخذي راحتك فيها..... عن الدلع بكرة تندمي ...خلى يتعود على قربك .. علشان ما يقدر لاسمح الله على فراقك |
ياقلبي انتي في نعمه احمدي الله عليها . انا اتمنى زوجي يجلس معايه ولا حتى يقولي تعالي . ولما اجي اجلس معاه يقلي ما عندك شغل تسوينه قومي شوفي العيال ولا المطبخ ولا اي شي . عيشي حياتك وانا عندي زوجي اهم من اي شي خلي الدنيا تضرب تقلب ما يهمني .
|
حبيباتي اللي تقول انها في نعمه انا اقول لكم
انه كل شي زاد عاب يعني الزايد اخو الناقص انا زوجي 24 ساعه بالبيت نسرق شغل البيت بالغصب كل النهار اتركي تشتغلي بعدين ما في اجمل من ان الرجال يشتغل ويرجع البيت الله يعين ثم حبيبتي اجلسي قربه لحين يمل اتدللي عليه وغنجيه وخصوصا اذا الاولاد بالمدرسه البسي من غير تشفير |
يابنت الحلال أنتي في نعمة
أنا ابقولك عن قصة 3 أيام صمت بيني وبين زوجتي ما اكلمها ولا اناظر فيها تدرين ليش لأنها منشغله عني يومين زيارة لاهلها واذا رجعت تجلس تقرا القران وتنام اليوم الثالث اللي هو قبل امس المغرب جالسه تغسل وتكوي وبعدين لما خلصت جلست تقرأ قران وراحت تصلي القيام ورجعت وقرأت قران ونامت انا حسيت بفراغ كبير تمنيت ادخل مواقع الدردشة او البالتوك واتعرف على بنات لكن ما ابغى اقرب للحرام وكنت اسلي نفسي بأي شي هذا كله بسبب انشغال المدام عني اكيد بعضكم يقول انها تقرأ قرآن وتغسل وتكوي واحمد ربك اقول ايه ميخالف لكن هي تروح عند اهلها 10 ساعات وما تقرأ قران واذا جت عندي قعدت تقرأ قران ؟!!! =-============ المهم انتي تفرغي لزوجك وحاولي اذا نام تسوين شغلك من غسل وكي وتنظيف وغيره روتين الحياة جددي فيه ألعبي معه بلاي ستيشن او أونو أو تصفحي المواقع انتي وياه وشوفوا وتناقشوا وعلى فكرة انا مثل زوجك بيتوتي وخاصه بالاجازة لاني معلم وطلعاتي ما تطول يعني ساعتين او 3 والباقي بالبيت وبس |
سبحان الله انا عكسك واخرتها اليوم الفجر زعلت منه
لانه كل يوم ماشوفه غير ساعتين الله يسهلها علينا |
أهلا أختي العزيزة
الحمد الله مشكلتك بسيطة وتهون عند غيرها "كبريها تكبر صغريها تصغر" انتي تحتاجين لأشياء تشغلين فيها زوجك مثلا خليه يشترك في نادي رياضة او ينظم لعمل خير بعد الدوام او خليه يشتغل معك بأشغال البيت خليه يجلي المواعين وحافظي انتي على نعومة ايدك اجلسي معاه حتى لو ماتتكلمون عن شيء نامي في حظنه وانسي الدنيا واذا انتي متمللة من الروتين بدعي له في كل شيء سوي حركات عند الريوق وحاولي تخلين المفاجئات بعد رجعته من الدوام حتى تقدرين تجهزين لها برواق واذا تبين تجهزين له وهو موجود قفلي عليش الحجرة وسوي الا تبينه او صرفيه برى البيت لدقايق مثلا جيب الشئ الفلاني من السوبر ماركت او جيب عشا من المطعم خصصي يوم واحد من كل اسبوع تتطلعون في طلعة عالمية تنسون الدنيا فيها يعني حاولي انتي تغيرين من الروتين ببعض الحركات واشكري الله على النعمة واحمديه على ما اعطاك ترا في زوجات يتمنون يشوفون أزواجهم ساعة بالبيت تحياتي |
خليه يشاركك بشغل البيت
وصدقيني اذا هو يحبك - واظنه يحبك - سيكون مستمتع معك بمشاركتك شغل البيت |
اقتباس:
مو على كل حال الوحده تقد تشتغل والزوج نايم لان ممكن الصوت يزعج |
اخوي انا كذا
ممكن توضح شلون اتصفح وياه مواقع ع النت ايش نوع المواقع وانا احس الواحد اذا قعد ع النت ما يحب احد يطل عليه ====== اختي دوام الحال من المحال ولكن بحمد الله تدوم النعم اكيد انتي توك باول سنتين زواج الرجال ليما الحين حاب الجلسه والله بعدين بينشغل وبتدورينه شوفي اذا كان موجود عطيه بنته وروحي ادهري بعمرك واستغلي وجوده باشياء كثيره |
الله يحفظها عليكي نعمة ويحفظها من الزوال
اما انا زوجي بيموت في الخروج طبعا شغل عنده وانا واثقة اني شغل الله يحفظهولي احيانا اقول له امتى ننزل اجازة في وطني علشان نجلس مع بعض امتى نفطر مع بعض ونتغدى في معاد مظبوط والله حبيبتي بحلم بكده ربنا يخليك زوجك واوعي تحسسيه بالزهأ علشن ميتضايقش منك زوجك حبيبك من غيره لاتسوين شئ صدقيني ولا انا بدون زوجي اسوى شئ الله يرزق بنات المسلمين جميعا |
شدعوه مافيه حدايق مافيه ملاهي
ما تلعبون مع البنوته بنتكم وش احلى من هالجو العائلي قولي له اعرف حديقه يروحون لها صديقاتي مع عيالهم ودي نروح لها الله يعافيك خل البنت تغير جو من هالبيت والمدينه بنروح نطلع لجو نقي شوي وبالحديقه خليه يشتري كورة من اللي تنفخ ويعطيها للبنت ويلعبها وتنبسطون لا تفكرين حالياً انه يطلع من البيت ويروح لأصدقاء سبحان الله ممكن يعجبه الجو وتصبحين نسياً منسيا وسعي صدرك وصدر بنتك وصدره هو بعد بطلعات عائليه جو عائلي مرح انا كل اسبوع قبل رمضان اطلع انا وزوجتي الحالنا للبر نشوي ونجلس نتقهوى ونتسامر ونرجع للبيت هلكانين من التعب ونووووووووووووووووووووووووووووووم جربي وان شاء الله تتغير اجواءكم |
اشكر كل من رد على موضوعي
وكنت متوقعه راح تقولون احمدي ربك انتي في نعمه الحمدلله وكتبته في البدايه قبل ماتردون بس زوجي 24 ساعه في البيت واذا طلع شوي ويرجع كل صباح اصحى الاقيه بالبيت والحمدلله هذا شي حلو انه يجلس بالبيت بس الشي ان زاد عن حده انقلب ضده نفسي يطلع مثل باقي الرجال للعمل يرجع الظهر نظام عمله بالاسبوع يومين فقط وليته يداوم مثل الناس لا كم ساعه ويرجع مافيه جديد ماعنده جديد وانا ماقصرت في كل شي حتى فالبيت احاول اغير الاجواء نفسي انه يغير من روتينه شوي سالت كم وحده تخيلي اذا زوجك يجلس 24 ساعه فالبيت ؟؟ وكان ردهم صح نتمنى يجلس بس مو طول الوقت وياليت كل وحده تحط نفسها مكاني وتعيش الوضع كيف ؟ |
أنا معك أختي , الوضع فعلا ممل
لامجال للإشتياق و لاتجدد المواضيع البعض يقول احمدي ربك و الحمد لله على كل حال لكن بالنسبة لزوجك ألا يشعر بالملل أو ناوي يغير من نمط عمله أو وظيفته أو يشوف له مشروع او عمل اضافي لازم يكون فيه دافع داخلي عنده للقيام بذلك و إذا ما عنده تحتاجين لطريقة ذكية لإدخال فكرة مشروع او عمل .. لأنه صعب تطلبي منه ,,حتى لايفهم أنك زهقانة من تواجده الدائـــم عموما هناك حل آخر بأن تشغلي أنت نفسك عنه بعمل او دراسة حتى تغيري نمط الحياة إذا كان راضي و ظروفك تسمح |
اقتباس:
مع كـلام الأخ الكريـم ما فـي أحـلـى من إشراك الزوج بأعمال بسيطة بالبيت، خـاصة انه ممكن تصير مواقـف مضحكة من جهته وأنت يمكن بعد كذا تقلقين او تخافين يخرب عليك شغلك، وتطلبي منه يـطلع....:d عزوبي:21: بس:d رجل:30: |
الروتين دائما يسبب الملل
عليكما ان تزيلا هذا الروتين بالسفر الى أحد المدن للنزهة وتغيير الاجواء اطلبي من زوجك ان يعمل اعمال اضافية تدر عليه دخلا جيدا كأن يعمل في مكتب عقاري ونحو ذلك اطلبي منه ان يسجل في نادي رياضي وقت العصر مثلا كي يتدرب ويقضي على الفراغ أذهبي الى اهلك وغيبي عدة ايام من اجل القضاء على الروتين |
| الساعة الآن 04:01 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©