|
تسعين بالميه ماراح احضر العيد !
كل عآم وأنتم بخير ..
كل عآم وأنتم بصحة وسلآمة ورآحة بآل .. تقبل الله منآ ومنكم صآلح الأقوال والأعمآل .. يانآس إلى متى أمثل وآجآمل .. تعبت اتحمل و آظهر غير ما قلبي يحمل .. رحت للمسجد دعيت بكيت استخرت نفسي كارهه الروحه .. يآآه مآأقرب الأمس من اليوم .. وجآء عيد الفطر .. عيدالفطر اللي قبل المآضي كنت عروسة .. وعيد الفطر المآضي كنت معلقة ومحد درى من الأقآرب .. وعيد هالسنة الله يعيده علينا وعليكم ,, صرت مطلقة بكل فخر .. شلون أروح وأجامل خلق الله وآنا مالي نفس بشئ .. مالي نفس بالحياة بكبرهآ .. جآملت الوالدة شريت وجهزت للعيد أغلى وأفخم شئ .. طيب وبعدين!! أنا هي آنا .. و حبيبي شريتله بدل الطقم أربعة كل واحد آحلى من الثآني .. نفس الشئ وبعدين!! وين الشئ الحلو بكل اللي قلته أو أقوله !! أعرف ان حديثتي أصبح بلا معنى .. بس وربي يآنآس تعبت.. مدري فيه أحد منكم مثلي جاه هالشعور وهالتفكير ! الحمد لله على كل حآل.. آدري إن تخلفت عن الإجتمآع العآئلي .. سيحزن من يحبني وكل من حولي .. وآخشى أن يٌقآل آي شئ .. ويروح تمثيلي كل الفترة اللي مضت بلا جدوى .. طيب والحل .. ؟؟ آتمنى ماأضيق صدر الوالدة الله لايحرمني منهآ .. بس خلاص احس صرت مكشوفه .. عيوني وصمتي يفضحني ..وآخاف تخوني كلمآتي .. بعد مآكآنت البسمة والكلمة الحلوة ماتطيح من شفآتي .. آدري ..أزعجتكم .. أدري قلبت مزآجكم .. آدري ماباليد حيلة .. بس وش أسوي ما ودي أروح والله .. وش السواة ؟ دعوآتكم |
مدري مافهمت هل قصدك انك ساترة سالفة انك مطلقه
ليه هل بقلبك امل لرجوعه لك ؟ |
السلام عليكم
حياك الله يا عزيزتي اقتباس:
فعلاً أول سنة بعد طلاقي ما حضرت اجتماع العائلة الرئيسي صباح اليوم الأول لكن في اليوم الثاني حضرت لأن الحفل موسع و في قاعة فكان أشبه بالزواج ربما تشجعت أذهب لآن مافيه سوالف خاصة كل مجموعة على طاولة مثل الزواجات عموماً أنا ما تخلفت عن الحضور من أجل الناس اللي عندهم الاجتماع بل هم ناس فيهم خير و أجواد و لا أزكيهم على الله لكن يمكن احساسي بالحزن لسى في ذروته خصوصاً في العام اللي قبله كنت عروس و كان زوجي يفضل أن أكون متواجدة صباح اليوم الأول شأني شأن بقية نساء عائلته و هالشي تم في عيد الفطر و الأضحى يعني صار لي حياتي الخاصة ,, و فجأة صرت مطلقه و رجعت لأهلي -حفظهم الله تعالى- أمي كانت تضايق و والدي كان يبيني ما أعيش في عزلة بس في نفس الوقت خلولي مساحة للتأقلم يعني مثلا إذا رضوا مرة مو معناته كل مرة يرضون إني ما أروح حطي في بالك أول سنة بعد الفراق ماهي سهلة عادة ممكن تتذكرين زوجك السابق كل مارحتي مكان كنتي تروحينه معه سوق أو منتزه أو لما تشترين حاجة تحبينها و كان يجيبها لك بس نصيحة مني لك لا تستسلمين للهموم اسمعي مني يا اختي (بعد الاستعانة بالله و التوكل عليه) إذا تركتي الاستغراق في الذكريات و حطيتي في بالك انك تقدرين تعيشين واقعك مثل ماهو بدون زوجك السابق بإذن الله بترتاحيــــــــن و تعيشين مثل ما كنتي قبل الزواج (مع ظروف الحاضر) أختي :- عاشقة الرياض ليه تقولين : تعبت اتحمل و آظهر غير ما قلبي يحمل .. ليه ما تكونين انتي من جوى مثل مانتي ظاهرياً أنصحك استمتعي بوقتك استمتعي بالعيد أظهري الفرحة بنعمة الله و احتسبي الأجر تزيني و تأنقي و اهتمي بصغيرك مثل ماانتي ما قصرت في توفير حاجاته المادية وفري له الراحة من خلال اظهار سعادتك حتى و ان كان صغير ترى الطفل يحس بأمه أتمنى تبشريني قبل العيد انك ناوية تبذلين جهدك عشان تستانسين و تستانس الوالده أتمنى هالشي ,, لا تنسيني (: أسأل الله أن يسعد قلبك و أن يعوضكِ خيراً اللهم آمين |
هلا( عاشقة) تقبل الله منا ومنك ..
يكفي حضورك من أجل الوالدة وخاطرها >> بيفرج الله همك ..ويوسع صدرك ... ليه ما تبين تحضرين : ** تتوقعين بتصيرين أسعد إذا جلست بالبيت ما أتوقع ... **أو تعبت من التمثيل >>> ترى ابتسامتك ومحاولة إخفاء ألمك قوة وصمود ومع الوقت بتصير ابتسامتك حقيقة ومن داخل .. بالنسبة لي بعد طلاقي بإسبوعين صارت مناسبة كبيييييرة وحضرتها .. لا وكنت قاصة شعري بعد ... حقيقة ما أدري هل كنت أُمثل !! أو توني ما استوعبت الصدمة مع إني أنا الي طالبة الطلاق !!! أتمنى تبشرينا بروحتك يوم العيد والله يفرج عنا وعنك .. |
احضري عشان امك تراها شايله همك لاتحملينهياه زياده
وعسى ربي يعوضك |
كان الله في عونك وابدلك الله بخيراً منه يارب
|
حاسه فيك وحاسه بوالدتك ووالدك
علشان خاطرهم روحي مثل مااستعديتي ربي راح يهونها عليك لأنك ارضيتي والدينك وصدقيني الضيق والزعل حتى لو أنه غصب عنك ماراح يفيد ربي كاتب لك خير جديد والمستقبل قدامك الله يسعدك ويوفقك ويشرح صدرك وييسر أمرك ويخلي لك ولدك ويفتح لك أبواب رحمته ويرزقك من حيث لاتحتسبي . |
عزيزتي الفرح في العيد ولبس الجديد شكل من اشكال العباده لله
عزيزتي يمر بنا احداث واوقات صعبه في العيد لكن لازم مانستسلم لها انا مر بي من سنتين وقت صعب يبدو لي اصعب من وضعك والى الان وانا احمد ربي اني ما استسلمت ورحت العيد اول ماحصل خلاف مع طليقي وطلبت الطلاق حرمني من اطفالي (الكبير وقتها كان عمره اربع سنوات والصغيره سنه ونصف) من نصف شعبان وبعد الواسطات من الاقارب ومحاولات عديده جوني في24 رمضان ثلاث ايام بس على اساس انهم بيرجعون لى مره ثانيه قبل العيد لكن اخلفو وعدهم ( ام طليقي هي المسيطره ومعاها شخص اخر مقوين طليقي على هالحركه )ومانفذو الاتفاق وراح لهم شخص اخر من اقاربنا يوم العيد الصباح وبعد ردوه انا كنت زيك رافضه اروح لاجتماع العيد اولا مو عيد بدون اولادي ثانيا احس لو شفت جدت عيالي باذبحها والود ودي اقطعها باسناني لكن ابوي كان يحاول يقنعني وكل شوي يعطيني امل مره ليله العيد ومره يوم العيد الصباح واخر شيء قال بيجيبونهم معهم اذا جو لاجتماع العيد ( طليقي من اقاربي ) لو تشوفيني وانا اجهز للعيد وانا اختار جزمتي اعزكم الله كان باخر الكعب معدن اول ما جاء ببالي تنفع اكسر راس جدتهم به يوم العيد ( من حر مافيني من سواياها بالرغم من اني كنت افضل زوجات اولادها لها وسويت لها اللى ماسوه عيالها وهالكلام بشهادتها ) اما فستان بنتي كنت ابي اجربه عليها و انتظرها تجي لكن لما فقدت الامل تجي قبل العيد رحت اشتريه ولقيت المحل شايل الخصم وشريته باغلى عشان البسها في نفس قاعة الاجتماع على اساس بيجون مع جدتهم وعماتهم ولا اعرف وش بيلبسونها اما الولد اكيد ثوب وكنت ادعي ربي في رمضان كان من حرمني من اطفالي يقصد اذلالي بهم فيارب تخزيه بين الله وخلقه عاجل وغير اجل ورحت العيد وكيس بنتي معي فيه الفستان والجزمه والبكله وكلي امل لكن جو بدونهم رفضت اسلم عليهم او حتى اطالعهم وابعد عن المكان اللي هم فيه لاني كنت ماسكه نفسي على الاخر لاقوم واذبحهم لاني وعدت ابوي اني اكون عند حسن ظنه واكون مبتسمه وما اخليهم ينتصرون علي والله اني اكتب ودموعي تنزل لما تذكرت ذيك اللحظات لكن الشيء الوحيد اللي اسعدني والى الان اتذكره وجه جدتهم وشلون كانت تتمنى الارض تنشق وتبلعها واذا مريت انا وامي من جهتها تحط راسها بالارض استجاب ربي دعائي واختزت بين كل اقاربنا لما عرفو السالفه والى يومك ماتجي للعيد عزمي حبيبتي وروحي واحتسبي الاجر في طاعة ربك ورضى امك |
الله يحييك أخيتي الغآلية آطيـــــآف ((ليه ما تكونين انتي من جوى مثل مانتي ظاهرياً )) ^^ حآولت وآحآول وسأبقى أحآول... ربك يبلد الإحساس ونكون بلآمشآعر يآرب ((ممكن تتذكرين زوجك السابق كل مارحتي مكان كنتي تروحينه معه سوق أو منتزه أو لما تشترين حاجة تحبينها و كان يجيبها لك ))) تعرفين رغم حنآنه لما يكون بوضعه الطبيعي وروعة تعآمله وأعرف تماما انني لن يمر علي مثله بحبه اللامتناهي ..ولم اسمع ان زوجآ سعوديآ ... يغسل عن زوجته الآواني .. او ينظف البيت ودورآت الميآه من طيب خآطر.. ويبخر السيارة قبل تركب زوجته..وغيرهآآآآ اشياء بسيطه .. لكن ماسمعت بأحد ممن ااعرف ... لكن كل هذا تلآشى آختفى والله من ذآكرتي مقآبل لحظة من لحظآت الرعب والعنف اللتي رأيتها .. فعندمآ تنبني له مكآنة بلحظها يسحقها وتتحول الى رعب ونفور ... أعرف اسهبت ... لكن قصدي من هذا تصدقين عمره مامر بخآطري هالكلآم الا لما قريت كلمآتك .. اتذكر الكلمآت المؤلمة ,, والخوف وبس.. مدري هو جحود هو رحمة من ربي ان لا اتذكر سوى السلبيآت.. وبالنسبة للأمآآكن إجمالآ صرت لااحب الخروج والتسوق اذا ذهبت للسوق اشتري مااحتاج وماقد احتاااج لآتجنب العودة للسوق وآرى النآس ... لا آعلم يمكن صرت معقدة الله يستر ( : *********** بس يآآخيتي بنآء على نصيحتك وعلشآن خاطر كبيرة السن الحنونة .. آبشرك جآري التجهيز للذهآب وعسى ماآتندم .. لا حرمني الله اخوتكن .. وعسى عيدك سعيـــــــد الله يوفقك يآرب |
هلآ وغلآ بشيهآنه ..
(((ترى ابتسامتك ومحاولة إخفاء ألمك قوة وصمود ومع الوقت بتصير ابتسامتك حقيقة ومن داخل ..)))) الله يسمع منــكـ... ويزيدك من فضله ونصير مثلك بطلآت : ) وعيدك سعيد الله يوفقك يآرب |
ورد وذبل الحلم الضآئع غآلية اللهم آمين ...بآرك الله فيكم وبآعمآلكم الصآلحة .. صدقتوا الله يسعدكم .. عيدكن سعيد والله يوفقكن يآرب : ) |
غآليتي زهرة نجــد : (( الفرح في العيد ولبس الجديد شكل من اشكال العباده لله)) ^ اللهم إننا محتسبين يآرب لاتحرمنآ الآجر .. أخيتي نصرك الله على من آراد كيدك ... وآثرك عليهم ,,من وآسع فضله ... ((ورحت العيد وكيس بنتي معي فيه الفستان والجزمه والبكله وكلي امل لكن جو بدونهم !! )) ^^^ انفطر قلبي عليك والله ونزلت دموعي حسييييييت بإحساسك... كيف قدروآ!!! ... يآرب لانزع الرحمة من قلوبنآ!!... حسبي الله ونعم الوكيل بمن ظلمك ..الله يعوضك بخيرويسعدك ولا يحرمك من ورودك ابدآآآآآآآ .. **** طمنيني عن البنوته والولد الآن تشوفينهم ؟ وكيف آخذوهم وهم رضع بعمر الحضآنة ؟؟؟ ** وعسى أعيـــــــــــــآدك سعيدة..تحضنين فيها صغآرك والله يوفقك : ) |
هلا اختي عاشقة الرياض سبحان الله كأنك تتكلمين عني انا هذا اول عيد وانا مطلقة والسنة الماضية كنت
عروسة !!!!! بالنسبة لمشاعرك هذا شي طبيعي تمر فيه كل منطلقة لكن انا انصحك تحضرين ترى اذا حضرتي خلاص راح ينكسر هالحاجز!!!! انا قبل شهر كان فيه مناسبة بسيطة ومن ضمن الحضور ام زوجي وكنت رافضه اني اروح بس اشارت علي صديقتي اني اروح مع اني ماشفت منه الا كل خير بس مادري كنت اتذكر يوم كنت عنده وكان يجيني حنين لذيك الايام فقررت اروح وسبحان الله الله يسره وحمدت ربي ---- فا انصحك روحي والايام كفيلة تنسيك وتداوي جروحك والحمدلله ان كل شي يبدا صغير وينتهي كبير الا المصيبة تبدا كبيرة وتنتهي صغيرة!!!! موفقة والله يعوضك خير------- |
دموعي نزلت حبيبتي وأنا أقرأ ردك...
أنا أيضا حرمت من خطيبي بأسلوب دنئ وهين...حسبي الله على الظالمين حسبي الله على الظالمين حسبي الله على الظالمين الله يقر أعيننا قريبا يا رب...آآآآمين.. |
حيآك الله آخيتي حنين للأمل ... اللهم آميييييين .. ويوفقك ويسعدك ..وعسى عيدك وآيامك كلهآ سعآدة .. آنا عند حسن ظن عبدي بي .. اللهم إننا متوكلين عليه .. لكن يبقى في الدوآخل أموور .... الله يسمح كل مأأستصعب علينآ ... وبالتوفيق يارب : ) |
sabra2009
آقر الله عينك بالزوج الصآلح الحنون .. وعيدك سعيد .. والله يوفقك : ) |
السلام عليكم ورحمة الله وبركاته..,,,
ما شاء الاخواااات الحبيبات مقصروا معاج بالرد...بس حبيت اضيف يا اختي العزيزة كل ماتشوفين وحدة من قريباتج تذكري انهن مايخلن من الهم...مافي احد ما يحاتي بدنياه..!!! مو بس انتي بروحج... ( لا يكلف الله نفس إلا وسعها ) خلي الاية هذي في بالج دايما تطلقتي وبإذن الله راح تتجاوزين هالأزمة بارادة قوية ونجاح...الحزن والنجوى من الشيطان ليشغلنا وينسينا ان الله ارحم لنا من امهاتنا واقرب الينا من حبل الوريد...كل ما وصلتي لمرحلة ماتطقين فيها نفسج روحي بسرعة وضي وصلي ركعتين لله واشكي له الحال والحي على الله عز وجل بالدعاااء وبإذنه تعالى لن يردج صفر اليدين.. لاتفكرين انج وحيدة !! دايما خلي في بالج ان الله معاج وماراح يخليج...كرريها في بالج دايما وبشوفين الفرق تأكدي ان ما اصابج ماكان ليخطأج وان الخيرة دائما فيما اختاره الله لكِ...!!! لاتعطين بال ابدا للوسواس الخناس وقهريه مثل ما قاعد يقهرج..بقراءة سورة الناس الطلاق مو نهاية الحياة...بل قد تكون بداية لحياة جديدة تفتح لكِ...مفتاحها اكثرة لاستغفار والدعاء عسى الله يفرج همي وهمج ويجعل لنا من كل خير نصيييب اللهم امين يارب العالمين..,,, |
اختي عاشقه الرياض
ليش تحرمين نفسك السعاده والانبساط عشان الناس الطلاق مب عيب ولاحرام وترا هذا الامر ربي قدره عليك من يوم انك في بطن امك ليش تسخطين وتتعرضين اذا كنتي خايفه من نظره الناس لك صدقيني هذي اوهام وتحسين نفسك ان الكل يتكلموا عليكي وهي مجرد اوهاااام كل واحد عنده مشاكله ومشغول فيها بس فكري كم شخص بيستانس لما يشوفك تضحكين ومبسوطه بالذات امك على الاقل روحي بنية انك تسعدين امك الغاليه اللي كثير ضحّت وتعبت عشانك وماعليك من كلام الناس وراح تاخذي اجر تفريح المسلم بأذن الله بس لاحظت انك كثير متشائمه حسب كلامك انك لسا صغيره وعندك طفل استمتعي بكل لحظه من شبابك ولاتخلين الاوهام والهواجس تدمر حياتك انسي الماضي كله واللي باعك بيعيه لاتضيعين اي لحظه من لحظات يومك بالتفكير في اللي تخلوا عنك فكري بأبنك الله يحفظه لك وفكري كيف بتربينه واشغلي نفسك معاه ولاتجعلين نفسك في دائره الحزن معظم الامراض العضويه لها سبب نفسي ترا النفسيه تؤثر بشكل كبير على صحتك انصحك يالغاليه فكري بالاشياء الحلوه اللي صارت لك بحياتك واحمدي ربك عليها وتأكدي باذن الله ان القادم احلى واجمل الله تعالى يقول في الحديث القدسي (بما معناه) انا عند ظن عبدي بي فليظن بي مايشاء والمعنى اذا تفائلتي بشي جيد ربي يحققه لك اسأل الله العظيم ان يعوضك بزوج يعرف قيمتك ويقدرك ياحي ياقيوم ويحفظ لك ولدك ويسعد قلبك اسفه طولت في الكلام بس والله ماسجلت الا يوم شفت موضوعك |
الاعضــاء كتبوا ماكنت أود قوله
أسأل الله أن يجعل لك من كل هم مخرجـــا... وأن يكتب لك السعـــاده أينما كنتي... فولله حزنـــت كثيرا لكلمـــاتك... |
اقتباس:
عاشقة الرياض ,, قولي آمين أسأل الله أن يسعد قلبك و أن يجزيكِ خيراً حقاً فرحت من قلبي عندما كتبت أنك تجهزين نفسك ( إيوه يختي كذا وسعي صدرك و على قولة شيهانة حتى وان كنتي تتظاهرين بالبداية و تحاولين هالشي بإذن الله بيكون حقيقي من قلبك ,, انتي ابذلي الأسباب و توكلي على الله ) كل عام و أنت بخير يا عزيزتي بانتظارك هنا لكي نعرف منك آخر أخبارك حفظك الله |
الله يريح بالك ويسعدك يااااااااااااااااااااااااااااااااااااااااااارب ويعوضك خير يا الغالية
|
حبيبتي عاشقة الرياض /
أنا أول عيد يمر علي وانا مطلقة وحامل بعد يعني همي همين والحمدلله الله يعوضني خير منه لا ياأختي حرام لاتضيقين صدر والدتك وانت مجهزه للعيد وبعدين اذا مارحتي راح تسمحين لنفسك بالتدريج بالعزلة وانت ماتدرين وتكوني اعتزلتي الناس لاياعمري روحي وحاولي تضحكي وتفرفشي أنا مطلقة مثلك وموكله امري لله حاولي تتقبلين حياتك الجديدة انبسطي وافرحي واجتمعي بالناس ولاتفرحين عدوينك فيك واستغلي كل لحظة وكل دقيقة من حياتك بسعة صدر وحب وفرح كفاية أيام الحزن وكفايه من أوجاع الزمن حرام والله لنفسنا علينا حق وصدقيني الله بيعوضك خير وبيسعدك والطلاق صدمه وجرح انا حاسه فيك بس مع الوقت بتندمل الجراح ياقلبي الله يفرج همومنا جميعا & |
أمل@ نورا123 (( حيآك آخيتي شرفنا انضمامك لنآ )) آطيآف ني ني 2004 رسيل الأموره همس الاصيل **** اللهم آمين .. بوركتم آخيآتي ووفقكم الرحمن .. وجزيتم عني خير الجزآء ,, تقبلوا أرق التحآيا.. |
انسي الماضي وعيشي حياتك بالامل والتفأول واحضري المناسبات واظهري ابتسامتك لتثبيتي لمن حولك انك قوية ولم تتضرري بما حصل وابحثر عن بر والدتك واسعدي ابنك
عوضك الله خيرا واسعدك ورزقك ماتتمنين |
آخيتي سحآبة الصحراء .. اللهم آميييييين .. آمطرت سحآبتك بالبشآئر عليك غآليتي وعلى كل أخييآتنا هنا ..وعوضنآ خيرآ .. |
| الساعة الآن 12:31 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©