|
زوجي يتحكم بلبسي
السلام عليكم ورحمة الله وبركاته ..
انا مسجله بهالموقع الرائع واستفدت منه اشياء كثيرة الله يعافيكم .. والحين انا جاية اعرض عليكم مشكلتي .. انا وزوجي عايشين حياتنا خلوة والحمدلله .. هو يحبني وانا احبه .. لكن لازم فيه اشياء تكدر صفوها شوي .. مشكلتنا اللي من يوم تزوجنا الى الحين .. لنا سنتين .. هي اللبس .. زوجي ملتزم ولله الحمد .. دينه يعجبني ولكن بعض الاحيان اقول هذا متشدد بقوووووه .. ويسوي اشياء بعض الاحيان اللي مو ملتزمين ما يسوونها .. هو يقرأ كثييييير .. ويعرف الاحكام الشرعيه بالمذاهب كلها .. يعني اذا قلت له وش حكم كذا .. قال بالمذهب الفلاني كذا وبالمذهب الفلاني كذا .. وهو بعض الاحيان يأخذ حكم من كذا مذهب .. المهم .. انا الحمدلله ملتزمه وكل الناس يشهدون لي بكذا .. من قبل ما اتزوج ما احب البس اي لبس عندي حدود يعني .. هو ما اعجبته حدودي .. مع ان خالتي الله يحفظها مررررررررررة مطوعة حنا نسميها الصحابية ما شا الله عليها .. دايما تمدحني .. تقول لي اني اقول لبناتي شوفوا فلانه(انا) ماشا الله لبسها حلو وساتر .. اقرب شي يوم العيد .. قالتها لي .. انا ما علي انا مقتنعة باللي البسه انا .. اول ما تزوجنا قال لي معليش حبيبتي ما ابغاك تلبسين بنطلون عند اخوانك .. مع ان البلوزة اللي مع البنطلون الى الركبه يعني زي البنجابي اللي كثير من المشايخ حللوه .. وقلت له انا على عيني وراااااسي .. احب غيرتك وانت تامر بس .. ومن يوم قال لي وانا ما البس بنطلون .. والحين مشكلة التنورة .. والله انها نص الساق او اطول بعد .. كل ما شافني البسها ضاق صدره وانقلب مزاجه وحااااااله .. والحين طايح بحركة وهي العقاب حسيت اني بزر عنده .. اول عقاب يوم اني بالنفاس .. جا لي اول مرة كنت لابسه له فستان النفاس ابكشخ له يعني .. كمه شفاف ومدري ايش ما قال لي الله يجنن عليك .. على طول .. كمه مدري وش فيه وووووو ساااالفة .. وعاقبني باييييش .. ماعطاني طلاعه بعد النفاس .. يعني هديه النفاس .. يوم قلت له قال لي انتي م تسوين اللي انا ابي .. يعني بهاذا الاسلوب ابنفذ بالعكس والله اعاند .. المشكله انه فشلني عند اهلي .. اول مولود لنا ولا يجيب لي هديه النفاس والله عيييييييب .. ما شا الله بعض الرجال يسفرون زوجاتهم يجيبون لهم اطقم ذهب .. اما زوجي ولاااااااااا شي .. ويقوووول انه يحبني مووووت ويعشقني ومن هالكلام .. واقولكم حاجه هو يسويها اتحدى واحد ما يستغرب .. انتم عمركم شفتوا احد يروح لصلاة الجمعة ببدله .. انا اول ما لبس بدله اول مرة انهبللللللت .. اللي اعرفه انا واهلي وكل الناس يسوونه ان الرجال يقوم الصباح ويتروش وزوجته تطله له لبسه وتجهز البخور له وهو يطلع من الحمام ويلبس لبسه النظيف وثوبه ويتبخر ويمشي .. هو لا ذاك اليوم ما تروش ولا شي .. قام من النوم ولبس البدله ومشى .. انا استغربت مررررررة وكنت قايمه ابجهز البخور قال لا لا مو لازم عطر يكفي .. بعد كذا قلت له يعني احس انه ما يصلح الواحد يطلع للجمعه لابس بدله .. احس عيب .. قال البدله اكشخ من الثوب .. مع اني انا اشوف العكس .. الثوب مرررة يعجبني عليه . وصار ما يلبس بدله للجمعه عشاني .. وانا ما لبست بنطلون عشانه .. المهم بأيام العيد لبست تنورة قصيره بنظره .. وهي والله ميدي اقصر من الطويله بشبر وقسما .. شافني فيها وتغير وجهه واااااضح .. ومن بكرا لبس بدله للجمعه .. يعني عقاااب لي .. قلت له انا خلاص راح ارجع البس بنطلون اذا كانت الدعوى كذا .. البسي والا ابلبس .. الله يعين بس .. ابغى حل لهالمشكلة .. لان مشاكلنا كللللللللها عشان اللبس وهذا حرام وهذا ما يصلح .. هو لو يعاملني باسلوب ويدعي والله استجيب له .. لكن الله يصلحه يارب .. اقول الحق هو اذا صرنا متصالحين مرررررررة يعاملني حلو ويشيلني من فوق الارض .. وانا اعامله احلى .. لكن مشكلة اللبس .. والحريم يعرفون الاسواق وحتى زوجي يعرف .. 5 محلات ما تبيع تنانير ومحل يبيع تنانير قصيرة مرررررررة .. يعني من وين اجيب تنانير .. وكم مرة اشوف تنورة تعجبني مرررررررة لكن اتركها عشانها قصيرة يعني انا اعرف حدودي .. ابغى هو يثق فيني ويخليني براحتي باللبس .. هو قال لي عن العبايه قال غطي عيونك صرت اغطيها سواء رحت معه او مع اهلي .. لانه من حقه ويغار علي .. لكن اللبس ابغى اصير برااااحتي .. الله يفرج عليكم .. |
والله لو مكانك
أمشي على هواه منها تبتعدي عن الشبهات ومنها ترضي زوجك اللي يستاهل يعني التعدد حلال بس ماترضين يسويه تقبلي حدوده بالتوفيق ياعسل |
حتى لو بغيت امشي على مزاجه ..
من وين اجيب تنانير طويله وحلوة .. يعني التنانير القصيرة موديلاتها احلى بكثييييير .. كل التنانير الطويله قلييييييييل تلقين حلوة .. انا ما اقول ما عندي تنانير طويله بالعكس الطويله اكثر .. بس الواحد وده يغير شوي .. : ) |
لا تشترين الجاهز
فصلي على هواه يا غالية يا كثر الخياطين اشتري الخام وفصلي تنانير طويلة وفساتين طويلة انا زوجي مثل زوجك ما يرضى بالقصير إلا ببيتنا لحالنا وفي لبس معين ما يحب يشوفه علي قدام حتى اخواتي وما يرضى وهو مو ملتزم جدا لكن عاداتهم كذا لكني تأقلمت .. وتعودت لا تكبري الأمور .. خلي لبسك للبنطلون والتنانير والشفاف له لحاله وبغرفة النوم سوي لك جلسة بغرفتكم فيها تلفزيون ومكان لكم اثنينكم بدون ازعاجات حد واذا طلعتي التزمي باللي هو يحبه |
انه الي فهمته انو حته قدامه ما يقبل بهل البس ؟؟؟ او انا غلطانه لانك قلتي من شافك لابسه شفاف ما قبل
حبيبتي المسأله جدااااا بسيطه هو مو طالب منك شيء مستحيل والصفات الي عندك زوجك الحمد الله كلها زينه بس كل رجل واله طبع خاص وانتي لازم تتعودين على طبعه وسوي مثل ما يريد ماله داعي الجدال وتصير فجوه بينكم يعني الزوجه دائما هي من يتنازل في كثير من الامور فأنتي لا تعاندين معاه وخاصه انه يسمع كلامك كما قلتي فليش ما تقوليله مثل ما تحب وتسوين الي يرضيه ,,, وبعد ما يكون هادي وصافيه من ناحيتك وضحيله وجهة نضرك اذا اقتنع كان بها واذا ما اتقنع خلاص شنو تسوي يعني مشاكل علمود هكذا شغله تبين انها صغيره ولكن اذا اخذت مجرى عناد ومشاكل راح تكبر فأنتي اتحكمي بالموضوع قبل لا يكبر براس زوجك ومبروك عـ البيبي ومن يهده عاتبيه عـ الهديه بحب وقوليله الي بخاطرك بس "بحب" لا تقوليله فشلت قدام اهلي ومن هاي الكلام بس قوليله انته الي مو حارمني من شيء وودائما تسويلي كلشي نفسي فيه ما توقعت منك ما تهديلي هديه بالنفاس تعالي معاه بالسياسه مو بالعناد ,,,, |
الله يهديكم
يا أختي مشكلتك حلها بسيط (البسي اللباس اللي يحبه زوجك ما دام إنه مباح) والمرأة يا أختي المفروض ما تلبس لباس يجذب غير زوجها مثل اللباس القصير وما دام زوجك ما يحب تلبسين قدامه لباس قصير خلاص سو اللي يبيه الشغلة ما هي وحدة بوحدة هو يسويلك وانتي تسوين له علاقتكم أرقى من كذا علاقة حب وتغافل والمسامحة على الزلة أما عن انه ما جاب لك هدية النفاس وانت تسمينها فشيلة علشان هدية يعني احنا نسامح ونعذر البعيد فليش ما نسامح القريب؟ وقفت هي على هدية؟ وين الهدايا اللي أعطاك اياها قبل؟ وين تضحياته والفلوس اللي دفعها من قبل علشانك.؟ |
اسمحيلي ولاتزعلين00وشلون يكون الى نص الساق ومايكون قصير
اجل كيف راح تربي بناتك 00بصرااحه لاتتخيلين اللبس كيف افسد علينا جمعتنا لدرجة التعب بالعكس هو من حبه لكي ينصحك 00اكسبيه ولاتعاندينه هو يبي مصلحتك الله يسخركم لبعض |
نصف الساق تقصد به الاخت المنطقة ماتحت الركبة للكعب والله اعلم
البس كذلك اختي صراحة ازا كان يرفض تلبسي قدام اهلك ومحارمك الا ماكسي و يعني ازا كان ميدي يعني اقصر من الماكسي بشبر والله غريب امره بس حاولي تقنعيه وجيبي فتاوي في حدود اللبس يعني التنورة ازا تحت الركبة بشبر او اتنين بتكون طويلة وساترة مو لازم ماكسي البنطلون يمكن معه حق لانو في شيوخ بقولو حرام بالمطلق لا امام الزواج ولا امام المحارم ولا النساء ولااحد من الاساس عشان تشبه بالغرب بس التنورة مش معقول تكون ماكسي وتجر الارض قدام ابوكي واختك !!! |
من قالك اختي لبسك موقصير ؟؟؟؟
انا بكلمك بصراحه وعشان مااكون منافقه انا مومتشدده في لبسي والبس كل شي عادي ... لكن اهل ابوي جدا ملتزمين وماشاء الله يعجبني التزامهم واتمنى اكون زيهم .... تفكيرهم نفس زوجك واكثر .... يعني البنطلون والبنجابي ممنوع قطعيا لاقدام حريم ولاقدام محارم .... والتنورة اقصر شي عندهم اذا بين الكعب بس واكثر من كذا يعتبرونه قصير واستحاله يلبسونه .... حتى الكم الشفاف هذا مرفوض عندهم قطعيا .... ماشاء الله بناتهم اللي مومتزوجات والمتزوجات كلهم نفس اللبس ونفس التدين الله يثبتهم يارب وفعلا القابض على دينه في هالزمن كالقابض على جمرة فيما معنى الحديث ,,,, وفي نفس الوقت ماشاء الله لبسهم مرة روعه وذوق .... وخاصة الموضه هالايام تنانير طويله وبلايز ساترة .... ومن قالك مافي محلات كثير تبيع تنانير طويله ... والله ان دخلت السوق ياكثرهم ..... اصلا في محلات معينه ان دخلتها اقول هذي محلات خاصة لبنات عمتي ودايم اشوف اشياء وادلهم عليها .... يااختي زي ماقلتي في مذاهب اربعه وزوجك يقرا كثير وهو يبي لك الخير والصالح وانتي لماتلبسي كذا ترضي ربك قبل لاترضيه لكن هو لمايلبس الثوب يرضيكي انتي بس لان البدله موحرام ... يعني لما ترك الثوب ولبس بدلة مايعاندك بالعكس بس يبيكي تحسين كيف كسرتي نفسه لما لبستي لبس موعاجبه .... قولي الحمدلله ان زوجك يمنعك بس من باب التدين في رجال يسوون بلاوي ويمنعون زوجاتهم من كل شي حلو عشان يتحكمون وبس |
اذا كان يمنعك من اللبس القصير قدامه هاذي مشكله ؟؟؟!!
اما اذا قدام اهلك عنده حق ... زوجك يحبك ويغار عليك ... |
انتي لبسك غلط .. اللي تقولين انه لنص الساق
اجل بهالحاله البنجابي ارحم لك من التنوره ام نص ساق ... اصلا مو حلووه كنك شاريه تنوره وكبرتي وصارت قصيره عليك ..يعني لا هي طويله ولا هي قصيره حييييييل انا ماقول لك اني مالبس انا البس بنجابي وبناطيل فوقها بلوزة طويله بس مو علطول البس اليد شفافه لما اكون مع البنات بس مرات اركب تنوره قصيره عالبنطلون لو اشتهيتها والبس قدام زوجي كل نوع .. انا اللي فهمته انه يمنعك باللبس بالخارج اانا زوجي كان يرفض بس قلت له ان اللاولاد مايشوفوني واني لو لبست بدي بدون جاكيت اخلي عباتي او حجابي علي كتوفي حاولي تكسبي ثقته واتركي اللي مايحبه ..ولو اشتهيتي البنجابي البسيه عند اهلك يكون اللبس محطوط بدولابهم بس انتبهي تتكشفي من وراه .. !!!!! واللهه يوفقكم |
الحل سهل أطيعيه خصوصا أن طلبه منطقي جدا
وهناك حاجة تغفلها كثير من النساء ألا وهي غيرة الرجل من إخوة زوجته، بعض الأزواج يغار على زوجته من إخوانها بشكل لا تتوقعه فخذي حذرك بارك الله فيك!! |
جزاكم الله خير ..
والله اقنعتوني .. لكن انا ما احب احد يتحكم بلبسي .. انا اعرف حدودي .. يعني انتم وش شعوركم اذا احد قالت البسي كذا ولا تلبسين .. خاصة ان القصير مو حرام .. حتى هو يقول لي البسي تنورة الى اطول من نص الساق .. والله اني البس نفس ما يقول واذا جيت اتناقش انا واياه شوي واجيب معي مسطرة .. هو مرررررررة دقيق بهالامور .. طيب ما يشوف احتشامي بالعباية والبس شراب سودا من قبل ما اتزوج وانا كذا .. ليش ما يثق فيني .. .. مشكورين نصايحكم حلوة .. ولا تقولون هذي عنيده .. انا ما ركبت راسي الا يوم صار يقهرني .. يعني مو اسلوب ان الواحد يقول سوي كذا والا بسوي .. |
كلكم راع ومسؤول عن رعيته...
يعني تبينه يجلب لنفسه العقاب علشان يرضيك بلبس القصير او الشفاف او غيره وبعدين اذا انتي لبستي البنجابي والتنورة القصيرة يوم عن يوم ويستدرجك الشيطان وتلبسين ملابس غير محتشمه والله يسهل دربك |
اقتباس:
قسم بالله لو شفت زوجتي طالعة بتنورة لنص الساق لآشوتها مع الباب غير مأسوف عليها لان هذا الباس يدل على اشياء كثيرة لا اريد ان اذكرها حتى لا اجرح مشاعرك لكن أتمنى تفهمين القصد يقول الرسول عليه الصلاة والسلام في وصف بعض اهل النار و نساء كاسيات عاريات ، مائلات مميلات، رءوسهن كأسنمة البخت المائلة ، لا يدخلن الجنة ولا يجدن ريحها وما اكثرهم اليوم وهذا مصداق لقول الرسول علىة الصلاة والسلام واطلعت على النار فوجدت أكثر أهلها النساء ابحثي في النت على حدود لباس المرأة المسلمة وستجدين الفتاوي الكاملة فيها . اقتباس:
توني انتبه لها الكلمة والله مصيبة اذا كنتي تعتقدين ان القصير ماهو حرام هل تقصدين ماهو حرام امام زوجك ام ماهو حرام امام الناس |
ايه القصير مو حرام امام النساااااااااااااء ..
انا وين ابروح .. لاقاربي وبس .. .. حتى هو قال لي وجاب لي فتاوى انه عادي الى نص الساق والبس اطول من نص الساق ويقول لي هذا اقصر .. .. |
يا أختي ليس المسألة حلال وحرام المسألة اكسبي زوجك بهذا الطلب العادي جدا وتنتهي المشكلة والله في نساء يقولون ياريت ألف طلب متل هذا الطلب وأكسب قلب زوجي ويصير يحبني أكثر والله ياأختي أن تركك لأشياء تحبينها من أجل زوجك طاعة له لريتفع قدرك عنده وقبل ذلك عند الله عزوجل وهذه بعض الأحاديث التي تذكر بذلك عن أبي هريرة عن النبي صلى الله عليه وسلم قال : { لو كنت آمرا لأحد أن يسجد لأحد لأمرت المرأة أن تسجد لزوجها } أخرجه الترمذي وقال حديث حسن وأخرجه أبو داود ولفظه : { لأمرت النساء أن يسجدن لأزواجهن لما جعل الله لهم عليهن من الحقوق } وفي المسند عن أنس : أن النبي صلى الله عليه وسلم قال : { لا يصلح لبشر أن يسجد لبشر ولو صلح لبشر أن يسجد لبشر لأمرت المرأة أن تسجد لزوجها ; من عظم حقه عليها والذي نفسي بيده لو كان من قدمه إلى مفرق رأسه قرحة تجري بالقيح والصديد ثم استقبلته فلحسته ما أدت حقه } وفي المسند وسنن ابن ماجه عن عائشة عن النبي صلى الله عليه وسلم قال : { لو أمرت أحدا أن يسجد لأحد لأمرت المرأة أن تسجد لزوجها ولو أن رجلا أمر امرأته أن تنقل من جبل أحمر إلى جبل أسود ومن جبل أسود إلى جبل أحمر : لكان لها أن تفعل } أي لكان حقها أن تفعل |
تدرين انا زوجي كذا وطبقت كلامه ولاعاندت ..
سنه كاامله بعد كذا صار معد يهتم يعن يوثق خلاص .. واذا بيدقق مرره مرره ..روحي لمحلات معروفه مايحتاج اقول اسمها لانها مخصصه لطبقه معينه من المجتمع لبسهم مره رايق وفخم وتيورات مره محترمه ..وطويله هذا اهم شي .. اذا مررره مالقيت قلت له شفت السوق وشفت البناطيل ..مالقيت شي حلو يضطر يوديني للمحلات هذيك واخذ اللي ابي وهو ساتر وفخخخم .. وبالمبلغ اللي اشوفه حلو بعيني:) بس زوجك والله حرام احس صفاته مره حلو لاتخربين حياتك عشان بدله !! اذا جت عالبدله بكيييفه !! انتي اللي بتصلين بالبدله ولاهو .. واذا عاقبك خليك مررره عاادي ولاكأنه مأثر فيك .. لانك اساآ ماغلطتي انتي ! وقولي له اسلوب العقاب يضحكني مرره .خخخ الله يسخركم لبعض يارب |
مو مشكله انتي فالنهاية تسوي لي يريح ريلج ودامه مو مقتنع خلاص ابعد عن الشر وغني له
تقبلي مروري |
مشكورين ويعطيكم العافية ..
ما قصرتوا .. ان شا الله انفذ اوامره .. واكسر قلبي .. تسلمون .. |
السلام عليكم ورحمة الله وبركاته
الأخت الفاضله زهرة اللافندر في الحقيقه انا من فتره طويله لم أدخل المنتدى ولكن سبحان الله دخلت فجأه الا وتطيح عيني على موضوعك أختي الفاضله القبول والفهم ان تقبل المرأه الرجال هذا يعني ان تستقبله وترضاه دون محاولة تغييره هي عندما تفعل ذلك فانه يشعر بانه مقبول لديها وهي عندما تحاول تغييره فانه يشعر انه غير مقبول عندها ان هذا المعني لايعني انها تعتقد انه كامل وخالي من النقص لكن يجب ان تعلم انها ليست هناك من اجل ان تطوره وتغير من سلوكياته وان ذلك ليس من اختصاصها بل ذلك اختصاصه ومسئوليته هو عزيزتي لقد مررت بنفس مشكلتك تقريباً بسبب اللباس كنت أغار على زوجتي غيره شديده ... كنت أعتبرها غيره ويعلم ربي انها كانت غيره اما هي كانت تعتقد انها سيطره ومراقبه وعدم ثقه ... وبسبب هذا الأفكار المتضاده كانت النتائج وخيمه لن أتحدث عنها هنا لانها تحتاج الى سرد طويل ولكن ما أحببت أن أوضحه لك قبل ان يقع الفأس بالرأس انه قد ماتعتقدين انها مشكله بسيطه في نظرك قد تتحول الى مشكله اكبر ومن ثم قد تتطور لنحصل على مالانتوقعه أطلاقاً وهو الفراق نحن الرجال يبغضنا مانشاهده على زوجاتنا وقد نكظم غيضنا لفتره ونحاول ان نتكيف ولكننا لانستطيع فهذا الكظم سوف يؤدي لامحاله الى الانفجار مستقبلاً ... بالنسبه لموضوع الهديه فانا معك في ذلك يجب عليك ان تصاريحه عما في قلبك خاصه اذا كانت حالته الماديه ميسوره فانتي زوجته وشريكته ونصفه الأخر فانتي أحق بالهديه من أي كائن أخر ... أتمنى لك حياة سعيده |
هلا اختي
والله يمكن ما رح أفيدك لأن احنا من عاداتنا ما نلبس قصير أو بدون كم الا قدام أزواجنا يعني يستحيل نلبس كذا قدام أهالينا صحيح جائز هاللبس قدام المحارم والنساء .. مادري كذا تعودنا أنا أشوف انك تحاولي تأقلمي نفسك على رغباته .. ومثل ما قالوا البنات خذي أفكار التنانير القصيرة وفصليها على طويلة احنا كذا نسوي .. اي شي نحبه في الكتالوجات والمجلات .. نفصله بتصميم ساتر موفقه حبيبتي ^_^ |
اسمعى الكلام يا لافندر
الله يهديكى زوجك يحبك ويغار عليكى لا تعملى مشاكل بدون مشاكل واعتبرى ان التحكم هذا حب زايد هو لا يريد جوهرتة يشوفها غيرة حتى لو كانوا اهلها الله يبارك بينكم تحياتى |
لافندر الله يهديك انا يلبسني برقع امام الحريم وراضية :)
قولي يا حلو اللي عندي والله الله يبارك لكم في زواجكم ولا يغير عليكم يا رب |
الفاضلة "زهرة اللافندر" ..
أنا أشبه زوجك تماما في تشدده في موضوع اللبس هذا ، و اشبهه ايضا في موضوع التدين و لكن لا اشبهه في موضوع الاشياء التي يفعلها و لا يفعلها غير الملتزمين و اطلب منك ان تذكري امثله لذلك .. أري انه لدي كل الحق في ان اشدد علي زوجتي في ارتداء الحجاب الشرعي لانه فرض و ليس مجرد سنة او تطوع او زيادة تدين، و تقصير زوجتي فيه احاسب انا معها في ذلك ، كما ان المراة الجميلة ان لم ترتدي الحجاب كما يجب لفتت انظار الرجال اليها حتي لو كانوا محارمها (لا اقصد الاب او الاخ) و من الخطأ ان تساوي بين ارتدائه البدله و بين عدم التزامك بالحجاب الشرعي ، كما ان ترك الحجاب الشرعي هو ترك احد اساسيات الاسلام مما يعطي انطباعا سيئا جدا عن من تفعل ذلك بان ايمانها ضعيف جدا و لا امان للحياة معها . انا اطالب زوجتي ان تؤدي فروض الاسلام و ليس فروعه و سننه و من ضمن هذه الفروض "الحجاب " ، و للاسف الشديد فلن استطيع الاستمرار معها مهما كنت احبها ليس اذا خلعت الحجاب بل لو استهترت فيه فقط ، لان الحجاب لا يعني عبثها بالدين فقط بل يعني ايضا عبثها بكرامتي و من تعبث بكرامتي لا تستحق حبي . و اهنئك علي ارتدائك للنقاب ، فانتي بذلك تستأصلين اي خلاف من الممكن ان ينشا بينك و بين زوجك ، و طبعا سيزيد حبه لك اضعاف و اضعاف ، فانتي بذلك تنطبق عليكي صورة فتاة احلامه . |
المشكلة اختي الكريمة انك حاطة في راسك ان زوجك هدفه التحكم فيك و مو راضية تشيلين هالفكرة من راسك ...
لو نظرتي الى الموضوع من زاوية اخرى على انه يفعل ذلك من باب الغيرة و الحب لما كانت ردة فعلك هكذا .. ثم الموضوع بسيط جداً و لا يستحق كل هذا الزعل و الخصام و حرق الاعصاب ... هو لم يطلب منكي شيئاً مستحيلاً او تعجيزياً بالذات و انتي انسانة فيكي خير كثير و تدين .. كما ان مراعاتك لرغباته تزيده حباً و تقديراً لكي .. و هذا ما حاول ان يوصله لك بلبسه للثوب في صلاة الجمعة ... فهو حب يلفت انتباهك انه مراعاتك لرغباته تزيده احتراماً و تقديراً لك ادعوا الله ان يوفقكم و يبعدكم عن الخصام و الزعل |
| الساعة الآن 10:16 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©