تعبت نفسيا وارجو النصح منكم
 

السلام عليكم ورحمه الله وبركاته.....

مشكلتي بأختصار واسمحولي اتكلم باللهجه العاميه ,,,, انا متزوج جديد لي تقريبا شهرين متزوج زواج تقليدي بحت ماعرف البنت ولا البنت تعرفني الا وقت الدخله وطبعا اعتراها خوف وصار بكي ونياح يوم دخلوني عليها ,, المهم هذا مو مشكله المشكله باختصار ماقدرت افض بكارتها الا بعد 3 ايام من الزواج مو ضعف مني بس البنت خوفها زايد مو طبيعي يعني يعني اذا اجيها تنحاش وتبكي وتقول والله بموت حرام عليك ارفق فيني ,, وانا رحمتها 3 ايام وعقبها قلت يمكن هذا دلع بنات او شي من كذا وفضيت بكارتها بعد 3 ايام بعد جهد جهيد وعقب مافضيت بكارتها قعدت بالفراش يوم كامل متواصل ماتقدر تتحرك ,, وبعدها خليتها اسبوع عشان تريح من الالم اللي فيها ويوم حاولت اجامعها ماقدرت البنت تتصدد مني وتقول بعدين بعدين ,, يعني هي تخليني اداعبها وتبادلني المداعبه وكذا بس لاجا وقت الجماع تخاف وتصيح وتبكي ,, ونسيت اقولكم اني من خذيتها للحين ما يمر يوم الا وتبكي فيه ,, والله العظيم ان معظم ملابسي الداخليه تتغرق من كحل عيونها وانا اضمها احاول اهديها مادري شفيها البنت تقول احس بشي كبير خانقني وجاثم على صدري وانا ودي فيك وابيك وابيك تاخذ حقك مني واخذ حقي بس ماقدر فيه شي يمنعني منك مادري شنو ,, المهم تفاهمت مع امها وقلتها كل شي واتفقنا نعرضها على مطوع يعني شيخ دين ,, ويقرا عليها كل يوم الى يومنا هذا وهو ماوقف قراءه كل يوم يقرا عليها نص ساعه ويقول هذا اللي فيكم اعرضا عين او سحر الله واعلم ,,, وانا تعبت نفسيا البنت مقصره معاي حيل ,, انا مو مشكله بتحمل اني ماجامعها وبصبر وبحتسب عند الله ,, بس البنت بدت تعالمني بجفاء وتكلمني من طرف خشمها ولاتقوم بواجبي لاتطبخ لاتغسل لاتكوي والله حتى كاس الماي ماتجيبه لي ,, انا اقدر اخليها تسوي هذا بس اخاف تتأثر نفسيتها والشيخ نصحني اني احاول اخلي نفسيتها كويسه عشان تستجيب للعلاج بسرعه ,,, بس انا خلاااص صبري نفذ قامت تتكلم على امي واخواتي بنفسيه مو حلوه مع انهم يخدمونها ويحشمونها وهي تحال تنزل من قيمتهم قدامي ,, انا والله تعبت ,, ولا ابي اطلقها عشان امها واخوانها ناس طيبين واحبهم واغليهم غلا محد يتوقعه ,,, امي كلمت امها يوم شافتني متضايق مع اني ماقلتلها شي بس الام تحس ,,, وقالت لامها ان ولدي متضايق وانتي يام فلان نفس اختي وتعرفين الرجال يصبرون لفتره بس مراح يصبرون طول العمر وحنا مانبي نخسركم ومن هالكلام ,,, وبعد كلام امي درت زوجتي من امها وامها صافه معاي وتقول لبنتها اي شي يقوله زوجك قولي انشالله وحاضر ,, وهي وصلت فكره لاهلها انها مظلومه وانها تسوي كل شي عشان ارضي عليها ,,, وااااااااااااخ والله مادري شقول وهذي السالفه ادري انها طويله شوي بس هذي وهي بأختصار بعد والخافي اعظم ,,,, وارجوكم اللي عنده حل لايبخل علي بشي بنصيحه او حل او حتى دعاء ,, ومشكورين وماقصرتو واسموحلنا على الاطاله

اذا مافي مانع
تذكر لنا الخافي
عشان تكتمل الصوره

كثير ومن كثرها انسا بعضها ,, بس البنت ماتصلي الا اذا امرتها ولا تسمع كلامي ,,, وتتزين اذا جينا بنطلع برا البيت وانا ملتزم ماحب كذا ,, يعني بيئتنا واهلنا مو متعودين ان البنت تتزين اذا طلعت ودايم اهاوشها على كذا انا اسكت على كل شي واتحمل الا اذا البنت تتبرج وتتعطر ووتزين ,,, طبعا انا لو اخليها على كيفها راح تتمادى وتفسر سكوتي انه ضعف مني ,, مع اني معروف عند العايله كلها ان شخصيتي قويه وحتى اخوانها قالولها كذا وهي اعترفت ان اخوانها قالو كذا ,,عطونا الحل الله يرحم والديكم

شوف اخوي
قول لها كل اللي تبيه
من عدم التبرج والتعطر الى.....اخره
وفي المقابل
عوضها عن هالشي يعني تسفرها
تطلعها بين فتره والثانيه تتمشون
هذا من واقع تجرببتي
زوجي ماكان يرضا باللي انت الحين ماترضاه على زوجتك
بمعنى كان يمنعني من احط مكياج وانا طالعه يفرض علي لبس معين لدرجة انه خلاني انقل من وظيفتي (مختلطه كانت)
وكل هذا تقبلته ليش
لانه
عوضني عن هذا كله
قام يسفرني بين كل فتره والثانيه يطلعني نتمشا يعزمني
يعني يحاول يكافئني لاني طعته
حاول بهالاسلوب مع زوجتك يمكن ينفع

والله يوفقكم

و الله أنا اللي قلبي تعب من أسلوبك معها

سامحني يا خوي ، لكن يا بخت مين بكاني و بكى علي و لا مين ضحكني و ضحك الناس علي

1 - بنت عاشت مع أمها و أبوها و لا تعرف شئ عن مسؤوليات البيت و الزوج و غيره و تعرف إنت إنه الزمن هذا مو زمن جدي و جدتي و حتى إنت مو مثل أبوك و جدك ، فطبيعي جدا إنه أي وحدة راح تتخيل الحياة الزوجية كلها رومنسية و رحلات و تمشيات و مطاعم ، مثل الأفلام

2 - لا بينكم مكالمات و لا شئ قبل الزواج ، لا تعرفها و لا تعرفك و تبغاها على طول تتعود عليك ؟
و الله العظيم إني حزنت عليها

3 - صلاتها و تبرجها ، هذا مو ذنبها ، إنت جيت و دقيت باب بيتهم و كان المفروض من البداية تتكلم مع أهلها عن الموضوع هذا و تهتم فيه و لا تبين لهم ، و لا راحت السكرة و جات الفكرة ؟

إنت وظيفتك و واجبك ألحين :
إنك تحتويها و توجهها ، إيش فايدة الإلتزام و العلم اللي عندك إن ما حاولت تنفع و تفيد زوجتك ؟

4 - أمك تكلم أمها ؟؟؟؟؟؟؟؟؟؟؟؟؟؟؟؟؟؟؟
معليه ، هذا مو تصرف شخص مسؤول و راعي لبيته ؟

أمك تحس و تشعر بك من غير ما تتكلم ، بس مالها حق تروح و تكلم أم البنت
و طبيعي زوجتك ما راح تحبهم و راح تاخد موقف و إنت اللي بتعمل و تزرع الشئ هذا بيدك

5 - إنها ما تطبخ و لا تغسل و تكوي ووو إلخ
لا تقارنها بأمك عشان هي لا تقارنك بأبوها

و كويس إنه لسه شهرين ، هناك اللي يجلسوا سنة و إنت أبدأ معاها حبة حبة و أصبر عليها

عالعموم ، حاول تكون نظرتك أوسع من كذا و اقرأ كثير عن كيفية معاملة الأنثى و التعامل مع رقتها
لا بالأوامر و النهي و غيره

و باين عليها إنها تبغاك تعطيها حب و حنان ، لكن إنت ما فهمتها و قلت إنها بس تبكي ؟؟؟؟

الله يعطيكم العافيه جميعا ,, ماقصرتو بدودكم ,,, بس انا البارحه يوم كتبت الموضوع ماكتبته بشكل كامل لاني والله العظيم اول مره اكتب في منتدى بس اقرا ,,,, يمكن الصوره ماوضحت لاختي روح الطير ,,,انا سافرت معاها شهر عسل والله العظيم وقسم بالله اني كلامي معاها كله رومانسي واني اعطف عليها واحزن انها بهالحاله ,,,, واني ماارفضلها طلب ,,, واني محتويها بكل رومانسيه وحنان بس هي كلش ولا على البال ,,, بخاطري انها تقولي حبيبي والله بخاطري هالكلمه ,,, خاطري تقولي لبيه ... خاطري تقولي ابشر ,,,, ماتعرف شي ابد من الرومانسيه ,, اخر الكلام بينا امس تذكرني انها للحين زعلانه ومنصدمه ان امي كلمت امها وتحسب اني انا اللي معلم الوالده ,,, وتقولي كلام مايلد على الخاطر ووتحن على هالموضوع كأنها تحرشني على امي ,,,,انا صراحه انقهرت يعني انا ماقضرت معاها وتحملت التعب اللي فيه واني ماجامعها للحين وصابر عليها واجد ,, وبالنسبه انج تقولين توها عروس اخوي متزوج معاي بنفس اليوم وهذي زوجته مشالله عليها تسويله كل شي وتدافع عنه وتبين لنا بحب زوجها ,, انا صراحه اغبط اخوي على زوجته الله يهنيهم انشالله واتمنا اني اصير مثلهم ,,,وعقب كلامها يوم تلوم امي على فعلتها انا انفجرت وقلت عندي عيوب غير هذي قعدت تفكر شوي وقالت لا ,, قالت انتي تبين تعايرني على هالموضوع ولج كم يوم وانتي تروحين وتردين عليه ,, وانتي مليانه عيوب انتي ماتطبخين شوفي فلانه يعني مرت اخوي شتسوي لزوجها والكل يحبها وانتي ماتقومين بواجبي الشرعي وانا مااعايرج بهذا بس ابي اذكرج اني انا اتحمل كل شي عشاني احبك واغليك ولابي هالموضوع يتكرر مره ثانيه واقفلي هالسالفه,,, قالت ودني عند امي ,, اصلا فعلا اللي قالوه عنكم وسكتت ,,, يعني قصدها عن عايلتنا ,, وهي معروف عنا ان حنا ملتزمين ورجالنا رجال مايخلون البنت على كيفها ,,, وانا مادري شنو قصدها بالضبط من كلمتها يوم تقول صدق اللي قالوه عنكم ,, وتقول اشهد ان امي سنعه وتعرف الاصول يعني تسب امي سب ضمني ,,,وانا هنا وقفت انلجمت ماعرف اتكلم ,, وتقول دام انك تقول ان هذي عيوبي ليش صابر علي وش اللي حادك ,, قصدها تقول طلقني وافتك ,,,, وانا ساكت ,,, اقول خلني اصبر يمكن تجي نتيجه ولا ربي يهديها ,,,وقمت ادعي لربي ,,, والله العظيم اني راحمها من الطلاق ,,, ادري الطلاق مو هين للبنت يكسر القلب ,,, وهي تبي تحدني على شي مابيه ,,, وانا الحين سافرت برا الكويت ادرس خارج الديره ,,, والنيه قبل الزواج اني اخذها معاي للبلد اللي ادرس فيها,,, بس مع هالمشاكل ماقدرت وامها تقول خلها عندي عشان اعالجها وياولدي اصبر وانشالله بنتي بتتسنع يعني تدري ان بنتها مقصره ,,,, ياناس انا تعبت والله تعبت مادري شسوي الليل ماقدر انامه ,, كل افكر واتخيل ,,,عطوني حل تكفون ,,,وترا انا والله مو مقصر معاها بأي شي اعطيها حب وحنان وعطف ومو مقصر معاها من النايحيه الماديه والنفسيه ,, ولابدر مني اي قصور ,,, تكفووون ساعدوني

الله يفرجها لك من عنده