تعبانه ومحتاجه مشورتكم
 

السلام عليكم ورحمة الله وبركاته

أخواني وأخواتي الأعزاء في هذا المنتدى الرائع أتمنى أن تكونوا بخير وعافيه حبيت أكتب لكم وأفضفض وآخذ رايكم بموضوع جدا مهم لأني حاسه إني تعبانه نفسيا وماني عارفه شسوي وهل اللي قاعده أفكر فيه صح ولا غلط آنه كنت كاتبه موضوعي من فتره طويله مادري يمكن بعض الأعضاء يتذكروته آنه مطلقه ألحين كملت سنتين من طلاقي طبعا ماكان لي يد بالطلاق الموضوع إني كنت ماخذه من الأقارب ورزقت منه بولد لكن عرفنا بعدين بعد السفر فيه من ولادته للخارج للعلاج إنه من ذوي الإحتياجات الخاصه وبعدها بين من تحاليلنا إن الموضوع موضوع وراثه وجينات لأنا أقارب وإن طليقي اهو حامل للمرض وآنه تحاليلي سليمه وإن لو راح ننجب أطفال بعدها راح يكونون نفس الشي أو أكثر من حالة ولدي طبعا آنه كل هذا الكلام عن التحاليل ماعرفته من طليقي إلا وقت ماصارحني بالطلاق المهم ماراح أطول عليكم قالي إحنا لازم ننفصل ماينفع نستمر مع بعض لأن لو راح نييب أطفال راح يكونون نفس الشي حاولت أفهمه إن آنه مو هامني الموضوع وإن إنته وولدي كل شي بالنسبه لي لكن قالي كلام وايد يعور القلب من هالكلام إني لازم أتزوج وأييب أخوان حق ولدي وكل من يتمناني طبعا الكلام أحس فيه مثل الصاعقه وقال حق أهلي إنه مايقدر يستمر معاي عشان راح يظلمني لأن ماراح يعطيني حقوقي كزوجه وأهو مايبي حياة زوجيه مافيها أطفال المهم طلقني وبالبدايه كانت حضانة ولدي عندي لكن بعدها كان يبي ياخذ الولد يعالجه بالخارج بالبدايه رفضت لان ماني عارفه شسوي ماكنت اقدر أفارقه ولا أحد من أهلي يقدر يروح معاي المهم صارت مشاكل على هالموضوع وعلى مواضيع ثانيه المهم بعدها رفع علي قضيه ياإما أعطيه الولد عشان يعالجه ويسافر فيه وإذا رفضت ياخذ حضانته المهم بعدها صار بينا محاكم على هالموضوع وآنه نفسيتي كانت منتهيه وإنتهى الموضوع إني عطيته حضانة ولدي لأن كان إنسان شري مستعد يتهم حتى أمي إنها بتسوي شي بالولد وطلع علي كلام إني ماأهتم فيه ولا بنظافته ولا بملابسه وبعدها سافر معاه مدة شهر والحمدلله الله صبرني وبعدها سافر معاه مره ثانيه مدة 3 أشهر وسوا له عمليه فتحه بالمعده والحمدلله ألحين وايد أفضل وألحين أهو قاعد عند أبوه في بيت خالتي وأبوه على كل اللي سواه لكن فيه ميزه إنه مستعد يسوي كل شي علشان الولد وموفر له كل شي من خادمه ودكتور علاج طبيعي إييله بالبيت وكل شي يحتاجه وآنه من عقب المحكمه كنت آخذه كل خميس وجمعه ينام عندي بس ألحين من بعد مارجع من السفر ماأقدر آخذه لأنه من بعد العمليه يعطونه حليب بس من الفتحه اللي بمعدته فالموضوع دقيق وأخاف أجرب بس الحمدلله كل يوم تقريبا أروح له وأقعد معاه والعبه وأطلع من عندهم وعلاقتي بأخته وخالتي اللي إهي أمه وايد زينه بس الموضوع ألحين من بعد السالفه الطويله اللي قلتها لكم إنه باخذ رايكم بموضوع

قبل أمس إختي قالت لي إن جارتنا قالت لها عن واحد مطلق طالب إنه يتزوج وعنده 3 أطفال عند
أمهم وعمره 31 ومدرس وصاحب صلاة قالت حق إختي تسألني إذا تقول لهم عني عشان يدقون علينا وأهلي من يومها وأهم يحنون علي إني أرضى إن الناس إيون آنه الصراحه من تطلقت وآنه رافضه فكرة الزواج وماني متقبلتها نهائيا عشان وايد أسباب منها عشان ولدي وايد أفكر آخذه عندي لو أبوه تزوج وبعدين من أحد إييب طاري الزواج جدامي وإني لازم أتزوج أقعد أبجي لأن ماأبي لكن الكل يقول مايصير تقعدين بروحج إحنا مودايمين لج بس آنه والله موفارق عندي أقعد بروحي الحمد لله موناقصني شي ابيت أهلي وآنه موظفه والصراحه يمكن ماني قادره أقول حق أحد هالشي إني أنه ليلحين أحب طليقي وأشتاق له وايد ومو قادره أمسح صورته من بالي ولا أنساه ولا قادره أمسح من ذاكرتي ذكرياتي معاه على كثر اللي سواه فيني ماني قادره أكرهه أهو على طول في بالي وكنت أتأمل بهالسنتين إني أسمع خبر إنه يبينا نرجع حق بعض لكن لا حياة لمن تنادي وخاصة الأمور بينه وبين أهلي تعقدت بزياده فمافي أمل والكل يقول لو يبي يردج جان ردج بهالسنتين وبنفس الوقت لوبقعد بدون زواج وأضيع الفرصه علي أخاف أسمع بعد جم سنه بزواجه وأنقهر ووقتها يكون راح علي الوقت والعمر وآنه ألحين عمري 27 مع إنه يقول مايبي الزواج عشان موضوع الأطفال بس ممكن ليش لأ وكنت أقول حق أهلي لوبتزوج مابي أييب أطفال لأن أحس بالذنب إن ولدي عند أبوه وأهو أولى يكون عندي وراح أعتني بهالأطفال وأهو لأ ماقدر وبعد ماني مستوعبه أكون مع شخص ثاني وآنه ألحين قعدوا أختي وأمي يقنعون فيني عشان أوافق إن الناس إيون وبالأخير عطيتهم شبه موافقه إن الناس إيون بس آنه وايد ضايق خلقي ومقموته وماودي أتزوج مع إنها فرصه وأحس لو بيون الناس بكون كئيبه شسوي عطوني رايكم والله ماني قادره أفكر وهل اللي قاعده أفكر فيه صح ولا غلط وآسفه على الإطاله
والسلام عليكم ورحمة الله وبركاته

نصيحة لوجه الله

إذا الرجل على خلق و دين وافقي و عيشي حياتك

و بالنسبة لطليقك انسي كل شي و إذا ما نسيتي تناسي
و بإذن الله بتعرفين طعم الراحة

قولي لي وش استفدتي من الهم و ش إستفدتي من الذكرى الحزينة
أنا أجاوب و أقولك: ما استفدتي تقدم تشوفينه في نفسك .. صح ؟

و بالنسبة لكلامك إنك ما تتخيلين تعتنين في عيال ثانين لك و ولدك مو عندك
فأقولك العيال هذولا إذا جو فهم بعد عيالك و بتكونين لهم أم تحبينهم مثل ما حبيتي أخوهم بإذن الله

و حتى و إن كنت موظفة و أهلك عندك حالياً
فإنت كامرأة تحتاجين رجل يدعمك , فكيف تضيعين من يدك الفرصة إذا كان المتقدم كفؤ

اتركي النظرة السوداوية
انظري للكون بنظرة حلوة
إي نعم في حياتك ألم بس بعدك عايشة على وجه هالأرض
تمتعي بالمباحات و اسعي لتكوين اسرة
و انجاب أولاد يكونون من خيرة المسلمين بإذن الله
و تعايشي مع الواقع
اعطي ولدك اللي تقدرين عليه و بلغي اللي متقدم لك انك ماراح تتخلين عنه و انه ما يضايقك في العناية فيه
بيني شروطك بوضوح و اسألي عنه و ضعي النقط على الحروف

**استخيري **
وفقك الله لكل خير

هلا وغلا بالغاليه ام عمر

كيفك مررررررررررررررررره وحشتيني وكثير في المنتدى وحشوني كويس لقيت وقت ادخل والحمد لله لقيتكم


اختي الغاليه


الحل انك تستخيري الله وتفكري بحياتك

الولد وحياته عند ابوه افضل وكذا كذا ماراح تاخذيه

وطليقك لو هو يبغاك كان قلت لك بلاش

بس هو يفكر بعقله ومعاه حق


انتي استخيري الله واسالي


كويس عن المتقدم لك والله راح يختار لك الخير وين



الله يكتب الي فيه خير لك يارب


ويشفي ولدك ويعافيه ويخليه لك يارب

الأخت الفاضله ام عمر

اوافق هذا الرأي تماما

رأيت وعايشت اسر لديهم اطفال من ذوي الاحتياجات الخاصه , لأن الوالدين اقارب
يعانون أشد انواع المعاناة والهم بسبب وضع اطفالهم , ومع كل حمل وولاده يضعوا ايديهم على قلوبهم خوفا من ان يكون الطفل القادم معاق .
لديهم اطفال طبيعيين واطفال معاقين , ولا يعلم بهمهم وتعبهم وتكاليفهم الماديه الا الله .

الأخت همس الأصيل
الله يسلمج
و بالنسبه إني أجس النبض صعب جدا خاصه قبل مده لما كنت رايحه حق ولدي عندهم كانت إخته تقولي وايد من صديقاتي يسإلوني عنج لأنهم عارفين موضوعج مع أخوي وكانت تسألني إذا تقدر تعطيهم رقمنا يعني اللي فهمته الأمل مستحيل
وشاكره لج مرورج العطر

آسفه على الخطأ في الرد السابق كنت أقصد الأخت همس الورد

الأخت العزيزه أطياف

جزاك الله خير على ردك الصراحه ريحني وايد وشاكره لك مرورك الرائع

الأخ بكر الشايب
فعلا إبني أعتبره أكبر هديه من رب العالمين
وبالرغم من إن الخطوه اللي إتخذها طليقي تجنبا لمزيد من الأسى لكن الله عالم بحالي وبنفسيتي بعدها ولحد الآن على الرغم إني كملت سنتين لكن لازم أحاول أتفاءل مثلما قلت
وأشكرك على مرورك العطر وكلامك الرائع

الأخت بكر الشايب آسفه على الخطأ وكتابة أخي بدل أختي

الأخت همس الأصيل
جزاك الله خير على كلامك وشاكره لج مرورك وإنشاء الله راح أكتب أي مستجدات

الأخت الغاليه أم السوسه
هلا وغلا فيج والله إني لما كتبت الموضوع على طول طريتي على بالي سبحان الله مادري ليش كنت حابه أشوف تعليقج على موضوعي إنتي وباقي الأعضاء الغايبين عن المنتدى مده طويله وجزاك الله خير على كلامج وشاكره لج مرورج العطر والله يخليلج أولادج يارب ويقر عينك بهم

الأخت حنين للأمل
جزاك الله خير على كلامج ونصائحك وشاكره لج مرورك العطر

الأخ الفاضل أبوحكيم

جزاك الله خير على مرورك وكلامك وفعلا العنايه بأطفال من ذوي الإحتياجات الخاصه عالم آخر لايعلم به إلا رب العالمين ولكن ألف حمد وشكر لله رب العالمين على هالهديه وآنه مقتنعه بكل هالكلام بس شسوي بنفسي كل مشاعري قاعده تصير غصبا علي

بغيت أقولكم على اللي صار وياي أمس واليوم وعطوني رايكم والله الأفكار عندي ملخبطه ومضايقه ماني عارفه شسوي
أمس قلت حق إختي خلاص دقي على المره وقولي لها موافقين إنهم يدقون يسإلون ولما كلمتها قالت لها خلاص الناس إعتذروا آنه والله ماتصدقون حتى إختي إستغربت مني كنت طايره من الوناسه إن الموضوع ماراح يتم وقلت خيره أكيد لأن رب العالمين عارف وشايف إني حدي مقموته ومختنقه ماودي أتزوج لكن اليوم بالدوام حصل لي موقف غريب قالت لي السكرتيره روحي ودي الشغل حق مكتب المديره تبي تشوفه ولما دخلت عندها كان قاعد عندها واحد بالمكتب وآنه دخلت وتكلمت معاها عن الشغل يمكن خمس دقايق ومشيت ونهائيا ماإلتفت على الشخص الموجود أبد ولا أدري شلون صاير شكله بعدها بس طلعت قالتلي السكرتيره تعالي أبي أكلمج وقالتلي إن هذا الشخص ياي يسأل عنج ويشوفج عشان موضوع خطبه وتفاجأت بعدين عرفت من التفاصيل إنه طلع نفس الشخص اللي كلمتنا عنه المره وإستغربت من الموقف مادام قالوا إعتذروا ليش ياي الدوام وهل موقفه صح ولا غلط وبعدين والله رديت إختنقت مره ثانيه وضاق خلقي حيل والله ماني عارفه ليش عكس أمس تماما كنت طايره من الفرحه إن الموضوع تكنسل وكل ما أتخيل الموقف أتذكر ويه طليقي وهالشخص اليديد أحس هذاك كنت أعرفه ومتعوده عليه لكن هذا شخص يديد ماأعرفه وكل ما أتخيل لو يصير الموضوع أحس كأن شي قاعد على قلبي من الضيقه شسوي والله ماني عارفه شوروا علي

((نصيحة اذا المتقدم لك ذو دين وخلق وافقي عليه

يمكن سبب ينسيك الالم الي انتي عايشته وتجيبين عيال بإذن الله سليمين

الله يشفي ولدك ويسعدك بالدارين))

>> أوآفق من سبقوني استخيري وتوكلي على خآلقك الذي لن يضيعك ولن يضيع صغيرك : )

اختي "ام عمر" لماذا لم يبقيكي زوجك زوجة له و يتزوج باخري معك ؟

شوفي أم عمر ..

جلسي ورتبي افكارك و بعدي عن العاطفه وعوار القلب الي جاي منها

موضوع تفكيرك في طليقك ورغبتك في الرجوع (رقم واحد )

عدم رغبتك في الزواج من جديد ( رقم اثنين )

تفكيرك في ولدك ( رقم ثلاثة )

انتي الي ذابحك انك قاعدة في وسط هالمثلث

وعشان نكون عقلانيين نمسك نقطة نقطة عشان نطلع بنتيجة مقنعة

هذي القناعة اهي الي بتخلينا نبدأ حياة جديدة متفائلة وأحلى من القديمة

لكن لو خلينا كل الافكار متراكمة على بعضها و غطيناها بغطاء عاطفي عز الله ضعنا وضيعنا أحلى سنوات عمرنا

1 / تفكيرك في طليقك ورغبتك في الرجوع له

هذي فكرة غير منطقية ابداً ابداً وكان المفروض انتي تطلبين الانفصال بعد انجاب طفل من ذوي الاحتياجات الخاصة

لأن بقاءك على ذمته معناته شيئين

أما انجاب مزيد من الاطفال المعاقين أو الي فيهم تشوه وهذا اعتبره قمة الانانية من الزوجين انهم ينجبون اطفال

من رحم المعناة والألم .. وش ذنبهم ما يكونون اصحاء .. وش ذنبهم ان امهم وابوهم انانيين وتفكيرهم غير ناضج

يفضلون بقائهم مع بعض ومتعتهم على سعادت اطفالهم

الاحتمال الثاني انك تبقين على ذمة طليقك لكنه اكيد ما يبي عيال منك .. والأكيد أنه بيتزوج غيرك عشان

ينجب اطفال اصحاء .. وهذا من حقه ..

تخيلي القهر الي تعيشينه وانك عايشة معاه بالبيت مثل الشجرة الغير مثمرة .. الي ممكن تكون ثمارها

حلوة في بيئة ثانية .. لكنها بقيت مكانها حتى شاخت

الرجل من حقه يتزوج وحدة وثنتين وثلاثة واربع .. لكن انتي إذا بقيتي على ذمته مالك إلا هو

صدقيني افضل حل كان انفصالكم لأنك بكرة راح تكرهينه لو تزوج غيرك وجاب عيال اصحاء وانتي جالسة تطالعين

العمر يمضي فيكي وتحسين بالحرمان ..

صدقيني احساس الحب الي عايشته راح ينقلب لكره وحقد لو تزوج عليكِ

زوجك كان عادل وعقلاني وحب انك تاخذين فرصتك في الحياة .. وما يبغي لك المضرة والقهر

فخلك انتي بعد عقلانية ولا تنظرين للخلف ابداً


2 / عدم رغبتك في الزواج من جديد .

طبعاً هذي الرغبة تولدت من رغبتك وأملك في الرجوع لطليقك .. وهي رغبة خاطئة وساذجة جداً

لأنني أعتقد أن مستقبلك ومألك في الحياة سيتوقف بمجرد رجوعك ..

وستبدأ معها رحلة المعناة .. اطفال مشوهين أو معاقين والذي لن يسمح بموجودهم

ثم زواجه باخرى وانجاب اطفال .. وجلوسك انتي بدون اطفال يحمونك ويقومون فيك عند الكبر

لا تفكري في اليوم .. فكري بعد 20 سنة مثلاً ... الن تحتاجي ابناء يعتنون بكِ

ام تريدين اطفال غير اصحاء يزيدون همك ويكبرونك في العمر وتموتين كل يوم قهر عليهم

أو تجلسين بدون اطفال .. ولا كأنك تزوجتي ولا شيء

لذلك اقولك فكري في الزواج بجدية بالغه و اختاري واستخيري واسألوا عن الرجل

وادرسي حياته وامكانية عيشك معه وكل شي يتعلق به

إذا كان ذو خلق ودين وطباع حسنة ويتحمل المسؤولية .. فتوكلي على الله

غداً تنسين طليقك .. وعندما تنجبين اطفال اصحاء يلعبون حولك ستعرفين كم كنتي ساذجة

عدما فكرتي في الرجوع لطليقك


3 / تفكيرك في ولدك

انا اشوف انه ماله داعي تفكرين فيه لهدرجة .. ابوه والحمد لله قد المسؤولية واهله بعد

وبعدين انفصالكم ماكان فيه مشاحنات وكره .. يعني صورتك راح تبقى حلوه في ذهن الولد

ولا بيكرهونه فيكي .. وبتشوفيه محد بيحرمك منه

انا شايفه ظروفك احسن من غيرك وفرصتك للبدء من جديد مو كل يوم تتكرر

فاغتنمي فرص الخير

هذا معناته ان الموضوع بالنسبة له ما تكنسل .. بس تصرفه غريب خاصه انه كان قادر

انه يجي بيتكم على راحته ولو ماعجبه الوضع ينهي السالفه ..

إلا إذا كان متردد وكان حاب يشوفك بدون ما تدرين عشان ما يسبب لك احراج

عموماً الايام الجاية راح تكشف تفاصيل اكثر

لكن اياً كان الرجل الثاني هذا أو شخص آخر .. فكري به جدياً

وياكِ ثم اياكِ التفكير بالرجوع لحياة خالية من اطفال

فمن حقك تنجبين اطفال اصحاء يرسمون يضيفون للحياة حلاة وينفعونك بس تكبرين

انظري لمستقبلك واتركي الوهم


طليقك رغم كل ذلك اقدم على خطوه قويه وقاسيه


الله يوفقك ويسعدك ويعوضك العوض الصالح وتجيبي اخوه لابنك

نصيحه غاليتي ام عمر اذا كان على دين وخلق فوافقي ....

وكلام الاخت باريسا ممتاز جدا ..

خذيه بالاعتبــــــــار..

الأخت عاشقة الرياض

أشكرك على مرورك العطر ونصيحتك لي وراح آخذ بالإعتبار كل كلامكم لي

الأ














الأخ good man 2000

لأنه أهو عارف مستحيل إني أرضى ولو كان قايل لي أفضل الطلاق على هالموضوع لأني مو من النوع اللي يتحمل هالموضوع وأهو قال حق أهلي وقتها إذا تبي تقعد معاي بس راح تكون مثل أي شي بالبيت ماراح أقدر أقرب لها

وشاكره لك مرورك العطر

الأخت العزيزه باريسا

أشكرك جدا على كلامك الرائع وتحليلك لكل موقف على حده وفعلا آنه عارفه وواثقه إن كلامك منطقي وصحيح مئه بالمئه وتحليلك أيضا صحيح وراح أقعد أفكر بكل الكلام اللي قلتيه وأحاول أقعد مع نفسي للتفكير بجديه وأتمنى أكون طبيعيه يارب ويرتاح قلبي من الخنقه اللي فيه وجزاك الله خير

الأخت GREEN222

أشكرك على مرورك العطر وجزاك الله خير على كلامك ونصيحتك

الأخت العزيزه رسيل الأموره

شاكره لك مرورك وجزاك الله خير على كلامك ونصيحتك و إن شاء الله راح آخذ جميع كلامكم بعين الإعتبار

انت قلت ان الامل في رجعة طليقك لك مستحيل ....
لازم تشوفين حياتك ... وابنك عند ابوه بين ايدي آمنه .....ترعاة وتخاف علية ...
بس المشكلة فيمن تقدم اليك .... المطلق ...احتمال يرد طليقتة .....
اتمنى لك حياة جديدة سعيدة .....
المطلوب منك ... ان تتأكدي ... من المتقدم لك ....
حتى لا تدخلى في هم اكبر من الهم الذي خرجتي منه .......الفرص امام كثيرة ان شا الله .....


الله يعوض عليك .. ويرزقك الزوج الصالح المخلص المحب لك .....



:17::17::17:

الله يفرج همك استخيري ياغاليه استخيري ثم استخيري

ولاتنسي الإستغفار والدعاء بجوف الليل وطرق باب من لايرد أحدآ دعاه سبحانه

دعواتي لك

الأخت سافر معي
شاكره لك مرورك العطر وجزاك الله خيرا على ماكتبتي وعلى النصيحه

الأخت ماعدت أنا
أشكر لك مرورك العطرو جزاك الله خيرا على دعواتك وطبعا الإستخاره أهم شيء وأشكرك على النصيحه

قال تعالى ( وَإِن يَتَفَرَّقَا يُغْنِ اللَّهُ كُلًّا مِّن سَعَتِهِ ۚ وَكَانَ اللَّهُ وَاسِعًا حَكِيمًا ) فاذا كان ذا خلق ودين فتوكلي على الله

الأخ كساب
أسعدني مرورك وجزاك الله خير والله يفرج همومكم مثل ما خففتوا عني بكلامكم

استخيري وانسي الماضي واذا كان الخطيب ذو صلاح توكلي على الله وابنك في امان عند ابوه وهاهو يشرف على علاجه ومهتم به

الأخت سحابة الصحراء
أسعدني مرورك وشاكره لك ذلك وإن شاء الله أنسى الماضي ياليتني أقدر بس مع إن مر وقت طويل بس كأن الموضوع من وقت قريب لحد الآن دايما أحسب نفسي عايشه بجو حياتي اللي راحت ودي أسوي مسح حق كل الأفكار والذكريات اللي ببالي وأفتك بس الله كريم والله المستعان

اسال الله ان يفرج همك

لأخت the_un lucky_girl

أسعدني مرورك وأشكرك على الدعوه وأسأل الله أن يفرج همك أيضا ويرزقك ماتتمنين

فرج الله همك يارب :)