|
كيف أقنع خطيبتي لتقديم الزواج ؟
السلام عليكم
يا جماعة أرجوكم أبيكم تساعدوني في وضع حل لحالتي تأزمت و ما ني قادر أشيل الفكرة من بالي أنا سلمكم الله صار لي أكثر من 4 شهور مملك و انا و خطيبتي نحب بعض بشكل جنوني ( على الأقل أنا متأكد من جهتي) المشكلة هي إني أنا من النوع اللي يحاتي كثير وما أحب إن فترة الملكة تكون طويلة 6 شهور كثيرة بالنسبة لي و الصراحة إني صرت ما أقدر اشيل خطيبتي من بالي لا في شغلي أنساها و لا أقدر أطلع مع أصحابي و فكري خالي دايم أفكر فيها ( طبعا التفكير ما له أي شغل بالعلاقة الجنسية بتاتا - يعني لو هي ناوية تخلي ليلة الدخلة بعد سنة من الزواج ما راح أقول لها لآ - أنا كل اللي أبغاه إني أضل معاها بس، لأني حبيتها و ما حسيت بالراحة إلا معاها) وبينت لها إن اليوم اللي ما أشوفها فيه أكون كأني ميت ما أجد أي حلاوة فيه بالعكس يكون عذاب لي فأنا فاتحتها قبل كم اسبوع مشان تحدد موعد للزواج لأكون مرتاح و تهدى نفسيتي شوي وهي كلمت أهلها بالموضوع و رحبوا بالفكرة و كمان عطوني إقتراح بأنهم هم راح يوفروا سكن لنا لين يجهز البيت اللي أبنيه ( البيت راح ياخذ حوالي سنتين ليجهز بدون التأثيث) مع إني ماحبيت فكرة إني أسكن مع أهلها لكن وافقة عليها لأني أدري إنها راح تكون أريح لها في كل الجوانب و لأنها راح تكون جنب أمها و أبوها طول الوقت فراح يخف توترها شوي لكن تفاجأت إنها هي تقولي إن الوقت لسه بدري مشان نتكلم بهالموضوع أنا حاولت إني أشرح لها أهميته بالنسبة لي و أرسلت لها رسايل على الجوال و على الإيميل أشرح لها لكن كل ما نتقابل و لا كأنها قرتهم ( مع العلم إنها تقراهم لكن ما تقولي إلى إذا سالتها خصوصا عنهم) لكن تضل فرحانة ومستانسة طول الوقت، و أنا ما قصرت معاها، أي شي يفرحها أسويه بدون تفكير لكن جوابها دايما لهالموضوع " أنا مادري شو أقول، لكن أحس مو مستعدة نفسيا " فأنا آخر مرة من زود التعب عندي قلت لها خلاص أنا ماراح أكلمك بهالموضوع مرة ثانية بس مشان ماتمل مني بسببه وبعد ساعات من هالكلام رسلت لي رسالة تبين فيها قد إيش هي بتحبني لكن بالنسبة لي صار وضعي أسوأ لأني مو عارف كيف أقنعها و لاني قادر أنسى الموضوع أنا أبي أضل بجوارها كل يوم و لما أرجع من عملي ( يوميا 12 ساعة أكون بعيد عن البيت) أبي أشوفها قدامي و البسمة على فمها وكل يوم بعد كل صلاة أدعوا ربي إنه يعجل بزواجي فيا أعضاء هالمنتدى أرجوكم اللي عنده أي إقتراح أو نصيحة أو مساعدة بليز لا يبخل علي بها حتى لو كانت لي مشان يخف تركيزي بهالموضوع وشكرا |
تبي الصراحة .. حتى أنا شايفه ان سكنك مع اهل زوجتك مو حلوة عشان صورتك
لأن البنت مهما كان تحب تحس انها تزوجت رجال قد المسؤولية ويعتمد عليه صدقني البنت تحب تكون فخورة بزوجها قدام اهلها وصديقاتها .. والزوج قد ما يكون مستقل وقد ما يكون قادر على الاعتماد على نفسه قد ما يكبر بعينها يعني لو صديقاتها بيزورونها بعد الزواج .. وين بيجون .. بيت اهلها نفس الشي يعني ما تغير شي في حياتها إلا إذا كنتوا اهل وهذا الشي عادي بالنسبة لكم .. فالأمر يختلف .. وانا الي شايفته ان اهلها ما عندهم حساسية من هالموضوع .. بس يمكن هي لا شوف جس نبضها من هالناحية .. وإذا تقدر حاول توفر مكان في بيت اهلك انت ذيك الساعه تعال نقولك شلون تقنعها |
أنا أقدر أوفر لها شقة ما عندي مشكلة بس هي رافضة الفكرة
و تقول تشوف إن السكن عند أهلها أريح لها وأنا قلت لها هالكلام في أخر رسالة إنه مع موافقتي أفضل الشقة أكثر وأنتظرها ترد علي لكن للآن ما أشوف منها أي خبر و لا حتى رسالة صباحية |
اقتباس:
اووووف 12 ساعة الله يعينها يعني نص اليوم انت بالعمل كلمها وحاول تقنعها واعرف وش اسباب التأجيل منها مو مش مستعده نفسياً شوف ليه مو مستعده ايش السبب |
اهااا إذا انت قادر توفر شقة .. فماله داعي التأجيل ابد
ايش يعني مو مستعدة نفسياً اهي تدرس والا ايش ؟؟ اقولك شي .. شكلها والله أعلم تدلع مالك إلا تثقل شوي ومو كل يوم عندها ولا كل وقت داق تلفون .. ومو كل شي مسج .. ولا عاد تجيب طاري الزواج .. ومااقدر وابيك .. هالكلام تركه هالفترة وان جاء طارية قول لها انك تفضل انه يكون الزواج بعد سنتين وبعد ما تأثث البيت مو فارق معاك >>> يعني حاجة تكتيكية صدقني بتحاتي وتصيرحالتها حالة بعدين واهي الي بتقولك يالله نتزوج بأسرع وقت اهم شي تتحمل هالفترة واضغط على نفسك شوي موفق .. طمنا عليك |
والله باريسا
هذي الفكرة كل يوم أقول بسويها لكن قلبي ما يطاوعني يقول حرام أخليها كدا أنا أشوف حالتي كيف و ما ودي تصير مثلي أبد وهي بدها قوة عزيمة ما أدري من فين أجيبها لكن الله المستعان راح أحاول أبعد أساسا عن المكان كله |
هل هي صغيرة ؟؟ ممكن تخاف من المسؤوليه و بعدين اشرح لها بلسانك ,, مو كل يوم معاها ,, مو بالجوال او الرسايل لمن تقابلها اولا خليها تقسم تقول لك الحقيقة لانها ممكن تستحي منك و تتهرب من الموضوع أسألها ايش الاسباب و انها مهمه بحياتك و لا تهنأ حياتك الا معها افضل من الحاله اللي انت فيها ولو كانت خايفه من مسؤوليه الاولاد راح تأجلها اذا عرف السبب بطل العجب حاول معرفة السبب بعدين انت المسؤول صح,, بس لو زوجتي ما راح اسكنها ببيت اهلها انا المسؤول عنها و حياتنا ما راح يتدخل فيها احد تزورهم وقت ما تبي لكن تسكن في نفس السكن لا و لا كمان مع اهلي مستقلين لحالنا صدقني هي بتحبك حتى لمن زعلت ارسلت لك مع انها ممكن تطنش و تقول هو راح يتقبل الوضع ويرجع لي لذلك راح تنحل مشكلتكم |
عاشق الجواهر
تعبت و أنا أكلمها مافي فايدة لا جواب شافي ابدا |
لا تقدر تجيب العزيمة والقوة .. لا تقول هالكلام
وبعدين ما كان قصدي من هالخطوة الأذية بس ابيها تحس فيك .. وهي ماراح تحس فيك إلا لما تنحط في نفس موقفك هو الانسان كذا .. ما يحس إلا لما يتألم والشي الثاني ابيها تحس بقيمتك واشكثر وجودك في حياتها كبير ومهم .. وكل هالاشياء ماراح تحس فيها إلا لما تبعد عنها .. وتحس بالفراغ الي ابتتركه هنا راح تتحمس مثلك ويمكن اكثر منك وبعدين اصبر شوي عشان تحصل على كل شي |
عز الملوك
الكلام أكثره كان بينا باللسان ولما شفت مافيه فايدة خليته بالرسايل قلت يمكن تكون محرجة مني أو أسويلها ضغط لكن ما في فايدة تقول أبي أفكر على رواق فالظاهر إني راح أقطعها فترة ماراح أبين فيها لين يتحدد كل شي مهما كانت النتايج أنا مو مستعد أضيع كل عمري و أنا أنتظر |
أنا مثلك تماما لكن يفرق اني لم أبين لهاثي خلفها حتى تصاب بالغرور فأكرهها وممكن أطلقها
لأني لا أهدر كرامتي من اجل أمراة .. لكن بينت لهم الفترة التي أستطيع الزواج فيها فإن قبلوا بها أتممنا وان لا . فمع ألف سلامة في مليون غيركم , لأنه أدفع ايجار شقة هدر , فوافقوا لكن لم أتخاطب مع الفتاة بل مع ولي أمرها مباشرة , لأني لو خاطبتها قد تتحامق وتتدلع وتبين أنه ما هي مستعجلة , فأقلب الطاولة عليها حبيبي لهاثك خلفها وولهك عليها وخاصة انك باين أنك طايح عندها , جعلها تتدلع عليك لأنها عارفه أنك منت قادر على فراقها , لكن طنشهاااااااااااااااا ولا تراسل ولا حتى ترد الا ببرود , وقولها فكرت جليا خلوا الزواج بعدين أنا مستعجل ودي أشوف حياتي وأشغالي الأهم .. |
علو النفس
أولا : كلامك فيه من الصحة أنا صحيح أحس إني استعجلت لما قدمت لها نقطة ضعفي كرجل على طبق من ذهب خلال هالفترة القصيرة وذلك لحسن ظن مني إنها ماراح تستغلها باسلوب خاطئ و ماللي صار هو إنهي ما استخدمتها بإسلوب خاطئ لكن مااستخدمتها بالإسلوب الصحيح وهنا فرق كبير بين النقطتين ثانيا: لاحظ قبل كل شي إنك مو جالس تتكلم عن أي شخص إنت تتكلم عن زوجتي شرعا و أمام الكل (و أتحدى أحد يقول غير هالكلام) وأنا ما راح أسمح إنك تستخدم هالعبارات و الأفكار اللي تتكلم بها إنك تبين شوقك و ولهك لما أحله الله لك هذا ما يمسى لهاث لكن اللهاث هو إنك تركض ورا شهواتك فإذا إنت ""تعرف شخص "" لهث ورا خطيبته/زوجته فلا تجي تعمم اللي شفته أو عرفته على الكل ثالثا: كل الأعضاء هنا لما يكتبوا مشاكلهم و محتاجين مساعدة هم أساسا ما يدورا الحل هم يدورا الإسلوب الأمثل لحل المشكلة أنا مشكلتي أقدر أحلها بأني أخبر أهلها و أقول لهم يحددوا وقت للعرس و أخلص كل أموري على مزاجي و هي ما تقدر تقول شي و كل شي يصير غصبا عنها لكن شو الفايدة بعد سنة أو سنتين راح تكرهني لهالإسلوب فأنا أقولها لك مرة ثانية إحنا ندور عن الإسلوب الأمثل لحل مشاكلنا بطريقة ما تخليها ترجع فياريت تتذكر هالشي قبل لا تكتب ردود مرة ثانية و أنا آسف على هالكلام لكن لازم أحد يقوله لك |
الله ييسر امورك يااخي ويتمم زواجك على خير عاجلا..الظاهر اخي زوجتك بتدلع عليك انها مش مستعجلة عالزواج..لكن في داخل نفسها نفسها تتزوجوا عن قريب عشان تضل قربك لانها بتحبك وهيك اللي بتحب صدقني..
جرب يااخي لاتجيب سيرة الزواج ابدا لفترة واثقل شوي عليها..شوف النتيجة.. موفق يااخي والله يهدي بالك وكل اللي عم بتمر فيه كتير منا مروا فيه. الله يخليكم لبعض. |
تسلموا كلكم على المساعدة
و الكلام ""الطيب"" أنا اليوم كلمتها وقلت لها إذا راحتي تهمها لازم إننا نجلس وناقش الموضوع ماردت علي كالعادة لكن بعد فترة أرسلت لي رسالة تقولي إنها مستحيل تنساني بس تبي وقت تفكر فيه على راحتها وكل شي راح يصير مثل ما أبي فعلى العموم الشغلة يبيلها شوية وقت أثقل عليها فيها و إنشالله مايصير إلا الخير تحياتي لكم جميعا |
يا حبيبي لن تفهم كلامي الا بعد الزواج وعندها ستعرف معناه وأتحدى ...
أهم شي لا تستعجل علي .. |
والله عجيب أمركم الواحد ما يصدق يخطب ويملك عشان يعرس والحين تبغى حل عشان تتزوج !! موعد الزواج والأمور الكبيرة هذي تتحدد مع الرجال فيس تو فيس يعني كلم أبوها عن رغبتك بتحديد الزواج أما سالفة السكن عند أهلها لا تفكر فيها نهائي ( مدري إذا هي مشترطه عليك بالبداية انها تسكن مع أهلها فهذا شيء ثاني ) إذا مو قد المسؤلية وش حقه توافق من البداية ..؟؟ خلك جدي شوي معها والله يكتب لكم الخير |
اقتباس:
اقتباس:
عادةً هالأمور تتم بين الرجال والعروس ترضى بالأخير ( ما أقصد أنها مالها رأي بس الأكيد والدها وأهلها بيشاورنها ويقنعونها بالرأي الأنفع لكم ) غير ذلك (ماخبرت العروس تحدد زواجها :25:) موفقين أخي الكريم |
يا ناس ضروري تعرفون أن كل انسان له شخصيته المميزة وله اسلوبه في الحياة
ومو ضروري نفرض شخصياتنا أو تجاربنا السيئة عليه أو نخليه ينظر للطرف الآخر وكأنه هو الانسان الي ما توفقنا معاه ويمكن نكون احنا السبب مو هو وبعدين الكل يدري أن الخطيب عادتاً يسأل خطيبته أو أهلها بعد الملكة خاصة إذا كان جاهز كم المدة التي تحتاجها عشان تتجهز للزواج ... شهرين .. ثلاثة .. اربعه .. مو اكثر من كذا بس هو ما عمل هالشي .. تركها على راحتها وغالباً البنت الي تجاربها قليلة في الحياة يكون نضجها أقل فما تعرف تبت في الأمور .. تبقى على طول متحيرة فحلها أن الواحد يحطها تحت الأمر الواقع أو يخيرها بين موعدين للزواج هذا التاريخ أو هذا عشان تقدر ترتب تفكيرها وتختار وبعدين يا اخوي بقولك شي .. الانسان تجاربه الأولى خاصة لما يكون توه صغير .. تعامله مع هالتجربة فيه نوع من السذاجة .. ومشاعر الحب لما تعيشها البنت لأول مرة تخليها لا على الأرض ولا في السماء كأنها عايشة في عالم الأحلام .. حابة تستمتع فيه على طول .. وتصير كأنها في غيبوبة من الحياة وحقائقها فالمفروض أن نعمل لها حركة تصحيها .. ونقول لها أن هذي مرحلة نعيشها تمهيد لمرحلة ثانية ولو ما كانت فترة الخطوبة بعدها زواج ما كان للخطوبة اي قيمة وهذا مو معناته انها استغلتك خطأ .. لا بس قلت تجارب الانسان تخليه ما يعرف يتصرف أو تصرفاته تصير غير ناضجة ويقعد يشوف نفسه ويغيب عن الوعي فمثل ما قلت لك .. أنك تبعد عنها هالفترة وتخليها هي تدورك وبعد نا تجيك تحدد لها موعدين للزواج اقصد تاريخين يناسبونك للزواج .. وعليها تختار يا هذا أو هذا الله يوفقك |
حبيت أبشركم
إنه خلال الخمس أيام اللي فاتت ما شفتها و حتى المكالمات كانت محدودة جدا (فقط مكالمتين):11: و الرسايل 3 فقط وهي اللي كانت تبتدي أنا مجرد أرد و ببرود :24: لكن البارح أصرت علي إني أروح لها :29: وكان استقبال ولا أروع:17: (3 نجوم بس :)، لو كنا متزوجين كان صار 5 نجوم :23:) و تم حل كل المسائل العالقة بينا بتفهم الطرفين للقضية :22: أحين الواحد يقدر يعيش حياته و هو مرتاح البال:17: و تسلموا جميعا على المساعدة و خصوصا باريسا على تشجيك لي على الفكرة تحياتي |
الف الف مبروك
الله يبشرك بالخير مش قلت لك دلع بنات والا هي مثلك تبي الزواج بس شفت مشاء الله خلال مدة قصيرة ما قدرت تصبر عنك الله يتمم لكم على خير عقبال الـ 7 نجوم بعد |
الله يوفقك اخى الفاضل
واسلوبك فى حل المشكلة عجبنى جدااا ربنا يثبتك ويزيدك والمرأة تحتاج تفهم لها ولنفسيتها واحتياجاتها مش عايزة جرباك وذل انت صح استمر ... وبعد اذنك فى تعليقى هذا .. الاخ علو النفس لا تظن ان الرجل فقط الذى لا يحب ان تذله امراة بل المراة اشد لانها ارق واضعف ولها ايضا كرامة فانتبه ولا تستغل حب زوجتك انك تقسو عليها وانت فاكر انك (بتتقل عليها حتى ما تتغر ) ولا تحتقر عقلها والا بتتعب فى حياتك واسالنى انا ربنا يرقق قلبك دى نعمة كبيرة اوى واذكر بحديث النبى صلى الله عليه وسم ما كان الرفق فى شىء الا زانه ولا نزع من شىء الا شانه باريسا ما قصرت عل لغة الخليج :) ربنا يكرمك ويسعد قلبك دوما ربنا يراضيكم ويرض عنكم تقبلو مرور وتحيتى |
الله يديم عليكم ..
|
جمع الله بينكما على خير والف مبروك مقدما
|
| الساعة الآن 06:03 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©