|
لاول مرة اتشجع واكتب مشكلتي بس لاني من جد تعبت وخلاص فاض الكيل
انا متزوجة من خمس سنوات من رجل طيب واخلاقه جدا عالية والكل يمدح فيه وانا احبه واموت فيه بس للاسف اني من غبائي مااكتشفت عيوبه الا الان انه انسان اناني ومايحب ان احد ينصحه وماياخد بنصيحة احد وروتيني ممل ورامي كل مسؤلية الاولاد عليا من تمشية من مشتروات من كله وكل هذا غير الضيقة المادية اللي من يوم ماتزوجته حبايبي الله يسعدكم بس انا الموضوع لسه ماكملته صار عندي عطل وماكمل الموضوع بس تسلموا على تفاعلكم معايا مشكلتي مع زوجي انه انسان روتيني ممل مايحب الطلعة ولاالتغيير لو يعيش مليون سنة بنفس الروتين عادي هذا شي والشي التاني ماهو حابب يتحمل مسؤلية اولاده باي شي لاتماشي لامشتروات ولاحاجة كله انا المفروض اعمله وماعندي مانع بس حلوة المشاركة وبعدين انا ماعندي الااتنين يعني مهم عشرة نفسي يوم ياخدهم ملاهي او يطلعهم البحر مافي الا بمزاجه ولو صار ورحنا يدوبك ربع ساعة وخلاص طفش طيب انابمشيهم مع اهلي طيب وانا فيني من هذا كله يكفي اني افلمت نفسي على اشياء كثيرة وبالعافية كل هذا علشان المفروض اني اصبر واتحمل اقلمت نفسي على ان العلاقة بيني وبينه بمزاجه لو هو حابب لو موحابب انسى ان اطلب لاني طلبت كثير وكنت اقابل بالرفض منه وتنكسر نفسي واقول معلش مشي حيلتك يمكن يتغير خلاص انا تغيرت وصارت نفسي ماتجي لهذا الموضوع الا فين وفين اقلمت نفسي ان ماتكون لي طلبات والله ياناس يوم مايعطيني فلوس ويقوللي روحي متعي نفسك مااعرف ايش اشتري لاني محتاجة كل شي وماببين له انه مقصر علشان لايتضايق اقلمت نفسي اني مااطالع لحياة اخواتي اللي ماشاء الله موناقصهم شي عمري ماقلتله شوف فلانة لاني مااحب احسسه بالتقصير بس كل هذا صرت حاسة ان من كثر تقديري لظروفه صرت عنده مااسوى شي او انه صار يحس انه مفروض عليا اتقبل اي شيء باعتقاده اني مبسوطة برغم اني مااخبي عليه اي شي يضايقني مااحب اكدس في قلبي دايما اول باول احب ان نتفاهم علشان لاتشيل القلوب من بعض لاني احبه وكم مرة فهمته انا انسانة بموت من الروتين نحاول نغير بابسط الاثمان وبابسط الاماكن والله ياناس مابطلب الغالي دايما الرخيص ومافي فايدة اهلي واخواتي كلهم سافروا وانا مااخبي عليكم صار فيني غصة انا بشر نفسي اسافر زي باقي خلق الله بلاش السفر يطلعني حتى لو المدينة مافي فايدة انا نويت بكرة ان شاء الله اخر فرصة اذا ماحب يفهم انها واصلة معي حدها انا بروح عند اهلي وبفهمه اني حروح علشان يشوف حل انا عارفة انا ماحيستغنى غني لانه يحبني ومتاكدو من هذا الشي ويحب اولاده موت بس لازم يحس انه ممكن يخسرني لو مالقي حل ولا ايش رايكم انا منتظرة ردودكم والله عارفةان ممكن تكون مشكلتي هينة قدام مشاكل الاخرين بس الله يساعدهم ويحل مشاكلهم يارب بس الانسان لما يكون متضايق يحس مشكلته اكبر هم في الدنيا |
الله يفرج همك يكفيك اخلاقه العاليه والطيبه وكله يهون
|
ما في حدا كامل يا عزيزتي،،
تحملي عيوبه قدر ما تستطيعين و حاولي ايجاد حلول لها،،او حتى لتجنب افعال قد تزعجك فيه والله يسعدك ويريح بالك يا رب |
ربنا يفك كربك
ممكن تدخلي احد من العقلاء صديق او قريب لكن بعد اذنه طبعا وتعرفيه انك حتحكي لفولان |
غاليتي اذا كان زوجك اخلاقه عاليه
انتي بنفسك تخلينه يبعد عن سلبياته مثلاً روتيني اذا تقدرين تخلينه يتغير يعني طبيعته من النوع اللي يحب تحطين له الغذاء الظهر قولي له والله بكل صراحه اني فكرت اذا جيت من عملك تاخذ لك قيلوله شوي وبعد صلاة العصر ان شاء الله جاهز وفي هذا اليوم تعمدي انك تحطين له الشي اللي يحبه .. على عدم تحمله لمسؤوليه اطفاله عوديه على شوي شوي حطي عنده طفله الصغير وقولي انا ابغى آخذ لي دش والله يعافيك طفلك عندك اهتم به هو راح يقول انتي امه لازم تخلينه معاك قولي لك وانت ابوه حبيبي وبعدين متى طفلك راح يتعود عليك انا شوي وراجعه ما راح اتاخر وروحي بسرعه للحمام لاتنتظرين منه كلام ... اشيااااااااء كثير انتي تقدرين تتفاهمين معاه بالصبر وطولة البال اذا سوى شي انتي مو عاجبك لاتعصبين طالعيه بنظرات تأنيب... وترى فيه مثل مصري يقول اللإبن على ماتربيه والزوج على ماتعوديه .. |
أختي الكريمة مشكلة زوجك بإختصار : أنه تعود على الروتين وما يبغى يطور ويغير نفسه ، لأنه يرى أن وضعه مستقر ومرتاح مع زوجته ، وكذلك مشكلته العائق المادي ، وهو ليس بمشكلة ، ويمكن الإستمرار في تحسين أموركم ، عن طريقك أنت ، لأن البيت في مسؤوليتك من وجهة نظري أن زوجك يحب الإستقرار وهو سعيد جداً فيك ، وقضية أنه الشغل كله عليك والمسؤولية أنت متحملتها ، فمن رأيي أن تبدأي بالإصلاح وهو سهل ، إدخلي على زوجك من الأشياء اللي يحبها ، وعن طريقها إبدأي حوار لطيف معه وناقشيه بإبتسامة وتودد عن مشكلتكم ، ومع الصبر والتكرار راح تتغير حاله ، وهو حاس بموضوعك ، ولكن يريد أحد يوقف معه لينتشله مما هو فيه ، و أنت خير سند له تحملي وإصبري والحل في يدك أنت ، يعني إجعلي بيتك ونفسك مجددة ، ومع الوقت راح يتغير تلقائياً ، لأنه ما يرضى أن زوجته تكون أفضل منه وهذا كله في صالحك والله يوفقك |
اشكركم على ردودكم والله يوفقكم يارب انا والله اني تعبت من كثر ماحاولت مافي فايدة انا من يوم ماتزوجته وهوعلى هذا الاسلوب والكل يقوللي حاولي تتاقلمي كيف اتاقلم على اني اموت نفسي مدفونة بالحياة يعني حابة تطلعي اطلعي مع اهلك حابة تشتري روحي مع اهلك حابة تمشي الاولاد روحي مع اهلك وهو وين مشغول ماادري بايش يخترع اشياء مالها داعي علشان يحسسني انه مشغول ولما اطلع واتصل عليه انت وين علشان اطمن عليه يقوللي في البيت احس بغصة بس امشي الموضوع لا والمشكله انه عارف ان روحتي لبيت اهلي تتعبني نفسيا بسبب مشاكل سابقة ماحاخوض فيها وبرمضان تراسلت مع طبيب نفسي وفهمته مشكلتي مع اهلي فطلب مني ان لازم ابعد عنهم ولو لفترة وفهمته هذا الكلام مع اني ماحاولت انه افهمه ايش هي المشكلة ومستحيل اعرفه لانها صعبة ومعقدة وماابي تتغير صورتهم امامه وفهمته ان الدكتور يقول لازم تغيري من روتين حياتك وتطلعي من اللي انتي فيه مافي فايدة كاني اتكلم في الهوى كل اللي عليه قال شفتي حتى الدكتور من راي ان لازم تخففي من روحة بيت اهلك كيف اخفف وهما المنفذ الوحيد لي ومافي بديل شافني برمضان ان نفسيتي كانت معدومة ان حاول يغير شي ابدا كل اللي يقوله شوفيلك احد تطلعي معاه كاني متزوجة الناس موهووالناس موفاضية لي حتى اخواتي ياجماعة والله انا مااحب المشاكل ولا النكد وراضية بكل شي الله قسمه لي في حياتي كل اللي طالباه التجديد في حياتي وهو مومهتم من ناحية الكلام اقسم بالله اني تعبت من كثر ماتكلمت وعن نفسي مااعرف اتكلم بصراخ او بقسوة دايما كلامي بنبرة ضعف وهذي طبيعتي حاسة اني خلاص كل حياتي غلط لما اجي افكر في حياتي احط اللوم على نفسي اني سلبية ولاني مااعمله مشاكل ونكد تعود على السلبية وتعود اني قانعة بكل شي من زود حبي ليه صرت افكر فيه قبل نفسي مااحب اتعبه واشيل هم تعبه هل انا غلطانة بطريقة تعاملي معاه انا متاكده اني غلط بس كيف اغير طريقتي مااعرف يعني انا وهو لينا يومين مانتكلم وعارف من ايش زعلانة لا ويزعل هو كمان كنا عند اهله واخواته طلبوه نتطلع نتعشى كلنا في مول قريب منهم وطلبوه انهم ياخدوني معاهم رفض انا زعلت قلتله ليش ماتسالني اذا حابة اروح ولا لأ يقولي بمزح انا فين مااروح تروحي معايا لاتبعدي عني وخلاص سكت واكلتها في قلبي ورجعنا البيت وعارف اني ماتغديت كويس ومافي شي في البيت لانه متضايق شوي حتى ماكلف نفسه يسالني حابة تاكلي شي لو هو جوعان كان احسن مطعم وراح جاب اكل وببساطة رجعنا البيت ودخل نام ولاكانه في اي شي انا من يومها وانا مابتكلم معاه انا حاسة اني في منطقة الصفر وموعارفة كيف او من وين ابدا من جديد فكرت بموضوع الذهاب لبيت اهلي بس خفت لانهم مسافرين ومافي الا اخويا ومابيجلس في البيت ايش ذنبهم الاطفال يتهجولوا معايا لغيت الفكرة وقلت لااجلس في بيتي بس اطنشه وطالبة حلولكم كيف اتصرف معاه وياريت لاتتاخروا عليا منتظرة حلولكم بفارغ الصبر وياكثره عندي
|
أختي الكريمة أقرأي ماضيه وأعرفي سبب تغيره طبيعة الإنسان أنه إجتماعي ومعطاء ، ولكن ممكن هناك موقف أو سبب أثر في زوجك لدرجة التبلد وعدم الإحساس والإنطواء ماضيه كيف كان ؟ وهل في بداية زواجكم كان كذا؟ وهل يعاني من مشاكل صحية ونفسية؟ هل طبع إخوته وأخواته مثله؟ أنت ما قصرت ومعذورة وسويتي اللي عليك ، لكن إذا عرفت سبب تغيره راح يسهل علاجه والله يوفقك |
اخي عبد العزيز زوجي بطبيعته من زمان بيتوتي ومن يوم ماتزوجنا وانا احاول ان اعمل تغيير في حياتي يعني انا دايما اطلب منه ايش رايك نتغدى في المكان الفلاني يرضى لما تكون المادية مرتاحة شوي مايرفض بس موحلو اني دايما انا اخترع الجديد غالبا الانسان يحتاج للتغيير المفاجئ لكنه كل حياته عادية واهله عكسه تماما اجتماعيييييييييين لاقصى درجة ويحبوا الناس والعشرة وحاولت اني اتدخل فيهم يعني من باب التغيير مالقيت عندهم قابلية برغم انهم يحبوني واحبهم كتير ومافي اي مشاكل بينا وهذا لاني انسانة سلمية مااحب المشاكل بس بعدها بطلت منهم اطلب منهم ان اطلع معاهم في اي مكان يروحوه اما عن اذا كان في ماضيه شي الله اعلم بس بحد علمي ان نفس طبيعته ماتغير صحته عال العال الحمد لله ونفسيته مرتبطة بالمادية برغم اني مريحاه من هذي الناحية ودايما افهمه ان انبساطي معاه اهم من المادة وان حياتي معاه بتكون بقمة السعادة لما احس بحبه موبفلوسه ومافي فايدة كل ماتكلمنا يقوللي ان شاء الله بس تصير معايا فلوس راح اعملك واعملك طيب هذي ارزاق من عند الله فرضا انت قسمتك من هذي الدنيا من الناحية المادية قليله يعني نموت تخيل من قمة روتينه انه لو اهملت نفسي بالبيت ومالبست وكان شكلي منعكش وعملتها كم مرة حابة اشوف ردة الفعل عادي لي شهور انام بالبيجامة ولا مرة قاللي ليش او ولامتى عادي ولما اتكلم معاه يقولي انا بسيبك براحتك طيب حلو لما الرجال يطلب من زوجته تتجهزله وتلبسله مافي هذا وانا غيرت فيه امور كثيرة من يوم زواجنا بس تعبت اللي يكسر خاطري انه يحبني والوحدة تحس بزوجها اذا يحبها اولا بس صرت حاسة اني صرت اخر اهتماماته من جد اخر اهتماماته دلوني كيف ارجع اولعه فيني انا خايفة على زواجي ومااحب يزعل مني وكرهت كثر الكلام لاني صرت احس انه طفش وانا كمان طفشت والحل ؟؟؟؟؟؟؟؟؟؟
|
الحل أنك تجلسي معاه جلسة مصارحة ، وقولي له كل شئ يا إما يعدل من حاله ، أو يتدخل أحد الوالدين في الموضوع إن لزم الأمر ، أو يعالج نفسه عند مختص لأنه واضح عليه أنه فارغ وما عنده شئ يشغل وقت فراغه فيه |
تسلم اخي على ردودك والله يهدي الحال ونشوف الي ايش بتنتهي حالة الصمت اللي بينا لا وبكل بساطة جاي اليوم ايش ماتبي تخرجي حسيته ان سؤال بس رفع عتب والمفروض اني افرح واقوله طيب ابشر قلتله لا ماحاطلع مكان قال نخرج مع بعض قلتله لا بس وخلاص وسكت لاني حاسة بس انه رفع عتب لااكثر موحبا بالخرجة والله مسكين الله يعينه على نفسه وعلى حكاية انه فاضي ممكن اغلب الاوقات فاضي وتصدقوا عمري مادخلت احد من اهلي او اهله في حياتي برغم انه صارت مشاااااااااكل كثيرة بس كنت اتغلب عليها وانهيها لاني احس اذا تدخل احد بتخرب علاقتنا ويصير في حاجز بيني وبينه وهذا اللي مااتمناه مااقول الا الله يعين ونشوف ايش يصير ادعولي
|
حالة زوجك المادية مخلية عندة احباط وهم
ليةما تكلمية يدور له على دخل ثاني مثلا وظيفه مسائية اي شي حتى يحسن دخلة يمكن ترتاح نفسيتة صدقيني زوجك مهموم مو متبلد بالنسبة للحالة المادية لها تدور على النفسية ومرت علينا فترات انا وزوجي الله لايوريك بس تحملي هذا شي خارج عن ارادتة بالنسبة للخرجات حاولي معاه شوي شوي يعني مثلا واذا حولكم حديقة اطلعي انتي والاولاد وبعدين اتصلي علية وقولي لة الجو حلو تعال اجلس معنا واذال مارضي لاتنقهرين ازمة وتعدي الله يفرج همكم ويوسع في رزقكم ويعطيكم راحه البال |
اقتباس:
الله يكتب لك الخير من رأيي أدخلي طرف ثالث تثقين به وهو يكون مرتاح له ، حتى ما يكون إحراج لك وله ، ويكون الموضوع بينكم أنتم يا الثلاثة ، وفي ظني هذا ما أعتبره تدخل ، لأنه ما راح يكون فيه تشويش أو يكون فيه حاجز بينك وبين زوجك |
الله يفرج همكم ويفرح قلوبكم يارب وبالاخص اخي بالله الاخ عبد العزيز الحمد لله جاء لي وصالحني ووعدني ان بعد اليوم اي مكان حابة اروحه حيروح معايا ماادري هل هو كلام او ان شاء الله يصدق بس والله ارتحت انا مااحب الزعل ولاان ابعد عنه كم يوم وحكاية ان يدور على وظيفة ثانية والله مسكين عنده وظيفه ثانية بس ربي قاسمه رزق قليل الحمد لله على كل شيء ويارب لاتحرمني اخوتكم وجزاكم الله الف خير
ملاحظة :ترى ممكن ارجع بعد فترة وبنفس المشكلة او مشكلة اخرى الحياة ماتخلى هههههه |
الله يفرحكم ويجمع ما بينكم على خير التفاؤل مطلوب ، والصبر في التعامل وعدم التسرع في الحكم كفيل بإذن الله على تفاهمكم وبالنسبة لملاحظتك فبمشيئة الله ما راح يكون مشاكل طالما عرفتي ما يحب وما يكره وتذكري أن كل مشكلة تواجهكم في الحياة هي تجربة تضاف لرصيد تجاربكم فيها |
| الساعة الآن 05:03 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©