|
كل ما زعلنا انا وزوجي من بعض أمه تزعل مني
السلام عليكم يااخواتي واخواني
ابغى رأيكم في مشكلة صارت معاي مشكلتي ان كل مازعلنا انا وزوجي من بعض امه تزعل مني وتقلب وجهها فيني لاني مزعلة ولدها طبعا هي ماتعرف من يكون الغلطان بس اهم شي عندها اني زعلت ولدها فتقلب علي انزل عنها ماتكلميني وتبقى طول الوقت مكشرة فأنا تفاديا للشر اطلع بيتي فوق وطبعا كل مشكلة لازم تدخل فيها حتى لو مادخلناها احنا تسوي نفسها المستشارة حقتنا المهم اخر مشكلة صارت معانا انا وزوجي بدت صغيرة وصارت كبيرة انا مااروح عند اهلي الا يوم الخميس كعادة كل الحريم وبقية الاسبوع مااطلع من البيت الا نادرا اذا كان ي عزومه والا شي وطبعا هذي مو كل اسبوع نادر ماتصير يوم الاربعاء كلمتني امي قالتلي كل عماتك مجتمعين وفلانه جايه وفلانه تقولي حاولي تجين قلت اوكي وماتوقعت انه يقول شي لان هو اصلا رح يطلع كالعادة ومارح يرجع الا متأخر خصوصا انه يوم اربعاء اصلا هو يوميا يطلع لما قلتله ماوافق قلتله ليش انت رح تطلع وانا طفشانه قاللي اذا رحتي اليوم مافي روحه بكرة وهذا الكلام تقريبا المغرب يعني اليوم راح وش رح استفيد سكت بنتي كان عندها موعد عند الدكتور وديناها وحنا راجعين قاللي تبين تروحين عند اهلك قلتله لا مو قلت اذا رحت اليوم مارح توديني بكرة قاللي اي قلت اي ليش بزران هذا انت كل يوم تطلع الاستراحة خلاص اجل انت رحت امس مافي روحه اليوم قاللي ليش على كيفك قلتله شفت ليش تضايقت انا نفس الشي اللي يسمعك يقول يوميا اروح بيت اهلي قاللي تبين تروحين بعد بدري بكرة انا كنت قايلتله قبل بيوم اني ابغى اروح بدري يعني من الظهر العصر لانه مايوديني الا متأخر قاللي انا صايم بكرة قلتله واذا صايم نفس الاكل اللي بنسويه على الغدا راحت تاكل منه اش فرقت معاك يعني وعلى فكرة انا مااطبخ في بيتي يعني بالحالتين مو انا اسوي الاكل المهم نزلت من السيارة معصبة سكرت الباب بقوة وطلعت على طول فوق عدا هذا اليوم صحيت من بكرة قلت خلاص بصير عادية مارح اسويها مشكلة مع اني كنت مررة متضايقة من حركته لان عارف اني مااجتمع مع الناس الا نادرا المهم كان يوم خميس فصحيته الساعة 2 ونص عشان يقوم يصلي الظهر قبل مايأذن العصر صحى وصلى لما خلص صلاة اذن العصر قلتله شفت زين امداك تصلي المهم رجع يبي ينام مااذكر اش قلتله فجاوبني بصوت نكدي قلتله اش فيك قاللي يعني ماتدرين الحين انا اللي مفروض اتضايق ومشيت الموضوع يجي هو يتنكد علي قلتله ايش فيك مارد علي المهم انا طنشت ولاحظو انه ماوداني عند اهلي المهم لما فطر هو نزل فطر تحت انا مااكلت معاهم لاني ماني صايمه انا خلصت صيامي طلع تقريبا قبل العشا بشوي قعد عالكنبة انا كنت اتفرج على التلفزيون قاللي تبين تروحين قلتله لا انا قايلته بروح بدري لان بدت المدارس وخلاص مافي احد بيسهر وخواتي كلهم بالمدارس ومتعودين اصلا ينامو بدري يعني بسهر لحالي وش الفايدة وقلتله هالكلام قبل مارد قاللي كيفك وجلس شوي بنتي كانت نعسانه وحاولت انومها مانامت كانت طفشانه وكان هو قاعد يلبس بيطلع قلتله خذها شوي بالسيارة خليها تنام قاللي عندي شغل ماني فاضي قلت بصوت واطي اها شغل بالاستراحة طبعا قاللي اش قاعدى تقولي وش قاعدة( تاكلين هوا ) انا هنا ناظرته نظرة ان خير وش هالكلمة هو حس نفسه غلط قاللي اش قاعدة تقولين قلتله اش قلت انت قاللي انتي اش قاعدة تقولي طبعا وهو يصارخ المهم انا مارديت لفيت وجهي وهو طلع بعد اكثر من ساعه نزلت تحت انا وبنتي تخيلو لقيته تحت واخته ناظرتني وضحكت قالتلي في ناس اليوم زعلانين ماراحو عند اهلهم انا انقهرت ليش قالهم شوي وطلع انا قعدت بعد ماراح شوي تحت بعدين طلعت بيتي وارسلتله مسج ( مو قلتلي عندك شغل وانت قاعد تحت بعدين مو انت تقولي لاتوضحين لاحد اذا كنا زعلانين ليش قلت لاهلك خلاص انا بصير كل كبيرة وصغيرة بقولها لاهلي) طبعا انا بعمرررررررري ماقلت لامي او ابوي شي هو بعد كذا دق علي يصارخ قاللي ايش الرسالة هذي قلتله اش فيها زي ماقريت ليش تقول لاهلك قاللي كل هذا لاني ماوديتك امس قلتله من جاب سالفة امس انا ماقمت من الصبح اكلمك عادي بس انت صحيت متنكد وقاعد تصارخ انا مشيت موضوع امس والا لا اليوم ليش انت سويت كذا قاللي اسألي نفسك :(اموت واعرف وش يقصد المهم قعد يصارخ قاللي وش رايك ماعاد في روحة بيت اهلك ابد ونشوف قلتله اذا تقدر لاتقصر قاللي تشوفين وقعد يصارخ انا هنا خلاص فقدت اعصابي قلتله سوي اللي تبي وتشوف رح تشوف مني شي ماتتوقعه وسكرنا لما سكرت كنت مرررررررررررة معصبة كان معي ريموت تلفزيون رميته بالارض وانكسر وعلبة كريم رميتها وانكسرت شوي وتدق علي خالتي(ام زوجي)مارديت شوي والا هي طالعه تدق الباب فوق فتحت قالتلي ايش في وش صاير قلت ولاشي انا كسرت اشياء قالتلي ليش قلتلها كذا قالتلي اش صاير يعني قلتلها عشان يعرف يتكلم ثاني مرة وتركتها ودخلت الغرفة المهم نزلت انا رتبت كل شي وبقيت جالسة بالغرفة دقيت على زوجي قاللي وش في قلتله تعال قاللي مااقدر معزوم المهم رجع الساعة 1 ونص وانا كنت منسدحة بغرفة بنتي دخل معصصصصصب ويصارخ وش تبين قلتله اش فيك قالي مو تقولين تعال جيت وش تبين وقعدنا نتكلم وكذا وهو مررررة معصب يعني مافي امل اتناقش انا واياه كل ماقربت منه يقولي وخري عني:( ثاني يوم الجمعه دنزلت تحت وقعدت نص ساعه لما راح الصلاة بس محد جا عندي قعدت لحالي مليت وطلعت بعد شوي نزلت تحت اجيب اكل لبنتي كانت خالتي موجودة بالمطبخ ومكشررررررررررررررة طلعت ماكلمتها بعد شووي دقت امي علي تقولي اش فيكم وش صاير وش مسويه امس انتي قلتلها وش مسويه قالتلي وش مكسرة قزاز وطاوله كان عندي طاولة مكسورة من زمان بنتي كاسرتها قلتلها من قالك قالتلي ماعليكي بس ليش كذا قلتلها ليش مجنونه اكسر طاوله وقزاز قالت مدري قلتلها من اللي قالك قالتلي مالك شغل انا عرفت ان خالتي بس قلت خليني اتأكد دقيت على اختي قلتلها من داق على امي امس قالتلي خالتك انا سكت لماجا زوجي من الصلاة قعد شوي بعدين نام كان صايم قعدت اجهزله للفطور عندي فوق قبل الاذان نزل قلتله ترى قاعدة اسويلك فطور قاللي باكل تحت وطلع انا انقهرت سكرت الباب وراه بقوه بعدين العشا طلع وقعدنا نتكلم وهو يصارخ طبعا انا حاولت قد مااقدر اكون هاديه من ضمن كلامنا قلتله ليش امك تكلم امي هو سكت قاللي انا قلتلها بس بعدين يوم كلمته امه سمعته يسألها ليش تدقين على امها تكلمنا وتكلمنا لين وصلنا اني ارتب اغراضي بروح عند اهلي قعدت ارتب الاغراض طلع قاللي لما تخلصين دقي علي انا لما طلع وقفت عن الترتيب قلت بستنى لما يجي واتكلم معاه نومت البنت ودقيت عليه وجا قاللي خلصتي قلتله هذي ثالث مرة اناقشك وعلى فكرة طول المناقشات الثلاث كنت هادية واستغفر بس هو يصارخ قعدت اكلمه لين راق شوي قلتله خلاص انا باكل وبشرب فوق لحالي ماابغى كل مازعلنا من بعض تزعل امك مني ماشفتها كيف مكشرة بوجهي مافي داعي كل ماصار بيننا شي تدخل احنا نعرف نحل مشاكلنا (وعلى فكرة كل ماتدخلت تكبر المشكلة ) قاللي انا مااكل فوق مااخلياهلي قلتله كيفك بس انا باكل فوق اتفقنا كذا وتصالحنا ورحنا نتمشى رجعنا تعشينا سوا ثاني يوم راح الدوام انا مانزلت لما طلع من الدوام دق علي قااللي وش طبختو قلتله مانزلت مو احنا اتفقنا كذا ماقال شي رجع تغدى وطلع ينام وكل شي عادي ثاني يوم لما جا من الدوام جا عندي فوق قاللي وش طبختي قلتله ماطبخت ماعندي شي قلتلك جبلي اغراض ماجبت قاللي وش باكل انا قلتله مو انت تبي تاكل تحت قاللي كيفي اكل وين ماابي اليوم مافي اكل يعني قلتله ماعندي الا نواشف قاللي اليوم بعديها وبجيبلك اغراض عشان بكرة اكلنا وصار عاد ي ماتكلم شي نمنا العصر لما صحينا راح كالعادة طبعا عطيته ورقه بالاغراض اللي ابيها جابها وقعدت ارتبهم بالليل وصرت اطبخ فوق بس امه الحين زعلانه مني مع اننا تصالحنا هي كذا دايما كل ماتزاعلنا ونتصالح بس تبقى زعلانه بس انا هالمرة مارح اكلمها واراضيها لاني ماسويتلها شي تبي تتعدل من نفسها كيفها امس زوجي بعد ماجا من الدوام قعد تقريبا ساعة تحت ويوم طلع مقلوب كمته قلتله حاول تكلم امك مابي الوضع يبقى كذا قاللي خلاص اتركي امي بحالها بس هذا مو وضع وش الحل عطوني رايكم الإشراف / عفواً تم تعديل العنوان ليتضح المضمون |
الموضوع طويل لكن اللي فهمته تبغين حل مع أمه والحل هو قاله لك
اتركي امي بحالها قولي سمعا وطاعه أنتي لاتزعلين أمه وخليك طبيعيه معها احترميها وقدريها تزعل أو ما تزعل هذا شي ما يخصك اللي يهمك ويخصك إنك تحترميها وتقدريها اتفقي مع زوجك ان مشاكلكم وأسراركم ما تطلع وإن اللي فات مات وافتحو صفحه جديده الله يألف بين قلوبكم |
اختي الكريمة موضوعك يبي له ثلاث ايام عشان الواحد يقراه فحبذا لو تختصرينه باربعة سطور حتى نفهم المشكلة و نساعدك
|
اقتباس:
اتركيها بحالها يعني لا انزل تحت ولا اكلمها ولاتكلمني ولا اشوفها هذا قصده وعارفة ان الموضوع طويل بس عشان اعرف من الغلطان>>>>>>>>>>>>>>هذا وانا مختصرة اشياء كثيرة:25: |
انا أقول اتركيها بحالها يعني لا يهمك أمر زعلها
وتشيلي هم زعلها وكيف تراضيها لأن مالها لا ناقه ولا جمل بالموضوع اللي أشوفه انك تنزلين تحت وتسلمي عليها ولا تطولين باليوم أو باليومين ربع ساعه بالكثير واستغني بنفسك وبيتك واهتمي بزوجك وبصراحه ما اتوقع إن زوجك يرضى تقاطعين أمه كلامه لك اتركيها بحالها ردة فعل سريعه قالها بدون تفكير ممكن يقصد تقللين زياراتك لها الله يوفقكم ويألف بين القلوب دعواتك لي بالزوجه الصالحه |
كوني بارة بها فقط .. عامليها كمعاملة والدتك .. اذا زعلت وانتي مو السبب لاتشيلي هم مابقولك طنشيها بس توددي لها اهديها المعاملة بالحسنى تخلي الصخرر يلين وانتي اسلوبك حلو ماشالله :18:
واالله يسعدك يارب. |
وليش اصلا تتدخل بينكم خلى خلافتك مع زوجك مو لازم احد يعرف عنها ولا تبينوا لاحد
بالتوووفيق |
طبعا هي مالها حق نهائيا تزعل ولا تدخل بينك انتي وزوجك ودامها تزعل من الهوا سيبيها اهم شئ زوجك قالك مالك دخل فيها خلاص حطي في بطنك بطيخة صيفي واطبخي فوق وخليها خليكي طبيعية واضحكي عادي
|
كل الغلط على زوجك لييييييش كل ماصار بينكم شي يروح يقول لأهله يااااااااكرهي للرجال ألي كذا؟!
سبحان الله مهماكانت رجولة الواحد يطيح من عيني لما يروح يتشكى لأمه من زوجته!!!! وش خلى للحريم لاااااااااازم تقنعينه أي شي يصير بينكم يبدى وينتهي بينكم بدون مايطلع برى البيت أنتي وياه راح تتصالحون وتنسون لكن ألي برى البيت سواء أهلك أو أهله ماراح ينسون الشي هذا وراح تكبر الحواجز بينكم والكراهيه وحتى لو كانت المشكله تافهه رااح تكبر وتكبر وتكبر وممكن توصل للطلاق فلازم تنتبهون لحياتكم |
حبيبتي
بكون صريحة معاكي .. اسلوبك مع ام زوجك لا يليق أبدا .. قالتلي اش صاير يعني قلتلها عشان يعرف يتكلم ثاني مرة وتركتها ودخلت الغرفة لو تعامليها كأنها أمك ما كان تركتيها ودخلتي غرفتك ..صح والا لا ؟.. بصراااحه حركتك تزعل .. يعني لو قلتي لها سلامتك يا خالتي مافي شي .. تفضلي تقهوي معايه .. بالله اش راح تخسري ..!!! لو حطيتي في حسابك انها امرأة كبيرة في السن وكل اللي في عمرها يتدخلوا بقصد او بدون قصد في حياة أولادهم .. واللي يهون علينا موضوع تدخلااااااتهم المستمرة .. هو اننا متأكدين انهم يتمنوا السعادة لنا .. فانا رأيي عليكي انك تروحي تعتذري لها .. مو ذنبها ان ولدها قالها عن مشاكلكم .. هي أم وطبيعي ماراح تظل سااااكتة.. " فحلي هالمشكلة مع زوجك بعيد عنها " قولي لها يا خالتي سامحيني بس كنت معصبة والشيطان لاعب لعبته .. وعامليها مثل ما تعاملي امك بكل احتراااااااام وتقدير .. ومهما صدر منها لا تغلطي في حقها .. هذا بالنسبة لأمك .. أقصد ام زوجك .. ............ أما عن اسلوبك مع زوجك حبيبتي والله العناااااااااااد ما يفيييييييد .. يعني مثلا لما سألك أوديكي عند بيت اهلك في يوم الاربعاء كان بينتي فرحتك بسؤاله وتشكرتي منه واعطيتيه كلمتين حلوين .. فتفرحي انتي بشوفة اهلك وضيوفهم ويفرح هو لفرحك وتشكرك منه .. وماتدري يمكن يعرض عليكي ثاني يوم تروحين مرة ثانيه .. .. اسلوب التشرط وكلمة بكلمة أسلوب ينفر زوجك منك فانتبهي حبيبتي .. الله يهدي سركم ويصلح حالكم .. ت ح ي ا ت ي .. |
ونصيحه مهما شفتي من أمه ماتجين تقولين له ليش أمك تسوي كذا ؟
أو ليش أمك قالت كذا؟ بالذات اذا كانت أشياء تافهه حسسيه أنك تعتبرين أمه مثل أمك وحتى لو شفتي شي وكان لازم تقولين له تعالي بطريقه أني تضايقت لأني ماأحبها تزعل علي أو تشيل عليه ومن هالكلام أكيد أنك شاطره مايحتاج أقولك |
مع كل كلمه قالتها شعاع من نور الله يعطيها العافيه ماقصرت أكسبي أم زوجك عشان تكسبين زوجك
وبالتوفيق حبيبتي |
اقتباس:
عفوا اختي الكريمة ام زوجك زعلت من انك طنشتيها ورحتي غرفتك ولا عطيتيها احترام لجيتها جايتك ملهوفة خايفه يكون صاير لك شئ انتي او بنتك لاسمح الله وقلبها متروع عليك كأنك بنتها وتتركينها وتروحين لغرفتك وتتركينها تنزل الحالها ؟؟ عيب صراحة انا معاك ان زوجك غلطان مفروض ما يكلم اهله بكل كبيرة وصغيره بالبيت لان المشكله مهما كانت صغيره اذا طلعت من جدران البيت تكبر وهذا شئ انا مجربه حتى بالفضفضه لو تحصل مشكله معاك ومع احد وتجين ملهوفه تقولين وش صار ويروح ويطنشك وانتي ببيته وش بتسوين اكيد بتزعلين زوجك يكثر الكلام عند اهله بمشاكل بيته وهذا شئ غلط وانتي لا تقابلينه كل شئ بالمثل قالك مافيه روحة بكره تقولين مافيه روحه الاستراحه بكره <<<< خطأ علم امه بالمشكله تقولين بعلم امي بعد <<<< خطأ لا تقابلين المشكله بمشكله وتكبر الفجوة بينكم معصبين لا تتناقشون لا تنادينه من عند اصحابه علشان تتناقرين معاه وتتناقشون بمشكلتكم اجليها شوي المشكله موجوده وزوجك موجود مو طاير بس انتظري الىم ا تهدأ النفوس وكلميه بس انتي معصبه ومن عصبيتك كسرتي اشياء <<<< اعتقد لو زوجك فيه رميتيه بصحن روقي اختي الكريمة ام زوجك انزلي لها وحبي راسها اما مسأله خلها براحتها متى ما ترضى ترضى ما يصير تحية طيبة ولي عوده لاني على عجالة |
قرأت كل ما كتبت .. وضحكت في بعض المواقف .. صحيح الحياة لا تخلو من المنقصات بس في النهاية لازم نعيشه ونتعايش معاها .. ومشكلتك لو حبيت اسميها مشكلة "مش مشكلة" وعادية جداً وتحصل في كل البيوت.. وأنا شايف انك انسانة عاقلة جداً وبتتفادي المشاكل وبتحاولي قدر المستطاع المسائل ما تكبر وإنها تاخذ حيز ضيق ودي صفة جيدة جميلة وتشكري عليها .. أما الانفعال فهذا شيء خارج عن الإرادة وواجب إننا ندرب أنفسنا على كبت الغضب ومحاولة مسايسة الأمور بشكل وديّ بعيد عن الانفعال والتجريح .. وزوجك لأنه ساكن عند أهله ولاحظي دول أهله يعني شايفنه في الطالعة والنازلة وتعابير وجه لا تخفى عليهم وحب الاستطلاع عند البعض بجبره يتكلم والواحد مرات بحتاج يروح عن نفسه وينفس عن همومه والحكي بجر حكي .. فاهمة قصدي .. يعني مرات ما بكون قاصد يحكي والكلام تلقائي بطلع منه .. بمعنى انو ما بكون قاصد يكشف اخبار واسرار بيته والكلام مع أمه بكون في شكل ونس .. ودي حلها انو يا إما يكون عندكم مدخل ومخرج منفصل أو بيت منفصل تعيشون فيه ..
أما زوجك بحكم وضعه ووجوده، أوصيك بأن لا تصغري من شأنه امام أهله حتى لا يقال بأن القوامة لك .. وأنه ومعذرة للفظ "طرطور" عندك .. الزوج هو الزوج واجب احترامه وتقديره وطاعته .. وكل له حقوقه وواجباته .. أما عند عناده لك بعض الأحيان في مسائل الخروج سواءً عند أهلك أو لأي مكان .. يا أختي أهلك يمكنك أن تصليهم وتبريهم بالهاتف ومتى ما سمحت الأمور وليس لزاماً أسبوعياً زيارتهم ولا تجعليها عادة حتى لا يصبح من الصعب عليك تركها .. ومسائل الخروج دائماً تؤخذ باللين لا بالجبر والكلمة الطيبة صدقة .. .. وأعتب على زوجك خروجه المستمر وكما ذكرت للاستراحة وتركك وحدك .. هذا ليس عدلاً .. ويمكنك مناقشته في ذلك في ساعة صفو وأنك تملين من الجلوس لوحدك وانك تشتاقين له في غيابه ويمكنه ان يخرج يوم او يومين في الاسبوع وليس كل يوم .. يعني كلامك معاه يكون بنوع من الأنوثة والدلع .. نحن الرجال نكره الأوامر .. صدقيني هذه حقيقة .. بالسياسة يمكنك أن تلحسي عقل أعتى العقول وللمرأة طرقها وطرايقها .. أختي لدي الكثير الكثير لأقوله لك .. لكن تعبت من الكتابة أتمنى أن أكون أفدتك .. واذا اخطأت .. سماح |
حبيبتي انا كنت مثلك بس لما غيرت طريقة تعاملي مع حماتي كسبت زوجي وصار اطلبي وتمني الكبار بالسن ما بدهم الا الكلمة الحلوة وهادي مرة كبيرة بعدين زوجك ما برتاح ما دام امه ومرته زعلانين من بعضهم وهيك انتي بطفشيه من البيت ورح اصير ما احب يقعد معك وراح اضل يطلع مقلوب راسه عليكي وسدئي انتي الخسرانة الوحيدة والايام الحلوة ما بتروح الا من عمرك انزلي واضحكي عليها بكلمتين يعني شو مال الحلو زعلان والله ما اهون علينا زعل القمر ونوارة العيلة ولي فات مات انسي هلا كرامتك زوج الوحدة ما بيرضى تيجي وحدة وتجاكر امه حتى لو كانت ام بنته وما عليها غلط ولما ترضى راح ييجي ويحكيلك شبيك لبيك وبعد هيك صيري حذرة باتعامل بس من دون ما تبيني يعني كلي بعقلهم حلاوة بس مو بلؤم
|
وبحب اضيفلك اياكي اتبيني انك بتمشي كلمتك على زوجك لانة بصير اعاملك بالعكس بس علشان يثبتلهم انة حاكمك وانك ما بتمشي كلامك علي وانا بحكي من تجربة قدامهم اعمليه الكل بالكل وبينك وبينه اعملي كل شي بدك اياه طبعا افهمتيني
|
اشكر كل من عطاني رايه وشوره بالموضوع واسفه لتأخري بالرد
بس حبيت ابين بعض النقاط لكل من اعتقد ان معاملتي ماهي زينه مع ام زوجي بالعكس انا معاملتي لها جدا محترمة وبعمري ماغلطت عليها بحرف وبالنسبه لخروج زوجي للاستراحه انا ياما كلمته باوقات الرواق وقلتله اني اشتاقلك وبقعد معك مو كل يوم تطلع عالاقل يوم اي يوم لا انا بعمري ماغلطت على زوجي وهذي اول مرة اعصب بهالطريقه وبالنسبه للي قالو لاتخلين زوجك يقول لاهله كل شي انا مليون مرة ناقشته بهالموضوع اقوله مشاكلنا مااحد له دخل فيها نتهاوش نتضارب بعد خلاص اخرتها بنتصالح ليش تخرب علي وعليك وباالنسبه لخروجي كل اسبوع لبيت اهلي هذا اليوم الوحيد اللي اروح فيه بيت اهلي وباقي الاسبوع محبوسه بالبيت يعني مستحيل اتخلى عن هاليوم وزين مني راضيه بيوم واحد بس لا وبعد يخليني للفجر خواتي يروحو ينامو امي تنام بنتي تنام واحيانا ماتقدر تنام لانها متعودة على غرفتها واقعد انا زي الخبلة لحالي شكرا لكم مرة ثانيه ويعطيكم العافيه |
يعني انتي مقتنعة انك ما سويتي اي غلط ؟
او إنك بحاجة لتغيير أسلوبك في التعامل ؟!!! |
انا ماقلت ماغلطت
قلت فهموني ايش الغلط اللي غلطته معاها وحابه اعرف اذا لها حق تدخل فينا وبمشاكلنا وتدخل اهلي مع العلم ان امي لما كلمتها قالتلها انا مالي دخل فيهم هم يعرفو كيف يحلو مشاكلهم وانتو بعد خلوهم يحلو مشاكلهم بس هي ماتستوعب هالشي |
حبيبتي
نسبة غلط زوجك أكبر منك بكثيير .. فحلي مشاكلك معاه وطلعي امه من حساباتك .. يعني الحرمه انا أشوفها ما غلطت أبدا لأن ولدها يدخلها بمشاكلكم و إنتي ما تدري ايش يقولها بالضبط فطبيعي تكون ردات فعلها بهالشكل .. يعني صفي قلبك ناحيتها وعامليها كوالدتك واذا شفتيها تبغى تتدخل صرفي الموضوع بطريقة لطيفة مثلا " لا تشيلين همنا يا خالة الموضوع بسيط ما يستاهل توجعين راسك فيه ومن هالكلام اللي يبرد خاطرها ويوقف تدخلها ".. اما زوجك فلااااوم تغيري اسلوب عنادك معاه .. وتكثري من جرعات الدلع واللطافة معاه .. وتنبهيه باسلوب انثوي جميل انك ما تبغين اد يتدخل لا من اهلك ولا من اهله لانك يا حبيبي كل أم بتشوف ان الطرف الثاني هو الغلطان وتتشوه صورته في نظرها .. واحنا نتراضى بس هي ما تنسى .. الله يهدي سرك حبيبتي .. ت ح ي ا ت ي.. |
مافي بعد كلام شعاع كلام ينفال ...
يعني اختي انتي معهم في نفس البيت تبينها تسمع تكسير لازم تسال وتخاف ....وانتي الله يهديكي رديتي برد جاف عليها حرام كان لازم تكسبينها وتردين بلين اكثر ... كلمه مهمه ... ترى في رجال كثير تكسبينهم لاكسبتي امهم .... |
انا يطفرني الزوج اللي ينقل كل شي لامه وخواته
مايدري كلمه من هاذي وكلمه من هاذي وينقلب كل شي على راس الزوجه ويقولون الحريم ثرثارات ومايمسكون الس سر!!!! |
| الساعة الآن 07:50 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©