|
باقي 29 يوم على الزواج والأحوال تردت(حلت المشكله ولله الحمد)
السلام عليكم ورحمة الله وبركاته
أسعد الله أوقاتكم بكل خير اخواني واخواتي في الله الحقيقه انا سبق ونزلت موضوع لكم هنا ويمكن احدكم يذكره وكان طويل والحمد لله انحل وتيسرت اموري .. اليوم جايكم بموضوع مع ثقتي في نفسي وثقتي بعقلانيتي وحسن تصرفي مع خطيبتي لكن الشق أكبر من الرقعه وهالبنت زودتها الله يسامحها وما أبغى اتسرع واخربها على راسها .. أنا ما عندي شي أخسره نهائياً ولله الحمد سوى الخساره الماديه , والمال حنا نجيبه مو هو اللي يجيبنا يعني دام خسارتي ماديه فلا فكرت , لا تفكرون ان أحوالي الماديه تمام لكن كل أمور زواجي ديون وأنا ما عندي مانع أتدين واتعب لكن هل البنت اللي بتزوجها بتكون في الأخير تستاهل هالتعب كله !! قصتي مع خطيبتي بدأت الاسبوع الماضي من يوم الأربعاء مو الماضي , اللي قبله بالضبط , طبعاً زواجي في العيد الجاي ان شاء الله .. تملكت عليها في شهر صفر الماضي وكنا بنخلي الزواج في بداية شهر شعبان قدر الله بعد ملكتنا بأسبوعين يتوفى جدي وجدها عليه رحمة الله ( لأنها بنت عمي ) المهم حنا ما كان عندنا مانع بالزواج بعد أربعة أشهر لكن هي سوت زحمه وزعل ومن هالكلام وأجلته علشان خاطرها لعيد الأضحى !! مشت الامور تمام وحصل مشاكل وعفسه وانحلت وتصير بعض الأمور وتنحل ولله الحمد , المهم في شهر شعبان توفت جدتي أيضاً ام ابوي اللي تصير جدتها بعد , المهم في شهر رمضان وفي احد المكالمات وقالت نبي نؤجل الزواج !!!! قلت ليه خير ان شاء الله , قالت بس انا اخاف يقولون ما فيه طقطقه ورقص ومن هالكلام علشان موت جدتي , قلت : واذا صار ما فيه طقطقه وش المشكله فيه , الله أراد ان جدتي تتوفى وش تبيني أسوي , أروح أطلعها من قبرها يعني والا وش اسوي , قالت لا مو المسأله كذا بس المسأله ان هذي فرحتي ومن هالكلام , قلت شوفي أنا ما عندي أي مانع لأن زواجنا بيكون في العيد يعني بعد 4 أشهر , ومسألة اني اقعد كل شوي اتأخر في زواجي لا هذي مرفوضه لان كل الناس بتموت وانا ما تزوجت إذا جلست على هالحال وبعدين أنتي تبيني والا تبين الطقطقه وهالكلام , قالت أكيد أنت بس لام نحط طقاقات ويكون زواج مثل كذا .. المهم قلت ابشري ما عليك بنحط طقاقات وابوي وابوك ما راح يرفضون وانا بقنعهم لأن وفاة جدتي بيكون مر عليها وقت .. << تحسفت بعدييييين على اني قلت هالكلام لكن زلة لسان .. المهم مرت الأيام ووصلنا للتحضير للزواج من الاسبوع الماضي , استأجرنا قاعه هي كانت تبيها ( طبعاً عندنا البنت مالها دخل بالقاعه الزوج هو المتصرف في كل شي حتى لو يحط خيمه هي مالها دخل ) المهم قالت لي تكفى ابي القاعه الفلانيه لأنها قريبه من صديقاتي وابيهم يحضرون , قلت ابشري ومن عيوني بحاول إذا ضروفي سمحت والا ترا بناخذ القاعه اللي تزوجوا فيها عيال عمي لأن سعرها مناسب لي وانا ظروفي صايره تعبانه , قالت تكفى ومن هالكلام .. المههم ابوي قال لي انا علي تكاليف القاعه وبناخذ القاعه اللي تزوجوا فيها عيال عمك , رخيصه وكويسه , قلت يا بوي انا ابي هذيك القاعه , المهم الله كتب لي هالقاعه اللي تبيها هي وتيسرت الامور .. جينا عند الطقاقات وكلمتني , هاه بشر استأجرت والا لا لأني ابي رقمهم علشان الزفه ومدري ايش , قلت ابشري هاليومين , كلمت ابوي وقلت وش رايك انا ما ابي نحط طقاقات الا بعد اذنك انت وعمي قال لا مو لازم جدتك ما بعد امداها تتوفى وتبينا نروح نطقطق , قلت يا بوي لو اضمن جدتي تطلع من قبرها كان ما حطيت شي , المهم قال شاور عمك , رحت لعمي وابتسم وقال مهوب ضروري ( مثل اللي يقول اغصبني واطيع ) , طبعاً عمي يسوي نفسه اني عنتر بن شداد وشغلات النسوان ما تمشي ومن هالكلام .. المهم جاها الخبر من امي في نفس الليله , دقت علي معصبه , وليش تسوي كذا وانت وعدتني من قبل ومن هالكلام , قلت اركدي والعني ابليس وابشري باللي تبينه , بعدين أنا دايم ما أقصر معك في شي حتى القاعه خليتك تختارينها ( طبعاً انا معودها أشاورها واللي تبيه ما أقصر معها فيه ) قالت : يا رجال القاعه أدري انكم حصلتوا هذيك محجوزه وانجبرتوا على هذي والا مو علشاني ولا شي, قلت والله ثم والله انها علشان خاطرك ( طبعا نزلت علي هالكلمه مثل الصاعقه لأن قد حصل لي اكثر من موقف منها مثل كذا بالضبط ) , لكن انتي هدي وابشري الموضوع ما انتهى بكلم ابوي وعمي واضغط عليهم وما راح يقصرون وانتي روحي توضي وصلي ركعتين وبتهدا نفسك وان شاء الله الامور تتيسر , قالت وشلون تتيسر فهمني ابي اعرف كيف تتيسر , قلت انا قلت بتتيسر يعني ابشري .. ( طبعا كنت متعمد ما أشد معها لأنها معصبه وفرحتها ومن هالكلام وقلت أخليها لين تهدا ) كلمت ابوي وعمي اليوم الثاني قلت يا ابوي البنت تبغى وعلشان خاطرها وهذي فرحتها , قال ابوي وش رايك دام بنتك تبي وملزمه انا ما عندي مانع ( يقصد عمي ) , قام عمي يتمتم وعصب علي وانت ازعجتني وانت ولد مطفوق ومن هالكلام ( لانه ما يقدر على حرمته جاي يسوي عنتر علي لان حرمته عله وترفع الضغط والمشاكل كلها ما تجي الا من تحت راسها ) , ابوي زعل ولا هي بعادته وقام قال له : انت لو هجدت اللي عندك في البيت ما كان جتنا هالصجه كلها لكن امتحنونا من امس وانت عندنا تسوي الرجال العظيم اللي كلمتي ما تنثني , يا رجال رح رتبك امورك وسكت اللي عندك في البيت ولا يصير اللي صار .. انا قمت وحبيت راس عمي وابوي وطلع ابوي ومشى وانا توجهت لوظيفتي يوم الجمعه لاني مو في نفس المنطقه واستقرينا على اننا نحجز طقاقات .. طبعا البنت دقت علي وانا في الطريق وش العلوم ومن هالكلام قلت لها انا في الطريق الحين وقربت اوصل ولا جبت طاري الطقاقات وكنت رسمي بالحيل وخليتها لين السبت في الليل ودقيت , سلام كيف الحال ترا ابوك وافق وخلاص تفاهمي مع امي على مسألة الطقاقات , احجزوا وعلموني ارسل لكم فلوسها , قالت اوكي قلت يالله مع السلامه , طبعا بكل رسميه ( طبعا انا موضوع القاعه ضايقني وقهرني بشكل كبير ) .. جلسنا لين يوم الاثنين وانا بالعاده ما اقاطعها ,دقت وما رديت بعدها ارسلت لي رساله اخر الليل ( اشتقت لك يالقاطع :) ) خليتها لين جا الصبح وانا في الدوام وارسلت لها رساله ( ما اقطع من دون سبب , دوري لسبب واكيد راح تلقين ) ردت علي الظهر برساله ( دورت كثيييييير وما لقيت سبب ) رديت عليها برساله طويله ( ما راح اقطع من دون سبب بس الظاهر من كثر ما صرتي تغلطين علي ولا تقدريني صرتي تنسين .. انا ان رحت او جيت عادي عندك ما همك , ان سويت والا ما سويت ما همك , حتى لو يسوي خالد المستحيل لعيونك ما راح تتغير نظرتك السوداويه تجاهه وظنونك فيه .. وتبغيني ما انسحب واقطع ؟ إذا حس أي شخص انه ماله قبول عند غيره اكيد بينسحب الا اذا كان ذليل وواطي !! صدقيني كل شي يهون الا الكلام الجارح مع انك ما ترضين ان احد يجرحك بكلمه , لكن انا اللي استاهل وصدق من قال ( عز نفسك تجدها !! ) انا ما كتبت هالكلام اللا من الغبنه والزعل , واللي خلقك ان زعلي لو يوزع على الخلق ما يكفيهم .. اي انسان يحاول ينسحب ويقطع اتصالاته مع شخص يعزه وخصوصا اذا اعطاه قلبه الا انن خاطره مضيوم ومقهور وفضل انه يبتعد علشان يتفادى الجاي لان وش يبغى بالهموم والقلق النفسي , فيعيش حياته لان الدنيا ما تسوى التعب .. يمكن انك تنظرين لكلامي هذا على انه خوف او ذل لكن لا يجي في تصورك اني في يوم من الايام راح اخاف او اذل لاني اعرف نفسي ما اخااف الا من ربي وخوفي منه يردعني عن امور كثيره .. اقدر استخدم امور كثيره مع اللي حاولوا يتعرضوني بأذى لكن المشكله انهم غالين مع انهم ما قدروني بس اخاف مع طول الوقت بنفذ الصبر ويتغير الحال .. لاني خلاص صرت اشوف ان ما فيه احد يستحق التضحيه , فققرت اسكر قلبي واستغني بالله عن الناس كلهم لان لي قلب واحد ولا يمكن اني اغامر به .. عفا الله عن جميع الناس من عدو او صديق .. طبعي المسامحه لان الدنيا ما تسوى في عيني شي , والا فضل اني اكون مع نفسي ومن حالي في حالي علشان اتجنب احد يعترضني واتجنب في نفس الوقت اني ما انتقم لاني اذا نويت انتقم راح ابطش .. سامح الله الايام وش سوت ) انتهت الرساله طبعا ارسلتها الساعه 12 الظهر ومن بعدها اتصالات ورسايل لين جا العصر وفيه رساله هزتني ( اسألك بالله ترد ) انجبرت ارد عليها برساله وهي ( لا تسأليني بالله الله يخليك , انا ما رديت برساله الا علشانه وانا الحين ما اقدر ارد عليك ) ودقت وحاولت لين الساعه 3 العصر , بعد بساعه ارسلت هالرساله ( تدري انك اول مره تكون قاسي علي لهالدرجه , طيب انت زعلان كيف اراضيك وانا مو عارفه سبب زعلك بالضبط , تقول اني جرحتك ولا قدرت اي شي تسويه لي , ليه يعني انت شايف اني جاحده لهالدرجه يعني ؟ انا قد قلت لك وبقول لك مليون مره انا لو ادور العالم ما راح الاقي مثلك جعلني ما انحرم منك , وانا ادري اني لو اطلب عيونك عطيتني اياها ما قصرت معي ولا راح تقصر , لا تزعل ولا تضيق خاطرك من شي منت فاهمه او فاهمه غلط , ولا تحط في بالك ان مالك عندي قدر , يشهد علي الله ان قدرك غالي وعزيز .. مدري وش اقول بس احسك كرهتني من قلب ) طبعا بعدها انقطعت الاتصالات من يوم الثلاثاء لين اليوم وانا حلفت بربي ما اتصل لو يصير اللي يصير , انا ما كنت متوقع انه بتقطع بعد هالرساله وعطتني هالرساله مؤشر ايجابي لكن الظاهر امها تدخلت او اختها وقالت خليه ينطق , لاني واثق ان امها واختها المتزوجه يتدخلون كثير .. لحد الحين ما اتصلت ولا شي , وانا ما كنت اتوقع تسوي كذا , لاني اعرفها زين مو منها هالشي , وانا ما ادري هل هي تبي ادق عليها واعلمها اني زعلت من كذا وكذا واقول لها تكفين تعالي راضيني .. نقطه مهمه : والله الذي لا إله إلا هو اني ما قصرت عليها في شي ويمكن الشي الوحيد اللي طلبته ورفضته هو المصروف لانه مو من حقها وحسيته اسلوب استغلال .. والله الذي لا إله إلا هو اني انا وياها عند ربي نتصافى واني ما اسامحها على اللي سوته وجالسه تسويه .. والله الذي لا إله إلا هو اني دعيت على من يتدخل وما زلت ادعي ان الله يحرمه الذريه ويحرمه اعز ما يملك وهذي اختها الكبيره الانجاب عندها صعب جداً واحتمال كبير ما تقر تنجب .. انا ما ودي ادعي على احد , انا رجال طيب وفيني خير لكن دمرتني الله يدمر من كان السبب وانا والله ما زلت صابر وراكد في كل اموري ولكن لا احد يقول لي دق عليها لان والله الذي لا اله الا هو ما اتصل لين تدق هي لو يكون على طلاقها .. سامحوني يا اخواني والله اني انفعلت , انا طيب معها لابعد الحدود حتى في مره كانت زعلانه اربع ايام وانا يوميا اتصل وارسل , والله ما بقى شي الا سويته حتى المكياج طلبتني ( مع ان الخطيبه ما تطلب خطيبها ولا تعد اللي مثل كذا الا قليلة حيا ) وشريته لها والدبله غيرتها ورقم جوالها غيرته والجهاز وعدتها اغيره والبنت مو قنوعه وانا كرهت شي اسمه زواج مع علمي ان فيه بنات طيبات حيل لكن اللي صار صار .. http://www.66n.com/forums/showthread...ED%CF%E6%E4%ED هذا رابط موضوعي الاول علشان تتوضح لكم الصوره كامله عنها .. ساعدوني الله يوفقكم انا ما ابي اتسرع وهي امها واختها خبيثات واخاف يدبرون لي مكيده ويقلبون الموضوع علي .. سامحوني انا انفعلت ولا تلوموني ما زلت مقهور وزعلان .. |
طبعا انا رايق واعصابي بارده دامني على حق ومو من عوايدي اسلى عن صوتها لكن هالمره غير احس اني في حرب مو زواج واحس اننها تبي اهانتي علشان ادق لكن والله ان تبطي ..
بس قلت اكتب لكم هنا واشوف وجهة نظركم , هل تؤيدون اني ابقى مطنش ( مع اني راح ابقى مطنش ) ؟ |
نداء إلى عزوبي بس رجل لأنه نفعني المره اللي راحت وانا اشكره وادعي له ان الله يشفيه ويا ليت يتواجد هنا لأن احسه بينفعني كثير ..
|
عليكم السلام ورحمة الله أخـي الكريـم هـل تتفـق معـي ان الذي تبغاه من زوجـتـك هـو التقدير والإحترام وحفظ المعروف والإعجاب بـك...وتقدر تعبك وسعيك لأجـلها.... و تذكر لما حليت مشكلتك مـع خطيـبـتـك،،، كانت عبارة عن مجلسة مصارحـة وشفت كيف دمعـت عينها وشعـرت فيـك،، وانحلت المشكلة بينكم.... فوضـعـك عـمـومـاً مع زوجـتـك ما منه خـوف أو يصل للطـلاق، وأنت ما شاء الله عليك عندك القدرة على وضع النقاط على الحروف... وزوجـتـك طيبـة قلب تحتاج لصبر وتوجـيه ومسايسة ومصاااااااااارحـة وهـذا الذي اكـد عليه الأعضاء في موضوعـك السابق.. لأن الصراحـة في وضعك ومعـك لها مكان وتأثـيـر....:22: لما تراسلتـوا بالرسائـل كان الأولـى انك تصارحـهـا بما تجـهـله وما يضايقـك فتصارحـهـا بتجريـحـها بالكـلام لك وتـبـيـن لها انك تـريـد الإحـتـرام والتقدير منها كـزوج ورجـل وإلا لن تجد منك الحب والعـطاء والسعي لإسعادهـا ....وانه لو كان هـذا الشيء وانها تحـكم رأيـها وتجعل امرها ورأيها بينك وبينها.... ولا تسمع لأحـد.... خـبـرها بذلك بالإضافة مالك إلا الصبر حتى يتم الزواج وتشرف بيت العـز وتنتقل معـك....اكيد بتتغيـر للأفضل أظـن انك تحتاج لزيارة مفاجئة لها ،،، لتخبرها بما عندك ولا تنسى تهدي لها... وخـل فيك حـزم ولـيـن كما مثل المرة السابقة، ولا تـطول الجـلسة معها كعادتـك في كل زيارة لها.... لكن وضـح لها انك كـرجـل ملزوم انك تعطيها الحب والحنان والأمان ،،، وبالمقابل انك تريد منها الإحترام والإعجاب والتقدير والتودد كزوجـة... وأكـد على هـذا الشيء لها... والله يوفقك ويتمم لك على خيـر ويصلح لك زوجـك ويديم عـزك وخيرك عزوبي:21: بس:d رجل:30: |
الشيطان يحاول التفريق بين الزوجين وأفضل ما يمكن للزوجين فعله عند الخلاف أو الغضب هو التوضأ والصلاة والدعاء والإستغفار الاستعاذة بالله من الشيطان الرجيم وبهذا يتغلبان على الشيطان ويضيعان مقصده والله يعينك ,, وييسرك لك زواجك |
افيدوني ..
قريت موضوعك هذا والي قبله وواضح ان خطيبتك الله يصلحها .. تفكيرها شوي مادي طيب نجي لمشكلتكم الي الحين مخليتك ما تكلمها اقتراحي .. ترسل لها مسج تقول فيه وش زعلك بالضبط من موضوعك هذا فهمت ان كلمتها يوم قالت انت ما حجزت القاعة عشاني .. هي الي جرحتك بالصميم فانت ارسل لها مسج قل شوفي كلامك وتصرفاتك مافيها اي تقدير لي .. وعطها الامثلة .. خلك واضح معها لان واضح انها ما تشوف اخطائها بنفسها .. صراحتك معها باي موقف .. احسن الف مرة من انك تشيل بقلبك ايام طويلة املا انها تحس .. وهي ما تحس وتصدمك زيادة وتزيدك غبن .. ارسل لها مسج قل الشغلة هذي وهذي ضايقتني .. ولا يتكرر اذا تبين مكانتك بقلبي ما تتغير .. وبس |
الله يعين
ماحد مرتاح |
ما حبيت أخرج من دون ما أدعيلك....
الله يبعد عنكم شياطين الإنس والجن... أخي العزيز, عجل بالزواج طول ما إنت رايد البنت, هذي بنت عمك... |
بصراحة واضح أن ضغوط الزواج مأثره عليك ومخليتك قابل للإنفجار في أي لحظة
ألحين أنت زعلان لأنها طلبت دقاقات أي بنت في مكانها بتطلب نفس الطلب أو زعلان لأن أبوها كان صارم مع أن الطلب لبنته ترى لوقدرت تقنعه وعرفت أنها مارح تواجه إعتراضات من العائلة كان ما إحتاجت ولجأت لك وأنت بعد ما قصرت طقيت الصدر وقلت لها خليها علي خلاص خلك قد كلمتك ولا يمكن زعلان لأن شكرها ما كان على قد الجهد اللي بذلته في إقناع أبوها وأبوك شكلك مظغوط وتبغى تعيشها الظغط اللي أنت عايشه يعني أنا مو عارفة بالظبط وين الخطأ اللي أرتكبته زوجتك؟؟ إذا أنت محتاج أنك تلمس منها التقديروالشكر والإعجاب على اللي تعمله لها أطلعها على التفاصيل عشان تكون معك في الصور ة وصارحة بكل اللي في خاطرك أما أنك تزعل وتبغاها تعرف لوحدها ليش زعلت منها فصعبه هي ما قصرت لما عرفت أنك زعلت حاولت تراضيك رسايل ومكالمات لكن أنت ما تبي ترضى أش المطلووب منها تصلح أكثر من كذا ترى العتاب إذا زاد عن حده مو حلو ويخلي الطرف الثاني ينفر منك الله يهديك الموضوع بسيط ومايسوى كل هذا الزعل لا تخلي الشيطان يلعب عليك وبعدين أنا لا حظت أنك ما تزعل إلا بعدما تنحل المشكلة يعني بعد ماتفاهم أنت وزوجتك على المصروف زعلت وبعد ما تفقتوا على الطقاقات برضه زعلت ما خليتها تفرح خربت عليها فرحتها المفروض تكمل جميلك وإذا عندك ملاحظات لزوجتك قولها بوضوح وبدون زعل لأنه باين على البنت أنها تحب وماتقوى على زعلك مبروووووووووووووك مقدما ياعريس موفق |
تراي سجلت عشان أرد عليك
نصيحه أقطع المكالمات بينكم ألين يجي العرس عشان ماتكثر المشاكل بينكم وتكبر القلوب وأذا جت في بيتك أرضها وطيب خاطرها وهي بتكون مثل ماتبي وتحب أن شاء الله |
اقتباس:
انا مع كلام عزوبي بس رجل! المصااااااااااااااارحة احسن شي اكثر ما يدمر العلاقات ايا كانت هي عدم القدرة على الحوار و المصارحة!! خلك صريح وقل الي بخاطرك وبدون تردد وشف كيف راح تتصرف الله يفرج همك :) |
اقتباس:
كلام سليم وأوافق على كل كلمة كتبتيها بعدين يا أخوي ليه التغلي الزايد البنت يوم عرفت إنك زعلان ما قصرت حاولت تراضيك وأنت مسكر المنافذ أرسلت رسايل ومكالمات لين طاب خاطرها وحست بالإهانه عشان كذا قطعت اتصالاتها ورسايلها افرض أن شخص ما تجاهل اتصالاتك ورسائلك ماذا ستفعل ؟ قس أفعالها على نفسك وتعرف اش كثر الخطأ اللي وقعت فيه يوم تجاهلتها وهي شاريتك وأنت بايعها ببلاش ورجاءا لاتسيء الظن بأمها وأختها (إن بعض الظن إثم ) سؤال/ وش تبيها تسوي لك حتى ترضى ؟ اسمح لي على الكلمة اللي بقولها أنت يا خوي تصنع من الحبة قبه وتكبر السالفه وهي ما تستاهل يا أخوي سامح واحلم وكبر عقلك وبادر بالإتصال والسؤال عن الحال وتصفية القلوب الله يهديكم ويألف بين قلوبكم |
بقولك شئ بصراحه أنت الغلطان ؟
أولا.... اذا هي طلبتك بشئ وأنت تقدر تجيبه ونفسيتك راضيه عليه يا أخي جيبه وخلاص وأذا أنت ما تبي الشئ ورافضه لا تسويه بصراحه محد يغصب انسان علي شئ ما يحبه ولا تعطي شئ ونفسك ماهي راضيه عليه علشان لا تنتظر بمقابلها كلمه شكر مع التقدير وهذي الحياه الزوجيه كلها طلبات في طلبات وأنت عاد مد يدك بالمستطاع واللي عاجبه عاجبه واللي مو عاجبه قوله هذي هي ظروفك واحوالك والله لا يكلف علي عباده بالواجبات والفرائض فما بالك بالدنيا وزينتها ثانيا.... هي حاولت تعرف منك شو اللي مزعلك منها بغض النظر عن تصرفاتها بس انت رفضت المواجهه وفضلت الصمت عن الكلام والنقاش والتوضيحات وكأن الأفضل لك ولها الوقوف علي كل منعطف وحل الخلاف بالحال ولا يهم من يكن المبادر بالنقاش لكن المهم أن النقاش معلوم وجاري حله بينكم .... والأن تراكمت بالنفوس الكثير ولم تعد تطيق المزيد يا أخي هي بنظر نفسها طلباتها عاديه وما فيها اي شئ يستحق الزعل لذا لا زالت تجهل سبب صدودك ولا تعرف ما الذي جرى لك ؟ أخي لازم تعرف أن تفكيرك غير عن تفكيرها وهي مش ساحره علشان تقلب الأوراق و تعرف شو اللي يزعلك ويفرحك والله جعل اللسان ترجمان العقل والقلب . أنت الحين بينت لنا وحنا فهمنا من شرحك لمشكلتك أنت ليش متضايق منها لعدم تقديرها لمحاولاتك لأرضاء نفسيتها وتحقيق رغباتها بس هي لازالت تجهل السبب لأنك أعطيتها عطايا وهدايا وانت راضي شكليا لكنك من القلب غير راضي فكيف تريد منها أن تفهم ما خفى عنها ؟ أكيد بتظل الامور غامضه عليها وأنت ستظل تنظر لها نظرة المستغله لما في جيبك ويجب عليك الأن المسارعه بتوضيح الأمور لها وأنتظر منها التجاوب معك وبأمكانك كتابة رساله لها أو ايميل لانك حلفت عن عدم مبادرة الكلام منك أو أبقى الأوضاع علي ماهي الأن وبعد الزواج تتفاهموا والله يعين ولا أعتقد بأنها مشكله كبيره الا اذا انت تركتها بدون هوامش فقط يجب عليك بأن تتحدث بصوت مسموع عن ما يقلقك وما ترضاه وما ترفضه |
الله يوفقك ويقر عينك فيها ويقر عينها فيك
ويسهل لك كل عسير أكثر من الإستغفار وبإذن الله ستفرج لك أسأل الله لك ولنا الفرج |
السلام عليكم ورحمة الله وبركاته
منقطع عن الكتابة من فترة طويلة .. لكن شدني موضوعك لأن في زوجتك صفات قريبة إلى حد ما من طليقتي الله يستر عليها وحبيت أفيدك بتجربتي ربما يزعل بعض الأعضاء من الكلام اللي بقوله .. لكن اللي يفهم زين وش مقصدي ما راح يزعل بإذن الله أول ما قريت كلامك زعلت عليك .. لأن التمادي في العطاء والبذل بالشكل اللي أنت تسويه ما راح يفيدك .. بل على العكس .. لا أنت ولا زوجتك .. لكن بعد ما ذكرت موقف القطيعة منك وإن البنت ردت لك مرة ثانية وحاولت تعتذر وحست بالخطأ أعجبتني حركتك خصوصا إنها أثرت على زوجتك إيجابيا ولا ظهر منها تعالي وتكبر .. لكن تصرفك بعد كذا ما أعجبني مرة ثانية !! كان من المفترض بعد ما شفت البنت ندمت وحاولت تراضيك إنك ما تطول عليها بالقطيعة زيادة .. لأن هذا فعلا يجرحها وهي سوت اللي عليها .. أنا لو كنت بموقفها راح أحس بالذلة وهذا شعور سيء جدا بين الزوجين .. أفضل تصرف في الحالة هذي إنك تتصل عليها وتعلمها إن زعلك مو كره لها بل كان من غلاتها عندك .. وإنها لو مو مهمة بحياتك كان طنشت ولا شلت هم ولا زعلت ولا شي .. واقبل اعتذارها بطريقة تحسسها إنها سوت الشي الصحيح بالاعتذار .. وبعد كذا عطها كم كلمة حلوة .. صدقني بالطريقة هذي راح تشتد المحبة بينكم بشكل ما تتخيله .. وراح تاخذ زوجتك الموقف هذا كدرس لا ينسى بحيث ما عاد تكرره مرة ثانية .. وراح تعرف هي أيضا إن زعلك مو سهل .. صعب تزعل بس بنفس الوقت زعلك مو هين أبد .. كذا ممكن تعطيها شخصية رجل حقيقي .. لكن العطاء المستمر ومحاولة الإرضاء بالعطاء طريقة غير سليمة أبدا أبدا .. ما يمنع إنك إذا اتخذت قرار معين وشفت إنه هو الأنسب إنك تلزمها فيه خصوصا إذا شفت إن اللي عندها مجرد طيش بنات .. ممكن تزعل اليوم .. وممكن تزعل مرة ثانية بعدين .. لكن بعد كذا صدقني تتأقلم عليك وتعرف ايش اللي يرضيك وايش اللي يزعلك جيد إنك وريتها كيف إنك حليم لكن زعلك قاسي لأنه درس جيد لمثل هذا النوع من البنات .. وهي أيضا تتفاعل إيجابيا مع الطريقة هذي وهذا في صالحها وصالحك .. شخصية زوجتك -والله أعلم- تحب تتدلع عليك وتحب تتنفذ طلباتها .. لكن مو لدرجة إنها تكرهك لو ما سويت اللي هي تبيه .. أو لدرجة إنها تزعل زعل طويل ويقل أدبها معك وتستمر المشاكل .. بالعكس ربما تزعل في البداية - وهذا متوقع في بداية الزواج- وبعدين ترضى وتعرف لك زين لا تطول عليها أبدا .. ارجع لها مرة ثانية .. ولا تظن إن مكالمتك لها مرة ثانية ذلة ومهانة .. الزوجين ما بينهم ذلة ومهانة .. اللي بينهم حسن تصرف وحكمة .. وخلك أنت الأعقل .. التمادي في القطيعة له عواقب وخيمة صدقني .. خصوصا في بداية الزواج يحتاج إنك تقرأ كتب معينة في فهم طبيعة النساء .. وزوجتك تقرأ في فهم طبيعة الرجال .. احرص إنه يكون قبل الزواج .. صدقني بتنكشف لك أمور ما تجي على بالك أبدا .. أنصحك بكتاب (الرجال من المريخ والنساء من الزهرة) جميل جدا أذكرك .. زوجتك ليست سيئة إطلاقا .. بالعكس أعجبني تصرفها لما حاولت تعتذر .. واستغل ذلك في صالح حياتكم الزوجية وعلى سالفة دخول أحد بينكم .. صارحها بالموضوع وقل لها أنا وأنتي واحد .. محد يدخل بيننا مهما كان .. واتفقوا على السرية التامة .. لا تطلع مواضيعكم لأحد أبدا حتى أبوها وأمها .. اتركوا مشاكلكم بينكم صدقني ترتاح مرة وهي ترتاح .. مو حلو إنها تدخل بيت أهلها وبعيونهم زعل عليها أو عليك وتسمع بس نصايح من يمين ويسار .. كل اللي كتبته لك من واقع تجربة .. والله يوفقك ويكتب لك كل خيرة |
على سالفة الحلف .. الدين يسر يا عزيزي .. كلمها وروح كفر عن حلفك بإطعام عشرة مساكين عند أقرب جمعية خيرية .. ولا تخلي الشيطان يكبر موضوع الحلف براسك .. (من نذر أن يطيع الله فليطعه .. ومن نذر أن يعصيه لا يعصه)
|
بـرد عليك بناء على مشكلتك السـابقه ! اكثر انسـان قريت له موضوووع بهالمنتدى واعجبني اسلوبه وتصرفه اثناء المشكله هـو { انت } طريقتك في حل مشكلتك السـابقه ماراح تعجزك عن حل مشكلتك هـذي ! جدا معجبـه بطريقة تفكيرك وسردك للمشكله وللحل ايضـا ! لكن !!! لديك ردة فعل سريعه جدا جدا !! ممكن تخفف منها شوي ؟! بقـولك شي ؟! هات لي بنت ترضى يكون زواجها بدون طقاقه !! ماااااااااااااافيه !! ابـدا مافيه ؟! وش هالزواج السكتم بكتم الله لايكتبها علينا ! مالومها يوم تدق وتسأل وتلح بالسؤال من هالناحيه الزواج باقي عليه اقل من شهر ؟! اكيد بتقلق وتقلق اهلها معاها وتقلقك انت بعد ! اخـوي والله العظيم ان زوجتك الآن تعيش اقسى ساعاتها ولحظاتها !! الخوف والقلق ملازمان لـ { الزواج .! كفايه عليها الي تعيشـه ! ومتأكده وانا بنت واعرف وش تقصد زوجتك من كلامها ! يوم تقولك : انا عارفه انكم لقيتوا القاعه محجوزه وانحديتوا على الي ابيها !! والله ومتأكده من كلامـي .. انها بس جس نبضك تبيك بس تحلف وتقول لا والله عشانك انتي هي مو مصدقه انك تحبها هالكثر !! بس تبيك تحلف انه عشانها ! تفكيرها فهمته من يوم ماقريت كلامك ! اخـوي ! زي ماطبيت المرهـ الأولى عليها طب هالمره ! وكلمها .. والله كفايه القلق الي هي فيه وربي هي بموقف جدا صعب ! حاولت تراضيك ودقت وكسرت جوالك !! وبعدين ؟! انا متأـكده ان الكلمه جرحتك بس مشكلتنا مانفهمكم ومشكلتكم ماتفهمونا !! مثل ماقلت لك :: الي قالته زوجتك لك .. انا متـأكده منه مليون بالميه .! هذي من فرحتها انه شي كبير زي كذا .. وقاعه انتوا متعودين تعرسون فيها ! ورخيصه وعلى قد ميزانيتكم ! تتركها وتحجز الأغلى والأحسن بس عشانها ! هي بس تبي تتأكد تبيك تسوي الي سويته الحين وحلفت لها ! تبي تعرف هل خالد صدق يحبني ؟! معقول اختار هالقاعه عشاني ! يالله شو هالهنـا الي انا فيه <<< مشاعرها مترجمه هنا !!!!!!!!!!!!! اخـوي قول اعوذ بالله منك يابليس .. وبادر بالصلح .. خليها تتعلم منك هالتفاني والطيبه والأحساس بالآخرين !! اخـوي : والله انها الآن محتااااااااااااجه بس تشـوف رقمك واتصالك او حتى مسج تعاتبها فيه ! ياليتكم بس تحسـون بالي تحسه البنت !! او على الأقل تملكون الأرقام السـريه لبعض كلماتنا ووش نقصد فيها !! كان ماصارت هالمشاكل .. |
بــــــــــــآك لحظه لحظه لحظه !!!!!!! اخـوي : وش سـالفتك مع الزعل وعدم الرد على اتصالاتها ومسجاتها !!!!!!!!!!!!!!!!! رحت قريت شوي بالموضووع السابق ورجعت ! اسـلوبك لازم تغيرهـ الله يرضا عليك ! ابـدا ابـدا ابـدا !! هذا مو اسلوب ! لازم تغيــــــــــــــــــــــر من هالمعامله الجافه الي كلها قسـووووووووووووووه !! والله اسسلوبك يحرق القلب !! وينبت جفووووه كبيره بينك وبين زوجتك ! واذا هذا اسلوب زوجتك بعد ! لازم تتفقون انكم تتركونه ! وتتجهون لشي اسمه المصارحه !! <<< ومافي غير المصارحه ؟! وماتبيتـون المشكله وتنامون زعلانين من بعض !! شلون يعني بكرا بتعيشون ببيت واحد ! وانتوا تعودتوا على هالشي وش بتسوون !؟ كل واحد بيقفل على نفسه الباب ويضل زعلان ؟! معقـول !! ترا مرررررررررره مره طريقتك هذي خطا ... ارجـع وفكر فيها وشووووف وش الي سببتها لك هالحركه وش راح تسبب لزوجتك من الم وجرح كبير !!! * وانــــــــــــا متأكده وموقنه تمااااااااااااااما انك راح تتوصل لحل .. وتتوصل لطريقه كويسه تتفاهموا فيها بدال حركات البيبهات << اسمحلي يعني تقفيـلة جوال وعدم الرد على الاتصالات .. مره تزعل هالحركه .. لوحدها تزعل !!!!!! |
^^^^^
في الصميم dant!L ~} :22: |
الله يسعدكم جميعاً
<< مروق الحين وشهيته مفتوحه للكتابه والروقان والتفكير المرتب .. حبايبي تعالوا نتعلم من شيخ الإسلام الإمام الشافعي الذي قال: رأيي صواب يحتمل الخطأ ورأي غيري خطأ يحتمل الصواب ) وأنا لست ملك منزل ولا نبي مرسل علشان أعرف أني مصيب .. الشيء الثاني يقول الأخطل الصغير : لا يعرف الشوق إلا من يكابده .. ولا الصبابة إلا من يعانيها ولا يسهر الليل إلا من به ألم .. ولا تحرق النار إلا رجل واطيها يا جماعه أنا قرأت ردودكم كامله , بالنسبه للبعض فكر اني زعلان بخصوص موضوع الطقاقات وانا والله ما شلت همه ولا فكرت فيه , أنا كل اللي قهرني في هالموضوع ونرفزني موضوع القاعه .. والله ياجماعه ان ما لها حق فيه لكن من باب التقدير مني لها وزياده على اللي سويته ( مو منه ولا شي لكن حتى هي اعترفت بلسانها اني سويت لها اللي ما ينتسوى ) .. هذا هو اللي ضغطني بشكل كبير اللي هو موضوع القاعه واني اخترته علشانها وفي الأخير قالت مو علشاني وكأنها تكذبني .. طبعاً بعضكم حملني الخطأ وانا معكم اني قد أكون مخطيء وقد أكون مصيب , أنا اعترف اني أخطأت في اني ما قلت لها سبب زعلي .. عموماً هي دقت البارح أخيراً تقريباً على الساعه 10 وانا كنت نايم ومع ذلك رديت لأني ما خليت الجوال صامت وكنت انتظر منها اتصال ورديت وصوتي واضح اني كنت نايم وقالت اوكي مع السلامه , واشوا الحين تعديت مرحلة الخطر ههههه واليوم دقيت عليها قبل شوي لاني حلفت ما ادق الا اذا بتدق هي ودقيت على الساعه 11 ونص قبل صلاة الظهر وهي أكيد نايمه وانتظر اتصالها وبنشوف وش بيصير .. __________________________________ << دقت علي وقطعت علي الرد ألو : خالد أخبارك وعلومك وش مسوي ومن هالكلام .. حي الله الزعلان اللي ما يرد علي ومدري ايش .. قلت حبيبتي << مسوي نفسه رسمي بس ما زلتي حبيبتي .. انا كل زعلي علشان كذا وكذا وكذا واللي ابيه كذا وكذا وكذا .. قالت ابشر ولا يهمك بس انا احبك وما ابي ازعلك واللي سويته والله انه علشان تتنرفز معي يوم دقيت وقلت لك ما يصير يتم الزواج بدون طقاقات ولاحظتك رايق مره وقلت ابيك تبين انك مهتم وان الموضوع مثل ما هو كبير علي , بعد انت كبير عليك وكنت ابيك تتفاعل معي ووتتنرفز خخخخ وقالت انا والله عارفه انها علشاني استأجرت القاعه والدليل ان امك قالت لنا وهي تسولف , تقول نبي ناخذ القاعه الفلانيه وخالد مو راضي ويقول لأبوه لا نبي هذيك القاعه , وتقول انا عرفت انه علشاني انت معارض .. المهم قلت لها انا متفاعل ومهتم وكنت بس ابي اهديك والدليل اني اليوم الثاني ارغمتهم على الموافقه لعيونك بس .. المهم اني انهيت كل شي وفهمتها مره ثانيه ما تسوي كذا معي وانا ما احب اسوي لها شي يضايقها بس هي نرفزتني وطلعتني من طوري وخلتني استخدم هالاسلوب , وقلت لها باستطاعتي اسوي شي اكبر من كذا .. فهمتها ان حنا في مجتمع قبلي وذكوري بحت ولا ترغميني على اشياء اسويها تقهرك , قلت انا ما اظلم ولا يمكن اظلمك لكن باستطاعتي اقل شي اسويه آخذك من بيت اهلك واوديك لشقتي واكنسل حجوزاتي حقت شهر العسل واحرمك فرحتك , ولا احد يقدر يلومني في هالشيء لأن اهالينا عادي عندهم لو ما رحنا شهر عسل , وعلى الدقه القديمه , يعني بيقولون مهوب لازم الواحد يخسر نفسه , قالت صادق .. قلت اجل لا تحديني على امور انا ما ابيها حتى بس لو ابيها بتصير , فسوي اللي قلت لك وكوني لي جاريه أكون لك عبدا .. لأني ما اقبل اعيش مجحود , يعني اسوي واسوي واسوي وفي الأخير ما كأني سويت لك شي .. قالت ابشر .. المهم رجعنا الامور تمام ويوم وصلنا لنهاية المكالمه .. قالت : خالد , أحبك ولا ودي تزعل مني الله يخليك والله الأيام اللي راحت علي انها كانت ثقيله بشكل ما تتخيله حتى أغراض العرس وقفت وما عاد شريتها , لأني خذيت كلامك ان كل شي انتهى وانك سكرت قلبك بجد .. قلت خلاص أنسي اللي صار وهي فترة زعل تمر على كل الناس وهذا درس وان شاء الله انك بتستفيدين منه .. وانهينا المكالمه ..... عموماً يا أخواني بارك الله فيكم فرد فرد وفرج الله همومكم ويسر أموركم وانا والله مقتنع اني مو كامل وان بعض تصرفاتي خاطئه لكن دائماً أحكم عقلي في هالأمور وانظر لغيري ومشاكلهم وأحاول اتجنبها , لكن مثل ما تعرفون الشيطان حاضر وانا والله ما لجأت لكم الا ابي حل ولا أي مشكله أعرضها عليكم لأن المنتدى ما وضع الا للمواضيع الصعبه , كفايه اني أشغلتكم في موضوعي اللي ما أعتقد انه كبير لدرجة اني آخذ من وقت فلان وفلان وفيه مواضيع غيري أهم .. أخيراً أما معكم الآن وبعد الزواج وراح أشارك وأفيد وأستفيد وأن شاء الله اني اكون ممن تقضى على أيديهم حوائج الناس .. ودي وعبير وردي لكل من مر على موضوعي |
اكبر خطأ ارتكبته في حياتك انك توليت ترتيب عرس الحريم ...
كان المفروض انك تحجز الصالة و تسلم ترتيبات عرس الحريم كاملة الى العروسة و اهلها لان العرس للبنت و هي ابخص باللي تبيه و تحتاجه ... هي ابخص بالزين و الشين .. الحين انت دخلت نفسك في سواليف حريم ما تفهم فيها .. لذلك ليس امامك الا الصبر و تلبية ما تطلبه خطيبتك لانها افهم و اعرف منك في هذه الامور |
افيـدوني ~ الحمــــــــــــد لله ~ ان الأمـور وصلت لمرحله طيبه ! وكويـس انكم اعترفتـوا بخطأكم ... ماشاءالله .. عيني عليكم باردهـ !! ان شاءالله تستمرون بهالشي وكل واحد فيكم يعترف بخطأه ويبااااادر للصلح ~ الله يووووووووووووووفقكم ويتمم زواجكم على خيــــــــــــــــــر .. تبــــــــــاً للعـزوبيه <<< ايـه بالله تبــاً ههههههههههههه مشـكور اخـوي ... ح،ـاولت اجتهد بالنصيحه وان شاءالله كلامـي مازعل العريـس ! |
لا والله يا دانتيل ما زعلت ولا شي ولو ابزعل ما كان دخلت عليكم وكتبت موضوعي ..
لأن ما راح اقتنع لو اني من النوع المتمسك برأيه ويفكر انه الصح والناس على خطأ , ولا راح اكتب موضوعي او استشير أحد .. وفقك الله وتباً للعزوبيه هههههههههه مع فائق احترامي للشخص المجهول خلف هذا المعرف .. |
عادي هو زعل خطيبته لازم نزعله شوي هههههههه
ما ودنا نشوف أحد يخطي بمثل أخطائنا وحنا نتفرج لا تنسوني من دعواتكم بالتوفيق .. فأنا أخوض تجربة الحلم الثانية .. الله يتممها على خير |
يا حليلها زوجتك عن جد صعبت علي خاصة بهاالفترة الحرجة بالنسبة لكل بنت يصير الها مثل هالموقف الصعب، الله يخليكم لبعض ترى ردودها لك مو كل بنية تقدر تسويها وتقول ابشر وانت قاعد شبه تهدد وتنذر صدقني اهي تحبك مووووووووووت ماشاءالله فلا تحرمها فرحتها خاصة انه قربت والله يهنيكم ببعض ان شاءالله ويبعد عنكم كل ضيقة صدر
|
الله يوفقكم ويجمع بينكم ويتمم لكم على خير لكن ماكان له داعي تذكر تفاصيل المكالمه الله يسعدكم تعلم ذكر المفيد لحل مشكلتك وتجنب ذكر التفاصيل تقبل نصيحتي فالعين حق والله الله باالتحصين لك ولزوجتك
|
يا أخي الكريم
يا ماااالك من إختلاف الرأي قبل الزواج بين الطرفين أنت حزت في خاطرك أنها قالت لك أن القاعه محجوزه علشان كذا أخترت القاعه اللي تبغاها أنا أتوقع أنها من النوع اللي تسمع طرف ثاااالث كلامه لها وهي تنقل لك علشان كذا فهمها أن حياتكم الأسريه سررر بينك وبينها ولا تدخل أي طرف أهم شي أنك متفاهم أنت وياها ولا عليها من الباقين لأنها حياتك وحياتها |
ماشاء الله لاقوة إلا بالله ..
حافظ على الاذكار .. والله يوفقكم ويسعدكم .. ويرزقنا والمسلمين ,, ! |
ترا الانسانة طيبة باين من رسالتها وانت الله يهديك مارديت عليها بعد رسالتها ...
بالعكس انت كذا قسيت عليها ... اتصلت عليك ومارديت! وارسلت لك وما حن قلبك ولا رديت ! اش تبغاها تسوي ؟؟ ترا انت غلطان المفروض تكلمها وتفتحوا قلوبكم لبعض... وانتم في بداية المشوار وياما يجي مشاكل كيف راح تسايرو اموركم بعد الزواج والاطفال .... والمشاكل هذي اللي قبل الزواج على القاعة وما القاعة شي طبيعي وتحصل كثير .. اخي يجب ان تعطي نفسك معها فرصة الحوار واذا فقد الحوار بينكم راح تتعبوا كثير ويشيل كل واحد بقلبه ومايصير كذا والله الدنيا ماتسوى .. .. الله يوفقكم ... |
يابعدي خطيبتك مهايطية وتبي تهايط قدام صديقاتها وأقاربها وأنت الله يصلحك معيشها الجو
كل ماقالت لك شي قلت ابشري ما راح أقصر . لو استمريت على هالوضع أتوقع يستمر وضعك بعد الزواج على كذا عشان كذا لو كنت مكانك رجعت وحجزت بنفس القاعة الي تزوج فيها عيال عمك خصوصاً إنك محتاج ولا هو وقت بهرجة وهياط وبرضو أمنع الطقاقات الي ماوراهن الا القلق والصرف الي ماله داعي يروح عليهن تقريباً إيجار نص سنة لشقتك قسم بالله حرام وأنت مزنوق تسوي كل هالأشياء وهي المفروض توقف معك ماهو توقف ضدك ولا تقدر وضعك اعذرني يا حلو على صراحتي :) بس ما أدري وش فيني حسيت إني أمون عليك ههه |
الحمــــــدلله ان الامور تعدلت ..
لكن لاتنسى ان من اهم اولويات حياتك الزوجيه المصـــــارحه بأسلوب جميــــــل وفقكما الله وجمع بينكما على خيــــــــــر ... |
الله يطول في اعماركم حبايبي ونصايحكم على عيني وراسي ..
وفقكم الله .. ننتظر المشرف يغلق الموضوع وينقله للمشاكل المحلوله |
راحت ايام اول
كل شئ بساطه في بساطه في الزواج وراحت علينا عموما انشرح صدري يوم انحلت مشكلتكم عامل زوجتك بما تحب ان تعاملك نصيحه اخويه |
صراحة...
انت معطيها وجه بزيادة!! ومعطيها الحبل عالغارب بعد .. وكل شي تبيه ملبى ومجاب.. ياخوي حتى لو تخم فلوس وربي فاتح عليك وتقدر تسوي لها كل شي بس لازم انت تكون كلمت عليها مو العكس انا بنت واعرف البنات ماينعطن وجه .. لا وهذي لسى ماتزوجتوا وكذا تسوي فيك .. اجل بعد الزواج وش بتسوي؟؟ راجع حساباتك وطريقتك بالتعامل معها.. حبها .. وكل يوم حبها اكثر .. بس لا تعطيها وجه زي ما انت تسوي اجل حتى القاعة هي مختارتها؟!! امركم عجيب ! |
الله يبعد عنكم شياطين الانس والجن
ويسخركم لبعض اخوي الاسلوب اللي تمشي عليه انت ابدا ما ينفع انك تمشي فيه بعد الزواج انا ما اشيشك على زوجتك ابدا بس شوف الوضع معاها في البدايه واذا هي اتعلمت من اللي صار ولا لأ و تقدر اللي انت بتسويه عشان خاطر عيونها واذا ما اتعلمت اتبع اسلوب تاني معاها بس اسلوب راقي مو يا ابيض يا اسود انتبه اهم شي امشي معاها بالصراحه وبين لها اللي لك واللي عليك واللي لها واللي عليها وان شاء الله تكون اتعلمت والله يهديها ويسخرها لك |
| الساعة الآن 12:51 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©