|
هل تسرعت بطلبي للطلاق ؟
انا مطلقه ولي شهرين ونصف ولدي ولد عمره اربع سنوات ونصف
بدأت معاناتي مع زوجي من بدايه حملي تغير علي بدرجه 180 هجرني ينام بغرفه وانا بغرفه كثير السفر تحملت هذا الوضع لدرجه اثر علي في نفسيتي وتعاملي وثقتي بجمالي وصار عندي اكتئاب وهو لامبالي تحطيم في تحطيم وزاد وزني وقلت يمكن مو عاجبه شكلي وسويت رجيم ورجعت زي يوم كنت بنت واحلا الكل لاحظ الاهو في عالم ثاني لدرجه انه اذا قربت منه وحاولت اتفاهم معاه ابغى اعرف وش النهايه لهذا الجفاء يقولي ابعدي ولاتمسكيني بنفرمني ويعصب ويلومني وانا ماني عارفه كيف ارضيه كرهت حياتي جاني احباط فظيع لاني احبه تركت البيت وجلست عند اهلي سته اشهر مافكر حتى يعتذر فلما دريو العالم بمشكلتي نصحتني احد صديقلتي وقالت اني تسرعت المفروض تشوفين مشكله زوجك يمكن فيه سحر تفريق وبذات انه يسافر كثير المهم بعد سته اشهر رجعت بيتي واهتميت بنفس وشكلي وحاولت افهم وش عنده وقلت له روح لشيخ وشوف ليش تكرهني وهو خاطبني من وانا خامس ابتدائي راح وقال الشيخ مافيه شي المهم قلت يمكن الرجال عاجز جنسيا ومايبغى يقول وقلت له انني مستعده للعيش معاك بكل ظروفك علشان ولدي ولا اهتم كل يوم يكرهني اكثر هو في وادي وانا في وادي شكيت ان في حياته وحدة ثانيه لانه يسافر المغرب بكثره بدأت احبط وقلت اذا متزوج عادي جيبها واعدل لاني احبه المهم استمر وضعه هذا سنه بعد رجوعي له احس انه غامض فيه شئ وراه وفي يوم من الايام فكرت الى متى واحنا زي الاخوان على قلت الاحترام هذه ياحياه باحسان اوطلاق وكنت متردده علشان ولدي المهم دعيت ربي اذا حياتي فيها خير معاه انه يلهمني الصبر لانها حياه لاتطاق نسيت اني انثى نسيت حتى الكلام الحلو المهم في احدى الايام ونحن في السياره ونزل هو السوبر ماركت فتحت الدرج في السياره واذابي على تقرير طبي باني لا استطيع الانجاب مزوره علي انهرت وبكيت وقلت له طلقني طلقني لاني حسيت بان هناك خيانه ورحت لاهلي وطلقني في المحكمه بكل برود اعصاب ولافكر حتى يعتذر بطلقه واحده في المحكمه ...فهل تسرعت بطلبي الطلاق لانني احس بالندم كل ماشوف ولدي ؟؟ |
ليش هو عمل هذا التقرير؟؟؟؟؟
بعد كل هذا وتسألين يالغلاااا!!!!!!!!!!!!! الله يهديك لا ماستعجلتي احمدي ربك ربي فكك منه وش اللي يخلي المرأه تصبر على الرجل والرجل كمان يصبر عليهاااا غير الخوف من الله والاشبااع الجنسي رااح شرط الحياه ماتستمر يعمي واحد مو عااجز جتسي ولا هو مريض ومايجامع زوجته!!!!!!!!!!!!!! شي صعب والله احمد ربك وصلي صلاة الشكر وادعي ان الله يعوضك خير ترى الطلاق بعض الاحياان يكون حل مثل طلاقك هذا حل الله ينور بصيرتك وهذا انسيه امسحيه من مخك حسبي الله ونعم الوكيل بس!!!!!!!!!! |
أختي
في البداية ما فهمت إيش المقصود بإنه قام بتزوير تقرير طبي بإنك لا تستطيعي الإنجاب .. ما فهمت إيش معناها و ليش ؟؟؟؟ سالت زوجي و قال لي ،، و الله زوجها مو هيّن .. هو زوّر التقرير ، لإنه الدولة تسمح للرجل بالزواج من أجنبية في حالة من الحالات .. و من ضمنها إنه زوجته السعودية ما تنجب .. أختي .. انت استخرتي .. و الله يسهل لك أمورك .. |
روح الطير للأن ماحطيتي توقيعك!!!!!!
غريبه روح الطير حجيه:d هي تتطلقت وخلصت خلاص الله يعوضها خير!! |
اقتباس:
انا اتوووقع انك بعدك في العدة صح ...؟! اتمنى تجاااوووبيني ع هذا السؤال وع اساسه نحاااول نحل الموضوع لان انتوا بينكم طفل وعشرة وكاان بينكم حب في يوم من الايام وكل هذا وانا اختك مااايهووون..! واتمنى من الله ان يسير لك الخير والصلاح |
أختي دنيتي دنياك ،،
أقري ردي ، كتبت فيه هو ليه ( مزور التقرير ) .. -------------------------- حجية نورين .. ما عندي توقيع : ( بتقهريني يعني ؟؟؟؟ :'( ----------------------- أختي صاحبة الموضوع .. جلست أفكر و أنا بأذاكر في مشكلتك .. ما تلاحظي بإنه الغلط مشترك ما بينكم ؟؟؟ يعني فترة الحمل زوجك بعدتيه عنك ،، مثل ما نقرأ هنا عن مشاكل الأعضاءء اللي يشتكوا من زوجاتهم فترة الحمل يعني أنا توحمت بزوجي ، بس الحمد لله ، مافتكر عمري نمت في بيت أهلي في فترة حملي .. لإننا نعلم بإحتياجات الرجل ،، و البعد يولد الجفاء مثل ما حصل معاك .. ليه ما حاوولتي تسحبيه لك من جديد ؟؟؟ هل هناك فرصة للعودة و إعادة المياه لمجاريها ...؟؟؟ |
اختي دنيتي دنياك نعم انا في العده
|
التقرير كان جديد موقديم قبل ماشوفه بعشره ايام مطلعه
|
روح الطير أختي دنيتي دنياك ،،
أقري ردي ، كتبت فيه هو ليه ( مزور التقرير ) .. -------------------------- هلا يا عيووووني تامرين من عيووووووووووني اقراه مرة ومرتين وثلاثه :17: حاضرين بعد حنا كم رووح الطير عندنا اختك دنيتي دنياك |
اقتباس:
احب ابين لك نقطة مهمه ترى المراه ما تخرج من بيت زوجها الا بعد انتهاء العدة اجل ليش انت في بيت اهلك ...!؟ هنا نحتاج الى وقفه ,,,,. العدة يا حبيبتي جعلت لامكانيه رجووع احد الطرفين عن قرار الطلاق ... الموضوع راجع لك هل عندك استعداد ترجعي لبيتك وزوجك ..؟ ولدكم ايش ذنبه ما يتربي بينكم ..؟ انا اشووف انك تكلميه وتشوفي ايش رده ... وايش مدى قبوله لفكرة رجوعكم ..؟ وقبل ما تتخذي اي خطووة الجي الى الله سبحانه وتعالى بكثرة الاستخارة ..................... واكثري من الدعاء وخصوصا في جووف الليل عندما ينزل الله سبحانه وتعالى الى السماء الدنيا ويقول : هل من سائل فاعطيه هل من مستغفر فاغفر له وفي سجودك فاقرب ما يكون العبد من ربه وهو ساجد واكثري من الاستغفار لقول رسولنا الكريم عليه الصلاه والسلام : من لزم الاستغفار جعل له من كل هم فرجا ومن ضيق مخرجا و رزقه من حيث لايحتسب وطمنينا فديتك ايش يصير معك اخـــــــــــتــــــــــــــك دنيتي دنيااك |
بس انا عند اهلي من ثلاث اشهر قبل الطلاق ولافكر حتى يعتذر وانا بنت خاله مر عيد رمضان ولافكر حتى يعايد خاله فكيف اكون في بيتي وقت العده
|
يا أختي
الدولة التي ذكرتيها ( ماأقدر أقول أسمها عشان لا يتمسح الرد أو نطعن في أحد ) سألت مرة بعض الشباب المدمنين على روحتها بكثرة وش اللي يوديك هناك ( الجمال ) ..؟؟ قال : لا .. ليس جميعهن جميلات بس فيهم أنوثة ودلع ورقه عجيبه + يهتموا بالرجل( الخلي...؟؟؟ أفهميها ) أهتمام مبالغ فيه لدرجة أنهن ينظفو الرجل ويدعكوه بالليفه لين يلمع . . أما التقرير فهي محاولة واضحة لإصدار تصريح بالزواج من الخارج خصوصاً إذا كان عمره تحت الأربعين يلا أنا وضحت لك بعض الأمور وأنت حاولي الربط بينها والتفكير في أمرك |
ليش ماشقيتي التقرير ؟
|
فرج الله همك وكربتك وعليك الآن بالدعاء وخاصة آخر الليل فله مفعول عجيب
|
انا وكلت امري الى الله لان اللي يزور على ام ولده علشان شويه دلع لقيها هناك الله لايرده والان اقتنعت باني طلبي كان في محله لان اللي مايخاف الله ويزور ماينعاش معه والله يعوضني باللي احسن منه يقدر المسؤليه ويقدس الحياه الزوجيه وصادق مع الله ومع نفسه وحسبي الله عليه وهو نعم النصير ......واشكر كل اللي ردو علي واي جديد راح اتوصل معكم الله لايحرمني منكم
|
الله يعوضك اخير منه
في رجال حسبي الله عليهم مايفكر الا في نفسه ونسي ان الله راح يحاسبه الله يحفظ لك ولدك ويكتب لك الخير وينصرك على زوجك |
جزاكم الله خير الجزاء وحسبي الله الذي لااله الاهو عليه توكلت وهو رب العرش العظيم
|
أختي / دنيتي دنياك
يرجى منك فتح موضوع جديد باسمي في قسم مراسلة الإدارة |
والله قصتك تقطع القلب
احمدي ربك انك افتكيتي من شخص بايع ماعاد يبيك ولا ماكان زور التقرير من أساسه لاتهنين نفسك وانا اخوك عشان واحد مايسوى اهتمي بنفسك واهتمي في ولدك الله يحفظه لك ويكبر قدام عينك والبلد اللي يسافر لها زوجك مشهوره بالسحر الله يعافينا بس الله يرزقك باللي احسن منه ويسهلك الخير بدربك ويبعد عنك كل مكروه ونصحتي لك أكثري من الإستغفار , وان شاء الله ينجلي همك وأسال الله ان يحفظ لك ولدك وتقر عينك فيه يارب آللهم آآآآآآآآآآمين يارب |
اشكرك اخوي ابو جوري وجزاك الله خير
|
لا تشيلي الهم .....يزينها ربك ..
مساء الخير اختي دمعه ومنديل .... انا اعتذر لاني فهمي كان غلط للموضوع ...! بس الطلاق مو نهاية العالم وصدقيني احسن الظن بالله وحط في بالك ان كل شي يحصل للانسان يكون له خير اقولك مثال بسيط وهالقصه قديمة جدا بس مهمة نتعلم منها ..... كان في ملك عنده وزير كل ما حصلت مشكله للدوله يقوله : لعله خير الى ان جاء يوم وقصوا اصبع الملك ويوم تشكى للوزير قاله كالعاده : لعله خير طبعا زعل وعصب وامر بحبسه قاله انا فـي عز ازمتي وانت تقول كله خيــــــــــر! وبعد كم شهر راح الملك في رحله في البر وتعرض له ناس من الهنود الحمر _حاجه مثل كذا ماعرف ايش بالضبط _ وقالوا : هذا بنقدمه قربان للاله وع اساس انهم بطبخوه او يحرقوه ,,,يمي يمي :d وتالي يوم شافوا اصبعه قالوا لا هذا ناقص ما يصلح نقدمه قرباااااااان ! سبحان الله قطع اصبعه نجاه من الموت وراح عفى عن الوزير واكرمه واحسن اليه واعتذر منه انت بس خل تفكيرك ايجابي وحلو وانظري للحياه بتفائل لان التفكير السلبي اول شي يبعد عنك الراحه ويجمع حولك طاقه سلبيه تنفر الاشياء الحلووة من حولك _ سمعت كذا في علم الطاقه _ ماادري عن صحته بس انت جربي بقناعه وراح تحصلي نتيجه حلوه لان كل ما نعتقده في داخلنا نجده في حياتنا وعلى نياتكم ترزقون رتبي حجرتك وخلى الهواء يدخل ويجدد نشاطك اهتمي بنفسك وبولدك اسمعي قرآن بصوت ندي ياثر ع نفسك او اناشيدك المفضله او قصايد معبرة وخلي بداخلك رااااحه وقناعه وكل مرة راح تسمعي القران راح ترجع لك نفس الراحه بدون طلب او تعب ولا تجعلي هذا الهم هاجسك ولا يكون محور حياتك وربنا راج يعوضك بالخير بس كل مرة تذكري همك استغفري فلإستغفار مفعول عجيب كما قال عليه الصلاة والسلام : من لزم الاستغفار جعل له من كل هم فرجا ومن كل ضيق فرجا ورزقه من حيث لا يحتسب دمتي بود |
حبيبتي انتي ماتسرعتي
الله يعوضك بخير منه هذا باع دينه قبل مايبيعك اذا كان يروح للحرام الله يعوضك بارجل منه |
مشكوره اختي والله ان كلامكم هذا هو من يجدد النشاط عندي والحمد لله كما ينبغي لجلال وجه وعزيز سلطانه
|
الصبر ثم الصبر ثم الصبر ان الله مع الصابرين فنحن يااخواتي نسمع او نشاهد قديما كيف بالنساء في الماضي كيف هو حالهن مع ازواجهن والبعض منهن تتحمل وتتحمل وتصبر على الاذى حتى الله سبحانه وتعالى فرج عليها وكبر ابنائها وبناتها وعاشوا عيشة سعيده لكن نحن نشاهد الكثير من نساء اليوم هداهن الله من اول مشكلة مع زوجها تطلب الطلاق او الخلع من زوجها فاين قوة التحمل والصبر ولماذا من الاساس تمت الموافقه عليه من البداية وتزويجه0
نحن نقول من وقت لاخر ان نسبة الطلاق كثيرة وفي تزايد فالصبر جميل وعواقبه جميله ورائعه وسعيده وتؤجر على صبرها ايضا 0 |
وليش ماتفكرين تنتصرين على هذه المعركه وتحاربين بنات ابليس وتصيرين انتي الدلع كله
تهتمين بنفسك وتتعلمين استراتيجية التعامل مع الزوج الخائن اول شي انتي اهتمي بنفسك وانسي انك متزوجه ودلعي نفسك بالقراء والثقافه والكشخه والدلع واللبس وتعلمي الدلع والرقه عشانك مش عشانه وابني شخصيه جديده وفيها جاذبيه بعدين راح يتفاجئ يوم يشوفك كذه متغيره وينجذب نحوك لكن لاتختارين الاستسلام والطلاق وخراب البيت انصحك باستشاره الدكتوره ناعمه الهاشمي .... والله يعينك ويوفقك..... |
يا اخ ضاحي خلاص انا تطلقت وانتهى الامر .. والله اني حاولت مرارا ولكن لاحياه لمن تنادي ..
|
الله يكون بعونك
والله يرزقك بواحد احسن منه يحفظك ويحفظ لك ولدك ويكون حنون عليك وعلى ولدك انا لله وانا اليه راجعون |
ربنا يوفقك بحياتك اختي الكريمة ويسعد قلبك ويعوضك خير واجمل مافيكي انكي وكلتي امرك لله وهو حسبك
اجعلي الله هو وكيلك في كل امورك ولن يخيب ظنك بأذنه تعالى تقبلي مني فائق احترامي وتقديري لشخصك الكريم |
جزاكم الله خيرا
|
اختي دمعه ومنديل اقول لك اكثري من الاستغفار والحمد بكل وقت يجيك هاجس لحياتك قبل وانتي قلتي انك استخرتي قبل ماتكتشفين هالتقرير صح ولا لا ؟ وهذا ربي قبل دعائك واستخارتك والطلاق مو نهاية العالم مدامك تخافين ربي الله بيعوضك خير بس عندي استفسار صغير واعذريني على اللقافه انتي من الرياض ؟ اذا كنتي من الرياض فيه مركز للداعيه اسماء الرويشد مره قمه والكل يمدح فيه حاولي تشتركين فيه |
الله يعوضج خير ان شاءالله
وانا مع اختي ياخذني الوله شغلي وقتج بالخير والصحبة الصالحة تعينج على دينج و دنياج و مؤسسة آسية د.اسماء الويشد من اخير الصحبات : ) |
الحمد لله على قضاءه
ابقول لك شي أختي الكريمة يمكن ما أحد تطرق له بالنسبة للبلد اللي طليقك يروح له هذا بلد شر ((لا أقصد كامل البلد ولاكن أقصد أماكن الفساد الموجودة هناك)) إذا اُعجبت البنت بالرجال وكان يصرف عليها بسخاء أثناء وجودة معها هناك,سوّت له سحر ويصير يصرف عليها ولا يشوف أحد غيرها الى حد مايشحت.... إذا طليقك مسحور عسى الله يفك سحرة ويردة لك وإذا كانت مجرد نزوة صدقيني إنك راح تبشريننا ولو بعد حين بعودتكم لبعض. أسأل الله ان يخفف عليك مصابك ويثبت قلبك |
ان شاء الله يردنا الي بعضنا ردا جميلا
|
اختي انتي تحبينه وعشان كذا تفكرين بقلبك؟؟؟
الي معذبك حبك له بعدين ولدك؟؟؟ الحب يذبح اذا قابله جفا ...وظلم...وصد من الزوج؟؟؟ وكلي الله...وحطي في بالك انه مكتوب عليك الطلاق ...وانتي في بطن امك؟؟؟ والرجال الي متمسك في زوجته ويبيها...لو تقول مليون مره طلقني ماطلقها والمسحور والمعوين بعد يتمسك في زوجته لو يبيها ويبحث عن العلاج من اي طريق..لو يهجرها ولا يطلقها |
اختي صحيح احبه وكنت متمسكه فيه بكل عيوبه وصدقيني ماعمره قالي ابطلقك بس حياته غامضه وفيها مشاكل ووجودي في حياته اصبح مهدد من مشاكله حتى اني فهمت ان طلاقي منه راح يحل له مشكله هناك والمشكله هذه انه متزوج بدون تصريح وجاب منها بنت وعرفت بعد طلاقي انه حاول قبل مايطلق يطلع التصريح بفلوس ومافاد وكمان حاول يطلعه بالتقرير المزور ومافاد وكان اخر حل له انه يطلق والله المستعان من جبره على هذه وعلى فكره هوالان مسافر لهناك وهذه اول سفره له بعد طلاقي ومادري وش راح يجيب من هناك
|
استغفر الله العظيم
|
رج الله همك وكربتك ورده الله اليك ردا سليما
اختي الزمي الدعااء والاستغفار فانه مخرج اين دور اهله وواخوانه الكبار |
السلام عليكم ورحمة الله وبركاته...
أختي دمعه ومنديل عندي بعض الاسئله.. انتي تقولين انه رااح للشيخ يقرآ عليه..وقاله انه ما فيه شي.!! هل انتم متأكدين انه ما فيه شي؟ ومن الي قالك انه مافيه شي هل الشيخ بنفسه او طليقك؟؟ |
مشكورين على مروركم الراائع
اعاند جروحي هو اللي قالي ان مافيه شئ واخوه اللي راح معاه لما سأله اخوي قال انهم ودوه لشيخ وقال ان مافيه شئ بس يستخدم الماء والزيت المقري عليه ويراجعني بعد 7 ايام وللاسف ما استخدم لا الزيت ولا الماء ولا راح بعد سبعه ايام |
لا حول ولا قوة الا بالله كيف ما يشرب الماء ولا يستخدم الزيت..
الله يهديه ويشفيه ويفرجلك همك ويرده لك ردآ جميلا.. تأكدي يا أختي تصرفاته مو تصرفات واحد طبيعي يجوز انها ساحرته حسبي الله عليها وين ما كانت بس وين دور اهله ليه تاركينه على كيفه..؟؟ليه ما حاولو يودونه الشيخ اكثر من مرره.. لا تيأسين يا اختي اكثري من الاستغفار وخلي املك بالله كبير.. |
| الساعة الآن 09:33 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©