اكتشفت حقارة اهل زوجي بعد 10 سنوات ((مستجدا الرد 28))
 

السلام عليكم ورحمة الله وبركاته
اكتب لكم وانه ميته من القهر على اهل زوجي ما توقعتها منهم كلللش صار لي عشر سنين متزوجه ومعاشرتهم وكل يمدحون فيني وفي أهلي وام زوجي ما تناديني الا يا بنتي واخته عادتني مثل اختها واليوم اكتشفت انهم يتكلمون من وراي ما خلو شي ما قالو عني ولا عن أهلي يذمون فينا ويسخرون منا ما توقعتها منهم كللللش طلعو ناس حقيرين ومنافقين وانه بنفسي اكتشفت نفاقهم محد قال لي لما جفتهم شلون يتكلمون في الناس في غيابهم واذا لا قوهم عطوهم الويه الثاني وقعدو يمدحون فيهم ويسون روحهم ان هم طيبين وقلبهم ابيض والله العالم من وراهم يقولون حجي ما ينقال مادري شلون اتصرف اصارحهم واقطع علاقتي وياهم ولا شاسوي محتاااااااااااااره والله بس ما بعديها على خير ياريت تقولون لي لو انتو مكاني شو راح تسوون ؟؟؟

اهدي يا بنتي وش تقاطعين وما تعدينها على خير


انتي الحين معصبه وبس ومو مركزه


اهدي وروقي ولا تسوين شي


اصلا لا تسوين شي


طالما بينهم وبين بعض خليهم يتحلطمون الين يشبعون


هم بس اللي كذا ؟ الغالبيه الاعم كذا


ولا يسب الناس الا الحسده الحاقدين


خليهم منهم لربهم

بس تقاطعينهم ؟؟؟؟؟؟؟؟؟؟؟؟؟؟؟؟؟ وما تعدينها على خير؟


خليهم بوجههم الكويس قدامك ع الاقل لا يصير شين من ورا وقدام


ولا يسوون كذا الا عارفين ان مالهم حق ابدا والا كان واجهوك فيه



عاااااااااااااااااااااااااااااااااادي اديها طناش واعتبري نفسك انتي واهلك احسن منهم والا ما كان تطاولوا عليهم وبالخفاء

وإذا أتتك مذمتي من ناقص فهي الدليل بإني كامل

راح احذرهم اكثر ولا اقول لهم عن شي يخصني

واسوي خطوط حمرا بيني وبينهم بلباقة تخليهم يستحون ليش هالخطوط الحمرا
يعني شرايج في فلانة قول مادري الله يستر عليها
او الله اعلم

ما أعطيهم غاية لو ينفجرون..!

الي قالوه فيني اخليه من صوب الله "يعلم خائنة الأعين وماتخفي الصدور"

ادعي بداخلي ان يارب طهرني من الصفات الذميمة ومن الحقد والنفاق والبغض والعُجب واني يارب مظلومة فانصرني
دبرني بتدبيرك فاني لا احسن التدبير الا بك


هذا الي انا سويته مع احدهم بس تقريبا نفس الحالة ولو كنت مكانج راح اسوي جيه

الله يهدي سرج اختي ويصلح مابينج وبينهم
ويشرح لج صدرج وخاطرج
وينصرج على كل من ظلمج

محد قال لي سمعتهم عن طريق الصدفة كنت بادخل وكانو يسولفون مع زوجة حماي وهي ساكته ما كنت تعلق وهم مستلميني ومستلمين امي وأهلي والقهر انهم لما يقعدون معاي يتكلمون فيها المسكينه وفي امها واهلها وانه طبعا لا تعليق اسكت عنهم يعني كل وحده يعطونها ريق حلو على اساس هي المفضله

شلووووووووون اقعد معاهم والله صدمة تخيلو ان ناس معاك في الحلوة والمرة وعديتهم اهلي مو اهل زوجي ومافي رسميات مثل الرسميات اللي بين الكنه واهل الزوج وآخر شي يطلع منهم كل ذييييييي قهرررررر الصراحه في هالحاله الواحد ما يشتهي يشوف وجهم او يسمع سيرتهم ما مرت علي حقاره مثل حقارتهم

انه ما همني انهم تكلمو فيني لكن انهم يتعدون على امي هذا اللي ما أرضى به وأمي مسكينه على نياتها ما تحجى عنهم الا بالخير وهم يستهزؤون بها ويذمون فيها

لاتسكتين خوذي حقك وحق امك صحيح

ان فية ناس يقدرون الأحترام ويستاهلون

وفية ناس ماتجي غير في العين الحمراء

لاتهملين الموضوع وتسكتين لأنهم راح يحسبونة

عليج ضعف ’’’ويتمادون اكثرواكثر ,,,تقبلي مروري

اييييييييييييييييييه فهمت


متبعين سياسة فرق تسد

يبون يكرهونك فيها وهي تكرهك

ولا يصير بينكم علاقات جيده وقويه


مرضى نفسيين ...


ماعندهم سالفه بس كلام في كلام ع الفاضي


لكن تقدرين تجلسين كذا في مجلس وتخترعين سالفه عن اهل زوج زكيف انكشفوا قدام حريم الاولاد وانهم كذابين وقبل كذا وبسبب كلامهم فرقوا بين حريم الاولاد وعيالهم وكرههوهم في بعض


ولما جت الام تموت وتستسمح ما سامحوها و بناتها الله عاقبهم في انفسهم وعيالهم بعمات شريرات وامراض وووو



مدري عاد فبركي لك شي يناسبك ... فهموها كان بها ... ما فهموها اهي رساله ووصلت لهم


بس من جد طنشي واحقريهم وحسني علاقتك بحماتك وخليها تحتار بين كلامهم وتصرفاتك ... والحكيم بيصدق التصرفات مو الكلام

خذيها قاعدة .. اللي ينقل لك.. ينقل عنك..

مجرد ماتشوفين أحد يحش لك بأحد.. لا تتوقعين انهم من حبهم لك.. ولا عشانك الغالية!!!!!!


لا .. افهمي واحذري .. لأن الغيبة والنميمة تمشي بعروقهم .. سواء لك او عليك..

واللي عليك .. انك تطنشين.. وتعرفين أنهم هم كذا مع الكل.. مو بس عليك..


ولا تحرقين أعصابك ولا شي..

افففففففففف البارحه ما غفت عيني دعيت عليهم ان الله يطير النوم من عينهم مثل ما طيرو من عيني بس انه ابي اوصل لهم بطريقة غير مباشرة اني ادري واعرف كل الكلام اللي قالو عني وعن امي حرف حرف بس مو عارفة شلون واذا طنشت انه اللي باموت من القهر وهم مرتاحين واكثر شي قاهرني ان اخته تيي بيت امي وتقعد وتسولف مع امي وخواتي وبعدين لين راحت عند امها تعطيها التقرير كااااااااااامل وهو على فكرة من النوع اللي (())والعكس صحيح طبعا

رأيي مثل رأي أروع حنان تماماً

و الله يقويك لأن النفاق صار بها الزمن وباء حتى من أقرب الناس

خلي مبدئك "طنشِ تعشِ تنتعشِ" لأن المصارحة ستزيد الوضع سوء

و خليك بعيدة و حذرة معهم و إذا سألوكِ ليش متغيره.....قولي للأسف انصدمت من ناس بوجهين و ضعي بعد هذه العبارة نقطة كبيرة لإغلاق مجرى الحديث معهم بلا توضيح.

تحياتي

حبيبتي هدي نفسك

أهل الزوج مهما سويتي لهم تبقين مرت الولد يعني غريبة

و مهما قالوا لك يحبونك و يعاملوك زين مستحيل يعاملوك مثل بنتهم لأنك تبقين شخص دخيل و إنتي اللي أخذتي ولدهم منهم.. هذي نظرتهم دائما


عزيزتي تحصل لي كثيرا مثل هالأمر و دائما أسكت و غيره طبعا من الأمور اللي الواحد ما يتحملها لكن في الأخير اللي سويته شيء واحد ما واجهتهم لا لأنهم مثل بيت زوجك قدامي و قدام ولدهم بالذات يعاملوني زين و يبتسمون و يسولفون و من وراي شيء ثاني مختلف نهائيا


بحكم إن علاقتي زينه مع أخت زوجي و لأنها مقربة جدا من أمها ناديتها يوم لوحدنا و قلت لها كل الأشياء اللي أنا أسمعها و ساكته عنها برغبتي و طبعا بدون تجريح و بدون رفع صوت و حاولت أبين لها إني فعلا أعتبرهم أهلي و أحبهم لكني إنصدمت من هالشيئ هي طبعا إنصدمت و صارت تبرر الموقف و نقلت لأمها الكلام و مر علينا أسبوع و أم زوجي ما تتجرأ تحط عينها في عيني ..

إذا تقدرين حبيبتي تكلمين أخت زوجك علشان ما يستغفلونك و يحسبون لك ألف حساب قبل ما يقولون عنك شيئ و راح تكسرين عينهم لأنه رغم معاملتهم السيئه إلا أنك تعاملينهم زين و لا تسوينها حرب و مشاكل لأنك في الأخير لازم تتعاملين معاهم لأنها أم زوجك و الزوج ما راح يقبل بالقطيعة

يا شيخة أحمدي ربك إنهم بيعاملوك كويس وما بيضايقوك..

وأما الكلام هذا كلام حريم ومادامك بتسمعيهم وهما بيحشوا في أحد فتوقعي إنهم يحشوك وتلاقيك يا ما حشيتوا سوى بس لمن يجي الكلام على وحدة تزعل وتسوي وفلم..

تصرفي عادي وعديها وأضحكي وأنبسطي معاهم عادي وهيا الحياة كذا..

كلمت اخت زوجي وطبعا على طوووووووووول اتصلت في امها وقالت لها وقعدت تحلف انها ما قالت وان الحجي سوالف عادية وتقول انها بتيني تعتذر مني بس انه مابيها تعتذر وانه مابيها تيي وولدها في البيت لان انه ما قلت له شي عن الموضوع كلللللش وقعدت ترقع في السالفه الا تقول انه احبكم واحب امج وما اارضى عليها مادري شلون اتعامل وياها بس قلت بانهي الموضوع وباقول لها ما صار الا الخير

ياختي عيون فتانه

معروفه --من حكى لك -- حكى فيك---

طنشي ومن ناحية امك هي الربحاانه تاخذ حسناتهم 00

وكلنا سواء الفرق ان حماتي هي الي تقولي انهم يتكلمون في ومن ذا الكلام

وعلى ايش يتكلمون الله واعلم

الحمد الله واثقه من نفسي و ماعمري غلطت عليهم لاكبير ولا صغير

انتي خليك واثقه وطنشي لاتسمعين كل كلمه بتتعب نفسيتك وتجيك المشاكل من ورى كلام النسوان

وموووفقه يالغاليه 00

عيون فتانة......الله يهدي الحال..
تراك سويتي عين العقل...........وأكيد راح يستحوا على حالهم وإن شاء الله راح يبطلوا عادتهم الشينة في الكلام عنك....
أهم شي إن لما يجوا يحكوا على زوجة حماك...لا ترضي ولا تشاركي ولو بالاستماع فقط

اختي كما قالو الاخوات طنشي لا تبقي تفكرين في كلامهم. وما دام صارحت اخت زوجك ارى انك تعطي فكرة لزوجك حتى لا يسمع منهم و يكونو هنا زي ما يقول المثل ضربني و بكا سبقني و شكا. حاولي توصلي له انك لست حاقدة عليهم بس زعلت منهم و ما كنت تتوقعين منهم. و كذا راح يحس انك عاقلة و ما حابة تسوي مشاكل . و الله اعلم.

آخر المستجدات
ان ام زوجي اتصلت فيني تعذر لي وتقول لي اني باجيك وباحب راسك قلت لها لا تحبين راسي ولا شي لج الكرامة ولا تجيني انتي بعد انه الا اجيج وقعدت تقول لي ان انتي بنتي وقلت لها حتى انتي امي وانه نسيت الموضوع ومابي اتكلم فيه مره ثانيه ومابي يصير خلاف بيني وبينكم وهاذي كلها من مداخيل ابليس و................الخ بس حسيت اني كسرت عينها وانها مو عارفة وين تودي وجها من الاحراج واني تعاملت معاها باللتي هي أحسن وما كبرت الموضوع وحتى هي تقول لي انه بأي وجه اقابل أمج احين قلت لها تطمني الموضوع بينا ما طلع لا لأمي ولا لزوجي اللي هو ولدها ........وانه تعلمت درس الصراحه والحين باحسب الف حساب لهم ولغيرهم صدق اللي قال احذر عدوك مره واحذر صديقك الف مرة

الحمد لله اختي ربك رد لك حقك و انا احس انك فشيت خلقك زي ما بيقولو المصريين. المهم الحذر كل الحذر في تعاملك معهم مستقبلا لا ترخي و لا تشدي خليك وسط. و تاكدي انهم سيكونون اكثر حذر منك.

ماشاء الله عليك عين العقل ..

عرفتي كيف تتصرفي

انا غلبه كنت انصدم كم مره وابكي وابكي وارجع لهم ما اتوب ولا اتعظ

وبعدين صرت ادخل زوجي وكانت المشاكل تكبر وصار الحقد قدامي ...

بعدها صرت اطنش يتكلمون قدامي ويغلطون وانا اسكت .. واسوي نفسي عادي

وبعدها ارتحت

يعني قدرت اعاملهم بالحسنى بس بحدود .. ومهما صار ماعلم زوجي اي شي
وماتمشكل معاهم حتى مايزيد الحقد ... وحسيت الاوضاع تحسنت

اخيرا قدرت اكمل حياتي بدون مشاكل
ما انزل لهم الا بالنادر ...

خلك رسميه وقللي زيارات

الله يوفقك

ماشاء الله عليك :22::22::22:

هدي اعصابك ياقلبي انتي انصدمتي في اهل زوجك ايش رايك بللي تنصدم باخوتها يتكلمون من ورائها احمدي ربك وحاولي تكظمي غيظك قال تعالى(( والكاظمين الغيظ والعافين عن الناس اولئك هم المحسنين))) وليكي الاجر من الله ولا تزعلي نفسك ولا تفكري في الانتقام منهم ماراح تستفيدي غير المشاكل معاهم ومع زوجك ونصيحة مادم طبعهم يتكلموا في الناس من وراهم خذي حذرك منهم ولا تعطيهم سرك ابد والله يسعدك

أحسنتم عزيزتي

تصرفك رائع و جميل جدا ردك على أم زوجك ترى فيه ناس كثير ما يكسر عينهم إلا الزينه

لأنك لو قومتيها سالفه كبيره و تهاوشتي الكل راح يقوم عليك و يخلون اللوم عليك لأنه دائما الناس ينظرون إن الحق مع أم الزوج و مرت الولد دائما شريرة ففي النهاية زوجة الولد هي اللي راح تخسر ..


و لا تنسين حبيبتي إن أي شيئ تسوينه لوجه الله أكيد راح تجازين عليه و تحصلين خيره ..


الله يجعل حياتك كلها سعادة و حب

الله يكملك بعقلك


ما شاء الله تصرفك روووووووووعه