|
عملية ICL زراعة عدسة لاصقة داخل العين!
بسم الله الرحمن الرحيم السلام عليكم ورحمه الله وبركاته عندي استفسار عن عمليه زرع عدسه دائمه فالعين لحل مشكله النظر،، واللي هي باللغة الانجليزية ICL - Implantable Contact Lens اذا حد عنده خلفيه عن العمليه او تجربه ياليت يفيدنا ودي اعرف اذا لها عيوب او مخاطر! هالعملية هي الحل الوحيد لمشكله قصر النظر عندي بسبب ضعف سُمك القرنية مع شده ضعف النظر هلي خايفين منها وانا متحمسه لها جدا الله يسهل |
الظاهر محد عنده خلفيه،، للاسف للحين مالقيت شخص مسوي هالعمليه عالعموم بنقل لكم شرح مبسط لـ هالعمليه عشان اللي دخل يطلع بفايده من الموضوع عالاقل :22: ................................. .... ما هي طبيعة هذه العدسات اللاصقة التي تزرع داخل العين ؟ العدسة اللاصقة التي تزرع داخل العين (ICL - Implantable Contact Lens ) هي عبارة عن عدسة لاصقة مشابهة للعدسات اللاصقة التي توضع خارج العين ولكن بدلا من أن توضع على سطح العين (سطح القرنية) فهي توضع داخل العين ( فوق سطح عدسة العين ) خلف البؤبؤ. وهذه العدسات مصنوعة من مادة فريدة من نوعها تسمى كولامرCOLLAMER) ) لها خصائص مميزة أهمها أن الجسم يتقبلها مدى الحياة ولا يرفضها جهاز المناعة أبداً. كما أن هذه المادة الفريدة المصنوعة منها العدسة تجعلها مرنة وطرية وبالتالي يمكن طويها وزراعتها بسهولة داخل العين . كيف تتم زراعة هذه العدسة داخل العين ؟ حيث أن هذه العدسة طريه ومرنه يمكن طويها بسهوله وإدخالها داخل العين من فتحة صغيرة جدا لا ترى بالعين المجردة ( لذا العملية تجرى تحت الميكروسكوب الجراحي ) . تستغرق عملية إدخال العدسة دقيقة واحدة ؛وبعد دخولها للعين تنفرد هذه العدسة المطوية تلقائيا وتأخذ وضعها النهائي بين القزحية وعدسة العين الطبيعية وبذلك تصحح عيوب إبصارك بسهولة. ما هي ميزات هذه العدسة؟ ومن هم المرضى الذين توصف لعلاجهم ؟ هذه العدسات نقوم بزراعتها للأشخاص الذين لا يمكن تصحيح البصر في حالتهم بطرق أخرى مثل الليزر أو الليزك ؛وذلك يشمل الآتي :-
لماذا تعتبر زراعة العدسة عملية مامونه اكثر من الليزك في حالة القرنية الرقيقة ؟ القرنية هي الجزء الشفاف المحدب الموجود في سطح العين الأمامي وعمليات الليزر والليزك تقوم بتعديل تحدب القرنية عن طريق إزالة طبقات رقيقة منها ولكن بعض الأشخاص تكون قرنيتهم رقيقة خلقيا منذ الولادة ؛وبالتالي تصبح عملية الليزك مستحيلة في حالتهم وغير مأمونه ؛ لذا تكون العدسة المزروعة داخل العين والتي لا تؤثر على سماكة القرنية هي الحل الأفضل لتصحيح بصرهم . ما هو العمر المناسب لزراعة هذه العدسات ؟ يفضل أن يكون المريض قد تجاوز العشرين عاما حتى تكون درجة ضعف النظر قد ثبتت في حالته ؛أما بالنسبة للحد الأعلى من العمر فيفضل أن يكون المريض اقل من خمسين عاما وان يكون غير مصاب بارتفاع في ضغط العين او التهابات سابقة في القزحية أو من اعتلال الشبكية المصاحب لمرضى السكري . هل ممكن أن تجف أو تتسخ هذه العدسات مثل العدسات اللاصقة الخارجية؟ لا تجف ولا تتسخ هذه العدسات أبدا لأنها مصممة على أن تبقى داخل العين غير معرضة للعوامل الخارجية فتصبح كأنها جزء دائما داخلي وبالتالي فهي لا تحتاج إلى عناية وصيانة يومية مثل العدسات اللاصقة الخارجية ولا يحس المريض بوجودها داخل العين . هل يمكن رؤية العدسة في العين بعد زراعتها ؟ لا يمكن رؤية هذه العدسة بالعين المجردة بعد زراعتها وبالتالي فالمنظر الخارجي للعين يصبح مثل أي عين أخرى طبيعية ولا يستطيع معرفة وجودها داخل العين غير طبيب العيون حين يفحص العين بالمجهر. ... وربنا يسهل (: يمنع وضع روابط خارجيه..الاشراف |
للأسف ماعندي خلفيه
وانا ودي اسويها من زمان ومتخوفه بس اذا عندك خلفي عن لون العدسه يكني تكون شفافه او لها الوان متعدده ..؟ |
اشكرك على الشرح
للاسف ما عندنا فكره حتى نساعدك ربي يسهلك امرك |
الخط جدا سي انا نظرى ناقص احس انى اتحولت مااقدرت اقرا كل شي
للاسف ماعندي خلفيه ابحث في مواقع طبيه والافضل استشارة اكتر من طبيب |
اقتباس:
هلا لمعه،، اللي اعرفه العدسه تكون شفافه ومااستبعد انه تكون فيه ملونه بس صراحه ماعرف اذا شي ملون والا! عندي موعد الاسبوع الياي وبسألج عن لون العدسه واذا فيه مجال يتبدل "ان شاء الله" شكرا عالمرور اقتباس:
العفو، الغرض من الطرح اخذ الفائده سواء من عندي والا من عندكم شكرا عالتواجد الطيب ربنا يسهل علينا وعليكم اقتباس:
العفو منج اختي بنت مكه مبين عندي تمام بس فعلا شوي صغير $: لو اقدر اغيره كنت غيرته لعيونج بس.. دورت فالمواقع ومالقيت حد مسونها طارح تجربته للاسف وموعدي الياي بيكون استشارتي الثالثه عند دكتور ومركز غير عن اللي قبل ومن بعده نقرر بإذن الله نسويها والا لا عزيزتي اذا نظرج ناقص وماتلبسين نظاره او عدسه طبيه تراه بينقص زياده للاسف سبب ضعف نظري الشديد اهمالي له.. نصيحه من اخت لبسي نظاره وحافظي على نظرج ثابت وتسلمين خيتو والسموحه منج مره ثانيه |
صباح الخير،،
حجزت للعمليه يوم الاحد 7 مارس بإذن الله،، بيبدون بعيني اليمين واليسار عقبها بكم شهر >_< يقولون لازم مابين كل عين وعين من ثلاث لـ ست اشهر الصراحه واايد بعيد بحاول اخذ اقرب موعد للعين الثانيه وربي يسهل تكلفه العمليه 39,000 درهم اماراتي 19,500 لكل عين بإذن الله نفيدكم بالتجربه دعواتكم ربي يسهلها علينا |
الله يقومج بالسلامه إن شاء الله ياختي ..
وطمنينا شصار عنج ،، مفكر إني آسويها هالعمليه ، للأنه بفضل من الله عندي قصر شديد فالنظر ولله الحمد عندي عين -18 والثانية -17 .. بس لحين متررد هل آسويها أو لاء .. خصوصا إن الكلام وايد عن هالعمليات وخوفا من المضاعفات .. |
صباح الخير،،
ربي يسلمك ويعافيك الموعد اللي الطاف كان تهيأه للعمليه الدكتور فتح خبقه صغيره اللي بيدخلون منها العدسه،، وضربني بليزر على عيوني الثنتين وضغط عليهن بالقوو الصرااحه لسعه الليزر اهون عن الضغط عالعين.. حسيته استنزف طاقتي كلها طلعت من عندهم هلكاانه حاليا اروح لهم مواعيد مراجعه يشيكون فيه على ضغط العين وهالامور وكل شي للحين تمام الحمدلله والعمليه بإذن الله آخر الشهر احتمال 28 او 29 الشهر الدكتور يقول العمليه ماتاخذ اكثر من دقيقه.. وفالمركز شفت اثنين مسوين نفس عمليتي وامورهم كلها تمام متفاءله خير في العمليه وان شاء الله تتسهل اشوف انه الواحد لازم يعدل نظره.. العلم مع التكنولوجيا تطوروا والعمليات صارت ابسط من قبل تخيل انا بدون النظاره او العدسات مااشوف شي يعني الموضوع خطير بالنسبه لي وياخوي مع الكبر صعب الواحد يعيش بدون النظر خلنا نلحق دام فيه مجال فهالوقت والله يتمم ويكتب لنا ولكم الخير بس اهم شي تفحص في كذا مكان وعند كذا دكتور وفالاخير ارسيلك عالافضل العين غاليه وانا اختك الله يعافيك ويحفظك |
صباح النور والسرور ..
الحمدلله على سلآمتج ، وإن شاء الله فترة بسيطه تكون معاج هالآلآم وتروح .. آنا يمكن من كذا سنة سويت عملية ليزر للأنه كان عندي ثقوب صغيرة فالشبكية، ف طريقة العملية كانت إنا الدكتور يضرب ليزر حوال الثقب ويحدده عشان ما يكبر، وفي كل ضربه يضرب الشبكية عيوني تقطر دموع .. وحمدلله على كل حال ، آلحين بس آنطر يثبت نظري عشان آفاتح الأهل بهالموضوع .. للأنه آخر مره فحصته كان يمكن من سنة وكان متغير شي بسيط .. وإن شاء الله تكون كل تأخيره فيها خيره .. واذا الله سهل أموري في هالعملية وسويتها ، إن شاء الله وايد أمور بتتحسن في حياتي وأولها باقدر آشتغل وآدرس .. للأنه في حالتي لازم اذا لبست العدسة، لازم آريح عيوني من 2-3 ساعات اذا كنت ابي البسها مره ثانيه .. الله يجديني ويجديج في نظرج .. وبعد العملية بجم يوم و " إذا " قدرتي .. لآحظي إني قلت إذا للأنه في إحتمال ماتقدرين تستخدمين الكمبيوتر .. بس وقت ماتقدرين طمنينا على حالج وشلون صارت العملية معاج .. :) الله يحفظج يالشيخة |
يسعدلي صباحك،،
الله يشفيك ويعافيك حالك شكله اصعب من حالنا مدام مرت سنه ممكن يكون فيه اختلاف في وضعك وان شاء الله للاحسن قلت لك مهم جدا تفحص عند كذا دكتور وفي مراكز ومستشفيات مختلفه عشان تتأكد من الاراء وماتستعجل الا وانت مستشير اكثر من خبير المركز اللي رسيت عليه اسمه مركز الشريف للعيون والدكتور اللي بيسوي لي العمليه هو صاحب المركز الدكتور خالد الشريف،، لهم موقع فالنت دور عليه لاني مااقدر احطه هني اظني ممنوع (مااسوي اعلان عنه بس قلت يمكن تستفيد) حسيتهم جدا حذرين ومهتمين وايد بالفحوصات والمراجعات اول بأول فكل مراجعه يفحصون لي دكتورين الا في آخر مراجعه كانوا ثلاثه مع الدكتور خالد الشريف وللعلم الفحوصات والمراجعات ماادفع شي عليها،، دفعت قيمه اول فحص 600 درهم وقيمه العمليه لعين وحده 19,500 درهم اقدر ادفعها باقساط لين يوم العمليه ادفعه كامل بس انا فضلت ادفعه مره وحده وافتك ... قلت لك الاسبوع اللي طاف خبق لي عيوني بالليزر تجهيز للعمليه وعطاني اجازه اسبوع راحه بس مامنعني من السباحه والسواقه والكمبيوتر والتلفزيون،، قالي اهم شي ماتحكين عينج والحمدلله كل شي تمام بالنسبه للعمليه، الدكتور يقول انه بإذن الله النظر استرده مباشره بعد العمليه واقدر امارس حياتي بعدها علي طول بشكل طبيعي جدا عالعموم اليوم الثاني بعد العمليه بيكون عندي مراجعه واذا شاء الله بخبرك بالنتايج وانت حاول تفحص عيونك عالاقل تطمن بين كل فتره وفتره حرام تتركها سنه بدون فحص الله يعافيك وتسترد حياتك دراستك والشغل |
آلحمدلله ..
ربي إيسر كل أمورج ويسهل عليج إن شاء الله .. بس خيتي في شي مافهمته لحين ! قريت في كذا فالنت، إن العملية تكون في عين وحده وعقب فتره يباشرون فالثانية .. يعني عين بيكون إن شاء الله نظرها طبيعي، والعين الثانية لاء؟ في هالحاله شالحل للي يلبس عدسة ونظاره في وقت واحد :/ أنا بحاول اتواصل معا المركز اللي ذكرتيه لي وباطرش لهم حالتي، وان شاء الله خير .. موفقه دنيا وآخره يارب |
الرجاء من الاخت yes no ترك رساله باسمي في قسم مراسلة اداره عالم الحياة الطبيه...الاشراف
مراسلة ادارة عالم الحياة الطبيه |
اقتباس:
هلا بك اخوي محرقي،، هيه العمليه مثل ماقلت يبدون بعين وعقبها بفتره يباشرون بالثانيه الدكتور قالي تلبسين عدسه للعين الثانيه لين مايسون لها العمليه ،،، سؤال بعد اذنكـ،، انت الحين تلبس عدسه ونظاره في وقت واحد؟! عالعموم بشرنا عنك؟ الله يسهل عليكم ويعافيكم |
اي يطولي بعمرج جي حالتي ..
للأنه انا عني تحدب فالقرنية والنوع المناسب لي من العدسات هو اللي من الأطراف soft وفـ النص hard .. الشركة اللي اتعامل معاها عندهم إلى -15 بس .. أما -3 فالنظارة تسو هالشغل .. شلون النفسية .. وجاهزه للعملية ان شاء الله |
هل حالتك هي نفسها القرنيه المخروطيه؟
الله يعافيك شكله وضعك جدا صعب،، ،،، النفسيه تمام الحمدلله امي يوم درت انه العمليه يوم الاثنين وشافت انه الوضع جدي صاحت خايفه علي ومحد مشجعني للعمليه الكل متخوف منها الا انا يفترض اني اقلق واخاف من العمليه بس ابدن مااحس بهالشي! <-- مخوفها انعدام القلق لوول الله يسهل علينا وعليكم ويكتب لنا اللي فيه الخير |
سهآلآت بإذن آلرحمن يالطيبه ،، عسسآج بخير آلحين ؟!
بخصوص حآلي مادري وآلله جآن إهيا نفسسهآ إللي قلتي عنهآ آو لآء !! طمنينآ عليج اذا قدرتي ،، |
الحمدلله الامور طيبه للحين
العمليه تأجلت يقولون نهايه هالشهر مليت تأجيل بس مثل مايقولون عسى فالتأخير خير كيف صحتك عساك بخير؟ |
يجعلها خير اختي
كل تاخيره فيها خيره وانا الاسبوع اللي فات اقول عملية يس نو الاثنين وشايله همك يلا ان شاءالله خير |
فديتج مشرفتنا وتسلمين عزيزتي
السموحه اقلقتج وياي،، وبإذن الله تراني عند وعدي |
ابشركم سويت اول عمليه لعيني اليمين
والحمدلله الامور طيبه وكل شي تمام باكر عندي مراجعه دعواتكم |
حمدلله على السلامه وطمنينا اول باول
|
ألف ألف حمدلله على السلامه إختي العزيزه ،،
وإن شاء الله رآح نص المشوار وباقي نصه .. ناطرينج تخلصين العملية بآلسلامه وتعلمينا شصار عليج |
ربي يسلمك ويعافيك اخوي
شكرا عالاهتمام والمتابعه العمليه الثانيه باذن الله نهايه هالشهر،، بعدهم ماأكدوها لي الله يسهل علينا وعليكم |
الحمدلله على سلامتك حبيبتي
تكفين ياقلبوو ابي منك تقولي لي التفاصيل عن العمليه لاني ابي اسويها لان عندي القرنيه مخروطيه يعني مضمونه وسهله وكم استمرت مده العمليه والتخدير موضعي وكم بين المده بين عين وعين ياليت توضحين لي لان ماعمري قابلت واحد مسويها في عائلتنا |
مووووفقه إن شاء الله لكل خير ،،
بس خيتي استفسار بسيط، شلون النر معاج فالعين اللي سوو لج إياها ؟ في مشاكل؟ مثلآ حرقه بسيطه أو الرؤية مو واضحه ؟ أو أي شي |
اقتباس:
ربي يسلمج اختي عزيزتي انا ماعندي القرنيه المخروطيه ومااعتقد انه زراعه العدسه هي الحل لمشكله القرنيه المخروطيه لازم تستشيرين طبيب وهو بيشرح لج وضعج وشو الحلول المناسبه لحالتج وضعي ومثل ماذكرت قبل،، عندي ضعف شديد فالنظر مع ضعف سمك القرنيه والحل الوحيد لي هو زراعه عدسه لاصقه وبالنسبه لاسئلتج،، نويت اطرح موضوع فيه التفاصيل بس بعد ماانتهي من العمليه كـ كل العمليه مثل ماقالي الدكتور سهله وبسيطه وماتاخذ وقت مااقدر اقولج مضمونه لانه الواحد مايعلم بالغيب وممكن تصير امور تكون خارج عن ارادتنا بس عالعموم الواحد يتوكل على الله هلي وكل اللي اعرفهم كانوا جدا متخوفين والكل للحين يشوف اني غامرت بنفسي وبعيوني واني خطيت خطوه خطيره ابوي خبرته بتفاصيل العمليه بعد ماسويتها،، قلت له اني بسوي عمليه تصحيح نظر بدون مااقوله انها زراعه عدسه لاني اعرفه بيمنعني منها هو من النوع اللي يحاتي ويشتغب على ابسط الامور كيف عاد عمليات وزراعات وفعلا يوم درى عصب وقال لو دريت كنت ماخليتج تسوينها بعد باقي العين الثانيه وربي يسهل علينا خدروني تخدير كلي بعد ماقالوا لي فالاول انهم بس بيعطوني مهديء وبصراحه ارتحت به اكثر العمليه خذت يمكن نص ساعه "بعدني ماسألت الدكتور عن وقتها بالضبط" وانا نشيت من التخدير بالضبط بعد ساعه من دخولي لغرفه العمليات بين عين وعين يفترض انها من اسبوعين لشهر،، اذا سويت عمليتي عالموعد في نهايه هالشهر بيكون بين العينين شهر بالضبط مشكله التأخير عندي انه الدكتور مب متواجد فالدوله اييها زيارات يمكن مره فالشهر او مرتين اذا عندج اي استفسار حياج اختي الله يعافيج اقتباس:
هلا هلا محرقي امس كان عندي مراجعه وسويت فحص نظر للعين اللي زرعت فيها عدسه والنظر ولله الحمد 6 على 6 اول يومين بس الرؤيه ماكانت واضحه اشوف القريب واضح بس البعيد اشوفه مضبب وكنت احس بانه فيه شي فعيني مع صداع والحمدلله راح هالاحساس المزعج من اول اسبوع عيني كانت ماتتشاهد الدم متجمع فيها حمره مره ومورمه "صغيره" كل اللي فالبيت كانوا مصرين اني صرت حوله لوول لانه من شدّه الاحمرار ماميزو بؤبؤ العين الدكتور قالي بيخف الاحمرار على مدى ثلاث اسابيع وبالفعل خف واليوم يادوب مبين للاسف اكتشفت عيب للاسف ماخبروني عنه قبل العمليه،، على بعد عشره سم او اكثر بشوي من عيني مااشوف بوضوح سألت الدكتور اللي اراجع عنده عنه وقال "شي طبيعي مو الانسان يوم يكبر يصير مايشوف من قريب"!! كان محتشر ومب فاضي من زحمه المراجعين عالعموم بتريا الدكتور خالد عشان استفسر منه اكثر تخبرت وحده سوت نفس العمليه ولقيت انها تعاني من نفس المشكله "ماتشوف القريب مره من العين" يهون هالعيب عند المشكله الاساسيه وعالعموم الحمدلله الله يعافينا ويعافيكم وعسى يمتعنا ابصرنا فاللي يرضيه |
مشكوره اختي على التفاصيل
بالنسبه لي قال الدكتور الحل لك زرع عدساات بس سعرها عندكم كثييير غالي هو قال لي العين الواحده 8 الاف ريال سعودي |
الحمدلله اختي ابدن ماكنت متخوفه ولا فيني حتى 1٪ شعور بالخوف
استخرت واستشرت وتوكلت على الله والحمدلله كل شي تمام للحين الدكتور منعني احك عيني او افركها قال اذا الجرح تبطل بنضطر نسويلج غرز وبيصير الموضوع صعب،، العمليه طبعا مسوينها بليزر بدون غرز وخياطه ممنوع احط فيها مكياج مسكره كحل وغيره ومنعني من الركوع والسجود فالصلاه قال صلي وانتي يالسه لمده ثلاث اسابيع وممنوع راسج يوصل لركابج مع اني اول يوم عقب مانشيت من التخدير بساعتين وقبل مراجعه الدكتور نشيت وتوضيت وصليت عاادي لول اختي تقول يابنت الحلال يمكن مو زين تسجدين تضغطين على عينج قلت لها الدكتور ماذكرلي هالشي وصليت الظهر والعصر والمغرب والعشا اليوم الثاني راجعت الطبيب وخبرني بالممنوعات،،، الله ستر في مراكز ومستشفيات عندنا تغطيها ضمان صحي من الحكومه المركز اللي اخترته مايتعامل مع الضمان الصحي قلت لج العيب اللي لقيته للحين،، اني مااقدر اشوف بوضوح على بعد 10سم او اكثر بشوي عن نفسي قلت يالله عادي نتعايش معاه بس اختي قالت مستحيل تسويها لو تدري بهالعيب من قبل تقول كيف اذا تبين ترسمين عينج كحل وظلال وهكذا لازم بتحتاجين تشوفين عن قرب استخيري اختي واذا قررتي تسوين العمليه اختاري افضل دكتور العين غاليه وانا اختج عقبالج اختي وربي يسهل عليج |
سآلمه معآفاه إن شاء الله يا خيتي ..
وحمدلله على كل حال دام هالشي هين بالنسبة لج ، بخصوصي انا لحين على حطت إيدي من المرة اللي طافت :( ولا رحت ولا مركز ولا أي عيآدة، للأني إنشغلت مع الجامعه وتالي صادف مرضي .. بس إن شاء الله كل تأخيره فيها خيره .. مفروض ان شاء الله خلال هالجمن يوم اتحرك حق رووحي .. خطآج السوو إن شاء الله ، وعسى ربي يسهلها عليج .. |
المهم انك ماتهمل الموضوع
اذا انت مشغول اجله شوي بس ابد لاتهمل شد الهمه شوي وخلص امورك وبإذن الله تلقى الراحه والسلامه ربي يسلمك ويعافيك وسهالات لنا ولكم |
ان شاء الله موعدي مع الدكتوره بداية شهر 6 ..
والله يسر لنا ولكم ~ |
السلام عليكم
اخوي محرقي بلييييييييييز ابي اتواصل معاك اذا ممكن لان انا عندي نفس المشكله وانا من البحرين ومو عارفه اروح حق اي دكتور او دكتوره انتظر ردك ضروري |
اختي مش مجرد كلام
ياليت اقدر اتواصل معاج ضروري ياقلبي لان عندي نفس الحاله قرنيه مخروطيه ومو عارفه شاسوي |
السلآم عليكم ورحمة آلله ..
زرت الدكتورة هيفاء في مركز جوسلين .. هي الدكورة اللي تفحص لي تقريبآ كل 6 شهور ~ يوم كلمتها عن طريقة العلآج وزرع العدسة خصوصآ إني في حالة عندي جزء بسيط من القرنية مخروطه .. قالت لي إن التحدب أو الإنخراط اللي فالقرنية شي أصغر من صغير، إللي حتى ما يسمى تحدب ! و خلال هالفحص للأسف وبفضل من الله خبرتني إن عندي ضغط بالعين ،، ولآزم آشيل من بآلي فكرة العميلة خلال هالجمن يوم .. وعندي عقب بآجر موعد معاها للتأكد من ضغط العين وجمن شغله ،، هم قالت لي الدكتورة إن عندهآ جهآز من مآ أتذكر إسم الشركة صانعة الجهاز، إن هالدكتورة فالبحرين، و 3 دكاتره هم الوحيدين فالعالم اللي يسون هالعميلة وباشرح طريقتهآ الحين .. العملية هي للي نظرهم أكثر من -12 .. يعني كمثال انا عندي عين -16.7 وعين تقريبا -17 .. فقالت لي العلاج بيكون .. زرع عدسة داخلية فالعين .. تشيل من -10 لي -12 تقدر الدكتورة تتحكم بقوة النظر للعدسة .. و اذا فيه للحين قصر النظر تقدر تزيله عن طريق الليزر .. وتقدر تشيل حوالي من -5 لي -6 ! وإذا كآن للحين فيه قصر نظر، فـ هالرقم لصغير بتغطيه العدسه أو النظارة الخفيفة .. وإن شاء الله كل تأخيره فيهآ خيره من ربي .. إختي الغالية همسات والله مادري إذا إدارة المنتدى تسمح آحط إيميلي أو لاء !! إذا فيه طريقة للتواصل خبروني ماعليكم كلآفة .. |
اقتباس:
هلا بك همساااات انا رحت لمستشفى الملك خالد وفحصوا لي فحص بسيط لقرنيه وقال يبدوا انها مو مخروطيه شكل الدكتور السابق بس يبي يسوي لي زراعه عدسات واي شي تبينه حبيبتي انا حااضره صح ها اليومين ماادخل كثيير لاني عند اهلي بس ان تحت امرك |
اخواني لو فيكم حد يقولي كم سعر عملية زرع العدسة للعينين وبالدولار لو امكن
ابي اسأل عن الاسعار في لبنان و الاردن وسوريا .؟؟؟ وعندي سؤال ثاني من خلال خبرتكم يا جماعة الخير ... عندي قصر -12 هل يمكن عمل ليزك لحالتي .. الدكتور في بلدي العراق خبرني ان العملية الوحيدة الملائمة لحالتي هي زرع العدسة وبصراحة اني عندي شك بكلامه .. لا عندي قرنية مخروطية ولافي سماكة للقرنية وكلشي تمام .. بس عندي الدرجة شوية عالية .. شنو نصيحتكم ؟؟؟؟ مع الشكر |
هلا إختي، بخصوص السعر للحين مآعندي فكرة عنه فالبحرين جم بيكلف كل شي ..
ولكن كلآم الدكتور صح بخصوص إن اللي أكثر من -10 ما بتشفيهم عملية الليزك .. للأنه قوته بس للي نظرهم -10 وأقل .. زرع العدسة يكون الحل البديل لليزك، أهم شي استشيري من كم دكتور شآطر .. وان شاء الله سهآلآت .. |
| الساعة الآن 09:53 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©