|
حياة الانسانة الملتزمة مع شخص غير ملتزم
بسم الله الرحمن الرحيم سلام الله عليكم ورحمته وبركاته اخواتي الفاضلات حبيت اعرف من واقع تجربتكم او تجربة مقربات لكم حياة الانسانة الملتزمة مع شخص غير ملتزم ( واقصد مسألة التساهل في الفضائيات والأغاني وهالخرابيط) كيف تقدر تخرج هالفضائيات من البيت ؟ وخصوصا عندما تكون هواية هذا الزوج هالاقمار الصناعية وكل يوم والثاني يلتقط قمر جديد ومحطات جديدة واكثر من خمس دشوش فوق البيت طالع نازل يبرمج وهذا فقط في وقت فراغه لانه حريص على وقت عمله وصلاته بالمسجد والحمدلله ولاعنده لاتدخين ولا خرابيط ثانية والله اعلم بعباده وهل ممكن الزوجة تغير من زوجها ؟ ومين منكم نجحت في تغيره للافضل وكيف ؟ كيف تقدر تحببه في حضور الدروس العلمية والمحاضرات؟ وحب العلم والحرص على طلبه ؟ حتى يضع يده بيدها ويقدرون يربون جيل مسلم ينفع نفسه وأمته الإشراف / تم تغيير العنوان بما يناسب المضمون |
أممممم
أنا بقولك عن أختي كانت ملتزمة جدا وزوجها متساهل شوي مثل يسمع أغاني ويتابع فضائيات بس الحمدلله مايدخن ويصلي المهم جلسته معه سنتين بعدها بدلوا الفضائيات اللي عندهم بقنوات المجد وأعفى لحيته وتغير تغير جذري الله يثبته يارب هذا يرجع للزوجة وقوة تحملها الله يهدي الجميع |
ماقول الا الله يثبتك ياختي ولا تيأسي منه مدام فيه خير، ولكن عليكي بالدعاء وشوي شوي عليه بالكلمه الحلوه والمعامله الحسنه وذكري بالله كثير وحاولي تأخذي أشرطه محضارات تشغيلها في السياره اذا رحتو مشوار
او حتى في البيت في الوقت المناسب ولكن المشايخ الي يحبهم.أهم شي الصبررررررررررررررررررررر. والله يكثر من أمثلك |
اختي الان يعرض في قناة بداية برنامج زيد رصيدك
كل يوم يجيبون شيخ البرنامج روعه فرصة يااختي تتابعي انتي وياة وبعدين يبغى لك شوية صبر الله يهدية على طريق الطاعه |
أسال الله ان يثبتنا و اياكم على الحق و الطريق المستقيم ..
ثم عليك بالاتكال على الله اولا .. هو بيده هدايه من يشاء .. لذا توجه لله عز وجل بالدعاء و التضرع اليه .. ثم ابذلي كل الاسباب المعينه لك لهدايه زوجك .. من نصيحه طيبه او شريط اسلامي او دعوه لحضور ندوه او محاضره .. او رساله طيبه له كلها نصح وخوف عليه .. ثم اصبري فان الصبر طريق النجاح معه أن شاء الله ... ولعلك تناصحينه باسلوب مهذب و محترم وليس بالأوامر حتى لا تنفريه .. ثم اعتزي بدينك .. فان عدم مشاهدتك لهذه الفضائيات و المكوث في مكان غير التلفزيون .. قد يقود لتكوني القدوه الحسنه لزوجك .. واحذري ان يجرفك التيار .. للسقوط في القاع ! وفقك الله ... |
امممممممم
نفس الحالة زوجتي ملتزمه وانا... !!!!!!!!!!!! |
اختي أنا بقول ما في داعي تقلقي ، وقت بصير عندك ولاد و بيكبروا شوي رح تزيد المسؤولية و زوجك ما يلاقي الوقت لحتى يهتم بالفضائيات متل ما هلأ عم بصير و أكتر من هيك انو زوجك رح يخاف على أولاده ، و انتي بتعودي بتقترحي عليه انكم تلغوا القنوات الي فيها مياعة و وو الخ و تخلوا القنوات الآمنة من أجل الأطفال ، يعني بحجة الأولاد بتقدري تخليه يلغي هالفضائيات التعبانة استعيني دايما بالله و عليك بالدعاء و الله يوفقك ;) |
يعلم الله اني سعدت كثير بتفاعلكم معي وجزيتم كل خير
المسألة يااخوتي انني من فضل الله من بيت متدين وخرج من هذا البيت طالب علم وداعية وامام مسجد ولا أزكي احد من اهلي على الله وكل اخواتي متزوجات من ملتزمين وطلبة علم وبقيت انا الى الان والحمدلله واغلب من تقدم لي غير ملتزمين ولاحول ولاقوة الابالله واخرهم كان هذا الشاب وهو من اسرة طيبة ومحافظة نوعا ما بس عندهم امور يشوفونها عادي لكن انا اشوفها كبيرة مثل الشاب ووالده واخوانه كلهم حليقين ومسبيلين وعادي عندهم الدش والاغاني لكن فيهم خير من ناحية حرصهم كلهم على الصلاة بالمسجد ولا فيهم احد يدخن وسمعتهم طيبة وانا ارى هذا الشاب هو افضل واحد تقدم لي الى الان فما ودي ارفض وبعدين اندم خصوصا اني كبرت واصبح البيت خالي بعد زواج اخواتي وبنفس الوقت انا في حيرة من امري عشان كذا ابي اعرف تجارب من واقع اخواتي اللي حالتهم مثلي هل اشترطوا على ازواجهم قبل الزواج عدم ادخال الفضائيات البيت ؟ انا من جد محتاجة مساعدتكم وماودي ادخل مغامرة ولا اتصرف مع الناس تصرف خاطئ ام العريس تعرف كل شي عني وتدري كيف وضعنا بالبيت فهل لو قلت لها ماودي يكون ببيتي دش عادي هالكلام لان والدتي رحمة الله عليها متوفية واخواتي خارج منطقتنا وانا اللي اتكلم مع ام العريس مع انه محرج بس الله يعين ودي اعرف سلبيات هذا الزواج وايجابياته ؟ وش تنصحوني فيه عشان باذن الله مااندم ؟ انا تعبت من التفكير ولازم اخذ قرار فهالفترة طلبت النصيحة من زميلاتي بالدوام وقالوا لي يجيك ان شاء الله احسن منه بس انا ماودي اقعد على امل يجيني خاطب مثل ماابي وبعدين يروح عمري وانا في انتظار واقول ليش مااحتسب اجر هداية هذا الشاب وخصوصا انه فيه بذرة خير بس كل مااتذكر هوايته الغريبة وحرصه على تجميع الدشوش فوق سطح بيتهم وكل شوي يلتقط قمر جديد ومحطة جديدة حتى اهله يضحكون عليه يقولون كل شوي مبرمج له محطة بتلفزيونه هل هذا الامر عادي؟ اخاف يكون هذا حال اغلب الشباب وانا ماادري كون اخواني كلهم ملتزمين وماعندهم هالامور اعطوني نصايحكم واسأل الله ان يجعلها في ميزان حسناتكم |
أولاً أعتقدت أنك متزوجة وبتسألي عن زوجك
ولكن أتضح أن الشاب متقدم لك للزواج ..!! اسأل الله أن يوفق بينكم ويجمعكم على خير شوفي أختي طالما أنك من بيت متدين وأهل علم فأعتقد أنه سوف يستصعب عليك أمر زوجك وستجدينه غريب عليك بتصرفاته خصوصاً إذا كنت ملتزمة بدرجة كبيرة ولا تقبلين أي منكر واضح وأما مسألة أنك سوف تأثرين عليه وربما سيلتزم فهذا إحتمال غير مؤكد وأما مسألة متابعته للدش والقنوات فأعتقد أن هذه هوايه لن يتركها إلا أن يشاء الله تعالى إستخيري مرات عديدة ثم إستشيري قلبك أولاً ولاتضغطي عليها بأنه هو المناسب وربما لن يأتي غيره ثم إسشيري أبويك وإخوانك وأحدالمشايخ إن أمكن |
اقتباس:
وربنا معاك اختي |
اختي في الله سعاد جزاك الله كل خير
انا قصدت من طرح هذا الموضوع هو عرض لتجارب اخواتي الملتزمات المتزوجات من شباب غير ملتزمين وكيف استطعن تغيير ازواجهن بفضل الله ؟ وماهي الطرق الناجحة والغير ناجحة ؟ حتى استفيد وتستفيد غيري من هذه التجارب انا غير متزوجة وكل من تقدم لي غير ملتزم فأردت ان اعرف واقع من تعيش مع غير ملتزم كوني من اسرة ملتزمة ولايوجد بفضل الله في اسرتي شخص غير ملتزم والشخص الذي ذكرته في النموذج كانت مواصفاته مطابقة لمواصفات اخر شخص تقدم لي وهو افضل من السابقين فأردت ان اعرف هل يوجد متزوجة مثلي وتزوجت بشخص مثل هذا واستطاعت ان تغيره؟ وجزاك الله خير على تفاعلك الطيب |
اقتباس:
ربنا معاك |
الله يكتب اجرك ياأخت سعاد ويرفع منزلتك ووالديك بالجنة
وان شاء الله اعمل بمشورتك على خير ولا تنسيني من دعائك |
اقتباس:
هل أغلب مشاكلكم سببها الاختلاف بينكم كونها ملتزمة وانت لا؟ هل ترى زواجكم ناجح ومستقر؟ ياليت تفيدني ياأخي واكون شاكرة واسأل الله ان لايحرمك اجري |
اقتباس:
ابشري بالخير حبيبتي وربي ما هيضيع صبرك وانتي متدينة وطايعة ربك بإذن الله وابشري بالدعاء لك بظهر الغيب عزيزتي |
اقتباس:
كيف نجحت اختك في تغييره بعدالله عزوجل؟ الله يجزيك عني كل خير اعطني تجربتها بالتفصيل الممل اسأليها وردي علي انتظر ردك على احر من الجمر |
انا بعد في بداية الامر توقعتك متزوجه بس تالي توضح انه متقدم لك الله يكتب لك اللي فيه الخير الزوجه تأثر في ززوجها نعم والف نعم بس كل وحده حسب شخصيتها وقدرتها واعتقادها بنفسها انا مرت علي حاله بس عكس حالنك تمام في ملتزم تزوج من امراه غير ملتزمه لااسف بعد مرور السنين اصبح يطليل ثوبه ويحلق لحيته وهذا كان من تاثيرها عليه لكن انت إن شاء الله انك ع حق وربنا ما يضيع تعبك بس اهم شي احتسبي الاجر عند الله وتفاهمي معه بالحسنى ولا تنصحيه وهو قاعد يتفرج ومندمج لاااا بس في وقت ثاني ع هدوء حتى مايمل ويزهق وهو المره الثانيه راح يقصر الصوت او اذا جيت راح يغير المحطه وكذا ربنا يوفقك ويسعدك |
اقول لك قصه حلووة في مثل حالتك في وحده في مشكله بينها وبين زوجها _ لانه يسمع اغاني وكليبات _ وظل كم يوم ما يحاكيها ولا ياكل ولايشرب في البيت بس يجي وقت النووم اهي ما تذمرت ابدا تراعيه وتهتم بنفسها وبيتها وتكلمه باحترام وتحسسه بالحنان معه حتى دايم يقول لها : ماني باصغر عيالك <<< من الحره هههههههــ... بس ترد عليه بلطف وحنيه وفي ليله حست انه صاحي لكن ما تحرك من مكانه وقامت مسويه نفسها توها صحت من نومتها وقااامت تدعي له وهي تبكي ومتاثره وايد هو بعدها تاثر ولاان قلبه وصار يقوول لها : اللي تبينه يصير ما يسمع لو كان معها واذا جات يغير المحطة مراعاة لشعورها بس طبعا لازم تفهمينه انه لوجه الله مو عشانك ملحوظه صغيرونه : يغير المحطه مو من باب النفاق لكن من باب عدم المجاهره بالمعصيه لان : كل أمتي معافى إلا المجاهرين ’’’’ كما قال عليه الصلاة والسلام |
جزاك الله خير أختي (دنيتي دنياك ) اذا ربي كتب لي وتزوجته على خير ماأظن اقدر اسمح بوجود فضائيات غير اسلامية ببيتي طووول الليل افكر فهالمسألة واتذكر مواقف مرت علي يوم اروح الصالون والقى الكوافيرات فاتحين الدش واقولهم باسلوب طيب اني مااسمع اغاني فيقفلون من غير نفس والبووووز شبرين وبسرعة يخلصون طلبي عشان يطلعون هالمعقدة من الصالون انا ماودي تكون حياتي مع زوجي كذا بنفس هالتعامل ياكثر ماطلعت مع اخواني بالاجازة مطاعم ونحصلهم مشغلين ميوزيك ويطلب اخوي يقفلونها واغلبهم يرفض ويعتذرون بأنه الزباين يبون كذا ونجلس نلف من مطعم لمطعم الين نحصل بعد دوخة وكل هذا عشان اخواني يرحموني يبوني اغير جو كوني انا البنت الوحيدة بالبيت بعد زواج اخواتي فهل لو تزوجت هالانسان راح يعمل معي مثل اخواني ؟ ساعات يجي ببالي اقول اذا هو الا يبي اغاني وفضائيات فتكون بمجلس الرجال بعيد عني عشان لاأسمع ولا أشوف وارجع اقول بنفسي ماصارت زيجة هذي ربي يعلم اني ابي اعف نفسي اسأل الله ان يلهمني رشدي |
اختي الفاضله
قبل 16 عاما كنت مثلك لزوج يعلم الله فعله كان لا يتورع ابدا عن مشاهده اي مقطع اباحي بكافه التقنيات من حاسوب وفضائيات وجوال كان مدمن وليس هاوي كزوجك ولكني استعنت بالله وخاصه ان لدي ابن وابنه اريد ان انشأهم في بيئه نظيفه فاول خطوه لي سجلت ابناءي بدور تحافيظ القرءان وعلقتهم بالله حتى لا يألفوا المنكر الذي يرونه على والدهم بل سيزيدهم القرءان ايمانا وتحصينا والتحقت انا ايضا وحين شحذت همتي وقويت نفسي بدءت دوري في بيتي كداعيه لزوجي فأتيته بكل الطرق التي تخطر على بالك ولا اكذبك القول لو قلت لك اني لاقيت انواع الرفض والتعنيف ولكني عرفت وقتها انها معركه بيني وبين الشيطان ولابد ان انتصر فيها ومع السنوات اصيب زوجي بحوادث كثيره اولها حرق من الدرجه الثالثه باشتعال زجاجه بنزين فيه وعكفت على خدمته 3 شهور وهنا بدءت ادخل اليه من مدخل ان الله يمهل ولا يهمل وذكرته بان هذا عقاب من الله لانه سبحان الله كان الحرق في نفس اليد التي يبرمج ويبحث بها وبدءت اذكر بالموت والعقاب والقبر والحساب استجاب لفتره وبعد شفاءه عاد وكاأن شيئا لم يكن اصبت بخيبه امل ولكني عدت من اجل اولادي وواصلت مسيره النصح بالاشرطه الدعويه والقرءان الذي اتعمد ان اشغله وقت حضوره عشان يخجل شوي من كلام الله واستمرت السنوات الا ان كان اليوم المشهود الذي اصيب فيه بمرض عضال مزمن اقعده واصبح امره معلق بعد الله بخدمتي فاستفاق حينها وعاهدني على كتاب الله الا يقرب شيئا اباحيا وبالفعل ولكن لا انكر ان لديه فضائي في غرفته عادي يتابع عليه افلام الام بي سي وغيرها وان كان شرها عظيم ولكن في طريقي باذن الله لان اجاهد حتى يدعها اطلت عليكي اعلم والله ولكن اردت فقط ان اوصل لكي بان الله لن يخذلك كوني معه فقط وادعي له ولا تنسي سهام الليل فانها لا تخطأ وذكريه بالموت والقبر وماذا لو قبض الموت روحه وهو على هذه الحاله ووذكريه بان الانسان يختم له على ما تعلق واحبه في الدنيا كوني معه داعيه بحكمه وموعظه حسنه ولا تيأسي فرحمه الله وسعت كل شي |
بعد هذه قصه ثانيه ...... بس اني سمعهتا مره ولا عندي تفاصيل كثيره لها انه وحده متزوجه واحد يدخن .. وبعد فتره من النصح والدعااااء حست ان مافي فايده معه بس سبحان الله ما ضيع تعلقها به عز وجل تقول : في يوم من الايااام وهم طالعين من المستشفى ولع سيجاره يبي يدخنها وشافه طبيب كان داااخل وقااام ينصحه ويحذره وقاله تعال معي ..... وراه صدر مريض مفتووح والرئه مسووودة من اثر التدخين وكانت حالته صعبه جداا من بعدها تاااااااااااب وانااااااااااااب وحرم يدخن لو سيقاااره وحده ربنا يوفقك لو فيه صفات طيبه وفيه الخير وارتحت بعد الاستخاره واهلك سالواا عنه اتوكلي ع الله وربنا مايضيع صبرك واحتسابك الاجر لوجهه الكريم ابد والله معك فلا تخافي ابد |
اختي امل الحياة
اسأل الله ان يحشرك في زمرة الدعاة مع محمد صلى الله عليه وسلم وصحبة اعانك الله على ماابتلاك الحقيقة الموضوع اصبح فيه لبس فأنا غير متزوجة ولو قرأت باقي الردود كاملة لعرفت لو اني بكلف عليك انا كان ودي بس اعرف تجارب لملتزمات توزجوا شباب غير ملتزمين ؟ عشان كذا وضعته بقسم المتزوجين وقلت بعدها بقعد افكر واستخير بلحالي بدون تدخل من احد وما كنت ابي اتكلم عن نفسي ووضعي لكن قدر الله وما شاء فعل |
مع كلام اخي الرسمي ..
يجب ان يعرف الخاطب رأيك في مثل هذه المواضيع و لا تتوقعي انك بعد الزواج ممكن يتغير زوجك فد تصابي بخيبة امل و تصير بينكم مشاكل .. لازم كل واحد يعرف فكر و تفكير الاخر قبل الزواج .. |
اقتباس:
وبصراحة كثير مشاركاتك كانت تشدني لما فيها من عقلانية وحكمة ورايك يهمني |
الله يهديك بس يا انتظار الفرج
مترددة في الرجال عشان دش وأغاني وحلق لحية.. لو كل وحده فكرت كذا ما اعرس نص الشعب :) اذا اعجبك الرجال وافقي وتوكلي على الله ولا تشاورين الزواج وتحقيق العفاف أهم بكثير من هذه المسائل ولي بيأخره لأجل هالحجج موسوس بالتوفيق |
مرحبا .....
هل تعرفين نوعية البرامج اللي يطالعها ممكن يكون من مجانين الرياضه او الفروسيه بس انتبهي اذا كان والعياذ بالله من متتبعي القنوات الاباحيه فنصيحه لاترتبطي فيه اما غير ذلك عاااااادي جدا صدقيني ممكن اللحين وقته فرااااغ بس اذا دخلتي حياته ماراح يتفرغ لطلعة السطوح:d وماتدرين لعل هدايته على ايدينك ..... تقبلي مروري .... |
تم نقله إلى هنا , مكانه الأنسب
الإشــــــــراف |
حبيت ادخل وادعيلك
بس اذا هو شاب على قولتك فيه صفات الصلاح الظاهرية ولاياكل الحرام ولايكذب ومحافظ على صلاته فى المسجد فتوكلى على الله نصيحتى لك عوديه يصلى فى الصف الاول فى المسجد وان شاء الله تبشرينا توكلى على الله |
تقدم له شريط أو إسطوانة تتكلم عن هذا الموضوع ، و تخوفه كثيرا من النار و تصف له الجنة ..
خصوصا الحور العين .. و تدعو له كثيرا بالهداية .. |
اقتباس:
وانا استخرت والله ييسر ما فيه خير وبالنسبة للاغاني والدش وحلق اللحية واسبال الثوب أليست من المحرمات؟ فلماذا تستهين بها ؟ أاصبحت موسوسة لأني اعطيت الامر حقه من التفكير؟ جزيت كل خير |
اقتباس:
بس من وين بعرف نوعية البرامج اللي يطالعها ؟ مالي غير العليم هو من يعلم الاصلح لي ادعيلي ياكنافة ولا ترى باكلك مع القهوة هههههه |
اقتباس:
الله يستجيب دعائك ياأختي وكلامك نفس كلام معلمة جاليات عندي بالعمل اخذت رأيها لانها ماشاء الله عليها اهتدى على يدها الكثير من النصرانيات وكل قترة تجينا مجموعة يعلنون اسلامهم فقلت اكيد بستفيد منها وخصوصا انها تعاملت مع غير المسلمين واهتدوا بفضل الله فما بالي خايفة من الارتباط بمسلم عاصي ؟ وذكرتني بقوله تعالى (وجعلنا بعضكم لبعض فتنة أتصبرون) أي اختبرنا بعضكم ببعض, وبلونا بعضكم ببعض, لنعلم من يطيع ممن يعصي, ولهذا قال (أتصبرون ) فلابد من الصبر في الحياة الزوجية سواء كان ملتزم او غير ملتزم والمهم هو الصلاة فان كان يصلي فهو باذن الله على خير ويوجد امل من اصلاحه ولاتنسيني اختي من خالص دعائك |
| الساعة الآن 04:18 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©