|
احس بغصه في قلبي
السلام عليكم ورحمة الله وبركاته ....
اخواني واخواتي اعضاء منتداي الغالي ... ان شاء الله انكم بخير وسلامه .... يمكن اليوم انا ماعندي مشكله معينه بس تقدرون تعتبرون موضوعي هذا فضفضه وكلام كثير مقدر اقوله الا لكم .... انا تعبانه حيل احس نفسيتي دمار والله مااخقيكم ودي اروح طبيب نفسي .... بس مدري بعد ان رحت وش اقول .... انا متزوجه لي 7 سنوات الله رزقني بثلاث اطفال اثنين منهم فوق بعض الله العالم وش كثر متعبيني .... زوجي احبه حيل وان ماخاب ظني اتوقع انه يحبني بس الحب اللي لازم تشغل مخك عشان تفهمه ....اربع وعشرين ساعه برى البيت ... الله الاعلم اني من يوم تزوجته ماجلس معنا انا وعياله يمزح ويسولف اويتقهوى اونطالع تلفزيون ابدا مايسوي كذا يشتاق للعيال اوكي يشوفهم عشر دقايق وبعدين انواع التطنيش يدخل غرفته وينام ولاعليه من احد حتى لونايم يوم كامل وشبعان نوم يااما يرجع غصب ينام او يطلع من البيت .... مافيه حل ثالث .... وانا والله تعبت المسؤليه كلها علي انا اب وام في وقت واحد تخيلوا ان طول يومي وانا قاعده معهم وبس يصيحون مافي شي يسليهم وشغلتي انا بس افصل بينهم وطول وقتهم زهقانين بس يبون يطلعون طيب وين اوديهم ؟؟؟ والله ان بيت اهل زوجي ان رحت لهم بس اسمع شكاوي من عيالي وكم مرة انطردت بمزحه وانا ابتسم واغيب يوم وارجع لانهم يتصلون ويقولون تعالي وعيالي الله يعلم وشلون ينبسطون هناك .... ومع كذا مايقدر .... تخيلوا انا اللي اطلعهم للالعاب وانا اللي اوديهم مطاعم وانا اللي اودي بنتي للمدرسه طبعا كل هذا مع السواقين وهو لاحياة لمن تنادي .... ياناس نفسي احس بكلمة حب منه نفسي احس بمدح باطراء نفسي احس بكلمة شكر نفسي احس اني متزوجه واكثر شي افقده ابي احد يهتم فيني يسال عني يغار علي ابيه يوم يحسسني اني مهمه.... كل هالاشياء افقدها وللاسف زوجي موجود.... والله تعبت من المسؤليه حتى السوبر ماركت علي .... انا كل شي وانا ماعدت اتحمل بس مابيدي حيله عيالي مالهم ذنب اهملهم .... طيب الى متى بعيش كذا ... طيب معقول مافيه حل ... طيب يمكن انا مكبرة الموضوع وسخيفه وفاضيه وماعندي سالفه ... طيب انا اشوف كل اللي حولي غير .... صح المفروض مااطالع لغيري بس غصب والله ... يارب ان شاء الله اني مااحسد احد والله يهني الجميع بس انا اتمنى اكون زيهم .... اتمنى اني ماثقلت عليكم وياليتكم تقبلون فضفضتي والله يعلم اني ماكتبت الامن غصه بقلبي .... واعتبروها قعدة سوالف لااكثر ولااقل ... |
أول شي الله يكون بعونك يا اختي
الشي الثاني اللزمي الإستغفار وهذا قدرك ونصيبك بس حاولي تقعدي مع زوجك وتفهميه وتتكلمي معه بكل اللي بقلبك وحسسيه انتي شكثر تحبينه وتحتاجينه وتفهمينه ان عياله يحتاجونه حاولي معه مره وثنتين وثلاث لعل وعسى الله يهديه قوليله ودنا نقعد معك يابو فلان , اللبسي له آحسن الملابس , حاولي تلفتي إنتباهه لكِ والكلمه الطيبه تكسر الحجر , كلميه بكل اللي تحسينه وفهميه ان عياله كبرو وعيالك حاولي تشغليهم في البيت , يعني جيبي لهم بلايستيشن , شوفي شنو اكثر شي يحبونه عيالك وجيبه لهم والله يكون بعونك يا اختي والأخوان في المنتدى ماراح يقصرون معك إن شاء الله اللهم سخر لها زوجها وأسعدها وفرج كربها يا أرحم الراحمين |
اقتباس:
هلا اخوي ابو جوري .... سبحان الله توني كنت اقرى مشكلتك والحمدلله على الصلح والله يتمم عليكم السعاده يارب .... تتوقع اخوي اني ماكلمته ..... اصلا انا مافي اي موضوع اتكلم فيه معه الاهالموضوع لانه من النوع الصامت وكل السوالف اللي ممكن اقولها له يعتبرها تافهه وماتهمه ابدا .... وكثر ماتكلمنا في هالموضوع مافي الارد واحد وهو الصمت .... او انه يقول انا طبعي كذا وماراح اغيره ...وبالنسبه للبس انا ماابي امدح نفسي بس والله مومقصرة لافي نفسي ولافي عيالي يوميا لابسين ونظيفين ولله الحمد... اما بالنسبه لعيالي ... والله مابقى شي ماجبته شريتلهم ديفدي وافلام كرتون وشريتلهم جميع انواع الالعاب حتى ان شقتي صغيرة وتمشي تصدم بالالعاب ومع كذا مافي امل وهم ترى صغار على البلاي ستيشن .... سبحان الله مايونسهم الا الجمعه يعني يبون يااما احد يجينا او نروح لاحد حتى سبحان الله موشرط يكون في صغار قدهم وحبذا لو وجدوا .... وانا اهلي للاسف موموجودين في نفس المنطقه كان وديتهم عندهم ....سبحان الله يمكن ملوا من كثر ماهم مقابلين وجهي :(:(... |
الله يعينك ويخفف عنك بس بصراحه مااعرف وش اقولك الله يهديه ويرجعه لك ولا ولاده |
يابعد قلبي .والله حزنت على حالك .. لا ياعمري لاتتعتذري من حقك تشكي ومن حقنا نسمع...
طيييييييييب سوي الطريقه هذي وبإذن الله كل اللي تتمنينه يتحقق .. تصدقي يوميا بنية ان الله يسخر لك زوجك . صلي يوميا اخر الليل وادعي ان الله يألف بين قلبك وقلب زوجك قولي اللهم اجمع شملنا... اللهم اجعلني قرة عينا له واجعله قرة عين لي ...ومن هذي الأدعيه وادعي بكل اللي تتمنينه (وقال ربكم ادعوني استجب لكم ) يعني هذا تأكيد ...من الله بإستجابة دعائنا بس لانستعجل . اخييييييرا : دائما استغفري ... وانتي واقفه وانتي جالسه وانتي تتفرجي تلفزيون وانتي برا البيت ووووو يعني خليه على لسانك . والله انها تحققت لي اشياء كثيرة بسبب هذي الطريقه ... اسأل الله ان يقر عينك بزوجك ويجمع شملكم |
السلام عليكم
اختي انا ابغى اقولك شئ ماادري يمكن الكل يعترضو عليه بس هدا من وجهة نظري لا تحاولي تغيري بزوجك لانك ما تقدري لكن اقتنعي من جوا من قلبك ان هذه حياتي ترى اللي انتي فيه نعمة انتي محسودة عليها انك تخرجي سوبر ماركت او سوق او اي خرجة بدون نكد لان ثلاث ارباع الحريم ما تخرج الا خرجت عينها وللمعلومية تكون خارجة مع زوجها اقلمي نفسك مع حياتك ولا تنتظري من احد حتى زوجك كلمة شكر او مدح او اهتمام لانك ما بتلاقي وان لقيتي مو بمستوى توقعاتك ولا تحسبيني اتكلم من فراغ لا والله انا متزوجة من13 سنة وعندي طفلين ولا كترت اطفال وهذا السبب اني ام واب بنفس الوقت وكل شئ على راسي لكن يعلم الله اني مبسوطة جدا بوضعي هدا لاني اقنعت نفسي مائة بالمائة ولا عندي اي مشكلة ولله الحمد |
اقتباس:
نفس الكلام اللي كنت ناويه اكتبه قالته اختي شيره .. عندي اخت نفس مشكلتك .. زوجها من النوع اللي على طوووول مشغول و سفريات من اجل العمل يعني يسافر اكثر من يجلس في البلد .. واكتفت بثلاث اولاد عشان تتفرغ لتربيتهم فهي الام و الاب . و ما شاء الله عليها تفرغت لعياله و لتجارتها الخااااصه و مبسوووطه و دايم على الاتصال بزوجها عن طريق الهاتف ... زوجك ما راح يتغير ... تأقلمي على الوضع .. و ما يمنع ذلك من المحاوله .. بالنسبه للسوالف سولفي عن الاولاد لكن بدون ما تشتكي منهم انما اذكري له المواقف المضحكه و الحلوه و قولي له وانت تضحكي انك نفسك انه يكون حاضر هذا الموقف وانه فاتك نص عمرك لانك خسرت الخروج معنا انبسطنا كثير او تمنيتك تكون معنا لان الايام تسرع و راح نشتاق لشقاوة الابناء .. لكن يا قلبي لا تحزني استمتعي بوقتك و بخروجك مع الاولاد خاصه ان زوجك ما يمنعك .. |
اقتباس:
الله يجزاكي خير على الدعاء .... ومشكورة اختي على مرورك |
اقتباس:
|
اقتباس:
هلا حبيبتي .... والله فعلا تفكيرك نفس تفكيري .... انا فقدت الامل نهائي انه يتغير واحيان اتاقلم على وضعي ...بس احس مشكلتي من الناحيه العاطفيه كبيرة احس اني احتاجه عاطفيا والقهر اني تزووجته وانا صغيرة وهو صغير يعني في عمر الزهور ليه مانستفيد من هالنقطه .... يعني متى ندلع بعض اذا صرنا شياب مثلا .... وفعلا انا رافضه فكرت الحمل مرة رابعه لاني تعبت من التربيه والحمدلله يارب على نعمة عيالي والله يهديهم ان شاء الله .... وعاد تصدقي لو غلطت مرة واشتكيت قدام امي مع اني مااشتكي لها ابدا بس غصب والله احيان يبين علي واتافف القاها تقوللي انتي في نعمه مااحد زيك... تطلعين وتروحين وتجين وتسهرين ولايقولك شي وش تبين من الرجال اكثر من كذا ...وكثير من الحريم يشوفوني في نعمه ومحد قدي عشان اطلع واروح واجي ومحد حولي :17::17: |
اقتباس:
هلا بالغاليه اميرات .... سبحان الله توقعت هذا ردك لاني متابعه لردودك والله في كثير من الاحيان اتفق معك في نفس الرد فاقول خلاص ماله داعي اكتبه اميرات كفت ووفت ... انتي عارفه السفريات هذي سالفه ثانيه بس انا للاسف يسافر عشان الوناسه .... ولمااقوله طيب موبس انت مضغوط حتى انا انواع الضغط من العيال يقول ماامنعك سافري مع اهلك ...:( تصدقي احيان احس اني ظالمه عيالي لان خلاص ماعاد لي خلق لشي .... بس قاعده معهم اوكي بس موعارفه كيف ابسطهم واسليهم .... يمكن فاقد الشي لايعطيه ...ويمكن عشان كذا بس يبون يطلعون برى ومايحبون البيت ولايلقون وناستهم فيه مدري تفكيري متضارب وكلامي ملخبط ... اليوم بالذات احس نفسيتي زفت وله ماكان كتبت المشكله ... او الفضفضه لاني مقتنعه انها مشكله مالها حل ... وبالنسبه للسوالف هو اصلا ماعنده استعداد يسمع اي شي لانه يجي البيت بس للنوم والله دايم اقوله البيت فيه منوم ....يجي هلكان وبس يبي ينام .... مابالغ لوقلتلكك عمره ماتعشى بالبيت لانه مايجي الااخر الليل .... |
الله يكون بعونك اختي
احيانا يفيض بنا الكيل بوضعنا ولكن صدقيني لو تغيرت الظروف و تم وضعك بظرف آخر مع زوج بطبيعة مختلفة ستقولين لا والله اني كنت عايشة بنعمة :) انا مع كلام اختي شيرة واميرات القناعة القناعة القناعة والصبر تأملي باذن الله الفرج من رب العالمين .. واسعدي بجزاء الصابرين :) |
اقتباس:
هلا بكورة حبيبتي ..... برضوه انتي من الاراء الحكيمه عندنا واللي احس انك تشبهيني كثير بتفكيري .... والله حبيتي اني قنوعة بحياتي والله يعلم اني مااشتكي ولااتذمر ... وكثير من الناس يحسبوني اسعد زوجه في العالم بس المشكله شي في داخلي يجبرني اني ابي افضفض لاحد يمكن ارتاح شوي وطبعا مولاي احد افضفض فماقدرت الااني اكتب هنا يمكن من تقديري لاعضاء هالمنتدى المحترم .... انتي عارفه اكثر شي يريحني اني اقارن وضعي بناس اردى مني وحياتهم مليانه مشاكل اقول الحمدلله لواني مكان فلانه اللي زوجها يضربها اوفلانه اللي زوجها اللي يحفظنا يشرب ويحشش ويغازل ... اومكان فلانه اللي يحرمه من الطلعه ومن صديقاتها .... وفي نفس الوقت الانسان مومثالي ارجع واشوف الناس اللي احسن من الجهه اللي انا فاقدتها واتمنى اكون مثلهم :):) |
شوفي
النصيحه الاؤلئ..... اكثري الاستغفار والدعاء بأن الله يهديه ويسخره لك وصدقيني بتشوفين النتيجه بأذن الله النصيحه ال2 اتوقع ان زوجك مل من الروتين اليؤمي ......اكل وشرب واذا قعد بلبيت وش يسؤي !!!!!!!! طيب جربي تبتعدي عنه فتره يعني اسبؤع او اكثر وروحي عند اهلك لغرض الاطمئنان عليهم وارسلي له مسج شوق وحب بعد قعدتك عند اهلك ب3 او 4 اياااام .....اذا ماتحرك ولا ارسل او مادق اتركيه !!!!!!!!!!!! بدافع انشغالك مع اولادك واهلك وهو صدقيني بيدق .....ويسئل واذا دق فقؤلي هلا بلغالي وووو........ومن هلكلالالالالام الحلو ومستحيل انه مايفرح بلعكس بيحس بقيمته ..... النصيحه ال3 جربي احدئ الليالي تقؤلين له كلمه حلوه او تضمينه اذا جاء وتقؤلين اشتقت لك او تسؤين حفله رومانسيه صغيره ويرجع ويشؤف المفاجئه ...طبعا اولادك نوميهم بدري...... داااااامه مو مهتم بلعااااطفه ومهملها انتي حركي هالشيء فيه احبك ووو......... ومنها قؤلي مشتاااااقه اسمع كلمه حلووووووه منك مثل بداية الزوووووواج ....,وووووووانتي واسلؤبك !!! لاتقؤلين مايصلح انا ابدء اذا مبدئك كذا اجل اصبري علئ جفاءه لك ...حبيبتي حطي ببالك ان الحياه الزوجيه تحتاج مبادره وتضحيه جربي وماتخسري شيء .... لاتظنين اني اشك انك مهمله !!!!لا والله ادري انك تلبسين ووو........... لكن جربي بلكلالالالام والمبادره منك بأسلؤب حلو .... بدل متناااقشيه وتحرقي اعصاااابك وهو صامت . جربي . |
اقتباس:
من الجهة اللي انتي فاقدتها لكن مستحيل تلقين حياة زوجية كااامله ابدا البيوت اسرار ويمكن اللي يجلس مع اهله ويلاعب عياله ويسفر زوجته كل سنه له وجه آخر ويغازل ويشرب ويضرب يعني اللي تشوفينه انتي في بيوت الناس ماهو دائما كل الصورة الله يرزقك الخير ويحفظ عيالك يا رب بكره يكبرون ويخف التعب عليك شوي :) |
اقتباس:
هلا حبيبتي همس حياك الله في فضفضتي:d تعرفين اني ماروح لاهلي كثير بسبته يقول مااحب البيت بدونكم ... اكيد كلكم بتستغربون ... بس هو تعود ان البيت مليان واننا موجودين يروح هو ويجي بس موجودين ... يعني مطمن واذا سافرت على قولته يكتئب البيت ... حليها معي .... مايبي يقعد في البيت واحنا فيه ولايبي نروح عنه:( وكل مااسافر لاهلي مااقصر مسجات واحاول اني امسك اعصابي ومااعصب خاصة انه ينتهزها فرصه بزياده وانا موموجوده وهاتك ياسفرات مع ان على قولته ماديته في الحضيض هالايام طيب من وين له ماادري؟؟؟ بالنسبه للروتين هو كذا من قبل لااخذه مايقعد في البيت ابد .... تخيلي اني انا اروح لحالي في زيارة اهله واقعد لحالي مع انهم للاسف جلستهم مختلطه حتى خففت كثير من رووحتي لاني انا الوحيده اللي لحالي ... وان جبرته بالمشاكل وبالهواش انه يقعد معي عند اهله.... تخيلوا انه يقعد ويروح لغرفه ثانيه ينام لين وقت الروحه ... مع ان جمعة اهله وناسه بس مافي شي يونسه الا انه يطلع مع ربعه وفي اشغاله ... والرومنسيه انا مازلت احاول بس فاقده الامل ... لمااسوي ليله رومنسيه وشموع وحركات يفرح دقايق وبعدين يخليني وينام .... وان عزمته نطلع نتعشى برى يرفض رفض تام كاني بذبحه ... بس مازالت المحاوله وبعاند عقلي الباطن وبقول يمكن يتغير .... خخخخخخخخخ وعلى طاري اولادك نوميهم بدري ...انا حاطه نظام لاولادي خلاص الساعه 11 نايمين واعتبر هالوقت متاخر بس لاني ماابيهم يصحون بدري ويجلسون مع الشغاله ....ومع كذا كل ماجا لقاهم نايمين يزعل يقول ماشفتهم ... مع العلم انه يشوفهم دقايق ويزهق يقول خلاص نوميهم .... طيب حرام اطفال يسهرون وموعلى كيفي ابرمجهم كل يوم على وقت .... |
اقتباس:
عاد تعرفين لمااقوله انا زوجتك ليه ماتقوللي كلام حلو او تقعد معي اونسولف .... يقول اللي يسوي كذا يلعب على زوجته عشان يغطي على خرابيطه:11::11: فلاتصدميني وتفكري زيه:23: امزح معك والله .... بس عارفه ان محد كامل لكن كلنا نتمنى الكمال ... ونتمنى نرتاح من الجهه اللي فاقدينها .... انا عندي عادي يمنعني مااطلع بس يطلعني مع عيالنا .... انتي عارفه يكسرون خاطري عيالي مرة لمااشوفهم يركضون على جدهم وعلى خوالهم وعمانهم كنهم مالهم اب .... تخيلي ان بنتي تقوللي ماما الله يخليكي ابي بابا ياخذني من الروضه مرة وحده بس بس مرة عشان كل صديقاتي ابوهم ياخذهم ..... وربي تحزني ... وارجع واقول القناعه كنز لايفنى ياليتني املكه بدون مااتذمر ... |
طيب حبيبتي
جربتي تقولي له سواليف اطفالك اللي يقولوها عن بعده عنهم .. مثل كلام بنوتك الله يحفظها .. يعني لما يعطيكي دقيقة من وقته قولي له موقف من مواقفهم الحلو ة .. وجيبي وراه تعليق بنتك مثلا .. بحيث ما يبان الموضوع انك تشتكي .. وما يمنع كم من دمعه وكم من دعوه ان الله يخليه لكم ولا يحرمكم منه ومن الكلام اللي يبين قد ايييش انتوا محتاجينه .. المره الاولى راح يسوي نفسه عاااااااادي ومو حاس بشي .. وبيقولك اتركيني بنام .. ومرة على مرة راح باذن الله يحن قلبه ويعيد حساباته .. ومع الدعااااااااااااااااااااااء باذن واحد احد راح يصير مثل ما تتمني واكثر . الله يهدي سركم .. ت ح ي ا ت ي .. |
اختي اطلبي منه بشكل جدي ان يخصص لكم كم ساعه في يوم تختارينه من ايام الاسبوع تخرجون
مع الاولاد و يخصص لكم اسبوعين في السنه عشان تسافرون مع بعض .. اعتقد هذا ليس كثير .. وظلي زني على راسه قولي له قبل بيوم بكره لي 3 ساعات من الاولاد نخرج معك جهز حاااالك .. وقولي انا خلاص طفشت وانا صااابره من حقي انك تهتم فينا على الاقل كم ساعه في يوم معين .. مو معقوله هذا الاهمال .. واذا انت مو متوعد لازم تتعود على هذا الامر من الان ... واذا رفض اعملي نفسك زعلاااااانه و لا تضعفي بسرعه و اذا هو عمل نفسه زعلان لاتخافي خليك زعلانه .. لحد ما ينكسر .. اهم شي انك ما تتطاولي عليه بالكلام .. انما يكون زعلك بهدوء و صبر و حكمه .. فكري جيد قبل ان تخطي هذه الخطوه عشان تدرسي كل ردات فعله المتوقعه و تعرفي كيف تتصرفي اثناءها .. لك مطلق الحريه في تطبيق هذه الخطه .. |
| الساعة الآن 12:04 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©