منتدى عالم الأسرة والمجتمع

منتدى عالم الأسرة والمجتمع (http://www.66n.com/forums/index.php)
-   المطلقات والأرامل والمتأخرات (http://www.66n.com/forums/forumdisplay.php?f=36)
-   -   تعايرني بعدم زواجي بكلام يسم البدن (http://www.66n.com/forums/showthread.php?t=201752)

حلم ميت 07-02-2010 12:08 AM

تعايرني بعدم زواجي بكلام يسم البدن
 
كيفكم اخواتي واخواني ؟
بقول لكم مشكلتي الي تأرقني ومسببة لي قلق وحزن
مشكلتي اني ماتزوجت بتقولون غيرك ماتزوج وين المشكلة ؟ مش سالفة اني ماتزوجت وبس ياليت الوضع كذا الموضوع ان الحزن يقطعني على امي وابوي وهم يشوفون بنتهم تذبل قدامهم ومااحد طق بابها ومشكلتي قريبتي الله يصلحها
قريبتي تغار بقوة من وضعنا المادي من فترة طويلة
واذا سمعت ان بنسافر على طول تسافر اذا عرفت ان شرينا شي ركضت وشرته واذا سمعت ان صلحنا حاجة في البيت او شرينا اثاث ركضت وعملت مثلنا
طبعا في الاول تذم بقوة في الي عملناه وبعدين تسوي مثلنا
اقول لكم موقف من عشرات المواقف
كنا بنسوي بركه صغيرة في البيت وقت عرفت قالت ليش تسون بركه خطرة مره يمكن احد يغرق فيها ويموت
بعدين شفنا العمال في بيتهم يسون البركه حتى قبل مانسويها؟


كنت مرة اسولف عن الوظيفه وقلت لبنتها ليه ماتواصلين تعليمك هي مخلصة متوسط الشهاده سلاح وبعد علشان تتوظفين وتساعدين زوجك لان زوجها حالته المادية مش كويسة قالت لي قريبتي وليه تتعلم الي دارس كلية مب متوظف وحاله من حال الي عنده متوسط
قريبتي عندها بنات تزوجوا الله يوفقهم ومن تزوجوا كلهم وهي ترمي كلام يفتت العظم علي وعلى غيري من البنات الي ماتزوجوا
كنت اقول للبنات ان صحيح ان المادة مش مهمه كثير الاان صعب الوحده ترتبط برجال حالته المادية جدا متدهورة مش علشانها
علشان عيالها لان بيتبهدلون
قالت لي تتزوج حتى لومفلس افضل من تجلس في البيت بدون زواج
ابي رايكم في هالموقف وانتوا حكموا
تقول البنت اذا تخرجت من الكلية المفروض تتزوج على طول اذا تخرجت وجلست سنتين بعدها تقدم تنازلات وتتزوج حتى لو واحد يكبرها بعشرين سنة
طبعا تقصدني لاني من تخرجت جلست في البيت سنتين
ياعالم ماادري شنو قلبها علينا قبل مايتزوجون بناتها كانت تقول ان الوحده لازم تصبر ونصيبها بيجي لها ولاتستعجل من تزوجوا وهي تتعمد ترمي علي كلام وتعايرني اني ماتزوجت
من تشوفني تجيب طاري الزواج وانو بناتها اي وحده من الامهات تشوفهم تنهبل عليهم وان الي خطبوهم واجد
مع العلم ان بناتها الله يحفظهم ماتزوجوا الا عيال خالتهم ويعانون كثير من حالتهم المادية الله يسهل عليهم
شنو سويت لها علشان تقهرني بكلامها وربي يشهد علي ماضريتها ولاضريت بناتها







بعيده هناااك 07-02-2010 12:18 AM

شوفي اختي اذا انتي تشوفينها تغار منك ليش تخلين فيه علاقه أصلاً؟ خلي علاقتك رسميه عشان ما تتجرأ عليك

ثانياً بناتها على كلامك ما كملوا تعليمهم وانتي كملتي؟ وهالشيء اتوقع يغيظها وما تبيك أحسن من بناتها بشيء
ثالثاً شوفي كلامك هذا..


اقتباس:

كنت اقول للبنات ان صحيح ان المادة مش مهمه كثير الاان صعب الوحده ترتبط برجال حالته المادية جدا متدهورة مش علشانها
علشان عيالها لان بيتبهدلون

اقتباس:

مع العلم ان بناتها الله يحفظهم ماتزوجوا الا عيال خالتهم ويعانون كثير من حالتهم المادية الله يسهل عليهم
وردها لك

اقتباس:

تقول البنت اذا تخرجت من الكلية المفروض تتزوج على طول اذا تخرجت وجلست سنتين بعدها تقدم تنازلات وتتزوج حتى لو واحد يكبرها بعشرين سنة
هي اتوقع الحين فاهمه انك غيرانه من بناتها انهم متزوجات فتحاولين تغيظينهم بتعليمك ومستواكم المادي فهي ردت عليك :)


طنشيها اختي ولا تهمك دامك واثقه من نفسك ولا تناقشينها بزواج أو تعليم أو اي شي حتى ما تضايقك بشيء ... وقولي بس حسبي الله ونعم الوكيل.

barakah22 07-02-2010 01:43 AM

شوفي يا أخت والله وأنا أقرأ قصتك حزنت حزن شديد

بس باقلك حاجة ولازم تؤمني فيها

نصيبك جاي جاي إن شاء الله

لا تستعجلي على رزقك

بعدين قصة انها بتغار منك فالمفروض انتي تنبسطي

لانه الغيرة معناها أنك ناجحة و موجودة وبقوة كمان وهيا تتمنى انها تكون او بناتها مكانك


أتمنى من ربي يوفقك ويرزقك بطابووووور عرسان انتي تختاري منهم


ولا تنسي تدعيلي كمان

usd 07-02-2010 01:59 AM

السلام عليكم

والله ونا خوك

موبس الكلام للبنت الى ماتزوجت حتى ها الكلام صاير بين الرجاجيل الي ماتزوجو

انا منفصل لي 8شهور والله يجيني كلام حريقه ليش وشقيك ماتبي تتزوج فيك مشكله (عيب)

لا ولين صار وحد اصغرمني قالو شف عياله مومثلك( الله يخليهم له ويخليه لهم)

الأشكال هذي خليك معهم رسميه جدآوالله ان ينهبلون( الحقران يقطع المصران)

.............................

الله يرزقني ويرزقك وجميع المسلمين

مشكلتي اصدق 07-02-2010 02:04 AM

حسبت عمرك ثلاثين اربعين

طلعتي توك يابنتي


مااااااعليك منها وخليها تبلط البحر


هي غيرانه موت منك ... ومالقت الا سالفة انك لسا ماتزوجتي مع انك صغيره ترى مو ذاك الكبر


سوالف زي كذا لا عاد تدخلين معها ... والا عطيها جوها

يعني قالت بناتي تزوجوا قولي اييييييييييييييييه ماشاء الله هذي الحظوظ والا بلاش

قالت وش فيها زود الشهاده ... قولي صحيح ماغير غثا وتعب قومة الصبح

شكلها عمتك او خالتك ... وتفاديها صعب ... عادي يا حلوه ... سوي مثلي انا وخواتي ... سلام وفنجال قهوه .. وكيف حالكم وقومي

لأن الجلسه مع الحساد تقصف العمر وتسد النفس اعوذ بالله


واذا تسائلت وشفيك ماعاد تجلسين معاي

قولي مشغوله ( دوره .. وظيفه ... اي شي) خليها تنفقع

المهم

مايسوي كذا الا الناس الحسوديين .. اللي يشوفونك احسن منهم ولو انهها تقعد تقط عليك كلام .. قصدها تحطمك لأنها تشوفك مرتاحه ...

انا الآن ووحده من خواتي بالذات جالسين نعاني من الحسد ... ونتعالج بالقرآن .. قللي تعامل معهم وخلوا علاقتكم فيها سطحيه ... واذا حسيتي بأي ضيق مو طبيعي فيك تراه منها

واضح من كلامها ودها تشلحك كل شي ... وهذا اللي يتمنى زوال النعمه من عند الناس فإنتبهي .. هالأشكال عندي واجد

حبيبها حمودي 07-02-2010 03:11 AM

رديها عليها لو عايرتك ان الله يقدر يسلبها النعمة اللي فيها
وبعدها اسفهيها

يارب جعلك تتزوجين شاب صالح وتكسرين عينها
يارب عاجل غير آجل يارب

دمعه ومنديل 07-02-2010 03:15 AM

مادام في غيرة ، يعني فيني صفة حسنة يحسدني عليها
يعني ليه أزعل مادام إني أحسن منه ، فأرى أنه مايتساهل إني أشوه هالصفة أو هاالشيء عشان شعور شخص متفوق عليه.
فلا بد أن يكون أسلوبنا هو ( أحسن إلى من أساء إليك ) ، وصدقيني محد في الدنيا بياخذ رزق غيره ولانصيب غيره وكل ماكتبه لك الله خيرا وخليها تغار وانت واصلي كل نجاحاتك في الحياه بدون الالتفات لها وبيني لها بأن الزواج ماهو كل شي في الحياه وان عندك الاهم منه ولثبتي لها ذلك والله يوفقك في الدنيا والاخره

GREEN222 07-02-2010 03:22 AM

حبيبتي من خلال موضوعك اكتشفت انه هي اللي غيرااااااااااانه منكم


حصنو انفسكم بالاذكااااار كل يوم


هي اللي مفقوعه عشان هيك تقول كلام لتسم بدنك فيه


نصيحه لوجه الله تعالى وقت تشوفيها عليكي بضيافتها والذهاب لغرفتك او تلهي بشغل البيت اواواواو


المهم تجنبي الاحتكاك بها

ومن ثم اقضو حاجاتكم بالكتماااااااااااان

يعني مش ضروري الناس تعرف باي شي قبل حصوله كالمسبح مثلا


وايضا ما حد يعرف عن مدخولكم الماااااااااااااااادي ابداااااا ولو كان اقرب الناس لكم


االحسد يا حبي قاتل


اسأل مجرب ولا تسألي حكيم

نور الإيمان 07-02-2010 05:03 AM

اختي بارك الله فيك الاعضاء كفوا ووفوا في مسألة النصيب اسأل الله العظيم يرزقك بزوج صالح عاجل غير اجل لكي ولي ولجمييع بنات المسلمين يارب


ولكن لي تعقيب بشأن قضية التي طرحتيها وطلبتي حكمنا وارجوكي تقبلي رأيي وانا لست ضدك شخصيآ ولكن لي رأيي اتمنى تتقبليه برحابة صدر


[/i][/color]
اقتباس:

كنت مرة اسولف عن الوظيفه وقلت لبنتها ليه ماتواصلين تعليمك هي مخلصة متوسط الشهاده سلاح وبعد علشان تتوظفين وتساعدين زوجك لان زوجها حالته المادية مش كويسة قالت لي قريبتي وليه تتعلم الي دارس كلية مب متوظف وحاله من حال الي عنده متوسط
اقتباس:

كنت اقول للبنات ان صحيح ان المادة مش مهمه كثير الاان صعب الوحده ترتبط برجال حالته المادية جدا متدهورة مش علشانها
علشان عيالها لان بيتبهدلون
قالت لي تتزوج حتى لومفلس افضل من تجلس في البيت بدون زواج
ابي رايكم في هالموقف وانتوا حكموا
اختي العزيزة بارك الله فيك الغيرة بين الاقارب موجودة عند الكل ( الا من رحم ربي ) بس اعذريني كلامك من وجهة نظري احسه صعب وقوي شوي ولو وجهته انسانة حاصلة على شهادة جامعية تامة تعليمها مثلك لوحده ماكملت بتحس بجرح من هالكلام وجرح كبير انتي بتحسيه نصيحة هي بتوصلها تجريح . مثل اللي يقول حط ايده عالجرح . وانتي وضعتي ايدك على شي ناقصها ماهو عندها ونصيحتك تطرقت لحاجتين عوروا قلبها وجرحوها انها ماعندها شهادة وان زوجها حالته تعبانة وهذي من وجهة نظري تجرح اي وحدة مو مكملة تعليمها وزوجها مادياته ضعيفة بتحس بجرح ونقص فما بالك لو احد لفت نظرها لوضعها هذا بتحس بانه يعايرها بهالشي هي كده بتوصلها المعلومة بغض النظر عن قصدك ونيتك الصافية

وردها جرحك لانك مو متوظفة فجى كلامها على الجرح عندك مع انها ردت على كلامك من حرتها من الكلام اللي قولتيه لها لان كلامك جرحها فردت هذا الرد

ثاني موقف كلامك كان ايضآ من وجهة نظري تجريح واضح جدآ مع نيتك وعدم قصدك انا اعلم . لكن اي قعدة عادية تكون فيها وحدة زوجها تعبان من الناحية المادية ووحدة تقول هالشي بتحس بخنجر انصب في قلبها وبتحس ان هالكلام موجه لها وانك بتعايريها بفقرها وهتحسسيها ان وضعك احسن من وضعها وبعدين كلمة عشان ولادها ما يتبهدلو يعني تقصدين من وجهة نظر قريبتك ان ولادها متبهدلين عشان ابوهم فقير واي ام مستحيل تسكت لوحدة تقولها اولاد الفقير مبهدلين وردها جى على قد جرحها اللي حسته ودامهم وافقو على قريبهم الفقير وراضيين وماهم مشتكيين منه مالا ضرورة هالتعقيب

لازم عزيزتي الغالية لما نكون بجلسة نشوف مين قاعد معانا ايش ضروفه ويكون الكلام على قد اللي قاعدين وعلى قد ضروفهم هذه خديها قاعدة طول عمرك عشان ترجعي بيتك وتعودي قواعدك سالمة مطمئنة ماتجرحي احد بلا قصد ولا حد يجرحك ويزعلك وينزل دموعك

لسانك حصانك خديها قاعدة

والله لما نقعد مجموعة نشوف ها فلانة متطلقة مانجيب سيرة عن الطلاق والا واحدة متزوجة نحدرها ما تتكلم عن زوجها ايش جاب وكيف يسعدها احسن ما تشعر باي ضيق تلك الانسانة ولو واحدة نعرفها تتكلم بنية صافية وتقول الي عندها نقولها يافلانة ترا معانا واحدة راعي ما تتكلمي عن كذا وكذا نحاول نخلي الجلسة حديث عام على قدر الامكان تفادي للي صار معك والجلسة كلها كم يعني . كل واحدة تمسك لسانها وكلها شوية وتروح بيتها لا زعلت احد ولا احد زعلها

ولو واحدة امها ميتة نتحاشى الحديث عن امهاتنا وايش يصير معانا ومع امهاتنا حتى ما تحس بنقص وتتضايق

ولو كلنا ضروفنا متشابهة هناك عااادي نتكلم براحتنا في كل المواضيع

انتي لاحظي حتى المنتدى مقسم اقسام مايجوز اروح قسم المطلقات واكتب موضوع عن السعادة الزوجية صح لكل مقام مقال عشان ترتاحي في دنيتك




وربنا يوفقك ويسعدك ويحميك من كل شر وييسر امرك ويرزقك بالزوج الصالح عاجل غير اجل

yes no 07-02-2010 09:45 AM

على كثر ماتبينين لها انج مرتاحه وسعيده بتنغاض وتنقهر
ريحي بالج وحاولي ماتكدرين من كلامها عالاقل جدامها
وطنشي يختي مالهم الا كذا،،

الله يوسع عليج فالدنيا والاخره

بهاء الاحمد 07-02-2010 11:48 AM

ردووود الاعضاء لا يعلى عليها ..

و إذا اردتي ان تعيشي فعليكي بالتطنيشي:d..

الله يكتب الخير و ينولك هو حيث كان ..

و وفقنا المولى لما يحب و يرضى ..

اللهم آمـــــــــين ..

SosO star 07-02-2010 12:26 PM

اخيتي كان الله في عونك .. اصبري و لاتهتمي لكلامها و تصرفاتها لأنك انت من ستتعبين..
انا متزوجة و اعاني من غيرة اخت زوجي و تصرفات كثيرة تشبه تصرفات قريبتك .. تذم الشي الي احنا نسويه وبعدين تسويه و تتفاخر به .. كنت احتار من هذا التناقض و اتضايق لكن الان اطنننننش لأن الشخص الي يغار هو الي تعبان ودايم عنده احساس بالنقص .. خلاصة الكلام حتى لو تزوجتي ممكن تتعرضين لمواقف زي كذا !! لأن الناس ماهمها الا بعضها ..
انظري للجزء الملأن من الكأس و لاتنظري للجزء الفارغ .. الله يعطيك لحد مايرضيك

الارمله الحزينه 07-02-2010 08:04 PM

السلام عليكم
اختي انا باقولك شي يمكن يحزن ويمكن يضحك انا مجموعه من القصص الحزينه منها للعبر ومنهاللبكي انازوجوني اهلي وعمري 12سنه ويوم جاء وقت زواجي اقول حق اهلي ابغى ادرس قالو البنت مالهاالابيت زوجها تبغين تجلسين مثل بنات عمك عوانس وفي الوقت اللي مات زوجي فيه بنات عمي تزوجو انا انتهت حياتي وصرت ارمله وبنات عمي عرايس
وبعد فتره كل ماشافتني وحده من بنات عمامي قامو يقولون مسكينه بنزوجك فلان من المزح لاكن هم يتهزون فيني
ومليت من كلامهم وتصرفهم وكل ماغلط علي احد مالى الا ان اتحسب -حسبنا الله هو نعم الوكيل-
وجارتكم جالسه تتهزى ولا تدري عن الخير المكتوب لك الله يرزقك الزوج الصالح حسن الخلق والخلقه

jolie85 07-02-2010 08:45 PM

السلام عليكم ورحمة الله وبركاته الله يعينك ربي يفرج كربتك ويزيل عنك همومك في القريب العاجل

اللهم ياحي يا قيوم اللهم ارزق اختنا الكريمة الزوج الصالح والذرية الطيبة

تحياتي والله يرعاك

حبيبها حمودي 07-02-2010 10:44 PM

اقتباس:

المشاركة الأصلية كتبت بواسطة الارمله الحزينه (المشاركة 2349415)
السلام عليكم
اختي انا باقولك شي يمكن يحزن ويمكن يضحك انا مجموعه من القصص الحزينه منها للعبر ومنهاللبكي انازوجوني اهلي وعمري 12سنه ويوم جاء وقت زواجي اقول حق اهلي ابغى ادرس قالو البنت مالهاالابيت زوجها تبغين تجلسين مثل بنات عمك عوانس وفي الوقت اللي مات زوجي فيه بنات عمي تزوجو انا انتهت حياتي وصرت ارمله وبنات عمي عرايس
وبعد فتره كل ماشافتني وحده من بنات عمامي قامو يقولون مسكينه بنزوجك فلان من المزح لاكن هم يتهزون فيني
ومليت من كلامهم وتصرفهم وكل ماغلط علي احد مالى الا ان اتحسب -حسبنا الله هو نعم الوكيل-
وجارتكم جالسه تتهزى ولا تدري عن الخير المكتوب لك الله يرزقك الزوج الصالح حسن الخلق والخلقه


حرام عليهم
ليش الناس كذاذ الله رزقهم قاموا يعايروا اللي انحرموا من هالنعمه
الله الرزاق وقادر بعيارتهم يسلبهم النعم !!

الله يعوضك خير أختي
ويستر عليك ويسهل لك الزوج الصالح اللي يسعدك يارب

بنت مكة2008 08-02-2010 12:04 AM

اقتباس:

قالت لي تتزوج حتى لومفلس افضل من تجلس في البيت بدون زواج
ابي رايكم في هالموقف وانتوا حكموا
تقول البنت اذا تخرجت من الكلية المفروض تتزوج على طول اذا تخرجت وجلست سنتين بعدها تقدم تنازلات وتتزوج حتى لو واحد يكبرها بعشرين سنة

لاحول ولا قوة الا بالله

يالطيف من دول الناس اكره دي التصرفات الا مالها داعي

كانوا الزواج والنصيب بي يدنا
ذكرتنى بي واحده كانت زميلتى تقولى اتزوجي اي واحد وخلاص احسن ولا تجلسي بدون زواج

المصيبه انها تبا الكل يتزوجوا وهيا طول النهار متبهدله من زوجها وتشتكى على طول اتزوجت من المتوسط رجل متزوج وكبيررررر مره

طبعا اجلس في بيت ابويه معززة مكرمة ولا يالطيف اتبهدل مع اي واحد مايقدرنى

اتمنى انك تطنشيها وتبعدي عنها واي تجديدات تبو تسوها لا تعطوها خبر اتحشوها

والله يرزقك ويسهل امورك يارب


ك

آية كبيرة 08-02-2010 04:17 AM

والله أنا أقول إنه يجب مراعاة ظروف الآخرين من حولنا
وصحيح كلام أخني سعاد 2000 وبارك الله في الجميع وربنا يحقق أمنية كل البنات
وكل شابات وشباب المسلمين

حلم ميت 08-02-2010 07:51 PM

بعيدة هناك
اختي الكريمة
مااقدر اقطع علاقتي فيها لاانها تقرب لي وبعدين ياعزيزتي اصلا مااتناقش معها كلامي مع البنات هي الله يصلحها دائما تنط من تشوفني اتكلم على طول تتدخل في السوالف
الله يوفقك في دنياك



barakah22
الله يبعد عنك الحزن
غيرتها والله كأنها مرض القهر ان هالغيرة من فترة طويلة ومش راضية تنتهي
الله يجزيك خير على دعواتك الطيبة مثلك
انتي اول المعازيم



usd
الناس مالها شغله ولامشغله الارمي الكلام
الله يرزقك الزوجه الصالحه والذرية الصالحة


مشكلتي اصدق

لو انها تجي لحالها ماجلست معها حدي سلام ومشيت
عندنا عادة في بعض ايام الاسبوع تجتمع العائلة تفاديها صعب ولااقدر ارد عليها مهما كان هي اكبرمني
تعيش حياتها وتخلينا نعيش ليه تراقبنا تخيلي بالله ان حتى اسماء عيالها قلدت علينا !
الله يشغلها بطاعته
الله يسعدك عزيزتي ويبعد عنك الحساد ويكتب لك السعاده في كل خطوة تخطينها

حبيبها حمودي
هذه بنت خالي وقت شافت قريبتي تتفاخر عليها انها ماتزوجت وان بناتها تزوجوا قالت لها يمكن بعدين يرجعون لك مطلقين
بيني وبينك مااقدر اقول هالكلام احسه قوي
ومااتمنى ان يتطلقون الله لايقول ربي يسعدهم ويبعد شر امهم عنا
الله يحفظك من كل مكروه وشر


دمعه ومنديل
ياعزيزتي الناس من يشوفون ان فيك صفه حلوة يحاولون قد مايقدرون انهم يحطمون فيك او يرمون عليك كلام يسم القلب
الله يوفقك ويجعل حياتك افراح ومسرات

barakah22 08-02-2010 11:46 PM

حلم ميت



barakah22

الله يبعد عنك الحزن
غيرتها والله كأنها مرض القهر ان هالغيرة من فترة طويلة ومش راضية تنتهي
الله يجزيك خير على دعواتك الطيبة مثلك
انتي اول المعازيم




الله يبعد عنك الحزن

الكلمة هذي عندي بالدنيا ومافيها


الله يسعدك ويفرج همك

انتظار الفرج 10-02-2010 07:13 AM



ياأختي حلم ميت

انت لست عانس ومازلت فتاة صغيرة

افرحي عيشي حياتك

بكره ان شاء تتزوجي وتضحكين على هذه المواقف

حلم ميت 20-02-2010 01:39 AM


GREEN222
الله يكفينا شر من به شر
ويصفي القلوب يااختي اكثر الزيارات تكون في بيوت الاقارب
ماقدر اتجاهلها
على نياتي كل شي اقوله للناس وامي مثلي مانقدر نخبي شي
والاقارب ياكافي كل شي يخبونه
الله يفرج همك

سعاد
ياحبيبتي انا وقت قلت لبنتها ان تكمل تعليمها ماقلته علشان تفاخر لاسمح الله قلت لها تكمل تعليمها وعرضت عليها اني على استعداد اني اساعدها واعطيها دروس خصوصية وبالمجان
احتسب الاجر عند الله
هي قريبتي نيتها شينه اتجاهنا
مشكورة حبيبتي على دعوتك لي ولبنات المسلمين


yes no
على كثر مابين لها ان مرتاحه على كثر ماترمي علي كلام يسم البدن
لدرجة اني صرت اكره الطلعات والزيارات
الله يوفقك دنيا واخرة

بهاء احمد
مشكورة عيوني على كلامك الطيب
الله يسعدك وين ماكنتي




SosO star
صدقتي اختي تلاقينها تذم حاجه وبعدين تركض تسويها
الله يصبرنا عليهم
الله يسخر لك زوجك ويكفيك شر الناس


الارملة الحزينة
لاحول ولاقوة الابالله
الله يصبرك اختي ويارب ياكريم ان يوفقك ويسعدك




jolie85
الف الف شكر على الدعوة الطيبة

فلهاوربك يحلها 20-02-2010 02:26 AM

اختي الكريمة
طنش تعش تنتعش
انامثلك
اخوي من ابوي وامي يعايرني

بس من اليوم ورايح ماراح اسمح لاحديتجرى علي بكلمة
خليك واثقة من نفسك
وصدقيني ربي بيرزقك قريب
مومهم نتزوج اهم شيء الاختيااااااااارالصح
الله يوفقك ويسعدك

الورديهـ 20-02-2010 02:47 AM

اقتباس:

شنو سويت لها علشان تقهرني بكلامها وربي يشهد علي ماضريتها ولاضريت بناتها


بإختصار تغاااار من وضعك

مخلصه تعليمك وبناتها لا
لساتك مو متزوجه وبناتها تزوجو وتدبسو ووضعهم مو قد كذا
فمن القهر ماعندها غير انها تحاول تقلل من شأنك بأنها تحاول تدخل فكره انك عانس ببالك
وانتي مو كذا وانتي الله يهديك تساعديها

خلاص زماننا هذا الوحده يوصل عمره 30 وماتزوجت مايطلقو عليها عانس
هذا زمان اول مو الحين

حبيبتي استني نصيبك لين يجي ولا تفكري بهالأمور لان من اسلوبك بالكلام انتي ارقى من انو وحده زي هذي تضايقك:29:

ومثل ماقالت فلهاوربك يحلها
اقتباس:

مومهم نتزوج اهم شيء الاختيااااااااارالصح
ياما بنات اعرفهم معرفة شخصية تزوجو بس علشان يفرحو ويعنني عندي زوج يسفرني ويوديني وينزلني السوق ويحبني وهو بالحقيقة كل يوم كفخ وكفيخ وكله علشان الاستعجال او الزواج للهروب من كلمة عانس

بنت عمي عمرها 20 سنه واخوها يعايرها يالعانس إلي بسنك متزوجات ومخلفات وانتي محلك سر
وردها عليه كثير يعجبني تقول إيه انا عانس ووضعي عاجبني ايش عندك !

ولما ترجع المياه لمجاريها مع أخوها ويناديها بأسمها ماترد عليها:( إلا إذا قالها عانس تقوله لبيـه ؟؟ :d

^
وربي هذولا البنات إلي مريحين اعصابهم :22:

نور الإيمان 20-02-2010 08:49 PM

اقتباس:

ماقلته علشان تفاخر لاسمح الله
اعلم ذلك ولكن دائمآ فاقد الشئ يكون حساس جدى تجاه هالشي اللي هو فاقده واي شي يمس هالشي المفقود ينجرح ويصل له على انه تجريح واللي قاله له يكون { من وجهة نظر فاقد هلشي } تفاخر لانه يملكه وهو لا هي تحس بكده

وانا اعلم حسن نيتك بدون ما تبرري موقفك بس فاقد الشئ يكون جدآ حساس والافضل انك تتركيها على راحتها لو حبت تكمل تعليمها وهي تجي بنفسها تطلب منك والا لا تتدخلي فيهم لكي تبعدي نفسك عن اي شئ يزعلك

وموفقة غاليتي وربنا يسعدك

يالبى قلبي 13-03-2010 09:05 PM

حبيبي
بالعكس السالفه توسع الصدر
واضح كثير انها معجبه كثير فيكم و يكفيك حبها لتقليدكم .. بس هي من شدة غيرتها الواضحه تبي تحطمك
بس انتي طبعا وحده متعلمه وفاهمه ومو من السهل ان الواحد يأثر فيك بآي كلمه وانه يسيطير على مشاعرك
كبري عقلك وخليك احسن منها ولاترادينها وخلي علاقتك فيها رسميه تغتاض اكثر واكثر ولا تحاولين انه تنكد عليك جلستك

دعوه اخيره .. الله يرزقني واياك ومن يريد الستر بالزوج الصالح التقي الحنون الغني الكريم الي مايحوجك لأحد وينسيك حياتكك الي قبل من السعاده والحب والخير .. امين امين امين

mosibati 14-03-2010 02:42 AM

هذه المرأة مريضة جدا وحالتها يرتى لها

يعني الزواج هو كل شيئ في الدنيا وإذا لم نتزوج خلاص نبقى ناقصين

صحيح أن كل واحد يتمنى الزواج لكي يكون عنده أولاد و يستقر وغير ذلك

لكن عدم زواجنا ليس نهاية حياتنا

أسأل الله العظيم أن يرزقك بالزوج الصالح

تغير كل مافيني 14-03-2010 03:39 AM

انا مع الاخت سعاد في كل شي قالته

وادعي لها ربي يشفيها ويسامحها

ترى اللي تعيشه موب هين واشين من الفقر نفسه

هي جالسه تتعذب نفسيا وهذا واضح من متابعتها لكم وتقليدكم وانتقاداتها لكم

ادعي لها ماتندمين

منفصله وأفتخر 14-03-2010 04:44 AM

ياقلبي الله يعينك
والزواج قسمه ونصيب وكل تأخيره فيها خيره
لاتستعجلي على رزقك أكثري من الدعاء
قريبتك مريضه الله يشفيها
ولا يرمى باالحجر إلا الشجر المثمر
هاالأشكال كثير نواجهها لكن مالك إلا تطنيشهم ولا تعبرينهم أو قولي لها ماتزوجت لأني ماأبي غير زوجك:d
وحاولي تتجنبيها وتريحي نفسك
الله يرزقك الزوج الصالح يارب

حلم ميت 16-03-2010 05:10 AM

حبيبها حمودي
الناس ماعاد فيهم رحمه
الله يرزق الارملة الحزينه الزوج الصالح والذرية الصالحه الي ترفع راسها وتكون بارة فيها



بنت مكة
وربي يشهد علي اني ارتاح لك كثير
الحمد لله معززة في بيت اهلي ومش مقصرين علي بشي
هذا الي معذبني
اتمنى اني اسعدهم وافرح قلوبهم
الاهل اكبر فرحه لهم زواج عيالهم



ايه كبيرة
عزيزتي فيه فرق بين الشماتة بااوضاع الاخرين وبين طلب مساعده الاخرين
مع الاسف اكتشفت اني عبيطة كنت اظن اذا عرضت مساعدتي على الناس بيفرحون ماكنت ادري انهم شايلين بقلوبهم علي




انتظار الفرج
الله يسعدك ويفرحك
جزاك الله خير على كلامك




فلها وربك يحلها
لاحول ولاقوة الابالله
اقسى شي ان اقرب الناس لك يعايرك جدتي ام ابويا تعايرني الله يصلحها ويحنن قلبها علي
ربي يرزقك الزوج الصالح الي يحطك بعيونه

صبيه منسيه 18-03-2010 06:17 AM

حسبي الله ونعم الوكيل عليها :(


الساعة الآن 03:15 AM.

Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©