|
مشكله مع زوجي والسبب عش حمام ....!!((حُلت ولله الحمد ))
والله ما ودي كتبت الموضوع بس ان المده طالت زوجي ما يكلمني وما اكلمه الا في الضروريات (( راح تضحكون على سبب مشكله )) سبب المشكله عش حمام لي فتره وانا اقوله يجيب عامل يشيله ومو جايب وقت المشكله من يوم الخميس اللي راح التفاصيل اني دائما اقوله يشيله مو راضي ويوم الخميس طولت السالفه وحنيت بدون صراخ ارجو ان لا يساء فهمي او اني غير صادقه فيما اقول مشكله تافهه والمصيبه انا اهلي الاسبوع الجاي بيسافرون فلا سفر وزوج ما يعطيني وجهه وعلى الصامت وش الحل لا تقولون روحي راضيه انا ما غلطت ... وما اعدها مشكله بس هو مكبرها .. |
خلاص روحي قوليله ماعاش هالعش اللي يبي يخليك قالب وجهك فيا
وخليه لما تفضى على راحتك ونلقى حد يجي يشيله المهم كله ولا زعلك واعملي كوب عصير فريش وقطعة حلو وقولي هالكلام اعتقد مستحيل يظل عالصامت ولا شو رأيك |
سعاد بعمري مهمومه دوره ونفسيه زفت
يعني بصراحه السالفه كلها على بعضها والله عش مو قادره احس اني مربطه قلت يمكن بعد الدوره تتحسن نفسيتي وبصراحه اتوقع انو لو ماكان في دوره ماظل كل هالفتره مايلقيني وجه .. ان شاء الله فهمتي لغتي الغريبه ....!! |
حبيبتي اكيد الانسان بس يكون بمزاج ونفسية متعكرة يشوف كل شي قدامه غير اول
هونيها وتهون وكل شي بيد الله مافي شي يمنعه عن الانسان الا لحكمة واللي يعطيه لنا ايضآ لحكمة والحمدلله على كل حال وكله يتعوض جربو تروحوا تتمشوا والا تقعدوا بمكان مفتوح ولا اي شي يغير الجو الانسان مرة سعيد ومرة حزين هذي الدنيا دار الشقاء ربنا يسعدك ويفرح قلبك ويبدلك لحال السرور بأذنه تعالى وما نسمع منك الا الاخبار الحلوة |
يعني الحمام تنبسط بعشها وأنتم متنكدين
فليهــا يا هند .. >> مدري وش أقول بس شكلك مضغوطة ياقلبي الله يصلح أمركم |
سؤال يا هند..
هو ليش مب راضي يشيله؟ |
توني كلمته والله مو مصدقه بيجنني هالرجال
اقوله انت هالحين كذا من سالفه العش الي تكلمنا فيه ...؟؟ قال يكفي ... ودخل الغرفه وبغيت اجن مو مصدقه رحت وراه قلت من جد والله شهسالفه وش بتسوي بالسوالف الاكبر قال يعني وش تبين هالحين انتي تقولين عني وسخ قلت انا قلت كذا قلت ترضى بهالشيئ لانك ماتنظفه انا الي انظف واذا مو شايله بتخلى الشقه عشه فروخ والله اني ماقلت وسخ قلت مو ذي مو عيشه اهلي بيسافرون وانا على عش فروخ مايكلمني والله اني ابكي وانا اكنب اجل لو صايره سالفه اكبر وش بيصير بستجن ..... |
عش حماااام@@
لالا مش معقولة!!! يابنت الحلال الموضوع سهل مرة........لالالا مو سهل......أصلاًٍ مافيه موضوع علشان يصير سهل والا صعب روحي بس انغزية مع جنبة وقولي له مثل ماقالت الأخت سعاد ((ماعاش هالعش اللي يبي يخليك قالب وجهك فيا)) والله راح تقولين لنا الليلة أنتهى الموضوع الله ييسر أموركم |
الأخت هند ام احمد
لاتكبرينها وهي صغيرة فقط ريحي نفسك (ريلاكس) وشوفي زوجك وش يحب من الحلى او القهوة او أي شي وتقهوي انتي وأياه بس وسعي صدرك والامور تياسير بأنه تعالى |
اشكركم انا نمت بيت اهلي الليله
جاني هو كالعاده ودق علي خليت امي تكلمه وتقوله انا انا بنام بيتهم الليله قال ليه قالت له انها تعبانه قال طيب ومجد عندها اغراض لها قالت ايه وسكر ..... |
ما عليه يا أختي
الموضوع مازال بسيط بس يمكن هو انه تهيأ انك تقصدين (انت وسخ) أو فهمها كذا وهذا اللي مخليه مكبر راسة لا تخلينة... ليني راسة برسالة توضحين له انك تغلينه ومستحيل انك تغلطين على نور عينك وبعدها كم رسالة شوق طبعاً هالرسايل ماتكون ورى بعض لكن تكون بنفس اليوم. والله ونا اخوك موضوعك هيّن بقوة بس الشيطان يكبر اللي بالخواطر الله يسمّعنا عنكم خير |
اللي فهمته من كلامك انه ما زعل من طلبك لما قلتي له شيل العش هو زعل لانه يفكر انك توصفيه بالوسخ في ناس فهمهم غلط اذا كلمتيه في موضوع يقلبه في دماغه بطريقة ثانية و يفهمه حسب تفكيره ما اقول غير الله يعينك حاولي تجلسي معاه و تسأليه ايش اللي مضايقه احتمال يكون متضايق اساسا من شي معين و لما كلمتيه زاد الوضع سوء عنده الله يهدي اموركم و ينصلح الحال ان شاء الله |
افا يا ذه العلم عش عش حمام يا اختي هند هههههههه يبه رجعي وانبسطو مو انا بيتنا متروس كله عشاش ونظيف ولا يستاهل زعل,,, يله يبه تعوذو من بليس ورجعو ولا صار شي ولا شي عش خليه يصير عشين يا شيخه ولا يزعل حد... ربي ينور قلوبكم بطاعته |
عزيزتي ممكن زوجك اخذ في خاطره فقدان العش لانه يحب الطيور خوفه من فقدانه ---لأن يعض الاشخاص يحبون الطيوروالحوانات جداويتعلقون بها والله زوج اختي عنده استراحه ومخليها حديقة حيوانات لحبه لهذه الحوانات ويحبها اكثر من عائلته وكلامه دائما عنها فشوفي خاطره والله يبعد عنكم الزعل على قول الاخوات خليهااعشاش موعش --بارك الله فيك
|
الحكاية بسييييييييييطة. لكن حتى مع حسن نيتك أقول لك لا يوجد ماهو أكثر وطأة على القلب من زلة اللسان فهي لا تنسى أبد الدهر. *
|
الله يجزاكم خير بصراحه موضوعي اكثر من تافه بس زوجي مو طبيعي يزعل على الموضوع باختصار هو يدور على اي زله عشان نتخانق انا احس كذا امس بعد ما قالت له امي اني بنام عندهم ظل ساعه وبعدين دق على جوالي قالت امي ردي وانا بصراحه كنت متردده المهم رديت وصوته بين انه ضايق صدره وانه على السرير بس ما بعد نام قال شفيك قلت شنو فيني قال ليه بتنام بيت اهلك قلت له انت مو طايقني وماتعطيني وجهه عشان عش بصراحه انا جالسه افكر في الايام الجايه اذا موضوع مثل هذا يخليك تزعل اجل المواضيع الكبار وش بيصر مصيرنا قال انتي قلتي عني وسخ قلت جيب المصحف احلف اني قلت انك وسخ قلتلك انك تبي تخلى الشقه عشه فروخ وانا الي انظف مو انت وطبعا انت فسرت الكلام الي تبغيه على كيفك وزعلت قال الاّ قلتي قلت والله ما اذكر واذا قلتها في وقت غضب مو انت احيانا تقولي غبيه والا بلهه هذا كلام واحد يقوله لزوجته قال انا اقول من باب المزح واحنا ذاك اليوم كانا جد قلت حتى لو مزح ترضى احد يقولك انت غبي سكت قلت انا اعدي لاني ابي الحياه تمشي ما ادقق على كل شيئ ... لكن انا وياك احس اني عايشه مع مدقق بياخذ على كل كلمه اقولها والله انها صعبه لا انا اتحمل ولا اي وحده غيري تتحمل قال طيب وانا شسويت لك هذاني اكلمك واسوي الي تبغين قلت تكلمني وانت مو مشتهي حتى تشوف وجهي المشكله انك انت انطوائي وتحب تعيش وما تكلم احد وماتسولف وعلى الصامت فأثر على طبعك معي لكن انا العكس تماما انا اجتماعيه واحب اسولف اذا زوجي وهو اقرب الناس لي صاد عني من لي اهلي اشوفهم بس كم ساعه وزميلاتي نادرا ما اكلمهم يعني ما لي احد الا انت وانتي مو ملقيني وجهه خمس ايام على عش طيور عموما تميت اكلمه تقريبا ثلث ساعه وبعدها اخر شيئ قال انا على ضغوط في العمل وانضغط في البيت بعد قلت واحنا شذنبنا يوم يومين بس المسأله بالطول .... وانهينا المكالمه |
والله اكذب ان قلت اني ارتحت في بيت اهلي مافي وحده تنام مو في بيتها وترتاح واكثر شيئ تعبني بنتي لانها متوعده ما تنام الاّ بسريرها وظلت صاحيه الي الساعه 6 الصبح واكثر وانا ساكته رغم اني حسيت بتغير شوي وحسيت اني اشتقتله لاني مو متعوده انام بيت احد ثاني يوم ظن اني بدق عليه ودق علي الساعه 2 وربع قال مادقيتي شلون يعني اطلع واجي اخذك قلت براحتك وقال طيب والغدا قلت اكيد من بره قولو ماشاء الله قلتو قال بوديك مطعم انا مو فرحت انا تشققت من الفرح ورحت لبست وتزينت وجلست بنتي ولبستها وطلعنا قال خلاص حرام مايمدينا بيصلون العصر ياحسافه اخر شيئ بخاري ورجعت الشقه (( معليه قولو ماشاء الله بخاري من يحصله هاليومين )) حسيت هو بعد مشتاق لي بس مايبغى يبين لي واكثر مشتاق لمجد حسيت اني اشوي وبغير من بنتي فعلا مشتاق لها ويضمها ويلاحقها بالشقه بقول كلمه اخيره اتمنى ان ما يتقفل الموضوع رغم ان المشكله انحلت لاني بغيت اشوف ردود الاعضاء يمكن تفيدني مستقبلا بغيت بعد اركز على شيئ اخير انو مو اي وحده تخطو هالخطوه اقصد المبيت بيت الاهل لانها بصراحه مجازفه وان جالك مره مو كل مره بيجيك وانا اتخذت هالخطوه لاني بذلت معه جميع الاساليب يعني حاولت اكلمه وحاولت اصلح الامور لكن مافاد وصدقوني لا تخذون عني فكره اني مو سهله والله مرات كثيره انا الي اجيه حتى لو كان الخطا منه واقول المراه بهالطريقه هي الي تكسب زوجها لكن مو كل مره باللين لان الرجال يتعود وينتظرها هي دائما الي تجيه يعني لازم مره اضع بعد خطوط لايتجاوزها وبعد ارجع والين واسوي فيها ضعيفه ومسكينه ..... ادري ثرثرت كثير بس حبيت اكمل بقاي القصه وما اترك نقاط في نهايتها انتظر ردودكم .... ومشكورين مقدما |
ألف مبرووووووووووووك
هذا عين العقل والله الله يوفقكم ويهدي سركم والله فرحت لك يا اوخيتي يازين المرة في بيت رجلها ويازين الرجل يتسامح ومايتعالى الله يوفقكم ويصلح بنتكم |
الله يوفقكم يارب ويبعد عنكم كل شر
اذا حسيتى في يوم من الايام انو معصب او مضايق من شغل او اي سبب لاتطلبي شي الا لما يكون مروق لانو ا الواحد لمن يكون مضايق لو احد قال سلام عليكم وقتها نقول ليش يقولها بدون نفس هههههههه او اي حجه |
بصراحة يا هند أتحفظ على ذهابكِ بيت لأهلكِ بسبب هذه المشكلة.
أنتِ نفسكِ عاتبتيه ولمتيه لأنه (ما عطاج ويه) بسبب عش .. تقومين أنتِ تروحين بيت أهلج عشان عش؟!!!! على كل حال الحمدلله أن الموضوع انتهى على خير .. لا حرمكما الله من بعضكما. |
باختصار ...
السعيد من وعظ بغيره و الشقي من اتعظ به غيره !! لذا ... نصيحه .. لا تخرجي من بيتك فيتعود زوجك فراقك فيملك فيتركك !! و سبب الخروج .. عذرا اقبح من فعل ! بل خروجك هذا كان يستوجب من زوجك وقفه حازمه جدا فيتركك كما ذهبت ترجعين و اذا تكررت فيتزوج ثانيه لكي اذا خرجت يجد من يؤنس وحشته ! هكذا هي الحياه ! فمن أجل عش ! تخرجين من بيتك ! عجبي ! والاعجب تصرف زوجك ! لا اجامل في ردودي فتحملي ردي بصدر رحب ! والله الموفق ... |
اه يا السيف المهند باي شيئ ارحب بردك ان كان هذا هو منظورك للحياة الزوجيه بشكل عام لما بقيت زوجه واحده على ذمت زوجها ....!! |
اختي هند..اول شي الحمدلله انه المياه رجعت لمجاريها...
ثانيا انت ياهند عندك ضغوط نفسية...وزوجك لديه ضغوط في العمل...عشان هيك اتخانقتوا عل عش.. طبيعي من الضغط...في الايام القادمة لازم حبيبتي تستوعبوا بعض اكثر وتفضفضوا لبعض...واذا حسيت زوجك مضغوط لاتضغطيه اكثر قد ينفجر...ولاتطلعي من بيتك تاني مرة لانه المشكلة قد تكبر ويصعب حلها...وصحتين وعافية عالبخاري:d..ايش ماكان اسمها طلعة ومطعم:d..الله يسخر لك زوجك ويسخرك لزوجك...اللهم آمين |
| الساعة الآن 02:39 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©