|
زوجتي جابت لي المرض
بسم الله الرحمن الرحيم ادخل بالموضوع انا بصراحه تعبت نفسيتي من زوجتي مدري هي غيره أو ماتفهم أو عندها حاله نفسيه مايمر اسبوع الا وحنا متهاوشين والسبب مره الانترنت ومره انا آخر اهتماماتك ومره انت غريب وتقول شكلك شارب شي ومنت صاحي حاولت ارضيها اكثر من مره لين طفشت وحياتي انا وياها على المحك آخر هوشه البارح وللحين متزاعلين واكبر مشكله عندها النت مع اني مااستخدم النت الا فيما يرضي الله وابي اعرض عليكم مشكلتنا اللي البارح تخيلوا طالع انا وياها من الظهر الساعه 2 وما رجنا للبيت غير الساعه 8 بالليل كلها تمشيات ووناسه واسواق ولما رجعنا للبيت وبعدما فتحت النت وجلست تقريباً ساعتين وتقبس علي تقول انا لي حق تعطيني من وقتك وقفل النت ولما رفضت اقفل النت خذت اللابتوب ورمته على الارض وللحين وهي زعلانه أبعرف هل أنا غلطان ولالا |
اتوقع متزوجين حديثا و هذا يحدث
نظرا لفراغ الزوجة, هل عندكم اطفال ماوضع زوجتك هل هي ربة منزل او موظفة.. |
كان نفسها تسهر معها و تكمل اليوم معها
عاااااااااااادي تحصل كثيييييير بداية الزواج :D و ساعتين كثيرة ، انتم الاثنين غلطانيين و الاختلاف فقط انها ما تفهم طبيعة الرجل و انت كذلك |
اقتباس:
أشكرك اخي على التفاعل مع مشكلتي تزوجت بشهر 7 الماضي تونا انا مهدي الوضع ع الاخر وهي شانه هجوم 24 ساعه وهي ربة منزل وربي جننتني وكلما صار مشكله تقول اجلس ببيت اهلي احسن لي ولا تقول طلقني ومن كثر ماتقول طلقني نفسي عافتها |
اقتباس:
شكرا على التفاعل اخي الكريم لكن أبسألك! ليش ساعتين كثيرهـ؟ بالمقابل انا معطيها (ساعات من وقتي) واعتقد على قولتك مافهمت طبيعة الرجل بس مو المشكلة هنا المشكلة عندي ان لسانها طويل وانا طبيعتي مااحب كثر الكلام لدرجة اني اجلس بالساعات مااتكلم |
خلاص السبب هو الفراغ و قلة الوعي بالتعامل الذكي مع زوجها
لكنها تحصل اول الزواج الزوجة تتصور زوجها ملك لها بوقته كله إلا في الشديد القوي و هذا غلط راح تتعب إذا ما تخذت موق جاد يعني هي لما تطول لسانها عليك لاتسكت يعني خلي نظراتك ثابتة و كلمها بشكل جدي انك لاتسمح لها بمحادثتك بهذه الطريقة و كأنك أضغر أطفالها و إذا ارادت ان تتناقش في شيء يحزنها , تتكلم باحترام و إلا لن تسمع لها قد تغضب , لكنها ستشعر حتما بالندم كن حازما و إذا تكلمت عن المشكلة وانك لاتعطيها وقت, أنبها بأنك لم تتوقع ان مافعلته من ترفيه لها=مابين بعينها= .. لازم يكون فيه احترام بينكم و إلا لن تحل معظم المشاكل و انتم في بداية الطريق الآن ... وقد يكون احساسها بالفراغ سيدفعها لتكرار ذلك لكن ان تعاتبك شي و لاتحترمك شي آخر ,,يجب ان تفهمها هذه النقطة .. ثانيا ادعها لممارسة بعض هواياتها او الإنشغال بدورة تعليمية وماشابه لتقتل الفراغ و تعرف ان لكل من الزوجين مساحة صغيرة بعيدة عن الآخر لممارسة مايحب ولاحقا ستنشغل بالأطفال بإذن الله , فالوضع لن يستمر هكذا لوضمنت الإحترام و تواجد ما يشغلها عنك |
اعتقد فراغ الزوجة هو سبب المشكلة
والله يصلح فيما بينكم |
المسداني
الله يجزاك خير كلامك ريحني كثير خصوصاً يعني خلي نظراتك ثابتة و كلمها بشكل جدي انك لاتسمح لها بمحادثتك بهذه الطريقة و كأنك أصغر أطفالها فعلاً هذا اللي حصل البارح جيت لها وقلت ماني اصغر عيالك هالمره رميتي الجهاز وماسويت لك شي والمره الثانية اكسر الجهاز على راسك هل تصرفي فيه اجحاف بحقها؟ |
ما كانت ردة فعلها...!!
لا اعتقد انك اجحفت و الله اعلم إذا كانت تطول لسانها و تطلب الطلاق لأسباب تافهة يعني لو استبدلت عبارة , اكسر الجهاز ب =سيكون لي تصرف آخر معك= لكن ما حدث حدث,, يجب ان تعي اهمية الإحترام .... |
أخي المسداني أشكرك من كل قلبي الله يوفقك ويجزاك خير |
اقتباس:
اخي الكريم ..,, همســـه في اذنـــك .. راجع حساباتك .. وافهـــم زوجتك جيدا .. كيف انت معهـــا في اوقاتهـــا كلها خاصــة الحرجه منها (( حمـــل // نفاس )) او غيرهــا .. وصدقني .. تحتاج المرأه الى وقت لتحتويهـــا .. ولكن تحتاج هي لوقت اطول لنسيان ذلك ,,.. اقلب الأدوار .. وانظر اليها من زاويـــة أخرى عندهـــا فقط.. ستجد الحــل حتمـــا ’’ والآن .. اترك عنك مهـــاترات الشيطـــان .. واذهب اليها .. امسك بيدها .. وانظر اليهـــا .. وعندمـــا تبتسم .. دع قلبك يعتذر لـــها .. فما انتم فيه ليست الا بهارات لتحلو الحياة .. ادام الله سعادتكما .. |
ياخي الكريم
زوجتك هذي شكلها توها صغيره ومبتدئه علي الزواج ويبي لها تعليم حبه حبه ولاتدلعها كثير ومن الافضل توقفها عند حدودها هي تسمع بأن الزوج ملكها لوحدها وهذا هي نظريتهاا لكن انت لاتخليها تطول لسانها عليك وخلها تحترمك واذا ماسمعت تعليماتك حاول انك توقفها عند حدها لأن اللي مدت يدها علي جهازك بكرا تمد يدها عليك لكن عليك بأنك توقفها عند حدها وتصدق ان عندي الحين شباب متزوجين يتكلمون عن غيره المرأه يقولون وجع راااااااااااااااااااااااااااااااااااااااااااااس ومنغثين رغم انه قديمين متزوجين لكن ماعلينا هذي كلها غيرررره وحاول انك تفهمها وتفهم امهاااا ازين لك بس مو الحين امهااا بعد ماتسوي كل حلولك ومانفع معهااااا هذيك الساعه كلم امها ارق التحايااا |
الله يألف بين قلوبكم
ويرزقك صلاح الزوجة ويجعلها سكناً وأنساً لك |
أدامك الله وأدام قلمك بعد النقاش مع الاخوان وخصوصاً المسداني اتصلت بها قبل قليل بحكم ظروف عملي عسكري ومن نبرة صوتها اتضح لي انها نادمه على المشكلة التي حصلت وهذا بفضل الله ثم تعاونكم معي جميعاً لكن عندي مشكلة ثانية ونفسي تتركها زوجتي اذا ارادت ان تعاتب ترفع صوتها علي وانا مااقدر استوعب اي عتاب اذا كان هناك رفع للصوت |
اقتباس:
وأخيراً أشكرك على التفاعل |
اقتباس:
جزاك الله خير |
خطـــوه مبـــاركــه .. اثبت بهـــا بأن فعلا ..(( قلب الاســد ))
اذا ارادت ان تعاتب ترفع صوتها علي وانا مااقدر استوعب اي عتاب اذا كان هناك رفع للصوت هههههههه اضحك الله سنك .. لازل كل منكـــما يعيش مـــاضيه بلحظات حاضره ... هذه ليست مشكلة ابــدا .. عندمـــا ترفع صوتـــها انظــر اليها بنظرة تعجب ممزوجة بعدم الرضا .. وقل لهــا .. اينـــا الرجـــل ذو الصوت العالي ..؟؟ صدقني عندهـــا تتمنى لو تنشق الارض وتبلعــها .. لفتـــه .. تحب المرأه ان تكون انثى دائمـــا خاصة عند زوجهـــا (( اللبيب بالإشـــارة يفهم )) |
اقتباس:
جزاكم الله خير ووفقكم جميعاً |
اتبع نفس الطريقة في كل مرة
يكن كن حازم معها بنظراتك و لا تسمح لها ترفع صوتها و قل لها انا احترمك و اقدرك و حقي عليك اوجب فعليك ان تعامليني باحترام و أدب التأنيب يكون وقعه شديد على المرأة فلاداعي ان تقابلها بصراخ يكفي الحزم وقت صراخها و لا تناقشها بالموضوع الذي تصارخ لأجله إلا عندما تتكلم باحترام, قل لها هل تعاملين ابوك و اخوك هكذا حين يحدث خلاف!! في المقابل كن رقيق معها لطيف , وقت تأدبها معك وتقرب إليها و لابأس ان تشاركك بعض صفحات النت ,, |
اقتباس:
عندها النت هو سبب المشاكل فلا يمكن ان تشاركني لأنها رافضة الفكرة بتاتاً أشكر لك تنبيهك لبعض الامور التي غابت عن ذهني |
اخوي لا توصل المشاكل لاهلها تعودو تحلون مشاكلكم بينكم وعاقبها على حركتها لما خبرت امها وقولها الزوجه العاقله تحفظ اسرار بيتها ولاتطلعها لبرا البيت والي يصير معكم طبيييييعي لانكم تو متزوجين بس خلها فبالك نصيحه افرض احترامك وشخصيتك وكل الي تبي الحين من بداية الزواج لان زوجتك الحين انت تشكلها مثل ما تبغا فحاول تحط لك بعض الاشياء تلتزمز فيها مثل *عدم رفع الصوت علا بعض..
*لا تخرج المشاكل خارج عشكم الزوجي.. *ان تحترم خصوصيتك ومثل ماتعطيها من وقتك وتخرجها هي بالمقابل تعطيك حقك بالخلوه مع نفسك اما ع النت او اي شي اخر.. *لاتخليها تشك فيك ازرع الثقه من الان بينكم.. لانها اذا وثقت فيك وحست بلامان معك مارح تتضايق من النت ولا غيره لانها واثقه فيك ... وكل الي يصير بسبب جهلكم الاثنين لشخصيات بعض كرجل وامرأه كل واحد يتصور المشكله من وجهة نظره هو مو من وجهة نظر الشريك الاخر......... اتمنى لكم السعاده وربي يوفقكم ويسعدكم كل حياتكم..... |
كم عمرك و كم عمر زوجتك ؟؟ معلش طووول بالك شوي .. واضح ان زوجتك ما تعرف كيف تتعامل مع الزوج و على بالها انها تتعامل مع احد اخوتها .. زوجتك لازم تعرف حقوق الزوج جيدا و هذا دورك يا بطل انك تفهمها و تتفاهم معها و تجلس معها بعد ما تهدوا من المشكله و تقول لها كيف تريدها ان تتصرف معك و كيف تحترمك وقول لها انك تريد وقت خاص فيك انت واثناء هذا الوقت هي تكون تشغل نفسها باشياء اخرى غيرك ..ادخل عليها من مدخل الدين و كيف الشرع اوضح عظم حقوق الزوج و انك لا تريد ان تنام و انت عضبان عليها فتلعنها الملائكه اشتري لها كتب عن الذكاء العاطفي و عن الحياه الزوجيه و عن المشاكل الزوجيه و حلولها .. يعني لازم تصبر عليها و تكون انت القدوه لها .. يعني اذا كنت لا تريدها ان ترفع صوتها عليك انت ايضا لا ترفع صوتك عليها .. اذا تريد منها ان تحترمك انت ايضا احترمها .. المسأله محتاجه منك صبر و سعة صدر و طووولة بال و صراحه و تفاااااااهم و حوار هادئ .. وربي يسعدك .. |
اولا ,,,,,الله يهديها ان شاء الله ويكبر عقلها
ويهدي كل زوجه تتصرف من قله الفراق والوعي وثانيا ,,,, كلم احد من اهلها ابوها او اخوها اكبر منها يمكن تهابه اشوي وماتقل احترامها لاعليه ولاعليك يمكن يقدر يكلمها وانت قوله عن كل تصرفاتها عشان لو صار اي تصرف خطأ منك في اي وقت يكون مالك عذر والكل بيكون عارف هالشي وبيكون السبب اهي طبعا الحين انت ساكت وصابر وطبعا الصبر له حدود طبعا في هذا الموضوع لاتكلم امها ابد لانها بتوقف مع بنتها لازم تكلم رجال احسن لك على الاقل بيكون متفهم وضعك واذا طلبت الطلاق مرة ثانيه خلها تروح بيت اهلها تجلس بدون ماتطلقها خلها تجرب الوحدة شلون بدون زوج وطبعا انت لاتتصل عليها ولا شي يعني بالعربي طنشها كم يوم ولا ترد على اتصالاتها وان شاء الله بتحس فيك واذا عدا الكم يوم انت روح عندها ويالله شروطك قبل ماتوافق ترجعها من البدايه يايكون بينكم احترام او خلها بيت اهلك وثاني شي خلها تعطيك حريتك حتى لو بالساعات واتمنى لكم الستر والصلاح ,, ان شاء الله |
اقتباس:
لما ترفع صوتها عاتبها بحزم و نبهها انك لا تحب رفع الصوت و انها يجب أن تكون أكثر أنوثة و لا ترفع صوتها مما حصل و انها لو اعتادت على هذا الأمر ستكون قدوة سيئة لأطفالها مستقبلاً لأن الاطفال يجب ان يشعروا بهيبة الأب و قوامته عتب بسيط مع شوية حزم بتنحل المشكلة هذه لكن لا تتوقع منها انها تتغير بين يوم و ليلة لأن الطبع يغلب التطبع و اذا كانت طبيعتها رفع الصوت لن تتخلص منها بشكل سريع لكن مرة على مرة و بحزم منك بمشي الحال ان شاء الله |
والله فكرتني بنفسي اول متزوجت ;)
نفس الكلام اقول لزوجي ليش تقعد عالنت ليش وليش وفعلا بالزات جملة اخر اهتماماتك صراحة لولا توقيت الموضوع كان قلت هادا زوجي بتكلم عني وانتو متزوجين حديثا يعني بسيطة يااخي حتعقل زوجتك وتكبر الان بطلت انا اقول لزوجي هالكلام يعني لو حسيت التهى عني او ماشفنا بعض كتير ممكن اقلو بس مو بصورة هواشات الامور تختلف بعد السنة الاولى كل الامور الطايشة هاي تروح ان شاءالله |
اقتباس:
اخي الكريم انا شاب حفظك الله عموما يااستاذي هذي باين عليها انها تسمع بالمتزوجين وماهي عارفه كيف تطبق اركان الزواج وشروطه شكلها مراهقه للحين زوجتك ويبي لها صبر وتعليم بنفس الوقت حاول انك تعاملها معاملة طفله لحين يكبر عقلها وتدرسها تدريس علي يدك ياحبيبي زوجتك من نوع النساء اللي تربيها علي يدك بس بتعليم وأدب لكن مثل ماقلت لك لاتخليها ترفع صوتها عليك نهائيا وخلها تهاااابك وتحترمك انا اذكر واحد من الربع ارسل زوجته اول شهرين من زواجهم عشان تجيب له ملعقه ههههههه جابتها وطشتها له طش فعرف انها توها صغيره لكن صراحه رباها علي يده مع مرور الوقت عموما انت ناقشها بكل هدوء وحسسها بنفس الوقت قل لها انا قصرت معك بشئ من اغراضها ومشاوريها وبكل شي لازم كل شي يحصل بينكم تحسسها فيه عشان انت تكون ماشي علي خطوة ثابته وهي راح تحس ويجي يوم تناقش نفسها بنفسها وان شاء الله انها بتحس في كل شي مع مرور الوقت وحاول انك تجيب قصص زوجيه فيها تقصير من الزوج لزوجته وخلها تقراها بدون انت ماتدري عشان تشوف النعمه اللي عايشتها معك وتقول مصيبتي اهون من مصيبه غيري هي تراها مو حاسه باللي انت تسويه عشانها لكن كل هذا يجب عليك انك تحسسها بكل شي وبنفس الوقت تدلعها بس مو كل وقت دلع لا ياخوي حاول تدلع وتذلل بنفس الوقت اووووك اخووي انتظر ردك تحياتي لك |
إذا رفعت صوتها عليك قل لها وأنت متعجب ،،،، صراخك يذكرني بواحد من اخوياي بالعمل إذا صرخ ،،،، !!!! عليك بالصبر فأنت بأول سنة زواج ومناسب لها لو تتصفح وتطالع هذا المنتدى وتتعلم وتستفيد،،،، فزوجتك على نياتها وطيبة لكن بدون معرفة بكيفية التعامل مع الزوج أو تكون زوجة ممتازة،،، الله يصلح زوجتك ويجمع بينكما على خير عزوبي:22: بس:d رجل:30: |
أي شي تبغاه منها من طريقة تعامل وغيره وضحه لها عشان تمشي سفينة حياتكم أول سنة صعبة صح لكن في أمور بديهية مثلا خطأ كبير إنها تطلب الطلاق كل شوية صارحها وعلمها حتى الشي اللي تشوفه ما يحتاج وشويه شويه ولا تزعل عشان لايمتلي قلبك عليها وتشوف مافي فايدة فيها انت محتاج أمور تعطي نتيجة إيجابية فكر وعالج بالأهم فالمهم واترك الزعل ورا ظهرك لأن مافيه فايدة وإذا اتحسنت ولو شويه شجعها والله يوفقكم تقبل مروري |
اسمع خلك شديد ترى الحريم ماينعطوا وجه
وش اللي ترفع صوتها !! وترمي الجهاز ماصار هذا زوج هذا صار اصغر عيالها ولعلمك اذا استمريت كذا بتزود اكثر |
المرأه يوم إنها تتزوج عندها فكره في بالها و مع الوقت تفهم بالحياه أكثر
هالفكره هو إن زوجها معه عصا سحريه يحقق لها كل أحلامها و بما إنه فارسها اللي على الحصان الابيض فتتمنى انه يجلس مقابل خشتها 24 ساعه :d أنا من رأيي تسوي زي ما سوى زوجي أول ما تزوجنا و بحكم إن فترة الملكه ما طولت و عمري كان 19 ما مدانا نجلس مع بعض كثير الموهيم كان كل شوي يحكي لي حكايه عن واحد من أصحابه كل الحكايا (خرطي) :d وأنا لي الله مصدقه مره يقول واحد من أصحابي طلق زوجته عشانها تقارن بين حياتها و حياة أخوانها :24: و في مره ثانيه قال إن واحد من أصحابي تزوج على زوجته عشانها رفعت صوتها عليها و و و من حكايات ألف ليلة و ليلة و تونا بشهر عسل ما بعد تهاوشنا بس وربي دروس لين الحين ما أنساها إنت سو كذا قول لها في وقت انتو مو متهاوشين إن صاحبك طلق زوجته لأنها كل شوي تسوي هوشه و تغار عليه أو ترفع صوتها و في نفس الوقت إمدحها وربي أكثر الحريم ما يجون الا بالمدح لكن سالفة رفع الصوت أنا ضد هالشي مرره |
السلام عليكم دخلت عشان اقترح عليك طريقة استخدمتها مع زوجي يوم كان يرفع صووتة علي ..... واخذتها من د.جون غرااااي انصحك تقرا كتابه الرجال من المريخ والنساء من الزهرة اذا رفعت صوتها اقلب وجهك عليها لكن بهدوء وقولها انا ماراح اكمل نقاش معك في هذا الموضوع حتى تحترميني وتقصرين صووتــــــك واخرج من البيت واتركـــــــــها ...(اناا كنت انام ) ومرتين ثلاث بالكثير راح تعقل وتبطل ترفع صوتهـــــــااا... واللي تمرون فيه هذا طبيعي وكلنا مرينا فيه في اول سنه زواج وهي على فكرة اصعب مرحلـــة لكن فيها توضع النقاط على الحروف وتوضح الحدود واساليب التعامل وفكرة القصص مفيدة جدا لدرجة اني مرة سمعت قصه عن عسكري يعذب زوجته باسلاك الكهرباء _تخيل_ عاد احكيها من باب انك قريتها بس لا اقل او اكثــــر وهي راااح تعمل لك الف حسااب اسفه على القصه المؤذيه بس فعلا سمعتها وصلها لزوجتك حتى تعرف انها في نععة كبيره ,,, ترفع صوتها براحتها ,,,وترمي الاب توب ...وتسووي كل الي في خاطرها :d ربي يوفقكم ويسعدكم على فكرة انصحك تاجل الانجاب شوي حتى تتفاهموا مع بعضكم وتعقل زوجت شوي وتحن للامومة لكن اياااااااااك ان زوجتك تستخدم حبوب تراها مضرة جدا للبكر وسبب عصيبة المزاج وتخلي الاحلاق ضيقه جدا ومعدوومه احيان بسبب انها تتلاعب في الهرمونات |
اخوي انت ماغلطت ولا شئ والغلط منها يعني وش تبغى ساعات مع بعض وناسه وتغيير جو على الاقل جاملتك يومها بس
كل اللي اقدر اقوله لك ان الخلاف وارد في بدايه الزواج بحكم تغيير الحياه والبيت وبعدها عن اهلها لاول مره انصحك نصيحه العمر بما انك ببدايه الزواج عودها على اللي تبغاه انت واللي تحبه من غير ماتلتزم بالصمت بس بهدوء ورواقه اذا هي هدئت قولها كلام حلو وان النت تسليه وتعالي جلسي جنبي تحلين هالجلسه وعصب عليها اذا طولت لسانها وقولها اني احترمك وعلى الاقل بادليني نفس الشئ وشوي شوي تمشي الحياه انتو ببدايه المشوار الله يسعدكم |
الله يصلح احوالكم بس حتى لو كانوا ببداية الزواج و الزوجة تحس بفراغ عيب الوحده فينا تكلم زوجها بهذا الاسلوب و الرسول حذر من طلب الطلاق بدون سبب و كمان تكسر الجهاز !! و الله صعبة التفاهم له اساليبه و لا بد ان تتعلم هذه الزوجه اساليب التعامل مع الزوج و انتقاء الفاظها و اللي يقولون عادي تصير بأول الزواج صح كلامكم لكن احترام الزوج واجب الامور اللي مثل هذي لابد تُحل من البداية و توضع لها حدود لان اذا استرم الوضع و بكره صار فيه عيال راح تكثر المشاكل بعيد الشر أخي السائل : اجلس جلسة هادئة مع زوجتك و فهمها ان الحياة مو خروج و وناسه و بس و ان جلوسك ع النت ما راح يضيع حقوقها و لتفادي زعلها حاول تجلسها جنبك و انت تشتغل ع النت و خذ رأيها و اسألها وش رايك بهذا ؟؟ اسوي هذا و لا اتركه ؟؟ ترى رايك يهمني ممكن بهذا الاسلوب تحسسها بأنها محل اهتمامك و بالنسبة لتصرفك ما كان صحيح ادري انك كنت زعلان بس خلك دائما عكس مزاجها اذا هي عصبت انت حاول تهدأ و تمتص غضبها لانك بكذا راح توازن الوضع و ان شاء الله تهدأ الامور ادعي ربي ييسر امرك و يصلح حالها و اعذرني ع الاطاله |
| الساعة الآن 09:56 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©