|
مشكلتي مع زوجي الشك و الضرب. بدأت باجراءات الطلاق ((تم الطلاق الرد 58 ))
http://www.sheekh-3arb.net/3atter/sa...s/image153.gif مساء النور عليكم ... الصراحة مو عارفة من وين أبدأ ...وأيش أقوول ...بس راح أقوي قلبي وأتكلم أبغاكم تساعدوني لاني تعبت ... تفكيري وقلبي وروحي وجسمي كله تعب ... أنا متزوجة لي خمس سنين وعندي طفلة صغيرة عمرها 4 سنين مشكلتي هي مع زوجي ... من يوم أتزوجتة وهو يشك فيني بكل شيء ومايعاملني زين دايم...و يفتعل معاي مشاكل ما كنت أعرف أرد عليه أو أدافع عن نفسي ...كل شيء يسويه أو يتهمني أبكي على طوول حاولت أغير فيه كثير ...وأغير الشك اللي عنده حاولت أساعده ...المشكله حتى في أمي يشك حتى لو فاتحة الشباك عشان يدخل هواء أو يغير جو البيت وعلما اني كنت ساكنة في الطابق الثالث ...كان يقوول لي ليش فاتحة الشباك ...في احد منتظرته يجيك .. الصراحة هو لاقريبي ولا يعرفني ...ولا عمري شفتة ...تزوجنا عن طريق وحدة صديقة أمي قالت لها عندي واحد قريبي يبغى يتزوج وأنا أخترت بنتك لانها تعجبني ... وأبوي قال يسأل عنه ...قالو له لا تسأل هذا أنسان ماشاء الله عليه أنسان محترم وخلووق وماراح تلاقي أحسن منه ...طبعا أبوي أكتفى من كلامهم ..وماسأل عنه وتزوجنا بأقصى سرعة ....حتى أني ماتعرفت عليه ...وهو كان مستعجل بالزواج بسرعة عشان أمه تعبانة ويبغى يفرحها بزواجه ... والله العظيم من أول ليلة سوى معي مشكلة ... لو أمي أتصلت علي ..يقوول لي وش تبغى منك ..وش قالت لك لو صديقتي أتصلت علي ...يقول لي هذه البنت مو كويسة وتلاحق رجال وهو أصلا مايعرفها ولا حصل شافها ... أنا ما أبغى أطول عليكم لكن القصة طويلة جدا جدا وصراحة مأساه وصل معي للضرب المبرح ...كان يضربني لين جسمي يصير فيه كدمات ويطلع دم ويقوول لي والله ماسويت لك شيء ...والله أنا أحبك طلبت الطلاق بعد ثلاث شهور من زواجنا .... قال لي أحبك ومستحيل كنت أفكر أضرك ..وأستجبت له وصرت حامل ... وضربني مرة وانا حامل بسبب أني لقيت صور خليعة في التلفزيون وكلمته بهدوء جدا ...انه في صوور مو زينة في التلفاز طبعا ...قال لي والله أنا ما أشوفها ولا حصل اني فتحتها قلت له انا مااتهمك بس أبغاك تمسحها وقام يضربني بأقوى ماعنده ...وربي لاعليت صوتي عليه ولا اتهمته بس قلت له أمسح هالقناة ... ولدت وجلست مع أهلي شهرين ...ماكان يسأل فيني ولا يتصل ولا حتى يسأل عن بنته المهم أبوي أصر على طلاقي منه وكلم أعمامي أعمامي قالو له لا تطلق عطوه فرصة ..أحتمال يتغير لو شاف بنته أحتمال يصير أحسن ...واحد في أعمامي قاال خلااص نكتب عليه شروط لو وافق عليها زوجته ترجع له ....لو ماوافق يطلقها ...وكلهم أتفقو على هذا الكلام الا ابوي قاال ماابغى منه شيء الا انه يطلقها .... ورحنا المحكمة ..وزوجي وافق على الشروط ...ورجعت له ...أول مادخلنا البيت قام يضحك ...قال لي انتي مفكرة نفسك شنو ...ماراح أنفذ ولا شيء .. وساعتها أبوي تخلى عني ...وزعل مني لاني ماسمعت كلامه وقال لي والله لو لقيتة زبحك ماراح أسأل عنك أنا بين نارين ...قلت أعطيه فرصه لزوجي أحتمال عشان بنته يتغير وللاسف حياتي صارت أسوء وأسوء ... تعذبت كثير ...حتى وانا نايمية يجي يمسكني ويقول لي انتي منو تكلمين يفكر اني اتكلم بالجوال مع احد وصاار يرووح لابوي ويقوول له...ترى بنتك ماتحبك ...تتكلم فيك كلام موزين تحكي لي قصة حياتك كلها ...وللاسف أبوي يصدق وينقلب ضدي وانا مالي حيلة ...مشكلتي أني حساسة جدا وما احب أضر أحد بس أقوول الله يهديه تفاقمت علي المشاكل وعملت مافي وسعي وتوكلت على الله وصرت أقيم الليل وأدعي وأستغفر الله ياربي وش سويت في حياتي عشان يحصل لي كل هذا والله العظيم في الاسبوع نتهاوش كل يوووم وشوفو في الشهر كم مره بنتي كبرت وصارت تشوف مشاكلنا ...والله لمن أبكي هي تبكي معي صارت بنتي عصبية جدا ...ودايما تبكي .. والمشكلة الكبيرة اني دايما أغفر له خطأه وأسامحه واقوول يلااا بكره بصير أحسن وكل مرة أعطيه فرصة ... وللاسف ماشي للاسوء ...وكانت المفاجاءة انه قال شافني مع واحد في شقة واني أرووح بيوت رجاال ...وتخلوي عني كل أهلي ... ماادري وشلون صدقوه ...طبعا ابوي ماله دخل فيني وامي ماتقدر تسوي شيء وهو كان يقوول لاولاد أخته وأخوانه وخرو عنها هذه وحدة مب زينة ..موكويسة وخرو عنها أحتمااال تسوي فيكم شيء ... تخيلو موقفي ما ادري وشلون صدقوه ...ووينه الاثبات قلت لهم بالله عليكم هو لو شافني مع واحد ...كان يدخل علي ويمسكني متلبسة ...بالله عليكم وشلون تصدقوون راحو واسألوه وتكلمو معهم ...قالو له انت صدق شفتها اا تدرون وش قالهم ...هي أصلا حركاتها خلتني أشك فيها كان كل مايجي من الدوام يدخل يدور في البيت أحتماال في رجال موجود جوة أو حتى لو دخلت أستحمى ...يقول لي ليش أستحميتي ... خمس سنين عذاب ونار ...كنت مسكينة مااعرف في الدنيا اي شيء سوى انك تحترمين زوجك وتطيعيه بس ... انا الحين أبغاكم تساعدوني ...أنا أبغى اتطلق منه .. وهو موراضي ويقوول لي أنا مستحيل أطلقك لاني أحبك ... وخلاااص أنا تعبت وصرت اشوف الموت أرحم لي من عيشة معاه وباشرت في الاجراءات من غير مايعرف بس خايفة انه ياخذ بنتي مني وصراحة انا مااقدر أعيش من غير بنتي مستحيييل السؤال اللي أبغاكم تجاوبونه ...هل اللي راح أسويه هذا صاااح والله ماابغى اجرحه ...لكن هل استمر في الاجراءات هذه اللي محيرني انه يقوول لي احبك وتصرفاته معي سيئة جدا جدا خلاني اكره الدنيا اللي عايشة فيها ... وكرهت نفسي ... وانا عن نفسي أكرهه بشدة والله مااحبه بس خايفة طلبتكم تساعدوني ,. وانا جاهزة لو اي سؤال تسالوني اجاوبكم عنه ...بس ابغاكم تساعدوني وتريحون ضميري ... الاشراف: تم تعديل العنوان ليتضح المضمون |
لاحول ولاقوة الابالله
اسأل الله ان يعينك وان يوفقك الى كل مافيه خير في دينك ودنياك واخرتك باعتقادي ان زوجك عنده مرض الشك وهو مما اتضحلي اكثر ماتشكينه منه لازوم يراجع طبيب اما سؤالك فلا استطيع الاجابه عليه..بأذن الله الاعضاء يفيدونك |
هلا فيك أخوي مجاهد 11 ...أشكرك كثير على أهتمامك
وياربي يوفقك ويسعدك في حياتك وتلقى الخير وين ماترووح هو صحيح مريض بالشك ...لانه يشك حتى في الاطفااال الصغار بس حكاية انه يراجع طبيب هذه مستحيلة ...لانه مو عارف وش قاعد يسوي أصلاا ودايم كان يقوول لي أنتي تتخيلين أني قاعد أشك فيكي ويشككني في نفسي صار يوم يتكلم معاي أرووح أجيب ورقة وقلم من دون مايحس فيني وأكتب اللي يقوله كله ...تصور وصلت لهذه المرحلة .... ربي يسهل ان شاء الله ويعطيك العافية يارب |
الله يعينك
ويهدي زوجك ويرجعه للصواب لاكن لا والف لا للضرب! كيف مستحمله الضرب؟ الله يشفيه هذا مريض ادعي ربك يشفيه! |
لا حول ولا قوة الا بالله
والله وحزنت من مشكلتك وربي خايفة اقولك على الحل ربي يحاسبني مش حاقولك غير الله يعينك ويصبرك ويقويك وياجرك في المصيبة هذه ان شاء الله الاعضاء راح يساعدوك باذن الله لا تخافي الله معك ان شاء الله |
ياحبيبتي ودي اساعدك بس المشكله بنتك ماتقدري تسوي شي بياخذها وبيتقطع قلبك عليها.....
والله مالك الا ربي هو القادر سبحانه على هدايته وتسخيره لك .... ثقي فالله تعالى وصلي وادعي بالسجود واشكي كل همك لرب العالمين والله بعدها بترتاحين وبيقوا ايمانك مع الالتجاء لله بالمحافظه على الصلوات باوقاتها والدعاء وتحري اوقات اجابت الدعاء واحسني الظن في الله بانه بيساعدك وبيوجهك للقرار الصائب لك ولبنتك ولزوجك والله يوفقك ويكتب لك الي فيه خير ويحفظلك بنتك ولا يحرمك منها ...هذا الي عندي ومعليش حبيبتي لو تغيري صورة التوقيع هذا منتدى عام مو نسائي واحس فيها فتنه للرجال اتمنى تقبلي طلبي بصدر رحب.. |
الله يعينك يا اختي ..
مشكلتك صعبه .. فالحياه مع هذا الزوج مستحيله لانه مريض بالشك و ايضا اهلك تخلوا عنك .. يعني لو تطلقتي وين بتروحين ؟؟؟ انت باشرتي باجراءات الطلاق و زوجك لا يعلم لكن هل احد من اهلك يعلم انك سوف تتطلقين و تعودين الي بيت اهلك؟؟ ينتك لا تخافي عليها فهي في حضانتك الى سبع سنوات ... هل انت موظفه او عندك دخل مادي ؟؟ .................................................. ...... |
اقتباس:
هلا فيكي حبيبتي ...عن جد أشكرك كثير لاهتمامك وربي مو عارفة وش أقولك ....صرت أشوف الضرب أهون لي من الالم النفسي اللي سببه لي ...على الاقل الضرب والكدمات والالم الجسدي يروح بعد أسبوع لكن يظل الالم النفسي طووول حياتي ... والله دايم أدعي ربي ...وربي يهون علي ان شاء الله مشكوورة كثير وربي يسعدك ويعطيك العافية .. |
اقتباس:
هلا فيكي ياعمري ... ليش خايفة تقولي لي على الحل ...وليش خايفة أنه ربي يحاسبك أنا أبغاك تساعديني وتشوفين لي الحل الافضل في هذه الحالة ومن وجهة نظرك انتي هل بقدر أعيش معاه ...كل يوم شك ...حتى لو ابتسمت يقول لي ليش أبتسمتي وياليته بس شك..حتى فتن وكذب وضرب وغيره ... أأمين يارب يسمع منك وان شاء الله ربي معاي مشكورة حبيبتي على أهتمامك بموضوعي وياربي تسعدين مدى الحياة وتشوفي الخير وربي يوفقك |
اقتباس:
هلا فيكي أختي ... هذا اللي مقطع قلبي ....بنتي ....والله مااقدر أفارقها ثانية ..الله يطولي في عمرها ويخليها لي ... أكيييد أثق في الله وأتوكل عليه ودايم صلواتي في وقتها ودعائي وقراءة القران لكن حبيبتي صرت موقادرة أصبر لاني متعذبة نفسيا وخايفة يوم أنجن وأدخل المصحة العقلية ... الموضوع هذا مو ساهل أبد ...هل تصدقين أني مااقدر انام في أمان ولا حصل يوم ارتاح بالي .. صرت ماانام معاه في نفس الغرفة ...دايم أنام مع بنتي وأقفل الباب بالمفتاح لانه أحيانا أفتح عيوني من النوم ألقاه واقف على الباب أو أحيانا يجي يصحيني ويقول لي أنتي مع منو تتكلمين ...وربي أخااااااف ....ولو سكرت الباب بالمفتاح يطق الباب باقوى ماعنده ويصحي بنتي من النوووم .. طبعا أستخرت ربي قبل لااتزوجه ...ودايم أستخيره انه يوريني الصواب ومشكورة حبيبتي على التنبيه واكييد رااح اغيره ... ومشكورة على اهتمامك وعسى ربي يوفقك ويسعدك مدى الحياة .. |
الله المستعاااااااان شك وضرب ومرض نفسي... كيف بدأت في إجراءات الطلاق بدون علمه؟ عموما مهما الأهل اتخلوا عنك الآن ما حيستمر تخليهم أعطينا أخبارك أول باول |
اقتباس:
هلااا حبيبتي ... وربي اني تعبت من هذه الحياة لو تطلقت برجع بيت أهلي أكيييييد .. انا الصراحة كلمت أمي وعمي وقالو لي انهم بيقنعون ابوي باي شكل ووقفت الاجراءات شوي عشان اشوف وش بيقولون لي بس خليكي متاكدة انه لو ابوي رفض هذا الكلام ..راح اكمل الاجراءات لان حياتي من عدمها واحد ...وراح أواجه لو يذبحني ... أنا تزوجت وعمري 17 سنة والحين عمري 22 سنة وابكر وحدة في اخواني كنت أبغى ادرس جامعة ...في البداية كنت حامل وخليتها لين اولد وبعدها البنت صغيرة ...والسنة الثالثة دخلت وسبب لي مشاكل كثيرة وتركتها ... انا الصراحة مااشتغل ولا عندي دخل مالي بس اتمنى لو اتطلقت أرووح أشتغل باي طريقة ..كوافيرة أو تطريز أو اي شيء بالحلال عشان منها أكمل دراستي الجامعية وأعيش بنتي ... حبيبتي مشكورة على الاهتمام وياربي تتوفقين وتنجحين في حياتك ربي يسعدك ويكتب لك الخير وين ماتروحين |
اقتباس:
اكيد يا اختي واصلي اجراءات الطلاق فالحياه مع هذا الانسان لا يمكن ان تطااااق .. وتأكدي ان بنتك راح تظل في حضنك و لا يستطيع ان يأخذها منك .. حتى لو انتهت فترة حضانتها تستطيع امك ان ترفع عليه دعوه حضانه و تكسبها ... اهم شي انك لا تضعفي مهما كان .. |
وعليكم السلام ورحمة الله لا حول ولا قوة إلا بالله الله يعينك ويصبرك زوجك ما أظن انه يعاني من الشك لكن من كلامك ووصفك لتصرفاته يبدو أنه وصل لمرحلة المرض العقلي !!!! والله أعلم والعجيب أنه ممكن انه يشك بك فقط ، لكن أن يتجاوز ويصل للشك بأمك ، حتى على الاقل حاجز الحياء يمنعه لكن يبدو أن وضعه سيء جداً وأخشي انه يتجاوز الضرب إلى تهديد حياتك أو حياة بنتك والشك فيها أنه ما هي من نسله ....!! الحياة معه صعبة ................................... والله يسهلك امرك ويكتب لك الخير عزوبي:22: بس:d رجل:30: |
اقتباس:
تصدقين اني اول ماتزوجته وانا توي عروس ماكان يكلمني مرة قلت له لاتطلع وتتركني بروحي سولف معي ...تكلم معي وربي شاهد على كلامي قال لي انتي مريضة نفسيا ...لاني أبغاه بس يتكلم معي الصراحة وكلت زوجة خالي وخالي بسرية تامة أنهم يبدؤن بالاجراءات وانا متابعة معاهم بالجوال وللحين خطوة أني أرووح المحكمة مابدأت ... وربي يسهل أن شاء الله مشكووورة كثير على الاهتماام وان شاء الله دايما باخباري معاكم ربي يسعدك ويوفقك ويفتح لك طريق الخير يارب |
بصراحه الحياه مع شخص زي دا صعب جداً..اليوم طفله بكره أكثر ..وماتدري إن دا إنسان مريض
في شئ صارله بحياته وهو صغيرعشان كدا صار شكاك إستخيري الله عزوجل في أمرك وربنا يختارلك الطيب ياغاليه وخليكي على كثرة الإستغفار ليل ونهار وربنا يعينك ياقمر |
اقتباس:
وربي ريحتيني ياعمري ..تسلمي يارب طول عمرك وياربي تسعدين في حياتك وتنالين اللي في نفسك |
أختي .. دعائي لكِ براحة البال وبتيسيير اموركِ يااااااااااااااااااارب ..
آلمني قلبي وانا اقرأ ما يحدث لك من اقرب الناس .. من زوجك وابو بنتك .. ومن رايي انه ليس انسان شكاك لا انه انسان مريض عقلي .. وهو يصب كل امراضة النفسية عليكي .. فأنت كالسجينه والأسيرة .. الطلاق سهل .. ولكن الخوف ان يأخذ طفلتك الصغيرة .. حتى لو اخذها بعد السيع سنوات مثلما قال احد الأعضاء .. فهي ما تزال طفلتك .. اسعي للطلاق اذا تاكدتي من ان تكون طفلتك معكٍ وعسى الله ان يوفقك ويعوضك ياااااارب .. تحياتي .. |
اسال الله العظيم ان يهدي زوجك ويرده الى طريق الحق والصواب ويخاف الله فيك وفي بنته ولكن حسب مافهمت من مشكلتك يااختي ان زوجك يعاني من انفصام للشخصية والشك والهواجس والظنون السيئة في الغير وليس فيكي لانه من شك في زوجته التي هي اقرب الناس له وشريكة حياته وعرضه وشرفه فمن المؤكد انه يعامل الناس مثلما يعاملك به وعلاج حالة زوجك وهي طبعا مشكلة نفسية وعليه التوجيه لاقرب طبيب نفسي وشرح حالته له ويحدد معه الطبيب جلسات حتى يشفى من حالته النفسية 0
اما بالنسبة لكي اختي الكريمة فعليكي بالصبر وتحمل الاذى من زوجك وتؤجرين على ذلك وعليكي بقيام الليل وكثرة الاستغفار والصدقه لان الصدقه تطفى غضب الرب سبحانه وتعالى ولاتحاولي ان تتصادمي معه في الكلام لعله يحس من نفسه انه غلطان عندما يشاهدك وانتي ما تراددينه لان السكوت ابلغ من الكلام احيانا وثقي اختي تمام الثقه انه لايوجد بيت مافيه مشاكل ولكن الصبر كما قلت هو سيد الموقف في كل الاحوال 0 |
هناك حلان اما ان يتعالج هذا الرجل وهذا مستحيل
واما ان تتطلبي الطلاق وتعيشي حياتك ولا اعلم سر خوفك من الطلاق ؟؟ هل برايك ستعيشين اسوء من هذه العيشه قد تتزوجين من رجل اخر ويعوضك عن ما فات اما لو استمريتي معه فسيستمر العذاب الى ان تصلي الى الجنون والعمر يجري فلا انصح ان نقضيه معذبين |
مثل ما قال الأخ بندر زوجك يعاني من مرض نفسي ولديه ذهان لذلك ينكر ماقاله لك
وأعرف شخص من جماعتنا أصابه هذا المرض وكان يشك بزوجته وبناته ثم يعتذر ويبكي لزوجته عندما تخبره بكلامه ولكنه مايلبث أن يعود ويتهمها في شرفها ويضربها ونفس السيناريو يتكرر لمدة سنه حتى ذهب لطبيب نفسي وتعالج والحمدالله صار طبيعي وكمل حياته مع زوجته الحين مات الله يرحمه لكنه عاش طبيعي تقريبا 20 سنة بعد العلاج فإذا عند زوجك استعداد للعلاج فالطبيب النفسي هو اللي بيفيدك إذا حالته بسيطة أو معقدة حاولي تفهمي أهلك أو أهله عشان يتعاونوا معاك أما إذا رفض الإستجابه للعلاج وماحد وقف معاك عشان يتعالج زوجك فطبعا أطلبي الطلاق ونفري بجلدك لأنه خطر عليك |
آلمني كثيراً موضوعك وأبكاني
ماأملك لك غير الدعاء الله يفرج همك ويسهل دربك ويكتب لك الخير |
الله يشفي زوجك ويسخره لك
ما في احد من عائلته يقدر يأثر فيه ويدخله المستشفى يتعالج |
لاحول ولاقوة الابالله
اسأل الله ان يعينك وان يوفقك الى كل مافيه خير في دينك ودنياك واخرتك |
الله يصبرك على المصيبة ولله حسة فيك عندي مشكلة اختي مع زواجة نفس المصيبة سنة ونصف محن مستحملين اخر مشكلة قبل اسبواع كرهة اختي بسببة لله يسمحة يشك ان في علقة بين اختي وزواجي مصيبة حسبي لله من عفريتهم التعبنة امى تحول جهدة تطليقة والكن المصيبة هو رضواخ اختي لهو حتي اصبحت اشك في اختي========
|
اقتباس:
وربي صدقت في هذه ...طبعا شك في بنته ...قال لي هذه أكيد مو بنتي وانا متبري منها وما أبغاها ...وأحيانا يقول شكلها راح تطلع بنت مو كويسة ويرجع مرة ثانية يقوول هذه بنتي وباخذها غصب عنك ... وبعد مرة أتهمني بالايدز ...تصدق ...قالي انت أكيد فيكي أيدز وقرر انه يوديني المستشفى عشان يسوي لي تحليل قلت له لو هذا يريحك يلااا برووح معاك ... ورحنا ويسوينا تحيليل الايدز ...وطبعا طلعت النتيجة مافي شيء والتحليل نظيف تدري وش قال لي... لو مو اليوم بكرة راح يجيكي ... بس الحمد لله على كل حال ...تخيل اني عايشة معاه خمس سنين وكل يوم شك ... مشكور كثير لاهتمامك وعسى ربي يكتبلك الخير وين ماترووح ويفتحها عليك ...ويسعدك ويوفقك في حياتك .. |
اقتباس:
زي ماقلتي صراحة صعبة جدا جدا ودايما أستخير.... وربي يسهل أن شاء الله أن شاء الله ياعمري بعمل بكل اللي قلتية ... وأنا محتاجة لدعاءكم وانكم توقفون جنبي ومشكوورة كثير على اهتماامك ...ربي يسعدك ويوفقك وتنجحين في حياتك يارب ... |
مرحبااختي مدى
والله يعينك على ما ابتلاك وصبرك ويكتبلك الخير زوجك مريييييض بالشك يعني لازم يتعالج مابي اخوفك لكن الي بهلشكل يمكن تطور الحاله عنده وتوصل للقتل فلازم تشوفي حل بأسرع وقت والحل هو علاجه ولاتنسي بكرا بنتك بتكبر وبصير يشك فيها بعد وتتعقد اذا ماتعقدت من الحين بسبب مشاكلكم اذا مافي فايده فلطلاق اخر الحلول تحياتي اختك j |
اقتباس:
آآآآمين يارب الله يسمع منك ياعمري ومشكوورة كثير لاهتماامك عسى تسعدين طوول حياتك وربي يفتحها عليكي وان شاء الله بنتي تكوون معي ...هذا اللي كان مخوفني انه ياخذها مني بس صراحة أميرات ريحتني الله يرضى عليها |
اقتباس:
طبعا علاجه عند الطبيب ...تاكد هذا شيء مستحيل يسويه لاني حاولت قبل كده اني أقنعه يرووح ...قال لي انا مو مريض ...أنتي المريضة طيب أخوي بندر أنا صبرت عليه كثير ...وحاسة نفسي اني تعبت واجد صرت عصبية وصرت أكره كل شيء في حياتي الناس صارت بعيدة عني ..عشان لايتأذوون من المشاكل والصراحة مرة كانت معي جارتي ....وجالسين نسولف ودخل علينا فجاءة وقال لها مين انتي ..وش تبغين وليش جيتي ومنهو زوجك طبعا جارتي بسرعة طلعت من البيت وتبكي ورحت وراها ..قالت لي ماراح أدخل بيتك ثاني مرة ... وساعة رجعت قلت له ليش سويت كذاا ...قال لي هذه قوادة تبغي تاخذك لبيوت الدعارة ... أخووي بندر .. اليوم أصبر عليه لو كان اعمى ...اصبر عليه لو كان مشلول لكن أصبر على من يبغى يجنني فصعب جدا ...وانا عن نفسي أحيانا من التفكير الكثير ما اقدر أتنفس وما اقدر انااام ...يكفى الانسان بس يكون باله مرتاح والصراحة ماكنت أشد معاه في الكلام ..كنت أستغرب من تصرفاته واول مرة تقابلني حالة مثل هذه ...بس الصراحة الحين موقادرة أبد أمسك نفسي ...لو تكلم معي أو شك أصارخ عليه لا اراديا وربي ...أعصابي مو قادرة تتحمل ...وأحيانا أسكت مدة طويلة وقلبي يعورني حيل ..الصبر عندي أنتهى مشكوور كثير على اهتمامك ربي يسعدك ويوفقك وينجحك ان شاء الله ويعطيك العافية .. |
اقتباس:
هلااااااا فيك أخوي ... زي ماقلت أن علاجه مستحيل والصراحة كان خوفي من الطلاق عشان بنتي ...لو أخذها مني وشلون بعيش انا وهو وشلون بيعاملها ...بس الحمد لله اختي اميرات طمنتني واكيد طبعا لو استمريت معاه بيستمر العذاب ...لاني عطيته أكثر من فرصة انه يتغير وماتغير ابد بل كل مرة يصير فيها أسوء من قبل وصح لسانك ...العمر يجري ..والانسان بيعيش مرة واحدة في الدنيا أتمنى لك السعادة من كل قلبي وربي يعطيك العافية ومشكوور كثير على الاهتمااام ...عساك تلقى الخير وين ماترووح ... |
اقتباس:
هلااااا فيك أخوي.. الله يرحمه يارب ويسكنه فسيح جناته .. للأسف زوجي يصر على اللي هو فيه ...مايبغى يتغير ومقتنع مئة في المئة انه سليم طبعا اهله أكيييد عارفين حالته ...لان الصراحة عنده أخته عمرها 30 سنة تصاارخ دايما وتضرب أي أحد تلاقيه جنبها من دون سبب ...حتى أمها تضربها وترجع طبيعية بعد أشوي ...وحدة في أهله قالت لي هذه البنت مريضة نفسيا ولا تخافين منها وأخوانه قالو لي كل اللي تشوفينه يحصل في هذا البيت ..لاتقولينه لاحد ابد... الصراحة عنده اخوه عمره 62 سنة واكبر واحد ولا تزووج للحين هو الوحيد المتزوج في اخوانه ...وساعة يضربني أمام اخوانه ...مافي أحد يتكلم ابد وأخته تقووول له طقها بعد ..انت راجل يااخوي خليك قوي ..تشجع فيه وهو عاد باقوى ماعنده يضربني ... ومرة من المرات جات أخته وساعدته ورب الكعبة شفت الموووت قدام عيوني ...مزعت شعري كله وهو ماسكني ويضرب فيني كنت أصرخ بأقوى ماعندي من الالم وجاتني لحظة ماقدرت اشوف فيها اي شيء وسكت ...سكت مسافة طويلة ...ويوم حسو اني سكت فكوني وطلعو من الغرفة ... ورقدت على السرير من التعب وجسمي كله يعورني ...وارجف .. فأحسن لي الطلاق زي ماقلت ,,, مشكوور كثير على اهتمامك عسى ربي يكتب لك في كل خطوة سلامة وينير لك الطريق وربي يسعدك ويسلمك ويعطيك العافية .... |
اقتباس:
تسلمي يارب من كل شر وأنا محتاجة لدعاءكم جدا وربي يسمع منك ان شاء الله .. مشكوورة ياعمري على اهتمامك وربي يسعدك ويعطيك العافية ويحقق لك كل اللي تتمنينه ... |
اقتباس:
الله يشفيه ... لكن للاسف أنا شايفه ان كل عيلته مريضة الصراحة زي مابينت في كلامي فووق ... الله يعين ان شاء الله مشكوورة ياعمري على أهتمامك وربي يسعدك ويعطيك العافية |
اقتباس:
واتمنى لك السعادة في الدارين والنجاح في حياتك ... وربي يوفقك ان شاء الله |
اقتباس:
آآآآآآمين يارب .... لاحوول ولا قوة الا بالله .. والله يصبركم عليه أسوء شيء في الدنيا الشك ..االله يشفيهم المشكله يتعبون اللي حوليهم بعد ... مشكووورة كثير على الاهتمااام وربي يصبرك ويصبر أختك وان شاء الله تخرجون من هذه المصيبة بسلااام ربي يسعدك ويوفقك ويعطيكي العافية يارب ... |
اقتباس:
آآآآآآآمين يارب الله يسمع منك وربي كلامك صحيح ...أنا مرة وحدة من أهلي قالت لي أحتماال يووم يقتلك ...وبعدين هو عنده أخوه ضابط شرطة يطلع له شهادة انه مريض عقلي ...وطبعا راح يطلع من القضية ولا كانه صار شيء وممكن يطلع بره البلد ويعيش في مكان ثاني ... بس صدقني صعب جدا انه يتعااالج ....لانه لو مااقتنع هو ماراح يفيد أي شيء وربي من الحين يشك فيها ...ربي يسترنا دنيا واخره ويسهل لنا طريق الخير مشكوور كثير وعسى تلقى الخير وين ماترووح وتسلم من كل شر وربي يسعدك وويوفقك ... |
هذا راي والراي مرفوع لك فيما ترين
أولا ً : زوجك مصاب بمرض نفساني ( الوسواس القهري )
ثانياً : أجلسي معاه جلسة رومانسية وافتحي الضوء الاحمر واشوي قولي له انك تحبيه موت وشوفي مدى إستجابته وتأثره لكن ماتمكنيه منك لين يسمع كل الي في خاطرك وانك تعطيه كل الاحترام والتقدير لكن لو أبا وركب راسه اقلبي عليه الطاولة واقلبي العين الحاره قفلي عليه كل شي وإلي في راسك روح سويه ماتبغاني طلقني مو من حقه انه يضربك لانه انت بنت ناس ولديكي أهل بعدين الضرب له ضوابط شرعية لكن يتهمك في شرفك لا والف لا لازم توقفيه عند حده احنا مشكلتنا اننا عاطفيون نقول يمكن يعقل يمكن يمكن يبغاني يمكن يمكن ونضع الاعزار فهميه انه هذا خط احمر بالنسبة لك تتهمني في شرفك لازم يعرف هذا الشي لاتفكري بأسوا شي هو الطلاق بل تدرجي قصري في البيت لاتهتمي في البيت لاتطبخي ولا تهتمي في زوجك نهائيا ولا تعطيه وجه قصري معاه في كل حقوقه الشرعية من جماع من ماكل ومشرب واهتما في البيت روحي بيت اهلك واجلسي يومين اسبوع غيري جو اتمشي معاهم ولا تفكري فيه خلي هو الي يجري في اجراءات الطلاق اذا مو راضي يحترم نفسه مو انت لازم يعرف انك انت انسانه عنك مبادئ ولك احترامك وتقديرك وصلحي علاقتك مع اهلك بالتدرج وسلمي على راس والديك وارضيهم حتى لو جيتي على نفسك وصدقيني اهلك مهما صار وبيصير ماراح يتخلوا عنك عارفه ليش لانك بنتهم وعمر الظفر مايطلع من اللحم فلا تصدقي انهم تخلوا عنك صدقيني اي شي يحصل لك اول من يوقف اهلك . انا ضد انك انت تخربي بيتك بيدك وتروحي المحكمة وتطلبي الطلاق خليه هو يزهق منك او يعقل لانه في بعض الرجال ماينفع معاهم الطيبة والكلمة الحلوة اصبري ان الله مع الصابرين وفكري كيف ماتخربي بيتك بيده ( طنشيه ولا تعبريه ولا تعطيه اي قيمة ولا احترام ولا تقدير اصلا وتفكري فيه ) راح يعصب ويضرب ويسوي لاتتكلمي معاه استحقريه . يايعقل ويصير رجال وينتبه لبيته واهله يامالك الا قفلة وجه ونكد وعيشة ضنكة احلى وسيلة للدفاع هي الهجوم لا تخافي منه صدقيني الله الي جمع والله الي يفرق مو خوفك على بنتك ولا اي شي |
يا اختي من خلال ردودك عرفت انك تعيشي في وضع مؤسف جدا ..
يا اختي المفروض بعد ما يضربك على طووول تروحي المستشفى عشان يعملوا لك تقرير طبي و يتقدم هذا التقرير عند الشرطه او انك على طووول تروحي عنده الشرطه تقدمي فيه بلاغ عشان يحققون معه و يكون التقرير في صالحك في قضية الطلاق .. لازم يكون عندك دليل ان زوجك يضربك و يشك فيك و هذا الدليل اما ان يكون من الشرطه او المستشفى .. |
اقتباس:
هلاااا فيكي أختي ... مرة قلت احتمااال انه حاسي بملل ولازم أغير كل شيء أحتماال يتغير... وسافر ورحت لاهلي وشريت أغراض حق البيت ...شمووع وورود ومناظر وماخليت شيء ورجعت البيت ..غيرت الديكور كله ...صار البيت جنه وقلت حتى انا اغير شكلي ..رحت الكوافير وقصيت شعري وسويت لي حركات رغم أني انسانة أحب الاهتماام في نفسي كثير وأحب الكشخة واجد غيرت شكلي ...طبعا رجع بعد شهرين من غيابه ..أول مادخل البيت ماعطاني وجه بس قال السلام عليكم ..سوي لي العشاء صراحة انصدمت وتاثرت حيل أنه مااهتم ...ومسكت دموعي وحبست الالم داخلي وسويت له العشاء ..وقام يتصل على أصحابه أنا رجعت وانا مشتاق لكم وانا ماعطاني وجه أبد..بس الحمد لله ...هذا رومانسيات ماتنفع معاه لا كلام ولا ضحك ولا شموع ولاشيء ... من ناحية التقصير في حقوقه الصراحة قصرت معاه أخر سنة اللي هي هذه السنة ماحصل في حياتي رفضت له طلب وماحصل قصرت في حقه بس هذه السنة اتبعت اسلوب جديد ...لو غلطت علي او شكيت فيني ماراح أكوي ملابسك وطبعا شك وسبني وتخليت عن الكوي ..رجعت ثاني مرة لو شكيت فيني أو عاملتني معاملة سيئة ماراح أرتب لك غرفتك ..ويرجع يشك ويشتم ويقوول اي شيء ,اتخلى عن النظافة مانفع كله ..حقوقه الشريعة غصب عني ياخذها حتى لو أني تعبانه كل شيء غصب ..لو مارضيت يظل طوول اليوم يدعي علي الله يحرقك ..الله يعذبك أنا متأكد أنك راح تدخلين النار ..اانا متأكد انك بتموتين بسوء الخاتمة انتي نهايتك سيئة يارب أشوف فيكي يوم تتعذبين فيه طيب طلقني ...يقول لي ماراح أطلقك أبد بس خليكي تتعذيبن كذا ويا أختي لو ماتكلمت معاه أو أستحقرته اليووم كله يدعي علي ويتحسبن فيني ... هذا انسان مايمل أبدا مستعد يتكلم معاكي أربعة وعشرين ساعة يشتم ويدعي عليكي من دوون مايتعب وربي اللي قلتيه هذا كله سويته رومانسيات ...والتخلي عن حقووقه مانفع وراح يصارعني طول حياته ومايتركني بروحي وطلاااق مستحيل يطلق مافي حل ياعمري غير الطلاق ... مشكوورة كثير على أهتمامك بالموضوع ربي يسعدك ويوفقك ويعطيكي العافية يارب |
| الساعة الآن 11:44 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©