|
التفكير بالزواج أتعبني
السلام عليكم ورحمة الله وبركاته
أحييكم في موضوعي اقترب موعد زواجي وما زال هناك بعض الأمور التي يتعبني التفكير بها مثل التعامل والسكن وغيره وأيضا هناك أمور اعتادها الناس وأنا لا أحبها مثل: دبلة الخطوبة وكل يكتب واحد اسمه في خاتم الثاني وكذلك دخول الزوج مع زوجته أمام النساء أنا رجل لدي شخصيتي ولا أحب أحد أيا كان أن يفرض علي عادة أنا لا أحبها لأنه مهم بالنسبة لي أن أكون مرتاح في زواجي نفسيا المشكلة أني أصبحت أرى الناس يعلقون نجاح الزواج بهذه الأمور أنا بحثت في كلام العلماء وأقنعني الرأي الذي يحذر منها للأسف بعض الناس يتكلم من دون علم ويقولك انت متشدد وهذه أمور الناس تعودوا عليها وإنت تعقدها طيب يا أخي على الأقل احترم الاختلاف اللي بيني وبينك وتكلم بطريقة أحسن يعني أي واحد يختلف معك في الرأي تقول عليه متشدد ومتخلف والله التخلف إنك ما تعرف كيف ترد وكيف تختلف عموما اخواني آسف دخلتم في متاهة لكن كل ما اقترب الزواج وأنا أقلق أكثر وأخاف البنت تصدم من طريقتي وتفكيري اللهم إليك المشتكى ولا حول ولا قوة إلا بك |
لااا اخوي لاااازم تتعايش مع النااااس
وتمشي على العادات اللي يبونها ليش خواتك ماصااار لهم كذا اياام زواجهم؟؟ طبعا العادات تختلف من نااس ل نااس مثلاا حنا ماعندنا دبله خطوبه وزفه وها الكلااام عندنا ملكه وبعدها زواج وكل ناس ولهم عاداتهم موفق اخوي |
ما تعارف عليه الناس في بلدكم ولا يخالف الشرع فاعمله إن كان عمله لا يكلف عليك أو يحملك ما لاتطيق..
واحذرك من الدخول على النساء مع الزوجة لأنه محرم شرعاً أسأل الله أن يعينك على طاعته وأن يبارك لك في زوجتك وأن يجمع بينكما على خير |
الفقير
اخوي مسالة الدبلة اتصور انتو ملكتو وخلاص عاد مدري وش سويتو لبستها طقم دبلة الله اعلم انسى مسالة الدبلة لكن مسالة دخولك قدام الحريم ما يجوز ولك حق ترفضها .. وضح لهم هالشي وفههم انها رغبتك ويا ليت يحترمونها اخر اضافة اضيفها حكمة تعلمتها من الحياة اتمنى تمشي عليها لانها تريحك من اشكالات كثير لم نخلق لكي نطبق ما تمليه قناعاتنا فقط يعني في الحياة ما نسوي الي حنا مقتنعين فيه وبس .. لان فيه ظروف تضطرنا نسوي اشياء ماحنا مقتنعين فيه .. عشان ما نتشتت عن الهدف الاكبر .. فانت لا كل شي بالدنيا متوقف على قناعاتك اسال الله لك تيسير الامور والرزق الحلال الطيب المبارك |
السلام عليكم اخي الكريم اعتقد انك تفعل ما انت مقتنع به والذي يرضي الله اولا واخيرا .والافضل ان يكون باقناع الزوجة بمبادئك لا فرض رايك رغما عنها فهذه حياتكما انتما الاثنين لا دخل اراء الناس فيما تريدان فعله وادعوا الله ان يعينك على طاعته واجتناب معصيته.
|
أشكر الشباب ياللي ردوا وعلى كلامهم
واعذروني ما اقدر ارد على الجميع اقتباس:
أختي مسألة القناعات أعتقد أختلف معاك فيها صحيح احيانا تحصل أمور أنا ما أبيها وهي قد تكون ابتلاء من الله لي لكن هنا لازم أوقف وأحاسب نفسي ليش حصل هذا الأمر وكيف أنا تصرفت فيه هذا التصرف لأني إذا خليت كل شي للظروف أو للعادات أو للناس بكون إمعة (يعني ما لي كلمة) واحنا للأسف (وهذا الشي أعاني منه أيضا) نخاف من معارضة العادات لكن الأقدار التي تحصلك من موت أو مرض أو غيره هذه ربنا قدرها ما نقدر نعارضها لكن العادات السيئة للأسف تملكتنا وصرنا نخاف نعارضها فلازم نفرق في كلمة "الظروف" هل هذا شي ما أقدر أغيره أو أقدر أغيره لكني أخاف من حكم الناس علي؟ شكرا لمشاركتك وربي يرزقك مثل دعائك |
طيب بسألك أختي
لو جاء زوجك ولم يفعل شيء إنت توقعتيه منه مثل لبس الدبلة؟ ايش حيكون موقفك وانت زوجة جديدة |
وعليكم السلام ورحمة الله اقتباس:
ترى حتى من يخالفونك الرأي؛ يخافون من حكم الناس عليهم !!! ثم أخي الكريم بعض العادات تكون من عادات أهل البلد لكنها لا تخالف الشرع لكن أوافقك بمسألة دخولك على النساء فناقشهم وأخبرهم وجهة نظر الشرع وكذلك وجهة نظرك الخاصة وبإذن الله ليست مسألة الزواج صعبة حتى تفكر هذا التفكير المتعب لك ،،، وترى كثير مثلك أبدوا وجهة نظرهم بهذا الموضوع وتم الزواج كما يريدون وانتهى لا تأخذ المسألة كأنها مسألة صراع !!! ومبارك مقدماً عزوبي:22: بس:d رجل:30: |
اخي عزوبي مشكور على مشاركتك القيمة
وبالفعل كلامك في الصميم انا آخذ هذه المسألة مسألة صراع لكن ماذا افعل اذا كان مجتمعي يحاول فرض الأمر علي؟ على سبيل المثال انا قلت لأمي: يا أمي أنا ما أبغى لا دبلة ولا دخول على نساء.. قالت: أنا خلاص ما راح أوقف في عرسك (أنا أعرف انها تمزح) لكن هذا الكلام تعبت وأنا أكرره وهي تصر الا تبغى تشتري الدبلة وقالت لي اللي بتتزوجها سألتني عن الدبلة ... قلت لها قولي لها هو ما يبغى دبل ... قالت: لا بعدين تاخذ فكرة مو زينة عنك!!! ومرة عارضتهم في مسألة الدخول على النساء وصار زعل وقالوا لي إنت بتفشلنا ووووو (وكلام والله تعبت وأنا أفكر فيه) علشان كذا يا أخي أنا أعيش في صراع لأن المجتمع اللي حولي يبغى يخلي زواجي وفق ما يريده هو وليس وفق ما أريده أنا وسبب هذا إنهم خايفين من كلام الناس وإنت أخي عزوبي تدري الرهبة التي تتملك المقبل على الزواج قبل دخوله في أيام الزواج الحقيقية فكيف إذا زاد على هذه الرهبة أمور أخرى تزيده رهبة؟ والله الواحد أحيانا يتمنى يكون عاش في أيام القدماء اللي ما كان عندهم هذا التعقيد وكان الزواج يتم بيسر وسهولة لكن ما نقول إلا قدر الله وما شاء فعل والله أعلم وأحكم منا ولا حول ولا قوة إلا بالله |
اقتباس:
هلا بك الفقير والله على حسب اهمية الشي بالنسبة لي .. مثلا زوجي بعرسي ماجاب طقاقة .. اضطريت ادفع من فلوسي اجيبها .. لان بعاداتنا الطقاقة اساسية فما زعلت كثير على الموضوع لكن ... ماحجز لي سفرة .. وانا كانت السفرررررررة مرررررررة مررة مهمة بالنسبة لي لاني اولا احب السفر بطبيعتي ثانيا عروس ومعروف حلاة شهر العسل بالسفر .. فمرة تاثرت نفسيتي هذيك الايام وباقية بقلبي للان .. من كلامك حسيت ان من عاداتكم ان الزوج يدخل قدام الناس ويلبس البنت الدبلة قدامهم .. انا كنت اسال نفسي هل اعتراضك لى الدخلة عند الحريم ؟ ولا على انك تلبسها الدبلة قدام الحريم ؟ لكن واضح انك على قولتك ماتحب الدبل من اصله .. انت تتواصل مع زوجتك ؟ مملك عليها وتكلمها ؟ اذا كان الجواب اي .. تقدر تعرف منها بشكل غير مباشر هل مهمة الدبلة عندها ولا لا |
خالفهم يا اخي لا تجيب دبل بس جبلها اسورة اقراط او شيئ ثاني دامك لا تحب هل الخرابيط من اجل لا يقولون عليك بخيل الله يوفقك واللي يترك شيئ من اجل ارضاء الله فاكيد رب العالمين يساعد.وعني اذا عرفت نية زوجي هي رضاء الله سافرحح اكثر واكثر.
|
شكرا أختي روعة المعتى والأخت ميسم على مشاركتكم
أختي لم أملك بعد ولكن الملكة قريبة واعتراضي على الأمرين: الدبلة والدخلة عند الحريم وأختي أشكرك على عرض بعض تجاربك طيب إنت ذكرت بعض الأمور الي كنت تبينها صارت وما صارت أنا أعرف إن أمور مثل السفر تزيد المحبة والألفة بين الزوجين خصوصا في بداية زواجهم طيب لو فرضنا هذا الأمر ما حصل وبسبب غير مقنع أنا أعرف إنه بيزعل لكن هل هذا المقصد من الزواج؟ لو زوجي قايم بحقوقي ويعاملني معاملة حلوة هل تسوى أخرب علاقتي بزوجي بسبب إنه ما سفرني أو ما جاب لي هدية أو منعني ألبس اللبس الفلاني؟ طيب أحتي ما أقصدك إنت لكن بعض الزوجات هذا حالهم ما يراعون تعب الزوج ولا محافظته على حقوقهم وينسون هذا كله في موقف واحد سواء سفرة أو هدية أو غيره |
أخوي في مسألة الدبلة هل انت معترض على أنه تلبس البنت الدبلة!!!! وإلا اعتراضك على عدم رغبتك في لبسه انت ، و عادي عندك خطيبتك تلبسه ،،،،، أنا بالنسبة لي حتى لو كانت الدبلة عرف أو عادة منتشرة!!! فصراحة ما ألبسها لأن طبعي إني ما ألبس خاتم ولا أرتاح للبسه أصلاً،،،، حتى لو كانت السنة في لبس الرجال للخاتم وضعه بالخنصر.... لكن ما أرتاح للبسه،،،،:( عزوبي:22: بس:d رجل:30: |
انا بنت وتزوجت من سنتين لاقيت اعتراضات من الكثير انتي عروس ليش فستانك كم طويل؟ ليش منتي لابسه دبلة؟ ليش ماتتصورين؟ ليش ماينزف العريس؟ وحتى ليلة فرحي الكوافيرة جابت لي الجنان تبي غصب اركب رموش واحط توصيلة وكل هالكلام رفضته لله والحمدلله زوجي يشوفني جوهرة بعينه وكلام الناس ماهمني مادام رب العالمين راضي |
اقتباس:
يا أخي لا الدبلة مهمة .. ولا دخولك قاعة العرس مهم .. وببساطة مادمت مقتنعاً فلا أحد يستطيع أن يجبرك على فعل شيء لا تريده. المهم بالفعل هو تلك الجملة التي كتبتها. شخصياً .. فإن كلامك هنا لا يوحي لي بأنك متشدد أو معقد كما يُقال لك .. ولكن سبحان الله أنت لا تدري بعد كيف هي عقلية خطيبتك .. وربما هي التي تنظر لك مثل تلك النظرة فيما بعد ويبدأ بينكما التصادم بسبب اختلاف الأفكار والمعتقدات. لذلك أرى أن تتحدث معها وتشرح لها بعض جوانب شخصيتك وبعض الأمور التي لا تستسيغها وترفضها وبعض الأمور الأخرى التي لا ترى فيها بأساً .. وفي المقابل ستسمع منها وجهة نظرها ورأيها في هذا الأمر أو ذاك .. وهكذا سيتمكن كل منكما من فهم شيء من شخصية الآخر. |
اقتباس:
هلا بك الفقير شي غريب انك بترتبط بها وانت ماعرفت لو شي بسيط عن شخصيتها وتفكيرها وهذا الشي ما يحصل الا بعد الملكة لكن بما انكم ما ملكتو لسا .. ان شاء الله يكتب ربي التوافق بينكم اتفق معك بباقي الكلام معروف ان بعض البنات تفكيرهم سطحي ومتسرعات بالحكم على الامور بالعاطفة .. لذلك ربي سبحانه وتعالى جعل العصمة بيد الرجل .. بخصوص الهدف من الزواج اكيد الهدف الاستقرار .. والمعاملة الحلوة وحدة من طرق الاستقرار لكن .. قد تبدو لك بعض المواقف (زي الحرمان من تمشية او لبس ) عابرة وماتستاهل الزعل .. لكن خلني اقول لك وش الي يزعل بالضبط .. الي يزعل هو قلة اهتمام الشخص بالاشياء الي يحبها شريكه .. وقلة الاهتمام هذي اذا تكررت من خلال عدة مواقف .. تاثر على القرب بين الزوجين .. انت ممكن ترفض مثلا تشتري لزوجتك دبلة .. تقول ماني مقتنع فيها زوجتك بتزعل مو لان الموضوع موضوع دبلة .. الموضوع انه رغم انكم توكم ببداية زواجكم اظهرت لها قلة اهتمام بشي هي تبيه انا افترض مجرد افتراض انها تبي الدبلة وانت ادري فيها وبظروفها مني .. لكن الي ابي اوصل لك اياه اخوي الفقير هو : لاتبدى حياتك بقلة الاهتمام بطلبات شريكتك وهي نفس الشي اوجهه لها بس ماهي معنا الان .. اتمنى يكون كلامي مقنع لك اخوي .. لاني والله ودي تمشي امورك بكل سهولة وتيسير .. فانت تطمن ولا تاخذ الامور على انها صراع زي ما قال عزوبي دمت بود |
ليست المشكلة في رفض الدبلة والدخول المشكلة في طريقة الرفض
أنت لست مقتنع بالدبلة و الدخول على النساء وهذا حقك خاصة أن لديك مايؤيده من الدين لكن تستطيع ان تتصرف بحكمة دون أن تثير حساسية الطرف الأخر بحيث لا يكون رفضك صادم لهم بإمكانك أن تعدل في الوضع ليتناسب ويتماشى معك لا أعلم في الحقيقة ماهي عاداتكم في الملكلة لكن من العادات المتعارف عليها عند معظم الناس أن الخاطب "الزوج" يقدم طقم ذهب أو ألماس للعروس أطلب من أمك وأخواتك أن ينسقوا مع العروس بحيث عندما تدخل عليها ويكون ذلك في غرفة خاصة لا يكون حاضراً فيها سوى أمك وأخواتك وأم العروس والعروس فقط أو ممكن اختصارها عليك وعليها فهي أصبحت زوجتك أو أقتصارها على من ترغب المهم أنه لا يتواجد في المكان سوى محارمك الذين يجوزلك الكشف عليهم وقم بتقديم طقم الذي أحضرته لها ولا بأس أن تلبسها العقد والخاتم وتبادلوا المباركة وباقي الهدايا ثم تنصرف أنت إلى الرجال وهي تزف إلى النساء لتكمل باقي الحفلة ناس كثير يفعلون مثل هذا يدخل العريس على العروسة وبعدين يزفونها للحريم لوحدها هذا بالنسبة للدخول على النساء أما بالنسبة للدبلة إليك هذه الفتوى اقتباس:
اقتباس:
في الملكة وليس في الخطوبه كما في بعض المجتمعات فأن رأيت ان الطقم الذي ستحضره لن يقوم مقام الدبلة فلا بأس أن تحضر لها دبلة وتقدمه كأي خاتم خاصة أن والدتك مصرة عليه وربما تتأثرعروستك و مادام الأمر والحمد الله واسع فقدم رغبة والدتك إذا لم تقتنع بالإكتفاء بالطقم فمن الحسن والجميل أن يكون الإنسان مرن في تعامله مع الأخرين مادام أن هذا لا يتنافى مع ديننا وأخلاقنا ومبروووووووووك مقدما والله يتمم لكم على خير موفق |
انا احترم رايك وقرارك .. لكن اشوف انه من الواجب عليك تبليغ العروس
والنقاش معها في المسائل الي انتي تبيها .. هذا افضل من انك تجي يوم الزواج وتقول لا انا اعترض على هالشيء ,,او انه ضد رغبتي ...؟؟ يعني عطها خبر من بدري بحيث انها تتقبل الواقع ويمكن تناقشك فيه ويمكن حياها يمنعها .. لكن ماتنصدم هي بقرارك .. لانك ماتعرف مدى الاحلام الي هي راسمتها في خيالها .. >> عموما لا تسمي قرارك هذا تعقيد لان كثير من الشباب لهم نفس رايك .. الله يسعدكم ويهنيكم ...ويرزقكم الذريه الصالحه ... |
حياك الله اخي الكريم انا من رأئي انك ترضي ربك وتمشي علي امور دينك فأترك سوالف التخلف للمتخلفين اللي لاينظرون لأمور ربهم واهم ماعليهم انهم يفرحون وينبسطون فثق تماما اذا تركت شي لله عوضك الله خير منه ولا تهمك عقليات النساء وانتبه تمشي خلف رأي يغضب ربك وانت مانت مقتنع فيه وبالنسبة لخطيبتك ثق تماما اذا قلت لها كم كلمة حلوه واخذت معها وعطيت راح تمشي علي افكارك بس اهم شي انك تفهمها وتوضح لها الأمور كلها واهم شي تقنعها بالدين اعرف شباب كثير مادخلوا علي النساء وهذي حياتهم سمن علي عسل وغيرهم بعد كثير مشوا خلف اراء امهاتهم وخواتهم هذي حياتهم فراق ويقولون لي لاتمشي الا علي قناعاتك انت فارضاء الناس غاية لاتدرك فصعب مهما سويت لهم ماترضيهم صحيح انهم يبون يفرحون فيك بس امور دينك اهم من ارضائهم ووالدتك ثق تماما اللي يرضيك راح تقتنع فيه بس اذا ماعندك خوات يكبرون راسها عليك ويخلونها تقلب عليك وهذي اهم شي ارضاء ربك ووالدتك وزوجتك ولاتنظر للباقين لأن صدمتهم وشعورهم تختلف عن امك وخطيبتك لك اجمل تحيه |
الموضوع سهل جدا .. بالنسبة لدبلة الخطوبة هي مجرد رمز للزواج بحيث يميز المتزوجة عن العزباء و كذلك بالنسبة للرجال و مو شرط تكتب اسمك على الدبله ثاني شي بخصوص الزفة انت ما عليك من كلام الناس اتبع اسلوب السكوت لين يحين الوقت يعني لا تشاور احد و لا تسألهم ادخل و لا ما ادخل و اذا سألوك قول لا جاء الوقت يصير خير و بيوم الزواج خلك عند الرجال و لا تدخل و اتفق مع زوجتك على كذا حتى ما تصر انك تدخل و بكذا تريح راسك ... مبروك الزواج مقدما و ان شاء الله ربي يرزقك الذرية الطيبة ... |
نسيت اقول ان الدبلة ما فيها شي و لا تعتبر تشبه بغير المسلمين بس خفت انزل رابط الفتوى و ينحذف ردي من فترة سمعت بالتلفزيون ان الدبله اذا كانت لمجرد تمييز المتزوجة عن الآنسة فلا بأس بلبسها بشرط ان لا يعتقد بأنها جالبة للسعاده او انها سبب لإستمرار الزواج كما يعتقد البعض |
[gdwl]ربي يسعدك حبيت ادعيلك بس[/gdwl]
|
.. أخوي .. مبين عليك من نفس بلدي ..وهذا مبين من سالفة الدبلة والدخول مع زوجتك الحفله .. ^_^
.. اولا ما فيها شيء أخوي لو لبست الدبله .. بالعكس راح تفرح , وتضحك من نفسك انك كنت كارهه تلبسها , بالعكس لبس الدبله راح يحسسك انك تملك شخص تحبه , وانك مقرون به , وانك مرتبط به ,واذا كلش كلش مو عاجبك تلبس الدبله, البسها وقت الا تكون مع زوجتك .. علشان ما تفكر البنت انك ما تبيها وما تحبها .. واخلع الدبله وقت الا ما تكون مع الزوجه او اتحجج انها ضيقه او تالم صبعك او انك تخاف تضيع منك .. بس صدقني وقت الحفله ووقت الا تمسك العروس يدك وتلبسك الدبله راح تفرح وتشعر شعور جميل .. .. اما عن سالفه دخولك صاله الفرح وانت ماسك يد زوجتك .. فهذا شيء راجع لك , البعض يدخل ويجلس وينبسط مع اخواته ومع العروسه لانه الحفله هي حفله العروس والمعرس , والبعض ما يدخل الصاله خير شر , والبعض بس يدخل ولما يوصل الكوشه , ويرفع الطرحه عن وجه العروسه , وتسلم عليه امه وامها ويباركون لهم , يسوون له درب ويطلع بره الصاله ويجلس مع الرجال .. وانت سوي الا يريحك .. وانت خبر العروس قبل انك ماراح تدخل معاها علشان ما تحرجها .. وقول لها خلي خواتك وخواتي هم الا يزفونك .. او انها تدخل الصاله لوحدها والكل وراها بمسافه يمشي .. يعني بكيفها او انك تدخل الصاله معاها وترجع تخرج مره ثانيه وبسرعه يعني تجلس خمس عشر دقايق .. .. الله يوفقك اخوي ويسعدك ويهنيك .. بس لا تحاتي وتقلق .. وخلي كل همك انك كيف تسعد زوجتك , وكيف ترضي ربك , واترك عنك التفكير في هذه الامور .. |
اولاً: الف مبروك عالزواج
ثانياً: تناقش انت وزوجتك المستقبلية وتفقو هي ليلة زواجكن اسمع شو رايها بالافكار لي بدور براسك انا وقت زواجي كانزوجي مايريد حفلة عرس يريد يسافر الى تركيا بس انا قلتلو هي ليلة بالعمر بتحز بقلبي والكل كان رافض الفكرة اضطر يرد عالاغلبية الله يتمملك على خير |
اقتباس:
انامع كلام الاخت حنونه بطبعي المسأله عاديه جدا ... انا اخوي لما اتزوج رفض الدبله والزفه حتى التصوير مع زوجته رفضه وحمدلله الحين عايشين مبسوطين عادي الوضع هذا مجرد مظاهر مالها داعي مع |
| الساعة الآن 01:08 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©