|
ابن خالتي عرف بموضوع المتقدم لخطبتي وقام يهدد
السلام عليكم ورحمه الله وبركاته كيف الحال اخواتي واخواني..... عارفه تعبتكم معاي بس يعلم الله اني ارى في ارائكم الحكمه... من اسبوعين من اليوم اتصلت لي بنت كانت معاي بالثانويه بس اكبر مني بسنه وتكلمنا تقريبا ساعه وبعدين قالت لي ابقاكي بموضوع قلت لها تفضلي قالت بصراحه وانا وكل اهلي نبقى نخطبكي حق اخوي وانهم راح يجون بس امها مسافره بس اخوانها راح يجون لابوي لان ابوهم متوفي من فتره طويله انا قلت لها هذا الموضوع بالاول لازم الوالد والوالده يعرفون فيه انا مااقدر اقول لك شي قالت والله انا متصله ومتأكده ان هذا بيكون ردك لاني اعرفك واعرف تربيتك واخلاقك وفعلا اخوانها اتصلو لابوي وجو خطبوني رسمي من فتره بسيطه والوالد قالي شنو صار بينهم الولد عمره 24سنه يعني بعمري بس انا اكبر من ب5شهور وابوي قال لهم ان انا اكبر منه ب5شهور وقالو نعرف واحنا ماجينا الا عارفين كل شي عنكم وماعرفنا الا كل خير وقالي ان توه متخرج من الجامعه بكالريوس وينتظر الوظيفه لانه قدم بشركات كثير وينتظر الرد وابوي قابل الولد لوحده وانعجب باخلاقه كثير وقاله ترى بنتي كانت مخطوبه من 5سنوات تقريبا قال عارف وهذا الشي مايعيبها ولاينقص من اخلاقها ولايهمني اهم شي عندي البنت انا باقي على رجعت امه من السفر تقريبا اسبوع بالكثير اسبوعين مادري كم بالضبط وابوي احين يسال ويجمع عنه المعلومات والوالده بعد تسال من جهتها... وانا للحين مافكرت بموضوع الي متقدم لي لاني انتظر رأي الوالد والوالده وبعدين بفكر جديا بالموضوع بتقولون لي وين المشكله.... المشكله ان قبل فتره ولد خالتي تقدم لخطبتي ولكن ابوه وقف في طريقه ورفضني وعمل مشاكل وانا اخترت الابتعاد لان كل انسان له كرامته واهو ولد خالتي دخل وسايط كثيررررر علشان انتظر لين يوافق ابوه وانا رفضت لان مافيه شي يجبرني انتظر لين ماابوه قلبه يحن ويوافق...والوالد والوالده رأيهم من رأي المشكله انا ماادري من وين عرف بموضوع الي متقدم لخطبتي وقام يهدد وابوي كلماه وحذره مايقرب لي ويتركني بحالي واهو من وقت انتهى الموضوع واهو يرسل مسجات ويتصل وانا ماارد وقلت لامي وامي كم مره كلمته انه يبعد عني يقول لها ان شاءالله واهو كذاب لين بالاخير غيرت رقم جوالي علشان ارتاح منه... وانا يعلم ربي ماكلمته ولاحتى رسلت له مسجات ولامره انا خايفه يعمل اي شي لانه يهدد وماادري شنو ناوي يعمل.. انا فكرت اقول لاخوي الكبير يتصرف معاه بس قلت يمكن يعقل بعد ماكلمه ابوي ... بس اشك لان امي كل مره تقوله اترك بنتي ولاترسل لها ولاتتصل ويقول لها ان شاءالله ولاينفذ للمعلومه انا عمري 24سنه واخر 4شهور وراح اصير ممرضه ان شاءالله اختكم::الحائــــرة |
الله يكتبلك كل خير وبعدين يهدد ليش ومابينكم شي خلى امك تهددوا انها تقول لاخوكى او ابوكي يمكن يخاف واذا استمر خلى احد يوقفوا عند حدوا
|
الاخت بنت مكة معاها حق ليش تخافين من تهديداتو ليك .والزواج نصيب ماهو غصب ولا تهديد.
|
اختي الحائرة...الله يهدي سرك وبالك وييسر امرك واذا في الشاب خير يجعله من نصيبك يارب....شوفي لازم ابوكي او اخوكي يتصل عليه ويكلمه بلهجة الرجل الحازم وينسى القرابة..وينبهه انه الزواج قسمة ونصيب وابعد عن بنتنا لانه اذا مابعدّت مش حلوة بحقك نشكيك لابوك وتوصل لناس كبار وانت فهمان ولاترضى ذلك لخواتك.
|
الله يوفقك يارب
استخيري الله سبحانه قبل كل شي وعلى ولد خالتك لاتخافي ولا شي بما انو خطيبك الجديد عارف الوضع لاتشيلي هم |
الله يفرج عليك
خلي امك تتصرف معهم شو هالناس ياربي |
اقتباس:
يهدد اني لو وافقت ماراح يسكت وانا اصلا حتى خطبه رسميه ماصار بينا ولا مكالمات ولارسائل ولاشي اهو مثل ماقلت جنني بالرسائل والاتصالات وامي كلمته كم مره علشان يبعد عني يقول لها ان شاءالله بس بدون فعل بالعكس يزيد... ابوي كلمه وبشوف بيعقل اولا..اذا لا بكلم اخوي يتدخل.. مشكوره غاليتي |
اقتباس:
كلام عين العقل بس وين الي يفهم الله يسعدك شكرا |
اقتباس:
|
اقتباس:
ابوي كلمه وهدده يبعد عني بس انا اشك انه يسمع الكلام.. ومثل ماقلتي اذا صار شي اكيد راح يتدخل اخوي وكبار العائله... الله يسعدك ويوفقك شكرا |
اقتباس:
موضوع الخطوبه يااختي ماوصلت لشي رسمي بيني وبين ولد خالتي ... الله يوفقك شكرا |
اقتباس:
ان شاءالله امي عارفه بالموضوع... الله يسعدك شكرا |
اقتباس:
ماادري ليه حاسه بخوف خاصه ان خالتي الا اهي امه ماحاولت تمنعه ولا حتى قالت رأيها في تصرف ولدها.. مشكوره لأهتمامك بموضوعي ماتتصورين كيف انا فرحت بأهتمامك واهتمام الجميع.. واي شي بيصير اكيد راح اكتب لكم بس لاتحرموني من نصائحكم... الله يسعدك.. . |
حبيبتي حائرة..كوني مع الله ولاتبالي..اكثري من الاستغفار والدعاء وان شاء الله بيبعد عنك وعن طريقك..لاتخافي
|
السلام عليكم ورحمة الله وبركاته
أتمنى لك التوفيق لكل خير أختي كان الله في عونك فلقد كان المفترض منك بعد أن قام ابن خالتك بالاتصال وارسال المسجات لك أن تخبري أحد أخوتك الكبار للتفاهم معه ولأنك لم تقومي بذلك تمادى معك الى أن وصل للتهديد وهذا دليل قوي لك ولكل العائلة أنه أنسان غير مناسب لك وأعتقد أنه أنسان صاحب سوابق أي راعي مشاكل وغير متدين وذلك من خلال تصرفاته. ولتجاوز تهديداته عليك أن تتعاملي مع الموضوع بجدية لا يشوبها خوف منه أو من ردات فعله في المستقبل ولتجاوزه عليك فعل الآتي: 1- وضع جميع أخوتك في الصورة ليتدخلوا ويوقفوه عند حده بالحكمة والموعظة الحسنة. 2-ايصال رسالة شفهية له عن طريق والدتك عن عدم رغبتك في الزواج به. 3-الطلب من الله أن يسهل أمرك مع المتقدم لخطبتك وأن يعينك على تصرفات ابن خالتك الحمقاء.فالمتقدم لخطبتك عارف عنك الكثير والظاهر أنه معجب بك لذلك عليك الدعاء ثم الدعاء لتيسير الأمر واتمام الخطبة لتنعمي معه بحياة زوجية سعيدة. 4-عليك أن تصرفي النظر بشكل جازم وقاطع عن ابن خالتك حتى لو لم تتم الخطبة من الخاطب الجديد وذلك يعود لتصرفاته معك السيئة وتهديده لك وأنت لا تربطك به رابطة سوى رابطة القرابة فماذا سيفعل معك اذا خطبك أو تزوجك!!! أعتقد أنه سينتقم منك ويعذبك بتصرفاته السيئة. دعائي لك بالتوفيق لكل خير والتسديد لاختيار أفضل الأمور حفظك الله من كل سوء ورعاك برعايته |
اختي مارح يحل الموضوع غير ابوة
خلي ابوك يكلمة ويقول له على الموضوع واخوك لايتدخل عشان مايسير شي لاتحمد عقباه دام ابوه مايبغاه يتزوجك رح يوقف في وجهه ويوقفه عند حده |
اقتباس:
ان شاءالله الله يسعدك شكرا |
اقتباس:
دعواتكم شكرا |
ان رجع يهدد مره ثانية كلمي اخوانك او ابوكي وخليهم يتفاهمون معاه محد بوقفه عند حده غير واحد
رجال مثله وثاني شي ان حصل وبديتو تتراسلون انتي وخطيبك خبريه وعن ولد خالتك وتهديداته وانه كان يبي يخطبك عشان يكون عنده خبر وما يصدق شي يمكن ولد خالتك يقوله عنك الله يفرج همك |
اقتباس:
ابوي علاقته ابد مو عدله مع ابوه لانه خطبني حق ولده وبعدين قال ماابقاها من وقتها صارت بينهم مشاكل انا متخوفه اقول لاخوي لاني اعرفه عصبي كثيرررر اهو يدري ان ابوه مو موافق اصلا وانا خلاص من جهتي انتهى الموضوع الله يسعدك مشكوره |
اقتباس:
انا غيرت رقم جوالي علشان كذا مااعرف بشنو يفكر او على شنو ناوي ... احنا لسى ماوافقنا على الي خطبني لان الوالد لسى يسال عنه يعني من الممكن لو وافقت انه يعمل شي... شكرا |
الحائره
الحل عند والده هو من سيحل الموضوع اما الوالد يكلمه او الوالده واحمدي ربك ان ما صار لك نصيت مع ولد خالتك وانا اقول لا دخلين اخوك لان الشباب ساعات يتوهوروون |
اقتباس:
فعلا ابوي راح يقول لابوه لان شكله ماراح يبعد وانا ماادري وش بنيته بس اختي الاكبر مني تقول ماراح يبعد لانها سمعت كلام من اخوه الي اصغر منه وماقبلت تقولي شنو قال علشان لااتعب... نفس كلام امي واختي اني ماادخل اخوي لانه عصبي بقووووه مشكوره غاليتي |
قولي له (((( اعلا ما في خيلك اركبو))) يعني بالعربي خليه يهدد ويخبط راسه بالحيط مدام انت واثقة من حالك ومافي شي يعيبك عنده انسيه وتجاهليه
بما انو امك حاولت توقفه ومارضي يسكت و تفاهمته وهوة ابدا بقترح تعطوه انذار بمشكلة كبيرة يتحصل له ان لم يبتعد عنك او صراحة لازمه واحد من اخوانك يعطيه علقة مرتبة عشان يسكت هادا ابن خالتك ومفروض يحرص على عرضك وسمعتك ويستر عليكي مو يقعد يطاردك زي الاطفال |
اقتباس:
فعلا امي حاولت وحاولت وصارت تطورات احين راح اكتبها ان شاءالله... انا دائم اقول الاقارب عقارب والدليل افعاله... مشكوره غاليتي نورتي |
السلام عليكم ورحمة الله وبركاته
اخواتي واخواني حصل الشي الي ماكنت اتمناه انا غيرت رقم جوالي وريحت بالي بس اختي الي اكبر مني ماارتاحت صار يرسل لها التهديد على الجوال وقالت لابوي وابوي كلم زوج خالتي وابوه قال انا مالي شغل هذا من بنتك وووو وحط السبب فيني اني انا وعدته بالزواج وكذبت عليه ويعلم الله اني ماسويت شي وابوي وامي متاكدين وواثقين مثل ماانا واثقه من نفسي ابوي عصب ... واختي حبت تكحلها عمتها اتصلت لاخوي وعرف بالموضوع اخوي اتصل لولد خالتي قاله اذا انت رجال تعال واجهني واخوي حالف مابيخليه ....طبعا هذا الكلام من اسبوع وانا اشوف ابوي متضايق وماادري شنو السبب واخوي عرف يوم الجمعه وصاير عصبي وماراح يتركه... |
في نظري الواجب ابوك او اخوك يكلمه ويغسل شراعه
يعني يكلمه ويهدده ويوقفه عند حده!! وش اللي يتصل ويرسل مسجات!! وين جالسين فيه! خلالالاص انتهي اللي بينكم .. انت خطبتها وابوووك رفض وهي الان جاها رزقها وتبي تشوف عمرها . صدقوني هالنوعيه من البشر مايصلح معاهم الكلام الليّن والرفق واذا كان الواحد يحتاج لكف على وجهه علشان يكون محترم عطه كفييين او ثلاثه عشان يتأدب من جد . حصلت معاي مواقف زي كذا واشد وتعاملت معاها بمثل هذا الاسلوب رغم انني ولله الحمد لست انساناً عدوانياً او شرساً لكن الموقف يتطلب الضغط على الاعصاب والتعامل بمثل هذه الطريقه الناجحه جداً |
أول شي الف مبروك بمناسبة الخطوبه الله يتمم لك على خير
وحلو ان اخوك عرف الموضوع عشان يوقفه عند حده لان هذي الاشكال ماتجي الا بالشده الله ييسر امورك ويفرج همك |
أختي
أحسن اللي صار ، بكرة يطلعوا كلام عنك و مو بعيدة ينشروه عند الناس و الخطاب و خلي أخوك يتصرف معاه |
اقتباس:
امي حاولت معاه باللين بس بدون نتيجه واخوي عرف وحلف ماراح يخليه انا الي اعصابي ماتتحمل الله يعين شكرا |
اقتباس:
الله يبارك فيك ويسعدك يارب اخوي عصبي وخاصه اذا موضوع يمسنا والحق معاه وللحين ماتلاقى معاه بس اهو ينتظره... دعواتكم.... شكرا |
هلا حيوره الله يفرج همك و يتمم موضوع خطبتك على خير وان شاء الله تبشرينا عن قريب
وبالنسبه لولد خالتك الله يهديه ويكفيكي شره ان شاء الله وان شاء الله ينحل الموضوع بدون مشاكل .. |
اقتباس:
فعلا انا خايفه ان يطلع كلام ماصار الله يعين واخوي اخذ اجازه من العمل وجلس لان عمله بعيد وماقبل يروح ... شكرا |
صباحك /مساائك خير ياعسسل اختي دام انتي مابينك وبينهـ شي خلاص ليش تفكرين اصلن بالموضوووع هوبس تهديد من قهرررهـ بس لا شاف تدخل من اخوكي صدقيني راح يبعد عنك وانتي طنشيهـ لا تعطينهـ ااااااهميهـ الله يوفقك يارررب تحياتي لك |
اقتباس:
ان شاءالله ينحل الموضوع بس بدون مشاكل مااتوقع لان ولد خالتي لليوم واهو يهدد ورافض يقابل اخوي واخوي ماراح يخليه الله يعين... مشكوره |
كلمي اخوك الكبير
هذا شكله مريض ولا غبي مع احترامي . . يحسب الدعوة بالقوة والغصب |
اقتباس:
صباحك \مسائك خير للحين اخوي ماشافه لانه هارب شكله خايف من اخوي وانا ان شاءالله بكره بنروح نعمل التحاليل الي قبل الزواج دعواتكم... شكرا |
اسأل الله ان يقدر لك الخير استمرى على استخارة الله واستعينى بالله وليس اخوك على هذا الغادر عليك بسهام الليل قومى قبل صلاة الفجر بساعة وادعلى الله على كل ظالم وان يصرف الله عز وجل مكره عنكم ويجعل كيده فى نحره ويشغله بنفسه اكثرى من قول حسبنا الله ونعم الوكيل وافوض آمرى الى الله ان بصير بالعباد ولا حول ولا قوة الا بالله موفقه بأذن الله تعالى |
الله يكتب لك الخير
طمنينا عنك : ) |
السلام عليكم ورحمه الله وبركاته...
اخواتي واخواني بقول لكم اخر التطورات اخوي عمل بحث لين لقى ولد خالتي وتخانق معاه او بمعنى اصح انه انضرب لان اخوي حاول يتفاهم واهو من كلام اخوي انه غلط عليه وعصب وانضرب... واخوي هدده بالشرطه ان سمع منه كلمه وابوه كان موجود واخوي قالي اطمني مايقدر يسوي شي... وان شاءالله يوم الاثنين عقد قراني... اقدم شكري لك من ساعدني الله يسعدكم دعواتــــــــــــــــــكم.... |
| الساعة الآن 10:11 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©