|
لو صديقك صاحب خلق ودين تعرض عليه اختك ولا تشوفها عيب؟
لو لك اخت انت بالنسبة لها كل شي ( الاب والام والصديق) وانت تعرف اختك انها انسانة متدينة وطموحة وصاحبة همة عالية وكل اللي تقدموا مو على المستوى المطلوب من ناحية دينهم واخلاقهم وانت لك اخوان في الله طلبة علم وخلوقين , هل فيها عيب لو عرضت اختك على واحد منهم؟ قبل فترة تناقشت مع اخوي في موضوع خاطب لاانا ولا اخوي مرتاحين له الشاب كان مبتعث وتوه رجع من اربع شهور وعمره 30 سنة اهله مبسوطين جداً مادياً , يسكنون قريب مننا بس هو وظيفته بأحد المدن الصناعية مااحد يعرف عنه شي لأنه حياته كلها من مراهقته الى هالعمر بالخارج الجيران يمدحون بالشايب ابوه , بس الولد مايعرفونه بالنسبه لعمله فالقسم اللي هو فيه اغلبه امريكان من الجنسين وهو عمله يعطي دورات للمتدربين السعوديين في مجال الهندسة والمتدربين مايقدرون يزكونه في اخلاقه ودينه لأنه علاقتهم علاقة مدرس بطلاب فما فيه احتكاك بينهم بس هو عملي ونشيط في شغله ومتميز بوظيفته وزملاؤه اللي يحتك فيهم هم الأمريكان اللي معاه بالقسم وماراح يستفيد اخوي شي من سؤالهم اللي عرفته علينا زوجة اخوه واكثر ماكان يسأل عنه كيف شكلها وخاصة جسمها ويدقق كثير بالسؤال لدرجة انه يركز على تفاصيل دقيقة وتخصصها بالجامعة ؟ انا استغربت من اسئلته ليش مايسأل عن دينها واخلاقها ومايمنع جمالها بس مو يدقق لهذي الدرجة وبعدين كثرة اتصالاته على زوجة اخوه انا مايعجبني كذا ليش مايخلي اخته او امه تدور او على الأقل يكون التواصل بينه وبين اخوه مو كل شوي يدق عليها وبعدين الشاب عاش سنين في بلاد فتن واهله اغنياء ويقدرون يزوجونه ليش ماتزوج عشان يعف نفسه في الغربة؟ وطبعاً ماعليه علامات استقامة حليق ومسبل و ... انا مو مرتاحة له ومابعد رديت على الناس , احس اني محتارة لأني راح اترك عملي واخواتي في الله وابعد مع واحد احسه غامض وفري المهم انا قلت لأخوي عمر بن الخطاب عرض حفصة على ابو بكر وعلى عثمان ولا عاب هذا الشي عمر ولا هو نقص في ام المؤمنين حفصة اخوي وجه حمر وتضايق وقالي لا انا عمر ولا اصحابي ابو بكر وعثمان والله يجيب الخير انا طاح وجهي وتمنيت ماكلمته يعني اخوي شايف الوضع ويعرف المشكلة مو في قلة خطابي المشكلة في قلة صلاحهم حتى والله في الأخير صرت اقول المهم يصلي بالمسجد وما يدخن و ماابي فضائيات غير اسلامية بالبيت بس ماعندي شروط ثانية ومع كذا يعترضون على موضوع الفضائيات واحد كان يقول انه الزوجة هي الملكة بالبيت وهذي مملكتها ومن حقها تختار عفشها من اي مكان وانا حاضر مع انه انا مااطلبت ولا شرطت هو من نفسه قال , انا فرحت وقلت انا بس ابي يحط الريسيفر الاسلامي قام ابو الشباب زعل وقال هذي شكلها معقده ومن اولها تبي تحكرني ومو بس هذا كذا واحد نفس الشي والله انا احترت البنات يتشرطون قاعات وذهب وانا بس اقول ماابي دش ويصير كذا , عشان ماابي منكر في بيتي الله المستعان بالله عليكم شرطي هذا وش فيه؟ |
اقتباس:
فلا يأخذك قلقك للتنازل !!!! بالنسبة لوضع أن يعرض اخوك على شخص ملتزم ومعروف عنه الصلاح ،،،،، فهذا يرجع لقناعة أخوك بالدرجة الأولى فإن كان متحمس لذلك ،،،، فبطريقة غير مباشرة يعرض على طالب علم معروف وكبير بالسن وهو بدوره بطريقة ما يعرض على من يرى ويعرف من طلبته وممن قابلهم ويعرفهم هذه تصير بالعكس بعض الشباب يبحث لكن يريد يختصر الطريق فيذهب لطالب علم يعرفه والشيخ يعرف الشاب بالمقابل ،،،، ويطلب منه إن كان يعرف عوائل عندهم بنات يناسبنه أنه يدله عليهم وبالمقابل يزكيه ويخبره أهل الفتاة بما يعرف حقيقة عن الشاب وهكذا ،،،،،،،، وهذه أسباب يقوم بها الشخص مع التوكل على الله الله يرزقك الزوج الصالح التقي ويرزقك الذرية الصالحة عزوبي بس رجل |
مسألة العرض الآن أصبحت شائعة وليس فيها أي مضض
وأنا قد عرض علي 3 مرات متفرقات من أناس أولياء للبنات وقد أحسنوا فيّ الظن ( جزاهم الله خير ) وكذلك أتاني من يسألني إن كنت أعرف شخص عن طريقي يتقدم للزواج من بناته وأنا أرى أنه لامانع من إقناع أخوك مرة أخرى إن كان يعرف ويثق في شاب صالح للزواج وفيه مواصفات ممتازة وعلى دين قوي وخلق رصين أن يعرض عليه ولو تصريحاً فإن الناس يقدرون من يعرض عليهم ذلك ويعلمون أنهم يريدون الستر على بناتهم |
و الله شوفي و أنا أخوك و الله أبدا مافيها شي لو رأيت صديق متدين و رجل بكل ما تعنيه الكلمه إن أعرض أختي عليه و بالعكس و الله أساعده و أوقف معه بس بعض الأخوان يخشى أن يقابل بالرفض فينكسر لكن أبدا لا ينظر لها بهذا المنظور و لكن يفكر أن الله سيرزق أخته بمن هو خير منه و شرطك عادي جدا و لا يدل على أي تشدد و لكن أريد أن أنصحك نصيحة أخ مسألة أنك تريدين رجل متدين وطالب علم و حافظ لكتاب الله شيء جميل و طلب مشروع لك ومن حقك لكن أريدك أن تعرفي أن تفاصيل حياة الانسان و ما يكون في داخله لا يعلم به الا الله فكم من رجل ملتحي و من طلبة العلم و أئمه و يكون قاسي و يمنع زوجته عن كل خير و كم من رجل حليق لكنه محافظ على صلاته و خلوق و يعين زوجته على كل خير و يعاملها بعطف و حنان و كثير منهم تأثر عليه زوجته و يصبح من طلبة العلم و من حفظة كتاب الله ( و العكس بالعكس ) مسألة الدش أنا لي صديق زوجته متدينه و محافظة و لا تتابع لا دش اسلامي و لا تلفزيون و لم تناقشه في مسألة الدش و كان يتابع القنوات و الأفلام و لكن بعد فترة أصبح لا يهتم به و يكاد لا يتابعه و السبب أنه بدا يخجل عندما يرى زوجته تجلس لوحدها وبعيده عنه أسأل الله أن يحفظهم لبعض و يكفيهم كل شر و أسأل الله أن يرزقك الزوج الصالح الذي يسرك و لا يضرك أختي أحببت أن أضيف إستخيري و و الله أن الله سيختار لك مافيه خير لك و بما أنك أختي تثقين بالله فإعلم يقيناً انه سبحانه سيختار لك الخير وييسره لك و لاتكوني متشككه أبدا بعد الإستخاره لإنه بالفعل من يسلم أمره لله كيف يدخله الشك أو عدم الثقه بأن الله سيختار له الخير و ييسره له أو يصرف عنه الشر و يعوضه |
ربي يرزقك بالزوج اللي تتمنيه ويكون قرة عين لكِ وتكوني قرة عين له ويرزقكم الله خير الذرية يارب يارب يالله آمييين
|
والله يا انتظار ياحبيبتي ابي اكلمج من واقع عيب الواحد يعرض بنته او اخته والله عيت ..يبي يقولون هذا اشفيه يبي يزوج اخته اشفيه يعرضها !!
البنت تكون معززه مكرمه فبيت اهلها والخاطب بنفسه يجيها بدون الايعز من اب او اخ!! اصلا ماراح يكون لها قيمه بنظزر الرجل فيمابعد .. وبيكون اخذها مجامله لفلان !! ابدا مو حلوه الطريقه بغض النظر عن الهدف النبيل لها.. حبيبتي انتظار انتي باسلوبك هذا تعطين الناس فكره انك نفس ماقال احد خطابك .. اهم شي ان الخاطب اخلاقه وانه يعرف ربه ويخاف منه وبعدين اذا تم كل شي بعدين كيفك تعودينه على اللي تبين وممكن لاتطالعين التلفزيون كل شي بالتدرج ياحبيبتي اما الخاطب الحالي .. استخيري .. استخيري.. وموشرط اللي درس برا يكون فكره فري والله يكتب لج الخير قريبا |
أختلف معك أختي نااني أنا كرجل لو كلمني صديقي عن أخته و كنت مقتدر ماديا و الله أوافق و أول ما سيخطر في بالي أنه سيشتري رجل و أن أخته بنت رجال و يريد أن يعفها و يسترها و لكني سأكلم أحد من محارمي أن تسأل الفتاة هل هي مقتنع بي أو لا و بعد موافقتها ستكون عزيزة كريمة و حتى لو إفترضنا جدلا أني سأتزوجها مجامله و أني لن أقدرها و لن يكون لها قيمة عندي فهذا يدل على أني لا أستحق هذه المرأه و لا غيرها حتى لو كنت أنا من تقدم لها لإنه معدن في داخل الرجل و اذا لم يكن موجود بإحدى الطرق فلن يكون موجود بكل الطرق فرجل لا يعز و يقدر زوجته أم عياله لا يستحق أن يكون رجل |
مافيها شي ياأختي انا عرض علي صديقي اخته وتقدمت لهم وعسى الله يكتب الي فيه الخير ,,,
والله يسر لك امورك ويفتحها بوجهك لاكن نصيحة بالنسبه للمتقدم لك لاتوافقين لا لما تعرفون الشخص يعني ماأنتم عارفين شي عنه الله يستر عليه,,, لاتنسين الأستخارة,,, بالتوفيق |
لا يعيب الفتاة قط أن يعرضها أبيها أو أخيها بشرط أن يعرضها علي من يستحق و لا يجرحه بإمكاناته الماديه كما لو كان يشتريه بالمال خصوصا لو كان فقيرا .
بالنسبة للدش في البيت ، فليس كل قنوات الدش منكر ، هناك قنوات تعليميه و تثقيفية و يمكنك تصغير حجم الشاشة لدرجة قليلة جدا ان جاء منظر لا يعجبك و هذه الامكانية في الدش الذي يتم تركيبه علي جهاز الكمبيوتر . اما عن اللحية و إسبال الثوب فكثيرا من العلماء اجازوا حلق اللحية و اسبال الثوب بدون خيلاء ، و من أخذ برأيهم لا عيب عليه و الله اعلم . اما عن هذا الشاب فانا ايضا لا ارتاح اليه لنفس الاسباب التي ذكرتها ، و انا شخصيا ابحث عن زوجة بها نفس مميزاتك و صفاتك و لكن للاسف لا اجدها قط في المجتمع الذي اعيش فيه .. |
أشوف اقتراح الأخ عزوبي بس رجل .. معقول جدا
وشرطك ما فيه الا كل خير بارك الله فيك عزيزتي وموفقه ^_^ |
انتظار حبيبة قلبي شفت مشاركتك في موضوع لمني وبغيت أرد عليك لكن خفت أخرج عن مسار الموضوع
وما شاء الله كأنك عرفتي ونزلتي موضوع خاص بك أنا بقول لك تجربتي الشخصية أقسم بالله يوم قرأت شروطك اتذكرت نفسي زمان ولو ترجعين لردودي بتلقيني ذاكره الكلام هذا في أكثر من موضوع وهذا واحد منها http://www.66n.com/forums/showthread.php?t=198108 يوم اتقدم زوجي ما كنت مقتنعة بتدينه وكنت مقهورة إن في بيتهم قنوات فضائيه وخايفه يجيبها في بيتي بعد الزواج أما باقي مواصفات زوجي كلها تمام ماينقصه شيء طبعا رفضته مرة ومرتين وثلاث ولما شفته مصر حطيت شروطي مافيه تلفزيون بالمرة لافضائيات إسلاميه ولاغيره طبعا حاول معي قال بأحط بس القنوات الرياضيه والإخباريه ورفضت كذا تعجيز أبيه يبعد عن طريقي حقدت عليه لأن أهلي زعلو علي لأني كل ماتقدم واحد يهرب من شروطي!!!!! اللي هي نفس شروطك الصلاة في المسجد ويشفر القنوات السيئة ماكان فيه فضائيات إسلاميه باقي آخر شيء قالي أبوي لا يكون مفكرة بيجيك سعود الشريم أو السديس كل اللي بيجوك مثل فلان إذا ماهم أقل منه وقال شوفي يابنتي الرسول صلى الله عليه وسلم قال من ترضون دينه وخلقه ماقال دينه وسكت ولا قال أخلاقه وسكت قال دينه وخلقه ومادام الولد يصلي فهذا أهم شيء في الدين أما الباقي بينه وبين ربه مافي أحد كامل كلنا عندنا ذنوب أماأخلاقه لايعلى عليها وهذا الأهم لأن آخلاقه لك أنت اللي بتضررين لو كانت أخلاقه شينه آخر شيء استسلمت ووافقت والحمد الله ما ندمت أبدا بالعكس ما أتخيل نفسي لأحد غير زوجي لو يكون اللي يكون لأنه أسرني بأخلاقه فإذا كان اللي إتقدم لك يصلي وخلوق وطيب إستخيري وتوكلي على الله وربي ما بيضيعك خاصة أن أخوك الله يهدي رفض اقتراحك مع إنه مافيها شيء لو عرض على أصحابه اللي يثق في دينهم وأخلاقهم فأنت ألحين مافي يدك شيء إلا الإستخارة والدعاء أسأل الله أن يرزقك زوجا صالحا دمث الخلق مخموم القلب وأن يكتب لك الخير أينما كان موفقه |
^^^^^^ حقيقة كلام الأخت أطياف الرياض فيه نسبة كبيرة من الصحة والواقعية؛ بما أنها صاحبة تجربة لعل رأيها يفتح لك باباً للتفكير الصحيح يوجد من الشباب من بظاهرهم الصلاح وإن لم يكونوا ملتزمين أو دعاة لكن فيهم خير كثير وحسن تدين وفطرة سليمة وغيرة على أعراضهم ومحارم الله وحب للخير وأهله الله يكتب لك الخير عاجلاً غير آجل عزوبي بس رجل |
حبيبتي إنتظار الفرج ربي يفرجها عليك وعلى الجميع لاحظت عليك إنك تدققي في الاسبال واللحية .... طيب والتعامل والعقلية ؟ لايجب ان نحكم على صلاح الرجل من مظهره الخارجي فحسب
شوفي حبيبتي شفت محاضرة للشيخ محمد العوضي او حتى لا أخطئ اعتقد نبيل العوضي يقول فيها ان هناك دعاة معروفين جداً ولهم حضور مؤثر على الفضائيات ورغم ذلك عاقين لوادينهم ما قصدته ان المظهر الخارجي ليس الفيصل في القبول والرفض صدقيني احياناً يرفض القنوات من باب التشدد في الدين وليس كل ملتحي ومسبل يعامل زوجته بما امر الله او انه يحترمها ويقدرها عليك بالدعاء ولا تستعجلي كل ما أخر ربي شي فهذا لحكمة اهم شي خلي ثقتك بالله انه يرزقك ما تتمنين واحسن كذلك . ولا تيأسي ابداً او تظني الظنون السيئة |
اقتباس:
جزاك الله خير على دعواتك ونصيحتك مااظن اخوي بيكلم شيخه , إذا اصحابه وهم طلبة علم مع بعض وعلاقتهم جداً قوية ماكلم ولا واحد فيهم بيقول لشيخه ... و انا اللي شجعني اكلمه انه فيه واحد من اصحابه يهتم و يجيب هدايا للبيت يوم يجي يزور اخوي وهذي الحركة كان زوج اختي يسويها , وزوج اختي هذا كان صاحب لأخوي وبعد ماتزوج اختي قالها تخيلي صار لي حول سنة المح لأخوك وهو ماهو معطيني وجه وكل مرة استخير وارجع المح وانا خايف يردني وبالاخير ربي حل عقدة لساني ونطقتها صريحة قلتله تزوجني اختك... فأنا ربطت هذي بذيك والظاهر اني اتوهم والله اعلم اقتباس:
اقتباس:
الله يجزاك خير وانا الحمدلله استخير في كل اموري بس انا مو مرتاحة وكثير يقولون لي صعب تغيرين الرجال وخاصة من ناحية التدين لازم تكونين مقتنعة فيه ولا تقولين بكره اشكله مثل ما ابي ترى هو اللي بيشكلك اقتباس:
|
اقتباس:
ولا ابي واحد يأخذني مجاملة لأحد اقتباس:
وهي من وجهة نظري مو كافيه |
اقتباس:
قلت اريد قنوات دينية فقط ببيتي اما اغاني وافلام وكلام فاضي لا والغريب كلهم بدون اسثناء يعترضون على هذا الكلام قبل فترة صديقتي كلمتني عن صاحب لزوجها وقالت هو محافظ على الصلاة وخلوق بس هو عادي يسمع اغاني ويشوف دش , قلت لها إذا فعلاً محافظ على الصلاة وخلوق ماعندي مانع بس مايحط اغاني او خرابيط ببيتي , وكان رد الشاب مخيف قال انا عسكري واجي من الدوام طفشان واتسلى على الاغاني والمسلسلات ومااحب التعقيد شوفوا لي واحده ثانية. قلت الحمدلله جات منه اصلاً ماكنت مرتاحة له ومسالة حكم اللحية يااخي لاتقول كثير من العلماء وتفتي ونحن لسنا اهل لتصدر الفتوى وليتك تراجع اقوال العلماء في ذلك موفق اقتباس:
|
انتظاااار الفرج ........طيب ممكن تقبلين بواحد يصلي ومايدخن والدش تحلينه بعدين معه لكن الرجااال بطبيعتهم مايبغون
المره اللي تتحكم وتتشرط ويحسبون التشرط لهم بس عاد وش نصلح.............يعني أنتي استخيييرررررري لكل متقدم لك واذا ارتحتي اقدمي والحين البيوت كلها فيها دش بس بعضهم كذااا لو مايتااابعونه ومو معناه ان دينهم ناااقص ممكن يكونون يدورون الاشياااء الكويسه.......................>>>>>>>>>>طلعت عن الموضوع بالنسبه للعرض أنا أحسهااااا صعبه تخااافين يرفضووون أخوك وتنكسرررر نفسه الا اذا واحد وااااثق فيييييه شي ثااااني لكن المجتمع مايتقبل الفكررررره لان بالعاده الرجل اللي يخطب مو المره اللي تخطب لنفسهاااااااااااااااا الله يوفقك ويرزززززقك اللي تتمنينه وأكثرررررررررررررررررررر ويجيييييييييك الفرج ياانتظاااار |
أنا كتبت لك رد البارح وعلق الجهاز وطار :)
واختصرت علي أختي أطياف الرياض الكتابه وتجربتها مثال حي قدامك أختي انتظار الفرج الله يوفقك ويرزقك الزوج الصالح ويعطيك على قد نيتك الطيبه بالتوفيق |
اطياف عيوني احس لقيت في كلامكِ ضالتي بس والله راسي ثقيل وودي اروح انام لكن برجع ارد عليكِ لأنه ودي اتناقش معكِ بالتفصيل الممل لاتبعدين عن موضوعي |
سبحان الله
أولاً الشرط الذي شرطتيه من حقك لكن كيف تريدون أصلاح المجتمع مادام أن الملتزم لايقبل ألا بملتزمة والملتزمة لاتقبل ألا بملتزم ؟؟ نعم زواج الملتزم من الملتزمة فيه خير عظيم لكن زواج المقصر من إمرأة مقصرة في فساد عظيم ألا أن فتح الله عليهم والله أن المرأة تملك مع الذكاء الصبر ماتغير بها جبال وليس طباع فقط فكيف إذا تزوجت من رجل عليه من التقصير بعض الأمور وأخلصت النية لله في إصلاحه وهدايته !!! أمران إذا توفت في الرجل المتقدم لك بإذن الله أن هدايته من الله سبحانه وتعالى ثم على يدك سهلة وهي محافظته على الصلاة وعدم التدخين ودراسته في الخارج ليس دليل على تفتح في الفكر بالعكس نعرف رجال درسوا في الخارج ورجعوا وهم أشد التزام لما شاهدوا هناك من تخلف في الإخلاق أختي الكريمة مادام أن الرجل تقدم لك وسأل عن مظهرك فأنه يعرف مما لاشك فيه دينك وأخلاقك ولم يتقدم لك ألا وهو راغب في هذان الأمران إذا ناصحتي إحدى الأخوات من تقصير عليها وبعد مدة تابت لله من كثر ماتناصحينها و كانت هدايتها على يدك فسوف تفرحين فرح شديد (( لأن يهدي الله بك رجل خير لك من حمر النعم )) فكيف إذا تزوجتي واحد يرضى دينه وخلقه ولكن عليه بعض التقصير وكلنا مقصرين عسى الله أن يتوب علينا ويرحمنا برحمته و هو أسهل من صديقة لاتعيش معك وإنما تصادفينها في بعض الأماكن بعكس الزوج الذي يعيش معك !!! عرفنا كثير من الرجال لم ينصلح حالهم ألا بعد زواجهم من زوجات ملتزمات وقد أراد الله لهم الخير بأن جعل هذه الزوجة من نصيبة حتى تكون هدايته على يدها الزوج والزوجة تأثير أحدهم على الآخر أقوى وأعمق لأنه تأثير فكري أعتذر لأني خرجت عن صلب عنوان الموضوع وقد أثارتي هذي القضية لوقوع كثير من الشباب والفتيات فيها كتب الله لك الخير في أمرك |
^^^^
سبحان الله جالسة أكتب نفس الرد وأنا أكتب نزلت الصفحةوشفت ردك قلت اللي كنت بأقوله بالضبط وربما بأسلوب أكثر سلاسه من ردي فمسحت ردي أكتفي بما كتبته |
كنت أتمنى أمنيتك ..
وللأسف كلما تقدم لي خاطب ما يكون بنفس المواصفات اللي أتمناه .. لدرجة قربت أصدق كلامهم عني إني معقدة ومتشددة .. حتى أخر خاطب ماكن ملتزم يمكن يصلي وصاحب خُلق .. ماكان طالب علم ومتدين .. و رضيت فيه لكن حالت الأقدار ألا يتم هالزواج والحمدلله على كل حال .. حتى تجربة أختي أنا ما نظرت لها أبدا هي ملتزمة وزوجها متساهل بس ماشاء الله ولاقوة إلا بالله كلها سنتين وتحول زوجها إلى إنسان ملتزم ترك اللحية .. وقصر الثوب .. وكسر الرسيفر .. تغيرت فيه أشياء كثيييييرة ولله الحمد .. لكن أحس نفسي غير عن أختي كل إنسان له طاقة معينة وأنا طاقتي ماتستحمل :) بالنسبة لعرض الأخوات على الأصحاب .. بالعكس ما فيها شيء بشرط أن هالصاحب يستاهل مو كل من هب ودب عرضت عليه أختي .. أعرف واحد زوج كل أخواته لأصحابه بعد عرضه لهم .. وبصراحة يتساهلون رجال دين ماشاء الله و الحمدلله ماضرهم شيء عايشين ومبسوطين ..يمكن أصحابه بعد يعرضون عليه أخواتهم .. فصار الموضوع هذا عادي بالنسبة له . الله ييسر أمرك ويرزقك بالزوج التقي النقي .. |
اقتباس:
هلا اطياف والله يعطيكِ العافية اللي لونته بالاحمر شدني كثير اللي اعرفه عنكِ يااطياف ان دراستكِ كانت بمدارس تحفيظ القرآن يعني نشأتك من الصغر دينية وهذا نفس وضعنا بالبيت اخواني واخواتي وحتى ازواج اخواتي ماازكيهم على الله لكن احسبهم والله حسيبهم من اهل الصلاح وحتى بمجال عملي مركزي يتبع للدعوة والارشاد , فبيئة البيت والعمل كلها محافظة وهذا اللي بعد الله يثبتني ويزيدني خير . وانا نفسياً ماارتاح لغير المتدين بس هالفترة الأخيرة صرت اقول اهم شي الصلاة والاخلاق ومايدخن والفضائيات ممنوعة بس مع اني اتمنى افضل لكن ماقدامي خيارت احسن , سبحان الله اخواتي كلهم اول متقدم كان متوفر فيه الصفات الطيبة واهمها كلهم طلبة علم وخلوقين , والحمدلله مرتاحات الله يسعدهم , وواحدة منهم تقولي الزواج يبيله صبر عشان الاختلاف في الطباع والتفكير وكذا , فمابالكِ تأخذين واحد مقصر يبيله جهاد وصبر كبير مره يااطياف قرأت لكِ رد كنت تذكرين صديقة لكِ لها فضل عليكِ بعد الله في تجاوز اول سنة من الزواج لأنها كانت شوي صعبة, طيب هالصعوبات لها علاقة باختلاف مستوى التدين بينكم ؟ وهل كان حاط فضائيات بالبيت؟ وبعدين إذا حب يسمع اغنية ولا يشوف فلم انتِ وش تسوين؟ حاولتي تغيرينه في امور وقدرتي؟ طيب اطياف انتِ لما استسلمتي ووافقتي ماكنتِ مقتنعة ومرتاحة ولا ارتحتي بعد الشوفة؟ لأني انا استخير وماارتاح وموضوع الشوفة الشرعية دائماً اجله واجله الين الناس تمل وتبطل , والى الان مادخلت ولا مرة للشوفة وبعدين هذا المتقدم , زوجة اخوة وصديقة والدتي الله يرحمها بينهم قرابة , وانا كثير ازور صديقة الوالدة الله يرحمها واحضر مناسباتهم ونفس الشي زوجة اخوه تحضر مناسباتهم فهذا الشاب اتصل على زوجة اخوه وطلب جوال صديقة الوالدة الله يرحمها وكلمها وقعد يسألها عني اسئلة دقيقة وبصراحة تافه وقلة حياء بعد ,وصديقة الوالدة الله يرحمها من حبها لي اكيد طلعتني السما انا مااحب الرجل اللي مره يدقق بهذا الشكل وفي امور مايصير يحادث فيها حرمه اجنبية و انا ماتعجبني هذي الجرأة مع النساء وبعدين انا مو خريجة شريعة , انا خريجة لغات وهذا الشي عجبه كثيييير وسأل عن شكلي ووصفوني ان كان زوجة اخوه او صديقة الوالدة الله يرحمها ودقق كثير في اوصاف الجسم بالذات فأحس هو بس هذا اللي عاجبه فيني ويمكن هو في باله انه يقدر يغيرني بعد الزواج واترك ماأنا عليه واقول يمكن هو عجبته اوصاف البنات اللي كانوا معه بالدراسة فيبي وحدة تتكلم لغتهم... احس اني قمت اوسوس واخر مناسبة في بيت صديقة الوالدة الله يرحمها كل اهله جايين مع زوجة اخوه وهم مايقربون لصديقة الوالدة الله يرحمها واول مره يدخلون بيتها لأنهم عارفين اني معزومة يعني وش دخل الخالات والعمات وحريم اخوانه في الموضوع وهو مابعد صار شي رسمي وهم ناس مبسوطين وحنا على قد حالنا وبسيطين وبعدين من ناحية خلقه ودينه ماعرفنا شي يبرد القلب لأن حياته كانت بالخارج وماله غير اربع شهور بالسعودية ولو قلت له ماابي دش واغاني ووافق , هو رجل ويقدر يدخلها بعدين وماراح اقدر امنعه واخاف اتعب معه لأني انا اصبر في اشياء كثير بس من ناحية الدين فتاخذني الغيرة والحمية وانا حارة اذكر مرة وانا طالبة كان عندنا درس عن هوليوود وانواع الموسيقى الجاز والروك وماادري وش بعد لأن منهجنا من الخارج وفيها كثير مخالفات فكنت طول المحاضرة اتناقش مع الاستاذة والبنات لدرجة وجهي صار احمر وحسيت خلاص ببكي ماقدرت اتحمل كلامهم عن حثالة واسكت المشكلة الوضع والظروف الحالية تخليني افكر اتزوج وخلاص حتى لو مااقتنعت بالمتقدم لأن اكبر اخواني كل مره يأجل موضوع زواجه وانا عارفه انه انا من بين الأسباب صعب بنت الناس ترضى تعيش معي انا وهي ببيت واحد والبيت كله شقة وصعب تنقسم هي عروس ومن حقها تفرح بنفسها وببيتها وتلبس لزوجها فوجودي صعب بالبيت واقول بنفسي يعني هم كل البنات تزوجوا بقناعة بعضهم اهلهم اجبروهم وتزوجوا وعاشوا ما ماتوا ادري يااطياف قرقرت على راسكِ ودوختكِ بس شسوي , اخواتي بطلت اقولهم اي شي جديد معي عشان لا يشيلون همي و يكفيهم هم ازواجهم وعيالهم فأعذريني والله لايحرمكِ اجري ولا تنسيني من الدعاء |
اقتباس:
لو تقدم شاب محافظ على الصلاة بالمسجد وخلوق وما يسمح بوجود منكر بالبيت لادش ولا اغاني ولا دخان وكان حليق ومسبل كنت قبلت وسألت الله اكون عون له وسبب في صلاحه بس اللي يحصل غير كذا إذا كان يحافظ على الصلاة وخلوق بالمقابل يكون يدخن ومااقدر ارتبط بمدخن او يصر على وجود فضائيات بالبيت وينظر للأمر على انه هين وعادي ولكن عند الله هو مو هين كيف الواحد يموت ويلقى الله وفي بيته هذا المنكر؟ وكيف بعدين بربي عيالي إذا الله اراد على شي وبالدش يشفون شي ثاني؟ وبعدين الفضائيات الخبيثة ( غزو فكري) تفسد العقل وتثير الشهوة وتأثيرها اشد من الغزو بالسلاح والصواريخ واللي يحرص على مشاهدة الأفلام والأغاني ماراح يتوقف عند هذا الحد لأنها خطوات الشيطان كم واحدة في المنتدى اشتكت من إدمان زوجها على الأفلام الخليعة؟ لدرجة اصبحت معلقة , متزوجة بس بالاسم نسأل الله العافية الله يعطيكِ العافية على حرصكِ ودعائكِ ولكِ مثله ياغالية اقتباس:
جزاكِ الله كل خير والله يستجيب منكِ الدعاء ولكِ مثله بفكر بكلامكِ والله ييسر امري وييسر امر كل من يريد العفاف اقتباس:
حياكِ الله دنيا الوفا وفعلاً تجربة اطياف الرياض فتحت لي باباً للتفكير من زاوية اخرى والله يسعدها ويهنيها وييسر لي الصالح لي من عباده وجزاكِ الله كل خير على دعواتكِ ولا تنسيني خاصة هذه الايام لعل بدعاء احدكم اخرج من حيرتي |
اقتباس:
ياعمري انا ابد ما قلت وافقي على اللي يطالب بوجود الفضائيات ابداً انا معاك بس كان قصدي ان المظهر الخارجي المتدين لا يعني بالضرورة ان صاحبه يملك سماحة الاسلام ويعامل المرأة بلين ورفق وانا معاك بكلامك الله يثبتك على طاعته ويرزقك الزوج الصالح الذي ترتضيه وتسعدي به وتقر عينك به عاجلا غير آجل يا الله |
اقتباس:
جزاك الله خيراً ورفع قدرك واشكر لك نصيحتك جعلها الله في ميزان حسناتك ولا داعي للاعتذار فحديثك في صلب الموضوع وكلامك سليم والله سبحانه وتعالى يقول (ولولا دفع الله الناس بعضهم بعض لهدمت صوامع وبيع وصلوات ومساجد يذكر فيها اسم الله كثيراً ولينصرن الله من ينصره ان الله لقوي عزيز)فأهل الصلاح يدفعون اهل الباطل وهكذا .. و ياأخي انا ليس لدي اي معطيات عن الشاب إلا ماذكرته فقط ولا يزكيه إلا اهله لا جيران ولا غيره يعرفون الشاب ,لذلك قلبي غير مرتاح وبالنسبة لشرطي انت تراه من حقي لكن كل من تقدم لي يرى خلاف ذلك والله المستعان اسأل الله ان ييسر لي مافيه خير ولا تنسوني من خالص دعائكم |
اقتباس:
اللهم امين ولكِ مثلها ياغالية طيب الوان ممكن اعرف تجربة اختكِ عشان نستفيد ؟ وبارك الله فيكِ |
الله يرزقك ياانتظار الزوج الي يستاهلك وييسر امورك يارب
|
عرض الرجل أخته للصالحين ليس فيه شيء , ولم يزل الناس يعرضون بناتهم على الصالحين الأكفاء..... والقصص في هذا الباب كثيرة..
أما شرطك الي اشترطتيه فنعم الشرط هو... واثبتي عليه.. واحذري من التراجع والضعف وإن تأخر الزواج قليلاً.. فإن الله سيجعل لك فرجاً ومخرجاً.. ومن ترك شيئاً لله عوضه الله خيراً منه.. |
: انتظــــــــــــــار } ماراح ازيد على تجربة اطياف الـرياض وغيرها بس ماقول غير الله يكتب لك الخير حيث كـآن ثم يرضيك فيه .. ويرزقك بالزوج الصـالح الي يكون عونا لك في امور دينك ودنيـاك .. : |
انتظار حياتي أفتحي موضوع في قسم مراسلة الحياة الزوجيه باسم وردة بين الثلوج
http://www.66n.com/forums/forumdisplay.php?f=129 |
ربي يرزقك بالزوج اللي تتمنيه ويكون قرة عين لكِ وتكوني قرة عين له ويرزقكم الله خير الذرية يارب يارب يالله آمييين
|
أختي خليكي على مبدأك وشرطك وبارك الله فيكي وكثر من أمثالك
|
اقتباس:
اللهم امين ويسر امري وامركِ ياغالية اقتباس:
اصبت بارك الله فيك ولا تنسونا من خالص دعائكم اقتباس:
جزاك الله خيراً وبارك الله فيكِ يادانتيل اقتباس:
اقتباس:
جزاك الله خيراً وجعلني خيراً مما تظنون وغفر لي ما لا تعلمون |
لكل من يشاهد موضوعي اسألكم الدعاء لي فربما يكون بينكم من دعوته لاترد |
اقتباس:
انا فاهمتكِ ياعمري وكلامكِ صحيح ليس كل متدين خلوق وإلا لما قال حبيبي وقرة عيني بأبي هو وامي صلوات ربي وسلامه عليه (( إذا جاءكم من ترضون دينه وخلقه فزوجوه ) مع ان الخلق من الدين جزاكِ الله خيراً على دعائكِ ولا تنسيني ياسعاد دائماً من الدعاء بارك الله فيكِ يااخية |
الله يسير امورك ويكتبلك كل خير
انا عكسك بالعكس مابدي متشدد ولا معقد ولا ملتحي وزي ماقالوا اهم شي اخلاقوا ياما ملتحين معذبين زوجاتهم ايش استفيد من لحيتوا اذا ماكان فاهم الدين كويس اووو او استخيري الله واتذكري مو كل ملتحي او مقصر ثوبوا يعنى دا التووب |
ياحبيبتي أنتي ياحظ الي بتكونين من نصيبه بس
أسأل الله الواحد الأحد الفرد الصمد أن يرزقك الزوج الصالح الي تتمنينه عاجلاً غير آجل |
اللهم إني أسألك بإسمك الأعظم الذي إذا سئلت به أعطيت واذا دعيت به أجبت اللهم اني أسألك ياذا الجلال والاكرام،ياحي ياقيوم
أن تقدر لأختي إنتظار الفرج من الرجال من هو اعفهم وأوسعهم رزقاً و أعظمهم بركة اللهم زوجها رجلا صالحا تقر به عينها و تقر بها عينه يا ذا الجلال و الإكرام وأسألك يارب أن ترزقها زوجا صالحا يعينها في أمور دينها ودنياها فإنك على كل شي قدير اللهم ارزقها بالزوج الذي هو خير لها وهي خير له في دينها ودنياها ومعاشها وعاقبة أمرها عاجله وآجله يا كريم يا رحيم |
السلام عليكم ورحمة الله بركاته
كيفك أختي إنتظار؟.......إن شاء الله تكوني بصحة وعافيه حبيبتي أنا ماراح أعلق على موضوعك بالنسبه للقنوات الفضائيه ......بإعتقادي إسألي من هم أفضل منا نحسبهم كذلك ولا نزكيهم على الله ......ناس ذو تجربه وخبره في هذه الحياة لأني أحسن الموضوع صعب شوي ........شوفي موقع الشيخ محمد المنجد فيه إستشارات ...........أكتبي إستشارتك وإن شاء الله ما تشوفي إلا كل خير أما عن الأخ اللي يعرض أخته على أحد أصدقائه .................بالنسبه ليا ............... أشوفه رجـــــــــــــــــــــــــال ومافيها شي ولا عيب ............ الناس في البدايه تستهجن أي شي جديد وما حاقول غريب لأنه هذا عندنا في ديننا ........لكن للأسف عشان بعدنا عنه صارت تحكمنا العادات والتقاليد !!! الواحد يتكل على ربنا وخلاص ماعليه بالباقي ......بس لازم ناخذ بالإ عتبار الطريقه الجميله والأسلوب الذكي من ناحيه........وشخصية الرجل (الخاطب)من ناحيه أخرى ...بمعني ندرس الوضع ......... وشوفي زوج أختي خير مثال ماشاء الله تبارك........عرض أخته على صاحبه وماشاء الله هي ماينقصها شي ......وذحين هم متزوجين وعندهم اولاد ..........وكمان عرض بنت أخته وماشاء الله كل شي تمام ....... ولا أحد داري بس أختي دريت بالصدفه ........... الله يرزقك الزوج الصالح اللي يسعدك في الدنيا والاخره ........ انت وبنات المسلمين اللهم امين دمتي بود |
| الساعة الآن 12:58 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©