خيانة
 

السلام عليكم ورحمة الله
بكتب الموضوع باختصار وبسرعة لاني ابي ردودكم بسرعة قبل لا اقبل على خطوة الطلاق
اليوم الصباح دق رقم على جوال زوجي وهو عنده ثلاث ارقام ومن بين الارقام هذي رقم مميز فانا نادرا مااشوفه يستخدمه
المهم دق الرقم وعطاه مشغول وشكيت انا ورجع دق عليه وطلعت بنت ونادته باسمه وبعدين قفل بوجهها وقالها انت غلطان اخذت الرقم من عنده ودقيت عليها من رقمي وقلت له كلمها يقولي كلميها انتي اقولها مين انتي تتحجج انها ماتسمعني زين
المهم ردة فعله كانت غريبة منها الي شككني انه عطاها بيزي من اول مادقت وثاني مرة اول ماقالت اسمه قفل بوجهها وكان جدا مرتبك
اعذروني اكتب ويدي ترتعش ماني عارفة وش اقول
بس هو حلف على المصحف وانا ماني مصدقة الشى هذا وانكر تماما انه يعرفها ولكن الي صار قدامي يعكس كلامه تعتقدون ياجماعة انه يجوز له الحلفان عشان مايخرب بيتنا ؟
انا ماني مصدقة حلفانه ابد وطلبت منه يوديني مكه ويحلف لي عند بيت الله الحرام تتوقعون انه اذا حلف بمكه بيكون صادق ولا بس عشان مايبغى يخسرني ويطلع قدامي خاين
تكفوووووووووووووووون كل شى اتحمله وياما تحملت الا الخيانة الا الخيانة وربي تنهيني
ابي ردودكم بسرعة ولي يحفظكم لاني هالمرة فعلا قررت الطلاق

مادري والله ليه تدوري وجع الراس دوارة


يعني وش استفدتي الحين لا وبتقلب طلاق وبسرعة قال


خلاص صدقيه طالما حلف

ياجماعة الي صار قدامي شككني فيه لو مايعرفها يرد عليها عادي
وبعدين اول مادق الرقم عطاه مشغول ومن قالت اسمه قفل بوجهها
في ناس تحلف وهي كذابة نسال الله السلامة

لا مكة ولا شي

حبيبتي كبري راسك

الخاين يكشفه ربي بيوم من الأيام

تجاهلي هالمرة او بالأصح تناسي ومشيها وشوفي النتيجة

الخطأ وارد ولكن كيف نعالجه؟؟
هذا المهم

السلام عليكم يا اختي
من كتابتك لموضوعك واضح انك شكااااااااااكة جدا ، اساسا كيف يرضى يعطيك الرقم ادقي عليه لو كان عامل عملة
يابنت الحلال لا تخلي الشيطان يخش بيناتكم المهم انه هو حلف ونكر مع انه مش ملزم ابدا انه يحلفلك او يعطي اهمية للموضوع لو يبي
بس استهدي بالله وحتى ولو كان في شي فا هالموقف حيخليه يراجع نفسه المهم انت خلي عندك ثقة بزوجك و حاولي انك تكسبي ودة خير ما يطفش منك

ولو كان بينه وبينها شي كان واجهتك وتكلمت معاك بثقة لانها بتكون مالية يدها منه مو تتلخبط وتلف وتدور


بعدين يحلف قدام البيت الحرام ؟؟؟؟؟؟؟؟؟؟؟؟؟؟؟؟؟؟؟


يعني اللي رابطك بزوجك مجرد حلف اتقي الله والطلاق انتي اللي بتنضري منه ما احد غيرك

السلام عليكم
اختي ..حبيبتي
اهدئي
واخزي الشيطان ..
عزيزتي ليش تسوي كذا ؟
ليش تدقي على الرقم وتجيبي الهم والغم لنفسك
كبري عقلك ومافي داعي تحلفيه في مكة
اذا انتِ عايشة في تبات ونبات مع زوجك فلا تخربي بيتك بشكك وتصرفاتك
ولا تدوري وراء زوجك ..

الله يعينك ويفرج همك .....
بصراحه

حتئ انا مو مصدقته ابدا ولا احد يتهجم
صدق يقهر
الافعال الي ذكرتها الاخت
تدل ان له علاقه صدق

لكن حلف ماادري

!!!!!!!!!ومااظلمه

الايام تكشف لك الحقيقه!

اشكركم حبايبي كلكم على ردودكم وماتقصرون ولايحرمكم الاجر باذن الله
طبعا رحنا مكة وقبل لايحلف لي اعترف لي انه قبل لايتزوجني كان رقمه مع خطابة وقبل شهرين بس دقت عليه وقالت له لقيت لك عروسة وقالها تراني تزوجت ورجعت مرة اخرى ودقت عليه وقالت له ترى البنت كويسة وبنت ناس
طبعا ياجماعة انتم عارفين شغل الخطابات والله المستعان صار شغلهم تجاري وكانها تبيع بضاعة
المهم وضحلي سالفة ربكته لمن دقت عليه وخاف لا ينفظح عندي واضطر انه يقفل بوجهها
حلفلي انه ماله علاقات وانه مايكلم بنات لكن الي استغربت منه كيف زوجي كان بيتزوج وحدة عن طريق خطابة ويامنها على بيته سكرت الموضوع بعد ماتضح لي سالفة الربكة ووكلت امري لله
اخواني اخواتي حلفتكم بالله انكم تدعولي بظهر الغيب لاجل الله يسخر زوجي لي ويهدي سرنا والله اني تعبت من المشاكل مايمر علينا يوم الا وفي مشكلة..وابي منكم مساعدة لاحرمكم ربي الاجر بالنسبة الاخوات المتزوجات وكذالك الاخوان ينصحوني كيف اخفف غيرة عن زوجي وكيف اتعامل مع كل شى بحكمة لاني والله فقدت الحكمة بعد زواجي وخاصا ان زوجي مثل ماقلت لكم لا صارت مشكلة يهددني بالطلاق او يطلع من البيت ويخليني حتى بدت ثقتي بنفسي تروح بالتدريج,,
اسال الله ان يحفظكم ويكتب لكم الاجر بكل حرف ساعدتموني فيه وبارك الله في جهودكم

يمكن شى بالماضى وانتهى بس هى تلاحقه او شى من هالقبيل وانتى مالك دخل بماضيه انتهى حاولى تحسنى الظن وماتهدمى بيتك عشان وحدة ماتستاهل حاول تحتوى الموقف وتشديه لك اكثر ويختى باسوءالاحتمالات خل نقول نزوة تتركيه وطلاق عشان نزوة من الشيطان وتسلميه للشيطان الله يهديك بس

ماكنت اعرف انه كلم خطابة قبل لا يتزوجني وهذا ماخلاني اشك بالموقف اكثر
جزاك الله خيرا على مرورك

من حلف له بالله فليصدق

خذي بحلفه ولا توديه مكه ولا يحزنون لأن الواحد لو نوى يكذب لو هو تحت أستار الكعبة

صدقيه وخليك على حذر بس لا تخلي الوساوس تلعب بك

الله يجزاكم الفردوس الاعلى جميعا ولايحرمكم الاجر يارب

بسم الله الرحمن الرحيم
مع احترامي ل تيم وعلاوي
شلون هو مش ملزم انه يحلف لا والله يحلف ويتحاسب على حلفه ان شا الله
هذي زوجته شريكه حياته حبيبته وام عياله
علشان بنت بليس ولعب الشوارع هذا مايكون ملزوم
احنا حريم مسؤلين عن كل شي بحياتنا معاهم حتى الرجال
اسمعي حبيبتي انتي لازم تصدقين اذا كانت السالفه اول مره تصير حتى لو المره المليون تدرين ليش
عشان الحلف الي حلفه مشي المركب هذي المره
واساسا لازم نصدقهم اذا حلفو (لاتنسين كلام الرسول صلى الله عليه وسلم فيما معناه ....اذا اتاكم احد بحلف فصدقوه )
الله يستر علي وعليك انا امر بنفس مشكلتك الله يعين .............

مدام حلف على كتاب الله معناه صادق وهدى شويه من الغيره هذى ماراح تجبلك الا الامراض

ودي فعلا اصير هادية من ناحية الغيرة لكن والله شى ماهو بيدي وغصب عني اسال الله ان يرزقني الحكمة والصبر

منذ متى متزوجه و هل لك ابناء ؟

اختي ما هي طبيعة المشاكل اللي بينكم ؟؟

لماذا تغيري على زوجك لهذه الدرجه التي تصرفاته تثير الشك عنده ام انها فقدان ثقة بنفسك ؟؟

اختي صابره بدنيتي

اول شي تعوذي من الشيطان
ثاني شي تاكدي انك غااااااااااليه عند زوجك لانه خايف على زعلك

لاتدققين بالموضوع خليك وااااااااثقه بنفسك ولو كان في علاقة وان شاءالله مافي تعتبرعلاقةحرام ومؤقته


وزائله اما انتي زوجته وحبيبته ولا تفكرين بخيانته ابدا قوي ثقتك بنفسك ولاتخسرين بيتك عشان وسوسة عسى بيتك عامر باذن الله بقولك حكاية مرة اخوي عشان تقتنعين وتشوفين الصبر

اخوي قبل لايتزوج كان له علاقة بوحده المهم تزوج وكانت زوجته عمرها 15 تخيلي وكان يكلم ويستهبل عندها وهي ولااااااااااااااااااااااا كلمة مطيعه وهادية وطيبه وهي عارفه كل السالفه بس مسويه نفسها انها ماتدري عن شي وفعلا ماشاءالله تبارك الله انتهت كل علاقاته وتغير وصار يكره العلاقات المحرمة بشكل فضيع وزوجته ماشاءالله مثل عيونه و لايستغني عنها ابدااا

يعني خليك جبل مايهزك ريح وتبين تفتكين من الغيرة عدي موقف او موقفين وبتتعودين


وبيت النار تصبح رماد[/U][/U]

تسلمين يالغالية ريما واسال الله ان يفرج همك ويحفظ لك عيالك من كل شر وسوء

لبى قلبك بس
يالغالية يعني مافي رجل ملتزم بهالدنيا معقولة..؟؟؟
انا وربي مابي شى من هالحياة سوى اني اعيش تحت ضل رجل يخاف الله
مو مسالة اني بايعتها او اني ابغى اطلق صدقيني مثل ماقلتي المراة هي الي خسرانة بالموضوع لكن الي متى ؟
والله لو يخيروني بين كنوز الدنيا وبين رجل تقي نقي يخاف الله لاخترت ان اعيش معه على حصيرة شرط ارتاح

ممكن تكون وحده من قرايبكم تعرف اسمه ؟؟

وهو بريء ما يدري عنها خاصه انه حلف على المصحف

لا ياخوي ماحد يعرف رقم زوجي الا اهلي البعيد ماحد يعرف رقمه

أختي الكريمه
الغلط وارد بها الدنيا ولكن الاستمرار عليه هو المشكله
ارتكبتي غلط بأخذك الرقم والاتصال هذه اكبر غلطه
كان يفترض بما انه حلف لك خلاص الموضوع هنا انتهى
يجب ان تحافظي على استقرار بيتك
يجب ان تراجعي نفسك وشوفي زوجك ماذا يريد منك واعمليه
لكي لاينظر الى غيرك
اعملي معه كل شي يريده
وصدقيني راح يموت فيك
اقول هذا الكلام لأني اريد زوجتي كذا
نصيحه من القلب الى القلب
دمتي بسعاده وراحة بال

وقسم بالله ياخوي الفاضل ماني مقصرة معه بشى وربي البيت الفلوس الي يرسلوها اهلي لي كل شهر ابعزقها على قولتهم بالعطور والمكياج واللبس عشان يشوفني حلوة مع العلم انه هو الي لازم يشتري لي كل مااحتاجه والفلوس الي يرسلوها لي اهلي اخبيها
لكن لا شفت ضروفه تعبانة مااحب اثقل عليه حتى لما يقولي معاكي فلوس اقوله ايه معي وانا مو معي شى مابي اثقل عليه واشيله هم مقاااااااااااابل كل هذا ابغى الوفاء والاخلاص والي مخوفني بزوجي يحب الفلة ويحب يسمع الاغاني الي فيها فلة بقوة ويستانس وانا اخاف مع العلم اني تزوجته على اساس انه متدين مااقولك انه خراب عشان ما اظلمه لكنه شوي فري وانا ماحب كذا ابي زوجي متدين لدرجة التشدد ويكووووووووون فري معي انا وبس