|
أحبك أمي
السلام عليكم ورحمه وبركاته
هالموضوع كتبته بسرعه وبدون ترتيب افكار / اعذروني تقدرون تعتبرونه مجرد فضفضه واطمع بنصايحكم وتوجيهاتكم أنا عندي مشكله .. متعبتني نفسياً .. وأجزم أنها السبب في التعاسه اللي أحس فيها ولأن المشكله مو مع حي الله انسان ,, للأسف مع أمي اولاً حابه اتكلم لكم عن شخصية أمي * اقدر اقول عنها جريئه وقويه * كلمتها مسموعه خصوصاً من أبوي ,, لأنه يحبها ونادر مايرفض لها طلب والله يديم هالحب * ست عن عشرة رقاله زي مايقولون :d يعني اذا كان ابوي ربي يحفظه مو موجود لظروف العمل ,, مايتعطل شغل البيت تفهم بكل شي ,, ماشاءالله لدرجة حتى اذا سيارة من سياراتنا فيها مشكله / ماتتردد تروح وتخالط الرجال عشان تصلح السياره * حنونه ومرات احسها بسيطه وتحب تساعد الناس ومرات احس بالعكس تهتم بالمظاهر * تحاول دايماً تبان أصغر من عمرها وتهتم بنفسها كثير ,, وتفرح اذا كنا معاها انا وخواتي بمكان عام او بالسوق وشخص قال لها ( ماشاءالله كأنك أختهم مو أمهم ) وتجلس تعيدها الف مره بالبيت من وناستها * تفرق بينا في المعامله والحب ,, تحب الأولاد أكثر من البنات وهي بنفسها اعترفت بالشي هذا وحنا نشوف من معاملتها لهم فيه تمييز واااضح المشكله بدت من يوم كنت صغيره .. تقريباً لما كان عمري 11 سنه أمي كانت تسوي شي ماأقدر اقوله ,, لكن شي ضد الدين اولاً وضد العادات والتقاليد ( لايروح بالكم بعيد ,, الحمدلله ماكان شي كبير ) بس اللي تسويه أثر فيني وفي أخواني كلهم ,, كنا نبكي في الليل قبل ماننام وحنا نتكلم عنها وعن الشي اللي تسويه .. ومصدومين لكن صغار ماندري وش نسوي كبرت شوي ,, وصرت أنا واخواتي نواجهها واحيان ننصحها ونبكي والله من القهر ونقول يمكن تحس فينا ,, بس من غير فايده لأنها كانت تنكر وتدعي علينا بحجه انو حنا ظالمينها واستمر هالوضع وكانت معانتنا تكبر كل مانكبر ,, خصوصاً أنا خواتي رغم جرائتهم الا انهم يخافون منها احيان وأنا اللي كنت اواجهها واصرخ في وجهها وانفجر من الغضب لأني كنت مقهوره على أبوي ,, يحبها ومو مقصر معانا وتجازيه بهالشي !!! وهذا اللي خلاها تكرهني ,, لأني اواجهها بحقيقتها ورافضه الشي اللي تسويه آخر مره قبل 4 سنوات تقريباً .. تكلمنا خواتي طبعاً ساكتين لأنهم يأسوا من الموضوع ,, وأنا اللي كنت اكلمها والله كنت أبكي وقتها من الحرقه اللي بقلبي وهي تصرخ بوجهي اكرهك من بد أخوانك اكرهك ,, وتدعي علي تصدقون مااذكر بعمري أن امي دعت لي ,, بل على العكس تدعي علي هذا طبع فيها مع الكل ,, تدعي كثير حتى على أبوي اذا كانت زعلانه منه او اذا كانت فيه مشاكل في البيت بين اخواني تدعي عليه ,, وتقول هو مرتاح بشغله وتاركني أنا في نار معاهم ماتقدّر أنه يشتغل ويتعب عشان يعيشنا عيشه كريمه ويحز بنفسي لما اسمعها تدعي لخواتي بالتوفيق وبالزوج الصالح وماتدعي لي طبعاً هالمشكله غيرت من شخصيتي وافقدتني الثقه بنفسي صرت مااحب اجتمع مع الناس كثير ,, أحب العزله خوووااافه بشكل مو طبيعي ,, اخاف من كل شي كل شي وأنا خجوله وصرت خجوله أكثر ,, وضعفت شخصيتي على الرغم أني محبوبه من الناس الحمدلله .. من ايام المدرسه والحين بالجامعه علاقاتي طيبه مع الكل وماعندي اعداء ولا أحد يكرهني وصديقاتي من ايام المدرسه يحاولون دايم يتواصلون معي ومتمسكين فيني بس أنا اللي قاطعه معهم واحس في شي يمنعني عنهم ومو قادره اتواصل معهم و مع الناس بشكل عام !! حتى زيارات الأهل اتجنبها اللي دفعني اكتب هالكلام موقف صار لي قبل فتره بسيطه مع أمي وأمس تكلمنا عنه ,, وعصبت وبكيت وصار اللي يصير كل مره الموقف بأختصار ,, زواج عمتي قريب وقبل أسبوعين رحت أنا وخواتي لمصممه ازياء ,, وخواتي تفاهموا مع المصممه وخلصوا من فساتينهم باقي أنا ,, وكنت محتاره مره واقلب بالمجلات أنا وخواتي تفاجأت بأمي تقول / خلاص ماله داعي تسوين فستان وتطلعين بزواج عمتك خواتك يكفون ,, وهم اجرأ منك ع الأقل اذا سوينا لهم فستان بيحللونه وبيطلعون وبيرقصون قدام الناس ,, بس انتي مو جريئه ,, يعني حرام الخساير أنا انصدمت وانحرجت من المصممه ,, شوي وأبكي والله طبعاً بررت كلامها هذا بعدين / ان أبوي يمر بأزمه ماليه ومايقدر يدفع لنا كلنا مع العلم أن ابوي قال لها ,, خليهم يسون اللي يبونه هذا زواج عمتهم ومو كل يوم يصير زواج أنا أخذت بخاطري من كلامها وقلت خلاص ماابغا شي خلونا نمشي وفي موقف ترك أثر قوي في نفسي ,, ويمكن أقوى من الموقف اللي قلته بس ماابغا أطول عليكم والله تعبت من كلامها ,, تتفنن بجرحي وتحطيمي دايم تكرر كلام زي السكاكين يطعن قلبي http://www.66n.com/forums/images/icons/icon9.gif ( أكرهك ) ( أنتي صح حلوه بس شخصيتك ضعيفه غير عن خواتك ) ( انتي مريضه نفسياً ) كيف أقدر اسامحها وانسى كلامها ؟؟؟ كيف احسن علاقتي معها ؟؟؟ كيف أرجع انسانه طبيعيه زي ماأنا احب ؟؟؟ أنا عارفه أنها السبب في كل اللي يصير لي ,, بس ماابغا اغضب ربي لأن رضاه من رضاها والله يجزاكم خير ومشكورين مقدماً |
اختي الله يعينك والله ماعندي شي انصحك فيه بس حبيت ادعيلك
نقل الوضوع الى مكانه الانسب......الاشراف |
مرحبا حبيبتي الله يعينك ان شا الله
بس عمر الام ماتكره ضناها لوايش ما كان السبب انا ام واعرف ولا فيه شي اسمه تفرقه بس انتي الله يصلحك تدخلين لها با الشي الي هي ماتحب احديتكلم فيه واذا ابوك داري عن الي هي تسويه خلاص هو يحاسبها يا حبيبتي ابتعدي عن المشاكل مع امك حاول تصيرين مثل خواتك خلاص بكيفها استخدمي اسلوب التغير هذا وشوفي ردت فعلها ........ الله يعينك ويبرد على قلبك يااارب ....ويهدي الجميع |
وعليكم السلام ورحمة الله أختي الكريمة صراحة ما فهمت ماذا فعلت أمك ؟!!! ولا يحتاج اننا نعرف !!! لكن ردة فعل أمك متوقـعـة وطريقة تعاملها معك بالتحديد ليست غريبة ، خاصة أنك أنت من وقف بوجهها وهي ما زالت تذكر هذه المواجهة والتحدي!!! وعلى أساس ذلك تعاملك بهذه الطريقة.... لذلك لعل أبسط طريقة أنك تجلسي معها على انفراد وتقولي لها اللي بخاطرك وخاصة الكلمات والالقاب التي أطلقتها عليك ، وقولي يا أمي أنت ما تعتقدين في أني ضعيفة شخصية،... إلخ لأنك تعرفين بقرارة نفسك أنك ما قلت هذا الكلام إلا أني يوم من الأيام واجهتك وهذا دليل على قوة شخصيتي ، وأني ما أسكت عن الحق ومع ذلك أنت تظلين أمي وبرك واجب وحق عليه وأنا أحبك وأعتز فيك وأنا مهما وإن كان واجهتك بقوة فأنا اكتسبت منك أجمل الصفات قوة الشخصية والإعتماد وإلا تبغيني أعيش ضعيفة !!! و لا أظنك بتعامليني معاملة الند للند لأني أمي وأنا بنتك .....!! والعلاقة بينما أكبر من الندية !!!! ومن هالكلام ....:d وعليك ببرها والصبر على كل ما تواجهيه من جهتها والله يوفقك ويحفظ لك امك ويصلحها عزوبي بس رجل |
الله يهدي بالكم ويسخرها لك ويهديها وينولك رضااها يارب العالمين
|
بس تدعي عليكي و تقولك "بكرهك" قوليلها الله يخدني و يريحك مني و تعيشي متحسرة بسبب دعواتك الطايشة..
و اكيد حتخاف تدعي عليكي.. و بس تقولك مريضة نفسيا قوليلها انت السبب!الله يسامحك. و حاولي تقضي وقت مع خواتك اطلعي و روحي و انبسطي..لا تنعزلي.. و شوي شوي حتيتحسني.. |
اقتباس:
آمين ,, الجميع يارب مشكوره =) |
اقتباس:
مافيه أم تكره ضناها !! أسمعها كثير بس وش أسوي لو اني اشوف العكس من أمي ومو مجرد كلام حتى بتعاملها احيان معي =( والتفرقه موجوده ,, يمكن الشي هذا ماتملكه بيدها وغصب عنها تفرق وياعمري والله ماكنت اتدخل الا من خوفي عليها وخوفي ان الموضوع يتطور ومن خوفي على هالبيت يتدمر عشان سبب تافهه وأنا مستحيييل اشوف الخطأ قدامي واسكت يعني عشانها أمي ,, اخليها على هالحال واتفرج !! خصوصاً ان ابوي ماكان يدري الحين تغيير الوضع الحمدلله ,, ومن فتره طويله =) اللي يضايقني ان الشي هذا لحد الأن مأثر على تعاملها معي ومأثر على شخصيتي كثيييييييييييييير http://www.66n.com/forums/images/icons/icon9.gif آمييين ,, والله يجزاك خير |
اقتباس:
http://www.66n.com/forums/images/icons/icon11.gif يعني بدفع ثمن الشي اللي سويته لمصلحتنا كلنا , طووول عمري وصعب جداً اطبق الكلام اللي قلته أنا و أمي مافي بينا لغه حوار أبد تدري لو أسوي كذا ,, يمكن تضحك علي http://www.66n.com/forums/images/icons/icon9.gif !! ولما اكون زعلانه مرررره ومنهاره ,, ونتكلم بالموضوع تنكر كل شي قالته لي ومرات تقول انتي مريضه وتفسرين كل شي على مزاجك من جد شي يقهرررر =( ومواجهتي لها ماتعتبرها قوه مني أبد كانت تعتبرها مرض نفسي عشان تطلع هي الصح و اذا كان بشخصيتي ضعف فهو منها يعني مثلاً الخجل والطيبه الزايده واشياء كثيره ممكن ماتدل على الضعف بس بعيون أمي ضعف =( يعني خواتي اللي اجرأ مني ,, أقرب منها لأنهم يشبهونها وآمين ,, الله يسمع منك شكراً على ردك |
اقتباس:
اللهم آمييين الله يجزاك الجنه وشكراً على هالدعوه =) |
اقتباس:
هالكلام مو بس أنا اللي اقوله أخواني كلهم يقولونه لها اذا دعت علينا بس مافي فايده تعود لسانها على مثل هالكلام ! والله لو ماتدعي يمكن اشك أنها امي مرات احس الرحمه منزوعجه من قلبها / الله يهديها =( اقتباس:
آحاوووول والله بس تجيني حالات من التحطييييم الزايد اكره كل شي كل انسان له طاقه http://www.66n.com/forums/images/icons/icon11.gif تسلمين ياقلبي / الله يجزاك خير |
ياعالم راح اجن http://www.66n.com/forums/images/icons/icon9.gif
عندي سؤال وماعرفت وين اسأل .. قلت اجي في موضوعي يمكن الاقي عندكم الجواب الله يخليكم لا تضحكون علي وصدقوني . لأن اللي بقوله صار معي ورب البيت اليوم الساعه 2 الصباح طلعت برى .. أبغا أخذ لي شي من الثلاجه ظلااااام والجو مرعب بس توكلت على الله http://www.66n.com/forums/images/icons/mama.gif فتحت الثلاجه ...!! وشي ضربني على راسي بقووووووه .. مدري كيف اوصف لكم .. بس كأنها يد كبيييييره ضربتني http://www.66n.com/forums/images/icons/icon9.gif صرررخت وهجيت بسرررعه وربي ماقدرت امشي واحس رجولي انشلت مدري كيف ركضت ورحت فوق عند غرفة امي من الخوف أنا فكرت في شي فوق الثلاجه وطاح على راسي قلت بنتظر لين تطلع الشمس .. واخذت الخدامه معي لأني خايفه رحنا عند الثلاجه ومافي شي ع الأرض !!!! والثلاجه اللي فتحتها كانت فاضيه اصلاً < عندنا ثلاجتين وكانوا مفضينها امس ولحد الأن احس بألم في راسي http://www.66n.com/forums/images/icons/icon9.gif صرت اوسوس وربي , مو عارفه وشو اللي ضربني http://www.66n.com/forums/images/icons/icon9.gif وبالقوه هذي ..! واللي محيرني مافي شي ابد ابد معقووول يكون جن !!! http://www.66n.com/forums/images/icons/icon9.gifhttp://www.66n.com/forums/images/icons/icon9.gif |
اقتباس:
ههههههههههههههه اختي يمكنه جني يمزح معاك او قطو فوق الثلاجه ونط على راسك :d ومافيه شي بعيد يمكنه جني انا طالب في البترول وعندي شقه اذا قمت باليل وبروح الحمام وانتي بكرامه احس اشوف اشخاص قدامي:11: شي اسود يتحرك واتعوذ من ابليس واكمل نومي |
ليه تدخلي المطبخ بالليل والعتم وهل الكهرباء مقطوعه
ثاني مره شغلي النور انصحك بسورة البقره والرقيه شغليها واستعيذي بالله الرحمن الرحيم |
اقتباس:
هلا أخوي فهد ههههههههههههههههههههههههه يمكن بس والله مزحه ثقيل الله يلعنه ومااعتقد قطو لو قطو كان قال مياااو ولا شي :d والله يكون بعونك http://www.66n.com/forums/images/icons/mama.gif بالتوفيييق |
اقتباس:
الكهربا مو مقطوعه بس هالمكان مافيه نور http://www.66n.com/forums/images/icons/icon11.gif انا اخاف بصوره غير طبيعيه لكن اتعوذ من الشيطان و اتوكل على ربي واحاول اقوي قلبي وللأسف كل مره انصدم بشي يزيد الخوف فيني :( يعطيك العافيه أخوي |
اقتباس:
ههههههههههههههههههه جني دمه ثقييييل :23: المهم اي مكان ظلام قبل ماتخشينه تعوذي من ابليييس وسمي بالله وربي يحميكي ان شاء الله اخوك فهد |
شوفي حبيبتي انا قاسية شوي عاولادي وخصوصا بنتي لانها عنيدة وتبغى كل شيء وتسال هذا ليش لا وهذا ليش اي وانا مااحب الاسئلة الزايدة فاعاملها بنفور وليس كره حتى جات يوم وكتبت لي كرت كبير تحكي لي عن مشاعرها اتجاهي وكيف انها مضايقة من هالشيء وانو شوي شوي حتتغير وحياثر على علاقتها معي وطبعا كلام خلاني ابكي من قلبي سوي زيها واكيد حتلاقي فرق كبير ولاتنسي تدعيلي
|
اقتباس:
والله سبب لي عقده وخصوصاً من هالثلاجه .. صرت مستحيل اقربها بالليل بس بالنهار عادي .. ع الاقل اشوفه اذا تجرأ ومد يده الملعون :d وتسلم على هالنصيحه وهذا اللي بحرص اسويه الله يجزلك خير |
اقتباس:
الله يخليها لك يآرب ويرزقك برها يمكن بنتك ربي يحفظها صغيره وهالتصرفات مقبوله للي بعمرها لكن هي تحاسبني على غلط هي كانت تسويه يمكن كان اسلوبي قاسي معاها وغير عن اخواني .. بس ليه ماتعذرني لأن كل اللي قلته من خوفي عليها ......!!! بالفتره هذي أحس علاقتنا عاديه جداً وسطحيه ..! أبي احس اني احبها زي اي بنت تحب أمها ومو قادره ومن جهتها نفس الشي .. ومااحس انها أمي وتهتم فيني الا اذا مرضت !!!! أعتقد مشكلتي معاها مالها حل .. لأسباب كثيره واولهم شخصيتها .. يعني لازم اتقلبها طول عمري زي ماهي .. عشان مااغلط معاها ومالها عندي الا المعامله اللي ترضي ربي وبس .. http://www.66n.com/forums/images/icons/icon9.gif على أمل انها تتغيير بس اللي يهمني الحين أكثر أني مااستسلم للأشياء اللي تركت أثر فيني واثرت في شخصيتي عشان ارجع مثل قبل واحسن ان شاءالله اشتاااااااااااااااااااااق لفاطمه الصغيره :rolleyes: كانت اقوى من الحين ام لؤي شاكره لك اهتمامك وردك الله يسعدك دنيا وآخره : ) |
فاطمة حبيبتي فضفضي اكتر ايش كانت امك تطلب منك لان والله دماغي صارت تودي وتجيب حتى نتمكن من مساعدتك ومساعدتها عالتخلص من هذا الشيء ولازم ترجعي فاطمة الكيوت الناعمة الكبيرة بملامح ضغيرة ناعمة هونيها بتهون وبنتي الله يحفظها بالتانوي ماشاء الله عليها وحاولي صدقيني لها معنى كبير وبتوصل للقلب قبل الراس اكتبي لها كل الي بخاطرك كل شيء مع حنان منك لها مع قسوتها عليك مع كلمات كسر خاطر منها لك مع شفقة مع اشتياق لحبها لحضنها لريحة صدرها للمسة يدها على راسك والله مهما كابرت الا بتاثر كل التاثير وبتراجع نفسها لاتعطيها الرسالة يد بيد بل ضعيها تحت وسادتها وتكون ظاهرة شوي حتى تنتبه والله يوفقك ياقلبي
|
| الساعة الآن 07:54 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©