|
زوجتي بعض الاحيان لاتحترمني تتلفظ علي بألفاظ بذيئه
السلام عليكم يا احبابي في المنتدى
الحقيقه يا اخواني في الله احببت ان استشيركم ولا خاب من استشار لاكن بدون تعصب للمراه ولا للرجل احب الانصاف دائما انا زوجتي بعض الاحيان لاتحترمني تتلفظ علي الفاظ بذيئه وكذلك تتهمني اني انظر الى الخادمه وقد كنت نظرت نظرة سريعه لا اقصد بها النظر الى الخادمه نفسها لاكن اول نظره كما اخبر الرسول صلى الله عليه وسلم او لمحه فهي تشك اني انظر الى الخادمه وانا شخص اعرف نفسي ملتزم ولا اقبل الكلام من احد علي فكانت مره منزعجه من امر ما فقالت لي انت تنظر الى الخادمه مثل العود في دبرها اجلكم الله اي انا مثل العود في دبر الخادمه فانفجرت من الغضب عليها ولطمتها على وجهها جزاء لها وانا ياجماعه انسان قلت لكم ملتزم ملتحي ولا ازكي نفسي لاكن للصبر حدود هي قالت هالكلام من عصبيه بها وانا لم احتمل هالكلام فبكت وقالت ابروح لاهلي وجاء اخوها واخذها وش رايكم وتقول طلقني بعد 14 سنه واربعه اطفال تقول هالكلام وش رايكم وهي شكاكه ولاتحترمني بعض الاوقات مادري من مرض فيها او مادري وش السالفه اشيرو علي وجزاكم الله خيرا \\ |
تم النقل إلى قسم المتزوجين.. |
وعليكم السلام ورحمة الله وبركاته,
اذا الخادمة هي سبب غيرتها الزايدة وهي سبب مشاكلكم فسفرها وريح راسك.. |
ليست المشكلة الخادمة لان الخادمة بالاجره بالساعه وليس عندي اصلا خادمة المشكلة هي انها تتلفظ علي بالفاظ بذيئه ولاتحترمني وانا اغضب واضرب احيانا ضرب غير مبرح ولاكن ردها علي وقح وبشغ جدا لايتحمله الرجل يا اخوان الزوج له كرامه ويجب على الزوجه احترامه والا وش فايده الدنيا تدرون وش الي صاير الان الزوجه تحسب نفسها مثل الزوج بالضبط لازم يراعيها ويخدمها ويقوم بشؤنها وهي اصلا مقصره معه بالتعامل وحسن التبعل وتبي معامله زينه مو معقول ؟؟؟؟؟
كوني له امه يكن لكي عبدا يعني انتي لاتقصرين معاه وعامليه بحسن واحترام وشوفي اذا كان طيب معاك او خسيس انا اعترف انه يوجد ازواج اخساس زوجاتهم يعاملونهم بطيب وحسن تعامل وهم يسيئون لهن ياويلهم من الله لاكن الي صاير معي غير زوجتي تعصب على وتعدى حدودها يعني مره كلت لها جيبي مويه لو سمحتي قالت لا قم جب انت طبعا كانت معصبه قبلها صراحه انا ماقلت شي وقمت شربت مويه لكن ليش هالتعامل وعصيان عشان امر تافه جدا جدا والله لكن اسأل الله ان يخلف علي وان يرزقني زوجته حنونه مطيعه طيبه جميله واهم شي متدينه تخاف الله في زوجها وتتذكر قول النبي صلى الله عليه وسلم( زوجك جنتك او نارك ) وانا اكون لها خاتم في اصبعها لابد ان يتبادل الزوج مع زوجته الحب والحنان والمجاملات والتضحيات والاحترام لاكن يجب ان تبادر الزوجه اولا الى زوجها ثم ترى منه مايسرها ويثلج صدرها \\ والله ولي التوفيق ويصلح احوالنا واحوال الناس يارب |
اخي الحل الوحيد
لاتطلقها وان كانت لديك مقدره ماديه تزوج عليها وخلها في بيت اهلها الين تعرف قيمتك ولكن لدي سؤال طوال ال 14 عام من الزواج هل كانت نفس المعامله ام تغيرت مع الايام حاول تتاكد ان لايكون هناك سبب مخفي مثل سحر او عين او شيء لم تنتبه انت له |
حياك الله انساني ..
بالضبط زي ما قال فارس .. يفرق اذا هي من اول ما تزوجتو وهي كذا ولا تغيرت مؤخرا بس .. وممكن يكون السبب عين او سحر لا قدر الله .. وممكن يكون تراكمات نفسية كبيرة جواتها .. وبعدين انساني .. من المفترض لا شميت ريحة عصبية منها ما توقف وتعطيها الفرصة تهينك .. بكل بساطة عطها ظهرك واطلع من البيت .. يعني انت لا تصلح الخطا بخطا اكبر منه .. بعدين لما ترجع للبيت .. تكون مثلا جايب معك اي شي رمزي تحبه .. (مو دايم) عشان تطيح كل ما براسها .. اكيد تبي تسالك ليش عطيتني ظهرك ورحت .. تقول لها ماحبيت اسمع منك كلام يكرهني فيك ... هذا مثال وطريقة من بين عدة طرق تخليها فيها تخجل من نفسها وتمسك لسانها معك ... بانتظار بقية التفاصيل |
اشكر جميع الاخوة الافاضل على الاراء الطيبه والحقيقه ان المشاكل بدأت معي من زمان بس كانت بسيطه تنهظم لكن من سنه والدعوه دمار الاخلاق نعال الله يكرمكم
|
اقتباس:
اها يعني مو من اول سنوات الزواج ... يعني زوجتك بالاصل ماهي وقحة وردية معدن .. انساني طيب كيف درجة التزام زوجتك بصلاتها وقرائتها للقران ؟ مواظبة ؟ ولا تستثقل هالشي ؟؟ |
احسنت زي ماقلت يالغالي بالنسبه لصلاتها يعني تصلي بس بدون سنن وتأخرها بعض الاوقات ماهنازود يعني لاكن الحقيقه من يوم راحت الشغاله قبل سنه خروج نهائي وهي تعبانه من شغل البيت وهي مره متنرفزه واخلاق زفت وهي اصلا ماتبي شغاله يعني ماتبي نقدم على شغاله لكن تتعب بشغل البيت وتربيه العيال وتدريسهم طبعا العيال اكبرهم ولد بصف اولى متوسط والباقين بالابتدائي وانا مادري وش اتصرف معها ابصبر اشوف اخرتها معي وامي تقول تزوج عليها عشان تعرف قيمتك بس لا تطلقها عشان العيال
|
وعليكم السلام ورحمة الله
اخي انساني ماهي المواقف والاشياء التي تجعل زوجتك تغضب وتتلفظ بهذه الالفاظ ؟ وما هي ردة فعلك بعدها ؟ وكم مرة بالشهر مثلا تصدر منها هذه الاشياء ؟ |
اخوي
انتظر.............. نتائج هاللطمة على الوجه.....ياتنزبط....ياتخربهامعاك.... انت وحظك:d |
اقتباس:
حياك الله اخوي انساني تقريبا تاكدت ان الموضوع مافيه سحر ولا عين مجرد ارهاق مسؤولية وتراكمات نفسية .. تقول انك سبق ضربتها من قبل .. هي بالاصل مرهقة من شغل البيت والاطفال .. وانت بدل ما تحتويها الله يهديك وتحاول تخفف عنها .. قاعد تضربها ..هنا الغلط يالغالي خليكم على الشغالة بالساعات بالنسبة لشغل البيت الاطفال امسك عنها مسؤوليتهم اذا شفت نفسيتها ماتسمح حط العيال كل فترة وفترة مثلا كل اسبوعين عند الاهل واطلعو مع بعض اي مكان عام تحبونه .. نهاية العام سفرية لديرة تحبونها كل فترة وفترة حطها عند اهلها تريح عندهم اسبوع اسبوعين زي كذا يعني عشان ترجع لك بكل حيوية ونشاط .. ياخوي انت محتاج للاشياء هذي بعد سنوات الزواج الطويلة كل ما زادت سنوات الزواج كل مازاد الاحساس بالروتينية والملل .. والزوجين الناجحين هم الي مايسمحون لها تاثر على حياتهم بانهم يجددون اسلوب حياتهم وتفكيرهم .. ان شاء الله يكون كلامي مقنع لك |
أنا مع كلام الإخت روعة المعنى ..
بس أول شي لازم تتأدب بس لا تطلق عشان العيال فعلا، هي مهما كان أم عيالك وغيرتها هذي لأنك زوجها وتحبك. استخدم معاها الطريقة الإسلامية في التأديب مثل الهجر في المضجع والضرب الغير مبرح حتى تتأدب. أنا حتى مو مع إنك توديها عند أهلها. اطلب من أحد عيالك يكلمها بالتليفون ويقولها ماما رجعي نبغاكي ترجعين البيت، وأكيييييييييد راح ترجع لأن عيالها راح يكسرون خاطرها. ولما ترجع، خلك ثقيل عليها عقابا لها على لسانها الطويل، اهجرها بالمضجع، وإذا كررتها استخدم الضرب الغير مبرح حتى تتأدب. وإذا تأدبت، يكون يبغالكم رحلة اسبوع اسبوعين بمكان هااااااادئ ورومنسي تستعيدون فيها ذكريات الماضي الحلوة وتجددون حيوية زواجكم. هذا رايي والله يهديكم ويصلحكم حق بعض ويصلح ذات بينكم |
اخي العزيز اول شي احب ابدأ فيه ردي لك ايااااااك ان تطلق زوجتك وام ابنائك بعد هذه العشره الطويله لايغلبك الشيطان ابدآ .. فكل ماحصل لك يحصل في اغلب البيوت سوآ لأجل خادمه او لأجل امرأه بالشارع .. وازيدك من الشعر بيت انا الحين متخانقه مع زوجي بسبب موضوع مثل كذا ودايمآ اقوله ودني بيت اهلي وطلقني لكن الحمدالله زوجي رجل عاقل وحكيم مستحيل يطاوعني لو بيطاوعني من زمااان كنا منفصلين .. ولهذا جعل زمام الأمر والطلاق بيد الرجل وليس المرآه .. وهي مجرد فترة زعل وغضب لانك ضربتها ومن حقها تزعل وتغضب .. الضرب مو شي سهل ابدآ وبالذات الضرب على الوجه محرم اصلآ .. وابي اقولك شغله مهمه ترى النظره الاولى لاتجوز اذا كنت تعرف ان في المكان أمرأه لكن حللت النظره الأولى اذا الواحد بيتقصى عن شي وامامه مجموعه من النساء ويريد البحث عن امر معين يجوز له النظره الواحده لكن يجي رجال وعارف ان هالمكان فيه حرمه ويناظرها ويقول هذي النظره الاولى !! عمومآ يااخي اوصيك بأن ترسل لها رسائل على جوالها انك لاتستطيع الاستغناء عنها وان البيت بدونها مظلم وانكك فاقده وانها احلى شي بحياتك وان هالشغاله وكل حريم الدنيا مايسوون اصبعها وكلام حلو بأسلوبك وطريقتك ارسله لها وماراح تلقى رد منها لكن استمر وواصل في الارسال واعتذر وقولها لو بيدي اقطع يدي اللي نمدت عليك كان قطعتها يااخي ترى المرأه مثل الشجره كل ماسقيتها من الكلام الجميل تثمر لك وتعطيك .. اذا مالقيت اي رد منها خذلها هديه جميله وروح لاهلها وقول ابيك اشوف ام عيالي ابي اتكلم معاها لوحدنا واذا رفضت وسط ابنائك بينكم وقولهم قولوا لماما ان بابا يحبك بالمره ويبينا نرجع للبيت البيت صار موحش وكئيب .. اذا حسيت تمادت واصرت على الطلاق اعرف انها تمادت بالدلال والتغلي ولابأس تحمل تغليها من حقها ضاربها .. اهم شي لاتقطع المصروف عنها وعن ابنائك وقولها لاتحطي راسك براس شغاله ماتسوى اصبع من اصابعك انا نفسي ماتقبل غيرك ابدآ وهالكلام بيجيبها باذن الله
|
استغرب حقيقه من اللي يقول زوجتي ماتحترمني !!
واحد من اثنين : اجبرها تحترمكـ مو بالضرب .. لا ابدا بتعامل واضح خليها تحترمكـ اول شي ارسم لها خطوط حمرا ماتتجاوزها واذا تجاوزتها .. لاتتهاون ابدا وفي نفس الوقت اذا تعبانه من شغل البيت ...... ياخي ساعدها مو عيب سيد البشر صلى الله عليه وسلم كان يساعد اهله في عمل البيت ( بما معنى الحديث اذا ضاق صدرها ... خرجها من البيت .. ياخي المرأة هذه امانة في رقبتكـ .. وانت مسئول عنها انت راعي عليها ومسئول عن رعيتكـ .. اعطيها حقوقها وخذ حقوقكـ مو لازم هي اول تقوم بحقوقكـ .. خلك انت البادئ في الخير .. ولا تقدم الخير بضعف .. قدمه باحترام وتقدير ,... وبدون منه واذا قصرت : قولها ترى لو تكرر مايصير خير .. وعلى قولتهم : خلك ماسك شعرة معاوية اذا شدت ارخي .. واذا رخت انت شد لاتقسى عليها باستمرار .. لانها بشر يجري عليها اللي يجري على الناس كلهم ... تمل وتتعب وتحتاج لضم الصدر ومالها (بعد الله ) الا زوجها .. والله يحفظكم ويبعد الشيطان عنكم |
واذا ماقدرت تجبرها تحترمكـ
.. كان الله في عونكـ .. |
هالحين انت انسان كامل؟؟
وتقول عن نفسك ملتزم بأي حق (هو أعلم بمن اتقى)..وفي الحديث الصحيح بما معناه (مامن شيء اثقل في ميزان العبد من حسن الخلق). عشرة 14 سنة هذي آخرتها معك؟؟ الحرمة لها احتياجات وتمر بتقلبات وضغوط يفترض انك تكون سندها بهالدنيا وتتحملها وتكون سترها وغطاها مهوب تروح تشكيها لامك (الحكيمة) اللي بدال ماتسطرك على وجهك تقول تزوج أدبها !! يعني حرمة انلطمت على وجهها عقب هالعشرة وش تبيها تسوي تروح تجيب لك كاس عصير وتسوي لك مساج ! عمر رضي الله عنه زوجته ترفع صوتها عليه نقص من مقداره شي؟؟..من أنت ومن تكون قدامه اللي لاسلك طربق الشيطان سلك طريق آخر من هيبته عيب وربي عيب تترنم بمكارم الأخلاق وماشفت عيوبك يكفي كلمتك بسياق الردود(نعال) مستواك اللفظي واضح واللي حولك أوعية تنضح باللي تنطقه..زوجتك كانها تغيرت مع الوقت فهي تطبعت باطباعك ومن عاشر القوم صار منهم وانا متعاطفة معها كثير وربي يعوضها بواحد افضل منك قاعد تدعي لنفسك بالزوجة(الخورافية) كأنك كامل مكمل ! وخير ياطير قالت تشوف الشغالة !! يااخي حرمه ماتفهم كيف تفكر الحرمة !! قل لها حبيبتي انتِ فاهمة غلط واسكت مهيب مرجلة تستقوي على حرمة ما أكرمهن إلا كريم وما أهانهن إلا لئييييييم وسلم على امك وقل خافي ربك ببنات الناس |
امكن يااخي من الضرب زوجتك طفشت والله اذا زوجي مد يدة علي والله امووووت من القهر واكره كرة موطبيعي اقول سو اي شي بس موضرب والله يوفقكم
|
شوي شوي ياجماعة ياطيبتي ضيعتني الحين انتي تزكين نفسك انك طيبه هو اعلم بمن اتقى يمكن الطيبه يمين وانتي يسار باين من نقدك انك طيبه اشوى انك مو زوجتي يامتعصبه اقولك انا طبعا نادم اني لطمتها والمفروض اني هجرتها او عالجت الامور بشي ثاني لكن مو معناه الي قالته شي بسيط انا اتوقع ان خطاها اكبر من خطاي بكثير هي الي خلت اعصابي تفلت مني لو قالت ياحمار ياكلب ترى ماقول شي يمكن ازعل لكن تتهمني وتدوس كرامتي بالارض كذا لا وانا طيب جايبلها طلباتها الخاصه من السوق وتقولي كذا بدال ماتقول جزاك الله خير يابوفلان تسوي كذا اصحو ياناس ترى فيه عقوق الزوج مثل عقوق الوالدين من باتت وزوجها غير راضي عنها تلعنها الملائكه حتى تصبح ومن ماتت وزوجها غير راضي عنها لم ترح رائحة الجنه وقوله زوجك جنتك او نارك كلها احاديث صحيحه اصحو ياعالم ياناس لازم كل يعرف حقه ماتخافون من الي شرع هالامر ماتخافون من النار صار ت الدعوه انانيه انا لو سبيت اخوي وانا رجال اخوي الكبير لو اهنته اهانه قويه وصفعني كان تراجعت وحبيت راسه لاني انا الغلطان
لاكن الله يصلح الاحوال وفهمنا وش الي لنا وش الي عليها يارب فهمنا فهمنا الدين والحقوق |
اقتباس:
غاليتي ..... هدي شوي مثل ما يقولون الصبر له حدود وش تتوقعين ردة فعل غير اللطمة لما يسمع مثل هالكلام من زوجته ؟ هذه كلمة تنقال لرجل عاشت معه 14 سنة؟ و هو إنصدم منها لأنه متوقع إنه بعد كل هالعمر تكون زوجته عارفة أخلاقه زين و مستحيل إنه يراعي لشغالة و غير الشغالة! و الصبر له حدود يالغلا لأنها سبته مرة و إثنين و عشرة و سكت لها ( المفروض من أول مرة سكتها ) |
| الساعة الآن 10:18 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©