|
غلطـــتي انـــت
أبغى أفضفض من زمآآآآن
بس خوفي ان تطيح فضفضتي بأحد يعرفني هنا وينشرها بس اليوم ضاقت فيني الوسيعه وقررت اني انثر كل همي ادري قصتي طوييييله واللي بيمل اقول له من الحين الله معك لاتقراها بس انا احس اني بديت أنهااااااار انا تزوجت قبل سنه ونص تقريبا زوجي مشكلللللللللللته الاولى ان ماعنده غيره والثانيه انه يقدس اخوياه تقديس رووووحي يعني هم كل شي بحياته ومشكلته الثالثه انه مايقدر ابد ابد اول ماتقدم لي طبعا دريت انه يشتغل بمنطقه بعيده ورضيت على - اني اشتغل -اني انقل معه قلت مو مشكله عادي انقل معه اهم شي نكون سوا بعد زواجي على طوووووول حملت وطبعا بعد شهر العسل رجعت بيت اهلي لأن ماعندي شقه خاصه فيني وهو بمنطقة شغله طبعا اتفاقنا من البدايه انه هو برضه يحاول ينقل لأنه اولى بالنقل علشان الاهل وكذا ... واذا انا نقلت له ماراح نطول هناك يعني اذا كثرنا 5 سنوات وبيدور اي وظيفه هنا بمنطقتنا جنب اهلنا على طول انا قمت ادور على حلول النقل واشوف البديل واسأل وأفرفر ويعلم الله اني كنت ابغى انقل في فترة حملي كنت اتعب مررره جسديا لان شغلي طوووويل ونفسيا لانه بعيد عني ومحتاجته طبعا اذا جا ويكند من ايام ماكنت مملكه عليه كان ينام عندنا ببيت اهلي معزز مكرم ماكل شارب نايم وفوق هذا ماقط طلبت منه فلوس والا نفقه واهلي يعرفوني عزيزة نفس كان اذا جا ...يا مع اخوياه ...او معي وجالس عالنت ...ادري مو مواقع اباحيه والا شي بس افلام اكشن وهالخرابيط وطبعا ماينسى اهله احيانا يطلع معهم ويتركني ويتمشى معهم وانا اللي محتاجه اغير جو اهله بعيد عن منطقتنا ساعتين احيانا يجي الربوع على طول اروح معه منطقة اهله مع اني تعبانه من الدوام مامداني ارتاح ... وطبعا اذا وصلنا منطقة اهله اكون هلكانه اروح انام يقول انتي كله نايمه ومو معطيتني وجه واهله ماعندهم شغاله وربي انا اللي اقوم اغسل وانظف ببيتهم واحيانا خواته يجلسون رجل على رجل كنت اتمنى ان تكون عندي شقتي الخاصه اللي البس فيها على راحتي واسولف على كيفي بس قلت مو مشكله انتظر النقل وانا بالشهر السادس جاني خطاب بالندب الى منطقته وكلمته وقلت له يافلان ترى الخطاب وصل قال انتي تبغين تجين ؟؟؟؟ قلت انت تدري ان نقلك انت بيكون احسن لنا احنا الاثنين وتدري ان ماودي لكن انا اذا بنقل فعلشانك لأني ابغى اكون معك قال انتي الحين ثقيله وبتولدين انا اشوف انك تظلين احسن وانا اللي بحاول انقل طبعا انا فرحت مررره قلت ترى مو كل مره بتجي الفرصه مو تقول بعدين نقلي وحاولي لان الحين مراعين ظروف حملي فقط قال لااااا وعد مابقول وانا اللي بنقل مرت الشهور وبقى على ولادتي كم يوم وكنا متفقين على اسم معين نسميه المولود فجاه كلمني بيوم وقال يافلانه الاسم ترى الاسم مابسميه الولد ...ليه ؟؟وش حصل ؟؟ قال خويي فلان يقول ( مو حلو ) طبعا صارت هوشه على هالسالفه بعدها اختار اسم ثاني وقال خلاااااااص ....بنفس اليوم الظهر قال اكتشفت انه قديم بعدها ولدت وانا بالمستشفى وقيصريه وهو يهاوش الا يبغى الاسم اللي في باله( اخيرا اختار اسم ) وانا ابكي وتعبااانه وهو يهاوش اخر شي قلت اوكي بس بشرط ماتقول لي نقلي وتعاملني احسن من كذا قال موافق ... يوم ثاني طلعت من المستشفى وهو راح لاهله ...شوي كلم قال خلاص بغير الاسم ...جدي يقول مو حلو لحوووووووووول انا مالي خلق افتح سوالف فجلست اقنعه بالاسم مع اني مو مقتنعه بس احاول اقوي ثقته بنفسه.... طبعا في فترة ماني بالمستشفى ....واللي ولدت قيصري تعرف مقدار الالم والوجع اللي لايطاق كنت اتمنى مثلا انه يمسك يدي والا يسولف معاي كان يغمى علي من الوجع لما كنت احاول امشي والممرضه تمسكني وهو يقول عادي كله دلع ... من اول ماحملت ترى وهو يقول الحمل مو مرهق بس انتي تتدلعين ...كان يمر على المطبات بسسرعه اقول خفف يقول انتي تتدلعين المهم جبت هالولد اللي اخذ عقلي ودنيتي كلها وصار هو يجي ويروح علي نسيت اقول لكم بعد الكلام والصياح اخذ لي شقه... بس اغلب الاثاث مني ومن ابوي هذا اذا ماكان كل الاثاث ..هذا غير انه كان بياخذ وحده بالطابق الرابع بدون اصنصير وملحق وبعمارة مع اخوياه <<< كملت بس بعد التوسل اخذ هذي ومشت الايام وانا اللي كنت اعتبر ام وابو الولد لأني انا اللي كنت اصرف عليه والعب معه وبس يقول الاه انا اللي اكون جنبه هو يجي يطلع ينام يجلس معه شوي بس بالليل مايعرف احد يبغى ينام في فترة خطوبتي كان عندي بعثه من عملي وكنسلتها طبعا علشان زواجي وبعد الزواج ومع محاولات النقل كان يقول لي قدمي اوراقك ..واقدم وبعد اسبوع يقول لي كنسلي ..هالحركه صارت 3 مرات والمره الاخيره قلت نرى هالمره مابكنسل لاني بختبر توفل وترجمه واوراق وتعب ... قال اببببببببببد صااامل وتحمست مررره قال عالاقل اطور روحي وارجع واتوظف قريب وفعلا اختبرت وانا حامل بنص التاسع اربع ساعات ونص تكسر ظهري وظليت يمكن 9 شهور وانا مابين توصيات وترجمه وحاله وتجهيز اوراق( يعني من كنت حامل الى مابعد الولاده ) بعدها هو جاته وظيفه هنا قريب بس راتب ضعيف ...امه كانت تتصل تحاول تقنعني ان اقنعه انه مايوافق عليها وانها مو مضمونه وكانت تقول ترى اذا فصلوه مابنصرف عليكم << شدعوه طلبناكم المهم هو اخذ رايي بالوظيفه قلت له بصراحه راتبها قليل وبعد حسبه بسيطه اكتشفنا ان راتبه كللله بيروح عالديون ومابيبقى الا 80 ريال قلت له انت بكيفك بس زي منت شايف راتبك ضعيف قال كلها كم شهر ونطلع ابتعاث قلت اجل اللي يريحك وبيوم اسود حتى اذكر انه كان ليلة خسوف راح جلسة اخوياه وطول وجا ويوم ثاني قبل لايروح منطقة عمله قال يافلانه ترى مابقبل بالوظيفه ...قلت اللي يريحك ...قال ومافي ابتعاث ...قلت ليييييييييييه ؟؟؟ قال انا فكرت زين واشوف اني اظل بوظيفتي اصرف لي .... قلت والنقل ؟؟ قال لا انتي اللي بتنقليييييييين ..... انا مررره انصدمت ... قلت انت اللي وعدتني وكذا وانت اللي قلت ان حنا حتى لو نقلنا مابنطول هناك قال مافيها شي نجلس الى سن التقاعد ... انا قمت اصيييييييح خلاص قفلت عندي ونزلت وزعلت عرفت على طوووول انه من جلسة اخوياه ومر اسبوع ولا دق ولا حتى سأل عن الولد بعد اسبوع جا والاخلاق تجاريه وكلام يسد النفس وانا يوم شفته كذا برضه خليته على راحته ولاكلمته بالموضوع نهائي مرت الايام وهو نفس الشي طول الاسبوع مايسأل واذا جا قافله معه ومره جلسنا وتناقشنا وعصب وعصبت وماطلعنا بزبدة حكي قبل 4 شهور ونص تقريبا اهلي امي وابوي سافرو علاج برا ...وهو يدري اني انا اللي بمسك البيت وخواتي الصغار واخواني بالاضافه للدوام وولدي وطبعا ويكند اكون معه احد الويكندات وبالضبط قبل 3 شهور وشوي كنا جالسين وهو قال خل نتفاهم وعلا صوته وعلا صوتي هو دايم يردد انه ننفصل احسن ...اقول له حنا مو كنا متفقين نطلع ابتعاث قال فكرت زين واستشرت ...اقول له اجل ليه تخليني اختبر وش هالسؤال اللي ياخذ سنه ليه ماقلت من اول يقول عادي مافيها شي فكرت عدل.. طيب والوظيفه اللي هنا ليه بطلت عنها ...تخيلو وشو قال قال انا يوم قلت لك وكنت ادري ان راتبها ضعيف ويوم حسبناها مابيطلع لي منها بعد تسديد الديون الا 80 ريال ... قلت يمكن انتي بتقولين انو عادي انا بصرف عالبيت ...انتظرتك تقولين ماقلتي عطيتك فرصه كم يوم ماقلتي فقررت اني ابطل <<< امحق عذر قلت وش هالتفاهه ... تبغاني يعني اسدد اجار الشقه واصرف عليك واسدد الفواتير واصرف عالولد واعطيك للبنزين غير المصروف الشخصي واجي البيت اطبخ واغسل واكنس ... اجل ليه تزوجت من البدايه ؟؟ قال بترضين تعطيني بطاقتك الصرافه ؟؟؟ قلت طبعا لااااا .... قال شفتي ؟؟؟ اجل مابنقل وانتي اللي بتجين جيت انا قلت له خلاص بسافر بروحي اجل مااشوف الا قام وضربني ضرررب وسبني وسب ابوي انا قمت ابكي ودخلت الغرفه ابكي ومن القهر دقيت على امه اقول لها مو معناته ان اهلي مسافرين يقوم ولدك يتقى علي وانتو مااخذتوني علشان تعذبوني قامت تقول انو اكيد انتي الغلطانه وذلي روحك لزوجك والحرمه تذل روحها لزوجها عادي طبعا من يوم الربوع المغرب الى الجمعه العصر مااكلت ولاااااشي بس بالغرفه وهو صار ينام بالغرفه الثانيه وبعدها راح منطقة شغله ... انا ماقدرت اداوم علشان يدي لفيتها وظليت بالشقه ويوم جا الربوع ماشفته الا دخل علي ...بالعاده يكلم ياخذني من بيت اهلي هالمره جا الشقه طوالي ...شافني كنه شاف جني قال انا ماقلت لك تعالي ...وليه انتي هنا؟؟ وماابغى اشوف رقعة وجهك هنا ومن بكره انتي ببيت اهلك نام بالغرفه الثانيه والخميس الصباح راح لاهله طبعا انا رحت بيت اهلي ولاااادق علي ابد ولا سأل عن ولده ولا عني وهو يدري المسؤليه اللي علي هالفتره قبل تقريبا شهرين كنت رايحه مناسبه مع خواتي وشفت امه قامت قالت جيبي الولد ابوديه البيت وبجيبه لك بعدين طبعا انا عييت خفت انهم مايرجعونه لانه دايم يقول لي انتي ام مو كفو وباخذه منك .. <<<< انا مو كفو وانا اللي ربيته بروحي وينك انت يوم احتجتك وقلت لي مشغووووول اتحداك تعرف وش يحب ياكل كيف يحب ينام اي لعبه يحبها اكثر .... كنت اروح الدوام مواصله لاتعب او مرض كنت اقول له بس ابغاك تقدر ماابغى منك شي يقول لي هذي وظيفتك وكل الامهات كذا اقول له ادري بس كل الازواج يقدرون قبل اربع اسابيع تقريبا رن جوالي رقم خاص كان يوم احد ... رديت الا واحد يقول لي تعرفين فلان قلت انت منو قال تعرفينه ؟؟؟قلت زوجي انت منو ...قال ماسكته الهيئه مع بنت...انا دارت فيني الدنيااااا وربي يوم ثاني ادق على دوامه يقولون لي مجااااز ... ادق على جواله يطلع مقفل ...المهم اسبوع كامل مدري وينه ولاقلت لاحد الا اختي اختفى الاحد الى الجمعه رحت الشقه اباخذ شي لقيت انها ماتحركت يعني ماجا فيها ابد ..السبت دقيت عالدوام سمعت صوته وقفلت جا يوم الاربعا وانا ماكنت مداومه كنت تعبااااانه موووت وظهري والنفسيه وكل شي رن تلفون البيت الساعه 8 وشفت رقمه وخفت ... رد عليه اخوي ..]قول له ابجي اخذ الولد اربعا وخميس وجمعه |
اخوي قال لي طبعا رفضت .. قلت هو طردني من شقتي اذا يبغى يجي يشوفه هنا ... قال اخوي حياك بيتنا تشوفه ...كان يدري ان اخوي بيطلع ..اخوي اصغر مني ماعندي اكبر مني جت امه واقفه عالباب سلمت عليها بأدب قلت لها تفضلي قالت مستعجلين جيبي الولد قلت لا مايطلع مع الباب اذا بتشوفونه حياكم معززين مكرمين ببيت ابوي قالت ابوه ومن حقه قلت توه يتذكر ان عنده ولد ؟؟؟الحين صار من حقه ؟؟؟ماقلتو من قبل ان من حق الولد بعد ان ابوه يصرف عليه ؟؟ليه توكم تتذكرون الحين؟؟قالت انتي ماتردين عليه اقول لها حلفتك بالله هو دق وانا مارديت؟؟؟هو ارسل مسج عالاقل (كيف الولد ؟ ) وانا مارديت عليه ؟ قالت لا ...بس انتي موراضيه يشوفه ...قلت لها هو طردني من الشقه قالت طردك انتي بس مو ولده ..<<< لاتعليق قلت انا مامنعته ابببببد انه يشوفه بس ببيت ابوي...مو هو اللي قال مالي تفاهم معك ؟؟ مو هو اللي قال روحي بيت ابوك ؟؟؟ اجل يشوفه هنا المهم شوي كلمت ولدها الا جا مثل العصار معصصصب يقول يب ياخذه مني وطووول لسانه تخيلو ببيت ابوي يقول لي ضفي وجهك ودخلي داخل موب طايق اشوفك والله شين وقوي عين المهم قلت لا مايطلع من هنا ... قال كيفي ...قلت ماامن عليه عندك تضربه زي ماضربتني قال اربطك واضربك واضربه ومن حقي واذا ابوك مارباك انا اربيك وامه واقفه زي الصنم بس حدها تقول ترى بنشتكي عليكم والمره الجايه بنجي مع دوريه نشوفه ومن هالحكي جلسو معه دقايق بعدين قال يلا يمه قومي لاعت كبدي ابغى اطلع وامه تهذر انو حرام عليك خلينا ناخذه وبنرجعه الربوع والولد يبكي بيدهم اقول لهم توه ...متعلم علي يخاف ينام بدوني...عمره 11 شهر بس ...صعبه ليلتين بدوني...امه تقول حمدي ربك هو مدلعك حط لك شقه <<< يعني بنات الناس بالشوارع ؟؟؟بديهي اللي تتزوج لها شقه وانا كاتبه من الشروط سكن مستقل وبعدين تقول كلللل الناس حاااااااااسدينك عليه بوسي يدك وجه وقفا <<< يعني انا البايره وهو يدري اني اخترته على اثنين معه مالت علي من اختيار وحنا بنزوجه وحده احسن منك واشرف منك <<< تخسون تقول ليه مارضيتي تنقلين معه ليه مو راضيه ؟؟ اقول لها مو بكيفي مو بكييييييييييفي لازم اجيب بديل وانا بديل ماعندي والندب يوم جا هو رفض ..قال هو رفضت لانك انتي ماتبغين << سبحان الله وكمل .. وجاتني وظيفه هنا وانتي اللي خفتي على فلوسك ومارضيتي .... وانا والله والله قلت له بكيفك بس للامانه قلت له كيف بنصرف ؟؟ المهم اخر شي قال لامه لاتكلمين هالاشكال الزباله خلينا نطلع انا عصبت قلت له انا الزباله ياحقير ؟؟ كنت واقفه عالباب وهو مقفي ماشفته الا بيرجع انا كنت ماسكه الولد وابغى اهرب ادخل الصاله قلت خواتي في مابيدخل... خواتي بالصاله كاشفات ...والشغاله ...دخل علي ومسكني مع شعري وانا خايفه عالولد لايطيح من يدي رفسني ببطني انا من الالم طحت وابغى بنفس الوقت احمي ولدي اضطريت اني احميه بجسمي لايجيه شي ...وهو كان بكل قوووووته وبرجله يرفس والله لو يهوديه ماسوالها كذا يشد شعري ويرفس وضرب بكل قوووته ويقول يااااااااااابنت الكلللللللللب الله يلعن امك سب في امي وابوي مااحترم حرمة البيت ودخله بغيابهم ... امه زي الصنم واقفه اللي رحمتني الشغاله جت وخواتي مع انهم كاشفات جو يبغونه يوقف بس مهما كان بنات مايقدرون يسوون شي بعدها اخوي اللي اصغرررر مني جا كان نايم وباعده ...اخوي مسالم مساااااااااالم ماقال له شي انا خلاص حسيت اني انتهيت ...ابغى اتحرك مو قادره ...وهو اسمعه يألف قصص برا على اخوي يوم ثاني كلم اخوي يقول له قل لاختك قلها تاخذ اغراضها انا الشقه كنسلتها وباخذ الاثاث طبعا انا عصبت قلت والله وققققح ماياخذ شي هو ماشرى شي كل اللي شراه مكيف الويندو والتلفزيون القديم اللي جابه من بيتهم فققققققققققط وكم صحن بالمطبخ المهم تفاهمو هو واخوي انه يعطينا فرصه مو بنفس اليوم وهذاك رضا ...وقال له اخوي خذ اللي شريته وخل اللي لنا ...طبعا جواز ولدي معه مارضى يعطينا اياه .. بعدها بيوم رحت الشقه اب اشوف وش سوو فيها طبعا غرفتي مفتوحه والدواليب مبيييييين ان احد فاتحها وشايف اللي فيها ملابسي الداخليه وارواب النوم وتخيلووووو ... خلى اللي لي بس بعد ما خربه يعني زي الكنب شققو المخدات وعدة المطبخ كللللللللها اخذوها مع انه ماشرى الا الصحون والملاعق ....حتى في مواعين من بيت اهلي اخذهم....تخيلو حتى الصابونه الحمام ...وانتو بكرامه حتتتتى الفرشاة تبع المرحاض تكرمون اخذها ... حتى الشامبوهات انا شرايتها واللوشنات والشور جل هو مايعرف هالاشيا كلهم اخذهم ...حتى نعااااااااال الحمام وانتو بكرامه يعني عيب ليه الرزاله والبخل حتى الكورن فلكس الحمد لله ربي واعواد الاذان والله والله حتى القصدير اخذوه عمرهم ماشافو خير جلست افكررر خلاااص ذبحني التفكير ...صحيح ماسكته الهيئه ؟؟ اقول لا مستحيل ..بس لما اجلس افكر فيها ...اجل ليه ماجا اسبوع الاجازه وفضى الشقه لييييه الحين ؟؟ حتى شكله لما جى بيتنا كان مره مبهدل كنه سنه ماحلق اختي تقول يمكن خافو يوصلنا خبر قالو نجي بسرعه نسوي اي سالفه علشان يقولون انو هم اللي مايبغونك مو انتي اللي ماتبغينهم علشان عرفتي سالفة الهيئه ..يعني يتغدون فينا قبل مانتعشى فيهم ليه فجأه تذكرو الشقه وان عندهم ولد لازم يشوفونه ؟؟؟ وليه اختفو بعدها ؟؟ وبعدين جيته فجاه كذا وبسرعه حتى ماارتاح على طوووول وكيف امداه يمر على اهله... بالعاده يوصل عندي 8 ونص ..9 الا هالمره ماجات 8 الا هو هنا ...تقول يمكن كافلينه وكانو معه طول هالاسبوع لان اخته بعد ساكنه هناك وجاو بالمره معه .. طبعا من بعدها اختفو ... لا سألو عن الولد ... ولا حتى جابو طاريه .. هذا اسبوع رابع من السالفه ويييييييين اللي يقولون من حقنا ومن حقنا ... اما سالفة الغيره.... هو من بداية خطوبتنا يقول لي ماابغاك تتغطين عن اخواني وخوالي وعمامي يعني عاي اقول له مو متعوده استحي ...يقول تتعودين هذا فلانة زوجة خالي ماتتغطى طبعا اذا اجتمعو قسم بالله اصير كني اصبع سادس خلااااااص مو مرتاااااحه مره يوم كنت مملكه قال ولد خالي عازمنا عالعشا بالمطعم الفلاني ...قلت اوكي فرصه اتعرف على زوجته طبعا لبست ورحت معه ووقفنا السياره وقبل ماانزل قال ترى كلنا على طاوله وحده قلت لااااااا انتو لحال واحنا لحال قال لاتصيرين كذا خلك عادي .... والله خلااااص مو مرتاحه تخيلو طاوله من اربع كراسي طبعا الطاوله مربعه ... انا ويميني زوجي ويساري زوجته مين اللي بيكون بوجهي ؟؟؟؟؟؟؟!!!!!!!!!!! خلااااااص مو عارفه حتى اكل وهو عااااااادي حز بخاطري ومره قال اختي عازمتنا عالعشا ومن الحين بقول لك ترى على سفره وحده والله حتى مااخذ رايي القهر ان امه كانت جنبنا اقول له استحي تقول لامه عاااااااادي زي اخوك تخيلو هو واخته وزوج اخته سوالف وانا سااااااااااااااااااااكته فيني غبنه وهالكلام مو من بعيد يعني يمكن7 شهور ومره صارت هووووشه معه الا يبغى نطلع رحله مع ولد خاله الزفت مال ابو المطعم ...انا كنت حامل وتعبااانه قلت اوكي اذا تبغى نطلع نطلع ..قال كلنا بسياره وحده قلت لا هذي صعبه انت تدري انا ماارتاح مع احد وبرضه ظهري بسيارتنا عالاقل احط الخداديه او ارجع الكرسي ورا اما معاهم بستحي واصلا كراسي اللي ورا مايرجعون هذا غير اني مابقدر اتكلم وصارت هووووووووشه بعدها ولد خاله صار عنده ظرف وبطل هذا غير الهندي اللي شافني وهو موجود هذي مابتكلم عنها لاني جلست ابكي عليها اسبوع اما عن التطورات اللي الحين فــ امي وابوي ماااااااااادرو ابد ابد ماقلت لهم اللي فيهم كافيهم بلعت الهم بروحي وانا بطبعي كتووووومه مااحب اقول لاحد حتى خوياتي ماقلت لهم كل يوم اروح الدوام وانا ارسم الابتسامه على شفاهي واسوي روحي ان مافيني شي وبس يخلى المكان تطيح دمعتي ... لاتقولون خوالي وعمامي .... عمامي مالنا علاقه فيهم وخوالي ماابغى اشغلهم انا بس كل ليله احط راسي عالمخده وولدي على ذراعي واناظر فيه ...احبه مووووت ومقدر اعيش دونه وينه ابوك لما حبيت ثمن بديت تخطي ثمن طلع لك اول ضرس ..وينه ؟؟ لو تروح عني امووووت انت كلي كللللي قل شسوي دونك ؟؟؟ احاتي بكره واللي بعده واللي بعده كل يوم اروح دوامي وانا يدي على قلبي لا يجون ياخذونه وانا بعيده عنه كل ليله عندي هم ... اقفل الباب مية قفل واناظر النوافذ وبس يرن التلفون قسم بالله قلبي يخفق خايفه بكره لا جاو اهلي يلوموني ويغصبوني ارجع له خايفه بعد بكره لو تطلقت بيكثر القيل والقال والكلام اللي يهد الحيل خايفه من الايام .. لا كبر حبيبي قلبي وصار من حق ابوه انه ياخذه وانا صرت بروحي بدونه خايفه من السنين ... لا كل واحد استقر ببيته وانا زوجت ولدي وظليت أغزل الهم بروحي فضفضت كثيييييييييير بس ارتحت ؟؟؟ مدري اقلها فضفضت اسفه طولت عليكم |
طيب انتي عاوزة ايه؟؟
عاوزة ترجعي المية لمجاريها ولا خلاص طلاق ؟؟ |
اختي
لازم تخبري ابوك وامك ولا تتردي في طلب الطلاق لانه ما فيه خير ولا تخافي الحضانة الك الله يعينك شو هاداااا في ناس هيك لا اله الا الله |
أختي الكريمة .... كان الله في عونك هذا أول شيء
أتمنى الفضفضة تكون ريحتك وبعد كذا ياليت تقولين لنا أيش اللي في بالك قبل ما نعطيك آرائنا وخصوصا اذا كان عندك رغبة في العودة له من أجل ابنك في حال اعتذار زوجك أو أن هذه الرغبة غير موجودة؟؟ كم تبقى على رجوع والديك من الخارج؟؟ |
لا حول ولا قوة إلا بالله يارب رحمتك وش ترك من اخلاق اليهود؟؟!! ياأختي كان الله بعونك هذا ماينعاش معه ابداً وبعدين ولدك شرعاً بحضانتك الى سبعة سنوات وبعدها يخير بينك وبين ابوه واكيد بإذن الله بيختار امه اجل بيختار هالوحش هذا؟؟!! هذا مالقي رجل يوقف بوجهه ويأدبه وانت لا ترخصين نفسكِ الله يعينك على بلواك |
لاحول ولاقوة ألا بالله
أيش الرجال هذا !!!!!! الله يعينك على بلواك ويحفظ لك أبنك ولايحرمك منه بس لازم أحد يوقفه عند حده لأنه تمادى!!! وهو ماتمادى ألا لانه عارف ماأحد بيقول له شي !!! لازم تقولين لأهلك والمفروض قلتيلهم من أول عن كل شي عشان يكونون عارفين كل شي أستغفر الله العظيم نرفزني هو وأمه!!!!!! |
وربي مقهورررررررررررررره على قصتك ، مدري وش أقولك ، بس تأكدي أن الله يمهل ولا يهمل ،
وصدقيني الله راح ياخذلك حقك منه ، حبيبتي : لو تكلمين الوالد أفضل ، لازم يشووف أنه وراك نآس ، أجل مستقوي عليك !! ويمد يده عليك وف بيت أهلك !! :( الله يصبرك ويفرجهآ عليك ، |
قصتك ضايقتني جدا جدا
تعرفي أختي الغلطة صارت من البدايه تساهل وتضحيات ما لها داعي ومن الاول تزوجتي وأنت مو عارفه وين مكان سكنتك لا بيت ولا شقه ووافقتي أنه يظل معكم في بيت أهلك هذا غلط كبير لأن مثل هذا يتمادى في كل الامور أعرف قصه قريبه من قصتك ولكن طبعا ما يجروء على ضربها أو سبها أقول لك أختي لا ترخصين نفسك حافظي على كرامتك وأول ما يوصل أبوك خبريه بكل شيء خليه جاد وحازم معه الله يحفظك ويفرج همك |
شو اللي صاير ببعض الرجاااااااااااااال قصدي اشباه رجال
الله يعينك بطاقة الصراف لك وحدك ومن ثم طفل عمره 11 شهر كيف ياخذوه المفروض يشوفوه بوجودك |
كان الله بعونك اختي..
والله من بعد قراءتنا للمواضيع في المنتدى عن طمع الازواج، ارى ان المراة الموظفة وظيفتها نقمة عليها... ماذا دهى الازواج؟؟؟؟ جشع وطمع واستغلال.... يريدون من زوجاتهم ان يصرفو عليهم... لا حول ولا قوة الا بالله.. حفظ الله لك ولدك وادامة الشمس التي تنير حياتك... |
لا حول ولا قوة الا بالله,,انشاءالله انك بعد هالفضفضة ريحتي نفسيتك شوي,,
واضح ان زوجك ماكان مستعد لهذا الزواج لا نفسيا ولا ماديا,,وواضح انه مايقدر يتخذ أي قرارات شخصية لأن أخوياه ما شاءالله عليهم هم اللي يقررون وهو ينفذ,,وأنتي الضحية,,وفوق هذا كان معتمد اعتماد كلي عليك وعلى أهلك من ناحية الصرفية,,وهذا غير الخيانة ان كان ثبتت,, من وجهة نظري ان هذا الشخص لا يستحق أن تكوني زوجة له.. الله ييسر لك أمورك.. |
لا حول ولا قوة الا بالله ....
الله يعينك ويساعدك وينصرك على الظالم والمفتري ... شوفي أختي مالي الا كلمتين والباقي الله يتقبل منا في ظهر الغيب ... 1- حكاية أنك ماتبين تثقلين على خوالك فهذي تشيلينها من راسك ...وش فايدة الأقارب الا انهم عزوة اذا هداهم الله ... وواضح ان زوجك مستقوي عليك لأن مالك ظهر ... فتوكلي على الله وأختاري أصلح وأحكم خوالك يصير وكيل عنك قدامه ... 2- لا تبينين لهم أنك دارية عن موضوع الهيئة ... هذي ورقة رابحة في يدك احتفظي بها في حال وصل الموضوع لمحاكم وقضايا حضانة ... الله أعلم وش يسوون لو دروا انك دارية ممكن يزورون ممكن يتحايلون الله أعلم .. 3- ابحثي وتقصي بمعاونة خالك عن أي قسم هيئة تم به الضبط لتحصلي على افادة او شهادة خطية من عندهم او محضر بالضبط ...أي شي أي ممسك لك عليه واحتفظي به الى أن يأتي وقته لكشفها .... الله ينصرك يا رب ..قلبي معك .... ولا أنسى أوصيك بصلاة الليل وتلاوة سورة البقرة والمداومة على الاستغفار بنية الفرج ... |
اقتباس:
أتفق مع رأي الأخت الكريمة رسـيـل 100 % أختي صاحبة الموضوع الله يكتب لك الخير ويهدي زوجك ويصلح حالكما عزوبي بس رجل |
الله يفرج همك يارب
المفترض أنك أول ماانضربتي رحتي للمستشفى وسويتي تحقيق وترا الموضوع ابدا مو صعب أتذكر مرة انكب على يدي موية حارة الساعة 12 بالليل وسألوني منين وكيف وسألوا زوجي وحتى الدكتورة لما قلت لها موية حارة بالغلط قالت أكيد.. بتسألين وليش الفضايح طبعا بتكون معك إثبات بينفعك بعدين لو حاولوا يضغطون عليك بالخلع أو شيء من هذا فأنت لو لاقدر الله صار شيء من هالقبيل اثبتيها ومثل ماقالت رسيل حتى ورقة الهيئة حاولي تحصلين على إثبات منها ومن رأيي تسكتين عن الموضوع لحد مايجون امك وابوك واشرحي للوالد الموضوع وبتنحل بإذن الله |
مشكورين والله ريحتوني بكلامكم
انا اليوم رحت المستشفى سويت تحاليل شامله صار لي فتره احس اني ماني على بعضي تدرون كم نسبة دمي ... انا الحمد لله مافيني فقر دم وكل تحاليلي ان مرره نقص صار 11 ونص وهذا كان في حملي اليوم طلع 9 لأول مره .... حتى الدكتوره تقول شاااااااااااااااحبه ليه كذا حسبي الله على اللي كان السبب انا مشكلتي اني اكتم اكتم مقدر افضفض يعني بس ابلع الهم بروحي حتى امي مااقول لها اسوي روحي مرتاحه وسعيده وانا اتقطع من داخل دايم خوفي اني اضايق احد والا اغث احد احاول افضفض بس مااقدر خويتي المقربه مررررره تقول لي فيك شي قول لي لي فضفض لي ريحي راسك ...والله اسكت ابغى انطق مااقدر بالنسبه لخوالي وحتى اهلي مسالمين مررررره اعرفهم يعني انا افكر بجية اهلي اخاف يقولون رجعي له واعتذري منه ادري بيحز بخاطرهم بس امي تفكر بكلام الناس كثييييييييييييير دايم كلامها لاتخلون احد يتشمت علينا والا يضحك علينا كل مابغيت افضفض لامي اتذكر كلامها وابطل لأنها مابتوقف معاي وبتقول لاتشمتين الناس فينا مشتاقه لامي والله والله ذيك الليله يوم يضربني قدام خواتي قمت ابكي زي الطفله واقول ( يمه ويييييييييييييييينك ؟؟) والله محتاااااااااااااااجتك ابغى حضنك ... والله محتاجه امي اذا كلمت تسألني فيك شي ؟؟ اقول لها لا مافيني بس رجعي طولتي يمه مقدر اقولها علشان ابوي تعبان وهي معه واللي فيهم مكفيهم ماابغاها تفكر وهي بعيده موافقه تهزأني تهاوشني اي شي بس ترجع ابغاها تضمني وابكي ابغى ابكي بحضنها بعد 16 يوم بالضبط ولدي بيكمل سنه فديت قلبه ابتسامته تنسيني همومي كلها والله ارجع من الدوام تعبااااانه بس اشوفه ماابغى حتى انام ألعب معه اضحك معه واضمه واشمه اخاف عليه من بكره انا ماودي ارجع له ماابغى .. كيف بأمن على نفسي اذا رحت معه وانا غريبه هناك ماعندي احد هذا غير اني كرهته كرهته كرهته بس خايفه خآآآآيفه من بكره والله خايفه احيانا أتردد واقول مابغى امي وابوي احد يتشمت فيهم خايفه من كلمة مطلقه خايفه من كلام الناس خايفه من اهلي خايفه من ولدي يلومني بكره بس ..... وانا ؟؟؟؟ وانا ؟؟؟ .. وانا ؟؟؟.... وكرامتي وحقوقي ونفسيتي ؟؟ مو عارفه شسوي بالضبط احس مخي ملخبط واهلي مدري متى بيرجعون بالضبط تدرون ... ذيك الليله السود ا من قهري دقيت عالشرطه طبعا اول شي طلع مشغوووول << لاتعليق بعدين رد علي واحد ياكل وخويه يناديه بسرعه بيخلص العشاااااا <<برضه لاتعليق اقول له كذا وكذا والله من الحيره دقيت قال .. هو عندك الحين ؟؟؟ قلت لا طلع قال اذا جا دقي علينا ...قفلت برضه من الحيره دقيت على السفاره انا عندي جنسيه ثانيه غير جنسيتي ودقيت على سفارتهم ادري اتخبط قلت يمكن يوقفون معاي ويحكمون ان ولدي يكون بحضانتي للابد بس رد علي واحد اهبل مايتكلم عربي ومافهم علي لاتلوموني يوم افضفض تدرون صار لي يومين مانمت مو قادره انام اذا حطيت راسي عالمخده كل ماتغفي عيني أحلم فيه وربي أحلم فيه وأفز ابغاه يروح من بالي ابغى ارتاااح والله احس اني اخر شي باخذ حبوب اكتئاب دعواتكم لي |
الله يفرج همك و غمك
و يجعلك ولدك قرهـ عين و يحفظه لك و يصير سندك إذا كبر أما زوجك لا تعليق :( الله يخارجك منه و ولدك بالسلامة ,,,, |
فرج الله همك وكربتك واعلمي انك قوية بأذن الله بس عليك بالدعااء في آخر الليل اطلبي من الخالق
وتقربي إلى الله بالطاعات والاستغفار واي دليل لديك احفظي عندك لحين الحاجة واذا كان لديك خال فاهم اشكي له فأنه مقام الأب والأخ حتى يعلم زوجك ان لك اهل واجلسي معه جلسه حاولي معه اصلاحه قد يصلحه الله وتعالي معه بالحوار الهادئ حفظك الله وابنك وجعله صالحا |
الله يفرج همك وينصرك على من ظلمك
|
ياربي الله ينصرك يارب
ويخلي لك اهلك وولدك |
الله يفرجلك يارب ويهون عليك والله تقطع قلبى وانا اقرا وخليك قووويه ولاتتنازلى عن حقوقك وخلى ثقتك بربى قوويه استغفرى كثييرر وصلى عالنبى مع الدعاء اختى لاتغفلين عنه وامانه مهما كان مايضعفك شى واعتبرينا خواتك هنا وقولى حسبى الله ونعم الوكيل والله يكتبلك الخيرة ولعله ابتلاء والله اعرف وحدة عانت من زوجها وكانت تدعى باستمرار وسبحان الله بعد طلاقها ومعها 5 عيال رزقها ربى بزوج رائع فاعرفى انه ممكن ابتلاء والفرج مع الصبر الله يفرجها علينا وعليك يارب
|
ساعدي نفسك على تخطي الأزمة وتذكري ان المنحة قد تأتي في ثوب محنة ، والبلية تعقبها عطية ،ونبيك الكريم يبشرك : " ما يصيب المسلم من نصب ولا وصب ولا هم ولا حزن ولا أذى ولا غم ، حتى الشوكة يشاكها إلا كفر الله بها من خطاياه "
أبشري أبشري فإن الله قريب منك وفرجه ليس ببعيد .. كلمات اهديها لك كما أهديت لي من قبل فلاح لي الأمل ...وما زلت على امل .. والحمدلله على كل حال .. |
ليس أمامك الا الدعاء لعل الله ان يرده الى صوابه ويهديه 000000
|
حبيبتي انا قريت قصتك وتمعنت فيها كثر ولا اخفيك ان دمعتي نزلت من كلماتك حسيت بظلمك وكل موقف حكيتي عنه تخيلته بالتفصيل انتي تحكين وانا اتخيل واسال الله ان يرزقك الصبر والحكمة
شوفي يالغالية اولا لازم تعلمي اهلك عشان يوقفون جنبك ومااضن ان هذا الانسان بيكون امين عليك بالمستقبل دامه ضربك في بيت اهلك ودامه انمسك مع بنت فخلاص مايحتاج نكمل في النقاش معه الشى الثاني حبيبتي ربي ماخلق الطلاق الا عشان حل المشاكل لا تقولي القيل والقال ربي ابنك وماعليك من احد اما تعيشين مع واحد ماعنده غيرة على عرضه اقولك لا ثم لا وفوق هذا ضرب واهانك فيك وش الله حادك؟ ادري ان صعب عليك الطلاق وانه مؤلم لكن ماعلى مثله حسوف ربي يعوضك وخير عوض عند ابنك بالوقت الحالي هذا رائي يالغالية وتاكدي ان ربي ماراح يخليك انتي انظلمتي واجرك عند الله لك مني دعوة بظهر الغيب والله يفرج همك وهمي وهم المسلمين |
الله يفرجها عليك من اوووسع ابواابه ..... اللهم لاتجعل الدنيا اكبر همنا ..... زووجك هممه الاول والخير اموور الدنيا ؟؟ جعله مايتهنى فيها ... حسبي الله ونعم الوكيل |
أختي الكريمة .... اهتمي بصحتك و لاتجعلين مثل هذه المشكلة تؤثر عليها و تذكري ن ابنك بحاجة اليك فاجتهدي في ذلك هذا أول شيء و الأمر الثاني لم تجيبي على سؤالي عن الوقت المتوقع لقدوم والدك و أما بخصوص الجنسية الثانية فهل هي جنسي بلد عربي أم غربي حتى أفيدك عنهم دون أن ترجعي اليهم اذا رغبتي في ذلك ...
الأمر الأخير .... ذكرتي أن والدة زوجك في صفه للأسف ... فماذا عن والده ان كان حيا أو اذا كان هناك أحد أقربائه من العقلاء الذين من الممكن التواصل معهم؟؟ كان الله في عونك |
لاحول ولاقوه الأ بالله
لــ الأسف زوجك رخمه وانا اخوك اول شي ضربه لك وانتي حرمه ثانيا ضربه لك واهلك غايبين نصيحتي لك الطلاق ريحي وارتاحي على حسب كلامك انك صغيره في العمر وموظفه وربي يرزقك بــ زوج غيره يكون صالح فيك المهم لاتضيعين حياتك على واحد تافه |
الي مثل هذا ماعنده شخصيه
وربي يسعدك ويوفقك ويخليلك ولدك يارررب الله يفكك منه وتلاقي الي يحبك وييخاف عليكم ويقدرك والله يوفقك |
الله يكون بعونك ويصبرك
ياقلبي اللي ينعرف اوله ينعاف تاليه اتركيه وربي بيبدلك خير منو وخذي نصيحتي داومي على الاستغفار وقيام الليل والاستخاره اذا فيه خير وفيه امل انو ينصلح حالو بيرجع لك نادم خاضع اذا مافيه بيصرفه عنك ربي ويعوضك خير لاتخافي ولاتحزني ولاتشيلي هم رزقك بيد لله تصدقي ذكرتيني بعضوه قديمه اسمها ساعدني أنساك نفس اسلوبها وتنسيقها سبحان الله أتمنى أنها تكون بخير00 |
صباح الخير
ابروح دوامي الحين وبرجع لكم العصر |
هلا بالجميع
وحشتوني وحسستوني ان في احد واقف معاي بالنسبه للي سأل عن ابوه الا ابوه موجود وترى هو أرحم بكثيييير يعني هو اللي احسه متفهم اخوي يوم يتفاهم تفاهم مع ابوه اول ويقول كان كلامه متزن وصاحب حق أهون من امه ... امه عيني عينك اقولها حرام عليك امي مسافره انا زي بنتك تقول بس هذا ولدي أكيد بوقف معه .... وهو الكذب عنده ببلااااااااااااااااااااااش وهي تصدق تخيلو طلعني عندهم البخيله اللي خايفه على الفلوس وهو اللي مو مخلي عني اي قصور حسبي الله ونعم الوكيل بس اليوم الاربعا والله ان حزة المغرب بس يدي على قلبي عين عالباب وعين على التلفون الله يعين بس بالنسبه للاخ اللي سأل عن الجنسيه الثانيه اللي عندي جنسيه غربيه وبالتحديد الامريكيه تتوقع في شي بيفيدني ؟؟ انا خلاااص تقريبا قرار نهائي اني انفصل عنه لأني مو متحمله أشوفه مره ثانيه بحياتي بس انتظر رجعة اهلي والله يسهل موقفهم ويسهل علي بس أفكر بشي أبغاها الكلمه تطلع منه مو مني علشان ما أرجع له ولا هلله نحااااسه كذا يعني بياخذ الفلوس والاغراض اللي كانت بالشقه وعدة المطبخ كلها جديده استعمال لايذكر ويتزوج ويتهنى فيهم ؟؟؟!!! لاوالله مااخليه احس صرت متوحشه ونذله حسبي الله عليه الله يعين بس اشوفكم على خير |
انسيه واطلبي الله بلعوض بخير منه هذا مش رجال هذا ناقص والله مايستاهل يكون اب وله ذريه وولدك من حقك لانه واضح انه ماراح يكلف على نفسه ويصرف عليه دام هذي امه حسبي الله لاتستغربي منه
|
اختي يعلم الله كم تاثرت لقصتك
اسال الله ان يجعل لك من كل هم فرجا ومن كل ضيق مخرجا ويرزقك من حيث لاتحتسبي وان يحفظك و اهلك وابنك ويحميهم من كل مكروه ولايحرمك منهم يااارب |
أختي الكريمة مرحبا بك مرة أخرى ....
أنا سعيد جدا لما سمعت عن والده انه طيب لانه هذا ممكن يكون السلاح اللي تضغطين فيه على زوجك أو على الأقل أنه ينصفك بكرة لما تتكلمين مع أهك و تبلغيهم بالموضوع لانك محتاجة أحد يوقف في صفك من جهة أهل زوجك لتضمنين حقوقك كاملة بما فيها الأثاث اللي شريتيه.... أنا ما راح أقول لك الآن اطلبي الطلاق منه أو لا .... لان الطلاق أبغض الحلال عند الله زي ما تعرفين و ما ودي أيضا ابنك الصغير يعاني من ألم فقد والده و تأكدي أنك مهما تسوين له تبقين أمه و لن تكوني أبوه يوم من الأيام ..... شيء أخير بخصوص الجنسية الأمريكية ... هل عندك جواز و كل أمورك زينة؟؟ النظام تبعهم يجيز لك اعطاء الجنسية لابنك لكن بعد شروط طويلة و معقدة أهمها أنك تقيمين كم سنة في أمريكا على الأقل .... و عموما ممكن أفيك بتفاصيل أكثر في هذا الموضوع اذا كان يهمك الله يوفقك يارب و يسمعنا عنك كل أخبار حلوة |
هلا أخوي ليفربول
ابوه طيب ايوه بس مهما كان هذا ولده واكيد بيوقف بصفه وبالنسبه لـــ أني انا مااعوضه عن ابوه طيب وينه ابوه ؟؟؟ والا بس اسم على الورق ؟؟ لو كان يحس بالابوه لو شعره كان عالاقل سأل عنه ...لو حتى يكلم اخوي يسأل عنه بس هذا حرام فيه كلمة ابو الا حرام فيه كلمة رجال وبالنسبه للجنسيه ... ايوه عندي الجواز الامريكي وداريه اني لازم اقيم بامريكا 5 سنوات على الاقل علشان اقدر اعطي ولدي الجنسيه وعلشان يقيم بامريكا 5 سنوات لازم اطلع الجرين كارد له وعلشان اطلع الجرين كارد له لازم الجواز السعودي والجواز السعودي عند ابوه ورجعنا لنقطة الصفر عالعموم مشكور عالافادهـ ربك يعين ويسهل |
أسأل الله الكريم رب العرش العظيم أن يفرج همك
ويسهل أمرك ويجعل لك من كل ضيق مخرجاً ألزمي الدعاء وربي ما راح يضيعك ولازم تكونين قوية وإيجابية عشان طفلك الله يعجلك بالفرج صادق دعواتي لك |
أختي الكريمة
أنا ما أدري ليش ما تحاولين الكلام مع والد زوجك خصوصا أنه جد ابنك و أكيد راح يحن عليه شوي خصوصا انك قلتي انه طيب و مافيه أي خسارة من المحاولة في كل الأحوال ما دام عندك جواز أمريكي الآن ممكن تبدين اجراءات الحصول على أوراق له حتى لو كنتي في السعودية بحسب التعديل اللي صار على النظام و لاتحميان هم الحصول على الجواز السعودي لابنك الآن شيء أخير .... حاولي بأي طريقة تستعطفين قلب زوجك على ابنه و لو عن طريق أخوكي أو أبوه لكن لا تحملين الهم لحالك و لاتخافين من أنه يأخذه منك لانه ما يقدر حسب النظام في السعودية الله يوفقك يارب |
هلا اخوي اشكر لك اهتمامك بس ياليت توضح لي وش التعديل اللي صار على النظام ؟؟؟ ووش الاجراءات اللي تقصدها وابدأ فيها؟؟ وهل اقدر اسوي شي و جواز ولدي عند ابوه ؟؟ |
أهلا و سهلا فيكي أختي مرة ثانية و الله يكون في عونك على مشكلتك ....نعم بحكم أنك عندك الجنسية و الجواز ممكن تتصلين على القنصلية الأمريكية و عندهم قسم خاص لشئون الرعايا لعلاج المشاكل اللي مثل حالتك و ممكن يفتحون لك ملف و يبدأون اجراءات اخراج جواز لطفلك حتى لو ما كان عنده جواز سعودي بناء على جنسيتك أنتي أهم شيء يكون عنده شهادة ميلاد ... وأتمنى يكونون متساهلين معاكي بدون أي تعقيدات ....
السؤال أختي! هل أنتي محتاجة لهذه الخطوة في الوقت الحالي ؟؟؟ أنا لا أعتقد ذلك حاليا !! أعتقد أنك بحاجة الى تحديد مصير استمرارك مع زوجك من عدمه وهل ستطلبين الطلاق أم الخلع و مالذي يترتب على هذا التصرف بعد ذلك........ المسألة طويلة والله ما ودي توصلين لموضوع الطلاق لاني أشوف أن هناك خطوات يجب عملها قبل كذا بين أهلك و أهله و أقترح أيضا أن تعرضوا مشكلتكم على أحد مراكز الاستشارات الأسرية و ودي تفكرين في طفلك وانه ما يكون ضحية لهذا الطلاق .... و لا تنسين نفسك ترانا في مجتمع ما يرحم المطلقة للأسف و راح تتعطل كثير من مصالحك و معاملاتك و أنا أتكلم عن خبرة ياليت اني أقدر أسوي شيء أكثر من كذا و اتكلم مع زوجك و نذكره بالله عز وجل ونذكره بابنه اللي للأسف ما سأل عنه .... الله المستعان |
هلا اخوي
هلا جميعآ اخوي انت جالس تقول اني افكر وافكر بطفلي اول شي طيب يعني انا مثلا اروح له وابوس يده بليز ابغاك ؟؟!! هو اللي قال لي ماابغى اشوف وجهك عندي بالشقه يعني بالعربي طرده والشغله الثانيه وانا ببيت ابوي وخواتي في واهلي موصينه علي قبل مايسافرون وهو تجرأ ومد يده اجل وشلون لو اكون معه بروحنا بعدين ....على اقل شي بكون تحت رحمة يدينه وبعدين هو يبغاني انقل معه وانا بهالظروف مستحيل انقل خلاص ما أأمن عليه أبد أبد افرض نقلت بعدها طردني وحتى لو حتى لو ....انا خلاص القلب عافه .. كرهته وربي كرهته ماعاد يهمني واحد بهالقسوه وقلة الادب وسوء الاخلاق وش اسوي فيه ؟؟ صدق ظل حيطه احسن من ظل بعض الرجال خل اقول لكم وش صار هاليومين.. امس كنت عالنت بالمنتديات وفجأه طاحت بيدي صفحه مدري وشلون طاحت انا هاليومين مرررره افكر بمسألة الحضانه وخااايفه واحاتي وكل شي طاحت بيدي هالصفحه عن وحده تتكلم عن محامي ساعدها ووقف معاها وانه من المناصرين لحقوق المرأه قلت خل اسوي سيرش عنه وسويت سيرش وشفت سيرته وكل شي وسبحان الله طلع الرجال أصله نفس أصلي ومكتبه قريب بعد وانه له قضايا مشهوره .. قلت خل ارسل له ايميل وارسلت له وقلت له السالفه بإختصاااار شديد واني ابغى اعرف الحقوق اللي لي وعلي لو صار انفصال كان رده انه لاتخافين وكذا واتصلي علي واتصلت اليوم العصر وكان جدا محترم وسمع السالفه بالمختصر وقال تبين اوقف معك بوقف انا اكره شي عندي ان رجال يمد يده على حرمه ... قلت له انا مقدر اتصرف الحين قبل لا يجون اهلي بس ابغى اعرف وش اقدر اسوي ووش لي ووش علي قال اول شي بالنسبه للحضانه .. اتحدااااااااه انه يقدر ياخذه منك حتى لو كمل ال15 سنه ...بس اهم شي انك ماتتزوجين اذا تزوجتي هو يقدر ياخذه قلت لااااا توبه ولاني متزوجه وبربي ولدي بس في وحده معنا مطلقه وزوجها اخذ منها عيالها يوم وصلو 7 سنوات قال لا ماااايقدر وهالقانون جديد ولو هي جايه لي وربي ارجع لها عيالها ثاني شغله تقدرين تطالبينه بالنفقه على الايام اللي راحت كلللها ...ويطلع لك مبلغ محترم قلت ماابغاه حلاله بس اهم شي ولدي عندي ثالث شي وهو اهم شي ..سالفة الضرب والتعدي بالبيت في غياب اهل البيت اللي هم اهلي والدخول على نساء غير محارم قال ...هذي جنائيه ...نقدر نكتب فيها خطاب وانا ارتبه لك وخواتك يشهدون وهم بيسحبونه على وجهه ويسجنونه ويأدبونه ويعزرون فيه بعد ....قلت هذي نخليها بعدين نشوف سالفتها بس انا ماعندي تقرير من المستشفى ولا شي ويمكن بيقولون ليه ماتكلمتي من قبل...قال عادي بحكم ان اهلك مسافرين وانتي تنتظرينهم واذا على التقرير يمشونها مايدققون عليها برضه لأنك ماقدرتي تتكلمين وابوك مو موجود قلت انا ماهمني انا اهم شي عندي ولدي انه يكون معاي اذا جاو اهلي يصير خير ان تكلم بالحسنى كان بها وان سوى فيها وصار مو رجال ويبغى تعويض وخرابيط وربي من ثاني يوم انا عندك بالمكتب .... قلت كم اتعابك ؟؟....قال انتي من اهلي واذا بساعدك بساعدك علشان ولدك وحقك مايروح والاتعاب مانتكلم فيها حتى لو ماتعطيني وقفلت منه وانا مرتااااحه وعرفت انام |
| الساعة الآن 01:08 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©