|
أكره زوجي و أشعر بالندم لأني تركت ابني
بسم الله الرحمن الرحيم
السلام عليكم ورحمة الله وبركاته أخواني أخواتي كنت جالسه اتصفح النت ولقيت منتداكم وأعجبني كثيرا ، من زمان نفسي ألاقي أحد يسمعني وينصحني لأني نعبت من مواقع الإستشارات النفسيه ما يردون على أحد من كثر الزحمه عندهم ما أبي اطول عليكم بس أرجوكم لا تبخلون علي بإرائكم ونصحكم لأني عندي أمل ألاقي أحد يسمعني ويفهم مشكلتي مشكلتي بإختصار بعد ما خلصت الجامعه تزوجت من رجل ما يقرب لي يعني من بعيد وبداية زواجي كنت كنت مبسوطه وسعيدة جدا ، ومع الوقت أكتشفت أن زوجي مدمن ولكن أكتشفت متأخره بعد ما حملت وجبت ولد، يشهد الله حاولت معاه أنه يترك الإدمان وتحملت الإهانات والضرب بس للأسف كان حاله للأسوء مو للأحسن ، وصرت أخاف على نفسي لأنه يجمع أصحابه ويسهرون معاه وكنت اموت من الخوف إذا جو أصحابه ، في الأخير ذهبت لأهلي ورفضت الرجوع له ،لأني والله العظيم خفت على نفسي وعلى أبني ، طبعا أهلي لمن عرفوا أنه مدمن رفضوا يرجعوني له ، وطلبوا منه الطلاق وحصل طبعا أبني كان معايه في حضانتي ولا طالب فيه أبوه ولا سأل عنه ، طبعا بعد الطلاق عشت حاله نفسيه صعبه جدا أنتوا عارفين مجتمعنا ونظرتهم للمطلقه ما يرحمون أحد لا بكلامهم ولا بنظراتهم أعنزلت الناس وصار خروجي قليل جدا من المنزل،ولكن أنا عندي أخوان أكبر مني وجميعهم متزوجين، في أول أيام طلاقي كانوا يعطفون علي أنا وأبني ودائما يأخذونا معاهم في كل مكان ولكن بدأوا زوجاتهم في التذمر مني ومن أبني طبعا أمي وأبوي موجودين لكنهم كبار في السن وأبوي ما يقود السيارة وأمي ما تحب الخروج عشان كذا أخواني دائما يمروني أروح معاهم لكن زوجاتهم كانوا يكرهوني وفي الأخير صرنا أنا وابني لا نخرج ولا نروح مع أحد إتقاء للمشاكل وأنا بطبعي أنسانه ما أحب المشاكل وأكرهها طبعا عشنا في عزلة أنا وأبني لانطلع ولا نخرج أبدا في هذي الفترة تقدم لي الكثير ورفضتهم عشان أبني ،ولكن بدأوا إخواني يضغطون عليه عشان أتزوج وكذلك أمي وأبي رفضت بقوة لكن للأسف قدروا أخواني يأثرون على امي وأبي عشان أتزوج ألحوا أمي وأبي علي بالزواج وخاصة أن المتقدم لي هذه المره على قولتهم ( لقطة ما يتفوت ) وهو يقرب لي وأيضا هو شاب لم يسبق له الزواج وعمره من عمري وعارف ظروفي وراضي بي وأُجبرت في الاخير على القبول رضاء لأمي وأبي، وتكفلوا أهلي بأبني وقالوا لي أتركيه عندنا وإحنا نربيه ولا تخافي عليه نحطه في عيوننا وحتى العريس نفسه قال أنه ما راح يتضايق منه وراح يعتربه أبنه ( أنا هنا أرتحت بعض الشئ ) واستخرت الله عز وجل ووافقت على الزواج منه أنا الحين متزوجه لي سنه وكل شي تغير أهلي تخلوا عن أبني وسلموه لأهل أبوه وقالوا اهله أولى أنهم يربونه إحنا مو ملزومين فيه ( هذا طبعا كله من اخواني وزوجاتهم ) وحسيت وقتها بحرقة في قلبي مو راضيه تروح أبد، وأنا مشكلتي مع زوجي الآن أنني أكرهه وما أحبه والله حاولت أحبه وأتعود عليه بس ما قدرت لان معاملته لي جافة جدا (عايش في زمان جدي وجدتي) عقليته جدا رجعيه وقلبه قاسي لا يظهر لي الحب والمودة أبدا مع أني ما أقصر معاه في شي والله العظيم تعبت من هذي الدنيا أولا :حاسه بندم وغصة في قلبي لأني تركت أبني وصدقت كلام أخواني وبُعد أبني مأثر علي جدا دائما حزينه ودموعي على خدي ثانيا: أكره زوجي جدا جدا جدا لأن توقعته الإنسان اللي بيمسح دمعتي وبيخفف عني حزني إعتبرته حبل النجاة اللي بيرفعني ويبعدني عن حياة الهم والالم ولكن للأسف قطع الحبل اللي كنت ماسكته والله أنا الحين أكتب ودموعي ما تتوقف مقهورة على أبني اللي تخليت عنه ومو عارفه ايش أسوي ،ودي أرجع أبني لحظني بس كيف كرهت كل شي في ذي الدنيا ولا أبي منها شي، ما أبي غير ولدي يرجع لحظني ، خايفه عليه يضيعونه أهل أبوه زي ما ضيعوا أبوه تكفون ساعدوني ايش أشوي؟؟؟؟؟ وأعتذر على الإطالة وشكرا |
ماادري والله ايش اقولك مااملك الا الدعاء لك الله يفرج همك ويرد ابنك لحضنك بس تذكري معاملة اخوانك وانت مطلقة ونظرت الناس لك احساسك بالذنب ببعد ابنك عنك هو الي مسوي فيك كدة حاولي تتحملي حياتك كدة احسن ومالي الا الدعاء لك ربي يصبلرك حبيبتي وان شاء الله الاعضاء يفيدونك
|
طيب الحين ماحملتى من زوجك الحالى؟
ممكن لو حملتى منه راح يتغير معك حاولى تسترجعى ابنك وتخليه يعيش معك واسال الله لك الفرج العاجل اكثرى من الاستغفار |
اختي
يمكن تكون نصحيتي غريبة خذي ابنك عندك..في بيت زوجك.. واذا رضى زوجك كان بها.... واذا مارضى خليه يسوي اللي يبي... خصوصاً انك تكرهينه الزوج يتعوض والا الابن مايتعوض يسر الله امورك |
طيب ماتقولين ان زوجك ما عنده مشكلة بابنك طيب جيبيه عندك . يا اختي مدام اخوانك اقنعوك بان تتزوجي بسبب تاثير زوجاتهم عليهم فصعب انك ترجعي لهم مره ثاني نصيحه
|
حبيبتي الله يجبر كسري وكسرك في ولدك...
ولك الحل ياطويلة العمر بس يبغالك تصملين علية وترا الولد من حقك يا قمر الله يرده لك سالم غانم يارب.. صحيح ان الام ان تزوجت صارت الحضانه للاب لكن بحالة زوجك واهماله فماله حق بضم الولد وبامكانك ترجعين ولدك لحضنك عن طريق المحكمة ان مارضيوا يعطونك اياه ...ونصيحه مني ترا اللي مايساعد نفسه ماحد يساعده..ولاتقولي ماني قادره على المحاكم..والله انا منك اصير مو قويه إلا اصير وحش عليهم إلين ارجع ولدي لحظني... شوفي انا الان عندي بنت وزوجي من اشباه الرجال <<< مو رجال بالاساس لكنه علمني كيف اصير قوية عين ولله الحمد لكن بالحق...دايم يهددني انه يحرمني من بنتي وانا لما تزاعلنا ورحت بيت اهلي مافكرت احرمه من بنته... واخوانك هذول واخواني وكل من يتقدر عليكي حسابهم على رب مايضيع من خلق.. وربي حسيت كل كلمة قلتيها ..الله يجبرك الله يجبرك الله يجبرك اللهم ياجامع الناس ليوم لاريب فيه رد عليها ضالتها... اللهم ياجامع الناس ليوم لاريب فيه رد عليها ضالتها اللهم ياجامع الناس ليوم لاريب فيه رد على اختي "وحيدة حزينة" ضالتها.. اللهم سكن قلبها برجعته لحضنها.. اللهم افرغ عليها صبرا وثبت اقدامها وانصرها على القوم الكافرين... >>>>>> اوصيكي من مكاني هذا وانتي بمكانك وين ماكنتي انك تطمئني بان الله لايرضى بالظلم وانه ناصرك عليهم كلهم ....وعسى الله يحنن قلب زوجك لك ويجعلك اجمل النساء بعينة ويستر عنه عيوبك.. ماتدرين قد ايش انا وحيده وحزينه زيك لكن قوة الله فوق كل قوة وقدرته سبحانه فوق كل قدره... ولايهمك احد.....تشجعي وطالبي بولدك ولاعليك من احد دام الله معاكي ولا تخافي من احد ترا المكتوب بيد الله وحده ولاحد بيقدم لك خير الابإذن الله وصدقيني انتي اقوى منهم بالله ...الله ينصرني وينصرك... قلبي معاكي.......................طمنيني وش يصير معاكي بعدين... ام دانة |
انتي ماتخليتي عن ولدك الظروف اجبرتج على الزواج مرة ثانية
مااقول غير اللة يردلج ولدك ويصبرج على حالج واللة قلبي معاج |
وعليكم السلام ورحمة الله وبركاته
اوخيتاه الهمك الله اصبر في بعد ابنك نصيحتي لك ان تهتمي في نفسك وزوجك وكرهك لزوجك احساسك انه هو سبب تفريقك بينك وبين ابنك وابنك ان طال الزمن او قصر يرجع لك وثاني شئ احمدي ربك انه عند اهله وصدقيني انه يبون يهتمون فيه ويربونه احسن تربيه بس انتي ادعي له بصلاح اما مسألت انه يربونه مثل تربيتهم لبوه مافيه احد ما يبي لابنه الخير ولكن الهدايه في يد العزيز واسال الله له الهدايه ويصلح شأنه اما سبب جفاء زوجك اسبب انتي لانك دايم مهمومه وحزينه قدامه ومهملته عاطفين اهتمي فيه وحسسيه بالحب وهذا من حقه وانه مافي الدنياء غيره يشغلك وشيلي الهم من قلبك وعيشي حياتك (ضل رجال ولا ضل حيطه بسه يبيله هتمام منك واحمدي ربك انه انتي الوحيده في حياته واخرجك من اذل والعزله ونظرة المجتمع نصيحتي انتبهي لنفسك ولزوجك ومسالت انه عايش زمن جده هذا شئ لا يعيبه انه متمسك في العدات وتقاليد ونتي مع مرور الوقت تبين تسطرين عل مشاعره وتغيريه ونتي وشطارتك بس بالحب وتفاهم والحوار الهادي وتشغيل الرمونسيه ما فيه رجال الا يحب التغير وشوفي تبين تسمعين من الاكلام الحلو لين تملين الله يتمم عليكم السعاده والمحبه بس لاتجعلين تفكيرك في ابنك يدمر حياتك باذن الله يبي يكبر ويتزوج ويشوف حياته ان كان عندك او عند غيرك اقر الله عينك في شوفته وملي فوادك في قربه بس انتي عجلي جيبي :15: اشغلي نفسك فيه الدنياء تمضي بما كتب الله لنا والله فيه حريم ضحن لجل ابناهن وما تزوجن بالخير تزوجو وراحو وراء زوجاتهم وهي لا حولها ولا حوليها __________________ |
أختي أم لؤي 34 مشكوره على الدعاء الله يسمع منك
ويحقق لك أمنياتك. ___________ المحبة للأستغفار مشكوره عالمرور أنا للحين ما حملت من زوجي لاني خايفه أحمل ويصير فيني زي ماصار المره الأولى وايش ذنبهم الأطفال كفايه غربلة أبني الوحيد أنا قلت أول بشوف معاملته لي تتغير ولا لأ وبعدين أفكر في الحمل _____________ واثق الخطوة مشكور أخي على النصيحه وهذا اللي جالسه فكر فيه بس وين أعيش أنا وابني لو رجعت لأهلي ما راح يتركوني إخواني في حالي ولو جلست عند زوجي ما راح أقدر أرجع أبني لأن الحضانه سقطت بزواجي ___________ ريـــو المشكله إن زوجي موراضي يوقف معايه ويساعدني يقول خلي الولد عند أهله أحسن له هم يربونه وبعدين أحس كلامه تغير بعد الزواج صار يغار من ولدي وما يحبه يعامله بقسوة وجفا مشكوره عالمرور الله يحقق لك أمانيك ___________ أم دانه مشكوره يالغاليه على الدعاء الله يحقق لك اللي تتمننينه في الدنيا وفي الأخرة بس كيف أقدر أرجع ابني لحضانتي بمجرد زواجي تسقط عني الحضانه وللأسف ما أحد بيوقف معايه في المحاكم لا زوجي ولا أهلي إذا تعرفين حل قولي لي طيب أقدر أتواصل مع المحكمه بالتلفون واذا قلت إن طليقي ليس أهل لحضانة أبني بيقولون لي أثبتي هذا الشئ كيف أثبت تكفين ساعديني إذا تعرفين والله يفرج همك ويسعدك يارب __________ أم فهد مشكوره عزيزتي على الدعاء الله ييسر لك أمورك ___________ مجروحه وأكابر مشكوره على نصيحتك والله يعطيك العافيه بس أختي والله أحاول ما أبين لزوجي همي وحزني لأنه ماله ذنب أحاول أهتم فيه لا أقصر معاه في شي بس هو إنسان قلبه جدا قاسي وما يعرف المودة والرحمه اللي بين الزوجين كأنه أخذني عشان يسترني بس أنا ما أبي منه غير كلمة طيبة وقلب حنون وعطوف وأنا أحاول بقدر الإمكان والله يعنني ويصبرني الكل مشكورين عالمرور ومشكورين على مواساتكم لي والله كلامكم ريحني |
السلام عليكم اختي
حزنتني قصتك الله يرحمك برحمته ربك كريم يالغالية |
اقتباس:
اللهـــــــــــــــم آآآآآآآآآآمين بس أبي أحد يساعدني ويقولي كيف أقدر أرجع أبني اللي عنده حل لا يبخل عليه تكفون؟ |
سامحيني اقولك ياقو قلبك وربي خنقتني العبره على ولدك كيف قدرتي تنامي بدونه او تعيشي لحظه وحده وهو بعيد عنك وماتدرين اذا مرتاح او لا الضيحه مع احترامي لك ابنك ماراعيتوا مشاعره وانتوا ترمونه من بيت لبيت وكانه منبوذ وما احد يريده دام ان زوجك مارفض انك تعيشين معه ليش تخليتي عنه زوجك مو نافعك هذا ضناك لاحول ولا قوه الا بلله
|
سامحيني اقولك ياقو قلبك وربي خنقتني العبره على ولدك كيف قدرتي تنامي بدونه او تعيشي لحظه وحده وهو بعيد عنك وماتدرين اذا مرتاح او لا الضيحه مع احترامي لك ابنك ماراعيتوا مشاعره وانتوا ترمونه من بيت لبيت وكانه منبوذ وما احد يريده دام ان زوجك مارفض انك تعيشين معه ليش تخليتي عنه زوجك مو نافعك هذا ضناك لاحول ولا قوه الا بلله
|
اقتباس:
أختي ام هتان أنا لو قلبي قوي زي ما قلتي كان ما تعذبت نفسيا لافكرت في حل عشان أخذ ولدي أرجوك إذا مو قادره تخففين همي لا تزيدينه أنا قلبي يتقطع على ولدي ومحروق عليه ومن قالك أني أنام وأنا مرتاحه من دونه ومن قالك أني عايشه حياتي سعيده بدونه هو في بالي في كل لحظه وكل وقت لأني مو قادره أنام ولا أرتاح ولاأعيش حياتي هو بعيد عن عيني وأنا الحين أشوفه كل يوم جمعه وأطمن عليه بس موكفايه أبي أرجعه لحضني وأبيه يكبر قدام عيني بس والله والله والله العظيم كل اللي صار غصبن عني مو برضايه لأن أخواني أجبروني على الزواج وبسطوا لي الموضوع عشان أرضى والحين بعد ما تزوجت غيروا كلامهم كله أنا أعترف أنه ضحيه بس أنا بعد وش ذنبي في هذا كله وأنا كل حزني وهمي عشانه على الأقل أدعيلي وأدعي له أن ربي يجمعنا مره ثانيه لاحول ولا قوة إلا بالله |
اسال الله العلي القدير انه يسخر لك زوجك ويزرع حبه في قلبك ويرجعلك ضناك عاجلا غير اجل ويسخر لك قلوب من احوجك اليهم ويقر عينك انتي حاولي تدخلين احد يحل الموضوع ويرجع لك ابنك
|
انا ما عندي حل بس لو كنت بمكانك كان اذا جاني يوم الجمعه ولدي اقفل باب الغرفة علينا وخل يصير الي يصير ولدي ماهو رايح وخلهم يعملوان الي يعملونه يعني وشو يكسرون الباب يهاوشونك انتي اكيد العذاب الي عايشته اكثر المهم انك تحاولين واذا ما قدرتي ولا جابت هالطريقه نتيجه ما تلومي نفسك ابد وتذكري ان الحافظ هو الله وليس انت فالله سوف يحفظه ان شاء الله كما حفظ نبيه يتيم لا ام ولا اب واصبح خير خلق الله ادعي لولدك بالغيب و عوذيه حتى لو كان بعيد عنك وثقي بالله هو خير حافظ والحزن الذي فيك طبيعي بس الشيطان يزيده عليك ليقلل ثقتك وتوكلك على الله
طيب عندي لك قصة عن واحد قريب لي ابوه توفي وطبعا تزوجت امه بسبب الحاجه زوج امه يكرهه ويعذبه تخيلي لما كبر شوي عاش عند جيرانهم امهم طيبه كانت تحسن عليه كبر وتزوج واصبح رجل من الحسن الرجال الله هو الذي حفظه وسخر له جارتهم تربيه وترعاه اقول لك لا تحزني |
حبيبتي آسفه اني تاخرت بالرد ........ ويعلم الله لظروفي ما رديت من اول ما قريت كلامك......
شوفي وانا اختك .... انا بقولك على اول باب تروحين له >>>>>>>>>>>> باب الكريم .. بالدعاء والاستنصار به وبقدرته لانك صاحبت حق في الحضانه حتى بزواجك >>>> الحضانه اصلا ساقطه عن الاب لانه غير امين عليه ..............وهذا الشي قريته قبل فترة بسيطه من ردي على مشكلتك .. ....وماني متذكرة الموقع بالضبط .. فيما معناة ان الام وان تزوجت وكان زوجها غير كفو للحضانة فانها تسقط عنه وتعود للام........ انا ياحبيبتي ابحثي لاتيأسي عسى الله يقر به عينك ويحفظه من كل اذى.......وانا والله لو بيدي شي مابخلت به عنك عسى الله يجبرني ويجبرك ويجبر كل مكسور.. لك ودي ................ام دانة |
انا ياحبيبتي زوجي يهدد فيا بانه بياخذ البنت وهي توها ببداية الشهر الرابع ويقول بيربيها مع اولاده عند زوجته الاولى واني والله اشفقت على بنتي من قسوة اهلي والناس لماتكون بدون اب...والاب مهما كان فهو سبحان الله حماية للابناء الا الشواذ من الاباء..
فكرت اتطلق او اخلعه واتزوج واخذ بنتي غصبن عنه لكني شفت ابوها وهو ابوها مايتحملها ببعض الاحيان فكيف بالرجل الغريب اللي ماهي من صلبه!!.. وآخر شي ومن كثر ماحاصرتني الدنيا انا وبتي من كل مكان قلت له خذ بنتك وانا بروح بيت اهلي وبسعى بالطلاق وربي مارح ينساني رح يرزقني احسن منك...وقتها حسيت ان السلاح اللي كان يهددني فيه انكسر ورجع يقولي كيف تروحي وتسيبي بنتك انتي قلبك قاسي ...ومن هالكلام ... قسم بالله اني كنت معزمة وملزمة وخلااااص قرفت وكنت خارجه بس جلست ابكي وانا اتخيل بنتي ترتمني بحضن اهله وهي ماتعرف امها..وقلت له هالكلام ورجعت قلت له هي مصيرها بتكبر وبتدور على امها..لكني مسكت ارضي عسى الله يفرج كربتي اللي انا فيها حسبي هو ونعم الوكيل... <<< كانت هذي سالفتي مع اني بحثت بالنت عشان ما اخليله طريق يحتفظ بالبنت ولو بعد بلوغها السبع سنين إلا اني لما لقيت الاسباب اللي تمنعه من رجوعها له اصتدمت بالواقع المر...ورجعت افكر بعقلي...وتيقنت وقتها انه ولو اخذ البنت عنده فهي باحسن واامن مكان بالعالم وانا برغم مقاومتي لكل شي الا اني ضعيفة وياريت ارد عن نفسي ....بعدين انتي تشكين من اخوانك وحريمهم وانا اشتكي من اخواتي واخواني لكن الله يصلحهم ويحنن قلوبهم عليا.... ادعيلي معك بالفرج تراني غريبة في بلدي وخصوصا بعد موت الوالد الله يرحمه تكشفت عقبه كل الوجيه وبانت |
.. الله يجمعك مع ابنك ويلم شملكم ..
.. تقطع قلبي على ابنك ,, الله يساعد قلبك .. ويصبرك .. .. عزيزتي .. لما يزورك ولدك يوم الجمعه , كيف تحسينه ؟ مبسوط مع اهل ابوه ؟ مرتاح ؟ يعاملونه زين؟ وليش بس يوم الجمعه ؟ أطلبي انه يبات عندك ويكون معك الخميس والجمعه , ويرجع لابوه ليلة السبت .. .. وعوضيه عن كل لحظه انتي بعيده عنه , وبهاليومين ازرعي فيه كل الحب والود لك , ولا تقسين قلبه على احد , وعلميه يحب اهل ابوة ويحترمهم ويسمع كلامهم , علشان يكون مرتاح معهم .. .. اما زوجك فأجلسي معه , وتكلمي معه بكلام يحنن قلبه عليك , لا تصارخي , تهددي ,, لاااا أستخدمي معه اسلوب اللين واللطف والحنيه ,, سايسيه .. اعرفي المفتاح لقلبه .. أذا عرفتي المفتاح لقلبه , راح ترتاحي بالعيشه معه .. .. واذا تقدرين تثبتين على طليقك لأنه مدمن .. أثبتي هالشيء وطالبي بفحوصات تثبت ادمانه .. واذا شفتي اي شيء على ابنك يدل على قسوتهم معاه لا تسكتي , اثبتي هذا الشيء بالشرطه .. وبعدها طالبي بابنك .. .. لكن اذا اهل ابوه يعاملونه كويس , هو مرتاح وزين معهم , وما قدرتي تثبتي ادمان طليقك .. ماراح تقدري تجيبي ابنك لحضنك , فلا تتعبي نفسك , وتهمي نفسك , وتتعب نفسيتك على الفاضي , عيشي حياتك وهو بس يكبر راح يجي لك .. .. الله يوفقك ويسعدك .. وطبعا ما يحتاج أذكرك بفائدة الدعاء وقيام الليل , والاستغفار .. |
| الساعة الآن 02:57 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©