|
كيف اطلب زوجي مصروف ..؟اخجل!!
بسم الله الرحمن الرحيم ........
اخباركم يااعضاء ان شاء بخير ...... انا عندي مشكله ومو مشكله الا خجل مني وبصرحه ! الاهم متزوجه وسعيده بزواجي ولله الحمد... زوجي الحمدلله كريم معي ومع غيري واي شيء اطلبه يلبي لي !! وله من الصفات الحسنه الي تعجبني فيه ومافي انسان كامل الاهم بلموضوع ان لي من بداية الزواج 2 ونص وهو يعطيني مصروف شهري احيانا 200 ريال واحيانا اكثر علئ حسب كل شهر .... لكن انقطع 7 شهور ويكمن اكثر بشؤي... ومعد اعطاني بحكم يمكن انه مايبخل علي بشيء او بسبب ضربة الميزانيه مره عزيمه لضيف جديد للزياره او السفر او خراب سياره او لابتوب ووو.........الخ..وهذا غير الاجار.. لكن الحمد لله بدينا نحكم الصرف يعني صرنا نصرف بلشهر 2الفين ريال من 9الالاف وشوي الاوضاع تمام راتبه 9 الالاف ماشاء الله .. الاهم هو من النوع الحساس العصبي وينحرج مني اذا قصر معي بئي شيء او واجهته بخطئ... لكن التفاهم هو يحل الامور ..... وانا من النوع الخجوله جدا منه حتئ لو اطلبه طلب معين تشؤفوني يحمر وجهي وأتقرب واطلب الشيء الي ابيه! ومااحب اناظر بوجهه ماادري كذا !وهو يضحك يقؤل عادي وش فيك اطلبي ! ...يمكن لاني بحياتي ماطلب شخص مبلغ ...وانا طبعا مو موظفه وعندي ولد ... لكن اخجل منه من طلب مبلغ مثلا ابطلب كل شهر 200 ريال شهريا ....... كيف اطلبه ؟؟كيف ابدء ؟؟كيف افاتحه من الاساس ؟؟وكيف الاسلؤب وهو من النوع الي ينحرج؟؟ ابي اسلؤب منكم يااخواتي لاجل اقؤله له .... ماعرفت وش ابدء فيه وكيف اقؤل له .... وكيف اتجرء واطلبه... لساني ينربط اذا صرت ابقؤله ماعرف كيف ابدء ..... واذا للاخوان رد فلا يبخلون علي ........ طبعا هلمصروف احتاجه سؤئ لاامي اذا احتاجت ...لان ابؤي الله يهديه يرفض عليها بأشياء مهمه وتحتاجها وكثير تتسلف مني وانا والله ماابخل عليها لكن يعني اخاف تطلبني او تحتاج وانا ماعندي فاانحرج وانضغط!! اطلب زوجي بذيك الفتره مبلغ وقدره مثلا 300 او 400ريال طبعا مو كثير لكن بتكون مفاجئه لزوجي بيظن اني مزنوقه بشيء واكيد بيسئل وش تبين غريبه انتي متسلفه ؟؟يعني بيخاف..لانه مو متعود اطلبه بشهر واحد والح عليه ....طبعا امي ماتطلبني لكن اسمع مع اخواتي الصغار انها تحتاج وانا بنتها الوحيده المتزوجه والكبيره وانا اقدر اساعدها فليش ابخل عليها ...وانا فلوسي الي قد جمعتها قبل !ناقصه حاليا وامي بحاجة لها من ناحية صحتها !!صح اكيد بترفض لكن دائما احلف وتاخذها وهي الدموع احيانا بعينها لانها محرجه لكن مهما كان هاذي امي..... انا غالبا اجمع المبلغ !و امسكه للصرف علي اثناء نزولي للسؤق او للسؤبر ماركت وهذا الاغلب.... ...او هدايا لااحد من اقاربي بدون مااقوله طبعا اني ابصرف واحتاج وغالبا استاذن منه للنزول مع ابي واتي فيقؤل لي تحتاجين شيء ابجيء وانزلك بكره ..فااقؤل لا ابتمشئ واغير جو .....واعلمه فيما بعد ... هو يتضايق ويزعل ويقؤل هذا مصرؤف لاتصرفيه السؤق خليه علي ,لكن اقنعهان هلفؤس منخيرك ومن هلكلام...... فانا لاجل هالشيء انا خجلانه كيف اقؤل له الله يخليه لي ولا يحرمني منه ؟؟؟ والله العظيم اخرها امس ناديته قال نعم قلت لالا تذكرت خلاص.... ماقدرت وماعرفت وش اقؤل ..؟ اكتب لكم ويديني معرقه واتخيل نفسي وانا اطلبه !خجلانه ويدين معرقه من الخجل. وجزاكم الله الف خير ...لاتظنون اني اتدلع او وحده فاضيه تكتب .....وربي اني جاده بكل حرف كتبته هنا .!.... |
شوفي يالغالية.. موظوعك بسيط.. بس يبي شوي تفكير .. وشوي جرأة.. وشوي أسلوب..
بالنسبة للتفكير: حطي في بالك هل الأفضل أنك تخلين طلباتك مفتوحة يعني كل ما أحتجتي تطلبين من زوجك .. وبكذا ماراح يكون لك حد معين( يعني ممكن تصرفين بالشهر 3 ألاف وممكن ما تطلبين ولا شي) أو أنك تاخذين مصروفك وتكونين مسؤولة عن نفسك.. ولو خلصتي مصرفك واحتجتي ماراح تقدرين تطلبين أو تطلبين على أستحياء.. كم المبلغ اللي انت تحتاجينه.. كم هو يقدر يقتطع من راتبه.. بالنسبة للجرأة: في حال انك قررتي تبين مصرف خاص.. تقولين لزوجك.. ودي أفتح معاك موضوع وانت شوف اللي تقدر عليه.. قولي له: انا ودي بمصرف خاص فيني كل شهر وماعليك مني ولا راح أطلب منك إلا بالشديد القوي.. فأنت كم تقدر تعطيني؟؟ ووضحي له انك بعض المرات تصير لك خرجه مفاجاة مع أهلك أو صحباتك وودك يكون معاك مصرف بدون ماتطلبين.. أو ودك تفاجئينه بهدية بدون مايدري.. وهذا يتطلب انه يكون لك مصرف خاص حسب قدرته.. وأنت عاد تقدرين بعدها تسوين فيها اللي تبين.. لأنها صارت لك. |
احلاهم واتحداكم
الله يسعدك حسيت وفرتي لي وش اقول ؟؟؟ يعني ابحفظ الي قلتيه انا متاكده اني لوطلبته مصرؤف اكيد ماابطلبه الا بلشيء الضرؤري الي مااقدر عليه انا احتاج بس 200 ريال فقط واجمعها كل شهر ....واصرف علئ عمري من احتياجاتي الملحه لي ... |
اقتباس:
تمام .. بس أنت لا تحددين لزوجك كم تحتاجين.. يمكن يعطيك أكثر:25: إذا قال لك أنت كم تحتاجين؟ قولي له انا بمد رجولي على قد لحافي.. ما أبي أكثر من اللي تقدر تعطينياه.. يعني خليها عليه.. عشان لا يحس انك طماعة .. وأنك فعلا مراعية ظروفه.. وأنه هو اللي مخير بتحديد المصرف.. |
اتحداهم واتحداكم
الله يرزقك من اوسع ابؤابه اللهم امين افديني اكثر الله يجزاك الله الف خير انتي وكل من يفيدني برئيه .... انا بصراحه حددت 200 ريال لاني احس مناسب لحالتنا الماديه لان تجي طخات تاخذ ربع الراتب وتكون غصب عنا مو تبذير لكن مره السياره وغيرها ...... وابقؤل مثل ماقلتي ..لكن احس اني احرجه واحيره هو !! لانه بينحرج يخاف يعطيني قليل او يعطيني كثير رغم الاجار الجاااااامد؟؟!! لكن ابسؤي مثل ماقلتي وهو يحدد بكيفه وابقؤله طبعا انت حدد وبكيفك وانت ادرئ براتبك ووضعك! وانا راضيه بلي تعطيني.. وانا والله ابكون راضيه عليه حتئ لو انها 50 ريال ..عادي الاهم يكون لي صرفيه .. هو يعطيني اذا صرت عند اهلي رايحه اجازه او استراحه لانه يخاف تحصل قطه او شيء لكن كانظام شهري لا انقطع .... |
ها قلتيله ولا بعدج خجلانة ؟ :d
عزيزتي اول شيء أحييج على حيائج من زوجج بصراحة شي حلو هل هو أكبر منج بوايد ولا انتي خجولة زيادة ؟ المهم في كلا الحالتين إذا بعدج ما قلتيله عن المصروف احسن طريقة اشوفها انج تكتبين اللي تبين منه في ورقة او مسج ويكون كلام مرتب واطلبي منه المبلغ اللي تبيه شهريا موفقة |
يادلبو ياهموس ماشاء الله عليك 200 وكل هالحياء
الله يخليكم لبعض يارب |
اقتباس:
|
اقتباس:
والله ضحكت من ردك علي يمكن تشؤفون موضوعي اني مكبرته لكن والله ماكتبت الا اني بجد والله ماعرفت اطلب ولا كيف اقؤل له !!.؟؟ وانا مشكلتي خجلي شؤي منه اثناء الطلب وبلاخص هالشيء الله يسعدك يارب. |
اوعدكم اني بقؤله باذن الله علئ حسب مزاجه ابي وقت مناسب ...!!
اقسم بلله ان فيني خجل من اني اطلبه لكن الله يعين بقؤله العصر. |
انا كنت احس باحساسك هذا مع ابوي الله يطول في عمره كنت استحي اطلب منه وماعمري طلبت
كانو اخواتي يطلبو بدالي . وابوي يعطيني الدبل .. اما زوجي كان هو يعطيني من نفسه ولما مسك كم شهر يعتقد ما باستفيد من اللي بيعطيني انا ذكرته مع ان راتبه ما يزيد عن ال300 الاف لكن اقنعته ان لي نصيب منها يمكن باشتري شئ او اوفر لوقت االضروره يمكن ابي اجيب له هديه واقنعته ان انا مالي دخل إلا هو وقلت له تعودت على خيرك .. عطني اللي تقدر عليه .. صار احيان يعطيني 500 واحيان 200 معليش خير ونعمه واي شئ يجيه من خارج العمل .. أقول ما شاء الله الله يزيدك ياترى كم بيجيني من خيرك اللي تعودت عليه اهم شئ يعطيني بطيب خاطر ويفتكرني 7شهور كثيره .. على فكره همس انا كان بيكون لي اول رد بموضوعك بس من اجي اكتب بنتي تسحب الفيش او تبكي والحين معصبه وملخبطتني مو عارفه اكتب اعترفي ايش في بينك وبينها ؟ :d |
همس 200 ريال شوي يابنتي بهالزمن اقل صرفيه ايد بالشهر بدها 1000 ريال
والله ماطلبتي شي بعدين هالمتين بتعطيها لامك ولا بتصرفي منها عزيزتي لاتحددي احكي لزوجك محتاجه منك مبلغ كل اول شهر تعطيني بيدي اخلي معاي للطوارئ اذا الح يقول كم اطلبي 500 ريال تكون معك بالمحفظة كل اول شهر والله مو عيب حبيبتي احنا لما نتزوج زواجنا بيعيلونا يعني مو حلوه تكون محفظتك فاضيه لازم يكون مبلغ فيها للطوارئ عموما انا عندي فضول ايش رح يصير معك رجاءا خبرينا على فكره انا قبل لااشتغل كنت متلك بس بعد 9سنين زواج خلااااااااااص صرت اطلب وبعين قويه مافي داعي للخجل الله يوفقك ويباركلكم تحياتي |
بتلات الورد
يسلم مرورك والله يخلي لك بنتك ويحفظها لك ..... اما انا نفسك اخجل اطلب ابؤي الئ الان لو احتجت لائيشي ارسل اخواتي يتوسطون ولا امي والان تزوجت من سنتين والحاله مستمره معي اخجل والله .. |
اقتباس:
الله يسعدك يارب انا زوجي يعطيني هدايا شهر او كل شهرين ويعطيني اي شيء ابيه واحيانا مااكذب يعطيني واستمر مده طؤيله يعطيني لكن فتره انقطع يعني كان يعطيني 500 او 300 علئ حسب صرفيه كل شهر ..... ابقؤلكم نهاية المجازفه ياليؤم يابكره .. |
ياقلبي ياهمووسة و الله حاسة بيك:) نفس الشعور و استحي
خاصة انه طول عمري كنت مستقلة ماديا الله يخلي منح الجامعة :) وزوجي رافض فكرة المصروف .. يقول لي اي شي تحتاجيه بس افتحي المحفظة و خذي اللي تبيه ... المهم ياقلبي انا توصلت لطريقة اطلبه بدون ما انحرج.. يكون طالع من البيت . و قبل مايطلع اروح الحمام اكرمكم الله بسرعة :) واقوله حبيبي فدييتك محتاجة شوي اغراض لنفسي ممكن تحط لي فلوس ..:) واذا سال كم .. ردي المفضل .. انت كريم و انا استاهل :) فايحط لي ... \ ممكن تجيبيها بطريقة مرح .. مثلا لما ينزل الراتب .. البسي لبس طفولي و سوي ظفيرتين وروحي عنده و مدي ايدك بضحك و قولي له بابا راتبي :) :) الله يوفقكم و يسعدكم يااارب |
انت كريم و انا استاهل
هلكلمه حلوه واظن لو اقؤلها اعتبر سؤيت معجزه فايحط لي ... \ ممكن تجيبيها بطريقة مرح .. شكللي اذا ماقدرت جد ابتحول الئ مرح الا هم بس اقؤل ! مثلا لما ينزل الراتب .. البسي لبس طفولي و سوي ظفيرتين وروحي عنده و مدي ايدك بضحك و قولي له بابا راتبي يانوره اول ماقريت هلرد !!!حسيت بحر صيييييييييييييف !!!!!بديت اعرق بجد تخيلي انا لي سنتين ويطلب ارقص لو دقيقه لو هزه بس!! ارفض وانا بقمة الخجل فما بالك لو هلحركه اظن بتعجبه واكيد لكن انا ابتقطع وبقؤه انا لا تظنون اني خجلانه بكل شيء لا بلعكس لامن لبس له ولا من كلام مبدعه لكن طلب هذا تعجيز عندي . الله يوفقكم و يسعدكم يااارب تسلمين قلبي والله يسعدك منتي هينه ماشاء الله . |
اختي الحبيبة..
كنت اعاني مثلك، اخجل جدا من هذا الطلب بالذات انني كنت اعمل قبل الزواج وكان راتبي جيدا.. ففكرت في طريقة هي ان اطلب منه ان اعمل مرة اخرى_ هو كان رافض تماما_ وانا كنت ألح الحاحا شديدا ولمحت له انني ستكون لي استقلالية مادية ولن اطلب منه شيئا، فقال لي، اي شيء تريدينه اعطيك اياه، سأعطيك مصروفا شهريا، تخيليه راتبا كما لو انك مازلت موظفة.. لكنني اعتقد انك لا تستطيعين تنفيذ الخطة لانك 21 سنه يعني لم تنهي دراستك بعد.. المهم، طالما انه كريم، فلا اعتقد ابدا انه سيرفض، تشجعي وازيلي حاجز الخجل، فأنتما واحد، ان لم تطلبي منه فممن ستطلبين؟؟؟؟ |
هلا ام محمد
تسلمين والله باذن الله تشجع واقؤل له العصر اليؤم او بكره علئ حسب راحته ونفسيته الله يسعدك يارب .. |
ياويليييييي
والله اخجل وانا اطلبه بس ليه اخجل ؟؟ لانه لازم يسال ليه وش تبين ووش محتاجه ولاااازم ؟؟وتحقيق افففف قرف وهالشهر رايح يشري رسيفر حول الالف وانا وبناتي محتاجين لبس واغراض حق البييت واشياء كثيره حسبي الله ونعم الوكيل >>>>مجرد فضفضه .. |
هههههه حلللللوه انت كريم وانا استاهل
بجربها يمكن تنفع |
اميرة الرومانسيه
يسعدك ربي الحمدلله زوجي مايحقق لكن يعني ممادري احس بااحراج ...... لكن في البعض من الرجال كذا الله يهديهم والله ياخوفي زوجي لاطلبته يقؤل كذا! |
موفقه ان شاء الله
|
ياقلبي .. اتووقع الخجل طبيعي .... بس يبيلك ماتناظرين فيه وسووي نفسك مشغووله مع ولدك وكلميه :22: بالنسبه لي عمرري ما طلبت مصروووف منه ابد .... بس اذا ناقصني شئ اقووله وهووو مايقصر ... فيني شي غريب لما اطلع من السوق يجيني تأنيب ضمير مو طبيعي :d ... اخااف اكوون كثررت عليه المصاريف ... وضيقت عليه ... وربي احياناً اندم واقوول ياليتني مارحت ... اتحدا يمر شهر يكوون صاارف علي لوحدي اكثر من 200 ريال .. كل شهر 200 لشئ مره عطر مره لبس او نص لبس :) انتظرك همووووسه ... وبشررررينا .. وصدقيني الخجل مع الوقت يرووح اللي سمعت عنووه ... مووفقه |
الله يعينك موقف محرج
ماادري ايش اقولك ...طيب ممكن ترسلين له رسالة قبل مايجي واذا جاء سوي نفسك نايمة ماافضل اطلب شي وانا منحرجة يكون وجها لوجه احب الرسايل مرررررة تفك ازمة ..واحسها تخليه يفكر وتعطينه وقت يحسبها صح احسن مايقولك مبلغ وبعدها يحس انه خرب الميزانية وينحرج يقولك انو راح يقلله .. موفقه تحياتي |
اختي همس الله يكثر من أمثالك بس خجلك مبالغ فيه كثير ونا مع اللي يقول لاتحددي الي تطلبينه
الا اذا كنتي محتاجه مره , ولاتضغطي ع زوجك ابد مثل مايقولن بعضهن ؟؟ الرجال دايم حتى لو يبقى من الراتب شي كثير يحاول يرتب نفسه ويجمع عشان يبني أو يشتري أو مشروع لكم ,يعني الزوجه هي العون الرئيسي لزوجها انا والحمدلله راتبي مكشوف ولا اخفي اي شي عنها عشان تعرف اي ريال وين ينصرف وتقدر الضروف اللي نمر فيها .. بس تشجعي شوي والله يوفقكم |
ما احب احدد نفسي بمصروف
بس انتي في حالتك قولي له كانت لك عاده معودني عليها وقطعتها ياريتك ترجعها وراح يسئلك وقولي له مبلغ كنت تديني اياه وكان جايب لي الاجر اتصدق منه واهدييك منه واهدي والديني ووالديك بالرغم من قلته وان شاءالله ماتخجلي وتقولي له هالكلام اذا عجبك موفقه والله يسعدكم ويهنيكم ببعض ويبعد عنكم شر الناس |
طمنينا يا همس..
ماذا حصل؟؟؟ هل طلبت؟؟؟ والله شكلك استحيتي..:d |
:d:d:d:o:o:o:o:o:o
:o:o والله العظيم ياام محمد الئ الان مربوط لساني كل ماجلست معه احاول اتكلم لكن ماقدرت وبلاخص والسبب!!! لان بكره نازله السؤق انقضئ هدايا لعرؤستين ابحظر زواجهم ولا بعد اتقضئ لولدي .... وانا ماناقصني شيء وهذا الي اقؤله له !!!! لكن الصدق ناقصني اشياء ....... انا عادي اقؤل ابي السؤق ناقصني كذا ...!! لكن انا مراعيه ظروفه بسب خسائر الشهرين الماضيه !!طبعا مو لعب بلفؤس بل اضطراريا .... وهلشهر شؤفؤا هديتين ... والبسه لولدي ... فانا مستعده اقؤله له من الشهر القادم ودي بمصرؤف شهري......... لكن قررت اني اقؤل له ارسل له مسج واكتب كلام وباادب وخجل بعد !!!:16::16: وهو بيتصل ويعاتبني ابشري ماطلبتي شيء لكن ليش ماقلتي لي ؤجها لوجه........ وكعادتي خجلت منك .....والاسطوانه من اول وجديد انا زوجك واذا ماطلبتيني تطلبين من !!! لكن والله العظيم ودي اتجرء واكلمه وجها لوجه لكن ماالحل الا اني كعادتي معه ارسل له مره عتبي بتصرف منه او طلب مني له ...... وكله مماقدر اوقف بؤجهه واقؤل عتبي او طلبي .....والله يعين لكن بكره الصبح ابرسل له .... اسفه اكيد رفعت ضغط البعض !!! لكن والله العظيم خجلانه وبلاخص لانه مو مقصر معي ولا مع امي وابؤي بلاعياد وغيرها والله هدايا لي ولهم ولااخواني مانروح الا ويدينه شايله حلويات وتورتة نجاح وقت نجاحهم ل سنه وانا احيانا اقؤل خلاص بلاش تونا قبل اسبؤعين جايبين فيقؤل لا حرام هذولا اطفال وابيهم يفرحون !!!! فهو من خلاني اخجل من عطياه.. صح معي مبلغ لكن نهايته بيخلص !!! واخافا احتاج مبلغ ...وبذاك الوقت اندم !!!وانحرج اكثر واطلب مبلغ معين !!! لكن باذن الله ابقؤل له بكره سؤئ الصبح او العصر لاني خلاص نويت اقؤل ! |
تصدقين يأخت همس
1-أسلوبك الحياوي حتى لو كان خارج عن ارادتك, 2- قناعتك بالمبلغ الزهيد, لهم دور كبير في تسخير زوجك لك بعد الله.. لو كان كل الزوجات كذا في طلبهم المصروف كان أخذوا مايتمنون وزيادة.. الله يخليكم حق بعض.. |
ياااحبي لك همس ليش كل ها الخجل والله لو طالبه 2000 ريال
عادي حبيبتي قولي له بكل ثقه هذا من حقك رجالنا مايقصرون ونطلب <<رايح فيها المسكين بعدين ماشاء الله راتبه حلو و200 قليله <<تحرضك بس انتبهي يلا عاد قولي ترا الموضوع مايحتاج كل ها الحياء لانه شي من حقوقك |
أول شيء
أسأل الله أن يوفقك مع زوجك والله أنتِ طيبة وزوجك طيب ولايقين لبعض الله يهنيكم وأعجبني حياك وزوجك مو مقصر معاك لو طلبتي صدقيني راح ينبسط منك لإنه عارف إنك ماطلبتي إلا لحاجة ضرورية وأتمنى لك التوفيق |
انتي رائعة ياهمس ربي يحفظك ويحفظ لك زوجك ويتم عليكم السعادة
شوفي حبيبتي روحي له وكلك ثقة بنفسك قولي له حبيبي ابي فلوس عشان لو احتجت شى مازعجك قوليها وانتي تمزحين وتبتسمي وتدلعي وبكذا مرااح ينجرح فديتك ياهمس اصيلة |
يااختي همس الله يسعدك كلمي زوجك ولاتستحي حاولي تكلميه في وقت يكون فيه مبسوط وكلميه بهدوء و إن شاء الله بيرضى ويعطيك
|
ادام الله السعادة بينكم وشكلك متفاهمه لوضعكم
وعادي كلميه عن مصروفك ولو يزيده افضل لان 200 لا تكفي احتياجاتك وممكن ادخار منها للحاجة |
اقتباس:
اقتباس:
اقتباس:
اقتباس:
لكن انا ابطلب وهو يحدد علئ حسب مايبقئ من الراتب ...[الله يرزقك من ابؤابه ../SIZE] اقتباس:
اقتباس:
اقتباس:
لكن انا انتظر الوقت المناسب لان امس ماامداني رحنا لعزئ ...وبعدها للسؤق من الساعه 7 الئ الساعه 10 ونص...وكان تعبان من كثر اللف وانا بعد فقلت انتظر الوقت المناسب .. والان الساعه 5 الصبح الاربعاء!!! كتبت له هلرساله بجواله بلمحفوظات وابقؤل له اذا ودعته عند الباب لك رساله بلمحفوظات او المسودات ... لان ماعندي رصيد ارسل له صرفته في مكالمه مع ابؤي ..الاهم مضمون الرساله هي ... صباح الورد ياورد ... لي موضوع ابي اقوله لك من كم شهر ؟؟!! وهو مهم بنظري !لي شهور ابي اقؤلك عن هلموضوع لكن الخجل هو الحاجز للساني من اني اقؤل لك ... وبنفس الوقت لاتفهمني خطأ بانك مقصر معي او محتاجه هلمبلغ للضرؤره ..لكن سبب خجلي هو عطياك بصراحه ودي يكون لي مصرؤف شهري لي انا !!لاني كنت سابقا اصرف علئ هدايا لك او لااهلي او احتياج لي شخصي ..وودي يكون هلمبلغ اصرفه مثل ماابي بدون اي احراج منك اشناء الطلب ...ادري مابتقصر انت كريم وانا استاااااااهل ..... لكن الاهم قبل ماترد ...انت اعلم بلميزانيه وبظروفك ...وانا راضيه بلي تعطيني .!!! لان اعرف بلميزانيه وظروفك ... تحياتي لك ... |
اقتباس:
اقتباس:
اقتباس:
اقتباس:
والله يسعدك يالغاليه وتحياتي للجميع والف الف الف الف شكر وجزاكم الله الف الف الف خير ... والله لولاكم ماكان تحمست وقلت له بلرساله واكيد انه كان ودكم اني اقؤله له وجها لوجه لكن والله وربي ماقدرت خفت ينحرج مني لانه انقطع ويعطيني مبلغ كبير كمجامله ويكون اعتذار منه علئ انقطاعه فقلت الرساله افضل لاجل يفكر ويحدد هو بدون اي احراج منه لي .. |
دقائق وبيروح هو للدوام ويمكن يااخذ الابتوب لدوامه ويمكن لا!
وابرد لكم الظهر او قرب العصر اثناء قدومه من المدرسه ... لاني خلاص كتبت المسج بجواله ... والله يعين ماادري كيف يكون ردة فعله اكيد بيخاف من المسج علئ باله عتاب مني له والاوضاع تمام ولله الحمد لكن ابطمنه وهو بيقرئها وهو بلسياره ! وابقؤل المسج هو طلب مني لك فكر ورد لي ...ولا تلومني .. |
صباح الخير
ابشركم هم وانزاح عن قلبي وبقؤه !!! ودعته وماقدرت اقؤل له ان في رساله لانه بيخاف وبيفتحها امامي وانخجل بذيك اللحظه طليت بعد خروجه من الشباك وشفته دخل السياره وارسلت كولمين له واستقبل وشاف فااتصل بي !! وقال السلام عليكم هاه ناسي ان شيء .......؟؟!! قلت لا لا انا انا اب اقؤلك شيء لكن لاتخاف ..؟؟ وهو ان لك رساله بلمسودات فيها طلب مني لك ... ولكن قبل ماتقراها اقول لك شيء ان ماابيها هلشهر لان اغلب الميزانيه انضربت واخرها امس انا ابيها من الشهر القادم وبس ..! وهو طلب انا احتاجه بصراحه وخجلت اقؤله لك وقدامك ... قال ابشري ابقراه وارد لك خبر ...والله يستر ... ضحكت بصراحه من كلمة الله يستر ...لانه متعود اني ارسل له عتبي في شيء ضايقني سؤئ منه او من اي شخص اواجهه... الاهم انتظرت دقائق الا ودق ...وبدت تعرق يديني ويحمر وجهي....يعيني بدء جو الصيف عندي الاهم وقال هذا وبس لكن سؤال انتي تحتاجين شيء ؟؟ ناقصك شيء؟؟ مزنوقه شيء ؟؟ قلت يعني ودي وبس يكون معي اهدي منه اعطي منه اشتري منه !!وبس ابشري طلبك موافق عليه !! لكن انتي كم تبين ؟؟؟<بدء يحرج مني خاف يعطيي قليل وهذا الواضح من اسؤبه !! > جيت انا وقلت حبي ات حدد انت اعلم بلراتب كم يبقئ منه ..! قال طيب والله ابشري انتي تستاهلي وانا وانتي ابناقشك بلموضوع اليؤم لاني وصلت للمدرسه !! وبنحدد المبلغ الي تبينه ..! قلت فكر كم تعطيني وانا راضيه ! عادي .... وقال ابشري فقلت يعطيك العافيه ماقصرت باي باي .... آآآآآآآآآآآآآآآآآآآآآآآآآآآآآآآه هم وراح وانتظر النقاش اليؤم الظهر او العصر بأذن الله . الف شكر لمن قرء ولمن تابع ولمن رد وجزاكم الله الف خير .. |
الله يسعدك يا همس
خليتيني اقرا و انا على اعصابي ايديني تعرق و حالتي حالة المهم ياقلبي الف الف الف مبررروك على خلاصك من هذا الهم :) بس ها لي نسبة من المصروف >>> ايجار جملتي انت كريم و انا استاهل :) الله يسعدكم و يوفقكم .. انا لحد الان مادري اخذ مصروف ولا لا ... يسيب لي فلوس قبل ما يطلع دوامه على اساس اذا احتجت شي للبيت ... يسيب لي كثثيير الصراحة فا اجمعها .. احيانا نكون برى و ماعنده .. ماسحب من الصراف .. فا اقوله انا معي و اطلع له مبلغ محترم فاايستغرب من وين .. اقوله من اللي تسيبه لي . فايضحك و يقولي ما تصرفي فا مادري اكون اجمعها و اخليها لنفسي و لا اعطيها ياه و لا اطالب بمصروف |
وبعد خجلانه تطلبين ميتين اذاً انا مضحوك عليه المدام تطلب الف الفين وثلاثة و وتقول يالله تخارج طيب اوريك فيها من بكرة 200ريال ولاغيرها ولاريال :29::29::29::29::29::29: |
| الساعة الآن 06:23 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©