|
كيف اقنع اهلي بالموافقة على زواجي منها
السلام عليكم
يناس انا من الضيقه اللي فيني ودي انتحر ودي ارتاح كل شي معكوس بوجهي عجزت من حظي الردي بقولكم قصتي بس ادري بتقول عني خبل صحيح بس امانه لحد يلومني المهم انا حبيــت بنت تكون اخت من زملائي بالدوام زميلي صراحه اعزه واغليه من قبل ما أحب اخته المهم اني حبيتها اخته كنت المحها لركبت الباص لمريته الصبح علشان يداوم معي وواجهته مره بالسوق واهله معه بس الوكاد ان البنت حبيتها وشقيت علشانها سويت اشياء اعتقد اني سفيه لاني سويتها كنت احاول اني اهلي يتعرفون على اهلهم بس بس ما قدرت فقلتله مره امي تبي حليب معزى من عندكم راح وجابلي وما قصر طبعا امي ما تدري ولا تبي اصلا حليب ورحت انا وشريت قطع قماش وحلا وحركات وقلت هذي من امي كل لسبيل التقرب منهم وتعرف على ابوهم وعلى واخوانهم واسير عليهم وضابط نفسي معهم بخلاقي وبكلامي وبهدوئي يعني صارو يعزوني معزه ويغلوني غلا مو بطبيعي وهو والله مو من شانهم من شان بنتهم بس المهم اني ابي البنت وكلمت امي علشانها وقالتلي <تبي ابوك يزعل انت تختار بنفسك صاحي انت> قالت تبي فلانه او فلانه قلت لا ابيها هي قالتلي<والله ما تاخذها> تخلي القريب وتروح للبعيد وابوي ما اقدر اكلمه لاني بصـــراحه استحي منه وانا من النوع استحي من طاري الزواج قدام ابوي تخيلو كل يوم اترجى امي فيها تكلم ابوي ويوم كلمت ابوي عنهم قال< يا جعله ما يتزوج اصلا يبي بنت فلان او فلان ما عندي مشاكل اوما ياخذله وحده مهي من بنات عمه لا> لانهم هم من قبيله غير قبيلتنا وابوي من الناس اللي متحجر حييل وامي مهي بعيده عنه بعد كل شي سويته بكل كلمة رجاء ترجيت امي فيها ولرحت لبوي ابي افاتحه بالموضوع اتلعثم واسكت مدري شسوي طفشان وتعبان حت بالجن سويت نفسي مجنون ولا نفع ابيها البنت يناس تكفون ابيها حياتي بنيتها معها وامالي بنيتها معها بالخيال ابي خيالي يكون صحيح وانا ولله الحمد مو ناقصني شي كل شي يتمنونه بالرجل يلقونه فيني بسسس حظي خايس مع والديني وابي بنفس الوقت رضاء والديني اهم شي ابي حت لو بيخطبولياها الا وهم راضين بأتم الرضا عني ابي حل تكفون لاني حالف اذ ما صارت من نصيبي لترك الديره بكبرها وبهلها |
الله يجعلها من نصيبك ..
أكثر من الاستغفار ... الاستغفار يفتح الأقفال يقول ابن تيميه أن المساله لتغلق علي فاستغفر الله الف مره او اكثر فيفتحها الله علي ماهنا شي على الله عسير ... الله يجمعك به |
السلام عليكم ورحمة الله
الله يهدي سرك امين اخوي اولا ماهو السبب اللي خلاك تحبها ؟؟ انت ماشفتها الا بعبايتها بس !! ومااتوقع صاحبك من النوع اللي يتكلم في اخته قدامك ؟؟ احس انك بس حطيتها في بالك وقمت تنسج احلام وردية وحبييتها من خلال خيالك فقط فماله داعي هالتعلق الكبيييييييييييييير .. لكن هذا ماينفي احقيتك في اختيار شريكة حياتك يعني انا ضد اهلك لما وقفوا ضدك .. لكن يااخوي الرجل يختلف عن المراة وانت قلها بالفم المليان انا ماراح آخذ الا فلانة ... لا تكون ضعيف قدام اهلك خصوصا انك لم تطالب بمعصية .. الله يفرج همك وييسر امرك ويحقق اللي في بالك |
وعليكم السلآم ..
وآلله مآأدري وش أقدم من كلآم .. مشكله العادآت اللي تسبب عوآئق بطريق الزوآج .. حآول تتجرأ وتكلم أبوك بخصوص هالبنت وامدح خويك واهله وقوله لاتحكم ع الناس اجلس معهم وانت اللي بتناسبهم .. وإذا مصممين ع رايهم أتركها لله وانسآها والله يعوضك خير .. |
قلب الماما< كلامك صحيح واكيد اني ما شفتها الا بعبايتها بس العايله ماشاء الله عليهم معروفين بالزين وبالدين
وناس بسيطين وعلى قد حالهم يعني لاكن تصدق ان البنت اعرف عن كل شي عنها اسمها ومدرستها وعمرها ومن زينها ومن شينها لا تقولي كيف لاني سويت المستحيل والمشكله لو اني بسن المراهقه يمكن اقول خيال ومدري ايش بس انا عمري 22 يعني تعديت المرحله اما من ناحية ابوي فأبوي صعب صعب صعب حيل ابوي لا يراعي مشاعر ولا ااحاسيس احد ابوي واعرفه زين |
كان الله في عونك يا ابني .. فانت في سن ابني ربي يحفظكم ..
اذا اهلك مو موافقين على البنت لانها من قبيله غير قبيلتكم هل انت متأكد ان اهل البنت ما عندهم نفس الفكره .. يعني ممكن انهم يرفضونك لانك من غير قبيلتهم ؟؟ و في الاونه الاخيره قرأنا الكثير عن مشاكل الزواج من قبائل مختلفه و تم تطليق الزوجين و مشاكل كثيره حصلت بين القبائل بسبب هذه النوعيه من الزواج .. يا ابني لا اريد ان اقول لك تمرّد على هذه العادات الباليه لانك لا تستطيع ان تواجه كل المجتمع بنفسك فالكثره مثل ما يقولون تغلب الشجاعه .. عندي سؤال هل احد من اهلك المقربين يعرف انك تريد البنت مثل خالك او عمك او اخوك الكبير و يكون له تأثير على والدك و ممكن يقنعه بالموافقه على البنت ؟؟ هل احد من جماعتكم متزوج من قبيله اخرى و مستقر في حياته و القبيله لم تعترض على زواجه ؟؟ بانتظار اجابتك يا ابني .. |
وعسى أن تكرهوا شيئا وهو خير لكم
والله ماتدري اذا اخذت هالبنت بتصير سعيد او لا مشكلتنا ننظر للمدى القريب ماننظر نظره بعيده ننظر لبكره وكيف بتصير حياتنا مع شريك حياتنا في ظل رفض المجتمع المحيط لهذا الارتباط يعني هل الزواج زوجه وزوج وبيت وعيال ولا علاقة تمتد للاسر والمجتمع أخي الكريم انظر لبعيد واستخر في كل امر تقوم به ترى هالبنت مراح تعيش معك لوحدك راح تتعايش مع اسره ولازم تتاقلم معهم ولازم قبل كل شي اهلك يكونوا موافقين الزواج وراضين به ليتبارك وتعيش في انسجام معها مجرد رأي |
وعليكم السلام ورحمة الله وبركاته
اخي الفاضل كم عمر بنات عمك الاتي رشحهن والدك ؟ هل هن جاهزات للزواج ام ستنتظرهم لبعض الوقت ؟ كيف علاقتك بأولاد عمك ؟ لو كانوا البنات صغيرات قل للوالد انا اريد الزواج الان ولا اريد الانتظار اما لو كانوا بسن مناسب للزواج في الوقت الحالي فحاول ان تتقرب لأولاد عمك وتلمح لهم ان اخواتهم كاخواتك بالضبط طبعاً تلميح حتى تصلهم الرسالة انك لا ترغب بهم كزوجات او لمح بذلك لأعمامك انفسهم وتكلم امامهم بصفة عامة ان العادات التي تجبر على تزويج الاقارب لبعض فيها ظلم للطرفين فربما يتقدم لبناتهم خطاب وهم يرفضون لانهم ينتظرونك مثلا . وحاول مع والدك ولا تيأس وقل له لو تزوجت ابنة عمي لن استطيع ان اسعدها وانا لا احبها وربما تصل للطلاق وهنا علاقتكم بعمكم ستتأثر وتحصل مشاكل وخلافات بين العائلتين وهذا مالا يرضاه والدك وقل لأمك ان تقول هذا الكلام لوالدك وتقول له غداً لو تزوج ابنة عمه فربما ذهبت تشكي لوالدها ان ابننا غير سعيد معها ولا يحبها ويعاملها بقسوة وابوها لن يسكت ويقول طالما لا يريدها لما اجبرتوه على ابنتنا دعها تقول له ذلك وحاول انك تدخل ناس او شيخ يكلم والدك انه لا يجوز ان يجبرك على الزواج بمن لا تريدها وتصدق بنية تسهيل زواجك وادعوا الله . |
جمعك الله معها وابعدك عن شر هذا الطريق لكن اذا كانت البنت محجوزه لأحد اولاد عمها وانت تقدمت لها ورفضوا راح تتغير نظرتك لصديقك وممكن تحصل مشاكل وافضل حل مني او من غيري هو الاستخاره اذا كانت العلاقه راح تستمر لنهايه العمر ع خير او تنتهي في نص المشوار وتأكد بعد هذا كلوا مشيئت الله فوق كل شي وعليك بالاستغفار فهو مفتاح الاقفال ومايرد القضاء الا الدعاء
|
اقتباس:
الله يعين الجميع يا رب ايه ايه عمتي تدري بس انها صغيره ولا لها قدره بشي اما من جماعتي القريبين لا محد متزوج من برى قبيلتنا لاكن عندنا شيبان ماشين على العصر القديم وبالعربي الفصيح بنات جماعتان القريبين واجد وخايفين انهن ينشبن بحلوقهن ولا يعرسن يعني يبون يخلصون منهن كل اللي اعرسو من قرايبهم محد طلع والله يعين |
اقتباس:
يا الله على الرد قعدت اقراه عشرين مره وكل ما قراه احزن بزياده وبزياده فعلا كلامك صحيح حت لو اعرست عليها احتمال كبير جدا جدا تصير مشاكل مع اهلي معهم وبدل ما يصير راحه واستقرار يصبح قلق وتعب يختي ردك بالصميم يعني انا ما فكرت ما بعد الزواج ولا حسبت حساب الاهل والحوووووسه اللي بعدين هــذا حظي الخايــس ونصيبي يعني وشلون اللحين اقعد معلق فيها وبس تفكيـر يعني كيف انسى لاكـن اذ ما صارت من نصيبي أعتقد ما من نصيب راح يكون غيرها |
اشكركم على ردودكم الرائعه
بس ا اخواني تراني قاعد اطلب المستحيل انا ..انا عارف وضعي عندي ناس الواحد بمخه حصاه ما يفتهم عجـزت وانا اسوي واسوي..تصدقون لي تقريبن يومين ما نمت والا زاد الهم هم اخوها بالدوام اليوم يقول رحتا حنا والاهل وجيت وانا االاهل ما غير يزيد بي المواجع والمسيكين ما يدري ..مرات تجيني حاله وضيقه قدامه ودي ابطها بوجه اخوها ودي اقوله<< احب اختك وسميها بسمها بعد>> بس مابي المعزه والغلا ينقص ما بيني وبينه بصبر بصبر وبشوف اخرتها ولازم أأحسم الموضوع اليومين ذي مع اهلي من بدري يأنهم يوافقون عليها او انا ارتاح من همي اللي انا فيه واسسسسف على ازعاجكم |
حاول انك تتكلم قدام اخوها عن عاداتكم الظالمة التي تجبر الشخص على انه يتزوج قريبته حتى لو كان رافض ودعه هو يقدم لك الحلول ويضع نفسه في مكانك وقل له انا اتمنى صفات اخرى ولو سألك عن مواصفات التي تتمناها اذكر مواصفات قريبة 90 % من اخته مثلا خلوقة من عائلة متواضعة طيبة اكون متفاهم مع اهلها وهكذا وشوف الحلول اللي هيقدمها لك لو قال لك لا تعصي والدك فستفهم انهم غير موافقين بدون احراج لك او لهم او احتمال يجد لك حل آخر ويشعر بشعورك ويتفهمك .
|
الله المستعان
اخي الفاضل شيل ايدك من البنت نهائيا طالما الموضوع فيه قبيله وعادات وتقاليد فلن تستطيع ارضاء احد يعني لو وافقت امك وابوك اكيد حتشب حريقه في القبيله بسبب عمانك واجدادك ولا تنسي زي ما انت عندكم عادات وتقاليد فيمكن ان اهل البنت نفس الشئ والمثل يقول اطلب المستطاع لتطاع الله يوفقك ويعوضك خيرا منها في رعايه الله |
اسأل الله لك التوفيق وراحة البال ..
نقل إلى مكانه المناسب . |
الله يجعلها من نصيبك ياااااااااااااااااارب
لكن تذكر رضا الوالدين اهم |
والله ما ادري شو اقولك المشكله انك صغير وخجول يعني لو حاربت في البيت هل بتقدر على حروب القبيله وانت شكلك بعد حساس ومن كل شي تتأثر انا اقول عندك حل من اثنين يا تنسى الموضوع تماما وتدعي الله يعوضك خير وترا حالتك اسهل من ناس وايد انت غير متواصل مع البنت ولاتعرفها ولاتعرف طبعها ولا أي شي مجرد خيالات وتوقعات ولاتطول اخطب حد من اهلكم احس انك لما تعيش الحب الواقعي بتغير نظرتك أو انك اعملها علي وعلى اعدائي وواجه كل هذيلا الناس وترا كلها 5 أو 6 سنوات وبينسوا وبيتعودوا |
يارجال هذا اسمه أول حب يدخل قلبك وبعدين انت حبيتها يوم شفتها تركب الباص اي حب هذا
وترى عمرك ياأخي الكريم صغير 22 توك العمر قدامك احنا مرينا تجارب مثلك وأقوى من تجربتك والحين نضحك على أنفسنا |
اقتباس:
اقتباس:
اوافق هذه الاراء ... فكل حبك وتعلقك بها نتيجة تخيلات رسمتها انت بنفسك . ولا يوجد اساس تبني عليه هذه التخيلات والاحلام فأنت لم تعرف طبعها ولا شخصيتها ولم تعرف ان كان هناك توافق فيما بينكم من ناحية الافكار والطباع وغيرها من الاساسيات التي تضمن السعادة والاستقرار . ثم لماذا لا تريد بنت عمك ؟؟؟ فلربما تسعد معها وتجد فيها كل ما كنت تبحث عنه . طع والدك وطالما هو سيكون راضي عنك فالله سيبارك لك في حياتك . وحاول ان تتفادي الاوقات التي تراها فيها لانها من عوامل بقاء هذه العاطفة في قلبك، فعليك أن لا تفكر بها وإذا جاءتك ذكراها في قلبك فاطرد هذه الفكرة بقوة،وانشغل بشئ آخر ولا تستسلم لهذه التخيلات والاحلام فكلما طردتها وحاولت التخلص منها سوف يضعف تعلقك بها. خاصة وانك تقول ان الارتباط بها مستحيل فلماذا تعذب نفسك . فالزواج ليس ارتباط شخصين بل هو ارتباط عائلتين وانت تريد ان تتخلى عن كل قبيلتك من اجل حبك ولا تنسى انك جزء من هذه القبيلة ومن هذه العادات وهم جزء منك . |
الله يكتبلك الي فيه الخير
سواء هي او بنات قبيلتكم وانت ماتدري الخير فين |
تعرف يا ابني من اللي يتحمل العبئ الاكبر في هذه المسأله ؟؟
الابناء .. نعم الابناء .. لا اللي هم منتسبين لقبيلتك مئه بالمئه و لاهم اللي منتسبين لقبيلة امهم مئه بالمئه .. يعني الابناء راح يكونوا ضايعين و منبوذين بين القبيلتين .. يا ابني فكّر بعقلك و ليس بقلبك .. يا ابني اذا انت وقفت على قارعة الطريق تريد سيارة تنقلك الي مكان آمن و اذا مرّت من امامك سياره و لم تقف لك هل تيأس ام تنتظر سياره اخرى لكي تنقلك الي المكان الذي تريد ؟؟ يا اخي لا تبحث عن زوجه خارج اطار قبيلتك حتى لا تتعب قلبك .. تحمّل تفكير قبيلتك الله يعينك .. |
معليش أخوي بكل أمانة,,
ضع نفسك مكان صديقك, فهل ستقبل بكلام صديقك عن أختك؟؟؟ وبعدها التمس العذر لأهلك وأبناء قبيلتك.. |
السلام عليكم رحمة الله وبركاته
اشكر جميع من كل شارك واعطاني رايه صراحه فيه اراء ريحتني والبعض منها فقدتني الامل واسمحولي لاني ما فتحت الجهاز اليومين هذي لاني بحاله يرثى عليها المهــم.. قــررت اني أحسم الموضوع من الاخر يعني يا سودا يا بيضاء لاني ماني قادر اقتنع اني انساها او انها مو من نصيبي.. المهم اني قدمت على اجازه اظطراريه من العمل لمدة عشر ايام .. وادخل البيت وجهزت غراضي بشنيطه وجهازي واطلع لبوي بالدوانيه.. دخلت عليه وحبيت راسه وسلمت على عمي وقلتله يا يبه.. انت عارف مبتغاي ولي حق اختار واشوف اللي تناسبني وانت ابوي وانت اكيد تدور التوفيق لعيالك لاكن يا يبه بنت فلان اللي علموك فيها ابيها وهذا زواج يا يبه مو لعبه اخاف بكره تغصبني على وحده تختارلها لي ثم ما نتوفق مع بعض او يصير شين ما نبيه حنا فلشور شورك ان كنت بتنهاني عنها فكلمتك على العين والراس المهم صار كلام وجدال طووويل بيني وبنه وجتني جراءه اني اكلمه بنفسي بالموضوع الزواج والعايله اللي ابيهم لان هذا حياتي ولي حق ولهم برضو حق بئرائي وبرائهم حت انه قال ابوي زين وبـــنات عمــك..قلت..وعمي يسمـع( ان قال الله ما تكون وحده منهن بذمتي) واستاذنته بالسفر قلت اني بسير على خالي بالكويت لاني مالي خل على قعدت البيت الغريب ان ابوي كان هادي وسمع كلامي من طقطق الي السلام عليكم وقالي( يصير خير إن شاء الله واذ كنت متضايق رح وسع بخويطرك شوي) وان اللحين عند خالي واحس اني مرتاح حيــل حيــا لاني حاس انها بتنفرج ادري اني خربتها قدام عمي وزعلته وابوي بعد اول مره يشوفني كذا لاكن على قولتهم < لجل عين تكرم مدينه> دعـــواتكم |
من جد احسك رجال بمعنى الكلمه
الله يوفقك وتكون من نصيبك اهم شي تاخذ الانسان اللي تبيه لانك لو عشت معاها مهما شفت منها من عيوب فبتذكر انك انت اخترتها وانت تبيها وصدقني لو عشت مع غيرها طول عمرك بتحس انك ماتبيها ومو مقتنع فيها وعمرك مارح ترتاح الله يكتبلك اللي فيه الخير |
الله مير يسلمك ويطول عمــرك
يختي ا الواحد بالدنيا ما يعيش فيها مرتين فاليش ما اخلي حياتي سعيده مثل الصلاه وطاعة الوالديت وحب الخير واابتعاد عن كل شي محرم ومن السعاده الزوجه اللي تتمناها والله يختي اني متامل خير.. الله يستر بس |
أللي يبيـــنا عيـت النفس تبغيه واللي نبيه عيا البخت ليجيبه
والله ذبحني التفكير تعباااان طفشااان ويش الحاله اللي انا فيها ذي انا ناقد على نفسي اللحين عيب علي رجال عمري 22 سنه(تدرون اني اللحين ابكي عليها) احس جسمي منمل وتقول واحد صاطرني بعصا على راسي احس بيفجر اعوذ بالله من الشيطان بحاول اني انام واتني بقادر افففف بس |
الله يكتبلك الخير بس احس انك بالغت في حبك وبالغت في ردة فعلك تترك الديره بهلها على قولتك عشان وحده تلمحها من بعيد طيب على الاقل اعرف اذا هي مخطوبه مثلا لاولاد عمها مو يمكن هم كمان عندهم نفس عاداتكم والبنت لولد عمها الله يكتتبلك الخير موفق |
اخي الفاضل استغربت حديثك في بداية الموضوع عن والدك ورجال عائلتك حيث صورت تقبلهم للموضوع من المستحيلات حيث تدرجنا معك في الحلول ولكن كنت تقول انتم لا تعرفون كيف يفكرون حتى قلنا لك بناءاً على ذلك ارضى بواقعك ولا تعذب نفسك طالما اهلك هذه عقليتهم ولكنك الان استطعت ان تتحدث عن رغبتك بالزواج من اخت صديقك امام والدك وايضاً امام عمك ؟؟؟؟؟ اذاً والدك ليس بالرجل المتحجر مثلما صورته لنا ولا عمك كذلك فلو كان والدك مثل ما ذكرت لهاج وماج على الاقل لوجود عمك معكم في نفس الجلسة؟ او كان عمك رد عليك رد ازعجك وذكرك ببنات عمك او او ولكن اتضح ان والدك رجل متفهم ويخاف عليك من الضيق ويبحث عن سعادتك .
وانظر ماذا ذكرت عنهم اقتباس:
اقتباس:
اقتباس:
اقتباس:
ربي يوفقك ويسهل امرك وتبشرنا بارتباطك بمن اخترتها وتسعد معها ان شاء الله . |
[align=center]اخوي لا تيأس فكثر الدق يفك اللحام ومادامك علمتهم انك مابتاخذ من بنات عمك وسمع
كلامك بيقولون خله ياخذ اللي يبيه الله يوفقك ويرزقك وان شاء الله ربي بييسر امورك بالتوفيق ..[/align] |
الله يكتب لك اللي فيه الخير يارب ..
|
الله يوفقك وييسر اموورك
|
زين ماسويت وان شاءالله ابوك يرضى وبيقتنع
واستحاله احد بيرضى يعطيك بنته وانت مغصوب عليها والله يجمعك باللي تبيه يارب بالحلال اللهم ياجامع الناس في يوم لاريب فيه انك تجمعه بالانسانه اللي يحبها بالحلال يارب وياليت تطمنا شلي يصير |
عليك با الاستغفاااااااااااااااار
|
اخاف تكون مخطوبه لاسمح الله
ولامايوافقون اهلها..بسيطه اذاماوافقوا تقدملها اكثرمن مره في الاخير بيقولون هذاشارينا يوفقون الله يوفقك |
| الساعة الآن 12:35 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©