|
زوجي ظلمني ارجوكم ادعولي
بسم الله الرحمن الرحيم
سادخل في الموضوع على طول زوجي يبي يتزوج في الاول كان يقولي بقسم البيت وبيعدل لكن لمن اعطوه كلمه وافقوا غلى الزواج بعد شهر اصبح يضيق علي ويقهرني تخيلوا كان رافض موضوع الشغاله تماما وكان يقول حرام وافق يجيبلها شغاله وانا لا يقلي مالك حق انا عندي 3 اطفال وحامل وسكت ورضيت اني اتنازل عن الشغاله وانا مقهوره بس علشان ما يطلق والحين صار يقلي انت ما راح اتريحيني في حياتي حتزهقيني وخلاني اتنازل عن المبيت وبعد كده طلبت منه غساله اتومتيك بد ل الشغاله علشان انا حامل وحتعب ما رضى وقالي ما عندي فلوس ما قدرت اتحمل طلعت من البيت وانا مقهور خفت على نفسي وعلى الي في بطني لاني تعبت من قهره ليه وعدم مرعاته تعبت من البكا ليل مع نهار فطلعت ورحت عند اهلي واخذت عيالي معاي وهو ما صدق على الله ما عاد يبي يقسم البيت ووشال غرفة نومي من غرفتي وحطها تحت وجاب غرفة نوم جديده و عفش البيت من كل شي ما خلا شي الا جابه اعطاها مهر 50 الف وهي مطلقه مرتين وواهلها طلبه منه 15 الف اعطاهم 50 فشخره واعطا امها 5 الاف وابوه الفين وكل هاد ويقول ما عندي فلوس من طلعت من بيته مارسل لي ريال لاولاده حرق قلبي ضيق علي وخلاني اطلع من بيتي واعطاه كل شي وانا ولا شي الحين اتزوج من يومين سوه فرح وزفه في صاله 20 الف وجاب ديجيه الي كان يقول حرام انا عم ببكي ليل مع نهار على الي سواه فيني وظلمه ليه اقسم بالله اني صبرت علي 11 سنه وتحملت منه كثير واهاني وحقرني وتحملت علشان اولادي ما يتشتتوا زوجي صعب جدا هو كان متزوج من قبلي كثير ومطلق انا اكثروحد ه جلست معه وعند ه اولاد من زوجاته السابقات وانا الي كنت معاهم وتحملت وضقت المر والحين بس لقا وحد تتزوجه رماني حسبي الله ونعم الوكيل والحين على ما سوا فيني ما ابي اطلق ما ابي اولادي يتشتتوا زي اخوانهم بس انا خايفه والشيطان بوسوس فيني اقول يمكن الجديده تاخذ عقله وتخليه يطلقني ما ادري ويش اسوي عيوني جفت من الدموع قلبي يحترق ما ادري ايش اسوي ادعولي الله يوفقكم انه يرجعلي ادعولي ان الله يهديه ويرده ليه ردا جميلا ادعولي انه زوجته الجديده على جمالها الله لا يجعل لها على زوجي سلطه ولا تخليه يطلقني ادعولي من اراد فيني سوء او باولادي الله يصرفه عني ويرد كيده في نحره ويشغلها بنفسها انا واثقه من الله ومتا كده انا راح ينصرني بس الشيطان بوسوس ليه وبحس بخوف من مجرد التفكير ارجوكم ادعولي ادعو لاختكم في ظهر الغيب عسى الله يستجيب لي ولكم ويفرج همي وكربتي ادعولي انه الله يحببني الى قلبه ويجملني في نظره انا منتظره ردودكم ودعاويكم الله يسعد كل وحده ترد علي |
اختي الغاليه انتي صبرتي كثير
اجلسي عند اهلك شوي اذا ما تعدل ولا قسم البيت مالك الا الطلاق العيال يتشتتوا ولا يشوفوا امهم منهانه كرامتها او مظلومه وخذي نفقتهم من ابوهم شهريا |
الله يرده لك ردا جميلا والاطفال مالهم اي ذنب انهم يتشتتون ارجعي لبيتك وربي عيالك وخذي حقه منه
والله ييسرامرك ان شاء الله |
مع احترامي أختي هذا ماهو زوج هذا واحد نذل و مزواج و أتوقع انك بتضيعين وقتك معه ..... الطلاق كرامة للمرأة مو إهانه .. الإهانه انك تبقين معاه و هو يعمل فيكي و بأولاده كذا ..
|
حسبي الله ونعم الوكيل..والله يآخذلك حقك منه.
|
إسمحي لي أختي ماراح أقول الله يرده لك .. لكن الله يغنيك عنه بغناة الكريم القادر على كل شيء ويعوضك خير في أولادك . أختك .. آه ياقلب
|
فرج الله همك وكربتك وعليك بالدعاء
اين دور اهلك لمادا لا يواجهوه ويناقشوه لكي يعترف بحقوقك |
الله يعينك حبيبتي ........
ويصبر قلبك ياااااااااااااااااارب |
حسبي الله ونعم الوكييل
الله يصبرك ويعينك ويفرج همك |
اللهم كن في عونها و فرج كربتها زوجك سامحه الله يبي له كف يصحيه مو كفاية أنك رضيتي بزواجه كان عدل بينكم بدل مو جالس يتكرم ويتجمل ويدفع من هالفلوس اللي كان بامكان يقسمها بينكم يجيب لك شغالة وغسالة ورضاوة لك مو بس يعطي الجديدة ويهملك ربي يهديه ويرجعه لك حرام الواحد يحرش زوجة على زوجها ولا كان خليتك تعطيه درس قاسي بس اصبري وحاولي ولا تيأسي والمكتوب عليك لازم يصير |
الله يعينك.. ويصبرك يارب ..
أسأل الله أن يرقق قلبه .. ويهديه الى الصواب . |
حسبي الله ونعم الوكييل
الله يصبرك ويعينك ويفرج همك |
السلام عليكم اخيتي اولا زوجك تزوج قبلك كم واحده وزيجاته كانت فاشلة انتي الوحيدة التي استطاعت ان تبقى معه هذه الفترة الكبيرة وهذا الشيئ يدل على انك انسانه بسيطة تتنازلين بسرعه واعذريني ان صح التعبير انتي ضعيفه شخصية فلو فرضتي نفسك بحدود حقك لن يستهين بك مادام استطاع معكى الاستمرار اخيتي بما انك صبرتي كل هذه االفترة وأرى انك تخافين شيء اسمه طلاق سواءاً حبا له وحفظاً للعشرة او خوفاً على اطفالك فابدئي مرحلة جديدة من حياتك كوني رحبة الصدر مهدي الطريق لكي يرجعكي لبيته وهناك احسني دورك كا زوجه لها منافس حاولى ان تكوني انتى من تلفت انتباهه دعي مطالبك حاولي ان تجعلي اوقاته معك مزاح وضحك خالي من المطالب الدنيوية وأن رئيته يغدق عليها لا تحتجي بل كوني انتي الطيبه فحسب كلامك انها كانت متزوجه من قبل وطلقت مرتين وزوجكي ايضا اظن هذه النقاط كفيله بأن تنبىء بمستقبلهم فاصبري والله يكون بعونك وحذاري ان تكوني الزوجه النكدية التي كلما جائها تحتج وتطلب فقط اسأل الله ان يجمع شملكم فيما يرضيية وللعلم لا يتزوج احد على زوجته الا بسبب فراغ عاطفي لم تعي الزوجة كيف تسده |
الله يفرج همج ان شاء الله...
شوفي حبوبة خليج كوووول تجملي واهتمي في نفسج آخر اهتمام .... لما يتصلج قوليله سوري مشغولة اسوي منكير والا اسبح، حسسيه بانوثتج، طوري من نفسج، الفاظج، حركاتج، نظراتج الساحرة، **دلالج،،،، واهو اللي بيركض وراج ان شاء الله... نصيحتي لا تتسرعين ولا تستسلمين للطلاق... انتي بعد لج حق ولا تتنازلين عنه.... الله يقويج الغالية>> حاسة فيج.... اشتركي في منتدى بلقيس... مش اعلان لكن صراحة... غير لي حياتي... وكله افكار انثوية خطييييرة للمتزوجات... دعواتيـــــ ويــــــاج |
ماذا تنتظرين من زوج استكثر على زوجته غساله وهي حامل وبالمقابل يعطي مهر للثانيه وامها وابوها !!!!! اخذي حقك من المحكمه تالت ومتلت مثل مايفولون
|
الله يوفق كل من رد عليه الله يجزاكم الف خير
|
غاليتى الله يفرج همك أكثرى من الدعاء لكن ليس عليه بل لكى أن يسخر لكى
وأنتى تنزلتى عن حقك كثير وما أظن أن هذا بنفع معه دفغى عن حباتك ولا تسمحى له أهانة كرامتك أكثرمن كذا أنتبهى لعيالك وحياتك لو جلستى أكثر من ذلك لتحطمتى نفسيا وسوف يؤثر هذا على أطفالك |
.. تركتي الجمل بما حمل !!!
.. اختي أرجعي بيتك , وعيشي فيه , ليش تتركين بيتك لهم !! ..بما انه انتي الوحيده الا للحين مستمره معاه من زواجاته , فاكيد مصير العروسه الجديده راح يكون مثل مصير السابقات , وما ارح يلاقي الا انتي الا صبرتي عليه .. وللحين موجوده .. .. لا تعطيهم فرصه يستمتعون ببيتك , ليش تضيقي على نفسك في بيت اهلك ؟؟ .. راجعي بيتك , وطالبي بكل حقوقك , من شغاله وغساله , ومصروف , وحق شرعي .. لا تتنااااااازلي ابدا .. .. ليش تخلين غيرك يتنعم بخيره وانتي الا المفروض تتنعم بكل هذا !!!! .. وذا رجعتي لا تحتكين فيه كثير , لانه الاخ توه معرس جديد , وماراح يتقبل منك اي شيء واي كلمه واي تصرف .. .. خليكي شوي صابره , وبعدها أبدئي بطلب حقوقك كلها وبحزم ,, بحزم مو بصراخ .. .. واهلك لازم يوقفون معك .. .. الله يصبرك .. ويعوض صبر خير .. |
حسبيا الله و نعم الوكيل فيه
الله ينصرك ....عليكِ بالإستغفااااااار كثيراااااا |
لاحول ولاقوة الا بالله
واحد بأخلاق زوجك ماتنفع معاه الطيبه ولا التسامح ؟! حسبي الله ونعم الوكيل في كل ظالم |
الله يجزاكم الف خير على ردودكم اليوم مرسلس رساله طبعا حملني الغلط كله ويقولي يترجع للبيت مع زوجته ويقسم البيت وما ازهقه ولا اطلب منه اي شي او يطلقني حسيت نفسي ولا شي عنده يبيني ارجع بس علشان اخلي الاولاد معاي خوفا اني اطلق وارميهم لاله وبعدين ما اتحرك وارسل الا لمن عرف اني ابي اروح مكه مع اخويه فهاد الي يهمه ما سال عني من رحت لبيت اهلي وما ارسل ايه ريال مصروف ليه ولا لا اولادي وما درى اذا نلقصنا شي ولا لا الحين يرسل بس يخيرني وبعدين الي هو مهم عنده لا تطلعي من بيت اهللك ولا تروح مكان الا باذني وهذا حقي انك تطيعيني يا سبحن الله هو وزوجته يطلعه ويمشيها ويروح ويجي وانا ما يبيني اطلع من البيت اشوف امور اولادي واتقاضالهم وخصوصا هو يدري ملىون بالميه انه ما عندي في بيت اهلي الا اخويه وحيد متزوج وما يفضا لا احد ودايم مشغول وامي هي بنفسها تروح اتجيب الي تبيه بنفسها لانه ما عنا احد الحين انا رديت على رسالته باني خيرته اما انه يفتحلي بيت لحالي بعيد عن زوجته واخذ كامل حقوقي زي زيها ولا يطلقني وما ادري الا سويت صح ولا لا بس الي متاكده منه اني مستحيل اقدر اتحمل رجعتي لللبيت مع زوجته لان اعرف زوجي راح يميل لهل وراح يقهرني ويهيني قدامها وما راح اصبر على كده
|
في رائي ترجع بيته ذي ما طلعت .. لأن زوجه ما طلب منها تخرج
وتحاول تلم أولاده عليها في ظل والدهم ولا تشتتهم .. والنتيجة لا يصرف عليهم وعلى الرغم من قسوة معاملة الوالد بس وجوده وأولاده بقربه أفضل مية مرة من بعاده .. لا أنصحك أختي إطلاقاً بالطلاق .. ضحي أنت من أجل أولادك .. ولك الثواب الكثير من الله وسبحانه لا يهمل دعوة المظلوم زوجك منقاد وراء عواطفه وشهواته بالزيجة الجديدة .. مرحلة وتعدي وخروجك من البيت مع العيال أعطاه فرصة أكبر يتفسح في البيت ذي ما عايز .. أرجعي بيتك وأقعدي على قلبه |
حلو قرارك جداً
كرامتك وصحتك النفسيه والجسديه ألزم ماعليك يايفتح لك بيت وتعيشن فيه بكرامتك يايروح بسلامته مع زوجته لان الوضع معاهم ببيت واحد مافيه واحده طبيعيه تتحمله ماأتوقع تقدرين تتحملين الظلم والقهر يومياً قدام عينك وتسكتين وماتسوين شي يعني روحتك للبيت معاهم غلط كبير في حق نفسك الله يفرج همك ويريح بالك |
اقتباس:
فمالمانع من ذلك .. لكن بشرط أن تكوني زوجة لكي كرامتكِ .. وليس مربية فقط لأولاده .. أرى لو وافقتِ ليكون أمام الأمر الواقع وربما مع مرور الأيام ينصلح حاله والله أعلم . ولاتنسي كما ذكرتي إنه مطلاق وأنكِ أكثر زوجة تجلس معه كل هذه المدة . |
النتيجه النهائيه لكل شي ...تبدأ من البدايه
بدايتك سيئه ,,,اختيارك سيء...فماذا تتوقعين ان تكون حياتك اختي هذا الانسان بكل بساطه لاتضيعين وقتك معه... قال احدهم في الردود السابقه المراه لاتخرج من بيتها واقول له اذا كان بيتها وليس سجنها ومكان لتعذيبها...وبلا نصايح سخيفه...لاتستغلون الدين لاهانة النساء ديننا حمى المراه وصانها واكرمها...فاهمين الدين غلط ليش اختي نصيحه لك هذا الرجل لايخاف الله اذهبي للمحكمه وطالبي بكامل حقوقك من منزل ومصروف شهري وحضانه للاطفال .... لاترحمينه ...ولاتكوني كزوجاته السابقاتك... سكوت زوجاته اللاتي قبلك اعطاه الضؤ الاخضر للأستمرار في ماهو عليه وحتى زوجته هذه لن تكون الضحيه الاخير.... قوي شخصيتك....واهتمي بنفسك وطالبي بحقوقك كامله مادري كيف تدعين ربك ترحعين لشخص مثل هذا |
اقتباس:
لها أبناء لاتدري أين تذهب بهم .. ولو تحمل الأهل لكن الى متى؟؟ تريد مصروف فماذا تفعل .. ؟؟ المحاكم والشُرط.. سالفتها طويله .. نحن مثلكِ أختي نطالب لها .. ولكن لاتضعين موقفكِ بمثل موقفها ولاتقيسين مايحصل لها عليكِ .. فالله سبحانه خلق الناس وجعل بينهم فروقات .. ! فمنهم من يتحمل ويصبر ويضحي أيضا .. ومنهم لا يتحمل أقل القليل ..! لا يدل حديثي على أي شيئ بقدر ما هو توضيح لاأقل ولا أكثر .. أنا رجل وأكره بالرجال صفة التسلط من باب القوامه لأنها إجرام في مثل هذه الحاله . |
لا حول ولا قوة الا بالله اليوم ارسل لي زوجي واختار الطلاق وقالي اذا بغيتي خليك على ذمتي لين ما اولد وبعدين يطلقني ما ادري هل هذا صح الي سويته ولا خطا انا من جد انسانه ضعيفه مو هاينه علي العشره رغم كل الي سواه قلبي بتقطع الم وحسره ما اقول الا حسبي الله ونعم الوكيل على كل ظالم وادعولي ان الله يصبرني
|
.. اختي (أمل الحياة ) ..
.. انت بنفسك قلت ان اخاك دائما مشغول .. وليس لك من بعد الله الا هو وامك .. وامك الله يطول لك بعمرها لن تدوم لك , واخوك غير مؤهل لتحمل مسؤليتك انت واطفالك , لانه عنده مسؤليه زوجته , وقد يمل من مسؤليتك او قد تتضايق زوجته منك .. .. يجب عليك ان تنظري للموضوع من جميع الزوايا .. .. اطفالك يحتاجون لك , ويحتاجون لوالدهم , لو حتى بالاسم .. .. لذلك اطلبي من زوجك ان يقسم البيت بينكما بالتساوي .. ويكون لك وللبيت ولاطفالك مصروف شهري وقدرة ..... انتي تحطي المبلغ الا يناسبك .. .. تشترطين عليه ان يعطيك حقوقك الشرعيه كامله , ويعدل بينكم .. واذا رفض فهذا شانه وهناك رب كبير يحاسبه .. .. تشترطين عليه ان يكون للاطفال يوم خاص يخرج معهم للحدائق والتنزه معهم .. لانهم يحتاجون يغيرون جو ويتمتعون بعمرهم .. .. تشترطين عليه كل ما يناسبك .. .. والاهم انك تقولي له هالشروط بوجه سواء بالهاتف او وجها لوجه او ان يذهب احد من اهلك .. .. والله يفرج همك .. ويسعدك .. ويريح بالك .. |
اقتباس:
ماشاء الله رد صائب وحاولي انك تنفذيه لتستقري ويكون زوجك قريب من ابناءك اعانك الله ووفقك للصواب |
لله يسعدكم انا قلتله يفتحلي بيت انا واولادي قريب من بيته بس رفض واختار الطلاق مع انه الحاله الماديه ممتازه ويقدر يفتح اكثر من بيت بس هو ما يبي يعدل ما يبيني اطلب منه المساواه بيني وبينها يبي يجيب لها شغاله وانا لا هي ما عندها احد كل اولاد زوجي الي بعيشوا معاها كبار البنات عمرها 24 والثانيه 21 والاولاد واحد18 والاخر 13 هو الاصغر وكل واحد بشيل نفسه اما انا فعندي 3 اطفال وحامل رفض يفتحلي بيت لمن قلتله ابي حق مثلي مثلها هو من الاول قالي بتعيشي تنازل عن كل شي اما بالنسبه للمصروف هو ما عنده مانع يعطيني مصروف لاولادي وهاذا الشي يمكن الي كويس انه ما بتاخر بالمصروف بس يريح حاله وانا في بيت اهلي في شقه فاضيه ساكنه فيها انا واولادي لحالنا يعني الحمد الله الله لا يحوجني لا احد ما انا محتاجه احد بس ما اقدر ارجع عند واحد حسسني اني ولا شي هانت عليه عشرة 11 سنه لمجرد لقا وحد تقبل فيه فضلها علي وهو لسه ما يعرف خيره من شرها والله في قلبي نار الله يصبرني ويفرجها علي والله لا يسامحه على ما سوى فيني وما اقول الا حسبي الله ونعم الوكيل الله يخلصلي حقي منه
|
لا حول ولا قوة إلا بالله ...
الله يهدي زوجك .. اسأل الله أن يفرج همك ويفك كربك ويزيل همك .. ولا حول ولا قوة إلا بالله ... الظلم ظلمات يوم القيامة .. |
الله يجزاك الف خير وان شاء الله يستجيب ربي دعاءك انا من جد محتاجه الدعاء
|
اسألك اللهم بكل اسم هو لك سميت به نفسك او انزلته في كتابك او علمته احد من خلقك او استأثرت به في علم الغيب عندك انك تكتبلي وصاحبة الموضوع ومن قرأ ردي الخير حيث كان وترضينا به ...
حبيبتي لاتزعجي قلبك وتفكيرك في انسان زي كذا وزي ربي ماخلقه قوي خلقك برضو قويه اجلسي ربي اطفالك واجبريه ينفق عليهم لو بالقانون انسان زي كذا اناني مايفكر الا بنفسه وحياته.. عيشي حياتك ياعزيزتي وادعي ربك يصلحلك اطفالك يعوضونك والله موجود .... |
الله يغنيك عنه يا أختي
تصبري وادعي ربي يخلصك منه الطلاق أرحم من هذي العيشة وكرامة المرأة فوق كل شي لا تقولين الأولاد ...اللي خلقهم ماينساهم وصدقيني انتي قادرة تربينهم بلا في شكله هو والخونة أمثاله. السموحة:( |
الله يعووضك ويفرجها عليك
وزوجك مرده بيندم اهم شيء عندك شيء تصرفين على اولادك منه وبتعيشين من دونه اسال الله الواحد الاحد ان يسعدك ويرضيك ويفتح لك ابواب الخيير ويربط على قلبك |
الله يجزاكم الف خير بس من جدا ما ادري شلون اقدر اعيش بدونه اتعودت عليه ومو هابن علي العشره وصعبانه علي نفسي انا الي صبرت وتحملته طول ها الاسنين فلحظه تيجي وحده وتاخذكل شي والله صعبه حسبي الله ونعم الوكيل ادعولي انه الله يرد ليه ردا جميلا ادعولي انه الله يحنن قلبه عليه ويشتاق ليه ادعوه ان الله يهديه ويرجع لعقل وصوابه وما يطلقني اسال الله ان يجملني في نظره ارججججووووووووووووووووووووكم ادعولي ابي اولادي يعيشوا بيني وبين ابوهم هم ما لهم ذنب ابي ابني او بنتي الي لسه ما شافت النور تلا قيني انا وابوها مع بعض مو كل واحد لحال يارب يار ب ارحمني ارحم ضعف قوتي وقلة حيلتي اللهم رد لي زوجي ردا جميلا يارب انزع فكرة الطلاق من راسه الله يسر اولاد الحلال وبنات الحلال الي يصلحوا بينا ويقنعوه ان يفتحلي بيت لو حتى ملحق انا موافقه لا تنسوني من الدعاء
|
اقتباس:
|
حبيبتي خلي ثقتك بربك اكبر ترا اللي خلقكم مابينساكم وهو اكرم من زوجك اللي تبينه جنبك وهو مايستاهل طيبتك هذي ؟؟؟؟
وهالانسان بايعك ليش تتمسكي فيه وهو مايبيك خلي كرامتك اكبر لاتخلي عيالك يخربون حياتك .. عيالك بيعيشون وبيعوضونك انشاء الله وانسي هالجاحد ولاتفكري بعشرته لانها هانت عليه ...( ومن باعك برخيص بيعيه بتراب ) عليك بالدعاء والله معاكم ما راح يخليكم .. لاحول ولا قوة الا بالله |
| الساعة الآن 12:29 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©