|
الشغاله سرقت منا 5500 ريال حسبي الله عليها
انا كنت حاطه فلوس بيت اهلي 3500 ريال
كنت مديونه من امي 5000 وجمعت المبلغ السابق على اساس اكمله ب1500 واعطيه امي وسرقت منهم 2500 ريال وخلت مشكوره الف اختى مجمعه فلوس الجمعيه 2500 خذتهم كلهم وبنت اختي عندها بالبوك 600 ريال اخذت منهم 500 ريال بكذا صفت على 5500 ريال انا والله جن جنوني لدرجه اني بكيت والا خلاني اروح اشوف الفلوس انا اول وحده بنت اختي فقدت ال500 بعدها رحت اشوف فلوسي وافقد انا 2500 دقينا على اختي وسألنها اذا فيه فلوس عندها ببيت اهلي وتقول فيه فلوس الجمعيه 2500 ونروح اندورهم بالدرج ومانشوف شيئ وهي المتواجده غالبا بيت اهلي ... الى عنده حل لا يبخل والله انجن جنونا كلنا ... ولما كلمنها انا ما اخذت انا مافيه ... |
لا حول ولا قوة إلا بالله
هند فتشوها وفتشو أغراضها ...المطبخ او الحمام الله يعزك ارفعي غطا السيفون ....وحدة صديقتي بالصدفة لقيت خاتمها فيه دوري في المطبخ وفي القدور وعلب كريماتها ....لا تخلو مكان ولا تختلط بشغالات غيرها عشان ما تخبيها عندهم ترى يعاونو بعضهم حسبي الله ونعم الوكيل الله يرد ضالتكم ياحي ياقيوم |
حسبي الله عليها ونعم الوكييل لازم وضروري تفتشونها
وزي ماقااالت اختي عبير الورد لاتختلط باي شغاااله وحاااولوا ترااقبوها واغرااضكم المهمه انتبهوا لها لاتخلوون شغالتكم تعرف وين مكااانها اسمها شغاااله حدها للتنظيف وبس اذا انتم شااكين فيها قولوا لها ترا ماااراح نعطيك راتبك الين تطلعيين الفلوس الي عندك وبنوديك للشرطه بياخذون بصماتك وبيحبسونك وبيقطعوون يدك اذا مطلعتيها وبيسجنونك وحااولوا انكم تنتبهوون منها اذا هذي افعاالها عيني عينك والله يعينكم والله الشغاالات مامنهم الاالمشاااكل بس الله يعين ع هذي الدنيا |
أختي هند
اضطريت اسجل دخول علشان موضوعك .. و علشان الضعيفة اللي مالها حول و لا قوة حبيبتي .. معليه سؤال ، على أي أساس اتهمتوا الشغالة ؟؟؟؟؟؟؟؟ شفتوها بعينكم ؟ و لا علشانها الضعيفة الوحيدة في البيت اللي مالها سلطة على أحد ؟؟؟؟؟ إذا انها بتسرقها كنتوا راح تلقوها جالسة لحد دحين في البيت و لا كانت هربت ؟؟؟؟؟؟؟ 5500 تغنيها 6 أشهر .. ايش يجلسها ..؟؟؟؟؟ قرينا قبل كم شهر موضوع هنا إنه وحدة راحت بيت اخوها الكبير و سرقت من بيته مبلغ كبيييير و ندمانة دحين هل الأخ شك في اخته ؟؟؟؟؟؟؟ مستحيل يشك في اخته لإنها اخته .. نفس الشئ ، ما أبغى اشكك في أحد من الأهل ،، لكن الشيطان شاطر .. و إذا الشغالة عندها شيطان ، فكلنا عندنا شياطين ،، نحن مو ملائكة .. شوفي و تبيني من أي أحد اخر غيرها مو لازم تسلطوا كل العيون و التهم عليها .. و معليه لا تحسبيني اعارضك .. لكن خايفة عليك من ظلم الناس و من المقولة هذه .. ( اذا دعتك قدرتك على ظلم الناس فتذكر قدرة الله عليك ) لإنه قبل كذا انسرق مني مبلغ في البيت و عندي شغالة ،، و ما أكذب عليك نفسي قالتلي يمكن هي ؟؟؟ لكن ماعندي شئ يقين يقول انه هي حتى يوم اني سألتها راعيت مشاعرها و ما اتهمتها ،، قلت لها كان هنا فيه فلوس ماشفتيه ؟؟؟ و قلت لها دوري معاي .. المهم ،، راعوا انها انسانة جاية علشان تجمع فلوس من راتبها و تغربت علشان الشئ هذا فلا تخلوا التهم كلها عليها لإنها لو كانت مظلومة ،، فربي راح ياخد حقها منكم و لو كانت صح انها سرقت ،، فممكن تتأكدوا قبل لا تتهموها و بطريقة ما تحس فيها لكن ما تظلموها و تتهموها و انتوا ماعندكم دليل غير انها ( شغالة ) و تحياتي |
روح الطير لا تجنيني حتى ما قدرت اكمل ردك
ترى فلوسي موجودين من زمان من مده ثلاث سنوات بالدولاب ولا نباقو الا لما جابتها اختي يوم الاربعاء بالليل ويوم الخميس فقدناهم اختي فلوس الجمعيه دائما بالدرج موجودين وما نباقو ليه يوم صارت موجوده انباقو يعني معقوله جا هندي ودخل البيت واخذهم من بيت عالم اهلي هي بالذات تواجدها مو دائم ببيت اهلي بس ايام يعني بأمكانها تاخذهم وتحفظهم بيت اختى الى لما تسافر ياجماعه الحمد لله ان ربي ستر انا كنت رايحه مكه وحاطه ذهبي بنفس الدولاب ذهبي يقدر ب60 الف ريال زين مانباق وبعد كنت حاطه فلوس لي تقدر ب3700 ريال غير الذهب كنت حاطتهم بشنطه يمكن تكون ما نتبهت لهم الله ستر الي خلاني نأكد الشيئ عليها انا لما جات اختي تكلمها اختي غلطت قالت لها ترى احنا فقدنا فلوس وذهب اختي ضنت او نست ان ذهبي انباق على طول قالت لالا انا والله ما فيه ياخذ ذهب يعني بالله عليكم ليه انكرت في البدايه الذهب ما انكرت الفلوس ورغم انا كلنا كنا نكلمها ولا دمعه وخوف وجيبو شرطه فتشوني ليه ما خافت على الاقل يارب هالفلوس جات من مصدر حلال يارب افضحها واخرج فلوسنا منها يارب |
هل هي بتسافر قريب ثم مثل ما قالت الأخت روح الطير حطي احتمالك بأشخاص ثانيين لا تستغربين بمن هم أقرب منك يأخذ مثل هذا المبلغ والله يحفظ لك أموالكم ويردها إليكم عزوبي بس رجل |
ايه هي قربت تسافر عشان كذا بدأت تلم شملها وتجمع فلوس من غيرها
الله المستعان .... |
احتمال أن تكون الشغالة .. مع الملاحظة أو رفع البصمات ممكن يظهر السارق ..
اما إحتمال ان يكون شخص آخر فهذا وارد .. فاذا كان شخص من داخل البيت من قام بهذه السرقة .. فتدبيره جاء محكماً مع قدوم الشغالة ! ليلبسها القضية ! وليوهم انها من فعلت ذلك !! يبقى الإحتمال وارد .. وأظن ان رفع البصمات هي الكفيل بالكشف عن الفاعل الحقيقي .. اسال الله ان يرد اموالكم اليكم في القريب العاجل ... |
الله يعينك الخدامه مثل نصيب انتي وحظك،،،من فتره بسيطه خدمتنا سرقت مية درهم ابوي كان حاططها على التسريحه وكانت سارقة من شهر ألف درهم من امي، ولما وجهتها نفت ويلست اتصرخ وكانها برئيه بالرغم انه خدامنا الثانه فتنت عليها انها تسرق بطايق الهاتف ومصروفي،،،وثاني يوم هربت،،،حسبي الله عليها حسستني اني ظلمتها والله حزنت فترة اكثر من اسبوعين:21: لاني كنت اظن اني ظلمتها والجمعه اللي فات فضحتها خدامت اختي انها فعلا سرقت الالف من امي وشرت موبايل:29:،،،،الخلاصه انه اتحذري منهنم لان كيدهم عظيم. |
حسبي الله على الشغالات من جد مشاكلهم اكثر من راحتهم اللي تيجيكي سراقة او ساحرة او او او والله العظيم اكرهم مووووت بكل الجنسيات الا من رحم ربي بالنسبة لمشكلتك اختي خوفي الشغالة في يوم وقوليلها قومي البسي علشان نروح للشرطة وانتي البسي واحبكي الامر وخيريها نروح او اكلم الشرطة تيجي تاخد بصماتك هنا علشان نعرف ايش سرقتي كمان وشوفي ممكن تنفع اما فكرت ان يكون من اهل البيت مااعتقد معلش سؤال هل في احد غير والدتك ووالدك في المنزل والله يردلك ضالتك
|
الموجود في البيت امي
وبنت اخوي تدرس بثانوي وعندها خير لان ابوها وامها واختها توفو بحادث ووارثه واثنين من اخواني ولله الحمد ما عليهم واحد معيد في الكليه وواحد كاتب عدل والحمد لله مو محتاجين ... الله لا يوفقها لا دنيا ولا اخره الله يفضح الي خذهم عاجل غير اجل |
اصفقيها على وجهها تطلعه لك <<<<<<<<<<<< متعقد من الشغالات
الله يكون في عونك اختي |
أختي هند ، اعذريني مجرد نصيحة كانت
أخوي فهد هي مو حيوان ، و لا عبد استعبدناه .. حتى لو كانت حرمية و سرقت الفلوس .. ماحد له حق بصفقها على وجهها .. شرع الله واضح جدا و اللي ما نرضاه على نفسنا لا نرضاه على غيرنا و هم في الأخير جايين من دولة و ما يعرفوا الحلال من الحرام .. عزيزتي هند .. أنا ما قلت كذا إلا لإنه حصلت لنا في عيلتنا حالات كثيرة زي كذا و في الأخير الفلوس تطلع بمكان ماحد يتوقعه و صارت لنا حالة بالفعل ، إنه الشغالة سرقت .. لكن اللي اعرفه عنهم إنهم يسرقوا أشياء بطريقة ذكية ماحد ينتبه لها مو يفضحوا حالهم .. مثلا تكونوا في يوم عازمين ضيوف ، فتقوم تسرق هي علشان ماحد يشك فيها و زي كذا .. و الله يعينكم .. |
الله يعوض عليك
|
السلام عليكم
اختي هند رعاك الله الشغالات ماينفع معهم المواجهة المفروض كتمتم على السالفة وفتشتوا من دون ماتدري راح اقول لك على تجربة مرت علينا مثل تجربتك قبل سنة ونصف تقريبا جبنا شغالة اندونيسية بعد ماقعدت عندنا فترة حوالي 3 او 4 اشهر بدينا نفقد اغراض ونقود بس ماكانت النقود كثيرة ونقول اكيد صارفينها وماندري وين المهم بعد فترة اختي عندها مبلغ كبير ( 25000خمسة وعشرين الف ريال سعودي) ماراحت للبنك تودعه فحاطته بدرج وقافلته بالمفتاح على ماتروح توديه بس كل يوم تقول بكرا واخرته شوي المهم درج المكتب اللي حاطه الفلوس فيه عباره عن درج يقفل لكن فوقه درج يسحب اختي ما انتبهت ان الدرج اللي فوقه لما تسحبينه بالكامل يصير اللي تحته مكشوف (بدون سقف) الشغاله كثيرة حركة بالبيت وتحب تكتشف كل صغيرة وكبيرة فعارفه هالشي زين في يوم من الايام جت اختي فتحت الدرج ومالقت من المبلغ الا حوالي 3 الاف ريال والباقي مختفي الصراحة احنا من جبنا الشغالة ما ارتحنا لها وكل ماتسوي مصيبة تنكر وتسوي نفسها مظلومة وتصيح وحالة فاختي خبرتنا وخبرت الوالدة والحمدلله ربي الهمنا الحكمة في التصرف سكتنا وماحسسناها ولا بشي خفنا تروح تحرقهم والا ترميهم والا اي شي>> بس عشان تثبت انها بريئة (اكيد ماراح يحرقون قلبها لانهم مو لها بالاساس ) المهم وديناها عند اختي الكبيرة في مدينة قريبة لنا مرة على اساس عندها عزيمة وبتساعدها وطبعا فاجأناها وهي كانت بالمطبخ>> نزلنا لها عبايتها وقلنا لها يالله بسرعة ع السيارة مافي وقت وماخليناها تطلع فوق ابد ورحت معاها انا عند اختي الكبيرة واهلي اخذوا راحتهم بالتفتيش وصلنا بيت اختي واهلي مالقوا شي ابد هناك عند اختي مسكتها بالمطبخ وقفلت الباب وكلمتها بشكل ودي وفهمتها ان المبلغ مرررة كبير وانو ان كان عندها تقول لي وين وانا بستر عليها وراح احميها من اي اذى هي خايفة منه وطبعا انكرت وقعدت تحلف وتسوي نفسها بريئة وانها متحسرة عشاننا على مصيبتنا وقعدت تقول يمكن فلان او علان من (اخواني وخواتي) وياحرام ومن ذا الحكي ولما هددتها قعدت تصيح لدرجت فقدت الامل انو يكون عندها ولما خلاص ماعاد فيه حيلة ماجيتها فيها وهي مصرة على كلامها وتفتح اختي الكبيرة علي باب المطبخ وتبشرني انه لقوا مبلغ 22 الف ريال وعليها زيادة (اللي كل شوي نفقدهم) بغرفة الشغالة رابطتهم بكيس مخمل و راميتهم ورى دولابها ومعاهم اغراض فاقدينها .. وفيه اغراض(ذهب) فاقدينها لليوم مالقيناها مع انو ماطولت وسفرناها وطبعا بعد ما انكشفت وواجهناها انا واختي لازالت عينها قوية وانكرت وقعدت تصيح وتقول انتم تتبلون علي ومن ذا الكلام حسبي الله ونعم الوكيل بعض الشغالات مدري كيف مسلمات وهذي بلاويهن الله يكفينا شرهن بس الصراحة الجنسية اللي ذكرت تظل اكثر الجنسيات بلاوي ومصايب من سرقة الى الجنس الى السحر لذا قررنا مانجيب منهم ابد وربي لايحوجنا لهم وفيه جنسيات افضل بكثيير وعندهم قيم واخلاق ولله الحمد ويارب يكشف لكم الحقيقة عاجلا غير اجل واعتذر عن الاطالة |
الله يعينكم أختي الحبيبه ..بس حاولوا إنتم ماتتركوها تسافر إلآبعد تفتيش دقيق
هادي هي مشاكل الشغلات الله يهديهم بس كانت عندي شغاله يدها طويله ..ولما فتشتها كنت الآقي عندها فلوسنا ...ولما أخوفها بالله وإنو دا مال حرام مايجوز تأخذو وكنت أقلها لو بتأكلي عيالك حرام راح يصيبهم المرض وممكن يموتوا ..فكانت تبكي وتخاف وتعترف بالسرقه وترد الفلوس ..بس كانت مبالغ بسيطه ..بس تحط ريال على ريال وتطلع حسبه الله المستعان |
الله المستعان خلوها على الله
والله ضاقت صدورنا بما فيه الكفايه وخاصه ان الشغاله راعيه تفتيش تفتش بكل شيئ صغيره وكبير كما قلتي اختي المتفائله وياليتنا سوينا نفس طريقتكم لكن حنا جن جنونا واسمعتنا واحنا نتكلم فما فيه مفر المشكله ياعالم ياناس اختى مسكينه مضغوطه حدها ورواعي الفلوس يطالبونها فيهم والي يقهر سألنا شيخ اذا فيه مجال ناخذ من راتبها قال ما يجوز لازم نشوفها بعينا الله يعوضنا ويخرجهم منها ويفضحها يارب ... |
الزوجة تأتي بالشغاله لكي تقوم لها بأعمال البيت وإذا حدث أي شيء صغير فالمتهمة الأولى هي "الشغالة" .. إذن لماذا تأتي بها إلى بيتكِ من الأساس ولماذا لاتتحملين المسؤولية بنفسكِ قبل أن تتهميها لاحقاً ولو ليس هناك أدله ..
الظلم ظلمات يوم القيامة .. وأنا أتفق جملة وتفصيلاً مع أختي روح الطير .. كيف نحن البشر قساة غلاظ إذا كان الأمر بعيد عنا وإذا أتهمنا غير ولو كان ظلماً .. فلتتقي الله كاتبة الموضوع ولاتتهم الشغالة إلا حين يكون هناك دليل مادي .. وحتى وإن سرقت الشغالة بنفسها فتظل من أدخلت هذه الشغاله للبيت هي المخطئه الأولى .. وهناك إحتمالات عديدة بأن يكون هناك أي فرد من المنزل قام بسرقة المال .. وكان من المفترض أن يكون المال في مكان آمن جداً لايصل إليه إلا صاحبه وعن طريق مفتاح .. لاتظلموا الشغالة واتقوا الله .. أتقوا الله .. يجب عليكم التثبت بشكل كامل .. |
| الساعة الآن 11:26 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©