|
جارتي الارملة و العيدية
بسم الله الرحمن الرحيم إخواني الكرام حابه أستشيركم في شئ نغص علي حياتي بالله أعطوني خبر هل مافعلته خطأ أم صح إخواني أحبابي في الله ..لدي جاره قريبه من بيتي وهادي الجاره لديها بنت أرمله ..مات زوجها بداية شعبان ..يعني البنت بالعده ..والبنت لديها ولد عمره 4 سنوات ..وبنت عمرها سنتان ومن باب العطف على الأيتام قررت إعطاءهم مبلغ بسيط كعيده ... وكلكم تعرفوا جيداً كيف أوصانا الله باليتيم وكذلك الحبيب محمد صلى الله عليه وصلى أوصانا أيما وصيه بهم ولما قررت أعطيهم المبلغ قلت أكلم الجاره بالموضوع ..فلم أجدها بالبيت وكلمت أم الأطفال وقلت لها يافلانه أنا حابه أعطيكي مبلغ بسيط كعيده لأطفالك... فقالت لي لاداعي لذلك والأطفال عندهم مايكفيهم ..فقلت لها ياحبيبتي لاتعتبريه صدقه لاسمح الله بل هديه لمحبتي لهولاء الصغار ..لكني أحسست أنها زعلت مني فهي لاتريدني أن أتصدق على صغارها ..فحلفت لها مره أخرى أنها هديه مني فبالله عليكم هل مافعلته خطأ في حقها وحق الصغار وهل يعتبرذلك ذلاً لها وطعناً مثلاً في كرامتها والأطفال حتى لو كان عندهم معاش أبوهم ..وجدهم وأخوالهم ماهم مقصرين معهم ..دي محبه مني وخايفه أن أكون جرحت أم الأطفال والله ماعملت كدا لأني أريد مدحاً أوثناءاً إنما عملته لله عزوجل ومن باب الترابط الإجتماعي وحبي للخير فدلوني جعلكم الله من عتقائه من النار في هذه الأيام الفضيله وجزاكم الله كل خير |
وعليكم السلام
انتي ماغلطتي جزاك الله خير بس .. الاسلوب غلط لو تبي تهديها او عشان الاطفال اشتري شي او عيدية لها وغلفيها وعطيتيهم ياها تجيها باسلوب هدية . مو اسلوب انك تشاوريها او تاخذي رايها اي احد بهالكون عندة عزة نفس فلا نستغل هالشي لحاجة او اجر او لو كان بنيتك الصدقة خليها بنيتك فقط واحرجيها على انها هدية .. وفقك ربي لفعل الاجر دوما .. اتمى تتقبلي رائي . :) |
اقتباس:
أنا ماشاورتها للبنت أنا كنت أبغى أكلم جارتي اللي هي جدة العيال وأنا أخذه عليها ..لكن وجدتها مسافره لذلك أضطريت أكلم أم الأطفال وأمهم ماتعرفني كتير يعني شافتني قليل وأنا قلت لها ياأم فلان أبغى أرسلك شئ بسيط للأولاد وهي عيديه لهم .. وأكيد كلنا عندنا عزة نفس والله ماهي نيتي أشاورها أو شئ بس لازم أستأذن عشان أرسل أولادي لهم فحبيت أعرف هل هم موجودين في البيت أو لأ؟ وأنا ماأبغاها تحس إنها صدقه ...كنت أبغاها كهديه في هذا الشهر الفضيل والله يقدرنا على فعل الخير يااارب ويعطيك العافيه إحساس على مشورتك الطيبه ... |
وفي شئ تاني أنا قلته لأم الأطفال إني متعوده على إعطاء عيديه لكل من أحب من أولاد صديقاتي وأولاد قرايبي
وأي إنسان يعز علي وجارتي عزيزه على نفسي وكمان قلت لها معتزتك من معزة أمك وأنا أحبك وأحب أولادك لذا حبيت أعطيهم عيديه هالسنه ..وفي نفسي إني نفسي أعطي هالأيتام محبه لله فهل في فعلي غلط ... |
بارك الله فيك اخيتي رووعة
حبيبتي .. طبعا نيتك صافية بس الطريقة غلط اي وحدة في مكانها بتحس انها صدقة و بتاخذها بزعل لو كانت مو ارملة كانت اخذتها بشكل عادي بس بما انها صارت ارملة الله يعينها و يصبرها فا اكيد وضعها صار حساس وصارت تفكيرها حساس برضوو انك قلتي انك ما تعرفيها كثثير فاي وحدة مكانها بتفكر انك تتصدقي عليهل مهما حلفتي لها ... كان ممكن تروحبي لها في العيد و تعاودي عليها و على الاطفال و تبوسيهم و تعطيهم الفلويس في يدهم .. هنا بتشوفها عيدية زيهم زي غيرهم |
اقتباس:
يعطيك العافيه على كلامك الحلو وزي ماقلت لكم والله نيتي صافيه ..وبعدين حبيت أستغل فرصة هادا الشهر الفضيل وأحسن إلى الأيتام لأني من يومين سمعت موضوع عن الأيتام بقناة الرساله فبكيت وتذكرتهم وقلت طالما بجوارنا أيتام لازم أعطيهم من مال الله ..لدرجة إني ماقلت لزوجي إني أبغى أعطي الأيتام فلوس كنت أبغاها سربيني وبين الله ومحد عرف في البيت غير ولدي عشان هو إللي بيوصل الفلوس وأنا قلت له حبيبي أولاد جيراننا أيتام وربنا ورسولنا وصى بالأيتام ونحن لازم نحبهم ونفرحهم بقدر مانقدر عشان نكسب الأجر بس والله ياأختي لاأخفكي إن ضميري يؤنبني لأني ماحبيت أسبب إحراج لأي أحد ..وقلت لكم إتصالي كان على أساس هل هم موجودين أم لأ ..لأني أبغى أرسل الفلوس وفي نيتي محبه لله وكنت مستعجله بإرسالها يارب أكتب لي الأجر يارب مشكوره عيوني والله يوفقك ويسعدك |
وعليكم السلام مثل ما قالت الأخت نورا يوم العيد بيأخذونها أطفالها منك مثلهم مثل بقية الأطفال وبينحرجون يردونها وممكن يوم العيد - بإذن الله - أنك تنادين أطفال جيرانك وتنادين أطفالها حتى يلعبوا معهم وتعطيهم العيدية هذا إذا ما كنت تقصدين من كلامك ان العيدية اللي تريدين إهدائها لهم عبارة عن كسوة مثلاً !!!! (عينية أو مالية ) أي أنه شيء أكبر من الهدايا التي توزع على الأطفال يوم العيد فالأفضل هدايا العيد البسيطة يوم العيد وأنهم يعيشوا فرحة العيد مثل بقية الأطفال وحتى ما يتضايقون ،،، وبإذن الله بنيتك الطيبة بتكون الأيام القادمة بينك فيها تواصل وتعاون وتكافل على الخير . والله يجزيك جزيل الثواب ويصبر هذه الأرملة ويجيرها في مصيبتها ويخلف لها خيراً كثيراً عزوبي بس رجل |
هلا أختي روعه الله يجزاك خير أنتي ماغلطتي بالعكس لكن الحرمه شويه متحسسه عشان لسه مامضى كثير على وفاة زوجها وهي لسه في العده وتفكر كثير بأولادها والموضوع حساس خصوصاً إنو أول مره تقضي العيد من غير زوج وتحس إنها فاقده الزوج اللي يحن على عيالها ويباشر طلباتها ويمكن اللي زاد الموضوع إنو أمها مو موجوده وهي ماتعرفك كثير لو كانت أمها موجوده يمكن ما أخذت الموضوع بكل هالحساسيه عموماً حصل خير وإنما الأعمال بالنيات الله يجزاك خير لا تشيلي هم إن شاء الله مصيرها تعرف طيبة قلبك:) |
اتوقع لو اديتيها لامها ماراح يكون فيها احراج لها لانو وجه لوجه صعب تاخذها منك
والله يجزاك خير ويبارك لك في ابنائك والله يتقبل منا ومنكم الصيام والقيام |
اقتباس:
هلافيك أخي عزوبي ربنا سبحانه وتعالي يعلم كم يحزفي نفسي لو زعلت أم الأطفال ؟؟ والحمدلله هي تقبلت العيديه وأعتبرتها هديه مني لهم لما قلت لها كلمتين حلوه وقلت لها هادي عيديه لصغارك .. وفي نفس الوقت أعتبرها عطاءاً لله في هذا الشهر الفضيل ..وبأفكر لو كل شهر أعطيهم والله لو عندهم كنوز الدنيا ما يغنيهم عن فقدان والدهم رحمه الله خاصة أن والدهم كان إنسان بمعنى الكلمه وكان أخلاق وزوجي يعرفه ويمدحه الله يغفر الله ويتقبله من الشهداء لأنو مات بمرض عضال لم يمهله كثيراً كان صغير عمره ثلاثين عاماً وأنا متأثره وحزينه على الصغار وأمهم من بعد وفاة والدهم ..ونفسي أساعدهم كما أمرنا ربي ويرضاه عني وفكرت أشتري لهم ملابس ..أو حتى ألعاب ..لكن للأسف ماأنزل السوق خاصة العشر الأوآخر والله يوفقنا لفعل الخيرات ويجعلنا من المقبولين عنده |
اقتباس:
المشكله إنو جدة الأولاد مسافره خارج السعوديه ..وماراح تجي غير على فتح المدارس في منتصف شوال... والأم موجوده بالعده في بيت أهلها مع أبوها وبعض من أخوانها فمافي أحد أكلمو غيرها والله أنا حاسه فيها إنو دا أول عيد لها بدون زوج خاصة إنو زوجها كان يحبها وهي تحبه وكانوا طيبين مع بعض ومبسوطين ..لكن قدر الله كان مقدوراً ..والموت حق ..والله يجمع بينهم يوم الدين والله يصبرها على ماأصابها ويكتب لها الأجر |
اقتباس:
زعلت قلت ياربي كيف ممكن أعطيهم المبلغ لأني والفه على جارتي ..لكن بنتها ماشفتها كتير ويمكن هي ناسيه شكلي رغم إني قلت لها أنا جارتكم روعه ..أم فلان وزي ماقلت لكم حبايبي أنا مستعجله أبغى أستغل هادا الشهر الفضيل فما عندي صبر إني أنتظرللعيد أوحتى تجي أمها ..والحمدلله إنها تقبلت الموضوع بصدر رحب وبإذن الله ماتكون زعلت ومشكوره على الدعاء الطيب ولك بالمثل يااااارب |
السلام عليكم
اختي جزاك الله خيرا على رحمتك والله يعطيك على نيتك, بس انا ارى ان الاسلوب غلط بالمرة وجارح للام ويمكن للجده اكثر خاصة انو لساعها في العدة,والم الام من الم بنتها. وكمان الشيطان مايصدق اي شي خاصة انها في حالة ضعف فيستغلها, اول شي انت استشرتيها وتاني شي الوقت لسا رمضان يعني لو انو يوم العيد اخدتيلهم اكياس صيغرة فيها لعبة متواضعة او حلويات ومعاها فلوس حتبان عيدية عادية جدا ومقبولة . الموقف انتهى وخلاص ,وانت اعتذرتي وبينتي وجهة نظرك ,وان شاء الله انهم يكونوا اكبر من كدا. الله يوفقك ويكرمك يا رب |
اقتباس:
والله... أول شئ لما اتصلت سألتها عن أمها قالت أمي مسافره برات السعوديه وبعدين سألتهاعن حالها وأحوالها قالت الحمدلله طيبين .. وسألتهاعن أولادها وكيف حالهم وهل بيدورا على أبوهم قالت نعم ..فقلت لها يافلانه أنا حابه أرسلك مبلغ بسيط كعيديه لأولادك ...هنا سكتت وبعدين قالت مافي داعي تتعبي نفسك وأولادي الحمدلله ماهو ناقصهم شئ أناهنا خفت تفهمني غلط ..فأضطريت أفهمها الموضوع إنها هديه..وفهمتها إني متعوده على إني أعمل عيديات لأولاد صديقاتي وقرايبي وأخواتي وأخواني والله من ضمنهم حطيت هالعيال الأيتام ..وزي ماقلت لكم بالأخير تقبلت عادي..والله في نيتي عطاء لله .. ياربي ماأبغى أحس إني جرحت أحد ..يارب إنت تعلم السر وأخفى والله كانت نيتي طيبه وأنا ناويه إني كل فتره وفتره أجيب هدايا ..أو أشتري أي شئ للأيتام خاصة لما عرفت أجر كافل اليتيم وطبعاً ماأعتقد إني اقدر أكفلهم لأنو في أهل أمهم بس نويت في نفسي إني أعطيهم أي شئ عسى ربي يكتب لي مرافقة الحبيب محمد صلى الله عليه وسلم في الجنه يااارب ياناس أحياناً بنضيع أموالها في أشياء تافهه والله ..لكن لو نوينا النيه الطيبه وأنفقناها في الشئ الذي يبقى في موازين حسناتنا مو هو دا الأفضل ... وأنا هنا بأستشيركم لأني مازلت خايفه على زعل هالأرمله والله ..قد أكون أنا الحساسه لأني ماأحب أحد يزعل مني مهما كان وجزاك الله خير أخي وتر ويعطيك العافيه يارب |
اختي روعه والله الي سويتيه عييييييييييين العقل وأن خالفت بعض الاعضاء في دلك ولكن كل له رأي ...
فعلك صحيح 100% مايؤيد كلامي ..........الخطأ لو ارسلتي المال مع ولدك بدون اتصال هنا تكون فهمتها صدقه...لكن اتصالك يدل على نقيض دلك... تأييدا لما فعلتي وراحة لكي اكثر ...متى ما كان في مقدورك وساعدتك ضروفك ان تخرجي لسوق اشتري للأطفال بعض الهدايا والحلوى وأرسليها لهم....في اي وقت تشائين.. ما فعلتيه هو التكافل الاجتماعي والاحساس بالأخرين دون جرح للمشاعر اثابك الله وسدد خطاك |
جزاك الله خيرا علي موقفك و لكن كان من الافضل ان تعطي المبلغ مباشرة للاطفال دون استئذان علي اساس انه عيديه .. و احرصي ان يكون ذلك امام والدتهم حتي لا يضيعوا المال ..
ما فعلتيه طيب و لكنه يخدش النفس و يجرحها .. تسطيعي ان تتصدقي بطرق غير مباشرة .. كان تعطيها خزين البيت من سمن و سكر و دقيق و لحم بربع الثمن .. بحجه ان احد اقاربك يتاجرون في هذه الاصناف بسعر الجمله .. و الله اعلم و مشكورة اختي علي الموضوع .. |
هو كلامك الي زعلها
اقتباس:
طب خذو على بعض كم مكالمه تتعودو على بعض بعدين اول يوم العيد مري عليها مادامها بالعده وعايدي على اطفالها نيتك صدقه و تصرفك وكلامك يدل انها صدقه اقتباس:
ما اعرف اسالي شيخ عن الناس الي تجوز لهم الصدقه في ناس احق منها بلصدقه مادام عندها معيل وراتب و اخوه وساكنه معززه مكرمه في بيت اهلها و نفقتها جاريه عليها |
غاليتي رووووعة
اذا حابة تستمري في ارسال الهدايا فا حاولي توطدي علاقتك معاها و تصيروا صديقات .. ساعتها راح تتقبل اي هدايا منك لاولادها بروح طيبة و بدوتن حساسية .. اما لو ضلت علاقتكم سطحية و مجرد بس سلام فا اكيييد راح تتحسس من اي هدية ترسليها لها الله يبارك في اولادك يارب |
يا اختى جزاك الله خير الجزاء وجعله الله عز وجل فى ميزان اعمالك انت محقه ولكن الافضل ان تحضرى لهم هدايا مثل لعب اطفال او لبس او بعض الحلو التى يحبها الاطفال واكيد لن يجدوا من يحضرها لهم الان ، عوضا الله خيرا عن والدهم وبارك فى امهم واعانها على حسن رعايتم وتربيتهم بأذن الله ام بالنسبة الى امهم قولوا لها يا اختى لقد قال الرسول الكريم صلى الله عليه وسلم تهادوا تحابوا اذن هى هدية لك من باب الحب فى الله |
اخواني الأعضاء أنا أستغرب من بعض الردود مثل قول المفروض والأفضل وغيرها من الكلمات التي يفهم منها الرجوع للماضي؟؟؟؟؟؟؟؟
هي تريد حلااااااااا هي كتبت عن مايدور في خلدها لأنها تفكر أن مافعلته خطأ... وتريد منكم أن تطمأنونها لكن وجدت البعض عكس دلك... ياليت من جميع الأخوه أن لايزعلوووو مني وأتمنى منكم أن تعيشون مايطرح من مشاكل لا ان تبدو كان المفروض لأنها أصبحت ماضي ومن يريد حلا يريد المستقبل تقبلو مروري بصدر رحب وجزاكم الله عني خيرا |
ياجماعة الخير لاتحسسوني بإني فعلت شئ خطأ..وعلي ذنب
والله صحيح في نيتي أن يكون المال لله كما أمرنا ربنا عزوجل بتفريح الأيتام لأني طمعانه في عفوه وكرمه وأن يجعلني أرافق حبيبه محمد صلى الله عليه وسلم في جنات النعيم ..وكما أشرت لكم لما سمعت موضوع الأيتام للشيخ نبيل العوضي في قناة الرساله تأثرت كثيراً وبكيت والله.. وقررت إعطاءهم مبلغ من المال حتى لو كان عندهم فلوس كتيره أهم شئ أن أعطيهم من ماأعطاني الله وأنا بصراحه حطيت المبلغ بمظروفين منفصلين وكتبت عليهم كل عام وأنتم بخير ..وكتبت أسماء الأطفال على إنها عيديه والله يتقبل منا صالح الأعمال وأن يجعل مانفعله في موازين حسناتنا وسبق وقلت لكم ..كان نفسي أكلم جدتهم لكن هي مسافره وأنا بخاطري أفرح العيال حتى لو مايفهموا ولايدركوا شئ .. يارب أعنا على فعل الطاعات في هادا الشهر الفضيل يارب وشكراً لكل من مرعلى الموضوع وكتب رأيه ..ويسعدك ربي أختي هضاب نجد كلامك ريحني والله يريحك دنيا وآخره |
اختي انت تقصدين اجر يتيم
وليس نيتك الاحسان لهذة المراة بالذات اذن خذي المال واعطيه ايتام في حاجة للمال واهاليهم ما عندهم مانع لتقبل المساعدة هناك جمعيات لكفالة الايتام يمكنك الاتصال بهم واخذ رقم حسابهم وايداع مبلغ مادي شهري ممكن اما بالنسبة لهذة الارملة فاظن ان نيتك واضحة وهي اظن فهمتك ولكن لم تتقبل الامر اذن اتركيها ولا تفتحي الموضوع مرة اخرى معها وكما قلت لك هناك ايتام بالالف يمكنك كسب الاجر فيهم والطريقة سهله ومضمونة ان شا الله |
حبيبتي ما فيها شي
جزاك الله كل الخيييييييييييييير بس هي اكيد ما زالت متحسسة من وضع الاولاد الجديد ....وكلاااامك لها وقت الي قلتي لا ماهي صدقة ...تراها تبين النية المبطنة لفعلك بس مثل ما يقولون زلة لسان اعانك الله ووفقك لفعل الخيرااااااااااااااات |
اشكرك اختي روعه على الدعوه
ووالله أنه سبحانه يشهد علي لم أكتب لك أنك على حق لكي أطمنك لاااااااوالله أني أراه عين الصواب فعلا وأسأله سبحانه أن يعتقك من النار ووالديكي وجميع الاعضاء ونفسي ووالدي وعامة المسلمين |
مكانه الانسب ..
الاشراف ؛ |
اقتباس:
وجزاك الله خيرالجزاء على النصيحه الطيبه وأنا قلت طالما بجنبنا جيران وعندهم أيتام أعطيهم مما أعطاني الله عزوجل والحمدلله أم الأطفال فهمت الموضوع وتقبله بصدر رحب والله يكتب لنا مافيه صلاح أمورنا وديننا يارب ويوفقنا لمرضاته |
اقتباس:
وأكييد وميه بالميه متحسسه من أجل صغارها خاصة لوشافت إنو كل الأطفال معاهم أبائهم إلآعيالها بتحزن وهادا شئ طبيعي فمن كان بموقفها ..لكن ماأقول غير الله يصبرها ويربط على قلبها ويعينها على تربية أولادها يارب وصحيح أنا قلت لها كدا لأني خفت تزعل مني لكن لما رجعت وبينت لها إني متعوده إني أهدى أولاد من أحب من صديقات أو أهل أعطيهم عيديات تقبلت الموضوع والحمدلله أرسلت لها العيديات ..وأنا قلت لكم محبة لله أعطيت هالصغار والله يعطيني على قد نيتي يارب والله المستعان |
اقتباس:
دخل في قلبي الطمأنينه ..لأني ماأبغى أحد يزعل مني أو يشيل بقلبه علي وأنا والله نيتي طيبه ونفسي ومنى عيني أعطي الصغار سواء عيديه ..مساعده ..أي شئ المهم أبغاه ينكتب عند رب العالمين وفي نفس الوقت ماأبغى أجرح أحد ولما حسيت إنو ضميري وخزني وخفت أكون زعلت الأم قلت أشاوركم بالأمر والحمدلله الذي سخر لي إخوه في الدين يدلوني ويرشدوني للخير والله يسعدك ويستجيب دعائك ويجمعنا في جنات النعيم سعداء مع الأنبياء والمتقين الأبرار تقبلي ودي عزيزتي |
مرحبا روعة
اختي ربي هو من يعلم بسريرتك وصدق نيتك..الله لا يحرمكِ الاجر ذكرتي ان المرأة مازالت في العدة اذاً مازال قلبها ينزف على فقدان زوجها والحزن مسيطر على قلبها فأكيد ماراح تقبل وتاخذ على خاطرها..المرة الجاية لما تزورينها فقط ادع الله لها ولطفلها فهذا الذي سيفرحها..الدعـاء لها ولطفلها تقبلي مروري |
عادى انت موقفك
|
| الساعة الآن 05:34 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©