|
ألحقوا على أختي قبل لا أذبحها
السلام عليكم ورحمة الله وبركاته
آسعد الله أوقاتكم بكل خير أحبتي في الله في بدايه الموضوع أقولكم تراني بكتب السالفه بالعامية يعني عشان أطلع إلي بقلبي ثاني شي لحد يدخل ويقولي ليش حاط هذا الموضوع وهو ما قراء الموضوع كاملاََ آنآ عندي اخت أكبر مني بـ 3 سنوات هي بثاني جامعه الآن وآنآ في ثاني ثانوي وكان لي ولد خاله أكبر مني بسنه كان كل عمري وذكرياتي الحلوة والمرة معاه حتى أمي وأمه كانو شبه توأم يعني مستحيل يمر يوم بدون مكالمة أو يشوفون بعض المهم قبل سنه تقريباَ سافرت أنا وياه للخبر يعني نشم هوا وكنت ألاحظ على الولد يمسك جواله والابتوب كثير وكل ماقلتله عطني جوالك قالي لااااااااا أقوله ليش يقولي في خصوصيات قلت كيفك المهم يووم جاني وقال عطني الاب حقك قلت شفه بالشنطه عاد أنا تركته بالغرفة لحاله يمكن ربع ساعه شوي رجعت وقلتله تعاااااال بسرعه حط الاب وجاني مسرع وصرفته ورحت وخذيت الاب وتفاجأت بخيانه تذبحني كل دقيقه وكل ثانيه وكل ساعه وكل يوم والله يا أخواني إني ما أنوم من التفكير في هذا الموضوع أكملكم السالفه لقيت محادثته على المسن مع أختي وسويت نفسي ما أدري عن شي قلت ما أبي أظلم الولد ومرة حطيت عيني على جواله وهو يكتب الرمز وعرفته يوم نام خذيته ولقيت مسجات من أختي على جواله حب وغزل صراحه أنا بغيت أكسر الجوال فوق راسه وهو نايم لاكن قلت من أصبح أفلح يوم قمت ميت من القهر يكلمني ما أرد عليه ونزلت تحت في الفندق دقيت على أختي 3 مكالمات أبي أحذرها وكان مشغول شوي دقيت على أعز أصدقائي وشرحتله الوضع أنا كان في بالي إني أعلم أبوي فقالي حرام عليك البنت غلطت ومحتاجه مين يعلمها لا تعلم أحد وكلمها أنت وكلم ولد خالتك وحذرهم المهم رقيت لود خالتي وحذرته ورجعت للرياض على طوول يوم رجعت حذرت اختي وقالتلي خلاص والله معد بيني وبينه شي قلت ان شاء الله عقلت البنت بعد كم شهر وبالصدفه شفته يسوي حركات لأختي وماتحملت وبغيت أمد يدي عليه لو ماكانت خالتي قدامي وعلمت أمي قلت أنتبهي لبنتك وعلمتها بكل السالفه وكلمتها وجلست فترة ماشيه تمام لاكن الحين أحسها رجعت لاكن الصدمه الكبرى أيش هي ؟؟؟ طلعت خالتي تدري بالموضوع وتقولي عادي ياخي مافيها شي صراحة أنا في ذاك الوقت متحسف إني ما ذبحت خالتي ؟ المهم إلى الآن أبوي ما يدري وصراحه طفح الكيل وعد أقدر أصبر أكثر من كذا وأفكر أعلم أبوي يتفاهم معها لاكن أخاف تطيح في أمي ويطلقها لاسمح الله لأنها هي إلي مصرة على أبوي يشتري لكل أخواتي جوالات وشاريتلهم لابتوبات ودلع على الآآآآآآخر فأخاف في لحظه غضب يقول أنتي طالق ونروح فيها أنا وأخواني الصغار اليوم دخلت غرفتها كنت بدور غرض وفجأه فتحت الدولاب ولقيتها كاتبه بالإنجليزي أسمه وكلام ماله داعي فأني أنعميت ومسحت كل المكتوب من القهر وهي ماكانت في البيت .. فيا أخواني وأخواتي ساعدوني وأعطوني حل الله يوفقكم ويصونكم ما تتخيلون قد أيش أنا ميت وكل يوم أموت أكثر وأكثر خايف تكبر السالفه ويدري أبوي من أحد غريب وساعتها راح يذبحني أنا لأني ساكت عليها وترى والله أبوي حبيب وبسيط جدا ومتدين وفي حاله لاكن لا يعصب !!! تكفون تكفون تكفون تكفون تكفون تكفون تكفون تكفون تكفون تكفون تكفون تكفون تكفون تكفون تكفون ألحين بحط الصفحه في المفضله وبنوم وأول ما أقوم بدخل الله يوفقكم أبي ردود الله يساعدكم ويستر عليكم يرجى الانتباه عند كتابة لفظ المشيئة يكتب ان شاء الله وليست انشاء الله |
ياحبيبي صلي على النبي واهداء الأمور ماتنحل بها الطريقه انت فهمت اختك وقلت لها وحذرتها وكلمته وحذرته وبرضه مارضي يسمع لك انت باقي صغير واكبر غلط سويته انك كلمت صاحبك هذي تعتبر اسرار بيت مفروض ماتطلع وش تبي صاحبك يقول عن اهلك ؟؟؟؟ اذا انت خايف على اختك من صدق تروح لا ابوك وتقوله بالسالفه وهو اكبر منك وافهم منك وبيعرف شلون يوقفهم عند حدهم الاثنين الموضوع لا وصل للكبار ينحل ان شاء الله والله يكثر من امثالك بس خليك عاقل ورزين لا تسوي شي يخليك تخسر اختك وتخسر ولد خالتك رح لا ابوك وكلمه ولا بيطلق امك ولا بيصير لا اخوانك شي ان شاء الله والله يصلحهم ويهديهم ويجمعهم على خير اذا كان لهم نصيب في بعض |
أشكرك يا أخوي أبو حمزة والله إني كل شوي أسوي تحديث للصفحه أبي أحد يرد علي
بقولك شي ؟ أنت تقول أكبر خطأ أنك كلمت صاحبك .؟ أقولك ليش كلمته : لعده أسباب منها 1- أعتبره أخوي 2- بينها عشره عمر يعني مو سنه ولا سنتين من الإبتدائي وحنا سوى 3- المشكلة صارتله مع أخته وفتحلي قلبه وفضفضلي وأنا حبيت أفضفضله ويرشدني للطريق الصحيح أتمنى تكون هذي الأسباب كافيه لك يا أخوي وبعدين صراحة لي عتب محب عليك أنآ الآن عمري 17 وتقول لسى صغير أخوي أنا صحيح عمري 17 لاكن عقلي مثلك ويمكن أحسن وهذا مو كلامي كلام الناس إلي حولي وأولهم أبوي وأمي الله يخليهم لي ان شاء الله ويستشيروني في أمور ما تتوقعها |
اقتباس:
الله يحفظك لأبوك وامك واهلك كلهم ويجعلك ذخر لو شنو مايصير هذي اسرار بيتك ومايصير تطلع لو انه مو عشرة عمر لو انه اقرب لروحك من روحك ,, افرض بكره تهاوشت معه ولا شي وطلع قليل اصل وقال اخته فيها وفيها وسود بوجهك قدام خلق الله انت صغير بسن باقي عقلك مانضج فديتك وباقي بسن مراهقه استهدي بالله وقول لأبوك الله يسعد قلبك يا اخوي |
الحق على ابوك ... ليش يشتري لاخواتك لاب توب
أنا كنت أموت ايام الدراسة على حاجة اسمها لاب توب وكل صديقاتي عندهم الا أنا لان أهلي رافضين .. وماقدرت اشتريه غير بعد ماخلصت الجامعة ب سنتين ... البنت لازم ماتمسك لاب توب غير بعد عمر 25 ...... وكمان لازم يكون في مراقبة من الاهل وتوجيه وبصراحة .... اي استخدام للماسنجر ... يثير للشك ... انا نصيحتي لك ... واجه أختك .. وهددها اذا ردت عليه او كلمته انك راح تفضحها ... خليك حازم ... لان هالموضوع ما ينسكت عليه والله .... وكل شوي فتش جهازها وجوالها .. خليها تحس بالتوتر والخوف .. وخليها تبطل قلة حيا .... لكن لاتوصل الخبر لخالتك او احد برا ... لانه راح يأثر على سمعتكم ... |
يا حبيبي يا أبو حمزة خلينا من سالفه الكبر والصغر
المشكلة كل ماجيت أقول لأبي أمي تحذرني وتقول لا تقولها أبد أبد أحترت وش أسوي وبعدين أول أنا وأختي كنا نجلسكل يوم مع بعض أما الأن صار في فراغ كبير بيني وبينها ولا تجيني إلا إذا تبغى شي وصراحة ودي أردها بس أخاف تكبر الفجوة إلي بيني وبينها ساعدني الله يجزاك خير وال الحل ؟؟؟؟؟ |
اقتباس:
يا اخي هذي اختك الله يصلحها محد يردها الا ابوك وان شاء الله ماتكبر الفجوه بينكم وانت خلي ابوك بنفسه يكتشف يعني امسكه وقوله السالفه كلها برى البيت وخله هو بنفسه يصيدها عشان مايجيك لوم وتكون انت نبهتها وسويت اللي عليك صدقني ابوك هو الحل طيعني وانا اخوك |
اقتباس:
الحين توها شاريه لاب لأختي إلي في خامس أبتدائي ؟؟ وقالت ميد أبوي أشتر لأختي إلي في ثاني متوسط بلاكبيري وهو رفض فراحت شرتلها من حسابها الخاص والحين أختي إلي في الجامعه معها بلاكبيري وأختي إلي في ثالث ثانوي وإلي في ثاني متوسط يعني دلع غير طبيعي نت أمي فقط لا غير وكل ما قلت ميد أمي تراك تخربينهم تقول ما عليك مني وتقعد تصارخ علي وتزعل ومدري وي يصير فيها ؟ وعلى قولتك أفتش أجهزة أختي صراحه أحسها صعبه يعني أنا ماعمري فتشت شي مو لي بعدين أنا ما كلمتها عن الموضوع إلي قبل سنه وغصبن علي حتى يوم كلمتها ما أدري وش أقول بس يوم كلمت أمي طلعت كل إلي في قلبي |
أخوي أبو حمزه أنا أخاف يصير شي ما أتوقعه أو أخاف يصير بأبوي شي لأنه تعبان نفسيا من أول أخاف أقوله ويصير فيه شي ؟؟
أنا أقدر أقوله تراني عازمك على قهوة وأطلع أنا وياه بالعكس علاقتي مع أبوي جداََ ممتازة بس أخاف يصير شي زي ما قلتلك أو يسوي بالبنت شي أو يتهاوش مع الولد وأبوه وترا أبوي تجمعه علاقه جيده مع أبوه |
أبو حمزة إذا كلمت أبوي في الموضوع أقولة إني حذرتها كم مرة ولا لا ؟؟
وأقوله إن أمي تقول لا تعلم أبوك بالسالفه ولا أكست ولا كنها قالت شي ؟؟ |
بسم الله الرحمن الرحيم
( وَإِذْ قَالَ مُوسَى لِقَوْمِهِ إِنَّ اللَّهَ يَأْمُرُكُمْ أَنْ تَذْبَحُواْ بَقَرَةً قَالُواْ أَتَتَّخِذُنَا هُزُوًا قَالَ أَعُوذُ بِاللَّهِ أَنْ أَكُونَ مِنَ الْجَاهِلِينَ (67) قَالُواْ ادْعُ لَنَا رَبَّكَ يُبَيِّن لَّنَا مَا هِيَ قَالَ إِنَّهُ يَقُولُ إِنَّهَا بَقَرَةٌ لاَّ فَارِضٌ وَلاَ بِكْرٌ عَوَانٌ بَيْنَ ذَلِكَ فَافْعَلُواْ مَا تُؤْمَرُونَ (68) قَالُواْ ادْعُ لَنَا رَبَّكَ يُبَيِّن لَّنَا مَا لَوْنُهَا قَالَ إِنَّهُ يَقُولُ إِنَّهَا بَقَرَةٌ صَفْرَاء فَاقِعٌ لَّوْنُهَا تَسُرُّ النَّاظِرِينَ (69) قَالُواْ ادْعُ لَنَا رَبَّكَ يُبَيِّن لَّنَا مَا هِيَ إِنَّ الْبَقَرَ تَشَابَهَ عَلَيْنَا وَإِنَّا إِن شَاء اللَّهُ لَمُهْتَدُونَ (70) قَالَ إِنَّهُ يَقُولُ إِنَّهَا بَقَرَةٌ لاَّ ذَلُولٌ تُثِيرُ الأَرْضَ وَلاَ تَسْقِي الْحَرْثَ مُسَلَّمَةٌ لاَّ شِيَةَ فِيهَا قَالُواْ الآنَ جِئْتَ بِالْحَقِّ فَذَبَحُوهَا وَمَا كَادُواْ يَفْعَلُونَ (71) ) يا أخي العزيز الاخ ابو حمزة قال لك أخبر أبوك بكل الموضوع وهو يتحمل مسؤولية بنته ما له معنى تضع عراقيل أنت لست صغير وتفهم ما شاء الله عليك تبارك الرحمن عقلك أكبر من سنك أنت مادمت متفهم ما عليك إلا تخبر أبوك وهو سيوقفها عن تماديها |
اقتباس:
بارك الله فيك اختي الفاضله مايحل المسائل اللي زي كذا الا الوالد يقدر يكبح جماح بنته والبيت كله قائم بطوع الأب والله يحفظ لهم الوالد ويطول بعمره |
السلآمِ عليكمِ ـآخويِ ’
ـأنتِ طلبتِ ـآلنصيحةِ وـآلحلِ ,, وـآنآِ بقولكِ ـآلليِ عنديِ ’ معِ ـآحترآميِ لأخوآنيِ ـآلليِ سبقونيِ بالإجآبآتِ ’ ـآنآِ ـآعآرضهمِ معآرضةِ تآمةًِ ’ لأنيِ ـآنآِ بعدِ عنديِ أبِ ’ وـآعرفِ وشِ ردةِ فعلهـِ لوِ صآرِ مثلِ هـِ ـآلشيِ عندنآِ ’ لآِ قدرِ ـأللهِـ ’ نصيحتيِ آخرِ شخصِ تفكرِ فيهـِ ـآبوكِـ ’ , ـإذآِ عندكـِ خآلِ تثقِ فيهِـ وبحكمتهـِ الأفضلِ تفآتحهِ بآلموضوعِ هوِ ’ وقبلِ كلِ شيِ تآخذِ وعدِ منهـِ مآيسويِ ـآيِ شيِ يضرِ بأحدِ منِ ـأهلكـِ ’ وـإذآِ مآعندكـِ’ روحِ لأختكِـ وهددهِآ ’ وقولِ لهآِ ترىآِ ـآعلمِ ـآبويِ ’ وترآنيِ مآسكـِ نفسيِ للحينِ ’ إذآِ مآتركتيِ خرآبيطكـِ هذيِ مآيردنيِ إلآِ لسآنيِ ’ , وقولِ لهِآ ولخآلتكِـ ولأمكِـ إذآِ ـآلولدِ صدقِ يحبهآِ خلوهِـ يخطبهآِ ’ عِ الأقلِ ملكةِ عشآنِ يصيرِ ـآلوضعِ عآديِ ’ وبعدينِ متىآِ مآبغوآِ تزوجوآِ ’ وحتىآِ ولدِ خآلتكِـ كلمهِـ ’ وقولِ لهِـ نفسِ ـآلكلآمِ , وهددهـِ ـإنكِـ بتعلمِ ـآبوكِـ ’ يآِ يتركهآِ ـآوِ يخطبهِآ ’ , نصيحةِ لـآِ تعلمِ ـآبوكِ قبلِ لآِ تسويِ هـِ ـألأشيآءِ ’ لأنِ ممكنِ بكلمةِ وحدةِ تنتهيِ حيآتكمِ , ممكنِ لآِ قدرِ ـأللهِـ يطلقِ ’ ـآوِ يسويِ شيِ بأختكـِ وولدِ خآلتكِـ , شوفِ ’ بعيدِ كلآميِ ’ إذآِ عندكـِ خآلِ تثقِ فيهِـ ’ أوِ خآلهِـ تثقِ فيهآِ لاِ تترددِ تقولهمِ ’ وقولِ ـإنكـِ بتعلمِ ـآبووكـِ عليهآِ , عشآنِ يهتمونِ ’ , ـأللهِـ يسترِ علينِآ وعلىآِ جميعِ بنآتِ ـآلمسلمينِ ’ ويهديهِآ يآآربِ ’ ـآتمنىآِ ـآكونِ ـآفدتكـِ ’’ دمتِ بخيرِ ..~ |
يعطيك العافية جذابه
بجاوب على بعض كلامك أنتي قلتي إذا عندك خال كلمه أنا كنت رايح بيت خوالي قبل أسبوع ودقيت الجرس فطلعلي خالي قال تعال أبيك شوي وكلمني عن الموضوع وقال أنتبه وشدد عليها ومن ذا الكلام يعني وتقولين إذا عندك خاله كل خالات خالاتي عارفين بالموضوع ومأيدين أختي ويقولون حرام عليك ومدري وش بالعربي هم كبار بأجسامهم وصغار بعقولهم ما يعرفون عواقب الموضوع همهم أن البنت تستانس كم يوم ثمن بتندم طول عمرها لو صار شي لا قدر الله وصراحة أبو حمزة دخل في راسي فكرة إني أقول لأبوي وشكلي بعلمة بكرا أو بعد بكرا يعني أشوف وقد يناسبة والله يقدم إلي فيه الخير |
لازم تخبر ابوك لان عرض اختك شي ما ينسكت عنه ابدا ولا يقبل الحلول الوسط
لكن بعد ما تخبر ابوك قول له امي ما تدري عن شي ، وطبعا خبر امك بعدها انك قلت لابوك انك ما تدرين عن السالفة حتى ما تصير مشاكل بين ابوك وامك |
آهآِ ,,
دآمِ ـآلسآلفهِـ كذآِ ’ وكلِ ـآهلكِـ رآفعينِ يدينهمِ عنِ ـآلموضوعِ ’ مآلكـِ ـإلآِ ـآبوكِ ’’ عشآنِ مآيطيحِ ـآلفآسِ بآلرآسِ لآآِ قدرِ ـأللهِـ ’ وـآنآِ معِ ـآخويِ رجلِ طيبِ ’ فهمِ ـآبوكِ ـآنِ ـآمكـِ مآتدريِ ’ وقولِ لأمكِـ لوِ سألهآِ أبوكـِ تقولهـِ ـإنهآِ مآتدريِ ’ , بسِ خذِ وعدِ منِ ـآبوووكـِ مآيسويِ مشكلةِ ’ حرآمِ يصيرِ شيِ لآِ قدرِ ـأللهِـ علىآِ موضوعِ يمكنِ مآيسوىآِ , لأنهآِ هيِ بعدِ صغيرهِـ ’ وـآلليِ حولهآِ كلهمِ مشجعينهِآ علىآِ هـِ ـآِلشيِ حتىآِ لوِ بطريقةِ غيرِ مبآشرةِ , وجلِ منِ لآِ يخطئِ ’’ ,, دمتِ بألفِ خيرِ ’’ |
الله يوفقك اخوي كيف الخوال يرضون وساكتين طيب يتقدم الولد رسمي ويخطبها الله يعين يااارب \ ويصلح شباب وبنات المسلمين ويحفظك ياخوي انت صحيح رجال وفاهم وان شاءالله ربي يصلح الحال |
اشكرك على غيرتك على اهلك اخوووي انا معهم ماادام ابوووك موجوود مالك حق تتحكم في اخووواتك قل لابوووك انه يشووف حل مع اختك واذا هم على كلامك يتراسلوون رساايل حب وماادري اش وخوالك يدروون خلاص يتقدم لها ويخطبها والزواااج يكوون بعد ميخلصوا الدراسه ولا انك تكلم ولد خالتك واذا مانفع معه كلم ابوووه عليه اكيد بيخاااف منه او انك تهدده بانك بتقوول لابووه >>> مسوي الولد انه حبيب ولا يقدر يستغنى عن اختك يربيه ابوه الصنع وعلووم الرجال هذا بعض الحلوووووول واتمنى اني وفقت فيها |
اذا ابوك ظروفه الصحيه ماتسمح له يتحمل زي كذا قل لزوج خالتك ولدك يكلم اختي ويحبها
يتقدم لها رسمي والا يكافينا شره لاني لو اقول لاابوي بتصير مشاكل الله يصلحك ويصلح مابينكم |
يا ناس أفهمو الولد أصغر من البنت ومايصلح يتزوجون خالتي طرحة الفكرة على أمي وأمي رفضت رفض تآآآآآآآآم
تقول مستحيل أزوج بنتي واحد أصغر منها لو وش يصير وأبوه يدري للأسف وجالس يتفرج شكلي بأتوكل على الله وبقول لأبوي السالفة يوم الجمعه ان شاء الله لفظ المشيئة يكتب على هذا النحو إن شاء الله يرجى الانتباه |
طيب قل لولد خالتك اذا عنده اخت بصراحه انا معجب في اختك وعطني رقمها بالله ابي اكلمها
واذا عصب قل هذا شعوري وانت تكلم اختي وليش تأجل تفاتح ابوك بالموضوع ليوم الجمعه ؟؟؟؟؟؟ |
صراحه اهنيك على هالعقل يعني اتخيل لو واحد مكانك كان على طول تصرف تصرف همجي وضرب اخته وفضحها عند ابوها
اقتباس:
تبغى نصيحتي خلاص دام انت شخصيا اكتشفت هالعلاقة الخاطئة انهيها بطريقتك ولا تدخل والدك بالموضوع انت قلت أنه تعبان نفسيا من أول فلا تعبه اكثر واضن هو رجل كبير ومو حمل هم وتنكيد انت لساتك شاب وانت الي تقدر تتفاهم مع اختك بعقل وبقوة تحمل صدقني هي فترة وتعدي افتكر زمان كنا نكلم اولاد خالتنا وتصير بيننا قصص حب وحركات لكن لما كبرنا عقلنا وندمنا على إلي كنا نسويه لانو مافي احد كشفنا ونبهنا على الشي الي كنا نسويه خذهآ معاك وسولف لها عنه وقول لها هو لاعاب ونبهها عن تصرفاتها وبين لها اهداف الشباب لما يتعرفو على بنات وهددها ان مسكت عليها غلط حتحرمها من الجوال والاب توب وان ما عقلت حتضطر انك تسوي شي هي حتندم عليه بعدين وولد خالتك هذآ الله يهديه قوله هالكلمة وبس وهو راح يفهمها من دق باب الناس دقو بابه والله اني اعرف انه شي يرفع الضغط وينرفز الواحد لكن مابيدك شي غير انك دايم تدعي ربك وتقول يارب ان كانو خواتي يسوون شي غلط اكشفهم لي يارب العالمين البنات بس يبغالوهم احد يصاحبهم ويوقف معاهم وينصحهم واختك طبيعي تتهرب منك لانها مفتشله من نفسها ومالها وجه تجلس معاك زي اول بس إلي استغربه موقف امك وخالاتك |
والله إنك رجال ينشد فيك الظهر وسنافي
إسمع القول إللي يجمد علا الشارب كل شئ يهون إلا الشرف لاتساهل فيه هاذا عرضك وشرفك و ياما بنات وطورؤس أهاليهم بفعايلهم والبدايه مكالمات ورسايل بلجوالات إنتبه معظم النار من مستصغر الشرروبنات الناس ماهم لعبه لولد خالتك وأمثاله وأختك هاذي تبغى له خيزرانه علا ظهرها لوماطاعت وسمعت كلام أبوها وأخوها والمفروض أمك هي تزعل وتكلم أختها علشان تخلي ولدها يبتعد عن البنت وتسحب الجوال والاب توب من بنتها وشوف أبوك لو ماعرف من الحين صدقني إن المسأله بتطور أكثر من كذا إنتبه ذولا في سن مراهقه بلا حب بلا خرابيط والله ماضيع ودمر بيوت الناس إلا هاذا إلي إسمه حب قبل الزواج علم أبوك بالسالفه مهما صار الأم مثل هسوالف ماتقدر تسوي شئ بالذات إنه ولد أختها وماتبغى صورة أهلها تنهز قدام أبوك علم أبوك بلهداوه وخله هو يفتش جوالها والاب توب علشان مايكذبوك حتا أبوك يعرف إن عنده ولد ينشد فيه الظهر مثلك وبالنسبه لأمك تقول البنت أكبرمن الولدوينها هيه عن خديجه بنت خويلد رضي الله عنها عندما تزوجت من رسولنا وحبيبنا محمد عليه الصلاة والسلام والفارق خمسة عشر سنه خلها تتوكل علا الله ولوالولد صادق زوجوهم لبعض بلحلال والفارق بسيط بعدين أناحسيت من كلامك إن أمك حاطه الحبل على الغارب لكل بناتها حاول تنصحها وجيب لهاأشرطه دينيه فيه شريط لشيخ سعيد بن مسفر إسمه عندما ينتحر العفاف وشريط إسمه سراب وشريط دقه بدقه لشيخ إبراهيم بو بشيت وفيه كتيبات تتكلم عن قصص مؤثره للفتيات الذين أهملوافي تربيتهم بسبب المعامله السيئه أو الدالال والدلع الزايد فأنتبه هاذي أختك عرضك شرفك قول لأبوك حتى لوصارت مشكله بين امك وأبوك وهم يحبوا بعض هيتفاهموا وتكو ن درس للبنت ماتتعودها ومافيه مشاكل من هالنوع أتوقع يحصل فيها طلاق بلعكس يمكن تكون لأمك عبره وتنتبه علا بناتها قول لأبوك ولاتشيل هم رايحه تعدي علا خير أبوك عاقل راشد كبير بيده حلول الرجل يأخذ الحلول بلعقل لاكن أمك تمنعها العاطفه لأن النساء تغلب عليهم العاطفه دائما وأخيرا بارك الله فيك وأقربك عين والديك وأسأل الله أن يجعل هاذي الصفه فيك بولدي يارب . |
الغريب في الموضوع
أن أمك وخالتك وأخوالك وخالاتك يعلمون بالموضوع ومؤيدين له ! أخي الفاضل أبلغ والدك بعد استحضار الأدله لكي اذا طلب منك اثبات تكون جاهزا كي لا ينقلب الموضوع ضدك , وبمثل ظروفكم لن ينجح أحد غيره - بعد توفيق الله - بلجم هذه العلاقه , وقبل أن تقول له شيئا , أبلغ والدتك عن عزمك ابلاغ والدك . أخي الفاضل ...الخوف أيضا على أخواتك الأخريات , سيما أن والدتك مؤيدة لهذه العلاقه , وقد يستسهلن مثل هذه العلاقات اذا علمن أن والدتهن تعلم بعلاقة أختك وساكته عنها ! ومستقبلا لو أقامت أيا من أخواتك الأخريات علاقه مع شاب ما , لن تستطيع أمك ايقافها اذا لم تعجبها هذه العلاقه لأن البنت ستقول , ولماذا سمحتي لفلانه ولا تسمحي لي أنا ؟ عند ذلك سترضخ والدتك . اذا كان والدك تعبان نفسيا , سيؤثر عليه مثل هذا الموضوع , ولكن فكر ماذا سيكون حاله لو حصل لأختك أمر أكبر من المحادثات والرسائل مع ولد خالتك لا سمح الله ؟ سدد الله خطاك . |
بكرة ماحد بيخسر غيركم إنتوا
الولد مصيره يروح يتزوج و أختك كل الناس تقول تحب ولد خالتها و ماحد بيخطبها المشكلة إنه أمك راضية و ساكتة و رافضة الزواج ؟ يعني ترفض الزواج و تقبل بالعلاقة اللي بينهم ؟ |
يا ناس أفهمو أمي ليست راضيه عن العلاقة وتغيرت 180 درجه عن أول يعني أنقطعت العلاقة بين أمي وخالتي بسبب الموضوع
وأمي زعلت وتكدرت وهددتها وأنا أعرف أمي أكيد ما ترضى على بناتها هذا الشي لاكن هي خايفة لو درى أبوي بيشرشحها ويمكن يحرمها من أشياء كثير وهذا إلي أمي ما تبيه |
خلاص اشتكي لأبوك
|
افضل حل والدك يعرف
|
اخي الكريم لماذا لا تحاول انت مع اختك قرب منها حسسها بالامان
كن اخوها وصديقها احميها من الفراغ العاطفي اسال استشاري حقيقي يعطيك طرق ناجحه وادا جربتها معها وفشلت هنا استعن بابوك لانو انا والله خايفه على اختك وامك من ابوك لانو ابوك اكيد راح يتغير كثير لو تخبره بالموضوع اخي لا تتسرع كل انسان خطاء وخير الخطائين التوابين وادا اختك تحب ولد خالتك والله صعب تمنعوها عنه لانو الحب مرض للاسف وعلاجه الحنان الاسري |
مشكورين يا أخواني
وآرجوا من المشرفين أغلاق الموضوع |
اخوي dedo-vip
اتمنى تقولي وش الحل اللي اتخذته لاني انا واقع بنفس مشكلتك بالضبط وبنفس المراحل اللي اتخذتها واذا في اي طريقه اني اتواصل معك عالخاص ياليت تذكرها |
الله المستعان هذه مصيبة عظيمة
|
| الساعة الآن 10:42 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©