|
مشكلتي مع والد زوجتي
السلام عليكم زوجتي هداها الله راحت لأهلها من عندي ومبسوطة ومستأنسة ومعها أطفالي بعد فترة حصل بيني وبينها خلاف بالهاتف وهي عند أهلها الحمد لله هذي أول مشكلة تدخل ابوها بدعم من الام كما اتوقع قطع ابوها الاتصالات بيني وبينها المهم ان ابوها يكلم شخص بيننا دخل مصلح ويطالب بالتزامات ماليه شروط يبغى لها 3500ريال بالشهر وشغالة وغيرها أنا فكرت بالموضوع بجد ما عندي منها الا ولد وبنت وهي ونعم وحبيبة لكن والله كان راتبي كله اصرفه عليها وعلى اطفالي بعد خصم قيمة القرض البنك والايجار ويصفى قرابة 7000 ريال اصرفه عليها كل شهر المهم ابوها كذب علي كذبات كثيرة ومن النوع المنان مرة وفيه داء العظمة الشاهد رأيكم اوافق على هالشروط لمصلحة اطفالي او ارفضها وقلعتها واتزوج غيرها ولله الحمد من عائلة طيبة ومعروف ووظيفة مرموقة ووالله لا احب ولا اتصور اطلق لكن بلوى هالاب وامها نصيحتكم ارجوكم فأنا حائر وأخشى لو وافقت على الشروط تكون العواقب سيئة كلما بغت شيء راحت تبكي عند ابوها |
دامك ا7000 ريال كله لهم وش دخل المصاريف يوم ابوها يطلب يعني وش سبب المشكله هل هي ماديه
|
وعليكم السلام آمين <<< على معرفك أخي الكريم لو توجهت بالمصادمة مع أبوها فيزيد أكثر وأكثر وهي ستفهم أنك تكره أبوها وستقف معه وتتركك لذلك الأفضل أن تتجه لها هي وتعزلها عن أبوها وتبين لها عواقب اتباعها لوالدها وأن والدها لن يهتم بها إذا وصل الأمر للطلاق وبقيت عنده ، فهو عايش حياته وهي ستكون على كبده يريد التخلص منها وقد يزوجها من بمثل تصرفات ( وأذكر لها صفات والدها دون التعريض بإسم والدها ) حتى تحسبها وتشعر أن الأسلم لها بيتها وزوجها قبل أن ترى نفسها وحيدة بدون رجل وأن أكثر المتضررين من المشكلة هي !!! وأنا لاحظت أنك أثنيت عليها ، لعل فيها حلم وصبر وتعقل فتسمع لكلامك والله يهديها <<<< آمين عزوبي بس رجل |
حاولت تتواصل معها و تعرف رايها ؟
حكاية الـ 3500 أحس من جد مالها داعي ؟ |
اعانك الله يمكن ليس لديها مصروف شخصي تشتري مايلزمها براحتها ومن حق الزوجة أن يكون لها مصروف
والطلاق ابعده عن طريقك وليس منه الا شتات اطفال لذالك اجلس معها جلسة تفاهم وضع لها مصروف تقريبا 1000ريال شهري يدخل حسابها اما موضوع الشغالة اذا كانت عاملة او متشتكي من مرض وفرلها شغالة اما اذا لم تستطع الجلوس معها اجلس مع والدها وتفاهم معها وتأكد مافي زوجة تحب فراق بيت زوجها دون سبب قوي |
الخطأ من زوجتك وانت المفترض عندك منها طفلين عودتها انه اي مشكلة تكون بينكم سواء كبيرة او صغيرة الا لو وصلت الطلاق لاسمح الله نص خراب البيوت الاهل لانهم ينظرون بمنظار الاهل والزوج ينظر بمنظار الزوجة والاهل يكونون حساسين جداً اتجاه اولادهم اسعى لاعادتها بدون مصاريف وخرابيط وضع لها حد وتنقيل الكلام لازم توقفه نهائياً ...والله يهديك ويهديها اول مشكلة وتقول بتزوج وش هالكلام ؟؟دور حل بدل ماتزيد الطين بله..
|
ا لسلام عليكم
اخوي نصيحه لاتوافق لانك اذا وافقت زوجتك تبي تمسكك مع ايدك الي تعورك طلبت هالطلب وذا وافقت بتكون غلطان طنشها اسحب عليها ولا كنك مهتم للموضوع بسراحه انا اخوي زي الحركه طلبت مرته يوم وافق قوت شوكتها مو زي اول بس نصيحه عطها اشكل ولا حتا تسال خلها لين تزهق من بيت اهلها خلها |
زوجتك الغلطانه مو ابوها
يعني هي عارفه طبع ابوها وبعدين المفروض الزوجة ماتطلع اسرار بيتها ولا مشاكلها لاحد كلمها لوحدها بدون مايكون ابوها معها وتفاهم معها واحس ممكن تقتنع بس هي ابوها مأثر عليها الله يوفقك ويسعدك |
الله يصلح ما بينكم ويبعد عنكم كل ذي شر
استغرب من ابوها والشروط التعجيزية الغريبة.. من رأيي انك تكلمها هي شخصيا..وتحاول معاها لمصلحة الأطفال المهمة اذا ابوها منع الاتصالات بينكم..خل وحدة من خواتك تروح لها البيت وتكلمها وتنصحها الله يصلحكم ويهدي أبوها يااارب |
غريب امرهم ...!!!
بس وش الهدف من هكذا تصرف ؟ |
أشكر الجميع للتفاعل وابداء الرأي بس أحب أوضح إن ابوها قافل الجوال بيني وبينها وانا لي قرابة شهرين ما تكلمت وساكت بس هو مدخل شخص وسيط وكل يوم له كلام مع الوسيط ومتقلب المزاج حتى الوسيط يقول الله يعينك عليه وأنا بصراحة أبي زوجتي وأطفالي وكاره الطلاق وفكرت اروح له واتكلم معه بس ناوي يشترط هالشروط تقريبا ونا اقول بنفسي اقبل بها والشكوى لله وأما زوجتي فيظهر إنها مانقلت كلام بس الام هي تقريبا السبب وانا كنت الاحظ في ابوها دايم يرحمها مرة ويحس انها مظلومة بطريقة او بأخرى ومصادفة كنت مع أحد اقارب الاب هذا الاسبوع وقال لي تراه والله بغى يفسد علاقتي انا وزوجتي اول ما تزوجت باختصار هل تشوفون اني اقبل بالشروط واذا جت المدام اشوف وضعها ان كان الشروط والقلق منها اغير عتبت الباب ازين لي وان كان من ابوها وامها الله يعين عليهم ومشكلتي اللي يقول اصبر واتركها الين ترجع هذا حل ممتاز بس اطفالي متعلق فيهم والله يصلح الحال |
اقتباس:
اعمله و لا تتردد .. |
يبون يشوفون لأي درجه انت متمسك فيها اكرمها اخي واكرم اهلها والله لتكبر في عيونهم وعينها توكل على الله ان الله لايضيع اجر المحسنين موفق تلاقي زوجتك الحين وعيالك مشتااااااااااااااقين لك وانت الرجال اللي فيديك كل شيء لممهم واروي عطشك منهم وفقك الله وسخر مابينكم
|
طيب وش النقاش اللي دار بينكم بالتيلفون وخلى ابوها يقفل الخط؟؟؟؟؟؟؟؟؟؟؟؟؟؟
|
طالب تقابلها... واذا رفض وافق على الشروط واذاجيتوا البيت ربها من جديد وقل لها مو كل مره تسلم الجره ومشاكلنا لااااااتطلع برا وووووووووو....
بس انا اقول خلها كم شهر عند اهلها حتى يكون صدك عنهم درس لها هي واهلها عشان تتوب تزعل مره ثانيه ... والوسيط الي بينكم خله يوصل لهلها انك ماتصبر بدون زوجه وانها اذا مااعقلت بتكون العواقب وخيمه خلهم يدرون انك صعب راس والله بيبطون ماتدخلوا |
اخي الكريم باي حق يطلب منك مصروف لها 3500 ا؟؟
اخي نصيحه لاتوافق مهما صار اتركهم انساها فتره وراح تجيك هي من غير شروط منها اما ابنائك عليك بزيارتهم وحولانك تنشر اشاعه نيه زواجك ورح تجيك على وجههه منكسره نادمه |
نصيحة لوجه الله لاتوافق والا راح تسوق عليك طول عمرك وتذلك
طالما اهل الزوجة نظرتهم ان الامكانيات المادية اهم عندهم من الرجل نفسه فمايفك الحديد الا الحديد احب اوضح لك بعض الامور نفقه الزوجة يلزمك الاساسيات والضروريات أما الكماليات فلا تلزمك شرعاًُ مثل تسديد فاتورة جوالها او مصاريف كوفيرة أو إعطاء الزوجة مصروف شهري..... الخ كل هذه كماليات ماتلزم الزوج لكن الزوج يحب ان يكرم زوجته ويقدرها ويعطيها لكن بعض النساء تستغل هذه المواقف لصالحها أما مايلزمك هو الاكل والشرب على قدر كفايتها بالمعروف العلاج السكن الجماع :22: حسن العشرة .... الخ إذا انت اكرمت الكريم ملكته واذا انت اكرمت اللئم تمردا الزوجة التي لا تطيع زوجها وتتكبر وتتعالى عليه وتخرج بدون إذنه مكن بيته أو بيت أهلها فهي ناشز لانفقه لها ولا كسوة . من شروط النفقه التمكين فان رفض ابوها اعطاك زوجتك فلا نفقه ولا كسوة اذا رفضت زوجتك العودة إلى البيت بحيلة اي كماليات تريدها تحاور اخبرها ان بيت اهلك غير مناسب كي اتحاور معاكي فيه خذها اي مكان هادي وفهمها أما اذا رفضت الخروج معاك اتركها على جنب وتحدث مع والدها بأنك تريد زوجتك فإن رفض فلا نفقه ولا كسوة . عليك بتأديب الزوجة / اتركها في بيت اهلها مع عيالها أنت ملزم بعيالك اصرف علي عيالك فقط ولاتكثر المصروف على عيالك كي لاتستفيد الزوجة من مصروف عيالها لنفسها خذ عيالك مشيهم ورجعهم لها اخر اليوم اكيد راح تسالهم فين رحتو وايش قال لكم ابوكم ؟؟ من هذه الاسئلة اثقل عليها صدقني راح تجيك ولاترسل رسالة ولاإتصال انت مثل ماتقولها خلي ابوكي ينفعك ولا تعطيها اي وجه شهرين ثلاثة شهور قد تصل لسنة وصدقني إلا راح تجيك . بعد ماترجع الزوجة / عليك بإعادة نظامك مع زوجتك وصدقني راح تجد خلل في نظامك ومن خلاله زوجتك قاعدة تدخل منه وتسبب لك تشويش في حياتك . عليك بالاحترام المتبادل ومن صور الاحترام عدم خروجها بغير إذن فهذا من الاحترام وطاعتها لك ايضا من الاحترام وانت كذلك احترامك لحقوقها الزوجية من الاحترام .... والله يوفق الجميع لما يحب ويرضى |
الله يصلح الحال وأشكر الجميع للتفاعل وأنا بإذن الله رايح لأبوها اقابله الاسبوع هذا وأخاف يصدموني أو يتغلون ثم يحصل مالا تحمد عقباه وأنا صراحة كنت محسسها بغلاها عندي وما اصبر عنها هي واطفالي فأحس إنهم الان يساوموني ونيتي بإذن الله بعد لقاء أبوها إما يرجعون لي أو سأبحث عن شريكة لحياتي تقدر الحياة الزوجية والشكوى لله |
أخوي الكريم هل ممكن تذهب له ومعك وسيط يكون له ثقل واحترامه عند والد زوجتك حاول تشوف من أقاربك أو أقاربه أو الحي الذي يسكن في والد زوجتك طبعاً قبلها خبر وسيطك بالمشكلة من الألف إلى الياء عزوبي بس رجل |
تصرفها هذا أو تصرف أبوها هذا أعتبره جس نبض لك . ولا راح يكون الأخير ان استجبت . فالرمح من أول ركزة . فمن رأيي تعتذر .
|
وافق ووقت ترجع البيت يحصل خير لك ولها
ثم انت تقول انو 7000 تصرف عليهم بالشهر ها نزلو لل3500 ثم وافق وموافقتك ليست معاهدة دول ولا شركات اولادك يستحقون ملايين الدنيا وقت يتربو ببيتك انت تقول تغير عتبت بيتك وما اهونها ولكن اولادك هل فكرت بهم هل لهم حسبان وعطف وحب بقلبك اولادك فلذة كبدك الا يحق لهم ان يعيشو مع والديهم بسلام ومن ثم وقت تكون زوجتك عند اهلها حاول انو ما تتشاجرو عل التلفون ادعو الله ان يرد لك زوجتك واولادك |
ياخي قول لعمك تمممام و على عيني و كل طلباتك مجابة
و خذ زوجنك و اطفالك وروح بيتك و بالبيت تفاهم مع زوجتك و افهم منها هذه طلباتها و لا ابوها ؟؟؟ اذا كانت طلباتها ساعتها لكل حادث حديث و اذا هي طلبات ابوها فقط و هي ماطلبت شي فا خلاص محلولة .. تقول لابوها ايه يعطيني و قفلوا الموضوع اعتقد زوجتك و الله اعلم مشتاقة ترجع لبيتها و لك لكن ابوها الله يهديه اش ذنبها هي الله يجمعكم |
لا توافق وطنشهم ومردهم لك يبي يملون ويرجعون لك
وإذا زوجتك فاهمة تبي تجي من نفسها وش اللي 3500 ريال كل شهر !! صح إني أنا ومالي وكل ما أملك لعيالي واللي يبون من عيوني لكن التشرط والشي اللي بالغصب ماله داعي ولو سمعت كلامه بالشي يبدأ كل يوم يملي عليك شروطه ومن كلامك موضوعك له شهرين وإذا قابلت أبوها ولا نفع معه حاول توصل لزوجتك إنك تبي تتزوج ثانية وأكيد يبي يتغير الموضوع إن شاء الله والله يسهل أمورك ويكتب لك اللي فيه الخير |
أخوي مافيها شي لا انفقت على اهلك وماخليتهم يحتجون لغيرك
وشروطهم مقبوله بس يخفض سعر الراتب الشهري مثلا 1500 وشغالة حاور ابوها وقول له بنتك على عيني وراسي وهي الغالية ومايغلا عليها شي بسس تبغى الصدق والله تحتاج للخدامة وبما ان عندك فلوس لا تبخل على زوجتك عطها والله يعوضك ان شاء الله |
السلام عليكم ورحمة الله مرحبا اخي والله انا مع رأي ام عزام واختنا قريين صحيح انت ما كتبت اصل المشكله بس انت حسب ما قلت انك تصرف عليهم سبعة الاف ريال شهريا وهي طلبت ثلاثه وخمسميه ومع راتب الشغاله ما يوصل خمسة الاف انا اشوف ان انت الربحان بهذي الحسبه يعني بيطلع لك زياده الفين وشوي انت ممكن تعطيها وتقولها انها لك ولأولادك طبعا من غير المأكل والمشرب وهي بتسدد فاتورتها وبتشتري الاشياء اللي هي تحبها وبيكون شي واضح ويرضيها ويرضيك وانا اعتقد انك لو وافقت على شروطها صدقني راح تحبك وتتأكد انك تحبها وشاريها انا اعرف بعض النساء يشترطون بعض الشروط فقط لتتأكد من محبة زوجها لها واول ما ترجع المياه لمجاريها تنسى الشروط اللي اشترطتها. وانت يا اخي الكريم ياليت لما تتكلم مع زوجتك او حتى بينك وبين نفسك ما تجيب سيرة اهلها والد زوجتك معذور بتصرفه مع ابنته ومن حقها عليه الوقوف معها ورفع الظلم عنها يعني تخيل انها بنتك وجتك زعلانه وتشتكي ايش راح يكون موقفك الله يصلح بينك وبين زوجتك ويجمع بينكم عاجلا غير اجل يا رب العالمين |
أشكر الجميع على المداخلات ولا تنسوني من دعواتكم بأن يصلح الله الحال ووالله كان ودي أبادر بالتنازلات مع أبوها بس خشيت من عواقب ذلك واسأل الله الخيرة بس عندي سؤال : في بداية المشكلة قال أبوها انها تبي الطلاق هل هذا يعقل وأنا والله لم اضربها او اتكلم عليها بكلام قبيح صح اني اعصب احيانا وتنتهي بسرعه ومن فترة ما اهديت لها شيء ولا أذكر اني نزلتها عند اهلها الا معها مصروفها كامل ياناس انا محتار هل يتصور ان تطلب الطلاق أو ابوها يكذب ؟ |
اقتباس:
اعتقد ان زوجتك ما تحل ولاتربط..كل شي بيد أبوها يا اخي اعتبره مثل ابوك وقوله حااااضر..وبس تجي زوجتك لبيتكم اقعد معاها ودلعها وفهمها بالود واللين واشتر لها هدية كشخة...صدقني بتنسى كل شروط ابوها وبتعتبرك انت أبوها وتحذيييييير لاتتهاوشون ع التلفوووووون مرة ثانية الله يؤلف ما بين قلوبكم ويجمع شملكم قريب يااارب |
بصراحة أنا جلست مع نفسي أستعيد ذكرياتنا ولله الحمد الامور تمام بس تذكرت إن الفترة القريبة ما أعطيتها مبلغ بيدها بس اذا بغت شيء وديتها السوق واشتريت لها قلت يمكن البنت كرهتني لأني مقصر معها من هالجانب ولا تبي ترجع لكن هل يتصور ذلك |
ياخي ما اعتقد زوجتك لها دخل بالموضوع
يمكن تكون فضفضت لامها عن شي معين على سبيل الفضفضة و اللام نقلت الكلام مع شوية بهار فا عمل الاب ما عمل لانه يعتقد بان ابنته تعاني معك ولم يستمع اليها و اصر على ما في راسه اخي ارجعها و ساعتها لكل حاديث حديث |
أخوي الكريم الذي فهمته من كلامك الأخير( الرد 28 وكلام نور (29 أن زوجتك خبرت والدها بمشكلة لا توصل لهذه المواصيل لكن والدها أراد تكبير المشكلة ولعل كلامك عنه ووصفك له بأنه فيه داء العظمة فهو يبغى يذلك ويبغى يتفاخر أمام بنته وبناته بأنه فعل وفعل !!!! فإذا كنت تقدر تتواصل بأي شكل كان وتأثر عليها وتحل مشكلتك بينها وتخرج هي من تأثيرها والدها هذا إذا ضمنت زوجتك وتعرف طباعها والله يكتب لك الخير عزوبي بس رجل |
ماتوصل انك تغير عتبت بيتك حتى لو هذي شروطها صح ان ازواجنا مايقصرون ماكلين شاربين لكن والله الوحده تحتاج مصروف بيدها اقل شي لو فكرت تهدي زوجها يكون عندها مصروفها الخاص ولايدري عن شي تبغى تشتري اشياء خاصه فيها والشغاله لو انت مقتدر واما بتاثر ع الميزانيه مافي مانع بالعكس بتكون طول الوقت فاضي لك وللعيال وتهتم بنفسها طول الوقت الشغل ياخذ من الوحده وانت الحمد لله ماذكرت زوجتك بسوء ابدا شكلها كانت عشرتها طيبه وياك استهدي بالله ولاتسمع بعض الردود اللي تصب ع النار بنزين هذي واسره فيها اطفال يحاتجون امهم وابوهم مع بعض وفي بيت واحد صدقني اللي راح يدفع الثمن لاقدر الله صار شي ولدك وبنتك اما هي بتشوف حياتها وانت اكيد تكمل طريقك اتمنى تتقبل راي برحابة صدر وفي النهايه راي مطروح الله يجمع بينكم اقرب وقت ويهدي سركم يارب
|
السلام عليكم ورحمة الله وبركاته
اخوي الكريم جميل ان الانسان يراجع نفسه ويعرف اخطائه والاجمل ان يحاول اصلاحها وانا حسب ما قرأت انت انسان عاقل وحنون ولن تؤثر فيك مثل هذه المشكله الصغيره وستحلها انشاء الله وعليك بالدعاء والتضرع الى الله اما من نا حية سؤالك بس عندي سؤال : في بداية المشكلة قال أبوها انها تبي الطلاق هل هذا يعقل وأنا والله لم اضربها او اتكلم عليها بكلام قبيح صح اني اعصب احيانا وتنتهي بسرعه ومن فترة ما اهديت لها شيء ولا أذكر اني نزلتها عند اهلها الا معها مصروفها كامل ياناس انا محتار هل يتصور ان تطلب الطلاق أو ابوها يكذب ؟ فجوابي لك هو انني واصالة عن نفسي ونيابة عن ثلاثة ارباع النساء فكلمة طلقني تعني او تساوي تمسك بي اكثر ارني حجم حبك لي اثبت للجميع انك تحبني ولن تتخلى عني مهما يكن. وهي كلمه نحب ترديدها ونكره وقوعه. اسأل الله ان يصلح حالك وان يجمعك بزوجتك عاجلا غير اجل يا رب العالمين. |
| الساعة الآن 06:58 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©