|
شاك في تصرفات اخي الكبير
السلام عليكم
يا اخوان انا عندي اخ اكبر مني بخمس سنين وهو عمره 29 وهو غير متزوج المشكلة هو له شهر متعرف على اخويا جدد عنده بالدوام ومن تعرف عليهم وهو متغير من ناحية تصرفاته صاير دايم يضحك وتجيه حاله هيستيريه وعيونه حمر ويحاول يخفي حالته وعيونه عني واذا قلت له ابطلع معكم يصرفني مع العلم ان اخوياه القدامى هم اخوياي يعني 24 ساعة اعرف وين يقضي يومه وقدام عيوني واخوياه القدامى الحين يسئلوني عنه لانه انقطع عنا لاكن من تعرف على هالجدد مايبغاني اتعرف عليهم ولا اطلع معهم واخوياه الجدد اشكالهم قشران وواضح عليهم الخراب والسربته للمعلومه اذا طلع معهم يرجع ويقعد في بيت الشعر لحاله ويتقهوي ويضحك لحاله !! واذا سألته ليش تضحك يقول البرنامج يضحك وهو كذاب لا يضحك ولا شي وامس مزودها شوي جا البيت الساعة 2 الليل ولما جا يوقف السيارة صدم الرصيف اللي عند البيت ووقفته كانت غلط ودخل البيت متلطم مسرع وراح نام وترك الداوم ومن بكرة قام يصارخ على اخواتي وهم ماسوو شي واخلاقه بخشمه للمعلومية حتى الوالده واخواتي ملاحظين هالشي ويسئلوني عنه وانا اقول لا عادي الامر طبيعي والاغرب من هذا كله انه ماوده يتزوج بحجه انه قاعد يجمع وهو نصاب عنده فوق ال 250 الف وابوي اصلا بيتكفل بموضوع الزواج !!! يعني واحد عمره 29 ليش مايبغى يتزوج !!:( يا اخوان انا الوضع مو عاجبني وشاك انه يحشش او يسكر او وراه شي كبييير وخايف على والدتي واخواتي انا بأطلع من البيت لاني باتزوج قريب واخوي الثاني متزوج ومشغول بأهله ووالدي كبير في السن شورو على وش اسوي؟؟ |
موضوعه بسيط راقبوه ورح شوف من يجالس وين يجلسون ومن اصحاب اصحاب اخوك لابد انك راح تتوصل لشيء وقتها وعندما تعرف نوعية ربعه ان كانوا من اصحاب المخدرات او من اصحاب الجلسات والخمر وشوف لك واحد مخاوي شما يعمل في المباحث وظبط لهم كمين محترم يقلع جذورهم ويوديهم ورا الشمس بس اخوك في يوم الكمين اقفل عليه في البيت لاطلع واستخبر بما اصاب اخوياه بتلقاه يرجع يحترم نفسه ويمشي على العجين مايلخبطهوش مثل ماقالوا اخونا المصريين |
أخوي
أخو زميلتي نفس الشئ مرة من المرات تعرف له كذا على شلة و سبحان الله المباحث مثل ما قال الأخ المهاجر المثخن ، قبضوا على أصحابه و هو ماكان معهم على حظه من يومها خااف و تعدل سلوكه يوم شاف نهاية أصحابه أشوف الحل اللي قاله الأخ المهاجر كويس حتى لو بعد عن أصحابه الجدد ،، طيب ليه يرفض الزواج ؟ |
أتوقع ان أخوك يتعاطى حبوب الكبتاجون ...
لانها تخلي الواحد يضحك بدون سبب احياناً ويعصب ويتصرف بهستيرية ... موضوعه جداً صعب ... الله يعين .. اما عن الحل : خبر أمك بالموضوع وخليها تدعيله بصلاتها ... ترى دعاء الوالدين مستجاب .. ولاتخبر أحد من أقاربك صدقني ماراح يسوون فايدة ..لان هذا رجال كبير مو بالسهولة السيطرة عليه .. لكن خله لما يطيح بتيهه ويتم القبض عليه مع ربعه ... وقتها راح يتغير لما يكون بالتوقيف أو السجن ... كثيييير من عيال جيراننا كانوا كذا ... ومانفعت معاهم جميع الوسائل والمحاولات من قبل الوالدين والاعمام ورجال الخير ... غير بعد دخولهم السجن والضرب اللي تعدلو وصاروا يمشون صح ... بعد الويل اللي شافوه !!!!! |
يمكن انه يتعاطى شي حاولو راقبوه وشوفو وين يروح وايش يسوي
ربي يهديه ويصلحه |
اقتباس:
فكرتك طيبة بس بنسبة 80% اخوي بينقفط معهم لانه اخوياه بيدبسون عليه وبيسوون له تحاليل وعلى ساحة الصفا:d اقول ليش ماادق على مستشفى الامل يجون يمسكونه ويسوون له تحاليل ويعالجونه غصبن عنه بس المشكلة هنا انه بينفصل من شغلة ؟ |
اقتباس:
اسبوع وتتاكد من اللي يسوونه وتقبض عليهم وانا كيف امسك اخوي اسبوع ؟ بالنسبة للزواج كان يحب بنت خالتي وهي تحبه وتزوجت وسحبت عليه :d وبعدها كره الحريم |
اقتباس:
وهذي مشكلة كبييييييييره |
اقتباس:
ادعوله |
وعليكم السلام أنت قلت أن أخوياه القدامى يسألون عنه إذا أفضل لك أنك تتواصل مع أقر أخوياه ومن تثق بدينه وخلقه وتشرح له كل اللي شفته على أخوك واتفقوا كيف يـأثرون على أخوك بأي طريقة جرب هذه الخطوة وشف وين يوصل موضوع أخوك والله يكفيه شر المخدرات وشر رفقاء السوء عزوبي بس رجل |
نصيحتي لك لا تعلم والديك ..
ادع له بصلاتك وبآخر الليل وكلمه بوقت يكون فيه صاحي يعني بعد صلاة الجمعه وانتوا راجعين من المسجد ولا اذا جلست معه على انفراد .. قله يا اخوي والله مايفيدونك وتخيل الوالده تدري فيك ويصير فيها شي بسببك ومن هالكلام الي يلين القلب .. حاول تتعرف على اخوياه الجدد علشان تسبب مشاكل بينهم وبين اخوك .. اذا تعرفت عليهم خذ منهم حبوب او حشيش وورها لاخوك وقله ان بضاعتهم طيبه وانك بتستمر تاخذ منهم وبتحشش مثل اخوك .. |
أخوك يتعطى حشيش .. اتصل بالمصحة النفسية ياخذونه و يعالجونه ،،،،
|
اقتباس:
|
قبل كل شي الله يكون في عونك والله مشكله معقده بعض الشي
بس انا انصحك قبل كل شي ان اهلك ما يطلعون على الامر اول شي عشان ما يقلقون وهم ما بيدهم شي يسوونه والشي الثاني لو كان فعلا ماشي في طريق خطأ ما تسبب له الاحراج فيما بعد ومن ناحية انك تبلغ لا تبلغ في الوقت الحاضر عن اللي معه عشان ما تدمر اخوك اكثر من كذا لانهم راح يسحبونه معهم رفقاء السوء ما راح يسكتون حاول تتأكد قبل انه فعلا يتعاطى شي واذا تأكدت شوف لك احد من اقاربك او من اصحابه ويكون ثقه وفيه الخير عشان يساعدك في امر علاجه بعدها بلغ عن اللي كان يجلس معهم عشان ما يدمرون غيره وقتها يكون اخوك برا المشكله بإذن الله |
طيب ليه ما تقوله ان الهيئة اتصلوا:27: بي يسألونني عنك يعني مثلا سألوك وين اأخوك الان وانت ما عرفت ترد عليهم وانك استغربت من سالهم خبره يمكن ينعدل ويخاف ويرجع للطريق الصواب
الله يهديه ويهدي جميع المسلمين يااارب |
تصرف اخوي بحكمه و ان شاء الله مايصير الى الشي الزين
ويارب ينقضه وينقض شباب المسلمين من هالبلاوي |
| الساعة الآن 02:43 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©