|
اخواتي وتفكيرهم السطحي وتدخلاتهم الغير مبرره
السلام عليكم
اتمنى استشارتكم في مشكلتي المشكله هي اهلي احنا كلنا بنات وكلنا متزوجات الا وحده صغيره اخر العنقود عمرها 20 سنه كل جمعه عند اهلي لازم تكون هناك مشكله والسبب هو تدخل اخواتي في مالا يعنيهم وانا بنت عصبيه جدا اتضايق بسرعه من تصرفاتهم خواتي احيانا اقول انهم عاقلات وواعيات ولكن لما اشوف تدخلاتهم احس انهم سخيفات وماعندهم اي عقلانيه مثال على تدخلاتهم امي احيانا تسافر عند اهلها في مدينه ثانيه واهل امي الي هم خوالي امي تعشقهم بجنون واكثر من الطبيعي مع انهم لايهتمون في امي كثير اهتمامهم عادي واحنا طبقه وهم طبقه اقل منا بكثير وماتربطهم فينا غير المصلحه يحبون يتمصلحون من امي وامي لانها تحبهم كثير ممكن تعطيهم روحها وهم مستغلين النقطه هذي ولكن بالاخر يظلون اهلها واخواتي اذا يتضايقون من سفرها لهم رغم ان حياه امي كلها هم وحزن وهي الان في سن الستين وتجد الراحه والسعاده عندما تذهب لاهلها والله انها اذا رجعت من عندهم وجهها يكون اكثر حيويه ونجد السعاده في عيونها انا اشجعها على الذهاب لاني افكر في راحتها وسعادتها اتمنى ان تعيش اجمل اللحظات في ماتبقى من عمرها وتنسى احزانها ولكن اخواتي عندما يعلمون انها ستسافر يجن جنونهم لماذا تذهب لاداعي لذالك لانها احيانا تذهب مرتين في السنه ووالدي متوفي واختي الصغرى لا تحب الذهاب معها فتضطر اختي ان تجلس في البيت ولكن نحن اخواتها لانتركها لوحدها وازواجنا يرحبون بها وبتواجها في منزلنا فهي اخر العنقود والكل يحبها فهي لن تضيع واخواتي يلومون والدتي انها تذهب وتترك اختي الصغيره ولكن نحن معها انا واطفالي والخادمه نجلس معها واختي الكبيره بيتها قريب من اهلي وهي تنام بالاسابيع والاشهر عند اهلي لانها على خلاف دائم مع زوجها فهي في كل الاحوال شبه مقيمه عند اهلي وعندها اولاد كبار فلا خوف على اختي الصغيره حتى اذا سافرت والدتي لاننا كلنا معها ولكن اخواتي يبحثون عن المشاكل وكثره الكلام والتنكيد على امي هم يحبون والدتي كثيرا ولكن يجن جنونهم عندما تفكر الذهاب الى اهلها هل من حقهم هذا التدخل وهل ماتفعله والدتي غلط انا متاكده ان امي تستحق ان تسافر وتعيش ماتبقى من عمرها بسعاده وراحه وهم لايحق لهم التدخل لان تدخلهم غير منطقي هذا اولا واسفه لاني سوف اطيل عليكم ولكن ليس عندي احد بعد الله سواكم ارجوكم تحمللوني الشيء الثاني ان اخواتي يتدخلون في حياه اخواتي المتزوجات مثلا عندي اخت زوجها ليس بخيل ولكنه حريص وهم لا يسمونه الا البخيل رغم انه اشترى لزوجته في ذكرى زواجهم تعليقه الماس بثمانيه الاف وذكرى زواجهم الثاني خاتم باربعه الاف ولكن اختي لا تحب الاسراف وهم يلومونها ويتكلمون من ورائها ان زوجها بخيل وهي ايظا بخيله ووووووووووو يطول الشرح ولكن انا الي اشوفه انه فعلا حريص ولكن هي راضيه ومبسوطه وسعيده لان زوجها يحترمها ويقدرها ومايغلط عليها واهم شيء التفاهم بين الزوجين والراحه والانسجام بينهم فلماذا نتدخل في حياه زوجين وسعيدين؟؟؟؟ واختي الثانيه سافرت شهر العسل لاجمل واغلى الدول الاوروبيه وهي التي اختارت الدول واشترت شنطه بقيمه خمسه الاف وفي الملكه اشترى لها هديه موبايل بقيمه 3 الاف واعطاها 5 الاف لان نقصها اغراض والمهر خلص وشقتها انيقه وتصميمها امريكي وجميل جدا كلها حيويه وشباب اهل زوجها يحبونها اكثر من بنتهم وهي لا تعرف الطبخ كان دايم يطبخ وهي تساعده في اعداد الغداء بعد الزواج بشهر اشترى لها هديه العيد خاتم قيمته ثلاثه الاف والاهم من هذا كله انه يحبها ويحترمها ويقدرها لا يهينها يعاملها بكل احترام وهي سعيده جدا معه ولله الحمد ولكن اخواتي لم ينظرو لهذا كله بل ينضرون لسفاسف الامور يعني هي تزوجت في شعبان وكل شعبان شهر عسل في اوروبا في العيد قالها حنسافر لدبي ولا سافرو لضروف قالو زوجها ماعنده غير الكلام لكن فعل مافي كذب عليها يقول حنسافر ولا سافرو!!!! طيب هي لسى راجعه من شهر العسل وماله داعي اصلا السفره هذي وايظا طلبت انه يشتري لها ساعه الماس وكان لسى مهديها خاتم الماس في العيد واعتذر وقال حشتري لك بس بوقت ثاني وقالو المفروض يشتري لها لو كان يحبها كان مايحرمها من شي مو يرفض وتكلمو كلام كثير ونسو كل حسناته اصلا هم ماشافو فيه اي حسنه رغم كل الي ذكرته لك بالله عليك هل هذا تفكير ناس عاقله دايم يتكلمون هذا زوجها ماشرى لها هذي زوجها ماسفرها ودايم كلامهم كذا يرفع الضغط وانا ما اتحمل واجلس اتناقش معاهم ابي افهمهم وعذرهم انو نبغاكم تكونو احسن منا مانبغاكم تعيشو عيشتنا نبغى مصلحتكم ومن هالكلام دايم يتكلمو هذي زوجها جاب لها حتى لو ان معاملته سيئه معاها اهم شي عندهم المضاهر مايفكر انو قليل الوحده تلاقي رجال يحبها ويحترمها واهم شي انها سعيده ومبسوطه معاه الي يقهرني انو مه دايم هذي سوالفهم مايقولو الحمد الله اختنا الله وفقها وعايشه سعيده مع زوجها لا يتدخلون في كل شي وهات يا نميمه ليه احنا اخوات ونتكلم في بعض كذا وفي شي مايخصنا كل وحده راضيه في حياتها ليه النكد انا مليت منهم ومن تفكيرهم وتدخلاتهم الغير مستحبه كيف اقدر اغيرهم وكيف اقدر امسح التفكير هذا من عقولهم نفسي مره اسمع وحده تقول الحمد الله اختي الله وفقها في زوج يخاف الله ومتفاهمين وسعيدين مع بعض لكن للاسف كل كلامهم الله يخلف عليهم ولا وحده تزوجت واحد يملى العين يبغون واحد يصرف فلوسه على ملابس ومكياج وهدايا وسفرات لزوجته والان من اسبوع صارت مشكله بيني وبين وحده من اخواتي وتعبت نفسيتي منها كثير حجزت سافر عند اخوالي اغير جو لاني اذا سافرت هناك ارتاح وزوجي حجز لي انا واطفالي وبسافر بعد اسبوع اغير جو ورتاح نفسيا المشكله انا مايهمني احد ولي شخصيه وزوجي راضي اني اسافر لانه حس اني محتاجه اغير جو لكن انا شايله هم كلامهم انا مايهمني الكلام ماعلي من احد بس انا عصبيه واتنرفز بسرعه وما احب احد يتدخل في حياتي المشكله الان اذا عرفو اني بسافر عند خوالي راح يجن جنونهم ليه تروحين ماله داعي وش نبين فيهم ومن هالكلام وهم عارفين اني ارتاح اذا سافرت هناك ما ادري اخاف اذا فتحو الموضوع اتنرفز واعصب عليهم واغلط عليهم بالكلام لاني واصله حدي منهم كيف ارد عليهم وكيف اواجهم انا فكرت ما ارد اسمع ولا كاني سامعه بس اعرف نفسي اتنرفز ولازم ارد ما اقدر اسكت ابي ارد عليهم رد يوقفهم عند حدهم ولا عاد يتدخلون في شي مايخصهم ارجوكم ساعدوني لان من جد اخواتي جننوني |
السلام عليكم ...
لا يكون تحكين عن بيتنا وأنا مدري :) نفس المأساة عزيزتي إلا أنني ارتحت عندما : 1- أيقنت انك تغير جبل ولا تغير جبلة . 2- ما دمت انا مرتاحة أطنششششش على الآخر ... لأن سبحان الله كيف وحدة ما عرفت تتعامل مع زوجها تجي تعلمني شلون أتعامل مع زوجي ؟؟؟؟ 3- اقتباس:
بتتعبين في البداية لكن خلاص بيتعودون عليك وعلى أسلوبك الجديد وإنتي بتتعلمين إنك ما تنفخين في قربة مشقوقة وأعصابك زوجك واولادك أولى فيها والله يكون في عونا وعونكم ،،، |
وليه يعرفو كل اخباركم
ليه تتكلمو عن اسراركم زوجي اشترى وزوجي جاب وزوجي حجز لي للسفر اكتمو اسراركم ما ضروري يعرفو انك مسافره قولي لهم جا السفر فجأه عمل لي زوجي مفاجئه اكتمو اسراركم البيوت اسرار وايضا اخوتك المتضررين من كلامهم اطلبي منهم ان لا يخرجو اسرار بيوتهم بحجة العين لان احيانا الانسان من اقرب الناس يصاب بالعين وقت تجتمعو اشغلو وقتكم بترتيب وتنظيف بيت الوالده الله يحفظها لكم وشكل اخواتك تاعبينها كتير وتروح عند اخوتها تغير جو تستاهل امك السفر لتغير النفسيه وقت تجتمعو اشغلو وقتكم بالطبخ للوالده وترتيب اشياء ترتاح فيها لمدة اسبوع ما تتعب فيها صحتها |
اقتباس:
يعني في ناس مثل حالتي وحاله خواتي طيب كيف صابره عليهم!! الى متى التدخل واللقافه الله يكون في العون شكرا لك |
اقتباس:
لانهم دايما شوفو فلانه وين سافرت وفلانه وش مسوي لها زوجها يعني اي شي يسوونه رجالنا لنا مايعجبهم وانا انقهر لما اشوف زوجي او زوج وحده مو مقصر وهم يحشون فيهم من جد قهر بس انا الان ابي حل لان لو برضو ما تكلمنا بيزعجونا يقولون ليه زوجك ما سوا وليه زوجك ماسفرك وانا ابي حل للقافتهم ابغاهم ماعاد يتدخلون في احد دام ان كل وحده راضيه ومرتاحه في حياتها ولا اشتكت لهم |
معناته انتي عارفه انو لو مهما عملو ازواجكم مارح تخلصو من السنتهم
معناته اريح راسي ومايهمني منهم اهم شي راحتي انا وراحه عيلتي ومن يوم ورايح لاعاد تتكلمي معهم بأي شي ولو تكلمو عنك سوي نفسك مو سامعه طنشيهم |
انا قلت لك يا اختي نفسي اسمع ولا ارد بس انا طبعي عصبي ما اقدر اتحمل اتنرفز بسرعه
وبعدين انا ابغى اوقفهم عند حدهم ماابيهم كل مره يتدخلون وكل مره اكلمهم يرجعون يهدون شوي وبعد فتره يرجعون لطبعهم ابغى حل جذري |
اقتباس:
قلت لك تغيرين جبل ولا تغيرين جبلة الواحد صعبة يغير الناس اللي حوله بس سهل يغير نفسه الحل هو الطناااااااااااااش تقولين عصبية وما أقدر ؟ اذا ما قدرتي نغيرين نفسك وشلون نبين تغيرين الناس ؟؟؟؟؟؟؟ |
اقتباس:
:22: :22: |
هلا فيك يا الغاليه
انا ما ابي اغيرهم ابي اوقفهم عند حدهم ولا عاد يتدخلون في حياتنا وحياه امي |
يالله !!
أنا حسيت بدوخة من اللي قرأته كيف أنتم عايشين في هذا الجو مافي راحة ولا استرخاء يعني كلٍ وحدة جالسة تشوف الثانية وتتبع النقص علشان تنتقد ؟!! واللهِ تعب بما إنه عندك رغبة في التغيير اجتمعي معهم وكلميهم بطريقة حلوة واسلوب جميل من باب الدين أول شي ذكريهم بالله وحكم النميمة والغيبة وبعدها قوليلهم بكل صراحة لو حابين نستمر وأولادنا بعدين يستمرون مع خوالهم لازم نترفع عن الأمور هذي لأنه فعلاً صعب الإستمرار بهذا الجو حتى لو كنتوا أخوات الله يكون في عونكم ووالدتكم رجاءً احترموا رغبتها وسنها وقدرها عندكم مالكم علاقة في روحتها وجيتها وتصرفاتها والله يرزقكم برها ورضاها .. |
انا تعبت من الكلام التفاهم ماجاب نتيجه احيانا يسكتون قدامي بس يوصلني الكلام من امي
لانها احينا تضطر انها تسافر ومحد يدري عنها عشان تفتك من كلامهم |
يــآاختي ماالك الا الصبرر والدعااء ... واذا انتي مااله منهم او مااتبيينهم ساافررري مع امك احسسن لك وفليهاا واستاانسسي ....
وغيري اسلوووبك معااهم حااولي انك تعاامليينهم بااحتراام كاانهم اغراااب ..وبعديين اهم بيلاحضوون علييك وبيعااملوونك نفس مااانتي تعاامليينهم ...[COLOR="Red"] [/COLOR] |
بحاول اطنشهم وان شاء الله اقدر
|
حبيبتي ريحي بالك من فضول الكلام
روحي لعند امك تكلمي بكل اشي ما عدا سفراتك دخلاتك مقتنياتك بس تفاديا للمشاكل لانو مها عملو بيضلكو اهل واعلمي ايضا ان العين حق وكل دي نعمة محسود |
افضل وسيلة للدفاع هي الهجوم
اختي العروس انا كتير مبسوطة انه الحمد لله في أحد بعائلتكم واعي و عارف الصح من الغلط و اللي هو أنتِ أنتِ يجب ان يكون لك دور بالتأثير على اخوانك و تغيير تفكيرهم ، أو مواجهتهم على الأقل ! يقول صلى الله عليه و سلم : " المؤمن القويّ خير و أحبّ إلى الله من المؤمن الضعيف " واجهي اخوانك و قولي انا رايحة بيت اخوالي لأصل رحمي !!! انت التي على حق و انتِ التي تفعل الصح فلم التردد ؟؟؟؟؟؟ لا تترددي ان عارضوكي هاجميهم بفكرة صلةالرحم لأن رسول الله صلى الله عليه و سلم يقول :" لا يدخل الجنة قاطع رحم " صحيح مسلم فسواء انت أو اخوتك او أمك يجب ألا تقطعوا أخوالك حتى و ان كانوا مستغلين هذا لا يبرر قطعهم و لا يجوز لاخوتك ان يقيسوا الأمور على المقاييس المادية و أعتقد انهم لا يحبون أخوالك لأنهم أفقر منكم و حتى لو كانوا يأخذون من أمك بعض المعونات المادية فهذا فيه أجر عظيم فالأقربون أولى بالمعروف طبعاً بحدود و لا اعتقد انهم يأخذون شيء بدون رضى والدتك و لا اعتقد انهم يأخذون الكثير و بالنسبة لتدخلهم بحياة خواتك و الله أمر محزن جداً أن يعلموا أسرار بيوتهم ، والمحزن أكثر تقييهم للرجال على جيوبهم !! حرضي خواتك على الكتمان ، و الكتمان الشديد في الأمور المادية وان حصل و تكلم اي احد من اخوانك لا تستمعوا لهم أعلم عائلة كان فيها البنات يتكلمون على زوجات أخوانهم (يعني عكس عائلتكم ) كان 2 من اخوانهم يتجنبوهم بشكل شديد و الأخ الأوسط كان يستمع لهم ، فكانوا كل مرة يكرهون بزوجته حتى يطلقها و يشرد أطفاله .. و هكذا تزوج و طلق 5 مرات !!!!!!! و الله يا اختي 5 مرات و انتقل من وضع مادي ممتاز إلى انسان فقير يشحد المال باع بيته و أغراض بيته ليدفع مهوووور كل مرة لذلك حذري خواتك من الكلام بأي شي امام اخوانك المخربين و حتى لو كلموهم اياكم و الاستماع لرأيهم و تقييهم للأمور المادية افضل حل هو الكتمان و اقتصار العلاقة على الرسميات ، يعني اتجنبوهم قدر المستطاع و الآن انتِ مالهم عليك اي حكم بعد زواجك ، فاذهبي لأخوالك و زوريهم و ان عارضوكي هاجميهم بالاستشهاد بقول الله و رسوله أحزنني جداً اعتراضهم على أمهم !! لا يحق للزوج ان يمنع زوجته من زيارة أهلها ، فكيف للأبناء أن يمنعوا والدتهم من الزيارة و مرتين في السنة ؟؟؟؟؟؟؟؟؟؟ و الله قليل ، قليل جداً ، لكن المهم امك تكون سعيدة الأهم وصل الرحم الأهم استمرار الزواج على الود و المحبة ماذا ينفع الألماس و الذهب ان كان أزواجهم يضربون زوجاتهم أو يخونونهن أو يسيؤون لهم او لأهلهم واجهي اخوتك بقوة الحجة و الأدلة و لا تخافي و ان عارضوكي طنشيهم و امشي بحالك الله يعينك على قول الحق استعيني بالدعاء ادعي ان يجعل الله فيكِ قوة لقول الحق موفقة |
اقتباس:
الله يعطيك العافيه وان شاء الله اعمل بنصيحتك |
اقتباس:
انا واجهتهم الاسبوع هذا وقلت انا رايحه اغير جو واشوف اخوالي ردو علي وقالو انتي رايحه تنبسطي والا رايحه تصرفي عليهم!!!! طيب اذا انا قادره اصرف فلوسي على ناس محتاجه ليه لا؟؟ وبعدين يكفي انهم راح يستضيفوني اقل شي اني اشتري اغراض من اكل وغيره لاني رايحه عند خالتي وبناتها ثنتين ومافي شباب وانا اكون معاهم كثير مبسوطه ومرتاحه شي طبيعي اني راح اصرف يكفي السكن ببلاش مافي شي لو اشتري اغراض للبيت من اكل ومشروبات وهما يادوب خالتي وبناتها وانا واطفالي لازم اقضي لي انا واطفالي شي طبيعي وكل شي بأجره شاكره لك كلامك الطيب اختي وماقصرتي كفيتي ووفيتي الله يعطيك الف عافيه |
الله يعينك يالعروس على مثل هالنوعيه من الأخوات صراحه شئ يرفع الظغط
أنت حاولي تطنشيهم وتحقريهم لأن الحقرآن يقطع المصرآن يوم يشوفونك ماعطيتهم وجه يمكن يحسوا شويه علا دمهم ويبطلوا هاذي العاده فيهم وبصراحه أنت فيك خير لأنك جالسه تنصحيهم وتنبهين عليهم بترك هاذا الأسلوب لأن ذولا أخواتهم ليش يتكلمون عنهم كذاوهاذي أمهم المفروض يريحوها من سوالفهم ذي إللي تنرفزها وشئ أكيد بتحط في خاطرها منهم وأمك ماقالت لك عنهم إلا إنها حست فيك غير عنهم وشافتك مهتمه بسعادتها وراحتها أكثر منهم وأنتي ماقدرتي تصبري على كلامهم وأنا أنصحك أتركي العصبيه الزايده أنت وراك بيت وزوج وعيال محتاجين لك ماعليك منهم دام إنك مبسوطه ومرتاحه فطنش عش تنتعش علا قولة الشيخ سليمان الجبيلان لاتزعلين ولاتعصبين وأعرفي بأن أي كلمه تخرج من أفواههم سيحاسبون عليها هم لوحدهم أنت ماعليك سوى نصحهم وتذكيرهم بأن هاذا الكلام نميمه وحرام ولا يجوز لهم التكلم عن حياة أزواج أخواتهم وأخواتهم بهاذي الطريقه وأنت لك أجر من الله في نصيحتهم أنت هدي أعصابك وبري أمك وطيعيها وما أتوقع إن هاذا الكلام يصدر من أخواتك في أخواتهم هو بدافع الحرص على مصالحهم ولاكن والله أعلم بداعي الحسد نعم حاسدين أخواتهم في حياتهم علشان كذا يبحثواعن الهفوات وإلا وش دخلهم في إثنين متزوجين ومتفاهمين ويحبون بعض سافروا وإلا ماسافرو حياتهم وهم حرين فيهاوأنا أحي فيك رجاحة عقلك وقول الحق صراحه أنتي أخت والنعم فيك من موضوعك ماترضي بالغلط أبدا نحسبك كذلك والله حسيبك وفقك الله يا أختي إلى مايحبه ويرضاه من قول وعمل وتقبلي تحيات أختك في الله . |
الف شكر لك بنت الحكمي وكل الي ردو انا سافرت وغيرت جو وطنشت اي كلام اسمعه
والحمد الله كانت رحله حلوه وممتعه وان شاء الله اطنشهم بس اتمنى انو تفكيرهم يتغير |
انا مع اختي قرييييييييين222
|
| الساعة الآن 04:52 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©