|
ابلعه واسكت او اتكلم
السلام عليكم
كيفكم شخباركم مع البرد الموضوع واضح من عنوانه اذا حصل موقف من حمولتك اهل زوجك تقصيرهم بتقديرك واحترامك هل توضحين لهم انك مضايقه وتوجهينهم عشان تعرفين سبب هذا التصرف بحقك والا تبلعينها وتسكتين مع ملاحظه ان هالموقف مو اول مره منهم يااااااااااامواقف كثيره وكنتي تبلعينها وتسكتين لعيون زوجك وان الدنيا ماتستاهل بس خلاص طفح الكيل:29::29::29: وش رايكم؟؟؟؟؟؟؟ |
السلام عليكم ...
أنا عن نفسي أسكت ... لكن أسكت بأسلوب ... فتوصلهم الرسالة أبلغ من الكلام ... ومهما سكتي تأكدي محد يقدر يجي يقول ريفان قالت ... وهذا المهم ... لأن كثرة الكلام ممكن تغلطك ... وممكن يصغر غلطهم مقابل كلامك فتتمنين انك سكتي .. والندم على ما لم يقال خير من الندم على ما قيل .. |
اذا كانت سوالف حريم يعني هي قالت وهاذي ماسلمت علي ومدري كيف ابلعيها لأن اغلب مشاكل الحريم تبدا بسيطه ونهاياتها خراب بيوت
اما اذا كان شي كبير فأعتقد انك تقولين لزوجك انه اذا حصل المره الجايه راح تتكلمين ! عشان يكون عندك فكره طبعا هذا بخصوص خوات زوجك اما امه فالعمر له احترامه وابلعي اي شي يجي منها ^_^ وانا اشوف ان الرسميه حلوه يعني كل ماكثرت الزيارات وكذا كثرت المشاكل |
صح كلامك وهذا الى خايفه منه اني اتندم لو اتكلم
بس حامت كبدي منهم وتصرفاتهم الغبيه لو اني اطنش مايهمنى ارحم بس مشكلتى اكل بنفسي واسكت |
اقتباس:
وزوجي عارف ومثلي مو محصل تفسير لتصرفاتهم لانها مو خرابيط حريم كلام انا اخاف اتكلم واتندم لاني اعرف نفسي اذا تكلمت بطلع الى بخاطري كله واخاف تكبر وتصير زعل وانا مابي يكون بينا شي بس ابي الخواطر مايكون بها شي ولا ابي احمل عليهم ودي اقول وارتاح |
تيب لو اقول لزوجي هو الى يقول لهم وانا اسكت وش رايكم
لان زوجي واصل اتش من تصرفهم هالمره لانه قل احترام بحقه قبل يكون بحقي واتوقع بيتكلم مابسكت طيب افرضو قالهم بيجون يحولون يبررون تصرفهم اعرفهم زين بيحولون يطلعون انفسهم من الغلط اسكت او اتكلم لان بكره بشوفهم غصب |
^
^ طيب اختي ياليت تذكرين بوضوح وش المشكله عشان نقدر نفيدك يعني ايش التصرفات بالضبط؟ |
ودي بس صعبه
لان لو بقولها عرفوني ناس هنا من اكون يعنى تصرف يدل على قل احترمهم وتقدير لك وزوجك |
أيضا لو مكانك لن احشر زوجي في الموضوع لأننا واحد ...
ما يمسه يمسني وما يمسني يمسه ... وماذا ساستفيد اذا شالت قلوب الأخوان على بعض ؟؟؟ وهل تظنين أنك ستصبحين بعيدة عن وجه المدفع اذا هو تكلم ؟؟؟ أقل ما سيقال عنك انك فتانة وتسعين الى التخريب بين الأخوة ... نصيحتي احتسبي اجر كظمك لغيظك فوالله ثم والله ثم والله إني ذقت حلاوتها بعد مرارتها بايثار الله لك ولو بعد حين .. ولا تنتظري هذا الايثار من الله لك وانتي تنتقمين لنفسك منهم فانتقام الله لك خير لك من انتقامك لنفسك ... اصبري ... أعلم انه صعب ولكن ما اجمل قطف الثمرات بعد ذلك |
أنا مع رأي رسيل آهتمي بأسرتك ودعيهم يتكلموا حتى يتعبوا ويسكوتا
إذا قلتي لزوجك حتكبري الموضوع ويمكن زوجك ينقلب عليك ترى في أزواج لا يرضون على والدتهم حتى وإن كانت هي آلمخطئة (خط أحمر) |
حبيبتي قال الشافعي
في الصمت وهي موكل واحد يقدر يصمت قالواسكت وقدخوصمت قلت لهم ان الجواب لباب الشر مفتاح والصمت عن جاهل اواحمق شرف وفيه ايضا لصون العرض اصلاح اماتزى الاسد تخشى وهي صامته؟ والكلب يخسى لعمري وهو نباح حبيبتي مافي مثل السكوت يعطيك هيبه كثرة الحكي بتنزلين مستواك وتبررين تصرفاتك للكبير والصغير وبيقولون لوموغلطانه اوحاسه بالذنب ماتكلمت وبعدين شوفي الخطأ منك اومنهم او من تصرفات زوجك واصلحي قد قدرتك يمكن يغارن منك اومن معاملة زوجك لك وتنعكس مشاكل بينك وبينهم ترى احيانا الزوج يكون غبي ويسبب مشاكل بين زوجته واهله مثلا يجيب لها هديه او يقول لها كلام حلو قدام خواته فيثير غيرتهن خصوصا لومو متزوجات اوتعيسات بحياتهن وحنا بشر نغار ونبي الزين لو كان زوجك من هذي النوعيه امنعيه يدلعك قدامهم تحاشي للمشاكل وفتح انظار الحساد عليكم ولو كان الغلط من اسلوبك معهن حاولي تصلحين نفسك وعامليهم باحترام واللي ماترضينه لنفسك وامك من زوجة اخوكي لاترضينه لهم وترفعي عن نقل كلامهن وتصرفاتهن لزوجك حتى ماتثيرين فته بينه وبين اهله الا اذا شي كبير يتوجب تدخله اما اذا الغلط منهن فمعاملتك الحسنه لهم كانك تغبرين وجوهم ولو كان ايش سوءهم بيستحون على دمهم واذا ماتغيرو اجرك على الله ودائما حثي زوجك على برهم واهديهم بدون مناسات اماسمعتي قول الرسول تهادوا تحابوا]فالهديه لها اثر عجيب في زرع المحبه بينكم واجعلي تعاملك معهم لله مو لخاطر زوجك بكذا عمرك ماتحسي انك بتنفجرين اوان كبدك حايمه لانك واثقه ان اجرك على الله والله يصلح لك امرك |
نظريهم بعيونك واضحكي بخفيف
واسكتي |
دخل من جوال مابقدر ارد زين بنسبه لزوجي ياناس شي شافه بعيونه ماحشرته والله مانقلته له بس شكلي بسكت وحول بزوجي يكنسل ومايقول شي مع اني اشك انه بيسكت لانه مره مضايقه وبيعها لوجه الله خير من الدنيا والي تقول ام زوجي ام زوجي دره من الماس مافيه مثلها وانا عندها عيونها الله يجزاها الفردوس باخذ برايكم وسكت وشوف موقفهم بكره اذا شافوني
|
ايي ياكثر مشاكل خوات الزوج مع الكنة،، صارت اكثر من مشاكل الكنة مع ام زوجها حاسة بالقهر اللي فيكي،، بس من تجربتي السكوت وااااااااايد احسن من الكلام والتشكي،، لانك بتفتحي مشاكل جديدة ومابتخلص واهم من ذا كله، عشان زوجك لايتضايق واذا اهو داري وشايفك ساكتة راح ينبسط منك لانك متحملة ومحترمة اهله،، وماتدرين شلون راح يتصرف، اكيد اهو يخاف عليكي ويحبك ومايرضى ان احد يمسك بشي بس والله من تجربة، لاتحطين في خاطرك وطوفي هالامور، صج بصعوبة تطوف بس حاولي، لان اكره شي ان تكون علاقتج باهل زوجج مو حلوة او عليها غبار،، وخصوصا البنات اذا عملتي معاهم اي شي راح ينقلون سمعتج عند اهلهم الباقي والله يصبرك ويعطيكي على قد نيتك |
يغارون منك لان حماتك تحبك طنشي. لعيون حماتك وزوجك اتركي زوجك هو يتصرف وما تطلبي منه شي وشوفي. النتيجة
|
وعليكم السلام والرحمه ... هالنوع من المواضيع اكررررررهه بصراحه .. اسفه اختي بكوون قاسيه شووي معاك .. اهل الزوج اللي تتكلمين عنهم مو هم اللي اختاروك لولدهم.. مو هم اعمام اولادك .. صدقيني مالك غنا عنهم حتى لو قصروا بحقك .. مهما كان التصررف اللي بدر منهم .. لو هو اخووك والا اختك اللي مسويته كان ماوقفتي عليه هالوقفه كان مشيتيها صح ...؟ ساعدي زوجك ع بررر اهله حتى لو شاف موقف منهم يزعله .. حاولي انتي تبررين له هالموقف لصالح الجميع .. ماراح يضررك بشئ ... يعني انتي مبسوطه انهم قللوا احترام اخوهم وقلتي اخيراً شاف هو بنفسه ولا قلت له ... وربي الدنيا ماتسوى كل واحد يشيل بقلبه .... يمكن انتم فاهمين الموضوع غلط ... الرسوول صلى الله عليه وسلم .. في مامعنى الحديث .. التمس لاخيك المسلم سبعين عذر .. مالقيتي عذر طلعي من خيالك عذر ... فكرري بعد عمر طوويل زوجك اذا صار له شئ لاقدر الله .. من لاولادك بعد الله غيرهم ...؟ ماااااااااااااااااااااااااالك غنى عنهم بعد الله ... اكرر اسفي اذا قسيت عليك بس روبي لمصلحتك بإذن الله ... الله يوفقك ياقلبي وييسر لك الخير ... |
نصيحتي اسكتوا
والله مافيه مثله وبالحديث قل خيرا او اصمت ودام ام زوجك عسل صدقيني لو تكلمتوا بتتغير عليك انتي خلي علاقتك وسلامك واحسانك لها والباقين طنشيهم |
الحمدلله انا لقائاتي باهل زوجي قليله ودايما عندما التقي معهم يكون زوجي معي
فاذا صار اي شي اسكت بس هو يعرف اني تدايقت من موضوع بعدين يجي يعتذر ويروح يفهم اهله انو تصرفهم غلط وانا بالنهايه اطلع البريئة لاني فعلا مااتكلم ولا اجي اقول اهلك سو وقالو |
والله انا رايي من راي رسيل.. صدقيني طنش تعش تنتعش..
والله ثم والله ثم والله انك لو تكلمتي وصارحتيهم مارااااااااااااااح ترتاحين.. راح يزيد الهم همين.. |
رسيل كلامك اكثر من رائع اختي انا كنت مثلك اسمع كلام واشوف حركات تحر القلب... والله لو اقولها بتقولون ....اشلون صبرتي عليهم ... بس والله كنت اسوي نفسي عبيطه ما افهم ولا اشوف ما يقصدون ..... علشان راحت زوجي ... لان هدفهم اثارت المشاكل وعوار القلب ما كنت اعطيهم اللي يبونه .... ما في غير اطنشين لين هم يتعبون من التحرش ويملون ويروحون حق غيرك نصيحتي لا تردين عليهم وسوي نفسك ما فهمتي قصدهم لغايه ما يطيحون بشر اعمالهم الله المستعان... |
السلام عليكم ريفااان أنا مجربة الوضع أنا عن نفسي طنش تعش أسمع بليمين واطلع من اليسار بس بلمعقول أهم شي مو شي يطعن الشرف او على اهلي بس لا تعطي أحد.وجهة ما احد يقرب يمك ولا يقولون فلانة قالت وبعد على قولت أمي الي تبي تغلة(يعني تقهرة) أسكت وخلة أنشاء الله أكون أفدت |
لاتهتمي لكلامهم ياما سمعنا وانظلمنا وسكتنا ووكلنا رب العباد
((والكاظمين الغيظ والعافين عن الناس)) لنا في هذه الآيه عظات وعبر مدى الحياة |
انا لي رأي اخر عن الاخوات00 وبحكم تجربتي00 وبحسب عدد مرات الضرر00
إن صبرت و عفوت00 فأجرك عظيم عند الله00 وهذا كلنا نتمناه ونريده في حياتنا ومع كل ابتلاءاتنا00 و لكن أنا وصلت لقناعه00 أنه إذا اريد أن اريح نفسي00 فرأيت00 أن مثل ما في بعض المواقف السكوت فيها شجاعه00 فأيضا الرد بتعقل ورد إساءه عن نفسك تمس كرامتك00 فهي ايضا شجاعه00 و وتقطع عليك مشوااااار طويل بينك وبينهم00 ولكن00 يكون ردك عليهم بتخويفهم من الله 00 ولا تطيلي الكلام00 فقط رد يجعلهم في المره القادمه يحسبون لك الف حساب00 هذا وجهة نظري وتجربتي00 يمكن لا تعجب الكل00 لكن رأيت بعيني فوائدها00 وفعلا ارتحت كثيييير خلاصة كلامي00 ضروري تبني مضادات لصواريخ الناس المستهتره00 لكي لا يجرحونك ويقهرونك00 وبعدها سترتاحي00 وليت زوجك ما يدخل بين سوالف الحريم00 نصيحه لوجه الله00 الله يكتب لك مافيه الخير00 |
مشكوووووووووووووووووورين ياحبنيلكم ماقصرتو
راحت لهم اليوم بعد العشاء واخذت معى عشاي وانا ماعرف اجامل يوضح بشكلى جلست رسميه شوي طبعا فهموها شكلهم والى تمد لي كل شوي صحن الحلى والى ماسكه تسولف على ومدري وش وانا مؤدبه مافتحت شي معهم حولت واحده تفتح معى موضوع ادري تبي عشان تبرر تصرفهم ماعطيتها وجه مابي اخذ واعطي معهم بالموضوع وزوجي ماراح معى ولا بعد شفهم حولت اقنعه برايي انه يطنش ويبيعها عند الله وسكت ادري ماله الا الى براسه ورجعت الان منهم والحمدالله مو متحسفه على شي يازين السكوت بس من يصبر بس خاطري مازل شايل عليهم ماتوقعت بعد كل هذا يصدر تصرف هذا منهم بس يلا الدنيا دروس |
اقتباس:
شوفي هذا اكبر دليل انهم يحبونك.. ولا كان طنشوك.. ولا كأنهم سوو شي..!!!!! وإذا انفتح الموظوع بيني لهم انه عادي.. بس انك بساعتها استغربتي تصرفهم.. وبعدين نسيتي .. لا تتكلمين وتفتحين وتسكرين.. ترا هذا اريح لك.. |
اقتباس:
شايله عليهم ....؟ ليه طيب مو شفتي انهم اهتموا فيك وحاولوا يرضونك بس ماعطيتيهم مجال وتقولين شايله غريب امرررك |
ليش يااختي شايلة عليهم
اذا عارفة نفسك تشيلي بنفسك كان خليتيهم يبررولك تصرفهم بعدين زوجك المفروض مايدخل نفسة بكلام الحريم تصرفات الحريم مثل الاطفال في الاخير يتصالحو والرجال في الاخير يطلع منديل زفر من الحكاية:d |
كويس انك ماقلتيلهم شي
السكوت احسن شي صدقيني ماتندمين وباين ماشاءالله انهم يعزونك لو مالك قدر كان ماهميتيهم واقنعي زوجك مايقووول شي لو بيتدخل بينقهرون منك انتي. |
السلام عليكم انا عندي موضوع مررررره مضايقني ما اقدر اقول لاحد تخيلوا اكتشفت ان زوجي يدخن بعد زواج ست سنوات وانا ما ادري معي كان حبيب وطيب راعي صلاه ماتوقعت هذا الشي منه اكتشفت هذا الشي وانا مسافره معاه وصارحته وكان هادي ويقول عادي مافيها شي انا انهبلت ما ادري ايش اسوي اعطوني حل ابيه يتركه يقول لاتحنين علي انا اتركه احسه يكذب ارجو الرد سريعاااااااااااااااااااااااااااااااااااااااااااااا اااااااااااااا
|
| الساعة الآن 01:43 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©