زوجي صار له اسبوعين مو قادر يصلي
 

السلام عليكم ورحمة الله وبركاته

انا زوجي كان انسان طبيعي من يوم عرفته كان عادي يصلي ومايسمع اغاني

لي الحين 6 سنوات متزوجه لكن من سنتين زوجي بدأ يتغير.. صار وهو يصلي يوسوس

ويعيد الصلاه مره ومرتين وثلاث.. وتطوت المشكله وصار يعيد بالوضوء مرات يقعد ساعه

بس عشان يتوضأ.. وسواسه القهري زاد بشكل ماينطاق

قبل سنه راح لطبيب نفسي واعطاه علاج واستخدمه وصار احسن لكنه ماستمر عليه بالمده اللي

حددها الطبيب.. لانه خايف انه يدمن عليه طول العمر .. وقعد تقريبا 5 شهور وهو متحسن

لكن الحين رجع لحالته بشكل اقوى لدرجة انه ماعاد صار يصلي نهائيا..

انا قلتله انت صلي وماعليك حتى لو انك متاكد انها غلط لاتعيدها لان الشيطان هو اللي يخليك تحس

انك غلط ...

لكن هو مو قادر وله تقريبا اسبوعين ويمكن اكثر مو قادر يصلي وكل ماحاولت معاه باسلوب جدا رقيق

وبكل هدوء .. اقله جرب بس ذي المره ارجوك.. يقوم يتنرفز ويعصب واشوف في عيونه نظرات كانه

خايف .. بالرغم انه انسان جدا باارد ومو عصبي ابدا ..

ارجوكم.. اللي يعرف حاله مثل زوجي .. لايبخل علي ويعطيني حل..

انا نفسيتي تعبت .. احس بديت اكرهه.. حاسه انه صار كافر لانه مايصلي ولا يحاول ..

قبل فتره.. يعني من شهر .. شفته وهو يتوضأ ووجه صار احمر وفيه علامات تدل انه بينفجر من البكاء

لانه مو قادر يتوضأ...

انا من جد خايفه ربي يغضب علي وعليه..

الله يجزاك خير يااختي ماقصرتي ..

لكن والله حاولت معه بالطريقه هذي بس هو مو راضي يقول مابي احد يشوفني ويقفل الباب..

قلت مره وحده وترجيته يجربها لكن رافض تماما..

لا بأس طهور ان شاء الله

الله يجزاكي بالخير ع صبرك
قبل كل شيء اكثري بالدعاء له

جربي خلطة ابن الرومي - موجود عند العطارين
الخلطة عبارة عن - شب وملح صخري و سدر
تأخذين سبعة اكياس من العطار
وتضيفين تقريبا 3-5 لتر ماء للكيس الواحد
وكل يوم يغتسل بكيس

اذا امكن يوميا تدهني كل جسمه بزيت الزيتون يكون افضل

بخصوص الوسواس القهري
اذا ما وده يتعالج عند نفساني
ممكن يستمع لإصدار كيف تريح بالك من الوساوس
للدكتور صلاح الراشد
ابحثي موجود ع النت 3 اجزاء
لو طبق التمارين ان شاء الله يتحسن كثير

اذا هناك شيخ ثقة يرقى عليه يكون افضل

واسأل الله العظيم رب العرش الكريم ان يشفي زوجك

ربي يشفيه ويعافيه يارب
اختي هل في احد من اهله مثلا يعرف بالموضوع؟
لو عنده احد مقرب منه جدا جدا ممكن يساعدكم بهالموضوع لعل وعسى زوجك يقتنع

اختي كلام اختي عفراء صحيح انا مجربته مع زوجي لما حسيت ببداية الوسواس معاه اي انه يمسح على الاعضاء سبع او ثمان مرات صرت اوقف جنبه واعد له الين ثلاثه وبعدها خلاص اقفل المويه واسبحه للصلاه والحمدلله الحين رجع طبيعي الله يشفي زوجك

اشتري كتب عن الوسوسة جدآ تقنع الشخص انها اوهام وانها ليس من ديننا الحنيف
قولي له هذا الشيطان وصل لمبتغاه معك استدرجك لين تعبت وماعاد صليت
استهدي بالله وقوم انا وياك نتوضأ اول انا وبعدين انت وخليه يشوفك وانتي بسهولة توضين وقولي انا بعلمك اذا فيه عضو ماوصله الماء
وانتي ارقيه وكوني معه والصلاة مع بعض واستغفروا كثيير بنيه الشفاء لزوجك ..
الله يشفيه عاجلآ غير اجل ..
تلاقين جسمه من كثر المويه ناشف رطبيه واقري عليه وقولي اللهمايرضى بالضرر حتى لو بينقصك شي وانت لاتعلم ومسوي اللي وصانا الرسول فيه من كيفية الوضوء الله مايحاسبك عليه ارتاح وانبسط وانتي غيري جوه بكل الطرق ..
وخليه يشكي لك كل اللي يحس فيه وانتي جاوبي بسماحة الاسلام واليسر لأنه هو الحين يعتبره تشدد واثم اذا مافعل وهذا من وساوس الشيطان وذكريه بان الشيطان تحدى الله في قوله تعالى {قَالَ فَبِعِزَّتِكَ لَأُغْوِيَنَّهُمْ أَجْمَعِينَ}
وقولي لاتصير منهم خلك اقوى من وساوسه وهذا بيرضي ربي ..
اللهم اشفه عاجلأ غير آجلأ وربي يكون فعونك يالغاليه..

شكرا .. من سنه تقريبا تعالج عند دكتور لكن خاف انه يدمن عالادويه فترك العلاج من نفسه ..

باذن واحد احد.. اني بشتري هالعلاج من العطار لكن خايفه انه مايرضى يستخدمها ..ياارب يرضى

جزاك الله خير وبحاول اخليه يسمع اصدار الدكتور

لا محد يدري.. ومره قلت له ايش رايك نقول لامك.. لان امه ماشاءالله جدا ملتزمه وحافظه القران.. لكن مارضى قال ماحللك لو احد يدري ومره تضايق

ايه هو عنده وسواس مو طبيعي .. ولما اجي اذكره انه حرام بطريقه جدا هادئه يقول انا عااااارف خلاص اسكتي وغيري الموضوع.. مايحب اتكلم في الموضوع لاني قد تكلمت فيه..

اما اذا لجأت لاحد ثاني صعبه لانه مايبي احد يعرف

ايه والله انك صادقه انه صحيح لكن ايش اسوي .. كل ماحاولت اجرب معاه الطريقه ذي .. على طول يقول روحي ويقفل الباب مايبيني اشوفه وهو يتوضأ ويقفل الباب اذا جا يصلي

ايه مره ايده تقشرت ورجلينه كانها بالمقشره مسكين..

ماقصرتي اختي .. والله ودي اقله كل اللي قلتي عنه انتي واخواتي اللي ردوا

لكن ماادري شلون اخليه يسمعني .. يارب سهلها علي

جزاكم الله كلكم خير .. والله ماقصرتوا واحس خففتوا عن معاناتي .. انا بحاول اخليه يقرا ردودكم

لان من جد مو قادره اتكلم معاه ... يارب تشفيه ..

هو مره انسان كويس مدري شصار عليه ..

وراح اقلكم المسجدات اللي باذن الله تكون اخبار زينه عن قريب

اعرف شخص كان يعيد الوضوء والصلاة

لكن قمت انا يالاتصال على شيخ ووضعت السبيكر عشان يسمع كلام الشيخ ويقتنع

والحمدلله اقتنع وصار يصلي ويتوضأ مره وحده

مرحبا اختي..
اولا:الله يشفي زوجك ويذهب عنه هالوسوسه عاجلا غير اجل..
ثانيا:انا بقولك عن تجربه امي نفس زوجك مرة توسوس وكلمت مشايخ ونصحوها ومافاد معها والصلاة تعيدها كم مرة والوضوء كل شوي تعيدة واحيانا وهي في الركعه الثانيه تقطع الصلاة وتروح تتوضا نصف ساعه وترجع وبعدها راحت لعيادات "سليمان الصغير"<<ان شاءالله ان الاسم صح..طبعا العيادة في الرياض وقابلها الدكتور نفسه وعطاها علاج والحمدلله ربي يجزاة الف خير من بعدها وهي من حسن الى احسن..
مرة امي سوت نفس زوجك قطعت الحبوب من نفسها من دون استشارة الدكتور وزاد وضعها وصار اسوا من قبل وراحت للدكتور وعصب مرة قال هذا اكبر غلط يسوونه المرضى انا لما نعطيهم الدواء يقطعونه من نفسهم وهذا يضرهم وبعدها امي استمرت على العلاج والحمدلله فادها ولاادمنت عليه ولاشيء..

عقبال لزوجك ان شاءالله اقنعيييييييييه يرجع الحبوب..وان شاءالله يتحسن وضعه لانه هذي صلاة عمود الدين الله يهديه ويشفيه..

وحده من قريباتي تعرضت لنفس معاناة زوجك

وكان علاجها بالرقية الشرعية عند المشائخ +العلاج النفسي

حاولي ترقينه واصبري واحتسبي انتي مأجوره