|
صوت بكائه قطع قلبي
السلام عليكم يا اخوان
امس صار موقف مرعب ما قدرت انام منه اتصلت اخت وقالت انها تسمع في بيتها صوت بكاء طفل تقريبا عمره ثلاث اربع خمس سنوات تقول يبكي بكاء غير طبيعي ولما راحت ورى البيت سمعت الصوت واضح وكان البيت الي يجي منه الصوت مضلم مافي اي صوت غير صوت الطفل وكانت الساعه 3 الفجر وتقول من الساعه وحده وهي تسمع الصوت كلمت زوجها قال هذا شكله مريض من كم شهر وانا اسمعه قالت طيب خل نسوي شي قال ماعلي منه وش دخلني فيه اختي انقهرت واتصلت علي انا ضاق صدري لانه طفل رحت انا واخوي عمره 16 سنه رحنا لبيت اختي ولما رحنا ورى البيت سمعنا الصوت طلع اخوي على الجدار شاف البيت مافيه حياه ظلام وصوت الطفل بس قال بطب على البيت انا واختي خفنا عليه وقلنا مسؤليه انزل وهو مصر يبي ينقذ الولد قلنا تعال لاتصير لنا مصيبه يفكرونك حرامي ونروح فيها نزل اخوي بس صوت الطفل مازال يقطع القلب رحنا ندق الباب محد رد رنينا الجرس الجرس مكسور والبيت شكله مهجور رنينا البيت الي بجنيهم طلع رجال وسئلناه عن الصوت قال والله هذولي ابوهم متوفي السنه الي راحت وعندهم بنات مطلقات ودايم نسمع صوت الطفل هذا يمكن من ست شهور مدري وش فيه قلنا له مابلغت ماسويت شي قال وش علي منهم مدري هو طفل والا جني مانسمع صوته الا في الليل رجعنا للبيت وانا افكر في البيت واختي كل شوي تتصل تقول ماقدرت انا الطفل الى الان يبكي كلمنا الشرطه قالو مانقدر نسوي شي لازم امر عشان ندخل البيت رحنا اليوم العصر ودقيت على البيت ردت شغاله قلت افتحي رفضت وجو حرمتين قلت انا جارتكم افتحو رفضو قالو وش تبين مانفتح لاحد مانعرفه سئلتهم طيب انتو عندكم طفل على طول ردو لالالا ماعندنا اطفال ولا شي قلت احنا نسمع صوت طفل يبكي دايما وامس ماقدرنا ننام من صوته الى الساعه 7 الصباح وهو يبكي قالت وش هالكلام ماعندنا شي يتهيء لك قلت يعني متأكده قالت ايه قلت المهم ترا في ذمتكم وانا قلت لكم وتراني بلغت الشرطه عشان يخافون وشكلهم مرتبكين ومو طبيعيين الحين انا حزينه على الطفل ياترى ليه يبكي كل البكاء هذا وكل الناس يسمعونه ولا احد يقدر يسوي شي؟؟؟؟ السنه الي فاتت كلمت حقوق الانسان عن طفله امها تعذبها ولا تعاونو معي قالو لازم اثبات وحلفت لهم وعطيتهم اسمي بس عشان يساعدون البنت ولا سوو شي واليوم اسمع طفل يتعذب ويبكي ولا قدرت اسوي له شي طيب وين حقوق الانسان ليه احنا مجتمع مسلم وما نساعد بعض ما نساعد المعذبين والله لو في امريكا بلد الكفر على قوله البعض كان ماخلوه يوم واحد يتعذب ليه احنا لازم اثباتات ولازم شهود يعني مانقدر نساعد طفل من العذاب الا اذا اهله رضو واذا يعني اهله يعني مايعذبونه يعني مافي تعاون بعد المشاكل الي سمعناها عن تعذيب الاطفال من اهلهم والله حرام الي يصير حرااااااااااااااااااااااااام وش اسوي صوت الطفل ماغاب عني وين اروح ووش اسوي دلوني |
حبيبتي
والله سالفة هلطفل تقطع القلب وحسبي الله ونعم الوكيل طيب حقوق الانسان صدمت من قولها !!! لكن هلمره سجلي بلفديو صوت وبيت اللي فيه الطفل وسجليه بلساعات الى ان يسكت ولكن يكون تصوير واضح وقدميه ارجوك لحقوق الانسان وشوفي واتمنى احد يفيد صاحبة الموضوع بخصوص حقوق الانسان وكيف نثبت ذلك ؟ وعن سالفة الاماللي تعذب بنتها ماادري طفلها انتي وش دراك ووين ابوها ووش في امها مريضه اقسم بالله اول مره اسمع عن ام تعذب بنتها كنت اسمع عن اب يسجن بنته سنوات بغرفه ومن هلكلام لكن ام ...!!!! اعوذ بالله وماحاولتي تلقين دليل او حتى شهود .! |
قصه البنت انو امها كانت تبي تجيب ولد ولكن جابت بنات وكانت هذي الثالثه
ولانها تبي ولد كرهت البنت وصارت تحطها في غرفه وتقفل عليها وتخليها تبكي وياويل الي يروح لها والبنت الان عمرها سنتين ولو تشوفيها تقولي من المجاعه واهلها نصحوها بس شكل كل العائله قلوبهم قاسيه والام قويه محد قدر عليها والاب ما ادري ايش دوره لان مره جاه مسج واحد يهدده انتبه لبنتك ولا بلغت عليكم حقوق الانسان وعصب على زوجته وقال انتي تبين تفضحينا بس ما سوى شي البنت الى الان معذبه وانا لما كلمت حقوق الانسان قالو لي ترا اذا صرتي تكذبين لك عقاب شديد قلت انا واثقه وعطيتهم كل المعلومات عن البنت وعطيتهم اسمي وعنواني عشان يصدقون بس للاسف الى الان البنت معذبه والكلام هذا من سنه كل فتره اتصل عليهم ويقولو بنرسل لجنه بس ما ارسلو احد اخر مره كلمتهم وقلت انتهم تعرفون اسم البنت اذا بكره سمعتو انها ماتت بسبب التعذيب اعرفو انكم انتم السبب والبنت في ذمتكم كلامي ما اثر فيهم ولا صار اي شي والبنت محد فكر فيها |
لاحول ولاقوة الا بالله
ناس تتمنى الاطفال وناس تعذبهم :( مادري وش افيدك فيه ياختي بس اذا فيه امام مسجد الحاره يكلمهم او شيخ الله يصبر هالاطفال ع امهاتهم |
فعلا اكبر قهر انو تشوفي الظلم وماتقدري تسوي شي
بس غريبة موضوع حقوق الانسان والشرطة بصراحة فعلا سجلي فيديو وخليهم يشوفو |
الله يوفقك لما فيه الخير
مثل ماقالو اخواني الاعضاء صوري مقطع فيديو لصوت الطفل وارسليه لحقوق الانسان وارسلي نسخه للشرطه وكلمو امام الحي او العمده او امين المدينه اللي انتم فيها وخبروه واعطوه نسخه من الفيلم المسجل الله يجزاك بالخير ويعينك ويوفقك |
ياعروسه ارجوك جربي مابخسري
خذي لك كميرا كما قلت سابقا وصوري بيتهم ويكون الطفل يبكي وبالساعات اطلعي بلسطح حق بيت اختك وصوري منه ويكون التصوير مقرب ولا تصورين قرب البيت وحاولي محد يشوفكم واعطي حقوق الانسان الفديو مع التحفظ بااسمك لاجل المشاكل ومابتخسري .... سوال وش هي شروط الاثبات لدى حقوق الانسان ودي اعرف ؟! |
.. بعد ما قرأت موضوعك , لا أعرف ما ذا أقول !!
صعب أتكلم , في موضوع ينتهك فيه طفوله بريئة !! .. عذرا .. سيظل هذا الموضوع يشغل بالي كثيرا .. |
والله لو اصور ما راح يصدقون بيقولو اثبتي انو الصوت من البيت مو مركب
تعلموني في هالاشكال الي عندنا واخاف يحطون لي قضيه ثانيه اني تجسست على الجيران وينسون السالفه الاصليه افكر من جد اكلم شيخ او عمده الحاره يمكن هذا الحل الوحيد |
اقتباس:
الله يقويك ,, كم أسرة معنفة .. لم تجد من ينتصر لها .. كم من طفل تنتهك حقوقه ؟ والمحزن تخلي الجيران .. بارك الله فيك .. وكتب أجرك .. أجتهدي في الموضوع .. لعله نهاية المعاناة .. |
اقتباس:
ايه صادقه انتبهي اختي لا تدخلي في سالفه وقضيه ثانويه ويتركو القضيه الاساسيه الافضل كلمي شيخ الحاره او امام المسجد .. |
ياليت مثلا تحاولو تكلمو الناس اللي بالبيت يعني تتعرفوعليهم او جيرانهم يزورهم او تعزمهم اختك اللي اقصده يكون فيه تواصل
|
يالله حسبي الله ونعم الوكيل فيهم ... والله حرااااااااااااااااااااام الي يسونه .. وانتي يااختي مالازم تسكتين حااااولي .. ولازم تحاااولين لان انتي مادامك سمعت الطفل وهو يبكي صرتي مسؤله امام الله .. لازم تساعدينه ولكي الاجر .. بوركت اخيتي وجزاك الله الف خير
|
اليوم كلمت اختي الي هي جارتهم تقول من يوم ما دقيتو عليهم الباب وكلمتوهم ماعاد سمعت صوت الطفل
ياترى وش سوو فيه !!!!! اختي تقول يمكنه مريض ومايقدرو عليه بس انا حاسه ان فيه شي استغفر الله احيانا اقول يمكن لان فيه بنات مطلقات يمكن وحده جابته بغلطه مع احد وتورطت فيه وصارت تسكر عليه تبيه يموت حتى لو مات برضو بتتورط ومره اقول يمكن مريض ومخلينه لحاله ويبونه برضو يموت ويفتكون منه والله كل يوم افكر فيه المشكله اني قلت لاختي كلمي امام المسجد قالت انها ماعاد صارت تسمع صوته ياليتني ما رحت لهم البيت ولا كلمتهم عشان يكون في اثبات الحين مدري وش سوو في الطفل |
حسبي الله ونعم الوكيل
طيب أخوك يوم طب وش صار ماشاف شي .. ؟ |
خليها دائما تتحرى صوت الطفل واذا سمعتوه
جيبوا امام المسجد وكذا جار عشان يكون فيه شهود امره والله حزني |
اخوي ما طب خفنا عليه يمكن احد من اهل البيت يمسك وتصير مصيبه
بس هو طلع فوق جدار بيت اختي وكان بيطب بس خنا ورجعناه اما عن امام المسجد اختي لها كم يوم ماعاد تسمع الصوت من يوم ماطقينا الباب عليهم وكلمناهم الحين لو بنكلم احد بيقول مانسمع شي بس انا كلمت عيال اختي وقلت لهم يكلمون امام المسجد بس المسجد بعيد عن بيتهم شوي وهمم لسى صغار ويمكن محد يصدقهم انا بيتي بعيد بس في الويك اند بمر اختي وبمر المسجد ونكلم الشيخ |
شي مؤلم بجد وين الأحساس بالطفل وين الضمير الحي وين الرحمه ربي يحمي ذاك الطفل من كل شر
|
حبيبتي ربي يجزاك كل خير والله اني فكرت نفسك يمكن وحده غلطانه مع احد وتبي تفتك منه حاولوا تسألواعن عدد افراد العايله ممكن ترسلين عليهم احد يقولهم انا من التعداد السكاني ويسأل كم طفل عندهم وكم عمره هل هوسليم اومعوق
اذانفوا وجود اطفال الظاهر ظي وياك صحيح واذا اقروا يمكن مريض لكن الرجل اللي ترسلينه لازم يكون كبير مو مراهق عشان يصدقونه بس انتبهي تورطين نفسك باي شي ينقلب ضدك ويمكن مثل ماقال جارهم جن يعني بس يصيح بالليل والله حبيتك شكلك صاحبت فزعه طمنينا شيصر معاك |
جزاك الله خير يالعروس وأنا معك وأنت الصادقه عندنا في منطقة تبوك شهر12نفذوا حكم القصاص في واحد عذب بنته وقتلها عمرها خمس سنوات ضربها بسلك كهرب و أستخدم إيدينه ورجوله في ضربها وركلها حتى فارقت الحياة وبعد ماماتت شالتها أمها ودتها المستشفى وكشفو على جسم البنت حصلو أثار إ يدينه ورجلينه في ظهر البنت وبطنها وعلامات السلك الكهربائي في جسمها كامل وقبضوا عليه وأعترف وصدر عليه حكم القصاص وزوجي شافه بعيونه يوم قصوه في الساحه بيوم الجمعه صراحة بعض الأباء والأمهات حرام يكون لهم أبناء وتعاملهم كذا والطفل إللي قلتيه حتى لوكان مريض مايجيه المرض غير باليل وليش ينكرون إن ماعندهم طفل والجيران يسمعونه وجارهم إللي رحتوا له شكله عنده سالفتهم ويدري عنهم بس مايقدر يتكلم مسؤليه مثل ماقلتي اليوم الناس صارت أكثرها تخاف من المشاكل رغم إني أشوف في قول الحق ماله داعي الخوف أبد ما يموتك غير إللي خلقك ليه الواحد مايساعد بللي يقدر عليه وأنا فكرت قلت يمكن إنهم بنات ومالهم عائل ومستحين يطلبون مساعدة الناس لهم يمكنه مريض ويحتاج يروح مستشفى وعلشان إنهم بليا محرم ماقدروا يودونه مستشفى طيب لوكان ظروفهم الماديه شينه كان ماعندهم شغاله لأنهم مايقدروا يصرفوا لها راتب وطبعا راتب الشغاله هم أولى فيه بس عندهم شغاله يعني وضعهم طيب طيب شغالتهم ماتطلع ترمي الزباله برى وأنتم بكرامه خلي عيال أختك يسألوها عندكم طفل في البيت خلوه يجي يلعب معنا بس أول شئ يستدرجوها بالسوالف ويقولون لها حنا سمعنا عندكم صوت أطفال وينهم مانشوفهم يطلعوا يلعبوا معنا بالشارع بقول لك شئ بس ما أدري هو صح أو غلط أنتي وأختك متأكدين إنه مو صوت تلفزيون أو مسجل وعلشان إنهم حريم يخافون لحالهم وقت اليل يشغلوا هاذا الصوت بالمسجل علشان ما أحد يقرب يمهم أو حول بيتهم يخاف من الصوت ويحسب أهل البيت صاحين مو نايمين يمكن إنه سبق وحصل لهم موقف في بيتهم ودخل عليهم حرامي أو أي أحد فقاموا دبروا هاذي الخطه علشان ما أحد يجي صوبهم والله أعلم أنت خلي أختك تحاول تقرب يمهم تسوي حلى أو أكل وترسل لهم منه وتعزمهم عندها في البيت أو تاخذ وحده من جاراتها وترسل عليهم إنها بتسير عليهم هي وجارتها وأختك تاحذ عيالها معها إللي أعمارهم _عشر وثمان سنوات طبعا أنتي تعرفي حركات البزران لو سيروا على أحد ودخلو بيته يصيروا المحقق كونان أكيد بينكشفوا شئ ويقولون لأمهم
آخر حل عندي لك روحي المكتبه وأشتري لك دفتر كبير من هالمجلدات وشوفي لك أي بطاقه عمل مع أي وحده تعرفينها تكون إسم بدون صوره وغيروا سيارتكم وشوفي لك واحد أكبر شويه من إخوانك وحاولي تعرفي وظيفة أبوهم وإسمه إذاكان متقاعد كمان هاذي حلوه شيلي ملفك وروحي دقي بابهم وأنت ومحرمك إللي معك وقدامك حلين إذا عرفتي أسم أبوهم وإذا كان متقاعد أويستلم ضمان إجتماعي أنت ذقي الباب وقولي لهم السلام عليكم هاذا منزل فلان الفلاني بإسم أبوهم طبعا بيردون أيوه قولي معكم المندوبه من المؤسسه العامه للتقاعد وجيت أجدد بياناتكم وأبحث وضعكم الإجتماعي علشان ماينقطع راتب أبوكم عنكم طبعا بيدخلونك أنت وأخوك أنت سجلي أسمائهم وعددهم وأطلبي كرت العائله وجلسي عبي البيانات وأسئليهم ما أحد منكم تزوجت وبعدها قولي لهم من فضلكم ممكن ألقي نظره على البيت لو تحتاجوا شئ نصلحه لكم أو أي ترميم نسويه حنا في خدمتكم طبعا بدورك هاذا إدخلي البيت غرفه غرفه وشوفيها بعينك أما إذا كان أبوهم مسجل بالضمان قولي لهم أنا باحثه إجتماعيه من الضمان الإجتماعي جيت أبحث إحتياجاتكم وأشوف أوضاعكم وش ناقصكم وأشوف البيت ناقصه شئ من ترميم أوإصلاحات وخلافه طبعا بعدماتخلصي بحثك أعطيهم رقم الشوؤن الإجتماعيه وقولي لهم لوأحتجتوا شئ إتصلوا على هاذا الرقم وبنساعدكم إن شاءالله بس لاتنسين فتشي بيتهم بحجة عملك ياالله لو أنا معك والله حتى دواليب ملابسهم أفتشها بحجة تحتاج لها تصمير بمسامير أشوف داخلها ملابس أطفال وإلا لا وثلاجتهم أفتحها بحجة فحص برودتها يمكن ماتبرد نغيرها لهم ونسجل بالدفتر وغسالتهم أشبكها وأشوف تغسل وتنشف ولا أسجل ناقصهم كذا نغيرها حتى أطلع مصدر الصوت ولو لقيتي عندهم طفل إسأليه حبيبي وين ماما وإللي يطالع فيهامنهم إعتبريها أمه وإصحك يقولون لك هاذاولد جيرانا أمه خلته عندناوراحت السوق أنت بس تأكدي حتى لو بدون بطاقة تعريفيه تقدرين تسوينها وتبحثينهم بصفتك مندوبه أو باحثه إجتماعيه وياعمري هاذا إللي قدرت عليه وأنا صراحه أحي فيك شجاعتك وإقدامك على مساعدة الغيرجزاك الله خير الجزاء ولاتنسين وافينا بالنتيجه بس إنتبهي زين على نفسك ترى ماعندنا الإ عروووس وحده بالمنتدى الله يحفظها لنا ويعطيها الصحه وطولت العمر إن شاءالله . |
عورتيلي قلبي وشغلتي بالي الله يكون بعون الجميع |
الله يلطف به ويرحم حاله هو وحده القادر,بس صدقيني البيت كله مو طبيعي يعني عليه علاماات استفهام, بيت مهجور وفيه نااس طفل يبكي بوقت مو طبيعي ولفترةطويلة , وبشكل يومي , والأغرب منه رد البناات وحتى وجود الشغالة معهم احسه غريب , ورد الجار شكله عارف القصة تقريبا , يعني بالمختصر المفيد هنااك سر والله أعلم به .
بس نصيحة لاتورطون أنفسكم , ماتدرون وش وراهم ولاتدرون يمكن تدخلون في متاهه مالها نهااية ,الدنيا تخوف وماعااد فيها آماان وكل يوم نسمع قصص عجيبة وغريبة والي مايخاف الله ينخاف منه. أما حقوق الإنساان يعني يبون القصة تطلع في الجريدة عشان يتحركون؟ |
اختي فعلا شيئ محزن
بس انا اقول ممكن هذا مو طفل ممكن عندهم في البيت مريض او وحده من البنات مريضه عندها تخلف او تاخر الي خلاني اعتقد كذا حكاية انه الطفل يبكي كل يوم وبوقت متاخر ومن عدة شهور ماادري بس ممكن ولمااختفى الصوت الظاهر انهم صاروا بتبهوا لهاالموضوع يكرواالغرفة او شي الله اعلم البيوت اسرار وماحد يقدر يعرف الله يعينكم يارب ويجزاك الخير |
شي محزن ومخييف
لاتهملو الموضوع وبلغونا اش يصييير |
من جد في سر كبير وغاااااااااااااامض بالموضوع تحسين ان البيت كله جن وعفاريت طيب اسمعي ليش ماتركبون كاميرا على شباك اختك صغيرة ماتبان وتشوفونهم متى يفتحون بابهم مين يجيبلهم اكل مين يرمي زبالتهم يعني الباب حق بيتهم ينفتح او 24 ساعة مقفل اذا مقفل ومر اسبوع ماحد طلع ونزل من الباب يعني البيت مسكون يمكن اخر الليل في ناس تجي عندهم او يطلعون من البيت
|
يالله وربي بكيييييييييت
الله ينصرهم يارب بالله بلغينا عن اللي يصيرر الله يقويك |
لاحول ولا قوة إلا بالله
كلام يدمي القلب |
الله يرحم حالة ويفرج عليه لا حول ولا قوة إلا بالله وش هالقلوب يا ربي ؟؟
حسبي الله ونعم الوكيل على كل من يعذب طفل بريء لا حول له ولا قوة . |
ارجوك ثم ارجوك لاتسكتين عن موضوع الطفل
اعملي مثل ماقالوا الاخوات التصوير كلموا امام مسجد الحاره او شيخ يساعدهم لاتسكتون |
| الساعة الآن 02:28 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©