|
من ارضي ابي واخواني او زوجتي ؟؟
السلام عليكم
انا شاب عمري عمري 29 عندي ولدين ومتزوج لي 5 سنوات طاحت فوق راسي مصيبة ويجب على ان ارضى احد الطرفين من طرف ابي وعمي واخواني والطرف الثاني زوجتي وقد تصل للطلاق المشكله هي ان بنت عمي تطلقت من زوجها قبل عده اشهر بسبب ان ولد عمي طلقت زوجته اللي هي اخت زوج بنت عمي المهم الشغله كلها عناد في عناد والحين ولد عمي خاطب وبيتزوج في الصيفية وابوي وعماني يبغوني اتزوج بنت عمي معه وانا بكل صراحة يادوب اتحمل مصاريفي ومصاريف بيتي وغير كذا من الناحية النفسية انا اقدر الهدوء والسكينة ومااقوى على مشاكل الحريم والقيل والقال لانه كيد راح تصير مشاكل بين الزوجتين من جهة ثانية زوجتي سامعة كلام بس ماهي متأكدة وخلال هاليومين تلمح بالكلام انها راح تترك البيت وابوي واخواني يضغطون على وهم متكفلين بالعرس من اوله لاخره المهر والشبكة والقصر والشقة حتى عمي يقول بأشتري لك سيارة علشان تكونو معي بالصورة انا الحمد لله مرتاح مع زوجتي واولادي ومتفاهمين وبيننا حب من ايام الثانوية حيث انها من قريباتي ارجو من الاخصائيين بالمنتدى وكبار السن يعطوني الحلول كيف ارضى جميع الطرفين ولااخسر احد ؟ |
ايش معنى أنت اللي تتزوجها ليش مايتزوجها أحد من أخوانك ماسبق له الزواج ؟؟
|
قول لاهلك بكل بساطة .. لا أستطيع التعدد ..
و تكلف نفسك مالا تطيق .. الزواج حيــــــــــــــاة .. لا تخضع للظروف الوقتية ؛ |
اقتباس:
|
ارضاء جميع الاطراف من سابع المستحيلات
فكر في رضى ربك اذا بدك تعدد هذا حقك الشرعي ان وجدت في نفسك قدرة على العدل |
الزواج رضى وقناعة..مو بالغصب.. عمره ماكانت المسألة بالقوة..:29:
وبعدين شسالفة..وإذا كانت بنت عمك..لايكون كل ما تتطلق وحدة من العيلة يجبرونك تتزوجها عشان يكملون لك النصاب.. وبعد ما يخلص نصابك وتطلقت وحدة من عيلتكم يشوفون واحد ثاني يتزوج.. أو يمكن تكون وحدة من اللي عندك ماتت فيصير يجوز لك تتزوجها بعد :25:. يا أخي هذي حياتك انت مو حياة عمك واخوانك!!!! انت الرجال وانت اللي تقرر كانك تبيها أو لأ .. مو يجونك فرض غصباً عليك!!!!وانت مالك أي راي:23: |
ياسلام عشان عيال عمانك انخربت حياتهم بيخربون حياتك انت يعني اذا اخذت بنت عمك راح تنحل المشكلة وتنتهي ألابتكبر وبتكبر بعد بصرااحه مررره تنرفزت ماعليك منهم مادامك مرتاح مع زوجتك وعيالك ومبسوط اضرب كلامهم بالحيط ألا اذا انت تبي هذا شي ثاني ولاتنسى الشغلة كلها عناد ومكايد وش خرب البيوت غير العناد والكياد
|
اخي
انت قلت بلسانك وكتبت بيدك انك تحب زوجتك من ايام الثانوي ومرتاح بحياتك وماتقدر ع زوجتين!!! يعني تطلقت يحكمون عليك تتزوجها !!!لاجل تنقذها من كلالالالام الناس حرام عليهم هذولا بيهدمون بيتك بيدهم ماهمهم لاانت ولا زوجتك ومشاعرها همهم بنت عمك وكلمة مطلقه !!! ولا همهم زوجتك وردة فعلها وهم عارفين ردة فعلها عدم الرضا هذا الناس الاقرب هو الاولى !!! للاسف ! اخي لا والف لا انت لاتجبر نفسك وتهدم بيتك وانت مرتاح فيه وزوجتك مو مقصره وخل ابوك وعمك اللي هو ابوها واخواااااانك يزعلون هذه حياتك انت وانت قلتها لن تستطيع تجمع بين بيتين وزوجتك الله يطمن قلبها لو انا لكنت ليل نهار ابكي من القهر والخوف من تحططيم او صدمه بزواج زوجي !!من كثر التاثير حاسه ان زوجتك تعيش اياااااااام قلق وبكى والله يعينها مسكينه نصيحه دامك مرتاح لاتسمع لهم واجعل كلمتك واااضحه اني لن استطيع ان اتحمل زوجتين فقط والسلالالالالالام لاتقول زوجتي بتطلب الطلاق وبينهدم بيتي لن هالشيء مايهمهم بقدر مايهمهم بنتهم اللي منهم وفيهم . زعلهم بيستمر كم شهر وبيرضون من انفسهم ........ ولا تعتذر ولا شيء لانك لم تخطىء ...يدورون لها زوج غيرك قولها لهم بلصريححححححححححح . |
فرصه وجاتك من رب العالمين
ياخي لاتتردد مافي احلى من زوج الثنتين كل يوم مع وحده:o وكل وحده تدور رضاه وراحته :25: ويتضاربون عليه:17: ياليتني مكانه |
اقتباس:
بس الرجال مبسوط مع زوجته ومو قادر على فتح بيتين ظروفه ماتسمح ولا له رغبه وليش مو واحد من أخوانك الكبار أللي خايفين عليها ويدورون لها على عريس يتزوجها ولا فالحين يجبرونك أنت تتزوجها !! أنت رجال والمفروض ماأحد يفرض عليك شي مالك رغبه فيه !! |
باين عليك ودك بالعرس(لانه حرمه ببلاش)
بس خايف من زعل زوجتك وخايف من المصاريف بعد الزواج يعني منت رافض كليا لانك لورافض ماتسمح لهم يفتحون الموضوع اذا انت فعلا ماتبغاها قول بصراحه لاتظلمها معاك وبعدين تطلق البنت للمره الثانيه بسب العايله وتقدرون تدورن لها على شخص بالعايله يكون راغب بالزواج سواء معدد اواعزب واذا تبغاها هذا اهلك ماقصرو كل شي عليهم وبعد سياره بس خلهم يجهزون صقاعه لزوجتك ام عيالك لكن لوتزوجتها لازم تحط كل وحده ببيت عشان تريح بالك |
يا أخي هذي حياتك انت مو حياة عمك واخوانك!!!!
انت الرجال وانت اللي تقرر كانك تبيها أو لأ .. مو يجونك فرض غصباً عليك!!!!وانت مالك أي راي يعني ماقدروا على الأكبر منك جو عليك انت حقل التجارب والله من جد قهرررررررررررر لا تجيب لهم طاري مرتك عشان لايستفزونك بالكلام اللي ماتحبه اعتذر لهم وارمي الكورة في ملعب اخوك الكبير وانج بجلدك والله ماحد نافعك كلهم اليوم حولك وقصر وسيارة وبيت وبعدييييييين؟؟؟؟ بكرة لاقفلت بابك انت الوحيد الي ابتلشت بحياة متنيلة لا الاولى راضية ولا الثانية ولا اهل الثانية بيخلوك في حالك (طالما هم من البداية مشكلجية) انت شوف حساباتك وش مكسبك واش خسارتك على المدى الطويل والحقيقة اني اجدك مائلا وقريب الرضوخ وإلا ما كان اصلا خضعت للتفكير في هدم حياتك المستقرة الله يعيييييين زوجتك على هذه الأزمة وتثبت لها انك قد الهزات والأزمات مهما كان حجمها، وانك مهوب من أول اغراء تبيع استقراركم |
ماراح يدفع شي من جيبه ولا قرش في احد يرد الخير بصراحه الانسان يمل ويحب التغيير حرام يضيع فرصه ذهبيه زي كذا طيع شوري وانا اخوك ولا تقول لا |
يا أخي ليس مطلوباً منك أن ترضي جميع الأطراف .. وبغض النظر عن كونك متزوجاً وتحب زوجتك ولا ترغب في التعدد ففي كل الأحوال طاعتك لوالدك وإخوانك ليس محلها هنا .. ولا يحق لهم بأي حال من الأحوال أن يطلبوا منك الزواج ببنت عمك فكيف بالضغط عليك وإجبارك!
وكما قالت العزيزة أحب زوجي .. ما دام إخوانك يرون أن مصلحة ابنة عمهم في الزواج (سريعاً) فليتفضل أحدهم ويضحي هذه التضحية بدلاً من محاصرتك أنت وأنت غير راغب في الزواج أساساً. المسألة لا تحتاج لكثير كلام .. وما دمت ترفض الأمر فخذ قراراً حاسماً وأنهي الموضوع. |
اقتباس:
أتوقع انك مومتزوج وحسبالك الزواج لعبة ووناسة وبس.. مافيها اي مسؤلية.. |
أخوي الهارف.. راح اقلك شيء واحد..
اقناعة كنز لا يفنى.. والطمع فرق ماجمع .. لا تطمع.. واحمد ربك على النعمة الي انت فيها.. كلكم راعٍ وكلكم مسئول عن رعيته.. راعي الله في حبيبتك.. وفي أطفالك.. ركز على سعادتهم .. على طريقه في تربية أولادك تطلعهم حفظة كتاب الله .. وتخليهم مميزين في سلوكهم ودراستهم..ولا يغويك الشيطان وتخسر سعادتك.. تراك في نعمه مايعلمها غير ربك.. وخلي الحاسدين.. واصحاب العقول الصغيرة.. تبدو لي رجل راجح .. وما راح تضعف أمام الأغرائات.. |
اقتباس:
انا اداوم من الساعة 7.30 الى الساعة 4.30 هل تتوقع الوقت الباقي من اليوم يكفى لمتطلبات زوجتين وعيالهما ؟؟! ياخوان انا والله ماريد الزواج وبنفس الوقت مااستطيع ان اقول مابغا انا تزوج الثانية قدام والدي وعمي (( يمكن الشباب يفهمو وضعي اكثر من البنات )):d صدع راسي من كثر التفكير |
قرأت جميع ردودكم لكن لم اجد الحل المناسب للتعامل مع المشكلة
تحياتي |
اقتباس:
لإنك انت ابوها وسمها00 انت رجال00 ومالك نفسك00ليه تسمح لخلق الله يزوجونك او يطلقونك !!! والله عجب |
اخي الحل موجود بس يمكن ما جاز لك أو ماتفصل على مقاس رأيك
وردك على الطناز والعمان تقدر تجيب له ألف حل اذا انت فعلا قطعت برأيك انك "لا تريد" |
سهله قل لهم استخرت الله ومانيب مرتاح وبنت عمي مااطيقها ابد
مااحبها ولو تزوجتها يمكن اطلقها وتصير السالفه سالفتين نصيحه دور انت لها معرس مريش ومزيون احسن منك واقنعه يخطب بنت عمك الله يكبر حظها وييسر لها ولد الحلال الي ماا عنده مره |
صراحه شي يقهر
بس فرضا ماوافقت تتزوحها ايش ممكن يصير مثلا |
ليش عيب الرجال يرفض يتزوج مرة ثانية و إلا تقل هيبته امام هالطلب
او راح يقولون زوجته متحكمة فيه او سكانه زوجته هذا قصدك يعني! طيب اخوانك الأكبر منك ..كلهم متزوجين اربع و مافي مجال يعددون و إلا كيف! تحجج بسفرة عمل .. او قولهم ماقدر على حنة الحريم او اي شي ماراح يحملونك غصب للمأذون.. |
حاول تجيب لك نقل أو انتداب
وقل لأهلك أنا عندي نقل بالعمل أو بعثه حسب ظروفك وابغى بالي يكون رايق ما أقدر على نقل مع زوجتين |
يا حبيبي اذا ما لك نيه ولا تبي وجع راس ، قول لهم ما اقدر اتزوج واعدد لان رب العباد قال اذا ما تقدرون تعدلون لا تعددون ، وما عليك من أحد ، خلهم يزعلون كم يوم ويرضون ولا تجلس انت طوال حياتك متبهذل وحالتك حاله ، لانه لو اندمرتك حياتك والله العظيم ما احد منهم راح يوقف معك وكلهم راح يقولون لك انت رجال ودبر امور حياتك وحريمك ، لذلك اذا تسمع النصيحه لا تتزوج بدون رغبه منك ..
|
اتفق مع وحده من اخواتك تكتم السرررر تمااام
وقلها روحي للبنت وتقول لها انك ماتتبغى تتزوجها ولامفكر تعدد ابدااا لانك تحب زوجتك ولاتبغى تهدم بيتك .. وقولها ترفض الزواج هييه وتفكك من المشكله معررفش يمكن تزبط معااك |
هداك الله مافي حل ابد
غير تصارحهم وبس استخرت وما ارتحت مالي استطاعه ع زوجتين الله يرزقها بواحد غيري دوروا لها عريس غيري مافي حل غير الصراحه معهم يعني تكلمهم وتقول لهم اي عذر او انتداب كم شهر او تطنش ولا ترد لااتصلاتهم ولا شيء وابوك لاسئلك قول له غيره لاترد عليهم همش فيهم . |
الحل إنك تتزوجها ، و بتخسر استقرارك العائلي
و يمكن زوجتك اللي حبيتها و عشت معها سنوات ، تتركك و تترك الأطفال معاك و وقتها ، لا فلوس أبوك و لا عمك ، بيرجعوا حياتك مثل ما كانت و يمكن بنت عمك تكون مغصوبة عليك كمان |
يعني لاجل ماتقول لابوك وعمامك لا تخرب بيتك واستقرارك العائلي والله العالم كيف رح يكون التأثير عالأولاد؟؟
عشان تظهر قدامهم بصورة الفحل الذي يستطيع القيام بواجب 2 واكثر لو ارادوا تخسر بيتك؟؟ طيب بعد ان تثبت لهم ما تريد، من سيعيش معك؟؟ من سيعاني معاناتك ويتحمل مسؤولياتك عنك؟؟ من الذي ستنقلب حياته رأسا على عقب؟؟ هم رح يزوجوك ويتركوك مع كل المسؤوليات.. اخي الرجولة لاتحتاج لاثبات ممن يمتلكها.. فهي تصرفات ومواقف اكثر من كونها قدرة على الزواج.. |
والله مشكلة
لازم تتحمل زعلهم خصوصا وانت ما ودك بالتعدد زعلهم فترة ولا مشاكل وظلم وربما تتحمل اثم باقي عمرك لأن الزواج مو بس مهر وشكبة وغيره من اللي فازعين فيه الله يهديهم الجد يجي بعدين اللي يخاف من عدم قدرته على العدل يكتفي بوحده وربما هنا يصح قول درء المفاسد مقدم على جلب المصالح قولها وبكل صراحة إني ما أقدر على بيتين ولا ودي وبنت عمي على راسي وما ودي أظلمها وممكن لو تعرف أحد ولا شيء يجيب لها عريس ذو خلق يتقدم لها بس يبدو ان عندكم ما للبنت إلا ولد عمها الله يعينك ويكتب اللي فيه الخير |
يا اخي ما دامك مرتاح و راسك بارد لا تخربها على نفسك و تعكر صفوة حياتك
اهم شي راحة البال لا تورط نفسك لا تنسى ان زواجك مو بس يدمر زوجتك يدمر اطفالك كمان لا تحطم سعادتهم و سعادتك دامكم مرتاحين و مستانسين و عليك بلدعاء ادعي لبنت عمك الله يفرج همها و يبعدها عنك نفس الموقف حدث لزوجي و اجتمعوا اعمامه كلهم عشان يزوجوا من بنت عمه و هيه كان من صغرها مكتوبه باسم زوجي مع انها اكبر منه بس زوجي ما كان رايدها ابدا و هم كانو يضغطون عليه و قالوله نحن نتكفل بكل المصاريف و نخلي كل السالفه سر من دون ما خطيبتك تعرف و كنا مخطوبين في ذاك الزمان عاد زوجي حس نفسه متورط صلى و دعى من كل قلبه ان الله يخلصه من هلورطه و بلفعل بعد يومين قالوله ان واحد من اولاد عمها رايدها و راح يملكها و زوجي وقتها طار من الفرحة و ما قالي هسالفه الا بعد زواجنه و اني عصبت بشكل كبير مع ان السالفه كانت منتهيه المهم يا اخي انت رجال و تقدر تخلص نفسك باي طريقة و ابوك و اخوانك بيثقلوا معاك يومين و بعدين تردون حبايب لا تضيع سعادتك على حساب الاخرين اعطيك حل فتاك يخليهم يهربون بلا عودة قوللهم عندك مرض الايدز هههههههههه لا بس امزح يمكن هم ما امزح |
اخي لاتصير نظرتك قاصرة
بمعنى لاتفكر بس الحين خلي نظرتك اكبر واطول وابعد لو ارضيت ابوك وعمك وزوجتك زعلت وافرض زوجتك عاندت وتطلقت وهي عندها ولدين يعني هي الكسبانه وانت تحبها كذا بتخسر زوجتك اللي كنت تحبها و اولادك الثنين لانهم راح يكون لامهم بالراحه ويكرهونك وانت تبقى مع بنت عمك اللي ماتحمل لها اي مشاعر لا ومطلقه بعد وماراح تكون مرتاح بتضل تفكر بزوجتك ويمكن هي عشان تقهرك تتزوج واحد ثاني وتنبسط معه لانك انت اللي بعت وبكذا تكون هدمت بيتك بيدك وحطمت عيالك وبتعيش انت وعيالك وزوجتك بمتاه وعدم استقرار واللي استفادت بنت عمك اعرست وخلي عاد ابوك وعمك ينفعونك وقتها عجبي على امر شبابنا والله شي محزن اذا حياتكم غيركم هو اللي يحددها |
عيش حياتك مع زوجتك طالما أنت مقتنع بها وراضي ولا تخضع للقيل والقال وخلك رجال حدد مصير نفسك ولا تدع الآخرين يحددونه لك .. ولا تدع الشيطان يلعب برأسك
الله لا يرضى بالظلم فلا ترضاه لغيرك .. وكون دبلوماسي في رفض ما يطلبونه منك .. |
اقتباس:
أسمحلي أخوي أللي عنده ثقه بنفسه وبرجولته مابيخاف من كلام الناس مين ماكانوا خل ثقتك بنفسك كبيره وفكر لبعيد وأرفض حتى لو زعلوا فتره وبينسون ولا واحد من اخوانك يتزوجها ليييييييش أنت ؟!!! |
على رأي المثل...عش رجبا ترى عجبا...
إنت رجال ولك كلمتك مو طفل يجي والدك أو عمك ويقرروا عنك إنك تتزوج فلانة أو غيرها...بعدين وين رأي البنت من الموضوع يمكن هي كمان نفس شعورك وماودها تتزوجك.. نصيحتي..خبر أهلك إن إذا إنت عزيز عندهم (مثل بنت عمك) يتركونك بحالك ولا يغصبوك على زواج ما تبيه...وياريت تخبر زوجتك بالموضوع كامل (إذا كانت من النوع العاقل) لأن مافي داعي تتلف أعصابها من القيل والقال..وكمان يمكن تقدر تساعدك وتتخلصوا إنتوا الإثنين من الموضوع... ومثل ماقالوا الأعضاء...زعل يومين ولا زعل العمر كله....زعل أهلك مدة بسيطة لأجل راحتك في حياة مديدة إن شاء الله |
اعلن لهم انك لاتستطيع التعدد والعدل وانك خائف من الله بسبب عدم العدل والزواج من اثنتين يحتاج الى العدل
حافظ على بيتك وابناءك |
رجال طول وعرض ،، مو قادر تقول ما أبي أتزوج !! لو أنا مكان زوجتك الأولى ما قعدت دقيقة عندك !! اللي يمشونه أبوه واخوانه ماله مكان بقلبي ولا لي مكان ببيته !! والسموحة !! |
اسمح لي بكلمات.. 1- يظهر في خطاب وقراءة موضوعك وردودك رضوخ مسبق ولين تام تطرح الموضوع ببرود وكأنك تنتظر من الأعضاء اجابه واحدة ( تزوج بنت عمك الله يبارك لك). 2- أنت رجل بالغ ويبدو لي عاقل، وصلت إلى مرحلة تستطيع فيها اتخاذ القرار دون الرجوع إلى مركزية معينة تنتظر منها التوقيع والموافقة. 3- تخيل الآن انك أقدمت على هذا المشروع تخيل نفسك بعد خمس سنوات مثلاً وابني خيالين أحدهما ايجابي والآخر سلبي لتكن منصف، واسأل نفسك هل يستحق مني الجميع هذه التضحية والمبادرة ومن الخسران في كل الأحوال؟؟؟ 4- ماذنب كلتا المرأتين؟؟ لو تقررت لديك نية الزواج مسبقا فلا بأس ولكن حين تكون لتلبية رغبة وإغاظة أشخاص على حساب آخرين فهنا المأساة بحق..ما ذنب زوجتك لتعيش معاناة وقلق فقط (لتحقيق هياط الشيبان)و ما ذنب ابنة عمك أن تزج بزيجة اخرى وهي لتو قد خرجت من تجربة فاشلة قد تحتاج إلى أشهر وربما سنوات لتتلافى أخطاؤها وتضمد جراحها، والمصيبة لو كان ذلك كله دون رضا منها؟؟ 5- ظهر لي فيما يبدو أن العائلة الكريمة إنما وجهت لك التبرع بالقيام بهذه المهمة لاحساسها بأنك -واسمح لي في ذلك- لارأي لك. أسأ الله أن يبصرك بالحق ويهديك سواء السبيل.. |
بكل بساطه ارررفض عصفور بيدك ولاعشره ع الشجره اخاف تخسر كل شئ ...
بالتوفيق كن واثقا قويا صارما في قراراتك |
| الساعة الآن 11:54 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©