كرهته وقررت اتطلق لكن ماذا اقول لأهلي
 

السلام
زوجي لا يصلي ولاحظت هالشي من شهر العسل لاننا كنا نطلع من الظهر او العشا وما يقول يالله نصلي او شي انا اللي كنت اقوله وفي شهر العسل جتني الدورة من ثاني اسبوع وكنا نطلع ونسهر وناسي شي اسمه صلاة (يمكن فيه الدورة هو بعد),,واحنا بحكم اننا مسافرين كنا نجمع ونقصر ,,اذا رجعنا الفندق ما اشوفه يصلي ,,واذا قلت له صليت يقول ايه نزلت صليت بالمسجد,,وما حبيت اضغط عليه من اول زواجنا وخصوصا اني كنت مو متجرأة عليه توي عروس,,وما عرفت انه يكذب بالصلاة الا يوم عاشرته 3 سنوات,,وموضوع الصلاة قاهرني كثير لان اهم شي الصلاة وهي اللي بيننا وبين الكفار,,
المهم اول زواجنا كنت ادرس عند اهلي لانهم بمدينة وزوجي بمدينة ثانية ولمدة سنه ما اشوفه الا وقت الاعياد واحيانا نهاية الاسبوع,,كانت حياتنا حلوة واحنا بعيدين عن بعض نحس اننا تونا عرسان ونتشوف لبعض كثير,, بس اول اجازة صيفية قعدنا فيها مع بعض 3 شهور متواصلة بدأت المشاكل,,
لاحظت انه يحب يخلي نفسه فاهم بكل شي حتى بالامور الي تخص النساء يعني شغل البيت والطبخ واحس هذا عيب على الرجل انه يدخل نفسه في زوجته وشغلها,,ايام نهاية الاسبوع كنت اجي من السفر لبيته الاربعاء المساء ,والخميس طول اليوم عند اهله ,والجمعة ارجع اسافر لبيت اهلي,,وفوق هذا كله يعلق ويهاوش انتي مقصرة بالبيت وانتي ما تسوين حلا(الحلا هذا قصته قصة الى الان نتهاوش عليه لازم كل يوم حلا قهوة) اقوله ما يمديني الاربعاء اوصل تعبانه من السفر والخميس عند اهلك من الظهر والجمعة ماشيه يا دوب الحق اغسل ملابسه وامسح الارضيات والحمامات وانتم بكرامة وفوق هذا تتذمر بعد..واخوي يا عمري هو اللي يوديني ويجيبني ولا يشكر له فضل ولا شي ,,اذا مر اسبوع وماجيت قال خلي اخوك يجيبك (يا سلام اخوي مكفول فيني ليش ما تجي انت ولا تعودت على الراحه خلاص)
مشاكلنا بعد ما استقريت عنده وخلصت دراسه مستمرة على شغل البيت لانه عرف ان هذا الموضوع يضايقني رغم اني ما اقصر في بيتي الحمدلله ,,يمكن مثل ماقلت اول الزواج عشان موضوع السفر بس هو مسكها علي خلاص لنا 3سنوات على هالموضوع ,,ووووععع
صار الحين يسب بأهلي ويسب ابوي رغم ان ابوي الكل يحترمه وما قد اذى احد الحمدلله بس اذا تهاوشنا يحب ينرفزني بأي شي ويدري اني ما ارضى على اهلي,,بس مو من حقه يسبهم ,,وش يبي فيهم اساسا
,,اهله هو زي العسل مدري وشلون طلع هو منهم,,يحب يتفلسف كثير المشكلة اني ما عرفته قبل الزواج ولا عرفت اهله ,,بس نعرف اهل عمه وبنت عمه امون عليها ,,وقالتي لي ما توقعتك توافقين عليه,,انا انصدمت قلت ليش قامت تبتسم (توهقت) وقالت لا بس يتفلسف كثير,,قلت امانه عليك فيه شي قالت ما ادري عنه ,,وبقولكم بصراحة انا يوم شفت صورته قعدت ابكي مو اعتراض لخلقه ربي ,,لا هو ماله دخل فيها ,,بس ماتوقعت اتزوج واحد كذا والي صدمني بنت خالتي يوم شافته قالتلي يوووووه زوجك صراحه ؟؟؟ ما توقعتك تاخين واحد كذا(انا بصراحة انقهرت وشوي اصيح ),,بس يوم تزوجته وشفته صار مقبول عندي وحبيته بدايه الزواج,,
والمشكلة الادهى والامر الحين انه اناني يعني طول اليوم بالشغل لين الساعة 4 العصر واذا جاء احيانا ينام لين الصباح ,,والصلاة مافي صلاة مثل ما قلت,, واحيانا يطلع يسهر,,الحين انا قاعدة منطقة بالبيت طول اليوم واذا قمت رحت تسهر وتخليني بلحالي بعد ,,يوم يومين ما عليش بس كل يوم تسهر او نايم ,,الحين صار ما يفرق معي اصلا ابيه يبعد بأي طريقة واذا نام كنت اقومه من النوم الحين ما ابيه يقوم ابدا..
فيه مشكلة ثانية اذا جاء يزورنا احد من أهله يقوم الدنيا وما يقعدها كأن بيته مزبلة قدامه,,سوي هذا حطي هذا غسلي هذا ,,كنسي هذا,, هنا انا اعصب وتصير بيننا مشادة وشوي نطق بعض ,,اقوله ليش وش شايف البيت وصخ ,,يقولي والله ما اشوفك تنظفين,,ياسلام يعني لازم تشوف ,,انت شوف البيت وشوف لبسك اكلك مو تشوفني انا وقت التنظيف,,اصلا انت يا نايم يا طالع واذا جيت قعدت عندك ,,مرة قهرني قام من النوم وشافني امسح دواليب المطبخ قال يا سلام يوم النظافة العالمي!!قلت مو اول مرة امسح بس اول مرة انت تشوفني,,,
صار يعرف ان موضوع النظافة ينرفزني فعند كل هوشه يذكر هالشي حتى لو ماله علاقة ,,قبل اتنرفز الحين اقهرة وما اهتم ,,صار ينقهر مني ومن برودي بهالموضوع,,يقول اشياء والله تقطع القلب اقول شلون يقولها اقعد ابكي منه واحسه يفرح اذا بكاني كأنه انتصر,,وصرت ابكي من وراه وقدامه اصير قويه ما علي منه,,

معليش طولت عليكم ,,بس اول مرة اكتب مشكلة في منتدى وشكلي بحذفه بعد بس شسوي تهاوشت معه والحين متزاعلين بسبه ان اخوة بيجينا زيارة وقوم لدنيا وقعدها عشان البيت مثل ماقلت والمشكلة اني مجهزة كل شي لاخوه بس الجحود من صفاته وش اسوي ,,, كرهته مو بس باللي ذكرت بأشياء واجد ,,وكرهت اطل بوجهه,,احس حظي مو حلو بالزواج واقول ياليتني ما وافقت عليه ياليت تزوجت غيره
افكر اتطلق بس بيننا ولد عمره سنه ,,تكفون شوروا علي لا تقولون حوار مافيه فايدة شايف نفسه ويتفلسف علي وبالاخير ما نطلع بنتيجة الا بالعكس كل واحد شايل بنفسه على الثاني,, اتفقنا من قبل على الطلاق وقالي انه بيأخذ ولدي منه ما اهتميت قلت له اخذه عادي لانه نااوي يكسر ظهري بولدي بس انا ادري ان ما عنده الا الحكي بس وصممت على الطلاق وقعدت ببيت اهلي اسبوع بدون ما اهلي يدرون وش السالفة بعذر ان راعي البيت يصلح بيته (احنا مستأجرين),,بعدين هون وخاف ورجعني .,,عشان اهله يحبوني وانا احبهم وعرف ان محد راح يوقف بصفه(والحمدلله ان اهله يعرفون تصرفاته),,
يوه طولت سوري ,,ارآآآئكم بلييز,,

أختي

الصلاة في كفة ، و عيوبه كلها في كفة لوحدها

انفصالك عنه ، لو كان بسبب تركه للصلاة ، كنت تصرفتي من البداية

عالعموم ، ما أعرف إيش حكم الزواج و الإستمرار مع زوج لا يصلي ؟

جزيتم خيرا اخواتي على الرد,,
ويا اختي روح الطير ,,وماريا,, والله ان موضوع الصلاة مؤرقني ونصحته كثير ودعيت له كثير بس بدون فايدة لدرجه اني سألت شيخ وقالي للاسف مايجوز انك تقعدين معه,,ولازم تقولي لاهلك واهله,,واخبرت ابي بالموضوع وتفاجأ جدا,,وقالي انتظري وادعي ربك ,,قلت له يا أبي حتى الجمعه مايصليها اقومه من النوم وما يقوم ,,واذا قام قال راحت علي نومه,,وانا ادري انه مايبي يصلي,,قالي ابوي خلاص اذا جاء الجمعه دقي على امر عليكم واروح الصلاة معه اكيد بيروح وينحرج مني,,بس للاسف ابوي حاليا مسافر للشغل واحسه نسى موضوعي ,,واذا على اهله كلهم من صغيرهم لكبيرهم يدرون انه ما يصلي,,بس شيسوون,
وانا اقوله الصلاة هي اللي بيننا وبين الكفار يقولي احسن قولي اني كافر,,قلت والله ما ادري الله اعلم بحالك,,
ومرة من المرات بكيت منها كثير وهي اني قعدت اراقبة هو صلى الفجر ولا لا,,وما صلى وكنت متأكدة وقعدت وواجهته وقالي والله اني صليت قلت وين قال بالغرفة قلت انا من اليوم مراقبتك وماصليت ,,عندها انحرج وحاول يغطي على فعلته وقام يهاوشني ,,ويقولي مالك حق تراقبيني و من هالكلام,,وبعدين قالي عطيني سجادة بيصلي يسكتني بس,,هنا بكيت قلت يعني كم مرة كذب وصدق طلع ما يصلي ,,شلون قلبه يطاوعه ,,وشلون ما يخاف من الموت,,لاحول ولا قوة الا بالله,,
اذا على الطلاق احس صار مو فارقه معي ,,لاني متأكدة انه ماراح يصلي لانه بالثلاثين ولا الحين ما عقل,,وتصرفاته تصرفات واحد مريض,,ما انكر انه فيه صفات حلوة بس بنفس الوقت فيه صفات شينة,,

حاولي معاه بكل الطرق ان شاء الله ربي يهديه
ربي يفرج همك

اختي جوري حبيبتي مثل ما ذكرت انا مااقدر اسرد مشكلتي اللي من 3 سنوات في خلال دقائق فقط,,
وبعدين انا قلت في ردي الثاني انه فيه صفات حلوة مثل حبه لاهله,,حبه لطفله,,يراعي الجيران,,بس للاسف يحتقر العمال,,
يطلعنا نتمشى الخميس الحمدلله هاذي صفة حلوة منه بعد تطنيشنا اسبوع ,,بس مو كل خميس على حسب يعني,,انا والله ما ودي بالطلاق ودي بحلول ثانية ,,دعيت له وعاملته بالحسناء واحيانا اقسى عليه من قهري منه,,بس ماادري وش اسوي وقفت بطريق مسدود ,,تخيلي اليوم اختي ارسلت لي رسالة كول مي(كلمني)لان ما معها رصيد ودقيت عليها قام يهاوشني وانا اكلمها وقالي سكريه مو اقعد ادفع عنهم انا,,وقلت لها اسفه مالك حق تقولي سكري ,, صرخ علي وقالي بربيك من جديد,,تخيلي ,,رديت عليه بأني متربية والحمدلله وتركته ورحت,,

وعليكم السلام ورحمة الله وبركااته

إذا كان مايصلي فهو كاافر وأنت مسلمة والمسلمة لاينكحها كاافر , ولايتم بينهم طلاق بل يكون تفريق .
اي مشكلة بينكم ممكن تنحل وممكن تأقلمي نفسك على طباع زوجك , وتقللين من المشادات الكلامية معه.

طيب شوفي أنا عندي لك أقتراح أنت أعطيه مهلة شهر , ووخليك بين النصيحة والتهديد بالترك , وفي هذه الفترة أكثري من قيام الليل والدعاء بالثلث الأخير له بالهداية, واكثري من الأستغفار وحسني علاقتك معه.

وإذا ماصلح حاله أستخيري الله وقدمي محبة الله على محبة غيره .وبما أن أهله يحبونك أخبريهم بالحقيقة قولي ولدكم مايصلي , وأنا شرعا لايجوز الجلوس معه .

الله يكتب لك الصالح ويفرج همك.

اخي او اختي\في رجاء الله,,
زوجي مكابر لما كنت اقوله قولي اذا ما تصلي خلني احسم امري ,, قالي ليش وش بتسوين يعني,,قلت ما يجوز اقعد معك لين تصلي,,قالي ضفي عفشك وانقلعي,, تخيلي ,,قلت له هذا مو حل ,,اهلي والحمدلله عندي واقدر اروح بأي وقت بس انا ابي حل,,,عصب وطلع ,,يعني لو اهدده بالترك ماراح ينفع ولا راح يعتذر لانه مكابر مرة مرة مرة,,

والى الان كل واحد ما يكلم الثاني اجيب القهوة والشاي اول ما يجي من الدوام ونقعد بدون كلام ,,ويروح ويخليني لنا 3 ايام على هالحالة وبشوف وش ربي يكتب,,,

....

أختي الكريمة:
كان الله في عونك. من وجهة نظري الخاصة أرى عمل مايلي:
1) إن كنت تعرفين بريده الالكتروني أرسلي له مقالات عن الصلاة وأهميتها وحكم تاركها.
2) أجلبي لبيتك أشرطة عن الصلاة وضعيها بالمسجل، وارفعي الصوت قليلاً من منطلق إياك أعني واسمعي ياجارة.
3) عندما يؤذن للصلاة قومي توضأئي أمامه وصلي أمامه إن أمكن.
4) في حالة تطاوله على والديك، قولي له: اتق الله يارجل، هل أنا شتمت أهلك؟ ثم أوضحي له أنك لاتقبلي أي كلمة سوء على والدك أو بقية أهلك.
5) أدي كل واجباته وما يطلبه منك كي لا يجد عليك مدخلاً وحجة للإساءة لك.
6) حاوريه بهدوء ولطف وذكريه بالآخرة.
7) قولي له: هل تتمنى أن يخرج ولدك مصلياً أم هاجراً للمساجد؟


آمل فعل ذلك بحسن نية وصبر، واستفرغي معه جميع الحلول مع التنبه لعدم الحمل، وأعطيه فرصة وأخرى، ثم أخبرينا ماذا حصل.

السلام عليكم ورحمة الله وبركاته

أختي حبيت أنبه لا يجوز الحلف كقول " أمانة عليك "

وهذه فتوى
ما حكم الحلف بالأمانة والذِمّة كقول الناس: أمانة عليك أخبرني بهذا الشيء، أو في ذمتك؟


بارك الله فيكِ

شكرا شكرا لكم اخواني واخواتي على ردودكم ,,

واحب ارد عليكم بأختصار,,اختي ملامح وله ,, يا حليلك ويا حليل سوالفك كلام بهدوء وحفلة كنت اسويله ,,واسولف له ,,بس اذا جيت اشكي له يقول لا تخربين الجو علينا ,,لاني مثل ما قلت ماقد طلعنا بنتيجة من نقاشنا لانه مكابر مرة ومايعترف بالخطا,واشرطة مستحيل يسمعها اصلا هو مو حق هالاشياء الحين اذا حطيت في السفر اناشيد دينية يقول فكينا من المطاوعة!!!الله يهديه يكره المطاوعة كره حتى مرة شفنا ولد صغير طالع من المسجد ماشاء الله عليه ,,قام ضحك وقال شوفي الارهابي الصغير بكره نشوفه بالاخبار!!تهاوشت معه على ذي السالفة لانه حرام سب اهل الدين ,,الله يهديه..

اخوي البليغ ,,اعرف بريدة الالكتروني واعرف الباسوورد بعد,,ارسله نصايح انا واخته الصغيرة(ملتزمة) تخيل ما يفتحها ابد ,,اللي لها 6,7 شهور يمكن سنه ما فتحها لانه يدري احنا وش نرسل له,, ومن ناحية الصلاة امامه اصلا حاطه سجادتي في غرفة جلوسنا عشان يشوفني ,,واقوله يقصر على التلفزيون عشان ينتبه اني اصلي وان هذا وقت صلاة يعني يالله صل ,,بس للاسف ,,يقول طيب طيب لين يروح وقت الصلاة,,

اختي مبادئ ,, انا مثلك احس ما راح اقدر اطول معاه ,, وامس ناقشت اختي الكبيرة بالموضوع قالت لي لاتستعجلين بس لاتحملين هالفتره ابد,, ونشوف وش ربي يكتب,,
شيخة البنات,, موضوع الصلاة صار يسبب لنا مشاكل ,, ما يرضى نتكلم فيه ابد ما يعطيني فرصة ,صرت اتكلم غصب عنه عشان يسمعني ,,حتى قلت خلاص ماعلي منه يتعذب ولا ما يتعذب طفشني,,بس المشكلة ما اصمل على رايي واذا اذن بدأت المشاكل روح صلي ,,يقول طيب طيب ,,وما عليك مني ,,بصلي برا,, والمسجد الله يخلف ما يدله,,

والله زوجك يحب النقد كثير
ويبيلك وقت تعدلينه بس ماتوصل للطلاق ابد
حاولي تزعلين لاتكلمينه فتره
بيني اعتراضك على النقد لا تطنشين اي شي فيه نقد بس لتاطولين لسانك

صح كلامك,, كأنك حاسه يا سنا,,,,

السلام عليكم ,,
ابشركم تراضينا,, بس بعد نقاش طوووووويل يمكن استمر ساعتين يتخللها لحظات صمت اذا حسينا الوضع بينفجر,,ثم نرجع نناقش,,
ناقشته بأسلوبه ,,بأخطائه وكل شي,, فهمته ليش انا زعلانه عليه ومو طايقته ,, وحسيته حس شوي,,وكان باين على وجهه ,,وبين لي انه ما يبي الطلاق ابد,,وحتى ناوي يأخذ اجازة نغير جو,,
بس المشكلة الكبرى ماقدرت اناقشه بأهم موضوع الصلاة ,,خفت يخرب علينا النقاش ويزعل مثل كل يوم,,فحبيت أأجلها وقت ثاني,,
ادعو لي,,

تسلمين يا ملامج وله,, شكلك مرة طيوبة ,,
الله يرزقك على قد نياتك يارب,,
معليش تأخرت بالرد,,بس كنت مشغولة شوي,,

الله يعينك ويصبرك علية يا اختي
بالنسبة لموضوع الصلاة لا تسكتي عنة
ضلك لزي علية حتي لو شتمك او ضربك اتحملي
لان ثوابك عند الله عظيم
تقبلي مروري