|
امـي زعلآنه مني ! :(
السلآم عليكم ورحمه الله وبركآته .. اتمنى تكونون بصحه وعافيه جميعاً , مآلي بالمقدمات بدخل بالموضوع .. اول شي انا عمري 15 سنه .. ومو متفاهمه مع امي ابدااا .. دايما هواش وصراخ لدرجه صرت اتمنى الموت استغفر الله من كثر ما تهاوش وتصرخ فيني وانا حساسه جداً ماتحمل احد يصرخ علي على طول دموعي تنزل :( .. امس اخوي الصغير رمى ورقه على الارض بالشارع وقلت له ياخذها ويحطها بالزبآله (تكرمون) ومارضى وراح دخل السياره واحتمى بامي وامي قالت خليه مراح يعيدها انا تنرفزت لان سبق وهاوشته امي والحين صار عادي ! وتناقرنا اانا و امي اقولها مو عادي اللي سواه وين عايشين تقول انا اربيه مو انتي شوفو انا اقولكم اسلوبي كان جداً بشع واهي كانت تصرخ حيل < وهالكلام كله بالسياره ماغير اختي تسكت فيني .. طبعاً هالكلام امس ويوم نزلنا قلت لها ما كان قصدي اللي قلت بس مايصير اللي يسويه قالت مابي اسمع صوتج !!! وللحين ماتكلمني .. ماني قادره اتحمل وهذي مو اول مره امي تزعل مني ! دايما تقولي انتي قليله ادب !! مادري امي مو فاهمتني ولا شي طبيعي ما نتفاهم ولا شنو بالضبط !! صرت افكر باشياء بعيده افكر اهرب من البيت افكر انتحر يمكن تشوفون موضوعي بسيط بس حيييييل كبير .. نتائج الامتحانات قربت تطلع وامي ماهي راضيه علي ! سآعدوني الله يفرج عنكم |
حبيبتي انت و عليكم السلام و رحمه ا لله و بركاته
ذكرتيني ببنتي تنسى نفسها كثير و تفكر نفسها انها ام اخوانها هذا الشي احبه فيها بس مرات تعصب عليهم و تدفعهم و تضربهم كمان و انا اشوف هلمنظر اعصب عليها اقول لها دايما ما في احد بهلدنيا يصرخ على اولادي ويعاقبهم غيري انت اختهم و توجهيهم بس بحدود اسالها انا اضربك تقول لا اصرخ عليكي تقول لا طب ليش انت تضربيهم و تصرخين عليهم و كمان نقطه ثانيه اركز فيها معها اذا صرختي عليهم و قلتي لهمshut up همه حيقولولك هلكلام ويحرجوكي قدام صاحباتك و اصحابهم تحبي تكوني بهلموقف انت اذا احترمتيهم تحترمي نفسك امك ما تزعل منك ولا تغضب عليكي بس هي تزعل انك تشوفك قاسيه على اخوانك تحب تشوفك انت الحنونه الطيبه عليهم ويحبوكي ويحترموكي صعب الان تشوف اولادها ما متفقين و كمان صعب عليها تشوف بنتها كبرت و ترد عليها الكلمه بعشره اذا عندك اعتراض بس تهداوا انتو الاثنين اتناقشي معها و قوليلها ايش الي تحبيه و انا اعمله و ما همني غير رضاكي اذا عندك ا خت اكبر او اصغر او خاله كلميها وسطيها بينك و بين ماما و تقول لها انك بتتعبي من زعلها و من كلامها ما تقولي ابدا انك تهربي و تتنتحري ازعل انا منك،،، امك لو تسمع هلكلام تنجلط في اسئله كيف صلاتك و عباداتك انت كيف دراستك و مستواكي منظمه وقتك بين دراسه وقراءه ولعب تقعدي علكومبيوتر كم ساعه بليوم توقفي قدام المرايه و تلبسي وتتمكيجي عندك موبايل وكيف استعمالك للموبايل |
أمك ثم أمك ثم أمك
خليكي قريبه من أمك وصادقيها وابحثي عن رضاها بكرا تتزوجي وتبعدي عن أمك وتقولي ياليت سويت وما سويت ... ويجيك أولاد وتشوفي إذا أحد رد عليك والحرقه اللي فيك من ابنك ليش يرد ويطولها معاك ... بتقولي هذا أنا سويته مع أمي والحين ابني سواها فيني ... وقبل ذلك ابتغي الأجر من الله |
الغربه مره :
كلامج ريحني شوي .. بس انا حاولت اكلمها واعتذر اهي مو راضيه تسمعني ومثل ما قلت مو اول مره تزعل علي .. وانا احس اني مصختها دايما اعتذر وارجع ازعلها وبالنسبه لـ اسئلتج كيف صلاتك و عباداتك : الحمدلله قريبه من ربي وصلاتي بوقتها واذكار الصباح والمساء ما اخليهم انت كيف دراستك و مستواكي : مستوآي عالي ولله الحمد منظمه وقتك بين دراسه وقراءه ولعب : الحين انا عطلت وماعندي شي غير النت والطلعآت هههه تقعدي علكومبيوتر كم ساعه بليوم : ماحسب والله لاني اقعد واذا مليت قمت توقفي قدام المرايه و تلبسي وتتمكيجي : لا مو وايد مهتمه بهالامور غير في المناسبات عندك موبايل وكيف استعمالك للموبايل : اي عندي استعمالي عادي واحيانا يكون دايما وعلى طول لان عندي " بلاك بيري " شكراً مره ثانيه ..... قلب صآفي : شكرا حبيبتي على النصيحه :) |
هلا عيوني باكتب كم كلمة لاني مستعجلة وان شا ءالله لي رجعه
والله بكره لما تتزوجي حتقولي آآآه على الايام الي ضيعتها وزعلت فيها امي وربي حتلاقي نفسك زعلتيها على اشياء ما تستاهل معليه هيه امك ولو عصبت عليكي ولو هاوشتك ولو سوت فيكي ايش ما سوت تبقى امك ومافي اي مبرر ترفعي صوتك عليها الآن انتي عندك اجازة استغليها وتقربي فيها لامك قومي الصباح سويلها فنجان قهوة وبوسي يديها ورجولها حتى لو ما سامحتك قوليلها انا ماني قادة انام وانتي زعلانه مني قوليلها انا بنتك واسفة غلطت عليكي والام ما تقسى على بنتها اعتذريلها وبينيلها انك ندمانه وانك غلطتي وانك تحبي اخوانك وانك لولا تبغي مصلحتهم ماسويتي هالشي ربي يهديكي ويسر قلبك ويقربك من امك اكثر واكثر تراها جنتك ونارك لا تزعليها والله رضى الوالدين تلاقيه نتائجه بالدنيا قبل الآخرة موفقة عزيزتي وابغى االرد الجاي منك يكون انك تسامحتي مع امك سلامي للوالده |
اقتباس:
ان شاء الله خير .... انت ما دام بتدوري حل ان شاء الله بنوصل لحل لاختلاف وجهات النظر بينكم |
بنبونته :
ادري اني بتحسف بعدين بس انا الحين غلطت وابي اصلح غلطي ومراح ارجع له ثانيه .. الغربه مره : تسلمين من ذوقج حبيبتي .. علاقتي بامي بالايام العاديه حلوه اصبح عليها ابوس راسها واذا طلعت للمدرسه ابوس راسها بس احيانا اشوفها مع اختي الكبيره تعصب اختي الكبيره وامي ماتزعل الا مني انا ! هالشي حيل يضايقني تحسسني اني صغيره واهي كبيره ليش تفرق بينا انا وياها بناتها وكلنا نفس الشي .. وبالنسبه لـ اختلاف وجهات النظر .. امي مايعجبها اسلوبي بالكلام تقول اني قليله ادب ! مادري ليش امي باذات من الناس كلها محد يقولي جذي الا امي! احيانا تعصب علي اذا قعدت على النت وايد وتعصب احيانا اذا مسكت موبايلي وايد مم امي عصبيه وانا اخاف منها يعني لاني ماتحمل احد يصرخ علي :( .. والحين اذا بتكلمني لشي ضروري مثلا اشيل شي انا حطيته بالمطبخ تكلمني بعصبيه :( ان شاء الله :( النتايج قربت تطلع يوم الخميس وانا خايفه تصير النتيجه مو زينه لان امي كانت زعلانه علي وبعد قربنا نسافر :/ ماني قادره اتحمل :( |
طهر
كانك تتكلمي عن امي ترى كل الامهات كذا يعصبوا لما يشوفونا على النت تخيلي انا متزوجة وعندي بنتين ولما اروح عند اهلي وتشوفني امي على النت تعصب علي صدقيني كل الامهات كذا مو بس أمك معلش لازم نستحملهم ونحطهم على روسنا هما السبب بعد الله عز وجل بوجودنا بهالحياة اهم شي انك الىن تسامحي امك اجلسي عند رجولها ولا تقومي حتى تسامحك قوليلها ماني قايمة الال لما تسامحيني بوسي راسها ويديها ورجولها والله اش ماعملتي معاها قليل انا ماحسيت بفضل وقيمة امي الا بعد ما جبت اولاد والله حسيت قد ايش هيه تعبت وعانت عشان تربينا لا تفكري امك تكرهك بالعكس مافي ام تكره بنتها او تفضل احد عليها ممكن تكون اختك معاملتها مع امك افضل منك عشان كذا امك ما تزعل منها مثلك الحين اهم شي قومي وتعوذي من الشيطان وسامحي امك واعتذريلها ترى رضاها من رضى الرحمن الله يوفقك وان شاء الله تجيبي نتيجة ترفع الراس |
ان شاء الله ..
بحاول مره ثانيه :( تعبتكم معاي شكراً وايد |
شوفي بنتي طهر - اسمك حلو - ويدل على طهارة قلب صاحبته-
طبعا ماله داعي اكتب كلمات إنشائيه عن الام وحقها العظيم !! لكن الذي احب أن تعليمه - أن قلب الام من اسهل القلوب التي تكسبيها - الله يخليها لكم لكن هناك خطوات - في الكلمه - عندما تتكلمي معها في اي نقاش - اسبقيه بكلمه طيبه - مثل جعلك في الجنه يمه - واحرصي أن لا يعلو صوتك فوق صوتها البسمه - احرصي دائما على الإبتسام في وجهها - واحرصي على مدحها في ملابسها - في شعرها او حتى في كلمه او تصرف اعجبك منها ولو إعجاب بسيط لا تنسي تهديها - هدايا تلامس قلبها ورغباتها كوني قريبه منها - على كل الاحوال - ولا تنسي تتناقشي معها وتتحاوري - في كل ما يخطر في بالك فهذا من شأنه أن يفتح جسر تواصل وتفاهم بينكم - ولا تنسي رسائل الجوال حاولي - كل شئ في بداية صعب - لكن بالإستمرار يكون شئ عادي- الله يجعلها قرة عين لك والله لا يحرمك برها يا عسوله |
اقتباس:
لانك كنت صريحه معاها و اوعديها بلتغير بس مو بس كلام لازم تكوني ناويه و تنفذي الله يوفقك ويسهل لك امورك ويكتب لك الخير |
الوضع طبيعي جدا امك الله يهديها ماتعرف تتفاهم معاك وانتي نفس الشي
دايم البنت الي بسن المراهقة والأم تصير بينهم حروب اهليه لأن كل واحد فيكم مو فاهم الثاني عدل الله يهديكم لبعض اقتباس:
الانتحار نهايته النار تعوذي من الشيطان وحاولي تتقربي لأمك اكثر |
شقرديه :
كلامج نفس العسل تسسلمين ياحلوه الغربه مره : كلمتها امس وقلت لها اني ابي اتغير سامحيني بس للحين ما صار شي شوي ترد علي وتكلمني وبعدها ماترد :/ تقول انها مرتاحه لانها ماتكلمني ! |
حلوه المعاني :
لانها امي ماقدر اقول انها الغلطآنه :( الله يعين بس .. تسلمين يَ عسل |
اختي المشكلة في الاسلوب
يعني انتي مو امه انتي اخته الي تحبه وتريد ان تراه افضل انسان بس اسلوب الصراخ مع امك ماينفع هذي امك ولا تتوقعي انك تجرحيها وتقوليلها اسفه وترضى بنفس اللحظة انتي لو في شي مدايقك قوليلها ياه بس بطريقة هادية وحلوة وهي اكيد رح تتقهمك صدقيني بس مافي ام تميز بين اطفالها يعني مارح تشوفك تصرخي عليه وتسكت مثل ماانتي بنتها هو ابنها ربي يوفقك ويسعدك |
الغربه مره : علاقتي باختي حلوه تحاول تتوسط بيني انا وامي بس امي موراضيه
اختي برابعه جامعه عاشقه الغالي : تسلمين حبيبتي ان شاء الله |
حبيبتى مرات ننسى انفسنا واحنا نناقش ونجادل امهاتنا ونعلى اصواتنا امك يمكن حساسة شوى وبتضلي انتى بنتها الصغيرة مهما كبرتى وبعدين الله يهديكى اخوانك الصغار لازم بالتفاهم تتعاملى معهم يعنى اختى حتى اختك الكبيرة تقولى انها تعلى صوتها على امك ونتى كمان طيب واكيد اخوانك الباقيين لمايكبروا مش هيعملوا هيك
حاولي اخوانك تتعاملى معهم بالحيلة والكلام الحسن انتى هلا باجازة ساعدى امك بالبيت هتخليها ترضى عليكى الصباح قدميلها فطورها وسرحيلها شعرها بدعابة حاولى معاملتك مع اخوتك تسبق ب حبيبي شيل الورقة-الله يسعدك- الله يرضى عليك ازا رفضت امك الكلام معك تظاهرى انك مريضة(خدعة ههه)وانك ممتنعة عن الاكل هتلاقي قلب الام الحنون سبقها لتتكلم معك وتطمن عليكى(مجربة ) الله يسعدك ويوفقك طمنينى---ادعيلي بالذرية الصالحة |
إبنتي الغاليه طهر
أنتِ تعيشين الآن مرحلة المراهقه وتتميز هذه المرحله ببدء إحساس الإنسان بذاته وبشخصيته بشكل مغاير لمرحلة الطفوله وبداية استقلاليته عن والديه . مقارنة بسنك تعتبر لغتك وقدرتك على الكتابه ممتازه وهذا يدل على أنك متعلمه وذهنك متفتح وأظنك ستفهمي أن كلامي القصد منه مصلحتك . أنتِ منظمه بحياتك ولديك قدره على التدقيق بالتفاصيل هذا من طبيعتك ولن أتحدث كثيرا عن نمط شخصيتك وما يهمنا الآن موضوعك الحالي . حبك للنظام ودقتك بالإضافه الى طبيعة مرحلتك العمريه تسبب لكِ تصادما مستمرا مع والدتك . إبنتي من المفروض أن يكون للإنسان شخصيته المستقله وهذا شيئ جميل ولكن لا تحاولي فرضها على أمك وأبيك الوالدين ليس لهما إلا السمع والطاعه . أما فرض الشخصيه المستقله يكون مع الصديقات , والأقارب ممن يقاربونك بالسن وحتى مع الكبار ولكن باحترام وأدب . لست أنتِ البنت الوحيده التي تصطدم مع أمها وليست أمكِ الوحيده التي تصطدم مع إبنتها ولكن تأكدي أن أمك تحبك وتريد لك الخير ولا تتدخلي بطريقة تربيتها لإخوانك فهي كما ربتك ستربيهم . لا يحق لك بعدما بدأتي تفهمي شيئا من الحياة أن تتدخلي بتربية اخوانك لأنك أنتِ بنفسك لا زلتِ صغيرة أيضاً , وتحتاجي لمزيد من التربيه , وطريق الحياة طويل ومتعب . إبتني إياك أن تهربي أو تنتحري الهرب يعني ضياع حياتك للأبد ووقوعك بين الذئاب المفترسه الإنتحار يعني عذاب الله والنار . إبنتي أنا لدي بنت عمرها مقارب لعمرك وتفعل بعض التصرفات التي تشابه تصرفاتك وأتحدث معك كأني أتحدث معها , واعتبرك مثل بنتي محتاجه النصح والتوجيه . الله يوفقك يا بنتي . |
يا طهر
الله يصلحك ،،، فعلا خلق الانسان عجولا انت استمري على المحاولات و ما دام علاقتك حلوه باختك دايما كوني قريبه منها و اتفاهمو مع بعض كيف تقربو اكثر بينك و بين ماما و اعملي معاها العشا ولا شي حلو و لا كوب عصير منعش لماما عصير ليمون بلنعناع و الثلج و قدموه لها و هي تدريجي حتشوف انك اتغيرتي و تبدا تغير من نظرتها الك يعني انت مثلا ممكن تصدقي اذا جا اخوكي الصغير و بعد ما عفس الدنيا صراخ و بكا و قلب البيت يقولك اسف ما اعيدها ثاني حتصدقيه علطول راح تقوليله ان شاء الله خير نشوف الايام الجايه كيف تكون و يكون تحت النظر و الاختبار ما حيتغير بيوم وليله يبدا يقلل من شقاوته ومن صراخه و اخر شي يبقى طفل صغير بس محتمل انت كمان راح تاخذي وقتك الله يكتب لكم الخير،،، ويوفقك |
محرومه الله يرزقج الذريه الصالحه اكيد مراح انساكم جميعاً من دعائي
محر ومه , ابو حكيم , الغربه مره :) اشكركم جداً جداً .. لو ما الله ثم انتو ماتطمنت .. بظل احاول لين ربي يلين قلب امي علي .. اشكركم مره ثانيه |
ابشركم :)
امي سآمحتني .. ادعولـــــي |
مبرووك طهر
والله فرحت لك والله الله بأمك لا عاد تزعلينها وبشرينا بنتيجتك موفقة يارب |
| الساعة الآن 03:55 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©