|
انا الغلطان ولا زوجتي
السلام عليكم ورحمة الله وبركاته
ويسعد الله مساكم انا وزوجتي متخاصمين لنا يومين وما نتكلم الا لحاجه ضروريه اذا البنت ولا الولد تعبانين وبس الحكايه بختصار انها طلبت مني فلوس ونا قلت ما عندي ومش الموضوع عادي ثاني يوم بنت اخويا جاها مولود (اول مولود لها) فكلمت الحرمه قلت لها بناخذ بوكيه ورد وحنا رايحين المستشفى وفعلا اخذنا ورحنا وكان الوضع عادي فلما رجعنا البيت بدات الهرجه مو تقول انتا ما عندك فلوس كيف طلعت دحين قلت يابنت الحلال والله ماعندي فعلا بس والله ماهي حلوه نروح المستشفى ويدنا فاضيه فابدا الموشح حقها لو انا الي طلبت ماكنت جبت شي انا لين هنا ممكن اقول معاها حق بس لما زادت وصارت تقول انا من اول مقدرا ضروفك بس بعد اليوم ماني مقدرا والله يخلي اهلي ولايحرمني منهم يعني كانها تقول انتا منتا مكفيني ومقصر معايا انا هنا اكلت معايا وحزت في نفسي وانا يعلم الله اني ماني مقصر معاها في الي اقدر عليه انا المشكله عندي قروض وجمعيات فوق 5000 كل شهر ومع هذا اديها 700 ريال كل شهر مصروف لها ولجوالها وهيا من مصروفها تشتري لبس لها ولعيال وانا اذا تبغى شي ومعايا اديها المشكله اني انا مقصر في حق نفس كثير يعني مثلا كرت قناة الجزيره ممكن 280 ريال في السنه ما اشتريه اقول اخلي الفلوس تمشيني لنهاية الشهر هذا غير سيارتي انعدمت من الامطار الي في جده ولين دحين صارف فوق 7000 ريال ولسا ما طلعتها وطبعا كلها سلف لين يجي التعويض وهيا تقول اول ما تقصر في شي واي حاجه ابغاها تجيبها بس دحين لا اقولها طيب منتي عارفة الالتزامات الي علينا تقول عارفه وان شاء الله تعدي هيا انا ما انكر انها مستحمله معايا وهاذي اول مره تقولها وانا عارف والله انو الموضوع تافه وفي دقيقه انهيه بس انا كلامها زعلني فا بصراحه من فينا الغلطان |
انت الغلطان يا سيدي
لو انك سألتها قبل لتروحو المستشفى و قلتلها ما هي حلوه نروح عليهم و ايدينا فاضية شو رأيك بنجي على حالنا شوي و خصوصا انو اول مولود لها يعني لوحدها مرتك كانت قالت بناخود بوكيه ورد و طبعا لانو اي مشكلة في الدنيا ما يكون الغلط على فرد بيكون على اكثر من طرف لكن واحد هو الي بدأ الثاني ما عرف يتصرف قام رد الغلط بغلط الله يفرجها عليك و يرزقك يا رب |
اقتباس:
|
أخي العزيز
من الطبعي إن المرأة تشعر بالغيرة من الأخريين وما أنكمر إن زوجتك زادة الجرعه حبتين لأنا من رأيي تمشي الأمور عادي وتنسى هي قالت هذا الكلام من غيرتها وكمان النساء بطبعهم إذا طلبت شي وزوجها ما حقق لها مناها ماتنسى هذا الشي بعكس الرجل يحسبها صح ويقدم الأولويات لأمور حياته بدليل إنت شغف بالمبارات بس أجلتها لأن هناك أولويات وأول ما تقدر وتتحسن ظروفك أنا متأكدة إنك ما راح تقصروشوي شوي راح تعرف إنك ما رفضت طلبها إلا لضيق الحال وكثر من دعاء اللهم اكفني بحلالك عن حرامك وبفضلك عمن سواك |
اقتباس:
انا الي قاهرني انو انا اول اي حاجه تبغاها ما عندي مشكله حتى هيا بنفسها تقول كذا يعني انا لو مو القرض الي عليا وكان وضعنا عادي |
وعليكم السلام ورحمة الله وبركاته
والله ياخوي وقت قريت كلامك تذكرت حديث الرسول صلى الله عليه وسلم .. بكفر النساء بالعشير .. ما رأيك لو ذكرتها بالحديث بطريقتك الخاصه علها ترجع لعقلانيتها وهدوئها ... وانت لا تضايق نفسك اخوي كلها غيرة نساء .. والله يوفقكم لما يحب يرضى :) |
لا أنت غلطت
ولاهي غلطت بمعنى أنك تعاملت مع الموقف بما يستدعيه حقا وهي ردة فعلها طبيعية تغار وتحس أنك ممكن تهتم لغيرها وهي لا أنت مشها وهي حتمشيها ولا تصعدون المشكلة أنا متتاكدة أنها عارفة الضروف تماما بس بدافع الغيرة كان كلامها |
الله يهديها ويصلح مابينكم
طيب وش عندها الشهر هذا ماكفاها المصروف فيه مناسبات او ايش انا زوجي يعطيني مصروف مقارب للي تعطيه زوجتك لي ولااولادي والحمدلله يكفيني وزياده الا فتره الايجازات او زواج اطلب اكثر اذا هي كبرت الموضوع تعال معاها بالسياسه وتفاهم معاها يمكن هي ماتحب زوجه اخوك او بينهم مشاكل وقهرها تصرفك |
ما حصل عادي.. والحمد لله كانت نهاية حديثكم سلمية.. زعلة وتفوت ولا حد يموت
ولا يفوت عليك أخي طبيعة حواء.. ولا أعمم.. وصدقني رغم أنها وافقت على طلب بوكيه الورد كان لابد لها أن تذكر ما ذكرت لك لأنها لو لم تذكره لأنفجرت تحكيه لأقرب الأقربين.. لذلك قيل بأن البيوت أسرار.. وما عليك سوى التعامل بحكمة وروية، وأنا في اعتقادي بأن السبعمائة ريال ليست قليلة ويمكنها إذا كانت مدبرة أن تمشي أمورها بها.. فنحن لا نلبس كل يوم وفاتورة الجوال يجب أن لا تتعدى المعقول. أنت لم تخطي .. وهي كذلك .. لكن أحياناً نفقد السيطرة على أنفسنا فيخرج منا ما يغضب الآخرين.. وملح الحياة الزوجية احياناً يكون بالزياده.. أسال الله ان يهيبنا وأياكم نعمة الصبر لتحمل ما لا نقدر عليه.. آمين |
لا تزعل اخوي امبينة انها قالت هد الكلام من زعلها منك ترا شافتك عم تظحك مع هلك و لا بتمازحهم و زعلت لانكم صارلكم ايام مو متحاكيين لا تاخد افخاترك
|
و اللة اخوي معاها الحق ... يعني تقول لها مو معاي فلوس و اليوم الثاني تشتري بوكيه ورد لبنت اخوك .... صدقني يزعل
مهما يكون هي حرمتك و تستاهل تعطيها الاولوية ... والدليل انها صابرة علي 700 ريال عل عموم حصل خير ... تكلم معاها و لا تطول الزعل اللة يديم المحبة بينكم |
انت بنفسك تعترف انها استحملت ظروفك كثير يعني مافيها شى لو انفجرت بيوم فيك احنا (بشر)
الله يرزقك من خيره وحلو الانسان لما يتعرف بفاضال زوجته وتحملها وصبرها لظروفه |
انت الغلطان 00
فلوس المظاهر اولى فيها زوجتك 00 وخاصة لما طلبتك - ياليت ماتتعود تردها لو تعطيها عشره ريال |
كلامها صحيح كلكم يالرجال كذا
لو طلبت الزوجة قلتم ماعندي ولو خربت السيارة ولا صديقك طلب تسلفتم |
اقتباس:
|
اقتباس:
|
اقتباس:
|
قلها انا مو اعطيك 700 ريال طيب ليه تطلبيني غيرها مافي غيرها واذا ماعجبتك اخذتها منك يصير ماعاد تجيب طاري تخاف تاخذ المصروف منها
وترى الا ماتجي المواقف ذي يمكن انقهرت انك فضلت الناس عليها عشان كذا زعلت تبغى تكون قبل اي احد الله يوفقكم يارب ويسعدكم |
لصراحه ردة فعلها مالها داعي ومبالغ فيها
وخصوصا انك مومقصر معها بشئ وهي المفروض تقدر ظروفك لان الناس وخصوصا بنت اخوك ما حتقدر انك تدخل عليها فاضى خصوصا انه اول مولود اسئلها يرضيكي نروح المستشفي من غير شئ واعطيك فلوس البوكيه عشان ترضي عني ؟؟؟؟؟؟ |
موقف عادي ويحصل دايم
الي انت عملته صح اجتماعيا....بس عملت مدخل للشيطان بحكم انك مخاصمها والشيطان شاطر راح قال لها ان قدرها اقل من بنت اخوك فاتنرفزت!! وعادي دايم الحريم يقولون الرجال لو احد طلب فزعتهم يتسلفو ولو زوجاتهم قالوا ماعندي!! وهذا الي خلى زوجتك تعصب وانت ساعدت الشيطان عليها لأن العلاقة كانت اصلا متوترة لو حصل دا في وقت اخر وانتوا مع بعض حبايب كانت هي اشترت لك هدية بنت اخوك من فلوسها باختصاااااااااااااااااااااار مشكلتكم الحالية كانت مخرج تراكمات لحالتكم الايام السابقة |
الله يعطيكم العافيه جميعا
بس انا حاب اوضح حاجه احنا قيل الموضوع هدا كان وضعنا عادي يعني ما كنا متخاصمين |
| الساعة الآن 06:54 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©