|
زوجي يخونني
السلام عليكم ورحمه الله وبركاته اخواني واخواتي الاعضاء اتمنى تساعدوني وتفيدوني في مشكلتي انا متزوجه لي سبعه شهور وحامل مشكلتي اكتشفت بعد اول اسبوع من الزواج ان زوجي كان يكلم وحده في فتره الشبكه لما شفت بعض الرسايل في جواله عن طريق الصدفه مع العلم اني ماافتش وراه لاننا متفقين على الثقه واحترامنا لبعض وفتحت الموضوع معاه واعترف واعتذر وانا مشيت الموضوع بالرغم من صدمتي القويه اللي زعزعت حبي وثقتي فيه ومرت الايام وللاسف قبل اسبوعين شكيت انه يكلم وحده من تصرفاته اهتمامه الزايد بالجوال والمسجات والابتسامات والسرحان ووقتها سمحت لنفسي اني اتطلع على جواله وبعدها اتاكدت من مسجات الحب والغرام انصدمت وتألمت بشده وبكيت لحد مانشفت دموعي كنت اسال نفسي ليه؟ انا قصرف في ايه ؟ احاول دائما قد مااقدر اني مااقصر معاه واهتم بنفسي وكنت اجتهد في هذا الشي وهوا بنفسه كان يعترف بالرغم من كثرت عيوبه واهماله للصلاه ولنظافته الشخصيه وجفافه وقسوته تحملته واحتسبت اجري على الله وقلت هذا زوجي لازم اتحمله واوقف جنبه واعينه على نفسه عشان نعيش بسعاده والله العظيم عمري ماسمعت منه كلام الحب اللي يقوله لها وقبل لما كنت اساله ليه ماتقولي كلام حلو وتدلعني يقولي انا كذا ومااعرف للدلع وكلام الحب حبك بقلبي كفايه - هل الدلع صعب بالحلال ويسهل عندما يكون بالحرام؟ حالوت اني اتمالك نفسي ومااظهر امامه صدمتي بالموضوع واتروى في ردت فعلي لاني ماابي اندم ولجأت الى الله ليلهمني الصبر المي وحزني لايعلمه الا الله وصدمتي كبيره في زوجي وافكر دائما بالانفصال معد اقدر اتحمل اكثر من كذا كل يوم يكلمها ليل نهار وانا ساكته وماادري اذا الموضوع فيه مقابلات ولا لا حاسه بإهانه كبير وانه مايستاهلني انصحوني مالي غيركم بعد الله وجهوني بالتصرف الصحيح والحكيم كيف افاتحه واواجهه بالموضوع بدون ماافقد احترامي لنفسي او اخطئ في تصرفي معاه وقبل مايتطور الموضوع للأسوأ جزاكم الله عني خير الجزاء في انتظار مساعدتكم |
أختي ,, أعتقد بأن علاقته المحرمة ,, هو ماضي ماقبل الزواج ,,
ومازال محتفظ به بعد الزواج ,, فلذلك لا تقلقي بشأن إن كنت مقصّرة ,, في اهتمامك به ,, وتزيّنك له ,, وقيامك بواجباته ,, على أكمل وجه .. أختي ,, أنتما مازلتما في بداية مشوار حياتكم الزوجيّة ,, فإن تهاونتي بالسّكوت على ذلك ,, فقد يصعب عليك السيطرة ,, على الموقف إن تطوّر الأمر فيما بعد ,, لذلك أرى أنّ المواجهة ,, وبشكل حازم ,, بعيداً عن الإستفزاز ,, هو الحلّ الأمثل .. |
قبل كل شئ حاولي اصلاح زوجك فيما بينه وبين ربه قال تعالى ( إِنَّ الصَّلَاةَ تَنْهَى عَنِ الْفَحْشَاءِ وَالْمُنْكَرِ ) إذا رفعتي بحنكتك وحسن تدبيرك سهم تقواه ومخافة ربه فبعدها تنحل هذه الامور الوضيعه المنكر وليكن همك حق الله 00 ومرضاته لا تنسي 00 أن تتقربي بخطواتك لمن عنده جل امرك من قبل ومن بعد بالطاعات من دعاء وصدقه ونوافل 00000 الله يهنيكم بطاعته |
اختي بما انو زوجك ما ارتدع من اول مرة
لازم تدخليه ياه ابوه او احد اخوانه بالموضوع لانو لازم يكون في خوف يعني زوجك مو حاسس بالاهتمام طيب خليه يحس بالخوف و طبعا اوعك تدخلي حدا من اهلك لانو زوجك بيتم يكرهم للابد لانو بيصغر بعينهم و لا تنسي انت بموقف قوة مو ضعف توكلي على الله |
اقتباس:
مشكور اخوي تعاندني على حسن تجاوبك ولي مزعلني اني توني متزوجه لسا مالحقت افرح بنفسي بس اخوي ياريت تساعدني وتقلي كيف ابدأ معاه الموضوع ابي اكون جديه بدون ضعف وبكى |
بالرغم من كثرت عيوبه واهماله للصلاه ولنظافته الشخصيه وجفافه وقسوته
ابدئي مع زوجك بصلاته يعني خليه يصلي ذكريه بالله وانصحيه وادعي له فأذا صلحت صلاته صلحت بقية اموره فالصلاه تنهى عن الفحشاء والمنكر والصلاه طهور ونظافه يتجد فيها الايمان مع كل وضوء نقوم به وفقك الله |
اسال الله ان يفرج همك ..
والله مو عارفه وش اقول .. لكن ارجعي ناقشيه ... وذكريه تحملك له وحبك له رغم عيوبه وانك فعلتي له كيت وكيت وعلمني وين مقصره عشان كذا تجازيني .. بعض الرجال يتاثر ببكاء المراه ويقتنع وبعضهم لا ..هالشئ يرجع لطبيعة زوجك .. فيه فكره كمان تكتبي اللي بخاطرك بورقه تبدائي اول بثنائك عليه ومدحه .. وبعده اكتبي اللي بخاطرك ... ولو عنده ايميل ارسلي له قصه اسمها ظلمها وهذه النتيجه تلاقيها بقوقل ... ولو تاب ورجع لحركاته ثاني وقتها اتخذي قرار حاسم معه ودخلي طرف بينكم .. والله قلبي معك اتمنى تطمنينا عن حالك .... |
الله يكون بعونك ! انت ادعي له بالهداية وزيدي جرعات الاهتمام بنفسك وتطويرها عشان يحس انك متميزة عن الي يخونك معاها ! تكلمي معاه بشكل عفوي عن الصلاة لانه مثل ما قال الاخوان لازم تصلحين مابينه وبين ربه اولا لان الصلاة تنهى عن الفحشاء والمنكر. وانتبهي يدري انك فتشتي بجواله لانه رح يفقد الثقة فيك وممكن يحط لجواله رمز القفل بعدين انت تولعي زيادة . الله يعينك على اصلاحه !
|
أختي الكريمة ..
أحياناً ,, يكون صاحب الحق ,, على باطل ,, إذا أساء التصرّف ,, وأحسن استغلالها ,, الطرف الثّاني لصالحه ,, لذلك : أولاً/ إختاري الوقت ,, والمكان المناسب - لكِ وله - للنّقاش ,, (حبّذا أن يكون في يوم راحة مثلاً) .. ثانياً/ كوني مستعدّة نفسيّا ,, هادئة ,, ومتّزنة ,, ورتّبي أفكارك ,, بشكل منطقي .. ثالثاً/ ابدأي حديثك معه بهدوء ,, بعيدا عن العصبيّة ,, والهجوم ,, حتى تصل إليه فكرتك ,, (هنا يكون الحزم ) ثُمّ أخبريه بأنّك لست غافلة ,, ولكنّك تتغافلين ,, لعلّ الله يصلح شأنه ,, ويردّه إلى رُشده ,, فلم تري منه إلا التّمادي ,, والإستغفال ,, ولكن إلى أين ,, وإلى متى ,, هذا ما تنتظرين إجابته منه؟؟.. أختي ,, استخدمي أسلوب التّهديد ,, بترك المنزل ,, أو بطلب الطّلاق ,, إن استدعى الأمر ذلك .. |
ماذا حدث للناس
اين خوف الله ياعباد الله شيء يحزن ويقطع القلب..اكثر المواضيع خيانات ومحدثات ايش صار فينا هل ذنوبنا اثقلت علينا ام غضب الله اللحق بنا واجهيه بخيانته لا تسكي لانك راح تنفجرين بيوم من الايام وبيكون انفجارك هو اخر طريق للعيش معه.. طلعي الي بقلبك قولي له انت ليه تزوجتني دامك تبي ترجع للماضي وتخون..؟؟ لماذا الانسان يتزوج عشان يحصن نفسه ويعفها بالحلال..ولا عشان يوسع علاقاته صارحيه بس بهدوووء بيني له عفوك عنه وانك سامحتي بس بحدود..يعني يوعدك ان خيانته ماتتكرر اذا تحسي انك مقصرة اتجاهه حاولي تصلحين من نفسك..اهتمي بكل شي يقدر يخليه لاهي فيك مو في غيرك لا تطلبي منه يقولك كلام حلو..لا تخليه يجاملك على حساب نفسك..الرجل اذا احب يقول ويفعل ويسوي.. الرجل ذكي من اننا نقوله تحرك...لكن حركيه انتي بطريقتك واسلوبك..اين كيد النساء؟؟ قولي له بعطيك فرصة واستغلي الفرصة في تغير نفسك انتي ايضا.. |
اقتباس:
صدقتي في كلامك اختي الصلاه هي اللي تقوم الانسان بس وش اسوي يعلم الله اني ماخليت لااسلوب ولا طريقه اللا واتبعتها معاه حاولت اني اطول بالي معاه للاخر دائما اذكره بدخول وقت الصلاه وبما انه يرفض يصلي في المسجد اطلب منه نصلي جماعه وساعات اصلي قدامه و ارسله رسايل عن اهميه الصلاه و اسمعه اشرطه في السياره ساعات يجاملني ويقوم وساعات يعند ويطنشني الا ان يخرج وقت الصلاه وانا صابره معاه ومحتسبه اجري على الله وبدعيله دائما ان الله يهديه وينور بصيرته بس الله سبحانه عظيم يغفر للعبد المذنب اذا تاب بس حنا البشر وخاصتا النساء مانقدر نغفر للرجل خيانته لأنها مؤلمه وقاسيه تفقدك ثقتك بنفسك وبكل من حولك |
اقتباس:
انا فكرت بهذا الحل بس من بعد مااواجهه واصارحه بالمشكله اذا مانفع كلامي معاه واستمر في تماديه واستهتاره بحاول ادخل ابوه في الموضوع |
اقتباس:
مشكوره يالغاليه كنت ومازلت مستمره في محاولت اصلاح صلاته بكل الطرق والاساليب لكن كبريائه كرجل يخليه يعند ويستمر في اهماله املي في الله ان ينور بصيرته للصلاه |
والله اذا بتزعلين وتعصبين خليها علي موضوع الصلاة واذا شفتي فيه رجا استمري بالحياة معاه مع نصحه ولاتسكتين عن سالفه مكالماته واذا استدعي الامر ادخلي رجال ثقه يمكن يستحي منه ....واجلي موضوع الحمل لما تأكدين انه عقل ولا تغلطين نفس غلطتي وتسامحين علي طول ولا مايبين بعينهم وتصير الخيانه هوايه مايقدر يستغني عنها
خليك قويه بالمواجهه وعندك الدليل وحطي شروط اذا يبي الحياة تستمر ...مو تقولي له خلاص بسامحك واعطيك فرصه ثانيه ووبس لا قولي عندي شرط انك تحرص علي الصلاة في وقتها ...واي شروط ثانيه لاتبينين ضعفك وانك خايف من الطلاق ..وخلي لاهلك هيبه .. زوجي لما تزوجنا كان ما يعرف يتكلم معاي وما اسمح الكلام الحلو والمزح وبعدين في كل خيانه له كنت انصدم من اسلوبه والقهر انه صوته دايما عالي ...معروف عنه هالشي الااذا كلم وحده يصير ناعم ورقيق!!!!لا وحنون يعرف بالبس يمدح القذرات بأناقتها |
اقتباس:
اللهم امين جزاك الله خير حبيبتي والله ماينفع معاه الدموع زوجي قاسي وابد مايتأثر بدموعي لو ابكي يوم كامل مايسأل عني ولا ينفع معاه اسلوب الورق والايميلات لانه بيتجاهلها ويسوي انه ماشاف شي مافي غير اني اواجهه بالموضوع بس انا منتظره الوقت المناسب لاني مو قادره اصيده طول الوقت برا البيت لاتنسيني من صالح دعائك والله نفسيتي سيئه جدا كرهت نفسي وكرهت كل اللي حولي اسال الله ان يلهمني الصبر وان يعينني على ابتلائي ادعولي ان الله يفرج همي ويجبر بخاطري |
اقتباس:
مشكوره حبيبتي جوري دائما بدعيله بالهدايه ومهتمه بإصلاح صلاته بشكل كبير لكن الهدايه ماهي بيدي بيد ربي ومهتمه بشكلي ومضموني معاه لدرجه ان امه دائما تقله انت اكثر واحد محظوظ في عيالي الله سخرلك كل اللي تتمناه في زوجتك لازم تحمد ربك وتحافظ عليها بس ياريته يقدر ولا يبين في عينه والله اني ارخصت نفسي لكن اسأل العوض من الله انا ماادعي الكمال لنفسي بهذا الكلام لانه مافي انسان كامل ومثل مافيني مميزات اكيد فيني عيوب لكن مهما كان مافي اي عيب يبرر الخيانه |
اقتباس:
شاكره ومقدره عودتك للموضع اخي الفاضل جزاك الله عني خير الجزاء ساعدتني كثيرا في ترتيب افكاري حاولت اني افاتحه في الموضوع لكن ماقدرت اصيده اغلب الوقت برا البيت بحاول الاقي وقت مناسب واصارحه حابه اسالك وعارفه اني ثقلت عليك كيف اقله اني عرفت الموضوع لاني ماابيه يعرف اني فتشت جواله؟ |
و الله مشكلة
شكله زوجك لسا مراهق و طائش و لا يعلم ما معنى الزواج و الالتزام بالاخلاص لزوجته و الخوف من الله ما دامه غير مكترث بصلاته فلا يستبعد منه تصرف كهذا و لكن يجب ان تكوني حازمة هذا المرة و برأيي طريقتك لمواجهة ، أو اخبارك لأهلك او أهله هذا يعتمد على طباع زوجك و انت أدرى بها يا اختي شوفي المواضيع على هذا الرابط تفيدك ان شاء الله ¤©§][§©¤][الخيانة الزوجية - مشاكل و حلول][¤©§][§©¤ |
ابنتي الكريمة هديلوا
أسأل الله العلي القدير أن ييسر أمرك ويصلح زوجك: بداية زوجك هذا خان الله وخان دينه بترك الصلاة قبل أن يخونك مع غيرك: سأمر على موضوعك بالنقاط التالية: 1- هل هو من تزوج برغبته الاستقرار وتكوين أسرة أم زوجه أهله لحمايته من العبث فإن كانت الأولى ولا أظن فهو متمكن من العبث وإن كانت الثانية فهو لم يعٍ معنى الزواج بعد. 2- كلمة إهماله للصلاة ومجاملتك أحياناً فيصلى وأحيانا لا فهذا بصريح العبارة كافر على الراجح من أقوال العلماء في تارك الصلاة تهاوناً كما رجحه الشيخ بن باز رحمه الله فلا يجب عليك السكوت مهما كان السبب. 2- في أحد ردودك على الأخ تعاندني قلتي سأفعل حينما اتمكن من مواجهته فهو أغلب وقته خارج البيت وهنا المصيبة الكبرى منك وهي سكوتك أولاً على موضوع تهاونه في الصلاة ثم السكوت عليه في البقاء خارج البيت, فالتهاون مع المستهتر يزيده تمادياً في ذلك ولا تنتظري مبادرته لإصلاح نفسه. 3- أنصحك بكل ثقة أن لا تتعاملي معه هو مباشرة في هذا الموضوع فهو لا يقدر شي مما ستقولينه له وخاطبي والده بهدوء دون أن يعلم الجميع بذلك وقولي له يا عم ابنك يترك الصلاة أحياناً ويتواصل مع غيري من النساء وهذا لا يرضي الله ولا يرضيني وأخبرتك لأني لا أحب أن يكون الموضوع بينكم وبين أهلي ولتتصرف معه بما يجمعنا على خير وإن لم يتغير أخبرت والدي ليتولى الموضع نيابةً عني. 4- عندما يعاتبك زوجك لماذا أخبرتي والده ولم تكلميه هو قولي له لقد طلبت منك كل ذلك ولكنك لا تقدر ما تفعل وأثره عليّ وعليك. 5- الحزم من البداية خير من البقاء عليه خوفاً من فشل الزواج وانتهاؤه بالطلاق وهنا الخطأ في فهم الناس. 6- البقاء مع زوج لا يصلى هو الفشل بعينه (عند الله) وإن كانت الصورة جميلة عند الناس بالمقارنة مع المطلقة والطلاق بدون أولاد خير من البقاء وإنجاب أولاد أبوهم لا يصلى ويخون زوجته قبل تمام السنة من زواجه. أكرر دعائي لك ولكل المسلمات بالتيسير والتوفيق. المستشار / رجل الرجال |
لاحول ولاقوة الا بالله
خيانه خيانه خيانه وش فيها البشر وين الخوف من الله ؟ حبيبتي انتي كتبتي موضوعك ومعاه كل محاولاتك بالحلول ...الله يعينك ويلهمك القوه والصبر لااملك لك الا الدعاء ان الله يهديه ويجعل مخافته نصب عينيه ويسخره لك ويجعلك اجمل النساء في عينيه ويهديكم الي الخير لانفسكم وحياتكم ..اللهم آآآآآآآآآآآآآآآآآآمين |
| الساعة الآن 10:32 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©