|
إنتصاراتي في حياتي الزوجية
السلام عليكم .. ياهلا وغلا فيكم
أعرفكم بنفسي : Very different هدفي : أفيدكم بالطرق اللي سلكتها في حياتي واعتبرتها " إنتصارات" واللي خلتني فعلاً فري دفرنت . وراح اقدمها لكم على شكل دروس خصوصية من واقع تجربة شخصية . الفئة المستهدفه : معشر المتزوجين وخاصة " المتزوجات " الأجر " الرسوم " : دعوة صادقة بظهر الغيب والدفع مقدماً ^ ^ كل وحده تجلس مكانها وبدون صووووت وطلعوا دفاتركم واقلامكم .. ( الدرس الأول : لكل مشكلة حل ) وهذا هو الإنتصار الأول في حياتي : بداية أخبركم بشيء مهم وهو أن الحياة عموما والحياة الزوجية خصوصا تحدي , ومقياس النجاح فيها هو قدرتنا على تحقيق اهدافنا , وعشان نحقق اهدافنا بمثابرة وجد لازم نعرف عدو النجاح وابو العجز وهو كلمة .. " مستحيل " تأكدوا لا مستحيل مع الأمل والسعي للأفضل . الحياة الزوجية ماهي منزل جاهر مصمم على احدث طراز ومزود بكافة وسائل الراحة لالالا .. حياتنا الزوجية نحن اللي نبنيها لبنة لبنة بذوقنا وجهدنا ووقتنا وكل ما كان ذوقنا سليم وتظافرت جهودنا و حطينا كل لبنة مكانها الصحيح كل ما كان بيتنا أحلى واقوي واريح .. واي شيء كنا نحلم في وجوده بشريك حياتنا وما حصلناه نقدر نوجده فيه بطريقتنا الخاصة , بتقولون كيف ؟ أشرحها لكم .."" هذى النقطة مهمة سجلوها بدفاتركم داخله في الإمتحان " ^ ^ _ بخبركم تجربتي في حل مشكلتي المستعصية واللي قدرت فيها أحول زوجي من أجلف جلف إلى أرق رقيق _ كنت قبل زواجي بنوتة نعوووومه هاااادئة رقيييقة شرات سندريلا ^ـ* لدرجة خلت المدرسات والطالبات يزقروني بالنعومة وصار اسم شهرة ونسوا إسمي الأصلي .. في البيت نفس الشيء الكل يحافظ على شعوري ويوم بيكلموني لااااازم بصوت واااطئ عشان لو حد رفع صوته علي أو طالعني بنظرة حادة أبكــــــــي قلت لكم رقيييييييقة ^^ قدر الله وتزوجت شخص عنيييييف عنيييييييف لو أجلس منها لبكرة أقول عنييييف ما خلص , فيه جلافة غير شكل وزاد الطين بله الحلو لاعب كارتيه كيف ظنكم يطلع ؟؟؟؟؟ وكل يوم يأخذ هزززبة محترررمة من أمه حتى الصغارية يخافون منه يوم يشوفونه الكل يشرد والسبه لعبه ومزحه الجلف .. والمسيكينة أنا إنظلمت معه وعااانيت معاناة صدقيه وأكثر من الكل لأني أنا اللي طول الوقت معه , ما يعرف يتعامل مع الجنس الناعم ^^ كل لعبه ومزحة عنييييف ودفاااشة وانا ياحليلي كل مرة ابكي حتى لو طالعني بحده بكييت وهوإستمتع بهالوضع وصار يطفرني ويمزح مزح مو صاحي ويقولي أنتي دلوووعة زيادة ومو حاس فيه خير شر .. حتى يوم يجيب اغراض من الجمعية ما يحطها زي العالم لالا يقوم يرمي العلب والأكياس يرفعها بيده ويشوتها برجله كأنه يلعب كارتيه بالضبط وكم مرة تصيبني وحده منها وعاااااااااادي ماسوى شيء !! أنا دلووعة .. ووقت النوم هنا المعاناة فيه طبع شين يوم بينام تجيه طاقة غريبة يرمي المخدات ويرفع البطانية ويرمها فووق ويقفز بكل قوته على الشبرية وبعدها يخمد وينام وطبعاً يتعمد يطيح نفسه علي .. وكنت أظهر من الغرفة وانام في الممر كحل مؤقت لأنا ساكنين عند أهله بنفس البيت ويلحقني يتعذر ويتأسف عشان لاننفضح قدام اهله وحليلي أرد معاه للغرفة ويتعدل يوم ويرجع لطبعه , غير إنه مرة صب المويه واتزحلقت وأجهضت لأنا ما كنا دارين إني حامل وكانت بتوصل للطلاق وهو يحلف ويقسم إنه مو داري .. ( حسيت بمعاناة حقيقية وفكرت بالطلاق لكن لأن عندي قناعة إن الحياة تحدي قلت لا بحل مشكلتي .. جلست أفكر كيف أحلها ؟؟ ما فيه إلا أغير زوجي ؟ كيف أغيره أمه ما قدرت عليه ؟ عطيت نفسي دافع قلت أنا أقدر لأني غير ووو ..إلخ قمت أرسل لعقلي الباطن رسائل تحفيزية .. وبدأت أفكر بطريقة لتغييره وحسيت بصعوبة كبيرة , فوصلت لنتيجة أسهل وهي أن التغيير يبدأ في أنا .. يعني أغير نفسي أولاً .. كييف ؟ أحاول اتخلص من كل هالرقة واقوي نفسي أكثر عشان أقدر أجاريه واغيره .. " يعني هالشخص ما ينفع معه طريقة الليونة لأنها ما هي من طبعه " ) خلصت الحصة ,, بعد الفسحة نكمل خخخ ^^ نكمل ما بدأناه في الحصة الماضية , مين تذكرني وين وصلنا ؟؟؟ أحسنتوا وصلنا كيف جاريت زوجي وغيرت من نفسي ..: بدات أطبع ببعض طبايعه مثل مزحة الجلف صرت أرد عليه بمزح أجلف وأحياناً أنا اللي أبدأ أتحركش فيه وبصراااحة أغلب محاولاتي في البداية بأت بالفشششل الذررريع وإنقلبت ضدي لأني توي ما تخلصت من الرقة والنعومة ^^ فكانت مؤلمة صراحة وكان هو المنتصر دائما.. " وكان هدفي مو إني أزعجة لا هدفي إني أتعلم الجلافة لأن هالخطوة هي تغيير نفسي مو تغييره " وفي مرة وهو جاي من شغله تعبان طلعت على الطاولة اللي جنب الباب وأول ما دخل الغرفة نطيت على ظهره عشان أطيحه بس خسارة ما طاح ولا حتى إختل توازنه بالعكس صار يلف بقوة بيطيحني لو طحت اموت هو طويل فقمت أصاااارخ وجت أمه على صراخي تقول ظنيته موتك فقال فضحتينا لا تلعبين لعبة منتي قدها بيحطمني الأخ ..! قلت ما عليه بعدني مو متمرسه وتوااالت محاولاتي وبدأت أفقد رقتي شيئاً فشيئاً ^^ إلى ماصرت ألاحظ إنه يحسب حساب لاي مزحة يسويها لأنه عارف الرد , لكن ما بطل جلافة .. حتى أهله وأهلى الكل لاحظ تغير شخصيتي للأقوى وطفرنا بأمه المسكينة بصراخنا وتكسير الأشياء ^^ إلى ما جت الضربة القاضية ^ـ* متأثرة فيه وبمصطلحاته واللي غيرت شخصيته نهائيا: وكنت وقتتها صراحة تعبااانة وااااايد ومتمدده على الشبرية بنام جاء الحلو كالعادة متعشي ومتفيج وفيه طاقة زاايدة بفرغها وحسيت إني مو متفيجة له وقلت ياربي هو ليش يسوي فيني جي , فجتني طاقة غضب زيادة على الجلافة اللي خذيتها منه , فأستعديت لأي هجوم , وقام يوم وصل سحب البطانية ورمها فوق وقفز على الشبرية بقوة وقبل يطيح رفسته برجولي على بطنه بقوووة لدرجة حسيت رجولي رااحت فلف إتجاهه وطاح على الكوميدينا وضرب فيها وإنكسر خشمه واتورم وجهه وإنفلق راسه وطاح على الارض يصرخ وجت أمه ررركض .. ودوه المستشفى وخيطوله سبع خرز وجبروا خشمه ونوموه يوم كامل للكشف على راسه وإعتقدوا أنه مسوي حادث وجلس شهر كااامل ما يطلع من البيت يقول لربعه طحت من الدرج , ويقول تبغيني أقول زوجتي ضربتني , وأنا الكابتن حقهم .. بقولون متزوج بلطجي من الشارع ..^^ وقال لأمه بس ما صدقته الكل يعرف أني نعومة وهو الجلف كيف أقدر عليه ^ـ* وضل فتررررة يعاني من الصداع .. الخلاصة : إن زوجي صار إنسان ثاااااااااني رقيق يدخل البيت بهداوة وينام بهداوه بدون إكشنات ويلعب مع الصغارية بشويش خخ , مو خوف مني لالالا بس لأنه حس بألمعاناه والألم ..وصار مايزقرني إلا يالمدرب ^^ وش تعلمنا من هالتجربة : ( إن حل المشكلة ممكن يكون المشكلة ذاتها زي ما صار معي ) وانتهت حصتنا اليوم بعد ما عرفنا إنتصاري الأول في حياتي الزوجية .. ومع لقاء في دروس آخرى ( نسيت الواجب ^^ ) سجلوه عندكم وياسواد ليلها اللي ماتحله : السؤال الأول : اذكري ما يستفاد من الدرس ؟ السؤال الثاني : أكتبي ثلاث ردود توضحين فيها مدى إستيعابك لما ذكرناه من نقاط مهمة ؟ السؤال الثالث : حددي أهدافك في حياتك الزوجية بدقة ؟ |
هههههههه مافيه حلول غير كذا حلبة مصارعة علشان يتغير !!
عمرررره ماتغير ياشيخة فكرة موضوعك حلوه لكن تطبيقك مااحسه حلو ! عموماً كل واحد ينام على الجنب اللي يريحه ؛ بالتوفيق ياعزيزتي .. |
أهلا بك اختي يبالمنتدى
أما قصتك عجييبة , مدري ليش ضحكت أسلوب سردك لتجربتك جميل و مسلي و الحمد لله نتيجتك طلعت طيبة و تعدل زوجك لكن مسكين ما كسر بخاطرش صحيح انكسر خشمه او صيغة مبالغة!! لكن عزيزتي قاعدتك اللي تقول اقتباس:
غير صحيحة , و لا تعمم , يمكن نفعت معاك ,ماتنفع مع غيرك في المشاكل البسيطة فلو كان هناك زوج عصبي يصارخ على اتفه شي , هل اصارخ و نسوي حلبة زعيق,,,لا ماينفع لو كان زوج يخون و العياذبالله هل ننصح زوجته تخون!! ماينفع , فيه مواقف يعني انتي قلتي (ممكن),,و هذا خلاها سليمة و اسئلتك صراحة صعبة,, و مرحبا بك مرة اخرى ما معنى الشبرية!!! |
جميل!
استفدنا منها درس. |
اقتباس:
هيه لازم تكون حلبة مصارعة عشان يحس على دمه ويتغير دام مانفع معاه كل الحلول . أهم شيئ الفكرة .. والتطبيق حتى أنا مو عاجبني بس كان لابد منه عشان يتغير ريلي , وخذيها مني قاعدة ( الدواء دائم مر ) .. شرفني مرورك .. |
اقتباس:
حياج أختي .. وعيونك الحلوة فديتج , أما كلامي كله واقعي وهية صدق إنكسر خشمه من قوة الضربه على الكوميدينا وطيحته بعدها على الأرض .. وعشان جي قعد شهر مايظهر من البيت ومسويلي وااايد حشررره .. ولا والله أختي ما كسر خاطري ولا شيء يستاهل ماجاه , بلاج ما تعرفين سوالفه , وبالعكس ضحكت عليه وهو يتونون بالمستشفى حتى الناس قعدت تطالعني الظاهر تحسبوني مينونة خخخخ ^^ أما القاعدة اللي قلت عليها , صحيح مو كل المشاكل تنفع فيها لكن أنا ذكرتها كفائدة , وحبيت أوضح أن كل مشكلة لها حل مهما إستعصت علينا بس يبلنا صبر وجهد .. وصدقيني وأنا اختج دائما التغير لازم نبدا فيه بأنفسنا أولاً وهذا أهم خطوة للعلاج , مهما كانت مشكلتنا لا نقول مستحيل صعب انا ما أقدر لا كلنا نقدر وعندنا طاقات غير محدوده يبالنا نحركها .. وزي ما قلت كل شخص وله طريقته الخاصة لحل المشكلة أو التخفيف منها على أقل تقدير .. واسئلتي صعبة افاااا عليج ^^ مو صعبة ابد الصعوبة تشغيل عقلنا والتفكير فيها وهذا اساس مشاكلنا ..حياج أختي .. والشبرية : الصراحه ضحكتيني وايد .!!! شبرية يعني كرفاية يعني سرير وهي وسيلة يستخدمها الإنسان لينام عليه وهي من ما أفرزته الثورة الصناعية الأولى فالقرون السابقة .... وفي السابق كان يستخدم ما يسمى الدوشق {الدوشج} طبعا لا تسألين شو معناته ؟؟؟؟؟!!!!!!!!!! لأن الجواب هي المرتبة الأرضية التي ينام عليها الإنسان ؟؟؟؟ بمعنى أن السرير له أرجل والدوشق بلا أرجل ...؟؟؟؟؟!!!!!!! واى سؤال أنا حاضرة ^^ أحب الطالبة المجده وااايد |
اقتباس:
اسعدني تشريفك واستفادتك .. بس ليييش ما حليت الواجب ^^ لا تقول اسئلتى صعبة .. |
مشكوره اختي على الموضوع وان شاء الله زوجك تعلم درس ما ينساه طول حياته
على فكرة لهجتك نفس اللهجة الاماراتية ، وطبيعي اعرفها لاني اتكلم بها :) |
السؤال الأول : اذكري ما يستفاد من الدرس ؟
طريقتك في حل مشكلتك نفعت معاك بس مهما كانت قوتك مستحيل تكون اقوى من الرجل لان الله خلقهم اقوى واحنا الاضعف يعني يقدر هو يردها لك ويكسر وجهك كله مو بس خشمك السؤال الثاني : أكتبي ثلاث ردود توضحين فيها مدى إستيعابك لما ذكرناه من نقاط مهمة ؟ مانقدر نطبق على جميع الناس وذلك لاختلاف الشخصيات سواء شخصية الزوجه او شخصيه الزوج فبعض الرجال صح يلعب مع زوجته ويطفشها من كثر المزح والضلطيش لكن مو الكل يرضى انها تكسر خشمه خصوصا في المجتمع الشرقي طيب ذي المره كسرتي خشمه وشوهتي وجهه طول عمره انا اللي اعرفه ان الخشم مايتجبر لانه غضروف وليس عظم المره الثانيه يمكن تكسرين رقبته وتؤدي الى وفاته وهذي نقطه مهمه لان ضربتك كانت قويه جدا السؤال الثالث : حددي أهدافك في حياتك الزوجية بدقة ؟ [/QUOTE] بعض المشاكل وليس جميعها نحلها بالمثل او نكبرها على قولة المثل اذا ماكبرت ماتصغر لكن لاتعتمد على جميع الازواج وعلى جميع المشاكل الزوجيه لان بعض المشاكل يكون حلها ودي بالمصارحه على حسب الشخصيات |
وعليكم السلام ورحمة الله وبركاته
أنا عندي قاعدة من تأليفي تقول "اللي يبوس غير اللي ينباس ، واللي يدوس غير اللي ينداس" يبوس= يقبّل يدوس= يدعس أو مدري أيش بقدمه. صراحة أختي أهنئك وبقوة على توفيق الله لكي بأن يسر لكي هذا التحول في شخصيتك (وهو ليس سهل أبداً وخاصة من المرأة لأنها عاطفية ). وسبحان الله الحياة الزوجية لاتستقيم ولا تحلا إلا بتعديل الطبع إلى طبع متوسط بين الزوجة وزوجها وبين الزوج وزوجته. وشاكر لكم الأسلوب الرائع في السرد السؤال الأول : اذكر ما يستفاد من الدرس ؟ - عدم صحة مقولة "أبو طبيع مايجوز عن طبعه" " هدم جبل ولا تغيير طبع". - الحياة الزوجية الهانئة مش شرط تكون في أول سنين الزواج. - يجب على أحد الزوجين المسك بزمام المبادرة لتحسين وضع الحياة الزوجية. - لاتقلق على بنتك او ابنك الرقيق وتقول مين اللي راح يتحملها ، أو اخاف مين اللي يحافظ على مشاعرها. -سكوت الناس عن تصرفاتك لايدل أبداً على موافقتهم ورضاهم على ذلك ، بل قد يكونوا متألمين أشد الألم من تصرفاتك ولكنك لاتريد فهم ذلك. فألحق نفسك وراجع تصرفاتك قبل موعد الضربة القاضية. - لاتستهين بالزوجة الرقيقة أبداً . السؤال الثاني : أكتب ثلاث ردود توضح فيها مدى إستيعابك لما ذكرناه من نقاط مهمة ؟ لا أخفيكي سراً ولكني بصراحة مافهمت السؤال. السؤال الثالث : حدد أهدافك في حياتك الزوجية بدقة ؟ أهدافي الآن : - الحياة الزوجية عبارة عن سفينة بها قبطان وقبطانه وكل واحد له مسؤوليات محددة ، فلازم نتفق على خطة معينة لكي تمشي السفينة على المسار الصحيح أو على مسار قريب من المسار الصحيح. سؤالي انا : ماهي الادوات التي ساعدتك على ذلك (قراءة كتب متخصصة ، دورات تطوير النفس ، استشارة متخصصين في العلاقات الزوجية ، الخ ) ؟ |
اولا احييك على انتصارك اختي
ثانيا انا الي كانت فيني المشكلة في اول زواجي كنت امزح مع زوجي مزح بقوة وهو كان يتالم خلاص لما شفت انو يمكن يورح فيها بطلت . |
اقتباس:
عيبتنك الرمسه مع إني حاولت واايد أعدلها عسب الكل يفهم , حلو إنها رمستك بعد ^^ |
اقتباس:
أختيه واضح إنج مو فاهمة الدرس عدل ^^ تركتي الموضوع المهم وركزتي على المثال , أولاً عشان تنجحين في حياتج لازم تشيلين هالأفكار من راسك الرجل أقوى عنك , الرجل الشرقي مدري شو بلاه , ومن هالرمسات اللي تزيدنا إحباط فوق الإحباط .. الرجل هو الرجل شرقي ولا غربي , له نقاط ضعف والتعامل معاه مو معجزة ( ثقـــــــــــــــــــــــــي بنفسك وشوفي نتائج هالثقة بعينج ) القوة مو بالحجم والعضلات القوة الحقيقية قوة النفس واللي تكمن داخلنا , ياما فيه ناس جثث وعضلات ومجرد ما تعرفينهم تكتشفين إنهم خررريطي وخواافين , والعكس صحيح .. لو فكرت بنفس تفكيرك وقلت ريلي أقوى عني , كان بقيت بمعاناة وكان تعرضت لخطر حقيقي على قولتج لكن الحمد لله حلينا مشكلتنا .. أنا ما قصدت إذاءه وهو يدري بهالشيء أنا صديت هجومه بطريقة علمته إنه غلطان وحسسته بالألم فصار يعرف إن أي هجوم مردود عليه , عشان جي تاااااب من جلافته ..^^ أما الخشم ^^ يبغالي اجيبلك لوحة توضحية لأجزائه ^^ الجزء العلوي عظم والسفلي غضروف . الإصابة كانت بالجزء العلوي وتجبر وما فيه إلا العافيه لا تشوه ولا شيء ^^ إش حلاته فديته .. وصحيح كلامج كل شخص وشخصيته وهذا اللي لازم نفهمه ان لكل شخص مفتاح , وبالتالي لكل مشكلة حل |
اقتباس:
وقاعدتك حلوة وصحيحه وعشتها فعلاً في يوم أسود ^^ ومشكووور على تهنيتك وفعلاً التحول ما كان سهل ابدا ابدا لكن هالنقطة صراحة احسبها لريلي بفضله صرت اقوى وشخصيتي احلى واكتسبت منه مهارات واايد فادتني في حياتي ككل .. وتصرفاته كانت أقوى دافع لي رغم إنها مؤذية بس ما عليه سامحناه ^^ وحلك للواجب ممتاااز وعيبني واايد خاصة ما يستفاد الفقرتين الأخيرة ^^ مهمة جدا والسؤال الثاني قصدت فيه كتابة نقاط تلخص ما فهمته من الدرس , بس يالله نحذفه عشانك فااهم بدليل مايستفاد .. ( جوابي على سؤالك ) الللي ساعدني عدة أشياء وكل واحد منها لايقل أهميه عن الثاني وهي : اولاً : عندي دوافع قوية جداً تفرض علي التغيير وهي : - شخصيتي الضعيفة واللي اسميها أنا [ رقيقة ] عشان لا تهتز ثقتي بنفسي غيرت مسمي ضعيفة إلى رقيقة فالمصطلحات لها تأثير قوي على النفس .. - شعوري بالمعاناة الحقيقية . - شخصية ريلي العنيفة جدا , وتناقضها مع شخصيتي .. - رغبتي في إيجاد حل دائم بدل الحل المؤقت . - معرفتي إن الحل ما يكون إلا بتقارب الشخصيات واجتماعها في منطقة وسط . الثاني : كتب التطوير الذاتي واللي إستفدت منها جداً وخاصة اللي تتحدث عن القوى الكامنة وتفجير الطاقات وقوة العقل الباطن ودعائم الثقة بالنفس .. الثالث وهو الأهم : إستعانتي بالله تعالى وثقتي فيه بأنه سيوفقني للنجاح .. |
اقتباس:
المهم إنج بطلتي قبل لا ينفجر عليج مثل حالاتي ^ــ^ |
هههههه من جد ضحكتيني من قلب اسلوبك وطرحك زاد الموضوع حلاوه الله يصلحكم لبعض
بالنسبه لي اوافقك بكل كلمه لاني استخدمت هذا الاسلوب مع زوجي لتغيير طبع فيه يعني الحاجه اللي كنت تضايقني منه صرت اسويها حتى لو ما تعجبني وهذا الا سلوب ممكن نستخدمه بمواقف كثيره اضرب مثال : اول ما تزوجت كان عند زوجي مجموعه كامله لمسلسل اجنبي يعيد فيه لدرجة اول ما يجي من الدوام يشغله ولما يصحى يشغله كل وقته بالبيت يجلس ويشغله ولانه مو مترجم وانا اساسا ما اهتم بهالاشياء وحسيت ان الموضوع زاد مرت سنه وهو يعيد فيه مليييييت انفجرت ......شي مو طبيعي وعذره يقوي لغته ؟؟؟؟ المهم بعد ما استنفذت كل المحاولات قررت اتابع بطريقتي اول ما اجهز الغدا بدل ما استقبله اشغل دفي دي واجلس مو مهم افهم بس اندمج ههههه واضحك وامدح الشخصيات واشغلت نفسي بنفس طريقته مع الاختلاف اني اعلق على الشخصيات الرجاليه ا كثر-كيد النساء - واخيرآ وبعد معناه لاكثر من عامين قرر انه يكسر كل المجموعه وانا اتلذذ بالنظر الى الدفي دي وهو يكسر واحد ورا الثاني وتمنيت اشاركه بس رفض هههههه درس ممتع وفي انتظار المزيد وشكرآ |
هههههههههههههههههه
مرحبا اختي مبرووك تغير زوجك للأفضل بس اللي اكتشفته ان الزوج ما يتغير الا اذا تكسر خشمه صح؟ اقولك ليش كان زوج اختي دايما يضربها واخر ضربه كانت القاضيه زعلت وجت عند اهلي المهم ما نفع فيه برضو كل يوم والثاني وهو عند الباب يهدد ويتوعد واخواني يحاولون يتحاشونه احتراما لعياله بس ما نفع فيه وجا يوم وجايب حديد مفصله تفصيل وفيه سلسله بيضرب اي واحد يطلع من البيت طلع اخوي وكان بيروح الدوام المسكين اخوي ما كان يدري عنه ماسك الكوفي حقه وبيركب السياره الا هذا طالعه ويضرب فيه وبالصدفه اخوي الثاني راجع للبيت يا خذ اشياء الا المضاربه حاميه فدخل المعركه يدافع عن اخوي وضربوا زوج اختي ضرب وكسروا خشمه وسحبوه على وجهه بالشارع وركبوه سيارته وبعدها صار زي الألف بس اختي ما رضت ترجع له وسلامتك |
بارك الله فيج
فعلا الواحد اذا يبي يغير العالم حوله لازم هو يتغير بالاول موضوع مفيد جدا |
الله يعطيك العافيه
رغم اني ارى سبحان الله لكل رجل برمجه خاصه تستطيع الزوجه الحاذقه الولوج اليه ومعرفة مفاتيح مهمه في هذا الانسان . فالرجال والنساء هم مختلفين في تركيبتهم . ولكل منهم خلق عجيب فسبحان الخالق . |
اقتباس:
حياج أختيه ودوم هالضحكة ^^ جمييل جدا إنج مطبق الدرس عملي خخخ وشايفه النتيجه بعينج شعورج يوم كسر الدفي دي هو شعور الإنتصاااااااااااار فعلاً شعور رااااااااااائع لا يوصف .. نفس الشعور يوم شفت ريلي غارق في دماءه ^ــ* وتسعدني متابعتج لدروسي .. |
اقتباس:
|
اقتباس:
هيه صحيح التغير منبعه الأساسي من النفس ثم من المحيط .. |
اقتباس:
|
اندسيت في موضوعك أختي وتراني ليسا ما تزوجت أدعيلي أني أرزق بالزوج قريب يارب وكل البنات :14:
موضوعك حلو وطريقة السرد جميله جدا ومشوقه وخصوصا أني أحب اللهجة الاماراتية فعلا التغيير يبدأ أولا من الداخل ثم فهم شخصية الطرف الآخر الوالدة الله يحفظها دائما تقول لكل رجال مفتاحه ومن المهم معرفه نوع المفتاح لانه طبيعي يختلف من شخص لأخر الله يبارك في حياتك ويعوضك بطفل صالح تقر فيه عينك |
| الساعة الآن 04:21 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©