|
الثعبان ضاع في البيت
السلام عليكم ورحمة الله وبركاته
عند أهلي ثعبان على أساس يربونه ماجلس كثير أحضروه وفي نفس اليوم الخادمة سهوا منها تركت بابه مفتوح وفي الليل مالقوه في مكانه طبعا طلع على البيت لأنه كان في غرفة أخوي البيت كبير جدا وكله أثاث ودواليب وزوايا ممكن يختبئ فيها لونه بيج مثل لون الكنب والسيراميك وهذا مصعب الموضوع أكثر الثعبان كل شهرين لازم يروح للطبيب عشان يقتلع له أنيابه اللي من خلالها يطلع السم ولو طول أكثر من كذا يكون سام وللإحتياط نشيل الأنياب قبل الشهرين من وهي صغيرة مدري و الله إذا عندكم حل ولا لا أول حل أنا أقترحته على أهلي يكلمو حديقة الحيوان وهناك في مربي خاص بالثعابين قلت لهم يستشيروه لو عنده حل منتظره ردودكم |
ما ادري وش علاقة الموضوع بالعلاقت الاسرية والاجتماعية بس يمكن وضع مصيدة في المكان المتوقع وجوده فيه فسيخرجه الجوع ليلاً والثعبان يعتمد على الرؤية الحراية للأجسام هذا إذا كان ما يزال في المنزل..
|
متى اخر مرة قلعتوا اسنانه ؟
لو من زمان ، فمن جد لازم البيت تفضوه و تجيبوا أحد يصيده .. لإنه سمه ممكن يموت أحد لا سمح الله بس لو من قريب فمافيش خوف من سمّه إن شاء الله ، فحاولوا تجيبوا ( فار أو طعم له ) .. و تصيدوه أحد يربي ثعبان يا سمو الأميرة .. أذبحك ؟ :( |
اقتباس:
ايش اسوي مالقيت منتدى للثعابين الهاربة :d قلت المشرفات ينقلوه للمكان المناسب بالنسبة للجوع الثعبان مستعد يعيش شهرين بدون طعام وشراب هذا اللي سمعته دمت |
اقتباس:
بالنسبة لأسنانه دوبنا اشتريناه ولا ادري اخوي وداه للطبيب ولا لسه مو راضي يقول وكل شوي يقول تطمنو تطمنو الله يستر وعلى قولك احد يربي ثعبان هذولا الشباب الله يهديهم مشكورة |
إذا انتم مقيمين في مدينة الرياض فيوجد سوق للحيوانات والطيور وألسماك عند تقاطع شارعي الملك عبدالعزيز والضلع الجنوبي للطريق الدائري اسمه سوق الحمام.
وستجدون هناك من يعرف يتصرف معاه |
لا أعلم لماذا يحب البعض مثل هذه الهوايات الغريبة على الرغم من مخاطرها ..
أعتقد أن عزف الموسيقى قد يخرج الثعبان من مخبئه .. مع أن الموسيقى محرمة شرعا لكنها ضرورة في مثل حالتك ، والله المستعان . |
اقتباس:
للأسف مو في الرياض شكرا |
ذكرتيني باختي كانت تبكي تبي تربي ثعبان و لما منعناها قالت طيب عنكبوت (هذاك الاسود الكبير اللي كله شعر وععع)
ماسكتت الا لما جبنا لها سمك و بالاخير ماتو :) الحمدلله ماسمعنا كلامها اختي .. مالكم الا الطعم ... لو البيت كبير وزعوا مثلا 4 و لا 5 على البيت كله و اتركوا البيت من الصبح للمساء يوم كامل لعل و عسى انه يتطمن و يطلع و ان شاء الله يستدل علي اقرب طعم و ان شاء الله تمسكوه بس صدق لو مكانكم ماقدر اقعد بالبيت دقيقة اخاااااااااااااااااااف الله يعينيكم طمنينا |
حبيبتي
انتم تعرفون افضل اكله يحبها يعني اكيد اذا راى اكله المفضل !! فمابتحمل ع مااظن كلفار او او الخ ...... وش هلتهور تربون ثعبان اعوذ بالله ! لو اني جارتكم كان هجيييييت . |
و عليكم السلام ورحمة الله وبركاته
والله هوايه من جد غريبه انا اعرف الناس تربي بغبغانات تربي طيور كناري تربي غنم اذا مره ثعبان ؟ هذي جديده بصراحه أول مره يمر عليا موضوع كدا بس انا عندي لك فكره شوفو الثعبان ايش يحب ياكل وحطوه له في الصاله او في مكان مفتوح كبيره يسهل الامساك به اذا طلع وان شاء الله مايضر احد من أهل البيت لأن الثعبان سمه قاتل الله يحفظكم منه يا اختي سمو الأميره ويحفظ اهلك |
شكرا لكل من شارك بموضوعي
اخر الأخبار للان مالقيناه وأخوي كلم واحد خبير وقال له يجي ويطلعه ب 800 ريال وأنا قلت لو مالقيناه نجيب خمس عمال ونفضي غرفة غرفة في البيت لين نحصله دعواتكم |
اقتباس:
أخوي يحب الثعابين وقبل كذا جاب ثعبان للبيت وأبوي طرده هو والثعبان :d وقال له وين احنا بأفريقيا تجيب لنا ثعابين وهذه المرة الوالد مسافر وجابه ومكتوب له وطلع من بيته وابوي قالب الدنيا يقول طلعوه من تحت الأرض |
انا اشوف انو في سو تفاهم بينكم وبين الثعبان ولا في احترام متبادل يجب ان يعطى كل واحد من الاسرة دوره وحترامه سوا الثعبان او اي فرد في البيت لذاللك اقترح عليكم
ان تبحثو عنه في اي مكان في البيت شبر شبر وزنقه زنقه ولاتتركو فراغ وبعد ماتلاقوه تقدمو له هديه قيمه لا ادري عن افظل هديه يحبها الثعبان لكن انتم ادرى بحكم معاشرتكم له واهم شي حسن المعامله في المستقبل اتمنى لكم حياة اسريه سعيده |
لقيت الحل
الهنود عايشين ببلادهم بين الثعابين جيبوا أربعة هنود وعطوهم 50 ريال لكل واحد وهم يتفاهمون معاه وأنا مية إذا نجحت الخطه واتوفرو 500 ريال |
ههههههههه هنود من وين هتجيبم اقلك اعميلي الواطعمة الي بيحبها ونفس الوقت اعملو مصيدة الو .في حد بيربي تعبان ده جنووووووووووووووووون .الثعبان بيكون الو اماكن خاصة مش في البيت
|
من جد هواية غريبة ومخيفة جداااااا بس فعلا صارت منتشرة عندي طفل يوميا يجي يحكي عن الثعابين والحيوانات المفترسة ابوه من عشاق تربيتها بس 800 ريال افضل ولا يطلع لاحد ويسوى مشكلة لو دا اخوية اطردوا من البيت:29:
|
لا حولا ولا قوة الا بالله
والله اقشعر جسمي.... ثعبان..... ماني مصدقا ما ابغى اخوفك يا سمو الأميره، بس في قصه صارت في مدينتنا هنا كان في رجال سافر على احدى دول افريقيا و جاب معه ثعبان اناكوندا بس لسه صغير رجع على هنا و ما طلب تصريح ولا وداه للكشف بس شال منه انيابه قبل لا يجي المهم انه عنده طفل عمره 3 شهور، و بالعاده هو يحط الثعبان في في صندوق محكم و في يوم كانت الأم حطت الطفل في سريره و راحت تخلص أمورها و زوجها نسى يسكر الصندوق الثعبان طلع و ماحد حس فيه و دخل للطفل التف عليه الين ما الطفل مات و ماحد داري عنه على بالهم انه نايم و بعد تقريبا ساعه الأم راحت تشوف طفلها و طبعا تخيلو موقفها من الصدمه الزوج الحين في السجن و صارت ضجه كبيره عن الموضوع هذا ان شاء الله تلقوه بسرعه و ما يصير لكم شي لو أنا مكانك والله ما قعدت ولا ثانيه |
اقتباس:
صراحه رد لطيف ظريف :d وعن طريقه ممكن تلاقوا الثعبان بطريقه وديه ويرجع يعيش كما كان !! ياناس ثعبان بالبيت، الله المستعان طمنينا اذا وجدتموه . |
سمو الاميرة..عنجد الله يسامحه أخوك..هذي مش عملة.
برأيي خلوا الخبير يجي ويصيده وفداكم 800 ريال ربنا بعوّض..وخلوا أخوك اللي يدفع خليه يتحمّل عملته ويحرّم يعيدها. |
ثعبان ؟؟؟
كيف تنامو في البيت وهو ممكن يكون موجود فضو البيت جيبو عشرين عامل يقلبون البييت فوق تحت الى ماتلاقوه هذا ثعبان مش عصفور وحتى لو الانياب خلعتوها الثعبان ممكن يلف جسمه على الضحية الى مايجيب اجلها ما ابي اخوفك بس لازم تاخذو حذركم طمنينا عليكم |
الله يعينكم بعض الشباب الله يهديهم تصرفاتهم غير محسوبه
طمنينا إن شاء الله لقيتوه |
ياحظكم عندكم ثعبان ولونه بيج بعد هاذا أحسن لون وأكيد عيونه دائريه وملمسه ناعم وجسمه بارد جدا أحسن شئ لماتمسكه وتلفه على ذراعك يطلع له منظر كأنه إكسسوارت
ياليتني عندك وأنا بنفسي أدور عليه وأطلعه بس بشرط إن حصلته أشيله ليه ماعاد لكم دخل فيه أنا بصراحه في مره رحت أتمشى في مهرجان أبها الصيفي وكان عندهم محل أتوقع إسمه بيت الثعابين دخلته أنا وأخوي وعيالي وزوجي دخل معانا وهو يتلفت يمين يسار بصراحه شفت ثعابين أشكال وألوان تهبل وفيه ثعبان لونه أبيض فاتح مره إسمه ثعبان تكساس شكله يجنن وتصورنا معاها وفيه ثعبان كان مطلعينه لناس برى القفص أعطانا الهندي وأ خذناه ولفيناه على أكتافنا ويدينا ورقابنا وهو في قمة الأدب وحنا في قمة الفرح وزوجي في قمة الخوف وهاذيك اليله مانام زين كل شوي وفز من على كرسي النوم يقول كل ما أغمض عيني أتخيل الثعبان على يديني ورقبتي رغم إنه ما قربها ولا جاها دخلناه المحل معانا بالقوه . وترى يا إخواني لاتستغربوا فيه ناس عندها هوايات والثعابين حلوه أهم شئ تكون مؤدبه ولاتدوسها أو تضغط عليها بقوه علشان ماتأذيك بالنسبه لكم يا أختي ثعبانكم دوروا عليه في خلف الأبواب عند التقاطعات الخشبيه إلله تجيك على الباب من برى مثل البروازحاولو تشوفوا تحتها وكمان شوفوا تحت الثلاجه لأن الثعابين تحب الأماكن البارده وشوفو اتحت غسالة الملابس وفي أدراج المكتبات وفوق رؤس الدواليب وخلف المرايات كمان إستخدموا التصفير لأن الصفير يطلع الثعابين من مكانها ولو عندكم فرشات زوليات شوفوا تحتها أي شئ معدني شوفو خلفه لأن المعدن يحتفظ بالبروده تلاقونه تحتها كمان فيه تحف ومزهريات شوفو بطنها من الداخل الثعبان إذا إختفى في مكان مستطيل تلاقيه يمتد ويلزق في هالمكان بالذات خلف سواتر الأبواب والنوافذ وإذ جاء في مكان مستدير وواسع يطوي نفسه بشكل دائري أو حلزوني ويكون موقعه في زوايا هاذا المكان الثعبان يسمع فإذا إستمع بأن في المكان ضجه فإنه لايطلع بسهوله لاكن إذا كان البيت هادئ فتجده يطلع من مكانه ويتحرك فأنتم حاولوا أنتي وأخوك بعد ما أهلك يناموا سكروا التلفزيون وخلوا الإضاءه مشتعله وإجلسوا في مكان هادئ ويكون كاشف على جزء كبير من داخل البيت يعني موقع إستطلاع وراقبوا بدون سوالف وبدون حركات ولا إصدار أي ضجيج خلوكم سكتم بكتم وناظروا بس أرجاء البيت وإن شاء الله يطلع حنا كنا ساكنين في قريه وكان في بيتنا حوش وكنا نلعب بالحوش الصباح أنا وإخواني وفجأه طلع لنا ثعبان أسود وكبير ودخل في فتحة كانت عباره عن شق في الجدار والمكان ضيق حاولنا أنا وأخوي نطلعه ماقدرنا نطلعه جبنا كل شئ وحاولنا ماطلع رجعنا جبنا إسطوانة الغازوأخذنا اللي حق الأنبوب إللي ينشبك في الفرن وحطينا فتحته في نفس الشرخ إللي بالجدار إللي فيه الثعبان وفتحنا إسطوانة الغاز فصارت الريحه حقت الغاز داخل الشرخ وماكملنا 5 دقائق إلا والثعبان طالع يكح يكح هههههه والله إنه طلع يتخبط كأنه سكران وأخذنا العصى أنا وأخوي وضربناه حتى إختفى بين التراب رجعنا ندور وراه حصلنا قطعه قطعه بس جلسنا نحاول نطلعه من الجدار من الساعه 8 حتى الساعه 12 الظهر وماطلع أخر شئ كتمناه بريحة الغاز وطلع غصب عنه طبعا هاذي تجربه قديمه وحينها كان عمري تقريبا 15سنه الحين صارت ذكريات أحكيها لعيالي قبل النوم ياسموالأميره لوحصلتوه تكفين صوريه ونزليه هنا في هاذا الموضوع نفسي أشوف صورته إذا ماكان عليك كلافه . |
بنت الحكمي شكرا على ردك
الصورة عندي هم صوروه أول ماجابوه وبعدها هرب بس خليهم يلقونه وأحط لك الصورة وبعدين أنا من يومها مارحت لأهلي مستحيل أروح لهم الا اذا لقوه مقدر أخاف منه مرة مرة حتى أخواتي وأخوي المتزوج محد راح يروح والثعبان يجلس بدون أكل سنتين أقرؤوو عنه في النت كذا مكتوب وكل ماجاع الثعبان كل ماتغيرت سلوكه وصار اشد شراسه وعنف ويحارب اللي قدامه بدون رحمة أخوي يقول انه من النوع اللي مو سام وصديق الإنسان ومائي يعني ماياكل الا أسماك وإحنا نقول إن شاء الله حبيب الإنسان مانضمنه أمس كلمتهم وسوو له فخ وحطينا له تونه وحوالينها زييت عشان ياكل التونه ومعد يقدر يهرب من الزيت ويارب تفيد واليوم راح يجيبو قنفذ لأني قرأت إن القنفذ عدوو الثعبان وبخرنا البيت بالرشاد يقولو يطلع من الرشاد والله كريم نشوف اليوم ايش راح يصير |
ثعبان:d
وبنت الحكمي تتغزل فيه :25: :24: |
أبشررررررركم جمييييييييعا
بفضل الله وبحمده ثم بفضل دعواتكم لقو الثعباااااان بعد كل المحاولات السابقة وزاد عليها أخوي وجاب صمغ فيران وحط له طعم ومافاد ولا شي وفجأه لقوه ملتف حول باب المطبخ ويصرخ آخوي الثعبان الثعبان الثعبان يالله لك الحمد وأخذه هلى طول وراح يبيعه وأبوي مو مصدق وقال والله لآذبح صدقة عني وعن أولادي أتوقع سبب خروجه وتجوله في البيت ريحة التونة اللي في المطبخ وبخور الرشاد الحمد لله ماكنا متوقعين ابدا نلاقيه أشكركم أشكركم جميعا أعضاء وعضوات |
الحمد لله على سلامة الجميع لانكم وجدتم الثعبان .والان تستطيعين الذهاب لزيارة اهلك .وان شاء الله يكون درس لاخوك :d:dويعرف يختار هوايته ونوع الحيوانات اللي يمكن تتربى او تستطيع التاقلم في البيت
|
سمو الأميرة
كنت متابع باهتمام الحمد لله على سلامتكم وجزاك الله خير على دعائك وشكرك بس خسارة ما لحقتي تصورينه لبنت الحكمي وليت أخوك ما استعجل بالبيع يمكن بنت الحكمي تدفع أكثر. ولعلك تكتبين ما يستفاد من الموضوع عشان الفائدة. |
توني دخلت الموضوع
ورجعت لي روحي في ردك الاخير فحمدالله علي سلامتكم |
الحمد لله ع سلامتكم
واخوكم هذا ان دخل مره 2 بثعبان فقولي لاابوك اطرده هو وثعبانه للمره ال2 ! |
الله يجزاكم خير ومشكورين
اتمنى من المشرفات عدم اغلاق الموضوع لأني بحط صورته لكن امهلوني شوي جهازي ابل وماأعرف كيف انقل الصورة من جوالي النوكيا للجهاز معليش انتظرو شوي راح أحاول اليوم إن شاء الله |
|
والله شكلو مرررررره مفزع:23: بس الحمدلله انو اتمسك وافضل قرار فعلا البيع:22:
|
الحمد لله على سلامتكم
صراحه قصه لطيفه ومفيده خصوصا ايام الصيف تكثرالثعابين وممكن تدخل بيوت الناس وتضيع في البيت . ففي الموضوع فائده وفي الصورة ايضا . سبحان الله وقانا الله شرها دنيا وآخره |
موضوع يخوووووووف بصراحه وشكل الثعبان :(
انا اخواني مره جاوب ظب ومسبب لي ازمه كيف ثعبان ؟؟؟؟؟ بنت الحكمي ههههههه شكلك مفتووونه بالثعبااان |
اقتباس:
بالله هذا لونه بيج :29: كنت مستنيه شي مره فاتح مايل للون الخشب و يلمع<< بغيت اسوي من جلده شنطه :d المهم الحمدلله على سلامتكم و تخيلت شكل اخوكي ميت خوف عليكم و ضميره يوجعه لأنه السبب اللي صار بيكون درس و عقاب له ان شاء الله ابدا ما راح يكررها بنت الحكمي والله موتيني ضحك لوهله حسبتك توصفي جواهر :d |
شكله مره يخوف:(
اتوقعته مره كيوت وجذاب:d والحمدلله إنكم لقيتوه.. |
بنت الحكمي والله انك ضحكتيني
الله يسعدك والحمد لله على سلامتكم ياختي سمو الاميره بس عسى اخوك ينتصح ((ومنظر ثعبان اخوك قعشر جسمي)) بالنسبه لموهبة اخو سمو الاميره فهي تشبه موهبة اخي الكبير طبعا الكلام هذا زمااااااااااااااان ايام المراهقه والجنان كان يحب اشياء زي كذا مره جاب لنا ضب صغييييييييييير كنه سحليه وقعد يخوف فيه اختي الكبيره:23: ومره جاب لنا ضب كبيييييييير وشكله من جد مرررررررررررررعب:24: وكان اخوي يمسكه بكل شجاعه:11: طبعا انا ماكنت اقرب منه او حتى المسه وفي يوم اخذه اخوي للسطوح وربط رقبته او ذيله مااذكر الموهم ربطه بحبل ونهاية الحبل كانت مربوطه ب ماصورة مويه اليوم الثاني اتوقع طلعت انا واخواني عشان نشوف الضب ونشوف وشهي علومه واخر اخباره المفاجاه مالقيناه ندور يمين يسار يمين يسار برضه مالقيناه بالاخير راح اخوي راعي الضب وطل من فوق السور وراح يطالع على الاسفل باتجاه الحوش لقى الضب المسكين ميت بالاسفل والحبل مربوط فيه ومين طلع السبب اخوي الصغير طلع وفك الحبل عنه(لقافه):25: من جد حزنا عليه هذا احدى غرائب اخوي الكبير (حبه للضبان) والادهى والامر انو فيه ناس تاكله:30: سمو الاميره انصحي اخوك لاعاد يعيده مو كل مره تسلم الجره |
الحمد لله على سلامة أهلك...الصراحة شكله يخوّف.
|
الحمدلله على سلامتكم جميعا أختي سمو الأميرة..
لي تعليق أرجو أن تأخذيه بعين الاعتبار... أنظروا في أمر خادمتكم بكثييير من الحذر.. ترك باب قفص الثعبان مفتوح.. أمر لا يمكن التغاضي عنه ولا يحتمل فكرة مجرد تصديقه.. أخاف أن يكون مؤشر خطر لسلوكها الذي أشك في سلامته.. وسلامة نواياها. أرجوكم إحذروا.. رسالة مع اقتباس"للشهيرة مثلاً" لخادمة بيت الوالد.." عزيزتي خدامة بيت والد سمو الاميرة.. بخصوص إنك نسيتي تقفلي باب قفص الثعبان في الليل:28:.. نفهم إنها مغامرة ليلية عابرة مع الأخ ثعبان أم هو زواج مسيار طويل التيلة مثلاً" :25: للتوضيح: المقصود بالتيلة هي وحدة قياس سماكة الخيط ورفْعُه كأخينا مقطوع الذنب.. ويستخدم مصطلح التيلة لوصف نوع خاص من القطن المصري... ذكرت التوضيح للدعابة لا أكثر.. |
| الساعة الآن 01:14 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©