|
المصروف الشهري للمرأة المتزوجة...نقطة اختلاف.
بسم الله الرحمن الرحيم,,
أخواني وأخواتي السلام عليكم ورحمة الله وبركاته : أنا أقول 700 في الشهر ..وهي تقول تبي 1500 ريال شهرياً. الحقيقة أنا قلت 700 ريال فقط من رأسي من دون حسابات دقيقة لأني ما أدري وش صرفيات الحريم الضرورية وكم قيمتها ...وفي نفس الوقت ما أبي أظلمها .. وهي أيضاً طخت المبلغ ..وما أدري عنها كان مسوية حسابات في رأسها أو لا . .فكم تتوقعون صرفية المرأة المتزوجة شهريا على أمورها الخاصة من لبس و فاتورة جوال وووو؟ تحياتي. |
بسيطة ;)
اسألها عن احتياجاتها وحددا البنود التي يفترض أن يغطيها المصروف .. والبنود الأخرى التي يفترض ان تغطيها أنت بعيداً عن المصروف .. واتفقا على المبلغ بحيث لا تستكثره أنت ولا تستقله هي. |
اقتباس:
شكراً أختي مهره .. هي مو مشكلة ....بس حبيت أنا أعرف كزوج أراء النساء في قيمة المصروف الشهري للزوجة ..بحكم أهل مكة أدرى بشعابها ...يعني ماهي الاحتياجات الطبيعية للمرأة المتزوجة من وجهة نظركن أيتها النساء ؟؟ وبعد ذلك يسهل تحديد قيمة المصروف الشهري. تحياتي |
سأتحدث عن نقسي..
زوجي ربي يحقظه خصص مصروفاً شهرياً لي وللصغيرين قدره 5000 درهم. هذا المصروف يغطي احتياجاتنا الخاصة: الجمعية أو السوبر ماركت + الملابس + بعض احتياجات المدرسة غير المكلفة التي قد تُطلب خلال العام الدراسي+ فاتورة هاتفي + مستحضرات التجميل + الصالون. طبعا أقصد بالملابس الاعتيادية التي تستخدم في الأيام العادبة وطبعاً يندرج معها العباءات والحقائب والأحذية أعزك الله . أما ملابس المناسبات فزوجي يغطيها وحده .. وأحياناَ إن كانت غالية زيادة عن اللزوم نتشارك في ثمنها. |
وكم من وجهة نظرك الاحتياجات الخاصة بالمرأة فقط ...من غير الأطفال ومصاريف الدراسة ومصروف العزبة ؟
|
والله يا أخي لا أستطيع أن أقول .. فما يكفيني قد يكون كثيراً لغيري .. وقد يكون قليلاً.
مثلاً هناك فرق بين من تفصل عياءة بـ 300 أو 400 درهم .. وبين أخرى تفصلها بـ 700 أو 800 . وهناك فرق بين من تشتري حقيبة بـ 200 أو 300 درهم .. وبين أخرى تشتريها بـ 1000. وهناك فرق بين من تذهب للصالون مرة واحدة في الشهر مثلاً .. وبين من تذهب أكثر من مرة خلال الشهر. وهناك فرق بين من تشتري مستحضرات تجميل معتدلة السعر .. وبين من تشتري ماركات غالية. وهناك فرق بين من تستخدم الهاتف بشكل محدود بحيث تكون قيمة فاتورتها قليلة .. وبين من تثرثر طوال الوقت ;) فتكون قيمة فاتورتها عالية. لذلك قلت لك اسأل زوجتك.. فهي أعلم بحالها وما يكفيها. وطبعاً يفترض أن تراعي كيف هي الأسعار عندكم وما إن كانت معقولة أم غالية. |
الأخت الكريمة مهره شكراً على المشاركة ...
ولكن أيتها الأخوات الكريمات : ماهي الحدود الطبيعية التي لا إفراط فيها ولا تفريط بالنسبة لاحتياجات المرأة ؟ ومن خلالها كم تقدرون المصروف الشهري؟ يعني مثلاً : هل ترون أن الذهاب للصالون مره شهرياً كافية وثلاث مرات مبالغ فيها مثلاً. |
السلام عليكم اخوووي اذا انت تغطي مصرووف البيت كامله (مثل عزبه فاتورة كهرب الى اخره ) فمااذا تصرف زوجتك 1500 شهريا اذا انت مستطيع ماديا فانا ارى 1500 شهريا فوق المعدل انا اشووف 500 ريال كاافيه للمرااه الي ماعندها ااي اللتزامات لاكن انت شووف وضعك وشوف اللي تقدر عليه انت من تحدد كم تعطيها شهريا انا عن نفسي بعض الاحياان اعطي زوجتي مصرووف وشهر ماعطيها على حسب الامكاانيه شهر 200 شهر 300 شهر 400 شهر اعطيها زفه هع هع لاكن 1500 والله واجد علي اني اعطيها شهريا وهي كل شهر بترووح السووق ولا ترووح تشتري عبااه جديده ولا كل شهر ترووح الصالوون هذي مصيبه والله انا اعطيها كسووة العيد 1200 ريال لها |
والله صعبه نحدد لك -
هناك عدة امور تتدخل في امر المصروف 00 على سبيل المثال - هناك مجتمعات ما يكفيها 10000 مصروف للمرأه وبعضها 500 تكفي وزياده هناك عدة بنود ضروري نضعها في الإعتبار00 اهم نقطه _ معدل راتبك بيتك إيجار ام ملك احتياجات الزوجه الضروريه عدد الأطفال ( يمكن نشيلها من الحسبه ) اللهي عندها طفل مو مثل اللي عندها ثلاثه او اربعه المحلات اللي تتقضى منها زوجتك غاليه - رخيصه - متوسطه ( جدا ضروري ) مستلزمات المطبخ - من قدور وملاعق وغيرها ( هذي ضروري يكون صرفيه لحالها ) لإنك دائما تحتاج المصروف بينصرف على ماذا ( بمعنى القائمه ) من ملابس إلى العلكه - له دور كبير تعرف اللي لك واللي عليك وغير هالبنوووود الكثييير _ من تذهب للكوافيره _ من تنظف بشرتها _ من ومن ومن وهذا شهريا ( والحمدلله لست منهم !!) مثلا - لو المها سنها وبتروح الدكتوره _ من راح حيدفع انت ام هي صينية شوكولاته للإرتباط إجتماعي _ مين حيدفع ::::: وقيس على ذلك ادوشت راسك ::: يمكن موصيتني زوجتك **** |
1500 حلوه
معقوله ترى يادوب تكفي شوف اسعار المشاغل الملابس التجميل وعلى حسب انت كم راتبك راتبك 3000 عطها 500 راتبك 6000عطها 1000 راتبك 8000 عطها 1500 راتبك 25 الف عطها 5000 يعني هذي زوجتك لاتبخل عليها وبعدين النفقه واجب على الزوج كما ورد بالقران (الرجال قوامون على النساء بما فضل الله بعضهم على بعض وبما انفقوا من اموالهم ) |
أشوف 500 ريال تكفي و زيادة للمرأة المتزوجة،.
إذا كانت مجرد مصاريف المرأة من دون الأطفال و من دون مصاريف المنزل و هناك نساء ما ياخذوا مصاريف شهرية، لإنه زوجها يتكفل بجميع متطلباتها |
يوم اني صغيره ببيت اهلي وادرس المتوسط امي الله يحفظهاا كانت تعطيني 500 بشهر
هدا كان مصرووف المدرسه واغراض المكتبه وووووو وكانت تكفي وزياده ويوم دخلت الثنوي زوجي خصص لي 700 ريال وكانت تكفي الحمدلله مابالك بوحده متزوجه وتحب تهتم بنفسها اكثر؟؟ الف وخمس ميه مناسب جدا مافيها لا افراط ولا تفريط بالعكس |
طيب خلها ألف. .
بين وبين. . نورين. . لبى قلبها سمية بنتي ;) |
ما ادري بكم تقدرون 700 الريال
بعملة الدينار تبعنا بس لوكان مثلا 700 دينا ر كمصروف شهري فهدا مو كافي لتغطية حاجياتي لكن الراجح ان1500 دينار تكفيني مع مراعاة الاقتصاد في المصروف.. |
ولكن أيتها الأخوات الكريمات :
: هل ترون أن الذهاب للصالون مره شهرياً كافية وثلاث مرات مبالغ فيها مثلاً.[/QUOTE] ارى انه الامر المبالغ فيه الروحة عند الكوفيرة ثلاث مرات بالشهر مثلا ا عاملة اشتراك عند كوافيرتي فهي تجيني مرة بالشهر حق الاشتراك عندها ومرة بالغرة حين تكون عندي مناسبة وكوني كوفيرة فغالبية الايام اعمل تسريحاتي بايدي |
اخوي عطها اللي ربي يقدره لك مراعي بذالك مقدار راتبك والتزاماتك بالشهر مثلا لنفترض ان راتبك 5000 ريال شهريا خصص لها 700 ريال ان كان لديك التزامات في هالشهر مثلا فواتير غاليه مقاضي البيت ايجارات ومالى ذالك... وان ماكان عندك التزامات في شهر ما زد من مصروفها للالف ريال او ماقدرك ربي عليه ،،
موفق . |
أنا أشوف 500 ريال معقولات جدا
لأنه العباية مو كل شهر و الصالون مرة في الشهر طبعا بدون فاتورة الجوال و الأولاد |
قدره على حسب راتبك فمن راتبه 5000 يكون 500 وهكذا
واذا كان هناك اطفال يزيد ومصروف البنات غير الاولاد |
على حسب احتياجات المراه
وبصراحه المراه ماتنتهي متطلباتها وبالنسبه لي الى امس وانا وزوجي متناقشين على مصروفي اللي مايعطينياه الا وقت الاعياد حجة ان ظروفه ماتسمح مع اني اذا قلت له محاتجه لبس لي او لبناتي يقول ماله داعي اي شئ احتاجه يقول ماله داعي ... اش اللي له داعي ؟؟ ماااااااادري ؟؟ الله يصلحه ويهديه ويرزقني |
السلام عليكم بصراحه اخوي انا زوجي راتبه 7000 ويعطيني راتب 200 بالشهر انا والله كل شهر اسويلي شغله حنا مو كل شهر نروح المشغل ومو كل شهر نشري ملابس على حسب يعني لو عطاني 500 بصراحه راح اكون راضيه رضا تام هذا انا لوحدي بس اذا فيه منا سبه زواج او عيد او اي مناسبه لي مصروفي الخااص الي يكفيني وطبعا فاتورة الجوال هو الي يسددها ولو يعطيني 1000 كان عطيت خواتي ههههههههه
|
أخي الكريم اذا ظروفك تسمح لك أن تعطي زوجتك 1500 فاعطها هذه زوجتك يا أخي وأم أطفالك فلا تبخل عليها .. واسخ عليها فهي تستحق والله بل هذا أقل شي يقدمه الرجل لزوجته اما اذا ظروفك لا تسمح فأعطها 1000 أو 800 |
من رأيي 1500 ريال يعني بما يقارب 150 دينار كويتي كافية للمرأة بدون مستلزمات الاطفال
بس 700 أشوفها قليلة الله ييسر امركم |
يعتمد على حسب ظروفك المالية
وحسب طريقتها في انفاق المال إذا كنت ممن وسع الله عليه في الرزق ، وكانت زوجتك عاقلة في انفاق المال وتضعه في مكانه المناسب ، فلا تخف ، اعطها وأنت مرتاح ، وسترده عليك إن احتجت .. أما إن كانت من النوع المبذر الذي لا يعرف قيمة المال فبامكانك تنبيهها وسؤالها عن حاجاتها لتقيمها حسب امكاناتك . هذا رأيي والله أعلم . |
انا شخصيا...حددت لنفسي مصروف 500 ريال شهري مع ان راتب زوجي كويس بس انا محدده هذا المبلغ لانه بيكفي مصاريفي الاساسيه وبيزيد احيانا
مصاريفي الشخصيه والاساسيه... صيدليه...مره كل شهر 70 ريال بالكثير تمشيه مع اخواتي مول او ملاهي مره كل شهر250 ريال انا وبنتي واحيانا بشتري شغلات بسيطه حقت بيت ماتكلف كثير وبالنسبه للبس ومكياج وعبايه وعطور هذي بيتكفل فيها زوجي لاني مو معقوله انا كل شهر ابي اشتري لبس ومكياج وعبايه..ولا اروح صالون اكثر ن مره في الشهر ...والجوال زوجي بيحط 100 ريال في الحساب شهريا وماشي زي الفل ماعمره فصل..وانا من النوع الي مايشتري عل طول يعني اوفر لوقت المناسبات مثل عيد او حفله او زواج...بروح اشتري شي غالي و ممتاز وحلو..ونطلع انا واولادي الاثنين باحلى لبس للمعلوميه التماشي والسوبر ماركت زوجي هو بتكفل فيها من والى..ومصروفي لاغراضي الشخصيه الاساسيه فقط..وانا بصراحه مادخلت مزاجي حكاية المصروف هذي..لان احيانا يمر الشهر ومااحتاج شي ابد واحب اذا احتجت شي اطلب...بس زوجي قال لازم مصروف .. وانا استغرب من الي مصروفها 1500 واكثر..الا اذا كان لها ولعيالها اكثر من ثلاثه اولاد ممكن واعرف وحده من قريباتي ارغمت زوجها يعطيها 1000 ريال طبعا تصرف 500 ريال وال 500 ريال الباقيه تخليها عندها لليوم الاسود على قولتها يعني تجمع وزوجها مايدري عنها وآخر السنه تطلع 6000 ريال وحتى لو احتاج زوجها في يوم من الايام تطلعها له لانه فلوسه على حد قولها_عجبتني فكرتها.. |
ناقشها واعرف ليه طالبه هالملبغ
متطلبات الحريم تختلف من وحده للثانيه ولاتعمم |
اساسا راتب الزوج كله للزوجه ..اكل ولبس واغراض يعني كله لها هي وعيالها..وهو شريك معهم..وماياخذ من راتبه غير حق البنزين وفاتورة الجوال والباقي كله مشاركه مع العائله..
انت جب ورقه وقلم وخلها تكتبلك مصاريفها الاساسيه فقط من غير فاتورة الجوال.مثلا_صيدليه_طلعات مع اخواتها_..وفاتورة الجوال انت كرجل مسؤل عنها..واحسب انت وهي وشف كم تحتاج..واذا جت مناسبه يكون لها مصروف خاص غير المصروف الثابت..وانت فهمها هذا الشي يعني وقت المناسبه بتعطيها زياده او اذا احتاجت تروح السوق بتعطيها الي يكفيها في نفس يوم نزلتها للسوق.. وفاتورة الجوال انت سددها.. |
من وجهة نظري
الزوج هو اللي يحدد مصروف زوجته لماذا الزوج عنده التزمات كثيره وعلى اساسها يعرف ايش المبلغ اللي بيعطيه الزوجة من غير ما ياثر في وضعهم المادي اما النساء في الغالب يبون كل شي من غير مايقولو لا وعلى كذا راح تحط اعلا سقف للمصروف شوف انت وضعك المادي وايش المبلغ اللي ماراح ياثر عليكم وبالنسبة لمجتمعي متسوسط اللي ياخذونه النساء كمصروف يتراوح بين 500 الى 100 ريال .. انا عن نفسي مصروفي 2000 ريال بس زوجي هو اللي حدد هذا المصروف رغم اني اشوف مبالغ فيه بس اذا هو راضي فالحمدلله .. و زوجي شاف هذا المبلغ ماراح ياثر على وضعنا المادي والتزاماته الشهرية والسنوية .. |
500 ريال مناسبة بشرط ألا تكون الزوجة مسئولة عن أي التزام أساسي من ضروريات الحياة ..
وعلى الزوج أن يتحمل نفقات زوجته كاملة من مأكل ومشرب وعلاج وملابس وفواتير ومصاريف المنزل كاملة .. أما الكماليات أو المصروفات الزائدة فلا يسأل الزوج عنها وذلك مثل أن ترغب الزوجة في شراء فستان باهظ القيمة في كل مناسبة أو تغيير جهازها الجوال في فترات متقاربة فالزوج ليس مسئولا عن توفير مثل هذه الأمور ، بل يلزمه أن يقوم بتوفير الاحتياجات الأساسية وما سوى ذلك إن تحمّله ففضل منه ، وإن امتنع فله الحق . |
أنا عن نفسي زوجي فاتح لي رقم حساب في نفس البنك إللي ينزل عليه راتبه شهريا ومفوضني أحول عن طريق الهاتف المصرفي من حسابه المبلغ إللي أنا أحتاجه طبعا أنا أحول ثلث راتبه تقريبا وأخليه في حسابي والحمدالله ماأحتاج أصرف منه إلا نادر لأن لوطلعنا مع بعض وأشتريت شئ زوجي يحاسب فيه بدون ما يقول و ين مصروفك ولاعمره سئل فيه وفي نفس الوقت الفلوس إللي أنا أجمعها أخليها لوقت الزنقات والظروف وأسوي منها جمعيات مع الحريم وأجمعها وكمان وقت مازوجي يحتاج أعطيه بطاقة الصراف يسحب المبلغ إللي يحتاجه لأنه في الأول والأخير أنا أعتبر هاذي إللي بحسابي فلوسه والمبلغ إللي يسحبه دائما يرجعه لي مع الراتب ونخليها لوقت الظروف ولو أخذت منها شئ مايعارض ولايسأل عنها لأنه عارف أنا في إيش أحتاجها وفين صرفتها وأنا ما أحب أخفي عنه شئ ما أ قدم على أي تصرف حتى آخذ رأيه فيه والحمدالله من فضل الله علينا من يوم تزوجته ما عمرنا إختلفنا علشان أمور ماديه
وكل واحد فينا كتاب مفتو ح لثاني ونسأل الله عز وجل أن لا يغير علينا . |
حابا اسئل قديش 500 ريال بالدولار يعني حتى اعرف اشارك معكون لانو عملتنا غير عنكوم...
انا تقريبا اصرف بالشهر من 800 حتى 1000 دولار هل هذا كثيرا؟؟ |
السلام عليكم ورحمة الله وبركاته
اخي الكريم تحية طيبة انا سجلت دخول علشان اقول لك تجربتي بسم الله وماشاء الله ولا حول ولا قوة الا بالله زوجتي الله يحفظها اعطيها شهرياً 1000 ريال لها و500 ريال للولد تحرقها - تتصدق فيها - تعزم اهلها على مطعم - توفرها = مايهمني المهم ان هذا مصروفك يازوجتي الحبيبة ولا راح اعطيك اكثر ولو فرضاً خلص مصروفها اعطيها 200 او 300 تمشي الحال الى اخر الشهر واخصمها من الشهر الجاي وهذا اتفاقنا من البداية انت لازم تحسبها صح وبناء عليه تحدد كم يبقى من راتبك وكم تبي تجمع لليوم الاسود مثل ما يقولون او لمستقبلكم تبي تجمع علشان تشتري بيت او شقة ولا لا تبي تجمع علشان تشتري سيارة جديده ولا لا تبي تجمع علشان يكون عندك رصيد يسندك وقت الحاجة وما تحتاج لاحد المهم تصفي مخك وتفكر بهالامور وبناءاً على هالشئ حدد كم راح تعطي زوجتك مصروف بعلاقة طردية مع راتبك انا محدد 10 % مصروف لزوجتي اتوقع 10 % لزوجة ترعاك وترعى اطفالك وتطبخ لك وتهتم فيك شوي بحقها وقت الاعياد انت عارف الوضع زودها لها شوي المصاريف تكثر بالاعياد مرتين بالسنة مو خسارة ولا راح تأثر بميزانيتك بإذن الله الفوائد : اصبح عندها كنترول كامل على ماديتها ووزنت امورها على 1500 ريال لها وللولد نادراً ما تتخطاها ولو تخطتها تكون حاسبة حساب الشهر الجاي بتنخصم منه فأصبح عندها كنترول قوي جداً اصبحت اعرف كم راح اجمع وكم راح يكون بحسابي بعد سنة او سنتين قادمة اذا تبي نصيحتي روح اجلس مع زوجتك وكلمها عن مستقبلكم وهل تبي تستمر على نفس العيشة هذي طول العمر واذا ودها تتحسن اموركم واذا ودها انك تشتري سيارة جديدة تواجه بدل القديمه ومن هالكلام الخ الخ الى ما تلين راسها ولو صعبه عليك تعطي 1500 قولها ما اقدر كثير على كذا بيجي اخر الشهر وحسابي فاضي والله يوفقك ويرزقك اضعاف مضاعفة تحية طيبة |
اقتباس:
|
يااارجل شهر عطها راتبك كلها وخلها تحس كيف المعاناه خلها تسدد الاقسااط وخلها تسدد دين البنك اذا عندك وخلها تسدد الفوااتير وخلها تجيب العزبه وخلها تستقطع من راتبك لامك وابوك اذا كانوا عاايشين وخلها تعطيك مصااريف السياره والمشااوير واذا باااقي 1000 حلال عليها انا مااشووف الزوجه تحتااج 1000 رياال شهريا ماهو بخل لاكن فيه الالتزاامات غير هذا المصروووف ياابنات فكروا زين اذا البنت متوفر لها كل شي في البيت الالف حق وشو كل شهر بتنزل السووق يعني هذا اسراااف بعض الزوجاات تفعل لزوجها هكذا لكي تخسره وتجعله في دين لكي لا يتزوج عليها لكي لا يستطسع ان يتزوج عليها |
كم راتبك أخوي ؟ الموضوع لا يخضع لشروطها وحسب بل يقف على امكانياتك المادية أولاً ،، ان كان راتبك مثلاً 8000 وليست عليك ديون فلا مانع من اعطائها 2000 حتى !! أنا غير متزوجة وآخذ من والدي 1200 وكل 3 أشهر يعطيني 1500 اضافية للمصروف ،، بترول السيارة ، فاتورة الموبايل ، صرفية الجامعة ، أغراضي الخاصة ،، ولا تكفي !! أفرح قلبها وتاخذ أجر :) |
أنافي مشكله من ست شهور تقريبا على نفس موضوعك
طبعا راتبي 7400l الصافي الي يبقى معي من غير قرض البنك وزوجتي تبي مصروف 2000 وانا اقول 1000 انا احيانا اصرف اكثر من 2000 واحيانا اقل بس احس كثير هذا وانا ما عندي عيال:(2000 يعني لاز الواحد يوفر من راتبه والى الان محد اقنع الثاني وكل مالها تكبر المشكله |
اقتباس:
|
| الساعة الآن 03:52 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©