|
خوف وقلق وتوتر زوجي يرباكاني ويؤلماني ...ماالسبيل
السلام عليكم ورحمة الله انا عندي هذي المشكله ومن جد ابغى حل ومشكلتي كالتالي زوجي العزيز عنده بعض التصرفات الغريبه وانا ادري انها تحتاج الى معالج نفسي بس طبعا مقدر اقوله هو مايحب السفر وانا اموت على شي اسمه سفر ظلينا بعد زواجنا سنتين وكان خاطري اروح مكه والمدينه مع انو ابدا مو ذيك البعد عادي طيب رحنا وانا حسيته من حجز ولمن صعدنا الباص وهو في حالة توتر يعني يمكن لانه اول مره يسافر بس هم هالشي عادي يعني هو وين رايح !!!!!!!!!!!! طيب ولمن اخذنا فندق وخلاص انتهت الاجازه والحين الرجعه يووووه بدى العصبيه ويالله وبسرعه وهو اصلا الباص حتى مابعد يجي دايما متوتر وقلق حتى مايخليني استانس وطبعا كنا اول الراكبين وظلينا ملطوعين ساعه على ما اكتمل العدد وعدينها المهم رحلتنا هذي الاخيره كانت على القصيم وطبعا مضطرين مو سياحه ولاهم يحزنون حجز تذاكر وياربي لو شفتوه مقلوب قلاب يحاتي ومتوتر وقلق طلعنا الى الدمام والله وصلنا الدمام قبل 12 الظهر وموعد اقلاع الطائره 2,5 تخيلوا ساعتين ونص بالمطار ليش ؟؟؟؟ لان يحاتي تطير الطائره او يصير شي يعني معليه يكون سيفتي بس مو كذا انا اتضايق احس كاني رايحه حرب المهم لمن ركبنا الطائره ونزلنا وطبعا يحاتي في تكسي او لاولمن ركبنا ووصلنا الى الشقه كد هو خلالاص رااااسه بينفجر ليش ؟؟؟؟ من التفكير المستمر وانا اقوله اتعوذ من ابليس ياربي احنا وين رايحين والله ناس وصلوا للقمر وهم براحه وسكينه ومتعه وانت عسى ماتشم انو في سفر تقوم قيامتك والله ماقدر ينام هذيك الليله من الالم بالراس المهم ولمن خلصنا شغلنا هو حجز على يوم ثاني رجعه خاف انو مايمدي الوقت مع انو حده يمدي وانا قلت له انو ترى وقتنا بسيط بس قلت لكم هو سيفتي حده طيب راح يقدم الرحله وراح للخطوط الجويه وسال المسئول قاله والله فل الركاب مافي حجز قاله دور منا منا لازم ننزل وهو والله شفايفه ناشفه ويعرق واخر شي قال بدبركم وفعلا صار فيه وهذا المسؤوال والله قاله اشفيك قلق ومتوتر عادي يعني رلكس قاله زوجي والله انا اول مره اجي ومدري شو الترتيب هداه عموما انا قفلت عليه يازوجي مايصير كذا ترى الامر ابسط من كذا وخير ان شالله حتى لو ظلينا يوم ثاني مو مشكله ليش هالحوسه والله يجيبلي الكآبه خلاص مابي اروح مكان وياه مابي اسافر والقهر رجعنا الشقه وحده جاب الغدا مامداني باكل عدل يالله بسرعه ترى مافي تكاسي وعلى مانحصل ونروح المطار ... الخ عجلنيييييي واخر شي وصلت المطار 2 والساعه اربع توه طاقم الطائره يجي وبعدها تحركت أأأأخ تعب نفسي خلاص وبعدها لمن ركبنا ارتاح وبدى يعتذر ويقول ادري ضايقتك وادري وادري وانا اقوله حبيبي خلي طلعتنا مو بس انجز وخلاص خلها متعه بعد يعني انا مايصير من السياره الى الطائره الى هالشغل الى الطائره مره ثانيه يعني انا ابي اشوف اطالع طيب قلت له اذا وصلنا الدمام ناخذ السياره وشوي نظل بالدمام وبعدها ناخذ الطريق قال اوكي اشوف يعني قلت على الاقل بيطيب خاطري والله نزلنا من الطائره الى السياره وهات ياخط وياريت كان اخذ الخط عدل كان بسرعه وصلنا الاخ ضيييع الطريق وخلاص صارمتوتر وين الطريق ومنا ومنا وهو حده موصل انا قلت له انا بالنسبه لي عادي لاتشيل همي انا ألعب بالايفون لاتعب نفسيتك وهو يقول انا ادري لعوزتك وانتي مسكينه انا السبب وقعد يلوم نفسه وانا اهدي فيه بس من داخلي بموووت من القهر ومابي ارروح وياه اي مكان خلاص تعبت منه مايصير طيب علموني هل هو عادي انا ادري انو عنده خووف من السفر او من المسؤوليه مايحب يروح ويجي يحب الاستقرار ولايروح مكان طيب الوضع محتاج وانا محتاجه للسفر الغريب انه هو لمن تعين اول سنه بوظيفه تعين بعيييييييد عن اهله ونقلوه ثاني سنه ونفس الشي بعيد واخته عندها مواعيد بالرياض كل شهر ِ يعني معقوله ماتعود ؟؟!!! معقوله بعده تضل معه هالمشكله كله قلق وارتباك وخوف ليش ؟؟؟ مع انه والله هو قدها واذا انحط بموقف يعرف شلون يطلع منه وجيد في الطرقات بس ليش يصير له كذا ادري طولت عليكم عطوني حل وفسرولي تصرفات زوجي من منطلق نفسي |
زوجك حرييييييييييييييييص ولكن بزياده
انا زوجي حريص يتصل لاااجيء الا ولشنطه جاهزه وهو معه حق ونروح قبل الرحله بساعه ...عادي ولكنه احس انه حريص لكن حرص مطلوب وانا مئيده له .... زوجك بزياده ....اتوقع الحل عند طبيب نفسي والله حالته معرق وقلق ويللله وووالخ حرص شديد وقلق ومايصدق يوصل اتوقع ان زوجك تعرض لموقف ما من ناحية السفر . |
نفس حالة والدي بالضببببببببببببببببببط..
متابعة الردود لعل و عسى نجد فيها ما يفيدنا.. كان اله في عونك اختي الكريمة.. |
هل زوجك دقيق في كل الامور ويشيل هم الامور دائما ؟
هل زوجك حساس ؟ يهمني جوابك .. |
اخوي متل زوجك بالضبط
وزوجي عكس زوجك دااااايما تروح علينا رحلاات بس زوجك اتوقع انه حريص بزياده طيب لما تكونو رايقين لي ماتتكلمو وتشوفي ليش يصير معاه هالحاله لما تجي سيرة السفر |
انا بصراحه مثل زوجك انقل هم بالسفر خصوصا اذا سافرنا لبلد اول مره انروحله واكون ميته خوف
اخاف انضيع او يتعدا علينا احد او ننسرق او احد يستغلنا او او وما احس بالامان غير لما يمر علينا يومين |
اهلا وسهلا بردودكم اختي او اخي الجانب الاخر نعم زوجي دقيق في كثير من الامور وحساسيته فب بعض الامور مفرطه بالنسبة لي اختي عاشقة الغالي طبعا اكلمه وابي افهم يقول انا نفسي مدري ليه اصير كذا واصلا هو عارف نفسه ويأنب نفسه كثير انو يعطي الموضوع اكبر من حجمه بس اخر شي يقول هذا طبع ويش اسوي وترجع ريمه لعادتها القديمه احترت معاه |
اخواني واخواتي انا ماتوقعت تكونوا كذا مو متفاعلين مع موضوعي انا طرحته هنا
لان اشعر بمدى اهتمامكم وحرصكم على صاحب المشكله ارجوكم اريد حل او اريد علاج وبصراحه انا اطمح ان يرد علي اخي رجل الرجال او الاخ بليغ مع فائق احترامي لكل الاخوات والاخوات بس لانهم اتوقع معهم معلومات كافيه عن هذي الحالات وممكن يساعدوني |
انا " رجل " ,!
على كل حال , اظن والله اعلم ان زوجك من اصحاب الشخصيات " الوسواسيه القلقه " اقرئي عنها ستستفيدين .. وهو زوج يستطاع العيش معه , اذا علمتي كيفية التعامل معه .. اتمنى لك التوفيق .. |
اها عفوا اخي الجانب الاخر صحييييح !!! يعني زوجي فيه وسواس بصراحه صدمتني انا اتوقعت يكون ماخذ الامور اكثر من الازم ويعطي الموضوع اكبر من حجمه بس وسواس صعبه !!! واحس اللي فيهم كذا مايقدروا يتخلصوا منه |
حبيبتي زوجك مايصير بالحاله هاذي الا مار بشي موتره ومعقده ترك في نفسه ...حاولي تجلسين معاه وتتكلمين ليه انت تتوتر مالسبب هل مرة بحياتك مواقف انت تعبت منها صدقيني في قلبه خوف مو طبيعي وعدم الاحساس بالامان......يبغالك لو بغيتوا تسافرون يسافر احد معاكم تكون سفره جماعيه راح يخف عنده هالخوف والتوتر واشوي شوي بيزول نهائيا
|
هلا اختي صمتي انا اللي اتوقعه مو انو صار له موقف لالا احس انه تعود منهو صغير على الاستقرار ومن البيت الى المدرسه ومافي طلعات وماكان عنده ربع كثير بحيث يطلع ويسافر وياهم فلمن طلعت له الوظيفه بعيد عن اهله يجي بس خميس وجمعه اوووو تقول امه صار ينتفض ولاينام وحالته موول وبعدين تعود وبالنسبه انونسافر جماعي مره سافرنا مع حمله زين والله في الرجعه يمشي ويسرع مشان يوصل للباص قبل راعي الحمله وياللله وبسرعه وانا اقوله انت اترك الامر لراعي الحمله مالك شغل تطللع فيها وتأذي البقيه !!ش |
أعتقد إنه زوجك يكون متوتر أكثر لما تكوني إنتي معاه لأنه يحس بمسؤليه أكبر من لما يكون لحاله و يحول على قد ما يقدر إنه يأمن كل شي لكي عشان ما يصير لك شي بعكس لما يكون لوحده يكون بس شايل هم نفسه و عادي يعني صحيح إنه متعب و ماتقدري تتمتعي بالرحله بهذي الحاله بس أكيد لأنه رحلاتكم قليله و لما تتعودوا بيقل توتره إن شاء الله انتي بس حاولي دايماً تحسسيه إنك مرتاحه في الرحله و انك حاسة في أمان دامه معك و عيدي ذكريه إنه إن شاء الله ما راح يصير شي و إن الله راح يحميكم حاولي مثلاً قبل الرحله تتفهمي معاه و تطلبي منه إنه ما يتوتر كثير و بيني انزعاجك بس بطريقه بسيطه حالة زوجك نفس حالة ابي الله يحفظه ,,, يكره السفر و يكره يركب الطايره و لما كنا نسافر كنا نروح المطار 4 ساعات قبل الإقلاع .. تخيلي و طبعاً مافي نوم أبداً ليلة السفر،، رايح جاي و يسأل كل دقيقتين متأكدين ما نسيتوا شي؟ إتأكدوا تمام أمي اتعودت عليه و احنا إتعودتنا عليه كمان إن شاء يكون شي بسيط و يقدر زوجك يتغير مع الوقت |
وسواس ليس معناها الوسواس القهري ..!
وانا لا اجزم ان كان من اصحاب الشخصيات القلقه ولها مسمى قديم وهو الوسواسيه .. و " الوسواسيه " المقصود بها هو كثرة التفكير في الامور العاديه مثل السفر وغيرها , وتجدين انهم اذا كان لديهم " شئ سيفعلونه غداً " , يظلون يفكرون به لدرجة انهم لاينام الا متأخراً بسبب تفكيره بالأمر .. الخلاصه انت التي تستطيعين ان تحددي ان كان " شخصيه قلقه " ام لا , ومن صفاتهم انهم : حساسون , دقيقون لدرجه متعبه , يشيلون هم الامور كثيرا ! ويعطيها اكبر من حجمها .. ارجع وأكرر لم اقصد بأن زوجك لديه " الفكره الوسواسيه او الوسواس القهري " ولكن قديماً كانوا يسمونهم " اصحاب الشخصيات الوسواسيه القلقه " .. |
| الساعة الآن 05:37 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©