|
اللهم اغنني بحلالك عن حرآمك ..
السلام عليكم ورحمة الله ..
انا تركي الزهراني وعمري 21 سنه ومتدرب في معهد خاص مدعووم من قبل المؤسسه العامه للثروه المعدنيه وسابك والوظيفه قريب بمشيئة الله.. التمست في منتداكم الشفافيه والصدق وهذا املي فيكم ولهذا اخترتكم عن سواكم .. تركي عاش حياته بمنطقه نائيه "الباحه" وتربى بين ايادي والديني.. هواياتي ايام الطفوله كانت سطحيه جدا وبدائيه زيي زي اي صغير يحب يلعب وكل همه وناسته.. انتقلت للرياض من قبل سنه وادرس فيها وستقبلي ومعيشتي فيها ان شاء الله.. ومن هنا بابدا قصتي معاكم .. محور حديثي ومعاناتي وحلمي هو "الزواج" كثير ما اسمع ان الزواج قطع ارزاق وقلق وربطه وصرفيه ع الفاضي ولا اخفيكم هالشي .. وكلما سمعت هالشي شفاتي تضحك بس قلبي يبكي وكسير.. لان حلمي كل الناس تحطمه وكل الناس سلبية الفكر عن هالموضوع نص ديننا صار منبوذ بمجتمعنا وصار هاجس وماحد يقدره بين الناس .. حتى من الاقربين تحطمت ولازلت مقفي ظهري واتجاهل الكلام.. الوالده الله يحفضها كلمتها مرار وتكرار على الزواج وكل اجوبتها تقول لاصار جيبك مليان نتفاهم .. صار الهم الاكبر بالزواج وللاسف الماديات والمظاهر .. وناسين ان ابواب الرزق معلقه بالزواج والعلاقه بينها طرديه.. قسم بالله يا عالم اكلمكم وانا مكسور من داخلي وعجزان .. اما يقولون عمرك صغير وما تصلح واما يقولون جهز قروشك ..!! ياناس الرسول يقول امهروا ولو بخاتم فيما معنى حديثه .. ليه هالتعقيد وليه الاجحاف بهالموضوع .. نسب الطلاق والعنوسه تعدت المعقول وهذا شي يخوف .. والشباب صار تفكيرهم منحرف عن الدين لان مالقيو ما يريحهم ويلبي مطالبهم بابسط احتياجاتهم.. 90 بالميه من الشباب ان ما كانو اكثر ظالين والسبب الزواج معقد عندنا .. خافو الله بعيالكم يامسلمين وييسرو عليهم .. المهور غاليه ولاحد بيتحملها وان احد قدر يتحمل المهر ما بيتحمل قهر هالمهر اللي يقص الظهر وتصير هالزوجه المسكينه هي الضحيه .. والله يامسلمين اني عايش متاهه لايعلمها الا ربكم بهالموضوع .. تخيلو دلوني ناس على دكتور في جامعة الامام وقالو ان شاء الله بينفعك بعد جهد جهيد من السؤال والسؤال.. واطلع له من دوامي واروح له واكلمه وانا كلي امل ان الله بيسرها على يده .. صدمني يوم قال " رح والله ييسرها لك نصيبك بتاخذه " حتى حل ياناس ما اعطاني كل اللي قاله مكرر باستثناء المسيار او المعسار بما اسميه انا.. المسيار وما ادراكم ما المسيار .. المسيار مبني على كلمه واحده "اهانه".. كذا اوصف حل "الدكتور المامول منه الخير" باختصار شديد لكم .. وانا اعتذر منكم اطلت الحديث .. ان كان فيه انسانه صادقه وتخاف الله فيني ومتدينه حتى ولو كانت منفصله او ماجاها نصيب وكبيره بسنها بشرح لها كل شي بالتفصيل .. وانتظر حواركم وحلولكم لي يا اخوتي واحواتي.. وفي الختام ما اقول الا الله ييسرها علينا وعليكم وعلى المسلمين اجمعين ويصلح شبابنا وبناتنا انه على كل شي قدير .. خالص ودي .. :: |
ابني الكريم: تركي الزهراني:
ونعم بك ونعم بزهران وبالجميع ففي الرياض وغيرها شباب أعمارهم أكبر منك يأخذون مصروفهمن من الوالد وأحياناً من الوالدة: وطلب المعيشة والبحث عن القرش ليس هدفاُ لذاته ولن أقول إنك صغير على الزواج ولكن من في عمرك يحتاج إلى ترتيب أموره المالية والوظيفية من أجل نفسه أولاً ثم حتى يكون قادر يفتح بيت فالزواج ستجد من تقبل بك على وضعك ثم ماذا بعد؟ وسيتيسر زواجك منها بأقل مؤنة ثم ماذا بعد ذلك؟ تحتاج إلى مصاريف لك ولها ومواصلات بين الرياض والباحة ثم مصاريف للطفل الأول وما تحتاجونه من أبواب الصرف في الحياة إذاً أنت في بداية طريق الحياة وليس المهر هو العائق في حياتك, وأنت على الطريق وستصل وسأبشرك ببشرى خير على النحو التالي: 1- فور صدور راتبك الأول ستشتري سيارة بالتقسيط عليه تناسب راتبك ومقدار القسط الذي ترغب في خصمه من راتبك وإن كنت تملك سيارة فتبيعها فوراً وتتزوج بقيمتها وتستمر في تسديد التقسيط. 2- ستهذب لصندوق الشيخ عبدالعزيز بن باز رحمه الله لإعانة الشباب على الزواج لمساعدتك في المهر. 3- ستذهب لبنك التسليف السعودي لأخذ قرض للزواج بدون فوائد وتسدده بأقساط ميسرة من راتبك (حيث تم رفع قيمة القرض مؤخراً وخصم قسطين من القرض. إذا وجدت أن لديك وقت فراغ وتستطيع العمل الإضافي إذهب لمعهد شركة العثيم لتدريبك مجاناً على العمل في أسواقهم وتوظيفك إن رغبت لديهم بما لا يقل عن ألفي ريال غير وظيفتك الصباحية. ومدينة الرياض فيها أبواب رزق كثيرة وخاصة لشاب متفرغ مثلك فمثلاص في الصباح بين صلاة الفجر والدوام تستطيع إيصال الطلاب والطالبات والمعلمات للمدارس بعقد شهري وإن تمكنت من إعادتهم ظهراً فبضعف المبلغ, وبالإمكان أن تأخذ قضر سيارات الأجرة المعروف وهكذا غير العمل في القطاع الخاص مساءً. أسأل الله لك التوفيق والسداد. ختاماً: سأسحب صورة من مستقبلك بإذن الله وأحضرها لك الآن تخيل تركي الزهراني وعمرع 45 سنة وبجانبه زوجته وخلفهما الأطفال والشغالة في سيارة عائلية فخمة وأنت في وظيفة مرموقة. هذه الصورة أنت الآن تصنع تفاصيلها من الآن. |
شكرآ لك اخي رجل ..
الصوره بصرآحه جدا جميله بس الوانها جدا مكلفه في مجتمعنا .. خصوصا اني ما املك الصبر لحين ينزل اول راتب مثل ما تكرمت سلفا .. وبالنسبه للدوام الجزئي دوامت فتره وانقطعت والسبب يعود لقلة وقت الراحه .. كنت اداوم من 6 صباحا الى 5 عصرا في المعهد ومن ثم على الدوام الليلي والى 12 منتصف الليل .. ولا اجد الراحه سوى في الـ 6 ساعات المتبيقيه من يومي .. وحاليا ما اشوف مانع اني اتزوج وامهد مستقبلي من هالوقت بالعكس من ابواب فتح الرزق الزواج .. وشكرا لك لانك بينت لي كم من المعاملات والقروض والسلفيات اللي يبيلي انجرزها للبدء بـ"مشروووووووع" الزواج .. اهني نفسي ع هالزواج.. جل التقدير .. :: |
الله يوفقك ويسر أمرك
نصيحتي لك إلجأ للأستغفار بإستمرااااااااااار صدقني بيفتحها الله بوجهك لأنه سبحانه وعد بهالشي |
اتزوج والرزق على الله ..
|
الله يوفقك ويرزقك بي بنت الحلال الا تخاف الله فيك
المشكلة كتير من القبايل اهم شي عندهم المفلوس والذهب وبس ويجلس الشاب طول عمروا يدفع فلووس وفي الاخر يمكن يعيش مع واحده مافي بينهم اي تفاهم ولا شي اذا مشكلتك على الفلوس بس الان نظام كل الشباب القروض او شوف بنت ناس اهلها مايبوا الا الستر لبنتهم وربي يوفقك وبعدين انتظر الوظيفه اول ماحد يزوجك وان لسه متدرب الا نادراااا |
الله يوفقك ويفتحها بوجهك
استغفر كثيييير اختك في الله |
كذلك احنه بالعراق عدنه المهور غالية جدا جدا جدا لا تناسب الوضع المعاشي للفرد العراقي الذي يتوسط دخله الشهري 200 الف دينار ( 120$) شهريا فمن اين يا ترى
احسن شي الواحد يبقة اعزب ما يتزوج |
وعليكم السلام ورحمـــــــــة الله وبركاته
اخوي تركي تبي تتزوج وتفتح لك بيت.. اول شي لازم انك تسعى..بإذن الله لما تيسر أمورك وتشتغل ذيج الساعة فكر بالزواج لاتستعجل وتضيق على روحك وتخلي هالفكرة أكبر همك..عندي حديث طيب ويبرفع من معنوياتك ان شاء الله عن أبي هريرة رضي الله تعالى عنه قال: قال رسول الله صلى الله عليه وسلم: " ثلاثة حق على الله عز وجل عونهم: المكاتب يريد الأداء، والمتزوج يريد العفاف، والمجاهد في سبيل الله " رواه أهل السنن إلا النسائي. الوالدة معاها حق..منو اللي يغامر في بنته ويزوجها واحد ما عنده راتب انتظر شوي...لما تتوظف وبعدها بتلقى العروس في انتظارك الله يوفقك ويفتح لك ابواب الرحمــــــــة والقبول |
تزوج موظفه ياكثرهم اشترلك تاكسي واشتغل عليه وادعي الله اللهم اغنني بحلالك عن حرامك وانشالله ربي يوفقك
|
اسأل الله ان يغنيك بالحلال عن الحراااام
|
توكل على الله وأكثر الأستغفار والدعاااء لله وصلاة الليل وبأذن الله ربي بيرزقك من حيث لاتحتسب ويفرج همك
من يصدق الله يصدقه كنت اعتقد ان الواحد مايقدر يتزوج الا اذا كان عنده مبلغ ضخم مجمعه لكن زواج اخوي اثبت العكس كان يبغى يتزوج بعمر صفير 22سنه بس ابوي رفض بحجة أنه توه مشتغل ويبغاه يعتمد على نفسه اخوي أقدم على الزواج وتوكل على الله وماكان عنده الا الراتب وسبحان الي يسر اموره تزوج بمهر 20 الف والباقي هونه رب العالمين من جد سبحان الله كيف يسر امره وجاه رزقه حتى بعد زواجه زادو راتبه وعايش مستقل لوحده لكن أهم شي الصبر والللجوء الى الله وأهم شي أقنع امك وابوك وربي بيسرها لك |
الله يعينك
بس ودي اقول كلام بخاطري انا لي فتره طويله اتابع المنتدى بدون تسجيل والحين بس الي سجلت عشان ارد عليك اخوي حالكم من حال البنات والله كثير يتمنون الزواج ولا هي قادره اول شي لانها بنت ومستحيل تروح لامها او ابوها وتقول يبه انا ابي اتزوج دورلي على رجال لاكن انتم تقدرون صح العائق عندكم يكون مادي لاكن مقدور عليه بعد توفيق الله وطلب الرزق لاكن البنت مكسوره نفسها تتزوج ولاهي قادره حياها يمنعها تشكي حتى لامها حتى لاختها حتى لصديقتها برغم حاجتها الكبيره لوجود رجل في حياتها تمنحه كل حياتها وحبها وحنانها في بنات كثير جالسات ومتعففات وصابرات ولا تكلمو ولا حسسو اهلهم بالضعف لاكن بجوف الليل يقومون بين يدي الله ويطلبونه الستر والعفاف كنت كاتمه بصدري ولا شكيت لمخلوق ولما قريت موضوعك حسيت انه حتى الشباب مثلنا بس هم يقدرون يبدون واحنا بس ننتظر البارح شفت اطفال بنات عمي يلعبون برا وربي ما مسكت نفسي دخلت غرفتي وجلست ابكي وادعي ربي والله مو حسد لهم بالعكس لاكن تمنيت اكون ام تمنيت اكون مع زوجي لحظتها واضمه ماقدرت اشكي لاحد يا ناس هذا شي نستحي نتكلم فيه وبالرغم من كذا يحرقنا من جوا محد بيحس فيني الا مر بنفس حالتي يارب تفرجها علينا وترزقنا الازواج والزوجات الصالحين والبيت المطمئن والحياه السعيده والاطفال وربي اكتبلكم وانا ابكي مدري متى بيجي اليوم الي افرح امي فيه وتشوفني عروسه انا مابي من الدنيا لا جاه ولا مال ابي رجال اذا ضاقت بي الدنيا اسند راسي على كتفه ويمسحلي شعري ويشاركني همي اسفه اني تكلمت وطلعت الي بصدري بموضوعك وانا اللي عمري ماشكيت همي غير لربي |
اقتباس:
لا فوض فوك |
ما راح أزيد على من سبقني بالأخص رد الأخ رجل الرجال
لكن يا أخي وضعك الحالي لا يبقي لك من الوقت إلا 6 ساعات لا تكفي حتى للنوم.. لو تيسر لك الزواج الآن كيف ستتحمل زوجه غياب زوجها طوال اليوم تقريباً ولا يأتي إلا للنوم..؟ وشيء آخر حتى لا تشعر بالحُرقه..تخيل نفسك والد لفتاة أو تخيل رجل تقدم لأختك بنفس وضعك الآن هل ستزوجه.. وفقك الله ورزقك الزوجه الصالحه..والرزق الوفير |
اخوي تركي تأكد بما انك طمعان في الحلال صدقني ان الله بيسير لك الزواج باذن الله من حيث لا تعلم ولاتحتسب
بس انا اقول لك لو تضمن لك دخل شهري قبل كل شي يكون احسن لك عشان ما تطلع من هم وتدخل لهم اكبر الله يبعد عنا وعنك الهم بس خل نظرتك بعيده فكر في المصاريف اللي بعد الزواج انت بتصير وقتها مسؤول عن نفسك وعن شخص ثاني معك واحتمال يرزقك الله طفل ,, انا عارفه ان موضوع الرزق بيد الله سبحانه بس خذ بالاسباب واصبر وان شاء الله انها بتفرج خل املك بالله كبير والله يغنينا واياك وكل مسلم ومسلمه بالحلال ويبعد عنا الحرام اسأل الله العلي العظيم ان يفرج همك |
توكل على الله وأكثر الأستغفار والدعاااء لله وصلاة الليل وبأذن الله ربي بيرزقك من حيث لاتحتسب ويفرج همك
انت انسان طالب الستر والعفاف والله ربي مايخيبك اسئل الله في طرفة عين او اقل من ذلك ان ييسر أمرك وتجد رجل صالح يخطبك لبنته بدون شرط ولا قيد وانا اعرف انك قدها وقدود والرجل الي يتكل عليه |
انت ذكرت انك راح تتوظف في شركة سابك...
وهذي الشركه ماشاء الله كبيره...ورواتبهم ممتازه...وعلى حد علمي ..شركة سابك اي موظف عندهم يرغب في الزواج يدعمونه ماديا..يصرفون له مبلغ عشان يتزوج...وايضا منزل.. وترى الزواج جمييييل راحه واستقرار...وعليك بحسن الاختيار.. وبالنسبه للمهور...اعتقد عندكم في الجنوب غاليه وتهد الحيل..فيه قبائل..مهورهم معقوله جدا..تقدر تتزوج من اي قبيله غير قبيلتكم.. |
انا اقول لا توهق عمرك اذا كانت حالتك الإقتصاديه وحالة اهلك عاديه
لأني اقولك من الحين الزواج موب لعبه يبي لك 150 الف بدون السياره وبعدين وشلون بتصرف على زوجتك ؟؟ فكر ياخوي قبل ماتخطي هالخطوه اذا توظفت واستقريت بوظيفتك ثلاث اربع سنوات تزوج |
لا عاد 150 الف...مستحيل
50 _60 الف لااكثر وتسوي احلى حفل زواج... اما اذا تتزوج من الجنوب او نفس قبيلتك هذا شي ثاني والله يعينك على عاداتكم |
اقتباس:
مستحيل يكون زواج بدون تكلفة احسبي اثاث البيت + اجار البيت " 20000 + اجار البيت 20000 = 40000 المهر في الغالب = 40000 الهدايا والحركات = 3000 ليلة الزواج = 30000 يجهز نفسة = 3000 المجموع 117000 و الكل يشترك بنفس الشي |
:dSIZE="6"]ياااااااخي بتتسر ان شاء الله
انتم ياااهل الجنوب لاجاااء الواحد يتزوج يعطون عانيات يعني كل واحد يقط خمسميه بعضهم الف عاد انت وحسب معااارفكم هل هم اكثار طليقي اذكر جاااه من العانيات يمكن حوالي ستين الف وفي الاخير تطلقناااا يعني وسع صدرررررك ومتى ما الله كتب للك بتتزوج ببتتزوج:17::17: هونها وتهووون ولا تحط العرس اكبر همك فكرررررررر وامن مستقبللك ثم تزوج قبل كل شئ الله يرزقك بزوجه صالحه تقيه نقيه :):):d:d[/SIZE] |
اقتباس:
لكن بعض القبائل.لا زواج اخوي .. المهر 25 والهدايا يوم الملكه الشبكه والعطور والساعه 4000 طبعا بعد ماملك اخوي اخذ عقد القران وراح بنك التسليف التابع للزواج..واعطوهقرض وبالقرض هذا اثث البيت افخم اثاث... وبالنسبه لاجار الشقه طبعا انت تكون مستاجرها قبل الزواج ب 3 شهور وتكون دافع دفعه مثلا حقت 6 شهور وحفل الزواج كلف 35 الف مع العشا انت لاتحسب الامور هذي كلها مع بعض..اول شي ملك..ولا خلصت من الملكه ربي بيفتح..ها عليك وتقدر تدبر تكاليف البيت والحفل |
يكفي رد الأخ رجل الرجال
واسمح لي بهذه المداخله بالنسبه لزواج والله يا أخي أعرف كثيرا من الآباء لايهمه المهر أهم شي عنده صلاح الرجل وطيب أخلاقه لكن اسمح لي بعض الشباب يذهب لعوائل راقيه جدا ويطلبون مهر غالي ويوافق ويتكبد هو تكاليف الزواج يا أخي لاتقل المهر غالي والله وبالله يوجد الكثير يهمه صلاح الرجل بعيدا عن المهر وتكاليف الزواج ورأيت ذلك كثيرا فقط أبحث عن أمثال هؤلاء ستجدهم كثر لكن استعن بالله والله يرزقك الزوجه الصالحه |
اقتباس:
نعم وانا أشهد على كلامك يا ليه الغرور في الجنوب المهر غالي جدا والمشكله الشاب يوافق والله يعينه على باقي التكاليف لكن لو رايت قبائل أخرى المهر أقل بكثير والله يسهل أمروك يارب |
الله يكون في عونك ياخوي
صحيح المهور غاليه وياليت تعذرون اهالي البنت لاتنسو انو الحياة صارت غاليه ويبغالها تجهيز وفستان ملكه وفستان زواج وذهب ومكياج وقاعة الملكه والتقديم وغيرها من الاشياء الي انتم تحبوها تكون في زوجة المستقبل والي تاخذ المهر كله بعد بكره ان شاء الله لو صرت اب وربي اغناك صدقني مابترضى تزوج بنتك بمهر اقل من مهر بنت اخوك ولابنت اختك ولابنت ولد عمك وللأسف مافي احد يرضى يزوج بنته بمهر خاتم وبالاخص اذا كانت وسط جماعه مهورها فوق 50 الف ريال والله كثير بنات يتمنو يتزوجو من دون مهر وانا من اولهم لكن لما نفكر بالموضوع صح على طول نشيل من بالنا هالفكره ونتمنى نتزوج بمهر فوق 100 الف :d اولا بنشيل هم كلام الناس ليش زوجتو بنتكم بمهر قليل وليه وليه والخوف ان تزوجت واحد مافيه خير بعد فتره وهو مطلقها ولا اذا ربي اغناه قام تزوج له وحده ثانيه على مزاجه< هنا يأنو الناس بتستلمها بالكلام واولهم اهلها يعني تخيلو وحده تزوجت بمهر اقل من مهور قريباتها + الناس مابترحم بتقول يوم انو اهلها زوجها بمهر اقل من مهور قريباتها اكيد فيها بلا + اذا طلقها بجد راحت فيها وبيشوفو انو كلامهم صحيح + القصص الي شفناها وسمعناها تخلينا نرفض اننا نتزوج بمهر قليل ومنها :( في واحد تزوج وحده من عائلة مستواها المادي مره متدني والاب كان فيه خير ماطلب مهر كثير من الشخص الي تقدم لبنته المهم نص المهر راح تكلفة الملكه والمشكله كانت بالبيت مو باستراحه ولاقاعه والربع راح لجيب الاب والربع الاخير فستان ملكه و زواج للبنت وكم روب نوم وملابس وذهب المهم تزوجت وبعد فتره ماتتعدى الشهرين راح لهله وقال انا ماابغاها اهله يحاولو فيه من هنا وهنا وليش ماتبغاه المهم بالنهايه قال الي اعرفه الحرمه لازم تلبس كل يوم لبس وتلبس كذا وكذا وهي ماغير معلقه على 3 ارواب نوم وان غيرتهم لبست ارواب نوم قديمه حقتها يوم كانت في بيت اهلها وملابس تحسوها من ارخص الملابس وماجتني غير بشنطتين وتسريحتها مو زي تسريحة البنات فاضيه من المكياج والعطور ولاكأني معاي حرمه في البيت ويعلق عليها قدام اهله :( ^ هذي القصه ماادري اذا حقيقه اولا لكن سمعتها من وحده واشك في مصداقية كلامها بعد :) وعلى فكره انا زميلتي زهرانيه وسألتها عن مهوركم قالت البنت البكر مهرها 60 الف الثيب 40 وممكن توصل 50 الف وقالت اذا احد تزوجنا من برا جماعتنا يكون مهرنا 70 الف وقالت في عوائل مهورهم قليله عندنا 30 الف وقالت كمان بس رجالنا يدفعو المهر وماعليهم شي نهائي بعد كذا البنت هي تتكفل بالملكه من إلى والزوج يجيب العربيه يوم ملكتها على حسابه وكمان قالتلي على عاده عندكم تسووها يالزهارين وهي انو البنت يوم ملكتها مسكينه لازم تجيب طقم ذهب لأم العريس وجدته عاد اقل طقم 2000 ويجيك خفيف بعد تخيلو الاثنين 4000 ريال وان ماسوتها الجماعه على قولتها بتاكل وجيهنا :d وام الزوج بتاخذ منا موقف :( صراحه مهوركم موغاليه مرره مافي شاب هالايام ماعنده سياره واقل سياره ومستعمله بعد تكون 50 الف ريال ـــــــــــ حلك تتزوج وحده مو من قبيلتك وعلى فكره في وحده اعرفها من قبيله ثانيه تقول مهورنا صح قليله 30 الف لكن في الحقيقه لو تجوو تحسبوها مهورنا بتكون فوق 70 الف:d لانو قاعة الملكه + العربيه + المطربه الي بتجي يوم الملكه بتكون على حساب الزوج واهل الزوجه العشا والتقديم فقط والزواج من الى على حساب الزوج وام العروسه لازم يكون لها مهر:d يعطوها 5000 ريال |
مشكلتنا نعظم كلام الناس حتى على حساب حياتنا وراحتنا >> بعد ماقريت تكاليف الزواج
الله يرزقك يا تركي من واسع فضله |
مساء النور اخي تركي .... والله اعرف ناس كثير مقتدرين ماديا اذا جاأهم الزوج الصالح لبناتهم ابو البنت هوه الي يزوجهم على حسابه وحت ايجار البيت عليه والاب الي يدبش لبينته كل مستلزمات العروس اهم شي عندهم الزوج الصالح لانهم قليل في هذا الزمن .. فأنصحك يااخي انك تبحث عن الناس الي يقدرون الزوج الصالح ولايكلفونك فوق طاقتك ..
|
| الساعة الآن 02:06 PM. |
Powered by vBulletin® Version 3.8.12 by vBS
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©