|
إهمال الدنيا وخوف الأخرة ولكن :(
السلام عليكم ورحمة الله وبركاته أخواني .. أخواتي بصراحه مدري وين أبدا بالظبط تعبت تعبت مره على حالي حاولت أعالج نفسي بنفسي ماقدرت أتعالج يوم وأرجع 10 أريام مشكلتي [ ماتهمني الدنيا أبد أبد أبد !! ] ليتني على كذا تهون المشكله إني مو ذاك الزود لأعمال الاخره تخيلوا لو بقرأ كتاب لأحد المشائخ المعروفيين ويكون هالكتاب عن أمور الدنيا لكنها مفيده ونافعه أقول يابنت الحلال تضيعين عمرك على كتاب أشغلي وقتك بالقران وليتني أقرأ قران ما أقرأ بس أتكلم <يعني أخسرهم كلهم مثلا عندكم الاهتمام بالنفس مجتمعي بشكل عام مهتم بنفسه مره مره مره وأنا تفس الشيء ولو يحصل لي ما أهتم بنفسي !!! أبغى بس أمسك سجاده وجلال وأصلي وأدعي وأذكر الله يعني كأني مغصوبه على الكشخه والاهتمام بالنفس والتثقف احس هالاشياء تضيع العمر وإذا فات الفوت ماينفع الصوت وش بقول لربي إذا سألني عن عمري فيما أفنيته ؟ اقول على أسواق وإجتماعات وكتب وإهتمام بنفسي ؟ دايم أقول ليتني على عصر الصحابيات او عصر جدي وجدتي العمر يروح على صلاة وعبادة دايم عمري أشوفه قدامي أحاسب نفسي على كل صغيرة وكبيرة لما أسوي اي ذنب أنقهههر وأقول ضاع عمري ليتني مستغفرة بدال ما أسوي هالذنب لما أروح للسوق أحس عمري يروح ودي تجيني الملابس كذا بدون ما أضيع وقتي تخيلوا وانا أتروش أقول يوووهـ ضاع عمري ماقدرت أستغفر بدورة المياة الله يكرمكم المشكله ليتني أسوووي هالأعمال على كل هالتفكير والتععب بسس أفككر وأتعب إذا أجتمعوا خوالي او عماني اقول يووهـ ضاع عمري على سواليف وضحك =( قهر ولو أجلس لوحدي أعرف روحي بجلس يا ع النت او التلفزيون أو أقرق مع أحد أو أفككر وأسوي للإخرة شيء بسيط والله اعلم ماهو عند الله بس ليه كذا أتعب نفسي بالتفكير مالا طاقه لي به هذا شيء الشيء الثاني فيني خوووووووووووووووووووووووووووووووووووف من يووم القيامه ماتصورونه احس القيامه بتصير بكرا دايم أفكر يالله إذا السماء أنشقت كيف بتحمل أشوف هالمنظر المرعب إذا البحار سجرت كيف بتحمل كيييف أتخيل شكل النار يالله طيب انا سويت ذنووب كثيره هذا وهذا وهذا خايفه خايفه مره وأحيان أقول لنفسي تخيلي زيت قلي يغلي ويرمونك الملائكه بأخر الزيت يالله مو ثانيه ولا ثانيتن سنييييييين وممكن قرون حسب ذنبي يالله أخاف مرررررررررره وأقول ليش الناس تركض وراء الدنيا ووراهم عذاب وإذا تذكرت الجنه ونعيمها أخاف ما أصير بالفردوس الاعلى وخلاص مقدر أرجع للدنيا مره ثانيه وأعمل عمل صالح علشان أكون بالفدروس الاعلى ومثل ماشفتوا الان الفتن خايفه الجيل اللي بعدي وش بيصير إذا جيلي هذا كله فتن الجيل اللي بعدي وش بيصير ؟!!! مدري كيف أنهي كلامي لكن والله تعبت ودي أستمتع بحياتي بأشياء حلال بدون ما أفكر بالعمر أحس عمري راح لاعلى هذا ولا على هذا والسبب الشيطان أحسه جالس لي جلسه ويخربط على رأسي علما بإني احس لما أعالج نفسي بنفسي بالكلام أخف شوي والحين الحمدلله خفيت عن اول بكثير بس باقي للحين اتعب وجزاكم الله خيرا |
حلوه يقضه الضمير الدائم الي فيك عاجبتني كثير بس يا حياتي عيشي حياتك بكل تفاصيلها بحلوها ومرها وخصصي وقت للعباده وطاعه الله تقدرين وانتي مثلا بسوق تتقضين ترددين الاستغفار والتسبيح او زي ما قلتي وانتي بجمعه مع بنات عمك وخالك تقدرين تستغفرين وتسبحين او تسمعون حديث او تتكلمون في امور الدين وانتي مثلا تنضفين البيت او تهتمين بنفسك وكشختك تقدرين ترددين الاستغفار وتذكرين الله يعني بي وقت العباده مالها وقت محدد الله يوفقك لما فيه الخير
|
عزيزتي.. حاولي تحطي في بالك انه في أعمال كثير نسويها وتكون عبادة.. يعني مثلا زياراتك لأهلك.. هادي صلة رحم.. ولما تقري كتب معناته قاعده تتعلمي وتثقي نفسك والعلم عبادة.. حتى النظافة عبادة لانه النظافه من الايمان.. عيشي حياتك وخصصي وقت للدعاء والقرآن.. قال رسول الله صلى الله عليه وسلم:إن لبدنك عليك حقا، وإن لأهلك عليك حقا، وإن لربك عليك حقا؛ فأعط لك ذي حق حقه". |
[B]
كلام دنيا الغموض و قلبي حنون صحيح 100%... وتذكري قول الله تعالى{وابتغ فيما آتاك الله الدار الآخرة ولا تنس نصيبك من الدنيا وأحسن كما أحسن الله إليك} اخـتـــي في الله: بإمكانك تستمتعي بحياتك وتكسبي اجر بنفس الوقت!!والمؤمن الذكي يدرك ذلك ..بمعنى اخر إذا اردتي ان تلبسي ملابس جديده تحمدي الله من قلبك وبكذا كسبتي اجر وبنفس الوقت لبستي جديد..او قبل ماتاكلي سمي الله تكسبي اجر وكلي بيمينك تكسبي اجر واقتديتي برسولنا صلى الله عليه وسلم وبرضوا انوي انك بتاكلي علشان تقوي جسمك وتتعبدي لله راح تكسبي اجر اكثر ..زوري قرايبك وارحامك ..بنية صلة الرحم ...بكذا كسبتي اجر واتمتعتي معاهم واخذتي نصيبك بالجلسه معاهم....وهكذا يعني بشطارتك وذكائك وصدق نيتك تقدر تكسبي اجر بكل شئ حتى الرياضه!! لو نويتي تعملي رياضه حطي بنيتك انك تعملي رياضه علشان تتقوي وتحافظي ع صحتك وتعبدي ربك ع اكمل وجه وانتي بصحه وعافيه..وراح تكسبي اجرررررر.... الدين يسر ..وحلو إن الإنسان يكون زاهد بس انتي طريقتك غلط واعرفي إن الشيطان يستغلك..حاولي تتعوذي من الشيطان وتعيشي حياتك بدينك واخلاقك وحسن نيتك...وليس بإهمالك لنفسك.. لاتنسي الإستغفار ..والدعـــاء ..اسأل الله ان يغفر لنا ولك ويسعدك في حياتك ويوفقك لما يحب ويرضى.. ولاتنسي ان تدعي بهذا الدعاء بكل وقت خصوصآ بعد الصلوات وقبل النوم {اللهم ارنا الحق حقا وارزقنا اتباعه وارنا الباطل باطلا وارزقنا اجتنابه}و{اللهم يامقلب القلوب والأبصار ثبت قلبي على دينك} |
حبيبتي ساعة وساعة
واظن انك تحتاجين الا علاج نفسي لان صحبتي كانت مثلك كان عندها خوف انها تموت وتقعد تفكر وتشيل هم فذهبت الى دكتور نفسي واعطاها علاج وهي الان متحسنة الحمد لله الله يسهاك ويوفقك |
اقتباس:
لكن تعرفين الاشياء هذي تلهي الواحد شوي .. واللي أسويه عارفه إنه حلاااااااال والاسلام أمرنا بصلة الرحم وبالترفيه عن النفس وبالاهتمام بالنفس لكن الشيطان يقول تضيعين عمرك مسكينه هههههه وانا ماسويت شششيء وأصلي وأدعي وأستغفر ....... وين تضيع العمر ؟ !!! الله يكون بالعون يارب |
اقتباس:
صحيح صدقتي أنا لو تشوفيني كل يوم أتروش خاصه مع الصيف وأهتم بنفسي مره لكن تقدرين تقولين أسوي الاشياء هذي بتعب يعني بدون نفس والنظافه اقول لنفسي النبي كان يأمرنا بالنظافه دائما دائما ويجيك الشيطان يقول ايه بس انتي نظافتك غير الرسول انتي زايده عن حدهـا !!! ع العموم اختي كلامك مره مره ريحني خاصه الحديث اللي ذكرتيه الله يجزاك الجنه يارب |
اقتباس:
صراحه مدري وش أقول لك يامروى كلامك مره مره ريحني كثيييييييير بإذن الله من اليوم راح أبدا أجاهد نفسي أكثر من اول وأتذكر كلامك انتي والاخوات وإن شاء الدعاء راح أقوله دايم دايم ربي يبارك فيك ويجعلك بالجنه |
اقتباس:
لالا علاج نفسي إلا هذي شوفي انا ما أخاف من الموت اخاف من عذاب جهنم وأغلب الاحيان يجيني هالشيء إذا بنام او إذا أبتقدم على فعل معصيه انا ودي أتعالج بكلامي الاول وكلامي الثاني [ خوف العذاب ] أبي أخاف لكن ما أبغى أحاسب نفسي لكل صغيرة وكبيرة وأقول لنفسي أشياء ربي ماحرمها يعني لما يجتمع خوف العذاب مع محاسبه النفس حتى على الاشياء الحلال إنها تضيع العمر تصبح كارثه / وانا ماوضح علي إني كذا لأن تعبي هذا بالقلب وما أحد يدري فيه جزاك الله خير اختي أنيسه |
ابنتي الكريمة المنصدمة
1- لقد خدرك إبليس من ثلاث زوايا الأولى بالتسويف والتمنى سوف أفعل وليتني أفعل ومن جهة النفس اللوامة لماذا لم أفعل ولماذا لم أفعل والعمر سنوات وأيام ودقائق وهي تمر مر السحاب ولا تعلمين كم بقي لك منها, والجهة الثالثة هي الخوف من يوم القيامة, ولاحظي لما خفتي من القيامة ماذا فعلتي من ذلك؟ لا شيء ولكنها مخدرلاات لك عن العمل الصالح والعيشه كعيشة ( واسمحي لي البهائم اكل وشرب ونوم بلا هدف وكلنا نسوف ونتمنى ولا نعمل) فالهدف هو رضا الله في الدنيا للاستمتاع به في الآخرة. 2- لن يقوم بعملك إلا أنت ولن يذهب رزقك لغيرك ولن يزيد رصيد أعمالك من الحسنات إلا أنتي فتوكلي على الله وجدّي في السؤال والعمل بما يجب عليك. 3- قد يكون لمشاعرك هذا مرجع نفسي في ذاكرتك كحادثة أو محادثة إحباط استمعتيها ممن تثقين فيهم جعلت الدنيا لا تهمك وتخافين القيامة فاسترجعي ذكرياتك عبر جلسات سحب عند معالج نفسي أو كتابتها اقصد أيام طفولتك في الحاسب لتعرفي سبب ذلك. أسأل الله العلي القدير أن يعينك والجميع على الخير وكسب رضاه. |
اقتباس:
اخي رجل الرجال حياتي ليست أكل وشرب ونوم , حياتي طبيعيه عايشه حياتي بملذاتها الحلال ولكن أستمتع بصعوبه بعد مجاهدة النفس طويلا ثم ألوم نفسي بعد فعل هذا الشيء بأن عمري ضاع على دنيـا ! ثانيا : صدقت وبإذن الله من اليوم سأعطي لكل ذي حقً حقه / الله ، ونفسي ، وأهلي ، وأقاربي بل سأسعى جاهدة لكسب الاخرة ثم الدنيا معاً دون خسر أحداهما ثالثا : انا كنت منذ طفولتي [ في عمر 5 سنوات تقريبا ] أحرص على الصلاة والصوم والصدقه وبر الوالدين والذكر ....... وأستمتع بحياتي أششد الاستمتاع وعايشه حياة جميلة جدا الحمدلله وحالتي هذه أتتني منذ شهر تقريبا حاولت أن أتذكر شيء وتذكرت أني نظرت مقطع يوتيوب لأحد المشائخ أن الحياة إما للأنسان وإما عليه ...... إلخ وهذا المقطع من زمان وانا أشوفه وكل ما أشوفه اتأثر وهالشيخ ينصح إن الواحد ينتبه لحياته ومايخسرها ويذكر بعظمة الله وانه سبحان الله يوجد في جسم الانسان مادة لو نقصت 1 % او زادت 1% توقف قلب الانسان فأي رحمه هذه يالله وزيادة المقطع سمعته وانا توني سامعه قصة صديقتي الغاليه مع أبوها الذي لم تراه منذ أكثر من 12 سنه !!! وهو حي بكيت لها وحزنت ثم رأيت المقطع وبعدها بدقائق أتاني خبر وفاة إنسان غالي وعزيز على قلبي فأظن أن هذا ما أثر بي والله أعلم جزاك الله الجنه اخي رجل الرجال |
اختي الكريمة وفقك الله
لا أعنيكي بما قلت شخصياً وإنما ذكرت بعده أننا كلنا نهمل ونندم ونسوف وأشكر لك تجاوبك بالبحث عما أشرت إليه وفيما ذكرتي فائدة وهي سيطرتك عليه بدل العكس وأنصحك بالدراسه في كلية خدمة المجتمع بجامعة الامام محمد بن سعود الاسلامية ففيها دبلومات للعلم الشرعي لغير الطلاب وقصدت من طلبي التذكر هو أيام الطفوله حيث تذهب الذكريات المؤلمة للعقل الباطن وتؤثر علينا من هناك ورغبت في استخراج ما قد ترين لنقله من العقل الباطن للعقل الظاهر. بارك الله فيك ونفعك ونفع بك ولعلك مأجورة على حسابك لنفسك. |
اقتباس:
أعلم أنك لاتقصدني شخصيا ولكن أردت توضيح الواقع اكثر واما عن الدراسه انا الان أدرس تحفيظ القران الكريم توني على الجامعه وحبيت اسألك اخ رجل الرجال بما إنك ماشاء الله تعرف للأمور هذي تتوقع الحادثه اللي ذكرتها سبب لحالي هذا خاصه وإني عندما فكرت تذكرت أن حالتي أتت بعد الحادثه ولكن لم أنتبه . أفتح هذا الرابط وأسمع أول آيه / http://www.tvquran.com/maher_2.htm أخاف منها مره =( وجزاك الله خيرا ونفع بك الاسلام والمسلمين |
ابنتي الكريمة المنصدمة هذه الآية لا تخص المسلمين بل تتحدث عن الكافرين بدليل آخرها, ولا تعتمدي على فهمك الأول لما تسمعي من القرآن الكريم فمن الواجب عند سماع آية الذهاب لكتب التفسير المعتمدة لمعرفة سبب نزولها ومعاني كلماتها ومقاصدها حتى تطمئن القلوب للقرآن على أساس شرعي, حيث استغل الشيطان فهمك الخاطئ بتيئيسك من رحمة الله, لذلك أنصحك بكتاب التفسير الميسر فهو بسيط ويوضح المعاني بسهولة ويسر. وما ذكرتيه صحيح حيث ركزتي على هذا الموضوع وعالجتيه بينك وبين نفسك دون تعلم الصحيح ممن هم أعلم منك, وعندما علمتي الآن الوضع فسهل التعامل مع الوضع وهو أنك لا تعتمدي على فهمك فالقرآن له سبعة علوم تخدمه لكي نعلمه. |
اقتباس:
التفسير انا الان أدرس التفسير وللحين مادرست إلا ثلاث أجزاء ونص تقريبا .. الايه اللي يخوفني فيها إذا قال الشيخ أقترب للناس حسابهم وهم في غفلة معرضون ..... إلى الثلاث الايات الاولى تدري وش يجي على بالي ؟ ! وهو يقولها أتذكر (الملاهي) أتذكر اللحضات اللي ضحكت فيها ، الايه الرابعه أقول هذي ماتكلمني أنتي اهم ماعليك الايات الاولى يعني صدق الشيطان لاعب فيني لعب انا ماكنت كذا ، الله يكون بالعوون والله تعبت وقررت أعالج نفسي عند الله ! بإذن الله الواحد الاحد بخصص ساعه كامله أكلم فيها الله بسجودي بتكلم واقول وش أبغى وش ما أبغى ويارب يارب مايصير بعد أسبوع إلا وأنا بأحسن حال دعواتك اخ رجل الرجال وكل الاخوان والاخوات |
السلام عليكم ورحمة الله وبركاته أخواني .. أخواتي لا أدري ما ذا أقول وبأي لغه أتكلم ! فحروفي تبعثرت وروحي صامدة متعجبه مما حصل لا أقول إلا سبحان الله سبحان الله سبحان الله القادر العالم سبحانه وتعالى لا أدري هل أستجاب الله دعائي أم دعاء أحد منكم ام كلاهما .. سبحانه وتعالى تمنيت أن أشفى بأسبوع ولكني شفيت بساعه !! بل بدقيقة عانيت شهر كاملا وشفيت بلمح البصر دعيت الله بقلب صـــادق بأن يذهب الشيطان عني ويجعلني أعيش حياتي مستمتعه مطيعه مرضيه لله فلم أقم من سجودي إلا وقد تغيرت نظرة الحياة إلا نظرة آخرى .. الحمدلله وبارك الله في كل من ساعدني ودعاء لي وجمعني الله وإياكم في جنات الفردوس الاعلى أختكم : المنصدمة |
ابنتي الكريمة المنصدمة نشكر الله ونحمده جميعاً ونبارك لك هذه الفرحة ونفرح لفرحك وللجميع وهذا الدعاء منك هو أكبر مما نفعل ونسأل الله أن ينير قلبك وقلوب الجميع ويثبتهم على الحق.. وتذكري قلتي في آخر ردك الذي قبل الأخير هذه العبارة ((((ويارب يارب مايصير بعد أسبوع إلا وأنا بأحسن حال دعواتك اخ رجل الرجال وكل الاخوان والاخوات)))))) قال تعالى (ادعوني أستجب لكم) الآية ولك وللإخوة والأخوات بمثل دعائك. |
| الساعة الآن 11:41 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©