|
مشكلتي مع زوجتي مازالت مستمره(المستجدات بالرد 30)
السلام عليكم ورحمة الله
كيف حالكم اخواني واخواتي مدري إذا تتذكرون مشكلتي او لا :d زوجتي العزيزة مازالت تماطل في الرجعه كل اسبوع خليه ياأحمد الأسبوع الجاي كل يوم تكفى ياأحمد بكره ثم بعد بكره:( آخر شئ قالت بكون مشغوله مع أختي تجهز لملكتها وبنفس يوم الملكه أرجع معك وقبل امس ملكة أختها واخوي الله يوفقهم هاه يافلانه مشينا للبيت لاأحمد انا عندي انفلونزا:23: ماتحسون اني عطيتها وجه كلمت عمها صديقي العزيز وأمس اتصلت قالت تعال بروح معك قلت إذا بيوم فضيت بمر عليك أدق تطلعين اكون واقف عند الباب ولامريت عليها انا اللي مزعجني في الموضوع ان وااضح ماتبي ترجع وجالسه تجبر نفسها سألتها مافيه اجابه وكل ماأكلمها أشعر برحمه اتجاهها ولاابي اجبرها أواعاتبها أوأزعلها عشان كذا مستسلم لأعذارها لكن إلى متى!! انا انسان تعبان وابي ارتاح وهذا الشئ مضايقني جدا وهي رافضه الطلاق ورافضه ترجع مثل الناس أنا متأكد لوبدق عليها بتجيب عذر وعلى فكره هي مستمره على الرقيه لكن إلى متى!!! وأنا برضو الفتره الماضيه حافظت على الرقيه تعبت في البدايه والآن الحمدلله كل شئ تمام لكن الهموم اتعبتني والتفكير أتعبني تصدقون بالله أني مواصل مانمت من البارح وشغلي اهملته لا حول ولاقوة إلا بالله |
سبحان الله
البارح كنت افكر في موضوعك قلت ايش صار عليه وفتحت الصفحه العاشره وكان موضوعك فيها قريت كم رد وجاني النوم وسكرت الجهاز بدون ما اكمل الله يجمعكم ويحببكم في بعض اكثر واكثر |
طيب جرب انك تقولها انا عند الباب انتظرك ..
يعني لا تعطيها فرصه تسووف لك .. الله ييسر امرك يارب .. |
أهلاً بأخي أحمد...
هل تصدقني لو قلت لك أنك مررت ببالي قبل يومين، وقلت لماذا غاب هذا الرجل؟ ::: -أرى لك أن تعطيها موعداً محدداً للخروج بمعنى اتصل عليها وقل لها: كوني جاهزة..سأحضر لأخذك الساعة (00:00) حدد أنت الوقت..إن قالت: أجّل ذلك أو أي عذر آخر..قل لها: أنا أحتاجك..إن وافقت وخرجت معك فالحمد لله..إن لم تخرج قل لها فيما بعد: أنا بانتظارك في البيت اليوم (حدد أنت اليوم).. أو -اتصل عليها الليلة أو غداً..قل لها: أنا بانتظارك عند باب بيتكم..استعجلي يا حبيبتي بالخروج..كن ذكياُ ولا تجعل مجالاً للأعذار...إذا قالت لك: اذهب وارجع فيما بعد..قل لها: لا أستطيع. أنا أريدك. وربما لو ذهبت لن أرجع (قل هذه الجملة مع خلطها بمزح وجد). |
ياخي وربي حتى انا تمر على بالي كثير
الله يوفقك ويفرج همك وان شاء الله تضبط امورك باسرع وقت :) |
والله امس مريت في بالي وحتى تمنيت ان زوجتك تكتب الموضوع
مثل ماقالوا لك الاخ الفاضل البليغ والاخت العزيزه لاتظلمونه لاتعطيها فرصة للاعذار والحل الامثل الحل الثاني للاخ البليغ الله يسر امرك ويسخرها ويهديها ويردكم لبعض ردا جميلا |
انا قرأت موضوعك من قبل يا أخي موضوع الرقيه مرات يطول وإحتمال يدوم شهور أقول احتمال ورجوعها لك في هذه الحاله لن يفيدك وربما يزيد الفجوه بينكما لذى أصبر حتى تتعافى نهائيا وأقولك كمان حاول تقلل مكالماتك لها حتى تشتاق اليك ربما صعب لكن حاول واذا قامت هي بالاتصال لا تفتح موضوع الرجعه حتى تحدثك عنه وان شاء الله يجمع بينكم يارب |
:: أخي أحمد حل موضوعك في كلمتين (ألو أنا عند الباب أطلعي ) قليل من الحزم والشدة مطلب :: |
والله خايفة ترجعها وترجع مشاكلكم لازم تستمر على الرقية ياأخ أحمد كل يوووم
لأني أتوقع ان العين عليك أنت يعني جايتكم عين قويه او سحر.. أرجوك لاتهمل الرقيه يوميا قبل سبع سنوات حصل لوحده من قريباتي ما حصل لزوجتك (كرهت زوجها في بداية الزواج ونفرت منه) وطالبت بالطلاق لأنها تشعر معه بالأختناق وبعد أن حصلت على الطلاق كلمتها إمرأه مجهوله وقالت أنا عملت لكم سحر تفريق لأني أحب زوجك وكنت اتمنى ان يتزوجني <<< هكذا بكل بساااااطه طبعا بعد الطلاق لم ينفع الندم لأن حياتهم كانت هموم ومشاكل من أول يوم زواج بالرغم من طيبتهم واخلاقهم العالية. |
لم ننساك وقلوبنا معكم وكنا نتمنى يدخل احدكم ليخبرنا برجوعكم معا واستقراركم
ولكن الحمدلله على كل حاال واصلوا على الرقية وعلى الاذكار والورد اليومي وحدد يوم معين في رسالة واذهب اليها وقل اخرجي انا عند الباب يعني خلك حازم معها |
عموما لا اعلم ماهي القصة بالتفصيل ولكن أخي اذا ظروفك حلوة وعندك فلوس تزوج .. او قل سوف اتزوج يعني طنشها وقل لعمها ابتزوج وتشوووف اذا ما اتصلت عليك بيدها ورجولها هذه نصيحة من اخ لك .. ولا تنسى تدعي لي .. :d |
والله العظيم كل مااتصفح أقول إن شاء الله يكتب لنا أيش صار معاه من جد دايم تمر على بالي وأقعد أفكر ياترى رجعت ولا لاء وكيف اوضاعهم قلت دامه قطع شكل الحرمه رجعت لاكن الله يكون بعونك أدعي لنفسك وأدعيلها وأرقي نفسك وأرقيها حتى لوبعيده عنك
|
اقتباس:
لا تسعجل النتائج |
أدري ردي ما بيعجب الكثير هنا ، فقط لإنها ( عضوة معنا )..
و قرينا مشكلتها من قبل مشكلة الأخ أحمــــد .. على عكس لو إنه طرح الموضوع كأي عضو أو زائر اخر .. المهم .. زوجة الأخ أحمـــــد ، طلاق و طلقها زوجها ثم رجعها له .. و المرة الأولى يوم راحت لأهلها تطلب الطلاق ، زوجها خطب بنت عمه ثم تراجع لإنه ندم .. يعني زوجته لازم تكون عارفة إنه جلوسها عند أهلها ( مو في صالحها و لا في صالح زوجها ) وحكاية إنها لسى ما تعودت عليه وووو إلخ خلاص ، خليتوا منها حكاية ألف ليلة و ليلة .. هي ماحد ضربها على يدها و غصبها تتزوجه خلال شهرين .. مع العلم بإنه أختي انعقد قرانها و تزوجت مباشرة بعد شهر و نص و فترة اختبارات نهائية .. يعني ما مداها تتعود عليه ، و أختي خجولة جدااااااااااااااااااااااا و زوج أختي ما بيعمل كل اللي بيعمله الأخ أحمـــد و مع كذا أختي حبته لحسن تعامله و تخدمه و تحسن إليه مع إنها قبل زواجها ، تقول مستحيل أحب واحد غريب عني و ما تعودت عليه ... إلخ و شخصيتها أصعب من شخصية زوجة أحمد .. . . طيب حكاية الرقية الشرعية ..؟؟؟ يعني لمتى يستنى الأخ ؟؟؟ إذا كل وحدة بعدت عن زوجها و قالت بأتعالج برقية شرعية و إلخ ؟؟؟ و زوجها ليه تزوج و صرف فلوس و كلف حاله ؟ مو عشان يحصن نفسه ؟؟؟ . . و لو إني رجل و في مكان الأخ أحمــــد .. يا إنها ترجع لك البيت و تعاملك كمعاملة الزوجة لزوجها .. أو إنها تتركك تتزوج اللي شاريتك و أهلها شارينك .. أما الجلوس بالوضع هذا ؟؟؟ و كل واحد مننا يعطيه اقتراح و حل ( غيّر من نفسك ، و خليك ثقيل .... إلخ ) عشان زوجتك تحبك ؟؟؟ معليييييه من جدددد .. زودناها .. الرجال دمه خفيف ، مو عقله خفيف ؟؟؟ فيه فرق شاسع ما بينهم .. الرجال عاش يتيم و ما يبغى يعيش بقية حياته ( نكد في نكد) .. . . و لا أحد يقول إني ما أحس بها .. لإني أول ما تزوجت ، ما حبيت زوجي و كنت أحمل نفس مشاعرها بالضبط تجاهه .. لكن ما عملت اللي هي عملته ، و كنت برضو مثلها و أكثر في العبادات و قيام الليل و المبادئ ووووو إلخ و زوجي العكس تماما ، مع إنه يوم خطبني .. قلت له أنا كذا ، و أبغى شخص زي كذا و كذب علي و أوهمني إنه هذه هي شخصيته و صدقته فيعني غير إني ما كنت أحمل له أي مشاعر ، و إضافة لها .. إني كنت أشوفه ضحك علي ؟؟؟ فإيش راح تكون مشاعري وقتها ؟؟؟ و مع كذا ..؟؟؟ بحثت و قريت و حاولت و غيره بس عشان أبين إنه وضعي ( كان ) مشابه لوضعها و يمكن أسوأ .. يعني حاسة بها .. . . و في الأخير .. يوم يخرج الرجل عن طوره ، كلنا نجلس نلومه وو إنت متسرع ووو إلخ ؟؟؟ طيب و هي ؟؟؟ نحط لهاا عذر ( تحتاج رقية ) ؟؟؟ و اللي يحتاج لرقية شرعية ؟ عقله بيطير ؟؟؟ مو عرفت تأدي حقوق أهلها ؟؟؟ فحقوق زوجها أولى برأيي .. و اللي عنده وجهة نظر مخالفة ، يعرضها بـ ( أسلوب محترم رجاءً ) |
اقتباس:
انتِ واختج قدرتوا تتكيفون في الحياة الجديدة وهذا فضل من الله والحمدلله لاتقارنين بينكم وبينها..زوجـــة أحمد تحتاج وقت ومداراة أكثر علشان تتعود واهم شي تحتاج للأمــــان علشان تقدر تتكيف معاه بالتدريج..من داخلها فاقدة الشعور بالإطمئنان والسكينة..والزوجة اللي تبتلى بهالإحساس تحتاج حق وقت وصبر أكثر اخوي احمد احرص انت وزوجتك على ختم سورة البقرة..على الأقل كل اسبوع ولما ترجع ان شاء الله..سافر انت وياها السفر مفيـــد جدا لكم..هي ساعتها بتكون بعيدة عن اهلها وماراح تشوف إلا انت اتوقع مشكلة زوجتك التعلق المرضي بالأهل..وصعوبة التكيف بالحياة الجديدة ترى مشكلتك مو صعبة..كل اللي تحتاجونه وقت طويل مع بعض علشان تتعرفون على بعض اكثر قلل من المقالب اللي تسويها لها..والأحسن لاتسويها زوجتك شخصيتها جادة مع اللي مو ماخذه عليهم..سولف معاها كثير وناقشها بالسياسة والاقتصاد وغيره صدقني كل اللي تحتاجه زوجتك وقت علشان تتعود عليك وتعرفك أكثر الله يسهل عليكم..ويحفظكم |
أهلا بك أخي أحمد بين أهلك واخوانك .. وفعلا كنت وزوجتك بالبال ونحب أننا نتطمن عليكم .. وان شاء الله بتجي بيوم تبشرنا بأخبار طيبة عنكم ... مو وقتها تنسانا :)
عندي سؤال أخ أحمد ... أتذكر انك قلت بأنك راجعت مختص عن مشكلتكم فهل تابعت معاه وكيف انتهى الأمر معاه ؟؟ يمكن نقدر نستفيد من ملاحظة أو تعليق له . ربي يوفقكم ويآلف بين قلوبكم |
الله يوفقكم
|
وفقكم الله لكل خير وجمع شملكما عاجلا غير اجل .
|
من جد كنت انتظر حل !
بصراحه عطيتها وقت كفايه خليك جاد اكثر معها عشان تتخذ قرار بجديه اكثر ربي يجمعكم ويوفقكم |
>>>>اخوك +اختها ؟؟؟؟ <<<<< صح اللي فهمته ؟
اولا: مبرووك لاخوك والله يجعل حظه احسن من حظك .....بارك الله لهما وبارك عليهما وجمع بينهما في خير . وثاني شي الامر لك ..لا تفكر في انها تجبر نفسها على الذهاب معك ... لان هذا ما يجب ان يحصل... دعها تجبر نفسها ولا تفكر لان ذلك في مصلحتها .. ومن المفروض ان تحاول هي الله يهديها اصلاح ما تبعثر في الايام السابقه ... ومثل ما نصحك الاخوة قليل من الحزم وعدم ترك مجال للتسويف وعدم قبول العذار . اخي لماذا خطابك دائما مع عمها .. اعرق انه صديقك لكن في مثل هذه المواقف يتطلب ان تكلم والدها مباشره والله ييسر لكم الخير حيث كان . بس فيه تساؤل في بالي يعني اخوك واختها ؟؟؟؟ ما تشوف ان الوضع قد يتوتر او تؤثر علاقات بعضكم على الاخر ؟؟؟ |
بس المفروض ترجع لبيتها ..هي مااعطت نفسها فرصه على التعود على حياتها الجديده..
ماادري اذا تقدر تغير البيت افضلكم..خذ رايها في تغيير البيت |
اقتباس:
يعني لازم فترة الملكه تطول سنتين عشان تتعود عليه اغلبنا تزوج في فترة ملكه بسيطه والحمدلله الامور تمام ..يعني المفروض الواحد يغصب نفسه الى مايعودها على الجو الجديد مو يجري ورا رغباته .. وامهاتنا وجداتنا ماشافوا ازواجهم الا في الدخله..واعرف كثير خطبه وملكه وزواج في شهرين..وماشاء خلفوا ومبسوطين واضح عليهم الاستقرار والراحه الصعوبه في التاقلم مع الحياه الجديده والبيت..بس برضه مايبيلها وقت طويل عشان تتعود على حياتها الجديد..على حسب تعلق البنت في اهلها..ومثل ماقلت هي مااعطت نفسها فرصه وطاوعت نفسهاو رغبتها..يعني لوتغصب نفسها..تجي عندك وتستمرون على الرقيه افضل لكم.. وموضوع الرقيه يااخ احمد استمر عليه..انا متاكده البلا فيك انت مو فيها.. |
الصراحة هي من فرطت فيك وارتباطها بأهلها الشديد
تحتاج هي قرصت اذن وانت عهليك بالرقية مرة اخرى |
أحترم رأيك يا روح ... انت عارفه :)
لكن ما أحب الاراء اللي تحرض أحد الشريكين على الانفصال لانه لما يوصل لمرحلة معينة راح ينفصل حتى لو حاولنا نقنعه بالعكس .. فأحب أترك هذا الخيار لصاحب المشكلة بدون ما يكون لي فيه أي تأثير .. وكمان لانه أحيانا يغفل عن ذكر بعض التفاصيل وهذه التفاصيل هي سبب صبره للحين ولاننا ما نعرفها نستعجل ونستغرب سبب عدم الانفصال للان . تذكري انه دائما لابد وأن هناك نقطة أو نقاط لم يذكرها صاحب المشكلة من يقول بأنها لم تجبر نفسها ولم تحاول فأذكره بأنها كتمت ولم تقول شيء لزوجها عن سبب ضيقها بل أجبرت نفسها على البقاء ومحاولة التقبل لدرجة أن نحل جسمها بشهادة زوجها ولدرجة انها وصلت المستشفى .. وما أظن انها كانت تمثل المرض وبرضه بشهادة زوجها ... يعني ما في أحد يقدر يقول انها ما حاولت تتأقلم وانها من النوع كثير الشكوى . رجاءا راعوا نفسية الأخ أحمد تجاه زوجته ولا تزيدوا الطين بله. كان ممكن تكون مثل الكثيرات ممن تزوجن دون سابق معرفة ومثل أمهاتنا ممن لم تر زوجها الا ليلة الدخلة ومرت بمرحلة صعبة ببداية حياتها وهي تحاول التأقلم ثم مشت الامور عادية ... لكن استعجالها واستعجاله في الوصول لحالة وفاق وحب وعدم تقبلهم لوجود المرحلة الانتقالية هذه وبأنها مرحلة وتمر ربما زاد من المشكلة وسلط عليها أنظارهم . وما زلت عند رأيي بأن للرقية دورها بدليل انه الأخ أحمد يقول بأنه تعب ببداية الرقية . مع الرأي بأنهم مفروض يجتمعوا ببيتهم ووقتها بتتعود على بيتها الجديد لكن مو مع من يلومها لاني أشوفها بذلت جهدها مثل الأخ أحمد تماما . وان شاء الله بمجهودهم الاثنين يوصلوا لحياة سعيدة باذن الله . |
لا أعلم هل اهانة النفس لأجل ارجاع الزوجة مطلوب .. يا أخي احتفظ بما بقي من كرامتك , ما في شي بالقوه ..
|
اولا لاكرامه بين الزوجين :)
ثانيا اخي جرب ان تفعل كما قال الاعضاء اطلب منها ان تاتي معك في الوقت المحدد ملاحضه انا بطبعي اذا خفت من شي اتهرب منه حتى لو كنت عارفه انو بهالطريقه الي جالسه اتهرب منها راح يزيد علي هالامر ويتعقد اكثثر واكثثر <<<<يمكن زوجتك مثلي بهالنقطه متخوفه من لقائك ومن الوضع ككل وتتهرب |
لا حول ولا قوة الا بالله
عليك بالدعاء وصلاة الاستخارة |
طمنا يااحمد عليكم
ان شاءالله يارب ان رديتوا حق بعض الله يسخركم لبعض ويردكم ردا جميلا ويسعدكم ويرزقكم الذريه الصالحه |
طمينا عليك وعلى اخبارك فنحن قلقون عليك ونتمنى لك الخير والسعادة وجمع شملكم
|
السلام عليكم ورحمة الله وبركاته
آسف تأخرت عليكم كثير اخي البليغ وبقية الأخوه والاخوات جزاكم الله خير اخي البليغ أغيب من التعب النفسي الذي أعيش فيه أصبحت مثل زوجتي أتقوقع على نفسي مريت عليها واتصلت فيها أمرتها بالخروج وعادت معي ذهبنا لشقة مفروشه لأني كرهت بيتي ولاأطيق العيش فيه والآن أبحث عن بيت آخر بقيت معي 3 ايام تقضيها بالصمت وآخر الليل بالبكاء تجبر نفسها وتجامل على كل شئ حتى على الأكل اشوف ان هذي الإنسانه تمرض عندي كأنها في سجن أو هم اللي يسألني عن أبوها ليش ماأتكلم معه أبوها ملاحظ عليه عصبي معهم ولاعاد دخلته بالموضوع لأني مابيه يعصب عليها وتزيد الضغوطات في نفسها وامها الله يسامحها ماني شايف اي تجاوب أومساعده لوبينها وبين البنت كأن هالبنت عايشه لحالها بعد 3 ايام قلت لها يابنت الناس انا مرضت من التوتر اللي عايشين فيه ومرضت يوم اشوفك تعبانه عندي صابني قلق ماعاد أنام وسألتها وتكلمت وقلت وقلت ماااااااافيه أي جواااااااااب فقط بكاء وديتها لأهلها ورحت لمكه 3 ايام خلالها أتصلت فيني مره وتقول أنا متضايقه وتبكي سألتها وش علتك عشان أساعدك وش اللي مضايقك مافيه اجابه قلت لها أنا ماأعلم الغيب ولاأدري وش في نفسك واللي تبينه آمريني تبين أطلقك بطلق تبين ترجعين برجع الآن لرياض تبين نسافر مع بعض تغيرين جو ماااافيه اجابه وبعدها ماعاد صار فيه أي تواصل بيننا رجعت لرياض جلست في فندق لأني أحاول أنسى كل شئ والطلاق يمر في بالي كثير ومرات أقول لا مابي أطلقها اشعر بتعب نفسي شديد انا بداخل دوامه من الهموم والأفكار أريد أن أنهي مشكلتي أريد أن أنهي ماانا فيه أسأل نفسي كثير لوطلقتها هل برتاح؟بخرج من الحزن اللي انا فيه؟بنساها ولاكأنها بيوم دخلت حياتي سكنت قلبي وذهبت بلاعوده؟ لا لا لا أعيش على أمل إصلاح الحال؟أو الفراق؟ ياليتني ماعرفتها وليتها رفضت الزواج لكن ليت ماتجدي نفعا" بحر العطاء لاعادي مافيه أي تأثير وأنا أخبرت أخوي بأن وضعي غير مستقر مع زوجتي وأخت زوجتي أكيد شايفه الوضع وأهلها أكيد حاطين الإحتمالات لكن الحمدلله مافيه مشكله وأن شاءالله حظ أخوي ووضعه يكون أفضل مني |
ياأحمــد اللي فيك انت وزوجتك عين تمشي مليون أنتم محسودين وسلامتك وياليت تقدر وضعها وتساعدها بدل من انك تجي تشتكي هنا اذا تبغى حياتك ترجع طبيعية فيه مشايخ يجون للبيت خله يقراء عليك أنت وزوجتك وماراح تندم باذن الله |
ياأخوي وينك دايم تجي فبالي الله يعلم بالحال مو بس انت اللي بدوامه لاكن نخاف نخطي بقرار ونندم عليه ولو صبرنا أكثر يمكن النفسيات تتأزم والوقت ينقضي والعمر على الفاضي ماأقول غير الله يكتب لك الخيره ويقر عينك بحياه هانئه
آه ياراحه البال من يبيع وأشتري |
الله يجزاكم خير ويصلح حالي وحالكم
أخي ابوشذى لها أكثر من شهر كل يوم تروح لشيخ وأنا شهر كامل يجي عندي شيخ في البيت لكن الوضع ماتغير وكلت أمري لله |
اسال الله الحي القيوم الواحد الاحد الفرد الصمد الذي لم يلد ولم يولد ان يفرج همك وينفس كربك ويردلك زوجتك ويالف بين قلوبكم ويبعد عنكم عيون شياطين الانس والجن ,,نصيحة اخوي الكريم عليك بالدعاء في الثلث الاخير من اليل وبين الاذان والاقامة والزم الاستغفار فمن لزمة جعل الله لة من كل هما فرجا ومن كل ضيقا مخرجا واكثر من لاحول ولاقوة الا بالله ,واسال الله لك الفرج القريب فهو القادر سبحانة..
|
يا ناس
لا تعطون الحريم وجه زيادة !! و الله كل ما حست إنك تبيها و حالك واقف عليها يتزيد كل هذا دلع و كلام فاضي و ربي العمر مو لعب عشان يضيع بهالمهاترات يا زوجة ترجع و ينصلح حالها و إلا طلق و دور على سعادتك بلا تضييع وقت بنات آخر زمن و الله لو تحس إنك زهدت فيها لترجع لك و هي ما تشوف الدرب اتصل قلها عافك الخاطر و ورقتك بتوصلك و شف إذا ما جاتك تركض ما أبي أحلف لكن كل الي يسوونه هي و من هم على شاكلتها هروب من المسؤولية و بس و لا تقول لي عين إلي بوه عين يتعالج و منت مسؤول ياخي عنها إنت تقدمت بتستقر و تسعد نفسك و الله كلمة مطلق على الرجال مهي سهلة خلك حازم حب نفسك و دور مصلحتها و سعادتها و الله يوفقك |
اقتباس:
يعني مو كل وحده خرجت من بيت زوجها معناه فيها عين...ولا محسودين..لاهي اول ولاآخر وحده تتزوج.. اذا منت حاس بشي وهي ماهي حاسه بشي بعد الرقيه خصوصا انكم شهر ترقون معناه مافيكم الا العافيه..في البدايه قلنا يمكن حسد بس الحين جبتوا شيوخ ومابان شي لو فيه شي كان تعبتوا وماتنامون من التعب.. اتصل عليها وفهمها انك صبرت الا مافيه الكفايه وخيرها ياترجع ياتروح في حال سبيلها وعطها مهله يوم تجهزنفسها وترجع... لانك واحد تبي تستقر وتبي عيال مثلك مثل غيرك مو تضيع عمرك تراكض وراها هي واهلها..الي معطينها وجه وعاجبهم وضع بنتهم ولاهم قادرين يحكمونها.. فكر بعقلك لابقلبك... |
أخي الكريم/ أحمد
أسأل الله أن يصلح بالك وحياتك عاجلاً غير آجل. أود أن أقترح عليك أمراً خاصاً جداً لكن أرجو منك مراسلة الإدارة بهذا الشأن. وعن طريقها سيتم الرد. |
الله يعينك حاول تصر عليها وربي يفتح لكم الالفه والحياه سعيده زي ماقلوا لك الاعضاء
لاتررد وطمني وش صار معك |
اقتباس:
كلام في قمة العقل كل ماصارعدم قبول او ود بين الزوجين قالوا عين كل ماصارت مشكله بسيطه قالوا نفس ياناس كلن يؤمن بالعين والحسد والنفس لاكن مش كل صغيره وكبيره دخلنا هذي السوالف والله لو انها شااايفته اسد قدامها كان تاقلمت عليه والبناات الحين اكثر فكر عن اووول يشلونها بعبااتها ويقطونها بيت رجلها ماتدري وش الطبخه الحين الزوجه صارت اجرى من الزوج في امور الزوااج النت والتكنولوجيا فتحت عقووول النااااس الى متى يصبر والخطاااء منك انت صاااير خفيف عطها كلمتين وويووم محدد ترجع بيتها وتقووم بواجبااتها لفت ودارت رووح شووف حياااتك انا ماحدك لاكن هذا النوع من النساااء اذا سكت زقت فوووق رااسك وانت بكراامه عسااك جاايب بنت من الرووضه تربيها |
| الساعة الآن 08:28 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©